အခန်း ၁၉၄၃

အပိုင်း ( 1943 ) တစ်ချက်တည်းဖြင့် ကိစ္စပြတ်သည်။

ရွမ်ထျန်းကျောင်းမှာလည်း အံ့ဩလွန်းပြီး မယုံကြည်နိုင် ဖြစ်နေသည်။

စစ်သူကြီးလေးယောက်တို့၏ ကျင့်ကြံမှုအဆင့်က သူနှင့် တန်းတူဖြစ်သည်။ သူမ၏ ဝိညာဉ်ခန္ဓာက ပိုမြင့်မားသောကြောင့် တိုက်ခိုက်နိုင်စွမ်းတွင် နံပါတ်တစ်ဖြစ်နေသော်လည်း အခြားသူများထက် များစွာ ပိုသန်မာခြင်း မရှိပေ။

ယခုမူ၊ ထိုအဆင့် ကျွမ်းကျင်သူလေးဦးက လုမင်၏ရှေ့တွင် ထိုကဲ့သို့ သေဆုံးသွားရသည်။

လုမင်၏ ကျင့်ကြံမှုအဆင့်က အဘယ်နည်း။ လုမင်က မဟာသူတော်စင်နယ်ပယ်မှ အကျော်အမော်တစ်ဦး ဖြစ်သလော။

ယခင်က လုမင်ကို သူမ ပထမဆုံး တွေ့ခဲ့ချိန်တွင်၊ လုမင်က ထူးခြားသည်ဟု သူ ခံစားမိခဲ့သည်။ သို့သော်လည်း သူမနှင့် အဆင့်တူဟုသာ ထင်မြင်ခဲ့ပေသည်။

လုမင်က ထိပ်တန်း ကျွမ်းကျင်သူလေးဦးကို လွယ်ကူစွာ သတ်ဖြတ်နိုင်မည်ဟု သူ မမျှော်လင့်ခဲ့ပေ။

လုမင်သည် စစ်သူကြီးလေးယောက်ကို သတ်လိုက်ပြီးနောက် ယန်စုန့်ဆီသို့ ဆက်လျှောက်သွားခဲ့သည်။

သူ လှမ်းလိုက်သည့် ခြေလှမ်းတိုင်းက ယန်စုန့်၏ နှလုံးသားကို နင်းသွားပုံပြီး သူ့နှလုံးသားကို တုန်လှုပ်သွားစေခဲ့၏။ သူ့မျက်လုံးထဲမှ ကြောက်ရွံ့မှုများက ပိုပြင်းထန်လာတော့သည်။

"သူ့ကိုသတ်၊ သူ့ကို အတူတူသတ်ကြစို့"

ယန်စုန့်က ကြောက်ရွံ့မှု၊ ဒေါသတို့ဖြင့် အော်ဟစ်လိုက်သည်။

"ဒီလူက ပုန်ကန်ပြီး ဘုရင်မင်းမြတ်ကို ဒုက္ခပေးချင်နေတာ၊ မြန်မြန်သတ်ပစ်လိုက်ကြပါ"

ကိုယ်လုပ်တော်ချင်ကလည်း အော်ပြောလိုက်၏။

"ဝှစ်... ဝှစ်... ဝှစ်..."

ဘုရင်မင်းမြတ်နှင့် တော်ဝင်အကြံပေးတို့၏ နောက်ကွယ်မှ လူအများအပြား ပြေးထွက်လာကြတော့သည်။

ထိုလူများ၏ အရှိန်အဝါများက အလွန်အားကောင်းသည်။ သူတို့ထဲတွင် အများစုက တောက်ပသောသူတော်စင်နယ်ပယ်တွင်ရှိပြီး စစ်သူကြီးလေးဦးထက် အားမနည်းကြပေ။

ဤလူများသည် တော်ဝင်မိသားစုနှင့် တော်ဝင်အကြံပေးတို့မှ ပြုစုပျိုးထောင်ပေးခဲ့သော ကျွမ်းကျင်သူများဖြစ်ကြသည်။ ဒါက သူတို့၏ စစ်မှန်သောခွန်အားပင်။

ကျွမ်းကျင်သူများစွာက လုမင်ကို အထပ်ထပ်ဝန်းရံကာ မလွတ်မြောက်နိုင်သော ပိုက်ကွန်တစ်ခုကဲ့သို့ ၎င်းတို့၏ စွမ်းအားကို ပေါင်းစပ်လိုက်ကြသည်။

"သတ်"

ထိုအချိန်တွင် လုမင်က ထပ်မံအော်ဟစ်လိုက်သည်။ အသံလှိုင်းများသည် အရပ်ရပ်သို့ ပြန့်နှံ့သွား၏။

ထို့နောက် မြင်ကွင်းက ယခင်ကနှင့် အတူတူပင်။ သူတို့၏ ခန္ဓာကိုယ်များက တုန်ခါလာပြီး လဲကျကာ အသက်ရှူရပ်သွားကြသည်။

ဤတစ်ကြိမ်တွင် ဘုရင်လည်း မျက်စိမျက်နှာပျက်သွားတော့သည်။

ယန်စုန့်နှင့် ကိုယ်လုပ်တော်ချင်တို့လည်း မျက်နှာများ သွေးဆုတ်ဖြူရော်သွားကြသည်။

"မိစ္ဆာ၊ မင်းက မကောင်းဆိုးရွားတစ်ကောင်ပဲ"

ယန်စုန့်က‌ ကြောက်လန့်တကြားဖြင့် အော်လိုက်သည်။

လုမင်က စကားတစ်ခွန်းသာ ပြောဆိုခဲ့ပြီး ကျွမ်းကျင်သူများစွာက ချက်ချင်း‌ သေဆုံးသွားခဲ့သည်။ ဒါက သူ့နားလည်နိုင်စွမ်းထက် များစွာ ကျော်လွန်သွားပြီ။

ယခုအခါ လုမင်က သူ့မျက်လုံးထဲတွင် မကောင်းဆိုးရွားတစ်ကောင် ဖြစ်သည်။

လုမင်၏ မျက်လုံးများက အေးစက်နေပြီး လုမင်ဆီသို့ ဆက်လက်လျှောက်လှမ်းသွားသည်။

ယန်စုန့်၏ ခန္ဓာကိုယ်က နတ်ပူးသကဲ့သို့ တဆတ်ဆတ် တုန်လာသည်။ သူက အော်ဟစ်ရင်း နောက်ပြန်ဆုတ်သွား၏။

"အဖေ... အဖေကယ်ပါဦး"

"သူ မင်းကို မထိနိုင်ပါဘူး"

တော်ဝင်အကြံပေးက အေးစက်စွာ ပြောလိုက်သည်။ ထို့နောက်တွင် သူ၏ခန္ဓာကိုယ်မှ ကြောက်မက်ဖွယ်ကောင်းသော အငွေ့အသက်များ ထွက်ပေါ်လာတော့သည်။

ဤအရှိန်အဝါက ယခင်က မည်သူထက်မဆို များစွာ ပိုပြီးသန်မာသည်။

"မဟာသူတော်စင်နယ်ပယ်၊ ယန်ခွေ့... နင်က မဟာသူတော်စင်နယ်ပယ်ကို ဖြတ်ကျော်သွားပြီ"

ရွမ်ထျန်းကျောင်းက မယုံကြည်နိုင်စွာ အော်လိုက်သည်။

ယန်ခွေ့က မဟာသူတော်စင်နယ်ပယ်သို့ အမှန်တကယ် ဖြတ်ကျော်သွားခဲ့ပြီ။ ယခုအခါ သူ့ကို မင်ယန်တိုင်းပြည်၏ နံပါတ်တစ် ကျွမ်းကျင်သူဟု ဆိုနိုင်သည်။

ရွမ်ထျန်းကျောင်းက လုမင်အတွက် စိုးရိမ်လာမိသည်။ သို့သော်လည်း လုမင်၏ အမူအရာကတော့ လုံးဝ ပြောင်းလဲသွားခြင်း မရှိပေ။ မဟာသူတော်စင်နယ်ပယ် ကျင့်ကြံမှုက လုမင်၏ နှလုံးသားတွင်း၌ အနည်းငယ်မျှ လှိုင်းမထစေနိုင်ပါ။

"ညီနောင်တို့၊ အတူတူ တိုက်ခိုက်ကြရအောင်"

တော်ဝင်အကြံပေးက ရုတ်တရက် ပြောလိုက်သည်။

"မင်ယန်တိုင်းပြည်မှာ ဒီလိုတည်ရှိမှုမျိုး ထွက်ပေါ်လာမယ်လို့ မမျှော်လင့်ထားဘူး။ ကောင်းပြီ၊ ဒီလိုဆိုမှတော့ လုံခြုံရေးအတွက် အတူတူတိုက်ခိုက်ကြ‌ရအောင်"

တော်ဝင်အကြံပေး၏ နောက်ကွယ်တွင် အိုမင်းသော အသံတစ်ခု ထွက်ပေါ်လာသည်။ ထို့နောက် အဘိုးအိုနှစ်ယောက် ထွက်လာပြီး တော်ဝင်အကြံပေး၏ နံဘေးတွင် ရပ်လိုက်ကြသည်။

"ဝုန်း... ဝုန်း..."

ထို့နောက် အဘိုးအိုနှစ်ယောက်ထံမှ ကြောက်မက်ဖွယ်ကောင်းသော ရောင်ဝါတစ်ခု ထွက်ပေါ်လာ၏။ ကြောက်စရာကောင်းသော ရောင်ဝါတစ်ခုက တိမ်တိုက်များကို ဖောက်ထွက်ပြီး ကောင်းကင်ကိုပင် အရောင်ပြောင်းသွားစေခဲ့သည်။

ဤအဘိုးကြီးနှစ်ဦးသည်လည်း မဟာသူတော်စင်နယ်ပယ် ကျင့်ကြံမှုအခြေခံ ရှိသည်။ တော်ဝင်အကြံပေးကဲ့သို့ပင် သူတို့နှစ်ဦးစလုံးက မဟာသူတော်စင်နယ်ပယ် အဆင့်အဆင့်တွင် ရှိကြပေသည်။

တစ်ချိန်တည်းမှာပင် ဓားနှစ်လက်က အဘိုးအိုနှစ်ယောက်၏ ဦးခေါင်းထက်တွင် လွင့်မျောကာ ပေါ်လာတော့သည်။

"လော့ရွှေတိုင်းပြည်ရဲ့ ဓားနှစ်လက် သူတော်စင်... နင်တို့က လော့ရွှေတိုင်းပြည်ရဲ့ ပြိုင်စံရှား ဓားနှစ်လက်သူတော်စင်တွေပဲ။ ယန်ခွေ့၊ နင်က လော့ရွှေတိုင်းပြည်နဲ့ တကယ်ပူးပေါင်းခဲ့တယ်"

ရွမ်ထျန်းကျောင်းက တုန်လှုပ်စွာ အော်ဟစ်လိုက်သည်။

လော့ရွှေတိုင်းပြည်တွင် ပြိုင်စံရှား ဓားသူတော်စင်များက ကြောက်စရာကောင်းသော ကျွမ်းကျင်သူများ ဖြစ်ကြသည်။ နှစ်ဦးစလုံးက မဟာသူတော်စင်နယ်ပယ် ကျင့်ကြံမှုရှိ၏။ တော်ဝင်အကြံပေးရ လော့ရွှေတိုင်းပြည်နှင့် လျှို့ဝှက်စွာ ပူးပေါင်းခဲ့သည်။ သူက တကယ်ကို သစ္စာဖောက်ပင်။

"ငါ့အကြောင်းကို သိသွားရင်တောင် ဘာဖြစ်လဲ။ ဒီနေ့ မင်းတို့အားလုံး သေကြရလိမ့်မယ်"

တော်ဝင်အကြံပေးက အေးစက်စွာ ပြောလိုက်သည်။

"သတ်လိုက် အဖေ... အဲဒီကောင်ကို သတ်လိုက်။ မဟုတ်သေးဘူး... သူ့ရဲ့ ကျင့်ကြံမှုကို အရင်ဖျက်ဆီးလိုက်ပါ။ ကျွန်‌တော်က သူ့ကို သေတာထက် ပိုဆိုးတဲ့ ကံကြမ္မာကို ခံစားစေချင်တယ်"

ယန်စုန့်က ပထမတော့ အံ့အားသင့်သွားသည်။ တော်ဝင်အကြံပေးက မဟာသူတော်စင်နယ်ပယ်သို့ ရောက်ရှိနေရန် သူ မမျှော်လင့်ခဲ့ပေ။ ထို့ပြင်၊ လော့ရွှေတိုင်းပြည်မှ ပြိုင်စံရှား ဓားသူတော်စင်များကလည်း သူ့အနားတွင် ရှိနေသည်။

သို့သော်လည်း ချက်ချင်း သတိဝင်လာပြီးနောက် ဝမ်းသာအားရဖြစ်ကာ အော်ဟစ်တော့သည်။

မဟာသူတော်စင်သုံးပါးဖြင့် လုမင်က မည်သို့သောနည်းလမ်းကို အသုံးပြုခဲ့သည်ဖြစ်စေ၊ သူ သေရတော့မည်မှာ သေချာသည်။

မဟာသူတော်စင်နယ်ပယ်က မင်ယန်တိုင်းပြည်တွင် ဒဏ္ဍာရီတစ်ခုပင်။

"ဒါက မင်းရဲ့ ဝှက်ဖဲလား"

လုမင်က ယန်စုန့်ကို တစ်ချက်မျှပင် မကြည့်ပါ။ သူ့လက်တစ်ဖက်ဖြင့် လေထဲသို့ ဖိချလိုက်သည်။

"ဝုန်း"

ကောင်းကင်တွင် ကြီးမားသော လက်ကြီးတစ်ဖက်က ရုတ်တရက် ပေါ်လာသည်။ ၎င်းက ကောင်းကင်ကို ဖုံးလွှမ်းပြီး တော်ဝင်အကြံပေးနှင့် ဓားသူတော်စင်နှစ်ဦးကို ဖိနှိပ်လိုက်၏။

ကြောက်မက်ဖွယ်ကောင်းသော ရောင်ဝါကလည်း အရပ်ရပ်သို့ ပျံ့နှံ့သွားသည်။ တော်ဝင်အကြံပေးနှင့် ဓားသူတော်စင်နှစ်ဦးတို့ မျက်နှာပျက်သွားကြတော့သည်။

ဤအရှိန်အဝါက သူတို့ ခံနိုင်ရည်ရှိသောအရာ မဟုတ်ဘူးဟု သူတို့ခံစားကြရသည်။

ဤအခိုက်တွင်၊ သူတို့က လွတ်မြောက်ချင်ကြသော်လည်း သူတို့ပတ်ဝန်းကျင် လေဟာနယ်က အေးခဲလာတာကို သိလိုက်ရ၏။ သူတို့က လုံးဝ မလွတ်မြောက်နိုင်တော့ပါ။

ယန်စုန့်နှင့် ကိုယ်လုပ်တော်ချင်တို့ လုံးဝ အံ့အားသင့်သွားကြသည်။ သူတို့က ကောင်းကင်ယံမှ နတ်ဘုရား၏လက်ဝါးနှင့်တူသော လက်ဝါးကို စိုက်ကြည့်နေကြ၏။ သူတို့၏ ခန္ဓာကိုယ်များကလည်း တဆတ်ဆတ် တုန်ခါလာတော့သည်။ ဤစွမ်းအားမျိုးက သူတို့ကို မျှော်လင့်ချက်မဲ့စေသည်။

"ခုခံကြ"

တော်ဝင်အကြံပေးက ဟိန်းဟောက်လိုက်သည်။ သူက လက်မလျှော့ဘဲ ခုခံချင်သေးသည်။

သူက လက်နှစ်ဘက်ဖြင့် တံဆိပ်တော်တစ်ခုပြုလုပ်ပြီး ကောင်းကင်ယံမှ လက်ဝါးပုံရိပ်ကြီးကို ရိုက်ထုတ်လိုက်သည်။

တစ်ချိန်တည်းမှာပင်၊ လော့ရွှေတိုင်းပြည်မှ ဓားသူတော်စင်များကလည်း တိုက်ခိုက်ခဲ့၏။ ဓားအလင်းနှစ်ခုက မြစ်နှစ်စင်းကဲ့သို့ ကောင်းကင်ကို ထိုးတက်သွားတော့သည်။

သို့သော်၊ အဆင့်နိမ့် မဟာသူတော်စင်နယ်ပယ်က လုမင်၏ရှေ့တွင် ပုရွက်ဆိတ်တစ်ကောင်နှင့် မခြားပေ။

ဧရာမ လက်ဝါးကြီး၏ ဖိအားအောက်တွင် သူတို့သုံးယောက်၏ တိုက်ခိုက်မှုများက ချက်ချင်း ပြိုကျသွားသည်။ နောက်ဆုံးတွင်၊ ဧရာမလက်ဝါးကြီးက သူတို့သုံးယောက်ကို ဖုံးအုပ်ကာ မြေပြင်ပေါ်သို့ ဖိချလိုက်၏။

"ဝုန်း..."

မြေပြင်က တသိမ့်သိမ့် တုန်လှုပ်သွားခဲ့သည်။ အခိုးအငွေ့များနှင့် ဖုန်မှုန့်များက လေထုထဲတွင် ပြည့်နှက်နေ၏။ ကျောက်တုံးအစအနများ နေရာတိုင်းသို့ လွင့်သွားတော့သည်။

ခဏအကြာတွင် မီးခိုးနှင့် ဖုန်မှုန့်များ ပျောက်ကွယ်သွားသည်။ မြေပြင်ပေါ်တွင် ကြီးမားသော လက်ဖဝါးရာ အမှတ်အသားကြီးတစ်ခုကို လူတိုင်း တွေ့လိုက်ကြရ၏။ တော်ဝင်အကြံပေးနှင့် ဓားသူတော်စင်များမှာတော့ ခွေးသေများကဲ့သို့ လက်ဖဝါးရာ မြေတွင်းထဲတွင် လဲကျကာ အကြေဆွဲနေကြတော့သည်။

သူတို့၏ အရှိန်အဝါများက အလွန်အားနည်းခဲ့သည်။ ယခုအချိန်တွင် သူတို့က သာမန်လူသုံးယောက် ခြားတော့ပေ။ လုမင်၏ တိုက်ခိုက်မှုတစ်ခုတည်းဖြင့် ၎င်းတို့၏ ကျင့်ကြံမှုအခြေခံများ ပျက်စီးသွားကြပြီ ဖြစ်သည်။

တော်ဝင်အကြံပေး၏ မျက်လုံးများက လက်မခံလိုခြင်း၊ စိတ်ပျက်အားငယ်မှုများဖြင့် ပြည့်နှက်နေသည်။

ပြီးသွားပြီ။ အရာအားလုံးပြီးသွားပြီဆိုတာ သူသိသည်။

"အား..."

ယန်စုန့်က ရုတ်တရက် ထအော်လိုက်သည်။ သူ့ခန္ဓာကိုယ်က သက်တန့်အလင်းအဖြစ်သို့ ပြောင်းလဲသွားပြီး အဝေးသို့ ပြေးသွားခဲ့၏။

သူက တော်ဝင်အကြံပေးနှင့် အခြားသူများကို ဂရုမစိုက်တော့ဘဲ တစ်ယောက်တည်း လွတ်မြောက်လိုသည်။

သို့သော်၊ လုမင်က သူ့လက်ညှိုးဖြင့် တစ်ချက်တောက်လိုက်သည်။ စွမ်းအင်တန်းတစ်ခုက ပြေးထွက်လာပြီး ယန်စုန့်၏ဒန်တျန်ကို ထိုးဖောက်သွား၏။ ၎င်းက သူ၏ဒန်တျန်ကို ထိုးဖောက်ခဲ့ပြီး ကျင့်ကြံမှုအခြေခံကို ဖျက်ဆီးပစ်လိုက်သည်။

ကျင့်ကြံမှုအခြေခံ ပျက်စီးသွားသည့်အခါ ယန်စုန့်က မပျံသန်းနိုင်တော့ပေ။ သူသည် မြေပြင်ပေါ်သို့ ပြင်းထန်စွာ ပြုတ်ကျသွားခဲ့သည်။

"မင်းတို့ပဲ ကျန်တော့တယ်"

လုမင်က ကိုယ်လုပ်တော်ချင်နှင့် ဘုရင်ထံသို့ လျှောက်သွားသည်။

"မင်း ငါ့ရဲ့ အချစ်ဆုံးကြင်ယာတော်ကို ထိဝံ့သလား။ မင်းရဲ့ မျိုးဆက်ကိုးခုအထိ ငါ သုတ်သင်ပစ်မယ်"

ဘုရင်က အော်ဟစ်ပြီး လုမင်၏ရှေ့တွင် ပိတ်ရပ်လိုက်သည်။

လုမင် ခေါင်းယမ်းလိုက်၏။ ဤဘုရင်က အသိစိတ်ပျောက်နေပြီ။ သူ့ကို အသက်ရှင်လျက်ထားခြင်းက အကျိုးမရှိပေ။

လုမင်က လက်ဖျစ်တစ်ချက်တီးလိုက်သည်။ ထိုအခါ စွမ်းအင်တန်းတစ်ခုက ဘုရင်၏ မျက်ခုံးနှစ်ခုကြားသို့ ထိုးဖောက်ဝင်ရောက်သွားကာ သူ့အသက်ကို နှုတ်ယူသွားတော့သည်။