အခန်း ၁၁၂၂

အခန်း ၁၁၂၂ စွမ်းအား

"မင်း ငါတို့ကို လှောင်ပြောင်နေတာလား။ ဒါမှမဟုတ် သေခါနီးမို့ ရူးသွားတာလား။ ဘာပဲဖြစ်ဖြစ် ရပါတယ်လေ။ မင်းကို သတ်ဖို့ဆိုရင် ငါတို့ထဲက တစ်ယောက်တည်းနဲ့တင် လုံလောက်ပါတယ်" အမှန်တရား တာအိုဂိုဏ်းချုပ်က အော်ဟစ်လိုက်ပြီးနောက် ဝိညာဉ်နက်ဂိုဏ်းချုပ်ကို လှမ်းကြည့်လိုက်၏။

​"မင်း သွားပြီး သူ့ကို သတ်လိုက်။ ကျန်တဲ့ လူတွေက အဲဒီမြွေကို အာရုံစိုက်ထားမယ်" သူက ဆိုသည်။

​ထိုစကားကို ကြားလိုက်ရသောအခါ လုံချန်းက မရယ်ဘဲ မနေနိုင်တော့ချေ။

​"မြွေကြီးက မင်းတို့ကို ပညာပေးတာကို ငါလည်း တကယ် ကြည့်ချင်တာပေါ့။ ဒါပေမဲ့ စိတ်မကောင်းစရာက အဲဒီအလုပ်ကို ငါကိုယ်တိုင်ပဲ လုပ်ရမယ် ထင်တယ်" သူက ရယ်မောခြင်းကို ရပ်တန့်လိုက်ပြီးနောက် ဆိုလိုက်၏။

​"ငါ့မှာ ပိုပြီး အရေးကြီးတဲ့ ကိစ္စတွေ လုပ်စရာရှိနေလို့ မင်းတို့ရဲ့ ဂိုဏ်းတွေကို လိုက်ပြီး မဖျက်ဆီးတော့ဘူးလို့ တကယ်ပဲ စိတ်ကူးထားတာ။ ဒါပေမဲ့ မင်းတို့ကိုယ်တိုင်က ငါ့ဆီကို အရောက်လာခဲ့ကြတာပဲ။ မင်းတို့တွေက တကယ့်ကို အလိုက်သိတတ်ကြတယ်လို့ ငါ ပြောရလိမ့်မယ်"

​"အခု မင်းတို့အားလုံး ဒီကို ရောက်နေကြပြီဆိုတော့ မင်းတို့ဂိုဏ်းတွေက ငါ့ရဲ့ မိသားစုကို ဖျက်ဆီးပြီး ငါ့လူတွေကို သတ်ဖြတ်ခဲ့တဲ့အတွက် ငါ တစ်ခါတည်း စာရင်းရှင်းလိုက်တာ ပိုကောင်းတာပေါ့။ မင်းတို့အားလုံးကို မြွေကြီးလက်ထဲချည်းပဲ လွှဲပေးထားလို့ မဖြစ်ဘူးလေ"

​လုံချန်း စကားပြောအဆုံးတွင် သူ့ခန္ဓာကိုယ်မှာ လေထုထဲ၌ စတင်ဝဲပျံလာပြီး အထက်သို့ မြင့်တက်သွားခဲ့တော့သည်။

​လုံချန်း လေထဲတွင် ပျံသန်းနေသည်ကို မြင်လိုက်ရသောအခါ ထိုအချက်က မည်သည်အား ဆိုလိုသည်ကို အားလုံးက သိရှိထားကြသဖြင့် မှင်တက်မသွားသောသူ တစ်ယောက်မျှ မရှိခဲ့ချေ။

​လေပေါ်တွင် လမ်းလျှောက်နိုင်ခြင်းက ထိုသူသည် ကောင်းကင်နယ်ပယ်၌ ရှိနေကြောင်း ဆိုလိုသော်လည်း လေထဲတွင် အမှန်တကယ် ပျံသန်းနိုင်ရန်အတွက်မူ အနည်းဆုံး ကောင်းကင်ဘုံနယ်ပယ်သို့ ရောက်ရှိရမည် ဖြစ်ပေသည်။

​ဂိုဏ်းချုပ်များသည် ကောင်းကင်ဘုံ နယ်ပယ် အစောပိုင်းအဆင့် ကျင့်ကြံခြင်း ရှိကြသဖြင့် လေထဲ၌ ပျံသန်းနိုင်ကြခြင်း ဖြစ်သည်။ သို့သော် လုံချန်းကပါ ပျံသန်းနိုင်သည် ဆိုလျှင် ဤသည်က မည်သည်ကို ဆိုလိုကြောင်း နေ့ခင်းကဲ့သို့ အထင်အရှားပင် မဟုတ်လော။

​"မဖြစ်နိုင်တာ၊ ကလေးတစ်ယောက်က ဘယ်လိုလုပ်ပြီး ကောင်းကင်ဘုံ အဆင့် ကျင့်ကြံသူတစ်ယောက် ဖြစ်လာနိုင်ရတာလဲ။ မင်း ဒါကို ဘယ်လိုလုပ်လိုက်တာလဲ" အမှန်တရား တာအိုဂိုဏ်းချုပ်က ထိတ်လန့်တုန်လှုပ်စွာဖြင့် အော်ဟစ်လိုက်မိသည်။

​ဝိညာဉ်နက်ဂိုဏ်းချုပ်ပင်လျှင် မှင်တက်သွားခဲ့ရ၏။ လုံချန်း မိမိတို့ဂိုဏ်းသို့ ဝင်ရောက်ခဲ့သည်မှာ သိပ်မကြာသေးပေ။

​သူ ထွက်ခွာသွားခဲ့စဉ်ကပင် မြေကမ္ဘာအဆင့် ကျင့်ကြံသူ တစ်ယောက်သာ ရှိသေးသည် မဟုတ်လော။ သူသည် ဤမျှ တိုတောင်းသော အချိန်အတွင်းမှာ ကောင်းကင်ဘုံ နယ်ပယ်သို့ မည်သို့အလျင်အမြန် ရောက်ရှိသွားခဲ့သနည်း။ သူ၏ ကံတရားက အဘယ်ကြောင့် ဤမျှ ကောင်းမွန်နေရသနည်း။ ကျင့်ကြံခြင်းမှာ ကောင်းကင်ဘုံ နယ်ပယ်သို့ ရောက်ရှိရုံတင်မကဘဲ ကောင်းကင်ဘုံ အဆင့် သားရဲကြီး တစ်ကောင်ကိုပါ ပိုင်ဆိုင်ထားသေးသည်။

​လူတိုင်းက လုံချန်းသည် ထူးဆန်းသည့် နတ်ဘုရား ဆေးပင်ကို တွေ့ရှိခဲ့ပြီး စားသုံးခဲ့ခြင်းကြောင့် ယခုကဲ့သို့ အောင်မြင်မှုမျိုး ရရှိခဲ့ခြင်း ဖြစ်မည်ဟု ယုံကြည်သွားကြတော့သည်။

​ကျင့်ကြံခြင်း အဆင့်ကို ယခုကဲ့သို့ အလွယ်တကူ မြင့်တက်စေနိုင်သော ဆေးပင်ဆိုပါက ၎င်းမှာ အမှန်တကယ် ကြီးမားသော ရတနာတစ်ပါး ဖြစ်ရပေမည်။

​အကယ်၍ သူတို့သာ ထိုအရာကို ရရှိခဲ့မည်ဆိုပါက မည်မျှအထိ အံ့မခန်း ဖြစ်သွားလိမ့်မည်နည်းဟု ဂိုဏ်းချုပ်များက မတွေးဘဲ မနေနိုင်ကြတော့ချေ။ သူတို့၏ ကျင့်ကြံခြင်းမှာလည်း အရှိန်အဟုန်ဖြင့် တိုးတက်သွားနိုင်သည် မဟုတ်လော။

​ထိုအတွေးနှင့်အတူ ကောင်းကင်ဘုံ သတ်ဖြတ်သူဂိုဏ်းချုပ်က ရှေ့သို့ တစ်လှမ်းတိုးလာပြီး လုံချန်းကို စတင် ခြိမ်းခြောက်လေတော့သည်။

​"မင်း ဒီလို အောင်မြင်မှုကို ရဖို့အတွက် ဘယ်လိုကောင်းကင်ဘုံအဆင့် ဆေးပင်ကို စားခဲ့တာလဲ။ အဲဒီအပင်ကို တွေ့ခဲ့တဲ့နေရာကို ငါ့ကို အခုချက်ချင်း ပြောစမ်း။ တကယ်လို့ မင်း ငါတို့ကို အဲဒီဆေးပင်တွေဆီ ခေါ်သွားပေးနိုင်ရင် မင်းကို အသက်ချမ်းသာပေးဖို့ ငါတို့ စဉ်းစားပေးနိုင်တယ်" သူက လုံချန်းကို သတိပေးလိုက်၏။

​"ဪ... မင်းတို့က အဲဒီဆေးပင်ကို လိုချင်တာလား။ အဲဒီဆေးပင်ရဲ့ နာမည်က အောင်မြင်မှုရဖို့အတွက် အပြင်းအထန် ကြိုးစား အားထုတ်ခြင်းလို့ ခေါ်တယ်။ မင်းတို့အားလုံးက ဒီလောက်အထိ အသက်ကြီးနေကြပေမဲ့ ကျင့်ကြံခြင်းမှာ တအားကို နှေးကွေးလွန်းတယ်။ မင်းတို့အတွက် ကျင့်ကြံရတာ ခက်ခဲနေရုံနဲ့ တခြားလူတွေလည်း တူတူပဲလို့ မသတ်မှတ်လိုက်နဲ့လေ။ လူတိုင်းက အောင်မြင်မှုရဖို့အတွက် ဆေးပင်တွေကို လိုအပ်နေတာ မဟုတ်ဘူး" လုံချန်းက လှောင်ပြုံးပြုံးရင်း ပြန်လည် ချေပလိုက်သည်။

​လုံချန်း၏ ဖြေကြားချက်ကို ကြားရသောအခါ ဂိုဏ်းချုပ်များသည် မိမိတို့မှာ ကလေးတစ်ယောက်၏ စော်ကားခြင်းအား ခံလိုက်ရသည်ဟု ခံစားလိုက်ရတော့၏။

​အဖြူရောင်ဂိုဏ်း တစ်ဂိုဏ်းမှ ဂိုဏ်းချုပ်က လုံချန်းကို အပြစ်တင်ရန် ပါးစပ်ဟလိုက်သည်။

​"ကောင်လေး၊ မင်းရဲ့ အဆင့်အတန်းကို မမေ့နဲ့ဦး။ မင်း ဘယ်သူနဲ့ စကားပြောနေလဲဆိုတာကို မမေ့နဲ့။ မင်းက ငါတို့လိုပဲ ကောင်းကင်ဘုံအဆင့် ကျင့်ကြံသူတစ်ယောက် ဖြစ်နေရင်တောင် မင်းက ဘာမှမဟုတ်သေးဘူး။ ငါတို့အားလုံး ပူးပေါင်းလိုက်ရင် မင်းနဲ့ မင်းရဲ့မြွေက တစ်စက္ကန့်တောင် ခံမှာမဟုတ်ဘူး။ ဒါကြောင့် ငါတို့စကားကို နားထောင်ပြီး..."

​သူ စကားကို စတင် ပြောဆိုခဲ့သော်လည်း စကားပင် မဆုံးသေးမီ လုံချန်း၏ ခန္ဓာကိုယ်မှာ လျှပ်ခနဲ လှုပ်ရှားသွားသည်အား မြင်လိုက်ရသည်။ နောက်ခဏတွင်မူ လုံချန်းသည် ထိုဂိုဏ်းချုပ်၏ အရှေ့တည့်တည့်တွင် ရောက်ရှိနေခဲ့ပြီ ဖြစ်သည်။

​ဝတ်ရုံနက်နှင့် ဂိုဏ်းချုပ်က အနောက်သို့ ပြန်ဆုတ်ရန် ကြိုးစားလိုက်သော်လည်း မတတ်နိုင်ခင် လုံချန်း၏ လက်က သူ့ရင်ဘတ်အတွင်းသို့ တိုးဝင်လာသည်ကို မြင်တွေ့လိုက်ရတော့၏။

​လုံချန်းသည် မည်သည့်လက်နက်ကိုမျှ အသုံးမပြုခဲ့ချေ။ သူသည် ထိုလူ၏ ရင်ဘတ်ကို ထိုးဖောက်ကာ နှလုံးသားအား ဆုပ်ကိုင်ရန် လက်ကိုသာ အသုံးပြုခဲ့ခြင်း ဖြစ်သည်။

​လုံချန်းက သူ့နှလုံးသားကို ဆုပ်ကိုင်ထားသဖြင့် ဂိုဏ်းချုပ်၏ မျက်လုံးများမှာ အဝိုင်းသား ဖြစ်သွားခဲ့ရသည်။ သူသည် လုံချန်းကို အသနားခံရန် ပါးစပ်ဟလိုက်သော်လည်း လုံချန်းက လက်ကို အပြင်သို့ မဆွဲထုတ်မီ သူ့နှလုံးသားအား ချေမွပစ်လိုက်ပြီ ဖြစ်သဖြင့် အချိန်နှောင်းသွားခဲ့ပြီ ဖြစ်သည်။

​"ငါ့ကို ငါ့ရဲ့နေရာအကြောင်း ထပ်ပြီး သတိပေးချင်တဲ့လူ ရှိသေးလား" လုံချန်းက ဓားကို နောက်ဆုံးတွင် ထုတ်ဖော်လိုက်ရင်း မေးလိုက်၏။

​လူတိုင်း မိမိတို့ မြင်တွေ့လိုက်ရသောအရာကြောင့် မှင်တက်နေဆဲမှာပင် သူ့ခန္ဓာကိုယ်မှာ နောက်တစ်ကြိမ် လျှပ်ခနဲ လှုပ်ရှားသွားပြီး ပျောက်ကွယ်သွားခဲ့ပြန်သည်။

​ဤကဲ့သို့သော စွမ်းအားနှင့် ဤမျှသော အရှိန်အဟုန်မျိုးက ကောင်းကင်ဘုံ နယ်ပယ် အစောပိုင်း အဆင့် ကျင့်ကြံသူ တစ်ယောက် ပိုင်ဆိုင်နိုင်သော အရာမျိုး လုံးဝ မဟုတ်ချေ။ ဤကောင်က အစစ်အမှန် မည်သို့သော လူမျိုးနည်း။ သူက အမှန်တကယ် မည်မျှထိ သန်မာနေသနည်း။ သူက ကောင်းကင်ဘုံ အဆင့် အထွတ်အထိပ် ကျင့်ကြံသူ တစ်ယောက်လော။

​သူတို့သည် လုံချန်းကို သတ်ဖြတ်ရန်အတွက် အကြီးမားဆုံး အတားအဆီးမှာ မြွေဘုရင် ဖြစ်မည်ဟု ထင်မှတ်ထားခဲ့ကြသော်လည်း ယခုမူ သူတို့ မှားယွင်းသွားခဲ့ပြီ ဖြစ်ပုံရသည်။ အကြီးမားဆုံး အတားအဆီးမှာ ထိုမြွေကြီးမဟုတ်ဘဲ သူတို့၏ ပစ်မှတ်ကိုယ်တိုင် ဖြစ်နေခဲ့သည် မဟုတ်လော။

​သူတို့က မြွေဘုရင်က သန်မာပြီး လုံချန်းက အားနည်းသည်ဟု ထင်မှတ်ထားခဲ့ကြသော်လည်း ယခု လုံချန်း လှုပ်ရှားလိုက်သောအခါ သူတို့၏ အတွေးအမြင် တစ်ခုလုံး ပြိုလဲပျက်စီးသွားခဲ့ရပြီ ဖြစ်သည်။ လုံချန်းက သူတို့ထက် မည်သည့်နည်းနှင့်မျှ အားနည်းမနေချေ။

​နှမြောစရာကောင်းသည်မှာ တိုက်ပွဲက စတင်နေပြီဖြစ်သဖြင့် သူတို့သည် ဤအချက်ကို နောက်ကျမှ သတိပြုမိခဲ့ကြခြင်း ဖြစ်ပေသည်။

​လုံချန်း၏ ခန္ဓာကိုယ်မှာ တရစပ် လျှပ်ခနဲ လှုပ်ရှားနေခဲ့ပြီး သူသည် ဂိုဏ်းချုပ်များ ရှေ့တွင် တစ်ယောက်ပြီး တစ်ယောက် ပေါ်လာကာ သူတို့ကို တစ်ဦးပြီးတစ်ဦး ပိုင်းဖြတ် သတ်ဖြတ်နေခဲ့တော့၏။

​ဂိုဏ်းချုပ်များသည် လုံချန်းကို ရှာဖွေပြီး ပြန်လည်တိုက်ခိုက်ရန် ကြိုးစားခဲ့ကြသော်လည်း သူတို့၏ အရှိန်အဟုန်မှာ ဆက်တိုက်ဆိုသလို သတ်ဖြတ်နေသော စစ်နတ်ဘုရား တစ်ပါးကဲ့သို့ ဖြစ်နေသည့် လုံချန်းနှင့် နှိုင်းယှဉ်လျှင် အလွန်တရာ နှေးကွေးလွန်းသည်။

​သူတို့သည် လုံချန်း သတ်ဖြတ်ချင်သည့် အချိန်၌သာ တစ္ဆေတစ်ကောင်ကဲ့သို့ ပေါ်လာပြီး ပြန်လည် ပျောက်ကွယ်သွားတတ်သဖြင့် အများအားဖြင့် လုံချန်းကို မျက်စိဖြင့်ပင် အမိအရ မမြင်နိုင်ကြချေ။

​...

​မင်ယုနှင့် ကျိချင်းတို့သည် လုံချန်း၏ တိုက်ပွဲများကို ယခင်ကတည်းက မြင်တွေ့ဖူးပြီးသားဖြစ်သဖြင့် သူ မည်မျှထိ တော်ကြောင်း ကောင်းစွာသိရှိထားကြရာ အံ့သြမနေခဲ့ကြချေ။

​သူမတို့ အနားတွင် ရပ်နေသော အခြားမိန်းကလေးတစ်ယောက်ဖြစ်သည့် ချူမြောင်မှာမူ လုံချန်း၏ ကြီးမားသော တိုးတက်မှုအပေါ် မှင်တက်လျက် ပါးစပ်အဟောင်းသားဖြင့် ရပ်ကြည့်နေမိသည်။

​လွန်ခဲ့သည့် အချိန်အနည်းငယ်ကတင် လုံချန်းသည် အထွတ်အထိပ် မြေကမ္ဘာအဆင့် ကျင့်ကြံသူများကို ရင်ဆိုင်ရန်အတွက် အပြင်းအထန် ရုန်းကန်ခဲ့ရသေးသည်။ အခုတော့ သူသည် ဤကမ္ဘာ၏ အသန်မာဆုံးသော ကျင့်ကြံသူများကို မိမိတစ်ယောက်တည်းဖြင့် ယှဉ်ပြိုင်တိုက်ခိုက်နိုင်နေပြီ ဖြစ်၏။ သူ၏ တိုးတက်မှုနှုန်းနှင့် သူ၏ ပါရမီမှာ တကယ့်ကို မိစ္ဆာတစ်ကောင်ကဲ့သို့ ထူးခြားဆန်းပြားပေသည်။

​သူမအနေဖြင့် အကယ်၍ လုံချန်းနှင့်သာ အတူ လိုက်ပါသွားခဲ့မည်ဆိုပါက မိမိသည်လည်း ထိုကဲ့သို့ သန်မာလာနိုင်မည်လော မတွေးဘဲ မနေနိုင်တော့ချေ။

​‘မဟုတ်ဘူး... သူက လုံးဝကို သီးခြားမျိုးနွယ်စုတစ်စုလို ဖြစ်နေတာ။ သူ ဒီနေရာမှာ ရှိနေတုန်းကတောင် သူ့ကို ရင်ဘောင်တန်းဖို့ဆိုတာ ဘယ်တုန်းကမှ မဖြစ်နိုင်ခဲ့တာပဲ။ ပိုပြီး သန်မာလာဖို့က သူ့ရဲ့ ကံကြမ္မာပဲလေ။ ငါ သူ့ကို ရင်ဘောင်မတန်းနိုင်သလို ဘယ်တော့မှလည်း ရင်ဘောင်တန်းနိုင်မှာ မဟုတ်ဘူး။ သူက ငါ့အနေနဲ့ ငေးကြည့်လို့ပဲ ရနိုင်ပြီး ဘယ်တော့မှ ဆုပ်ကိုင်လို့ မရမယ့် တောက်ပတဲ့ ကြယ်တစ်ပွင့်နဲ့ တူတယ်’ ချူမြောင်က တွေးတောရင်း သက်ပြင်းချလိုက်မိသည်။

​တာရာနှင့် ရိုလီတို့သည်လည်း လုံချန်း တိုက်ခိုက်နေသည်ကို ပါးစပ်အဟောင်းသားဖြင့် ကြည့်ရှုနေခဲ့ကြ၏။

​"ဒါက ဒဏ္ဍာရီလာ လူသားတွေရဲ့ စွမ်းအားလား" တာရာက မျက်မှောင်ကုတ်ရင်း မေးလိုက်မိလေတော့သည်။