အခန်း ၁၉၃၄

အပိုင်း ( 1934 ) ဧကရာဇ်တစ်ပိုင်းအဆင့် ကျွမ်းကျင်သူကို သတ်ခြင်း။

လုမင်၏ ကစဉ့်ကလျား ကပ်ဘေးလက်ချောင်းက ရွေကျီးကန်းမျိုးနွယ်ဝင်ကို ပြင်းထန်စွာ ထိုးနှက်ခဲ့သည်။ သူ၏ ကြီးမားသောခန္ဓာကိုယ်က ကျွန်းပေါ်တွင် မီတာထောင်ပေါင်းများစွာကျယ်သော တွင်းကြီးတစ်ခုကို ဖြစ်ပေါ်လာစေခဲ့၏။

"ဝှစ်"

နောက်အခိုက်အတန့်တွင် ရွှေကျီးကန်းက ‌ပျံတက်လာပြီး အဝေးသို့ အသည်းအသန် ပျံသွားသည်။

ဤအခိုက်အတန့်တွင် သူ လုံးဝ ကြောက်ရွံ့နေပြီ။ သူက လုမင်ကို လုံးဝ မယှဉ်ကြောင်း သဘောပေါက်သွားသည်။

ဤတိုက်ခိုက်မှုသည် နိယာမမြစ်ကို တိုက်ရိုက် ထိုးဖောက်ဝင်ရောက်ခဲ့ပြီး သူ့ကို ပြင်းထန်စွာ ဒဏ်ရာရသွားစေခဲ့ပေသည်။

"ဧကရာဇ်တစ်ပိုင်းအဆင့် ကျွမ်းကျင်သူတစ်ဦးရဲ့ ရှင်သန်နိုင်စွမ်းက တကယ်ကို သန်မာတာပဲ။ ဒါပေမဲ့ ‌ဒီနေ့မှာ မင်းသေရမယ်"

လုမင်က အေးစက်စွာ ပြောလိုက်သည်။ သူက လျှပ်စီးလက်သကဲ့သို့ ရွှေကျီးကန်းနောက်ကို ပြေးလိုက်သွား၏။

လုမင်၏ ကျင့်ကြံမှုက အန္တိမသူတော်စင်နယ်ပယ် အဆင့်မြင့်အဆင့်သို့ ရောက်ရှိနေပြီ။ သူ၏ ကစဉ့်ကလျားကပ်ဘေးလက်ချောင်းကို ထိန်းချုပ်နိုင်စွမ်းက မြင့်မားလာပြီး သူ၏တိုက်ခိုက်နိုင်စွမ်းကလည်း ပိုအားကောင်းလာခဲ့သည်။

မူလက သူ၏ တိုက်ခိုက်နိုင်စွမ်းဖြင့် ဧကရာဇ်တစ်ပိုင်းကို အလွယ်တကူ သတ်ပစ်နိုင်သည်ဟု ထင်ခဲ့ပေသည်။ ယခုတော့ ဤမျှလွယ်ကူပုံမရပေ။

ဧကရာဇ်တစ်ပိုင်းအဆင့် ကျွမ်းကျင်သူ၏ အင်အားက သူထင်တာထက် ပိုသန်မာသည်။

သို့သော်... အနည်းငယ်သာ ပို၍ အားထုတ်ရလိမ့်မည်။

လုမင်၏အရှိန်က အံ့မခန်းပင်။ သူက ရွှေကျီးကန်းထံသို့ အလျင်အမြန် ချဉ်းကပ်ခဲ့၏။

"ကစဉ့်ကလျား ကပ်ဘေးလက်ချောင်း"

လုမင်က ရွှေကျီးကန်းနှင့် နီးစပ်လာသောအခါ ကစဉ့်ကလျား ကပ်ဘေးလက်ချောင်းကို ထပ်မံအသုံးပြုခဲ့သည်။

ကြီးမားသော ကစဉ့်ကလျား ကပ်ဘေးလက်ချောင်းက နတ်ဘုရား၏ လက်ညှိုးကဲ့သို့ ကောင်းကင်မှ ဖိချလိုက်တယ်။ မြင်ကွင်းက အလွန်တုန်လှုပ်ချောက်ချားစရာကောင်း၏။

ဧရာမ လက်ချောင်းကြီးအောက်တွင် ရွှေကျီးကန်းက ယင်ကောင်လေး‌တစ်ကောင်နှင့် တူသည်။ သူက ကစဉ့်ကလျား ကပ်ဘေးလက်ချောင်းအောက်တွင် ပုန်းစရာ နေရာမရှိပေ။

အစွမ်းကုန် အသုံးပြုပြီး ခုခံရန်သာ တတ်နိုင်သည်။ ဧရာမလက်ချောင်းကြီး ကျဆင်းလာသောအခါ သူက အော်ဟစ်ပြီး ကျွန်းပေါ်သို့ တစ်ဖန် ပစ်ချခံခဲ့ရသည်။ ကောင်းကင်တွင် ရွှေကျီးကန်းအမွေးများ ပြည့်သွား၏။

ဤတစ်ကြိမ်တွင်၊ လုမင်က ရွှေကျီးကန်းကို လွတ်မြောက်ခွင့်မပေးတော့ပေ။ သူက ရွှေကျီးကန်း၏အထက်တွင် ချက်ချင်း ပေါ်လာသည်။ သူ့လက်ထဲတွင် သူတော်စင်လက်နက် လှံတစ်ခု ပေါ်လာ၏။ သူက ရွှေကျီးကန်းကို လှံနှင့် ထိုးချလိုက်တော့သည်။

ရွှေကျီးကန်းက သွေးရူးသွေးတန်းဖြင့် ရုန်းကန်လိုက်သည်။ သူ့ရင်ထဲတွင် ဒေါသနှင့် လက်မခံလိုစိတ်တို့ ပြည့်နေသော်လည်း ရလဒ်ကို ဆုံးဖြတ်ခဲ့ပြီးပြီ။

"ရွှပ်"

လှံရှည်က ရွှေကျီးကန်း၏ ဦးခေါင်းကို ထိုးဖောက်သွားပြီး သူ၏ဝိညာဉ်ကို ဖျက်ဆီးပစ်လိုက်သည်။

ဧကရာဇ်တစ်ပိုင်းအဆင့် အကျော်အမော်တစ်ဦးကို လုမင်က သတ်ပစ်လိုက်ပြီ။

လူတိုင်း၏ မျက်လုံးများက အလွန်လေးနက်သွားကြသည်။ ငယ်ငယ်ရွယ်ရွယ်ဖြင့် ဧကရာဇ်တစ်ပိုင်းအဆင့် ကျွမ်းကျင်သူကို သတ်ခဲ့ခြင်းမှာ တုန်လှုပ်စရာကောင်းလွန်းပေသည်။

"သူက ကစဉ့်ကလျားနိယာမကို အသုံးပြုခဲ့တာပဲ။ သူက ဘယ်သူလဲဆိုတာ ကျုပ်သိပြီ၊ သူက ကစဉ့်ကလျားရဲ့သားတော် လုမင်ပဲ"

လုမင်ကို မှတ်မိသည်နှင့် တစ်စုံတစ်ယောက်က အော်ပြောလိုက်သည်။

"အဲဒါက သူပဲ။ သူက ယွမ်တောင် မြင့်မြတ်သောကျောင်းတော်ရဲ့ ပါရမီရှင်တစ်ဦးလို့ ကြားတယ်။ သူက ကောင်းကင်ဧကရာဇ်ရဲ့ဓားကို ဆွဲနှုတ်ခဲ့ပြီး ဘုရင်အများအပြားနဲ့အတူ ဟန်ရှင်းဟဲကို ရင်ဆိုင်တိုက်ခိုက်ခဲ့တယ်တဲ့။ နောက်ပိုင်းမှာ သူက နဂါးမဟာမိတ်ကို တည်ထောင်ခဲ့တယ်"

"လက်စသတ်တော့ အဲဒါက သူပဲ။ သူ့ရဲ့တိုက်ခိုက်နိုင်စွမ်းက ဒီလောက်သန်မာတာ မဆန်းပါဘူး...."

အံ့ဩခြင်းများ ပြည့်နှက်နေသော အသံတွေ တစ်ခုပြီးတစ်ခု ထွက်ပေါ်လာသည်။

လူအများစုက လုမင်ကို မမြင်ဖူးသော်လည်း နာမည်ကိုတော့ ကြားဖူးသည်။

ယွမ်တောင် မြင့်မြတ်သောကျောင်းတော်က ယွမ်တောင်တစ်ခုလုံး၏ အသန်မာဆုံး ပါရမီရှင်များကို စုစည်းထားသဖြင့် အာရုံစူးစိုက်မှု၏ဗဟိုချက် ဖြစ်ခဲ့ပေသည်။ ၎င်းတို့ထဲမှ သန်မာသော ပါရမီရှင်အချို့ကို အင်အားစုများစွာက သတိပြုမိခဲ့သည်။

နောက်ဆုံးတွင်၊ ထိုပါရမီရှင် မသေခဲ့ပါက အနာဂတ်တွင် ယွမ်တောင်၏ အုပ်စိုးရှင်များ ဖြစ်လာမည်မှာ သေချာသည်။

လုမင်က ဧကရာဇ်တစ်ပိုင်း ရွှေကျီးကန်း၏ သိုလှောင်လက်စွပ်ကို သိမ်းဆည်းကာ ကျွန်းအထက်သို့ ဆက်လက်ပျံသန်းခဲ့သည်။

တခြားသူများလည်း သူတို့ပတ်ဝန်းကျင်ကို စပြီး လေ့လာခဲ့ကြလေသည်။

ကျွန်းက သေးငယ်သောကြောင့် လုမင်၏ အမြန်နှုန်းဖြင့် လှည့်ပတ်ရန် မကြာလိုက်ပါ။။

ထို့နောက် လုမင်က ပတ်ဝန်းကျင်တွင် လှည့်ပတ်ပျံသန်းခဲ့သော်လည်း မည်သူ့ကိုမျှ မတွေ့ရတော့ပေ။

'ဒီပန်းပွင့်ကမ္ဘာထဲကို ဝင်လာတဲ့ လူအနည်းငယ်သာ ဒီကျွန်းမှာ ပေါ်လာပုံရတယ်။ ကျန်တဲ့သူတွေက တခြားနေရာတွေမှာ ရှိသင့်တယ်'

လုမင်က သူ့စိတ်ထဲမှ တွေးလိုက်သည်။

လုမင်က ဤကျွန်းပေါ်တွင် မည်သူမျှ နေထိုင်ခြင်းမရှိကြောင်း တွေ့ရှိခဲ့ပေသည်။ ဒါက စိမ်းလန်းစိုပြေသော တောအုပ်တစ်ခုဖြစ်ပြီး အားနည်းသော မိစ္ဆာသားရဲအချို့သာ ရှိနေသည်။

'ဒီကမ္ဘာရဲ့ အခြေအနေကို သိချင်ရင် ဒီကနေ အရင်ထွက်သွားရမယ်'

'နောက်ပြီးတော့ ဒီကမ္ဘာမှာ လူတွေရှိမလား မသိဘူး'

လုမင်က သူ့စိတ်ထဲမှ တွေးလိုက်သည်။ ထို့နောက် ခပ်လှမ်းလှမ်းမှ ကျယ်ပြောလှသော ပင်လယ်ထဲသို့ ပျံသန်းသွား၏။

ကြာပန်းကမ္ဘာကို ကောင်းကင်ဧကရာဇ်တောင်အောက်တွင် ချိပ်ပိတ်ထားခြင်း ဖြစ်သည်။ ၎င်းက ကောင်းကင်ဧကရာဇ်နှင့် တစ်နည်းတစ်ဖုံ ဆက်စပ်သင့်ပေသည်။ ကောင်းကင်ဧကရာဇ်မှကျန်ခဲ့သော ရတနာအချို့ကို သူရနိုင်လျှင်၊ ၎င်းက မကြုံစဖူးသော အခွင့်အရေးတစ်ခုဖြစ်မှာ သေချာသည်။

အခြားသူများကလည်း ကျွန်းတစ်ဝိုက်တွင် လှည့်ပတ်ပြီးနောက် အကန့်အသတ်မဲ့ ပင်လယ်ဆီသို့ ပျံသန်းသွားကြလေသည်။

လုမင်က အလင်းတန်းတစ်ခုအဖြစ်သို့ ပြောင်းလဲသွားပြီး အံ့မခန်းအရှိန်ဖြင့် ပင်လယ်ပြင်ပေါ်သို့ ပျံသန်းသွားခဲ့သည်။

ထိုအချိန်တွင်... သူက ပင်လယ်ထဲမှာ ကြီးမားသော ပင်လယ်သားရဲများ ပေါ်လာသည်ကို တွေ့လိုက်ရသည်။ သို့သော်လည်း အများစုမှာ မြင့်မားသော ကျင့်ကြံမှုအဆင့် မရှိကြပေ။ လုမင် မြင်ဖူးသမျှတွင် အသန်မာဆုံးသော ပင်လယ်သားရဲက တောက်ပသောသူတော်စင်နယ်ပယ်တွင်သာ ဖြစ်သည်။

သို့သော်လည်း လုမင်ကပဲ ကံမကောင်းတာလား သို့မဟုတ် အခြားအကြောင်းရင်းတစ်ခုခုကြောင့်လား မသိပါ။ လမ်းတလျှောက် ပျံသန်းလာခဲ့သော်လည်း နောက်ကျွန်းတစ်ကျွန်းကို မတွေ့ရတော့ပေ။

ဤကမ္ဘာကြီးက လုမင် မျှော်မှန်းထားသည်ထက် ကြီးမားပုံရသည်။

လုမင်က ခုနစ်ရက်တိုင်တိုင် မရပ်မနား ပျံသန်းခဲ့ပြီး ဘယ်လောက်ဝေးဝေး ပျံသန်းခဲ့ပြီမှန်း မသိတော့ပေ။

ထိုအချိန်တွင် လုမင်၏ မျက်လုံးများက တောက်ပလာသည်။ သူ့ရှေ့တွင် ကျွန်းကြီးတစ်ကျွန်း ပေါ်လာခဲ့၏။

အဝေးကကြည့်လျှင် ဤကျွန်းက အလွန်ခမ်းနားသည်။ ယခင်ကျွန်းထက်လည်း များစွာ ပိုကြီးမားပေသည်။

လုမင်က ကျွန်းဆီသို့ ပျံသန်းသွားသည်။ သူက အနီးသို့ ရောက်သောအခါ လမ်းကြောင်းတစ်ခုမှ ကျယ်လောင်စွာ အော်သံကို ကြားလိုက်ရ၏။

"တစ်ယောက်ယောက်ရှိတယ်"

လုမင်၏ မျက်လုံးများ တောက်ပလာပြီး အသံကြားရာဆီသို့ ပျံသန်းသွားတော့သည်။

မကြာမီ၊ ထူးဆန်းသော သားရဲများကို စီးနင်းထားသည့် စစ်သည်များကို တွေ့လိုက်ရသည်။ သူတို့ထံမှ ကြီးကျယ်ခမ်းနားသော အငွေ့အသက်များ ထွက်ပေါ်နေပြီး မြေပြင်ပေါ်တွင် ပြေးလွှားနေကြ၏။ မြေပြင်က အဆက်မပြတ် တုန်ခါနေတော့သည်။

'သူတို့ထဲမှာ အများစုက ဝိညာဉ်နတ်ဘုရားနယ်ပယ်မှာ ရှိပြီး တချို့က သိုင်းအုပ်ချုပ်သူနယ်ပယ်မှာ ရှိနေကြတယ်'

လုမင်က ဝိညာဉ်အသိဖြင့် ကြည့်ရှုပြီးနောက် ဤစစ်သည်များ၏ အကြမ်းဖျင်း အင်အားကို သိလိုက်သည်။

ထောင်ချီသော စစ်သည်များက မြေကွက်ကျယ်တွင် ပြေးလွှားနေကြသည်။ သူတို့ထံမှ တောက်ပသော အလင်းတန်းများက ကောင်းကင်ယံတွင် ဟိန်းဟောက်နေသော ရေနဂါးကြီးအဖြစ်သို့ ပေါင်းစည်းသွားကြ၏။

လုမင်၏ အတွေ့အကြုံအရ ဤသည်မှာ စစ်တပ်တစ်ခု၏ လေ့ကျင့်မှုဖြစ်ကြောင်း သိလိုက်သည်။

လုမင်က လေထဲမှ ပျံသန်းရင်း ပတ်ပတ်လည်ကို အကဲခတ်လိုက်သည်။ အနီးနားတွင် ကြီးမားသော တပ်စခန်းတစ်ခုရှိသည်ကို သူတွေ့ရှိခဲ့၏။

"အဲဒီမှာ ရပ်လိုက်စမ်း။ မင်းဘယ်သူလဲ"

ရုတ်တရက်၊ ကျယ်လောင်သော အော်သံတစ်ခု ကြားလိုက်ရသည်။ လုမင်၏ရှေ့တွင် လူရိပ်အနည်းငယ်ပေါ်လာပြီး လုမင်၏လမ်းကြောင်းကို ပိတ်ဆို့လိုက်၏။

"အားလုံးပဲ၊ ကျုပ်က ဒီအတိုင်း လမ်းလျှောက်နေတာပါ။ လမ်းမသိလို့ သတင်းစုံစမ်းရအောင် တစ်ယောက်ယောက်ကို တွေ့ချင်လို့"

လုမင်က လက်ယှက်ပြီး ပြုံးပြလိုက်သည်။

"သတင်းစုံစမ်းချင်တာပေါ့၊ မင်းက သူလျှိုတစ်ယောက်ပဲ ဖြစ်ရမယ်။ ဟေ့... သူ့ကို ဖမ်းဆီးပြီး သခင်လေးရန်ဆီကို ခေါ်လာခဲ့ကြ"

မှုန်တေတေ မျက်နှာထားဖြင့် လူလတ်ပိုင်းအရွယ် အမျိုးသားတစ်ဦးက သူ့လက်ကို ဝှေ့ယမ်းလိုက်သည်။ ချပ်ဝတ်တန်ဆာ ဝတ်ထားသော လူအနည်းငယ် ထွက်လာပြီး လုမင်ကို ဝိုင်းထားလိုက်၏။ အေးစက်သော သတ်ဖြတ်လိုစိတ်တို့က လုမင်ကို ဖုံးလွှမ်းသွားတော့သည်။

လုမင်က ခေါင်းယမ်းလိုက်သည်။ ဤလူများက သိုင်းအုပ်ချုပ်သူနယ်ပယ် ဝန်းကျင်တွင်သာ ရှိကြသေးသည်။ လုမင်၏ အတွေးတစ်ခုဖြင့် သူတို့ကို သတ်နိုင်သည်။

'ဒီလူတွေရဲ့ ကျင့်ကြံမှုက ငါ့ကိုခြိမ်းခြောက်နိုင်ဖို့ အားနည်းလွန်းတယ်။ ဒီလိုဆိုမှတော့ သခင်လေးရန်ဆိုသူနဲ့ တွေ့ဆုံပြီး ဒီကမ္ဘာကြီးအကြောင်း ပိုသိအောင် လုပ်ရအောင်'

လုမင်က သူ့စိတ်ထဲမှတွေးပြီး ပြောလိုက်သည်။

"ကျုပ် လိုက်ခဲ့ပါမယ်"

"ကောင်းပြီ၊ သူ့ကိုခေါ်သွားလိုက်"

လူလတ်ပိုင်းအရွယ် အမျိုးသားက သူ့လက်ကို ဝှေ့ယမ်းပြီး လှည့်ထွက်သွားသည်။

များမကြာမီ၊ သူတို့က စစ်စခန်းတစ်ခုသို့ ရောက်ရှိလာပြီး ကြီးမားသော စစ်သုံးတဲကြီးတစ်ခုထဲသို့ ၀င်သွားကြလေသည်။

တဲနှစ်ဘက်လုံးတွင် လူအချို့က မတ်တပ်ရပ်နေကြသည်။ လုမင်က ၎င်းတို့အား သူ၏ ဝိညာဉ်အသိဖြင့် ကြည့်လိုက်သောအခါ ၎င်းတို့၏ ကျင့်ကြံမှုက သိုင်းသူတော်စင်တစ်ပိုင်းနယ်ပယ် ကျင့်ကြံမှုရှိကြောင်း တွေ့လိုက်ရ၏။ သူတို့ထဲမှ တစ်ဦးဆိုလျှင် တောက်ပသော သူတော်စင်နယ်ပယ် ကနဦးအဆင့် ကျင့်ကြံမှုရှိသည်။

ယခုအချိန်တွင် အဖိုးတန် အဝတ်အစားများကို သပ်ရပ်စွာ ဝတ်ဆင်ထားသော လူငယ်တစ်ယောက်က တဲ၏ ထိပ်ပိုင်းတွင် ရှိနေသည်။ သူက မာနကြီးပုံရပြီး အေးတိအေးစက်ဖြင့် လုမင်ကို လှမ်းကြည့်လိုက်၏။

"သခင်လေးယန်၊ ဒီလူက စခန်းထဲကို ရုတ်တရက် ဝင်လာ‌တာတွေ့လို့ပါ။ သူက ကျုပ်တို့ကို စူးစမ်းဖို့ တခြားတိုင်းပြည်က စေလွှတ်လိုက်တဲ့ သူလျှိုလို့ သံသယရှိတယ်။ ဒါကြောင့် သူ့ကို စစ်ဆေးပြီး ဆုံးဖြတ်ရအောင် ခေါ်လာခဲ့ပေးတာပါ"

လူလတ်ပိုင်းအရွယ် အမျိုးသားက လူငယ်အား လေးလေးစားစား ပြောလိုက်သည်။