အခန်း ၁၃၇

အခန်း - ၁၃၇

ပင်လယ်ကမ်းခြေရှိ ဗီလာအိမ်ကြီးတစ်လုံးအတွင်း၌ ဆံပင်ရွှေဝါရောင်နှင့် လူငယ်တစ်ဦးသည် ကွန်ပျူတာပေါ်ရှိ ဒေတာစီးဆင်းမှု များကို ကြည့်ရင်း မျက်ဝန်းများ လှုပ်ခတ်နေသည်။

သူက အင်္ဂလိပ်ဘာသာစကားဖြင့် တီးတိုးရေရွတ်လိုက်၏ “စိတ်ဝင်စားစရာပဲ၊ တကယ်ကို စိတ်ဝင်စားစရာကောင်းလှတယ် ငါက ကိစ္စအချို့ကို စုံစမ်းစစ်ဆေးရုံတင် ရှိသေးတာ၊ ဒီလောက်အထိ တော်တဲ့ ဆရာကြီးတစ်ယောက်နဲ့ တိုးလိမ့်မယ်လို့ မထင်ထားမိဘူး ဒီကောင်က ဘယ်သူလဲ သူ့ရဲ့ရည်ရွယ်ချက်က ဘာလဲဆိုတာ ငါ တကယ်သိချင်မိပြီ ဒါမှမဟုတ်... သူလည်းပဲ အဲဒီကိစ္စကို သိနေတာများလား”

ထို ဆံပင်ရွှေဝါရောင်နှင့် လူငယ်၏ ဖြူဖွေးနုနယ်သော လက်ချောင်းများသည် မိန်းမသားတစ်ဦးကဲ့သို့ပင် ရှည်လျားပြီး အနုပညာဆန်လှကာ ကီးဘုတ်ပေါ်တွင် အလွန်ညင်သာချောမွေ့စွာ ရိုက်နှိပ်လှုပ်ရှားနေသည်။

“ဟွန်း စူပါကွန်ပျူတာကို ထိန်းချုပ်ထားတာပေါ့လေ... ဟုတ်လား မျှော်လင့်ထားတဲ့အတိုင်း ကမ္ဘာ့အဆင့်မီ ဟက်ကာတစ်ယောက်ပဲ” ဆံပင်ရွှေဝါရောင်နှင့် လူငယ်က ခပ်ရွဲ့ရွဲ့ နှာခေါင်းရှုံ့လိုက်ရင်း “စူပါကွန်ပျူတာ ရှိတာ မင်းတစ်ယောက်တည်းလို့ မထင်လိုက်နဲ့”

ဂျပန်နိုင်ငံ၊ တိုကျိုမြို့၏ ဆူမီဒါရပ်ကွက် အတွင်း၌မူ ရှီလဲ့သည် ရဲကွန်ရက်စနစ်ထဲတွင် အလုပ်ပေါင်းစုံကို တစ်ပြိုင်နက်တည်း လုပ်ဆောင်နေရသည်။ ပထမဦးစွာ သူသည် အခြားကမ္ဘာ့အဆင့်မီ ဟက်ကာတစ်ဦးနှင့် ထိပ်တိုက်ရင်ဆိုင်နေရပြီး၊ တစ်ချိန်တည်းမှာပင် ညဘက်လှည့်ကင်းရဲများ၏ လှုပ်ရှားမှုများကို စောင့်ကြည့်နေရကာ၊ ယဲ့ဖုန်း နှင့် အဖွဲ့၏ အခြေအနေကိုပါ တစ်ဖက်တစ်လမ်းမှ အာရုံခွဲ၍ စစ်ဆေးနေရသည်။

‘မင်းက “သူတို့” ထဲက တစ်ယောက်လား၊ အကယ်၍ မင်းသာ “သူတို့” ဖြစ်နေမယ်ဆိုရင် ငါ သေချာပေါက် စုံစမ်းဖော်ထုတ်မယ်’ ရှီလဲ့သည် မိမိကိုယ်ကိုယ် တိုးတိုးလေး ပြောလိုက်ပြီးနောက် ထုံးစံအတိုင်း ရဲတပ်ဖွဲ့၏ ရေဒီယိုလှိုင်းနှုန်း ထဲသို့ တိုက်ရိုက်ဟက်ကာ ဝင်ရောက်လိုက်သည်။ ကြိုးမဲ့နားကြပ်ကို မိုက်ခရိုဖုန်းအဖြစ် အသုံးပြုပြီး အိုဆာကာ ဒေသိယစကား အပီအပြင်ဖြင့် ညလှည့်ကင်း ရဲကားအားလုံးထံသို့ အမိန့်အသစ်များ ထုတ်ပြန်လိုက်တော့သည်။

“လှည့်ကင်းအဖွဲ့အားလုံး သတိပြုရန်၊ လှည့်ကင်းအဖွဲ့အားလုံး သတိပြုရန် လက်နက်ကိုင် အကြမ်းဖက်သမားများသည် လက်ရှိတွင် သမုဒ္ဒရာကုန်တိုက် ပလာဇာဆီသို့ ဦးတည်မောင်းနှင်နေကြတယ် လှည့်ကင်းအဖွဲ့အားလုံး အကြမ်းဖက်သမားများကို ဖမ်းဆီးပိတ်ဆို့ရန် သမုဒ္ဒရာကုန်တိုက်သို့ ချက်ချင်း သွားရောက်ကြပါ”

ရဲလှိုင်းနှုန်းထဲတွင် အမိန့်အသစ် ထုတ်ပြန်ပြီးနောက် ရှီလဲ့သည် လမ်းမစောင့်ကြည့်ကင်မရာစနစ်မှတစ်ဆင့် ရဲ့ဖုန်းနှင့် အဖွဲ့ ရဲများ၏ ဝိုင်းရံပိတ်ဆို့မှုအတွင်းမှ တဖြည်းဖြည်း ရုန်းထွက်နိုင်ခဲ့သည်ကို မြင်တွေ့လိုက်ရသည်။ သူသည် နားကြပ်၏ လိုင်းကို ချက်ချင်းပြောင်းလဲလိုက်ပြီးနောက် လှမ်းပြောလိုက်သည် “ယဲ့ဖုန်း... ငါ အခု အခက်အခဲအကြီးကြီးတစ်ခုနဲ့ တိုးနေလို့ မင်းတို့ကို ခဏလောက် အာရုံမစိုက်ပေးနိုင်တော့ဘူး မင်းတို့ ကိုယ့်ဘာကိုယ် သတိထားကြ ငါ ရဲကားတွေ အားလုံးကို တခြားဘက် လွှဲပေးလိုက်ပြီ”

“သူဌေး... စိတ်ချပါ၊ ကျွန်တော်တို့ သေချာပေါက် သတိထားပါ့မယ်” ယဲ့ဖုန်းသည် ရှီလဲ့၏ တည်ကြည်လေးနက်နေသော လေသံကို ကြားရုံမျှဖြင့် တစ်ခုခု အရေးကြီးသည့် ကိစ္စကြီး ဖြစ်ပွားနေပြီဆိုသည်ကို ရိပ်မိလိုက်သည်။

ညလှည့်ကင်းရဲကားများနှင့် ယဲ့ဖုန်းတို့၏ ကိစ္စကို ဖြေရှင်းပြီးနောက် ရှီလဲ့သည် အခြားအတွေးများကို ရုပ်သိမ်းလိုက်ပြီး တစ်ဖက်မှ ကမ္ဘာ့အဆင့်မီ ဟက်ကာကို ရင်ဆိုင်ရန်အတွက်သာ အာရုံအားလုံးကို အပြည့်အဝ နစ်မြုပ်လိုက်တော့သည်။

‘လာစမ်းပါ မင်းက ဘယ်သူလဲဆိုတာ ငါ ကြည့်ရသေးတာပေါ့’ ရှီလဲ့တွင် ယုံကြည်ချက် အပြည့်ရှိသည်။ ကမ္ဘာ့အဆင့် ၉ ရှိသော စူပါကွန်ပျူတာ ‘ယန်’ ကို ပိုင်ဆိုင်ထားသဖြင့် ရှီလဲ့အနေဖြင့် တစ်ဖက်လူကို သေချာပေါက် ခြေရာခံမိလိမ့်မည်ဟု အကြွင်းမဲ့ ယုံကြည်နေသည်။

အာရုံအားလုံးကို စုစည်းလိုက်ပြီးနောက် ရှီလဲ့၏ တိုက်စစ်စွမ်းအားသည် ချက်ချင်းပင် ဆပွားတိုးတက်သွားခဲ့သည်။ စူပါကွန်ပျူတာ ‘ယန်’ ၏ စွမ်းဆောင်ရည်ကို အသုံးချကာ သူသည် တစ်ဖက်လူကို နောက်ဆုတ်သွားရအောင် အတင်းအကျပ် ဖိအားပေးလိုက်ပြီး တစ်ဖက်လူ၏ ကြားခံဆာဗာများကို တစ်ခုပြီးတစ်ခု အဆက်မပြတ် သိမ်းပိုက်လိုက်တော့သည်။

ပင်လယ်ကမ်းခြေ ဗီလာအတွင်းရှိ ဆံပင်ရွှေဝါရောင်နှင့် လူငယ်သည် မိမိ၏ ဆာဗာပေါင်း တစ်ဒါဇင်ကျော်ကို ဆုံးရှုံးလိုက်ရသည်ကို ကြည့်ရင်း အံ့ဩတုန်လှုပ်သွားခဲ့သည်။ နောက်ဆုံးတွင် သူသည် မနေနိုင်တော့ဘဲ မိမိ၏ ကိုယ်ပိုင်စူပါကွန်ပျူတာကို ချိတ်ဆက်လိုက်ပြီး ရှီလဲ့ကို ပြန်လည်တိုက်စစ်ဆင်ရန် ပြင်ဆင်လိုက်တော့သည်။

ထို ဆံပင်ရွှေဝါရောင်နှင့် လူငယ်က သူ၏ စူပါကွန်ပျူတာကို ချိတ်ဆက်လိုက်သည့် ခဏ၌ပင် ရှီလဲ့သည် တစ်ဖက်လူ၏ ကာကွယ်ရေးစွမ်းအား သိသိသာသာ မြင့်တက်လာသည်ကို ချက်ချင်း ခံစားလိုက်ရသည်။ ဥပမာပြရလျှင် ကာကွယ်ရေးစွမ်းအားမှာ စက္ကူတစ်ချပ်အဆင့်မှသည် သံပြားအထူကြီးတစ်ချပ်အဆင့်သို့ ပြောင်းလဲသွားခြင်း ဖြစ်သည်။

ရှီလဲ့၏ မျက်ဝန်းများ အနည်းငယ် ကျဉ်းမြောင်းသွားသည် ‘စူပါကွန်ပျူတာ ဟုတ်လား ဟွန်း မျှော်လင့်ထားတဲ့အတိုင်း ကမ္ဘာ့အဆင့်မီ ဟက်ကာပဲ၊ သူလည်း စူပါကွန်ပျူတာတစ်လုံးကို ထိန်းချုပ်ထားနိုင်တာပဲ ဒါပေမဲ့ စူပါကွန်ပျူတာ ဖြစ်ရင်ကော ဘာဖြစ်လဲ ယန်က ကမ္ဘာပေါ်မှာ အဆင့် ၉ ရှိတဲ့ စူပါကွန်ပျူတာကွ ငါ့ရဲ့ စွမ်းအားနဲ့ဆိုရင် ကမ္ဘာ့အဆင့် ၁ ရှိတဲ့ Blue Gene ဒါမှမဟုတ် အဆင့် ၂ ရှိတဲ့ Red Storm သာ မဟုတ်ရင် မင်းရဲ့ ကာကွယ်ရေးစနစ်ကို ငါ သေချာပေါက် ချိုးဖျက်ပြမယ် မင်း ဘယ်စူပါကွန်ပျူတာကို ထိန်းချုပ်ထားလဲဆိုတာ ငါ ကြည့်ချင်သေးတယ်’

ရှီလဲ့သည် စူပါကွန်ပျူတာ ‘ယန်’ ၏ စွမ်းပကားကို အပြည့်အဝ ထုတ်ဖော်လိုက်ပြီး ထိုကမ္ဘာ့အဆင့်မီ ဟက်ကာနောက်သို့ မလျှော့သောဇွဲဖြင့် လိုက်လံခြေရာခံ တိုက်ခိုက်တော့သည်။ တစ်ဖက်လူသည် စူပါကွန်ပျူတာတစ်လုံး၏ စွမ်းအားကို အသုံးပြု၍ ပြန်လည်ခုခံနေသော်လည်း ရှီလဲ့၏ ပြင်းထန်လှသော ဖိနှိပ်မှုကြောင့် အသက်ရှူရပ်မတတ် ဖြစ်သွားရပြီး အလွန်ခက်ခဲစွာသာ ကာကွယ်နေရရှာသည်။

ရှီလဲ့သည် အဆက်မပြတ် တိုက်စစ်ဆင်နေရင်း အဲရစ်ဆင်ကုမ္ပဏီ၏ အဆင့်-၁ ဘော့တ်များကိုပါ ဆွဲခေါ်လာခဲ့ပြီး အမည်မသိ ဟက်ကာကို ပြင်းထန်ပြတ်သားစွာ ထပ်မံ ထိုးနှက်လိုက်ပြန်သည်။

ဆံပင်ရွှေဝါရောင်နှင့် လူငယ်၏ မျက်နှာမှာ အဆက်မပြတ် ကျရောက်လာသော တိုက်ခိုက်မှုများကို ကြည့်ရင်း ပိုမိုဆိုးရွား ညှိုးငယ်လာခဲ့သည်။ မူလက သူသည် ရှီလဲ့ကို ပညာနည်းနည်းပေးရန်နှင့် မိမိ၏ လှုပ်ရှားမှုများကို ဖုံးကွယ်ရန်အတွက် ယဲ့ဖုန်းနှင့် အဖွဲ့ကို ရဲများလက်ထဲ အကွက်ဆင်အပ်နှံရန်သာ ရည်ရွယ်ခဲ့ခြင်း ဖြစ်သည်။

သို့သော်လည်း ရှီလဲ့က ဤမျှအထိ အစွမ်းထက်လိမ့်မည်ဟု သူမထင်ထားခဲ့သလို၊ စူပါကွန်ပျူတာတစ်လုံးကို ဘော့တ်အဖြစ် အသုံးချနိုင်လိမ့်မည်ဟုလည်း လုံးဝ မမျှော်လင့်ထားခဲ့ပေ။ ပုံမှန်အားဖြင့် ကမ္ဘာ့အဆင့်မီ ဟက်ကာတစ်ဦးအဖြစ် သတ်မှတ်ရန် စံနှုန်းနှစ်ခု ရှိသည်။ပထမတစ်ခုမှာ အလွန်မြင့်မားသော နည်းပညာစွမ်းရည် ရှိရမည်ဖြစ်ပြီး၊ ဒုတိယတစ်ခုမှာ ကမ္ဘာ့အဆင့် ထိပ်တန်း အလုံးရေ ၅၀ အတွင်းရှိသော စူပါကွန်ပျူတာတစ်လုံးကို ဘော့တ်အဖြစ် ထိန်းချုပ်ထားနိုင်ခြင်း ဖြစ်သည်။

ထို စူပါကွန်ပျူတာသည် သာမန်စက်ပစ္စည်း ဖြစ်၍မရဘဲ ထိပ်တန်းအလုံးရေ ၅၀ အတွင်း ရှိနေရမည် ဖြစ်သည်။ ထိပ်တန်း အလုံးရေ ၅၀ အတွင်းရှိသော စူပါကွန်ပျူတာကို ထိန်းချုပ်ထားနိုင်မှသာ တကယ့် ကမ္ဘာ့အဆင့်မီ ဟက်ကာအစစ်အမှန် ဖြစ်ပြီး၊ အပြင်ဘက်က စက်များကို ထိန်းချုပ်ထားသူမှာမူ ထိပ်တန်းဟက်ကာတစ်ပိုင်းဟုသာ သတ်မှတ်နိုင်သည်။

ထို ဆံပင်ရွှေဝါရောင်နှင့် လူငယ်သည် မိမိ စိတ်ကူးပေါက်ရာ လိုက်လံနှောင့်ယှက်မိသည့် လူတစ်ယောက်က ကမ္ဘာ့အဆင့်မီ ဟက်ကာအစစ် ဖြစ်နေလိမ့်မည်ဟု အိပ်မက်ပင် မမက်ခဲ့ဖူးပေ။ ဒါက တကယ့်ကို ကံဆိုးလွန်းလှသည်။

ယခုအခါ သူသည် တစ်ဖက်လူ၏ ပိုက်ကွန်အတွင်း ငြိတွယ်နေပြီဖြစ်ပြီး တစ်ဖက်လူ၏ စွမ်းရည်အရ ဆိုလျှင် အနှေးနှင့်အမြန် မိမိ၏ တည်နေရာကို ရှာဖွေတွေ့ရှိသွားလိမ့်မည် ဖြစ်သည်။ အကယ်၍ သူ ကွန်ရက်လိုင်းကို ဖြတ်တောက်လိုက်လျှင်ပင် တစ်ဖက်လူသည် စနစ်မှတ်တမ်း (System Logs) များ၏ သဲလွန်စများအတိုင်း လိုက်ပါကာ မိမိ၏ IP အချက်အလက်ကို ရှာဖွေနိုင်စွမ်း ရှိသည်။

‘ဘာလို့ ဒီလောက်တောင် ကြောက်စရာကောင်းတဲ့ မိစ္ဆာကောင်တွေ များနေရတာလဲ’ ဆံပင်ရွှေဝါရောင်နှင့် လူငယ်က စိတ်ပျက်လက်ပျက် ညည်းတွားလိုက်ပြီးနောက် ချက်ချင်းပင် စိတ်ကို ပြန်လည်စုစည်းကာ ရှီလဲ့နှင့် ထိပ်တိုက်ရင်ဆိုင်ရန် အာရုံအပြည့် စိုက်လိုက်တော့သည်။

ရှီလဲ့သည် စူပါကွန်ပျူတာ ‘ယန်’ ၏ စနစ်အရင်းအမြစ်များကို အသုံးပြု၍ ဆံပင်ရွှေဝါရောင် လူငယ်၏ ကာကွယ်ရေးစနစ်ကို ထိုးနှက်နေရင်း တစ်ဖက်လူ၏ အကန့်အသတ်များကို စမ်းသပ်ကာ တစ်ဖက်လူ အသုံးပြုနေသည့် စူပါကွန်ပျူတာ၏ မည်သူမည်ဝါဖြစ်ကြောင်းကို ဖော်ထုတ်ရန် ကြိုးစားနေသည်။

‘တွက်ချက်မှု အရှိန်က 10 TFLOPS အထိ ရောက်နေတာလား မင်းက သေချာပေါက် “သူတို့” ထဲက တစ်ယောက်ပဲ ငါ မင်းကို မိတော့မယ်’

ရှီလဲ့သည် စိတ်ထဲမှနေ၍ တစ်ဖက်လူ၏ ကာကွယ်ရေးစွမ်းအားကို တွက်ချက်လိုက်သည်။ ကွန်ပျူတာလောကတွင် TFLOPS ဆိုသည်မှာ ကွန်ပျူတာ၏ လုပ်ဆောင်ချက် တွက်ချက်မှုအရှိန်ကို ကိုယ်စားပြုခြင်းဖြစ်ပြီး၊ 1 TFLOPS ဆိုသည်မှာ တစ်စက္ကန့်လျှင် အကြိမ်ရေ တစ်ထရီလီယံ တွက်ချက်နိုင်ခြင်းကို ဆိုလိုသည်။

စူပါကွန်ပျူတာ ‘ယန်’ ၏ အရှိန်မှာ 474 TFLOPS ဖြစ်သည်။ ယခုအချိန်တွင် ဂျပန်နိုင်ငံ၌ ညနက်ပိုင်းအချိန် ဖြစ်သဖြင့် စူပါကွန်ပျူတာ ‘ယန်’ ၏ အသုံးပြုမှုနှုန်းမှာ အလွန်နိမ့်ကျသော အဆင့်သို့ ကျဆင်းနေသည်။ ရှီလဲ့သည် စနစ်စောင့်ကြည့်မှုအရ မိမိအနေဖြင့် အနည်းဆုံး 474 TFLOPS အနက်မှ 40 TFLOPS ခန့်ရှိသော အရင်းအမြစ်များကို ဆွဲထုတ်အသုံးပြုနိုင်ကြောင်း တွေ့ရှိလိုက်သည်။

ရှီလဲ့သည် 20 TFLOPS နီးပါးရှိသော ဧရာမ စနစ်အရင်းအမြစ်ပမာဏကို ဆွဲထုတ်ကာ တစ်ဖက်လူ၏ ကာကွယ်ရေးစနစ်ကို အလုံးအရင်းဖြင့် ချိုးဖျက်ရန် ကြိုးစားလိုက်သည်။ ထို ဆံပင်ရွှေဝါရောင် လူငယ်မှာ ဤမျှ ပြင်းထန်လှသော တိုက်ခိုက်မှုနှင့် ရင်ဆိုင်လိုက်ရသဖြင့် ခေတ္တမျှ ပျာယာခတ်သွားခဲ့သော်လည်း နောက်ဆုံးတွင် သူ၏ များပြားလှသော အတွေ့အကြုံများကြောင့် အလွန်ခက်ခဲစွာဖြင့် ပြန်လည်ခုခံနိုင်ခဲ့သည်။

သို့သော်လည်း ရှီလဲ့၏ မျက်နှာတွင် အပြုံးတစ်ခု ပေါ်ထွက်လာခဲ့သည်။ ‘ဟဟ... မင်း ထိန်းချုပ်ထားတဲ့ စူပါကွန်ပျူတာရဲ့ အမြင့်ဆုံးတွက်ချက်မှုအရှိန်က 20 TFLOPS ပဲ ရှိတာမလား’

မိမိ၏ အတွေးကို သက်သေပြရန်အတွက် ရှီလဲ့သည် နောက်ထပ် ကွန်ပျူတာတွက်ချက်မှု အရင်းအမြစ်များကို ထပ်မံစုစည်းကာ တစ်ဖက်လူထံသို့ ပြင်းထန်စွာ ထပ်မံတိုက်ခိုက်လိုက်ပြန်သည်။

ဆံပင်ရွှေဝါရောင် လူငယ်မှာ ရှီလဲ့၏ တိုက်စစ်ကြောင့် မျက်နှာပျက်သွားခဲ့ရပြီး သူ၏ ကာကွယ်ရေးစနစ်ကြီးမှာ စတင်ပြိုလဲလာခဲ့ပြီ ဖြစ်သည်။

ဤအခြေအနေကို မြင်သောအခါ ရှီလဲ့၏ အပြုံးက ပိုမိုကျယ်ပြန့်လာခဲ့သည်။

‘ဒီလိုကိုး တကယ်ပဲ အမြင့်ဆုံးအရှိန်က 20 TFLOPS ပဲ ရှိတာပဲ မင်း ဘယ်သူလဲဆိုတာ ငါ သိပြီ’

ရှီလဲ့သည် သူ၏ တိုက်စစ်များကို လျင်မြန်စွာ ရုပ်သိမ်းလိုက်ရာ ပြင်းထန်လှသော တိုက်ခိုက်မှုကြီးမှာ တစ်ခဏအတွင်း သဲထဲရေသွန် ဖြစ်သွားခဲ့ပြီး ဆံပင်ရွှေဝါရောင် လူငယ်မှာ အနည်းငယ် ကြောင်တောင်တောင် ဖြစ်ကျန်ခဲ့သည်။ ရှီလဲ့သည် တစ်ဖက်လူ၏ အတွေးများကို ဂရုမစိုက်ဘဲ ယာယီစကားပြောခန်း တစ်ခုကို စတင်လိုက်ပြီး ကီးဘုတ်ပေါ်တွင် အင်္ဂလိပ်စာလုံးတစ်ကြောင်းကို တိုက်ရိုက်ရိုက်နှိပ်လိုက်တော့သည်။

‘မီးတောက်ဓား ရာဖေးလ်... မင်းရဲ့နာမည်ကို ကြားရတာ ကြာပါပြီ၊ ဒါပေမဲ့ အခု ကိုယ်တိုင် ဆုံတွေ့လိုက်ရတော့လည်း မင်းက ပြောသလောက် မဟုတ်ပါလား’

မှန်ပေသည်၊ ပင်လယ်ကမ်းခြေ ဗီလာအတွင်းရှိ ဆံပင်ရွှေဝါရောင် လူငယ်မှာ ကမ္ဘာကြီးကို တုန်လှုပ်စေခဲ့သည့် အဖြစ်အပျက်ကြီး သုံးခုကြောင့် ကျော်ကြားလှသော မီးတောက်ဓားတော် ‘ရာဖေးလ်’ပင် ဖြစ်သည်။

သူ ထိန်းချုပ်ထားသော စူပါကွန်ပျူတာမှာ ကမ္ဘာ့အဆင့် ၁၉ ရှိသည့် ‘သန်ဒါ’ ဖြစ်ပြီး အမြင့်ဆုံးတွက်ချက်မှုအရှိန်မှာ 20 TFLOPS မျှသာ ရှိသဖြင့် ရှီလဲ့၏ စူပါကွန်ပျူတာ ‘ယန်’ ၏ အဆင့်အတန်းကို မှီရန် ဝေးပေသည်။

ပင်လယ်ကမ်းခြေ ဗီလာအတွင်းရှိ ဆံပင်ရွှေဝါရောင် လူငယ် ရာဖေးလ်သည် ထိုစာကို မြင်သည်နှင့် ချက်ချင်းပင် မျက်နှာ အလွန်ပျက်သွားခဲ့သည်။ သူသည် လက်သီးကို ကျစ်ကျစ်ပါအောင် ဆုပ်လိုက်ပြီး ခက်ထန်သော မျက်ဝန်းများဖြင့် ယာယီစကားပြောခန်းအတွင်းသို့ အင်္ဂလိပ်စာလုံးများကို ပြန်လည်ရိုက်နှိပ်လိုက်၏။ သို့သော်လည်း သူ အတည်ပြုပြီး မပို့နိုင်မီမှာပင် ရှီလဲ့သည် ကွန်ရက်လိုင်းကို ဖြတ်တောက်ပြီး ထွက်ခွာသွားခဲ့ပြီ ဖြစ်သည်။

ကွန်ရက်လိုင်းကို ဖြတ်တောက်ပြီးနောက် ရှီလဲ့သည် မိမိ ကျူးကျော်ဝင်ရောက်ခဲ့သည့် အမှတ်အသား အားလုံးကို လျင်မြန်စွာ ဖျက်ဆီးပစ်လိုက်ပြီး သူ တည်းခိုနေသည့် ဟိုတယ်၏ Check-in အချက်အလက်များကိုပင် လုံးဝ အစအနမကျန်အောင် ဖျက်ဆီးပစ်လိုက်သည်။

အကြောင်းမှာ တစ်ဖက်လူက ရာဖေးလ် ဖြစ်နေသောကြောင့် ဖြစ်သည်။

ရှီလဲ့အနေဖြင့် ရာဖေးလ်ကို အနိုင်ယူနိုင်ခဲ့သော်လည်း ရာဖေးလ်၏ နောက်ကွယ်တွင် ရှိနေသော အဖွဲ့အစည်းကြီးမှာ လက်ရှိ ရှီလဲ့အနေဖြင့် ရင်ဆိုင်နိုင်စွမ်း ရှိသည့် အရာမျိုး မဟုတ်သေးပေ။

ထို အဖွဲ့အစည်းကြီးမှာ သူ၏ ယခင်ဘဝတုန်းက သူ့ကို စွန့်ပစ်ခဲ့သည့် အဖွဲ့အစည်းကြီးပင် ဖြစ်သည်။

ထို အဖွဲ့အစည်းကြီးသည် မည်မျှအထိ အစွမ်းထက်ပြီး ကြောက်စရာကောင်းသည်ကို ရှီလဲ့တစ်ယောက် အသိဆုံး ဖြစ်သည်။

ရှီလဲ့သည် မိမိ၏ အမည်ဝှက် များအဖြစ် ကောင်းကင်တမန်နာမည်မျိုးစုံကို အသုံးပြုရတာလည်း အကြောင်းရင်းမှာ ထို အဖွဲ့အစည်းကြီးကြောင့်ပင် ဖြစ်သည်။ သူသည် ထိုအမည်ဝှက်များကို အသုံးပြု၍ ထိုအဖွဲ့အစည်းကြီး၏ အာရုံစိုက်မှုကို ဆွဲဆောင်ရန် မျှော်လင့်နေခြင်း ဖြစ်သည်။

ထို အဖွဲ့အစည်းကြီး၏ အမည်မှာ’ကောင်းကင်တမန်ကောင်စီ’ သို့မဟုတ် အလွယ်အားဖြင့် ‘P’ ဟု ခေါ်ဆိုကြသည်။

၎င်းသည် လွန်စွာ အစွမ်းထက်သော်လည်း အလွန်အမင်း လျှို့ဝှက်ဆန်းကြယ်ပြီး လူသိနည်းလှသော ဟက်ကာအဖွဲ့အစည်းကြီး ဖြစ်သည်။

ပြင်ပကမ္ဘာတွင် မည်သည့် နာမည်ဂုဏ်သတင်းမှ ရှိမနေသော အဖွဲ့အစည်းကြီးလည်း ဖြစ်သည်။

သို့သော်လည်း ရှီလဲ့ သိထားသည်မှာ ရာဖေးလ်သည် ထိုကောင်းကင်တမန်ကောင်စီ၏ အားအနည်းဆုံး အဖွဲ့ဝင်တစ်ဦးသာ ဖြစ်သည်ဟူ၍ ဖြစ်သည်။ ကောင်စီ၏ အခြားအဖွဲ့ဝင်များသည် ရာဖေးလ်ကဲ့သို့ နာမည်မကြီးကြသော်လည်း ၎င်းတို့၏ စွမ်းရည်မှာ ရာဖေးလ်ထက် သေချာပေါက် ပိုမိုမြင့်မားကြသည်။

ထို့ကြောင့် ရှီလဲ့သည် တစ်ဖက်လူမှာ ရာဖေးလ်ဖြစ်ကြောင်း အတည်ပြုပြီးသည်နှင့် ချက်ချင်း နောက်ဆုတ်ခဲ့ပြီး သဲလွန်စအားလုံးကို ရှင်းလင်းကာ မိမိကိုယ်ကိုယ် အမှောင်ထုအတွင်းသို့ ပြန်လည်ကွယ်ဝှက်လိုက်ခြင်း ဖြစ်သည်။ သူသည် ကလဲ့စားချေချင်ပြီး ထိုအဖွဲ့အစည်းကြီးကို နောက်ကွယ်မှနေ၍ ဆွဲထုတ်ချင်သော်လည်း၊ လက်ရှိအချိန်တွင် မိမိအနေဖြင့် ကောင်းကင်တမန်ကောင်စီ၏ ပြိုင်ဘက် မဟုတ်သေးကြောင်းကိုမူ သူ ကောင်းစွာ သဘောပေါက်ထားသည်။

အမှောင်ထဲတွင် ပုန်းကွယ်နေပြီး တိတ်တဆိတ် အင်အားတောင့်တင်းအောင် တည်ဆောက်ခြင်းဖြင့်သာ ကောင်းကင်တမန်ကောင်စီကို ကလဲ့စားချေနိုင်မည့် အခွင့်အရေး ရရှိလိမ့်မည် ဖြစ်သည်။

ကျူးကျော်မှု သဲလွန်စများနှင့် ဟိုတယ်တည်းခိုမှု မှတ်တမ်းများကို ဖျက်ဆီးပြီးနောက် ရှီလဲ့သည် ဟိုတယ်၏ စောင့်ကြည့်ဗီဒီယို မှတ်တမ်းအားလုံးကိုပါ ဖျက်ပစ်လိုက်ပြီး လုံခြုံရေးစောင့်ကြည့်စနစ်ကို ယခင်ဗီဒီယိုဟောင်းများဖြင့်သာ ပတ်ပြထားကာ အခန်းတွင်းရှိ သဲလွန်စအားလုံးကိုပါ သန့်ရှင်းရေး လုပ်လိုက်သည်။

အခန်းတွင်း၌ ထင်ရှားသော သက်သေအထောက်အထား တစ်ခုမှ ကျန်ရှိမနေတော့ကြောင်း သုံးကြိမ်တိုင်တိုင် သေသေချာချာ စစ်ဆေးပြီးနောက် ရှီလဲ့သည် မိုင်းတစ်လုံးနှင့် ဓာတ်ဆီပုံးအကြီးကြီး တစ်ပုံးကို ထုတ်ယူလိုက်တော့သည်။

သူသည် ဤဟိုတယ်တွင် သုံးရက်တိုင်တိုင် နေထိုင်ခဲ့ခြင်းဖြစ်ရာ မည်မျှပင် သန့်ရှင်းရေးလုပ်ပါစေ သက်သေအချို့ ကျန်ရစ်နေနိုင်သေးသည်။ ကောင်းကင်တမန်ကောင်စီနှင့် ရင်ဆိုင်ရချိန်တွင် ရှီလဲ့သည် လုံးဝ ပေါ့ဆ၍မရသဖြင့် သူ သုံးရက်တိုင်တိုင် နေထိုင်ခဲ့သော ဤအခန်းကို လုံးဝ ဖျက်ဆီးပစ်ရန် ဆုံးဖြတ်လိုက်ပြီး သက်သေအားလုံးကို မီးတောက်များအတွင်း၌ ပြာကျသွားစေရန် ပြင်ဆင်လိုက်ခြင်း ဖြစ်သည်။

သူသည် အခန်းအနှံ့သို့ ဓာတ်ဆီများကို လောင်းထည့်လိုက်ပြီး အထူးသဖြင့် ရေချိုးခန်းအတွင်း၌ ပို၍ အများအပြား လောင်းထည့်လိုက်သည်။ မျက်နှာသုတ်ပုဝါများ၊ သွားတိုက်တံများနှင့် အခြားပစ္စည်းများကို အဓိကထား၍ လောင်းချလိုက်၏။ ဓာတ်ဆီများ အခန်း၏ နေရာအနှံ့သို့ ပျံ့နှံ့သွားသောအခါ ရှီလဲ့သည် မိုင်း၏အချိန်ကို မိနစ်သုံးဆယ်အဖြစ် သတ်မှတ်ကာ စတင်လိုက်တော့သည်။

မိုင်း၏ အချိန်ရေတွက်မှု စတင်လာသည်နှင့်အမျှ ရှီလဲ့သည် သူ၏ လပ်တော့ပ်ကွန်ပျူတာကို သယ်ဆောင်ကာ နှာခေါင်းပေါ်ရှိ မျက်မှန်ကို အနည်းငယ် ပင့်တင်လိုက်ပြီး ခပ်ဖျော့ဖျော့ ပြုံးလျက် ဟိုတယ်အတွင်းမှ ထွက်ခွာသွားခဲ့တော့သည်။

ကမ္ဘာ့အခြားတစ်ဖက်ခြမ်းရှိ ပင်လယ်ကမ်းခြေ ဗီလာအတွင်း၌မူ ဆံပင်ရွှေဝါရောင် လူငယ် ရာဖေးလ်သည် သူ၏ ကီးဘုတ်ကို ဒေါသတကြီး ရိုက်ခွဲပစ်လိုက်ပြီး အော်ဟစ်လိုက်လေသည် “မင်း ဘယ်သူပဲဖြစ်ဖြစ် ငါ မင်းကို သေချာပေါက် ဖမ်းဆီးပြမယ်”

“မဟာ ရာဖေးလ်ကို စော်ကားရဲတယ်ပေါ့လေ... ငါ မင်းရဲ့ဘဝကို သေတာထက် ပိုဆိုးအောင် လုပ်ပြမယ်”