အခန်း ၃၈၁

အခန်း (၃၈၁) ကောင်းဖန်နိုင်ငံသို့ သွားရောက်၍ ကောက်နှံများကို လုယက်ခြင်း

လျန်ရှီးမြို့။

မဟာချင်စစ်တပ်၏ ကျားဖြူစစ်တပ် စစ်သူကြီး ချောင်ချင်းကန်းသည် စစ်ကောင်စီတွင် တပ်စွဲထား၏။

ထိုအခိုက်တွင် ဟင်းလင်းပြင်နယ်ပယ်က ပြဲဟသွားပြီး ၎င်းထဲမှ တာအိုပုံရိပ်တစ်ခု ထွက်ပေါ်လာသည်။

၎င်းမှာ ချီလင်ခန်းမကြီး၏ ဒုတိယခန်းမသခင် ရွှမ်ယွမ်ဖေးဟယ်ပင်ဖြစ်၏။

"စစ်သူကြီးချောင်... ကျုပ်ဆီမှာ ခင်ဗျားအတွက် သတင်းကောင်းတစ်ခု ရှိတယ်..."

"မဟာလီစစ်တပ်က ဟင်းလင်းပြင် ဝိညာဉ်ရတနာတစ်ခုနဲ့ ခေါ်ဆောင်သွားခံရပြီး အရိပ်အယောင်တောင် မကျန်တော့ဘဲ ပျောက်ကွယ်သွားပြီ..."

"အင်အား နှစ်သိန်းတစ်သောင်းရှိတဲ့ ကောင်းဖန်စစ်တပ်ကလည်း တစ်ညလုံး ခရီးနှင်ပြီး ကောင်းဖန်နိုင်ငံကို ပြန်ဆုတ်သွားကြပြီ..."

"ကောင်းဖန်စစ်တပ်ရဲ့ ဆုတ်ခွာရာလမ်းကြောင်းက ဝမ့်ရှန်းတောင်တန်းရဲ့ ရိက္ခာနဲ့ ထောက်ပံ့ရေး လမ်းကြောင်းတစ်လျှောက်မှာပဲ ဖြစ်တယ်..."

ဒုတိယခန်းမသခင် ရွှမ်ယွမ်ဖေးဟယ်သည် ပြန်ရောက်ရောက်ချင်းပင် သတင်းကောင်းကို မျှဝေလိုက်ခြင်း ဖြစ်၏။

ချောင်ချင်းကန်းသည် ယနေ့နံနက်တွင် လျန်ရှီးမြို့အား မဟာလီစစ်တပ်က တိုက်ခိုက်လာမည့်အရေးအတွက် မနေ့ကတည်းက သူ၏ စစ်သူကြီးများနှင့်အတူ ကာကွယ်ရေးဗျူဟာများကို ချမှတ်နေခဲ့ခြင်းဖြစ်ရာ ဤသတင်းကို ကြားလိုက်ရသောအခါ အလွန်အမင်း တုန်လှုပ်သွားတော့သည်။

"ဝိညာဉ်ရတနာ..."

"မဟာလီမင်းဆက်မှာ တကယ့်ကို အမွေအနှစ်တချို့ ရှိနေတာပဲ... သူတို့က ဝိညာဉ်ရတနာတစ်ခုကိုတောင် ချန်ထားရစ်ခဲ့သေးတယ်..."

"ဒါပေမဲ့ ဒါကလည်း ကောင်းပါတယ်လေ... မဟာလီစစ်တပ်ကသာ လျန်ရှီးမြို့ကို မတိုက်ခိုက်ဘူးဆိုရင် ကျုပ်တို့ရဲ့ ကျားဖြူစစ်တပ်က စစ်သည်တစ်ယောက်မှ ဆုံးရှုံးရမှာ မဟုတ်ဘူး..."

"အခု ကောင်းဖန်စစ်တပ်ကလည်း ဆုတ်ခွာသွားပြီဆိုတော့ ကျုပ်တို့ ရှီးလန်စီရင်စုကို ပြန်သိမ်းဖို့ အချိန်ကျပြီပေါ့..."

ချောင်ချင်းကန်းသည် ဒုတိယခန်းမသခင် ရွှမ်ယွမ်ဖေးဟယ်၏ စကားများကို မည်သို့မျှ သံသယမဝင်ဘဲ နှလုံးသွင်းလိုက်၏။

ဤသတင်းအချက်အလက်ကို ကြားသိပြီးနောက် ချောင်ချင်းကန်းက အစီအစဉ်သစ်တစ်ခုကို ချက်ချင်း ရေးဆွဲလိုက်သည်။

ယခုအခါ မဟာချင်မင်းဆက်ကို စတင်တည်ထောင်ခါစသာ ရှိသေးသဖြင့် ပထမဆုံးဧကရာဇ် ဟုန်ယွမ်ကျီက ချောင်ချင်းကန်းအား ရှီးလန်စီရင်စုကို ပြန်လည်သိမ်းပိုက်ရန်သာ စေလွှတ်ခဲ့ပြီး စစ်ပွဲကို ထပ်မံချဲ့ထွင်လိုခြင်း မရှိပေ။

ထို့ကြောင့် ချောင်ချင်းကန်း၏ အကြံအစည်မှာ ရိုးရှင်းလှ၏။ ကောင်းဖန်စစ်တပ်များ ရှီးလန်စီရင်စုမှ ထွက်ခွာသွားသည်ကို စောင့်ကြည့်ရန် ကျားဖြူစစ်တပ်ကို ရှေ့သို့ စေလွှတ်မည်ဖြစ်ပြီး ထို့နောက် ရှီးလန်စီရင်စု တစ်ခုလုံးကို ပြန်လည်သိမ်းပိုက်မည် ဖြစ်သည်။

ကောင်းဖန်နိုင်ငံအပေါ် တန်ပြန်တိုက်ခိုက်ရေးနှင့် ပတ်သက်၍မူ ၎င်းသည် ချောင်ချင်းကန်း တစ်ဦးတည်း ဆုံးဖြတ်နိုင်သော ကိစ္စရပ် မဟုတ်ပေ။

"စစ်သူကြီးချောင်... ကောင်းဖန်စစ်တပ် ဆုတ်ခွာသွားတာကို အခွင့်ကောင်းယူပြီး အပြင်းအထန် တိုက်ခိုက်ကာ ကောင်းဖန်စစ်တပ်ရဲ့ အဓိကအင်အားစုကို အမြစ်ဖြတ်ပစ်ချင်စိတ် မရှိဘူးလား..."

ဒုတိယခန်းမသခင် ရွှမ်ယွမ်ဖေးဟယ်က ပြုံး၍ မေးလိုက်သည်။

ချောင်ချင်းကန်းက ချက်ချင်းပင် ခေါင်းခါယမ်းလိုက်၏။

"ခန်းမသခင်... အဲ့ကောင်းဖန်စစ်ကို နှစ်သိန်းကို ကျုပ် သေချာပေါက် အမြစ်ဖြတ်ချင်တာပေါ့..."

"ဒါပေမဲ့ အဲ့ကောင်းဖန်စစ်တပ်က ကောင်းဖန်နိုင်ငံရဲ့ အထက်တန်းလွှာတွေဖြစ်ပြီး နိုင်ငံရဲ့ အုတ်မြစ်ဖြစ်တဲ့အပြင် နဝမအဆင့် သိုင်းပညာရှင်ဖြစ်တဲ့ အကြံပေးအမတ်ကြီး ကိုယ်တိုင် စောင့်ကြပ်နေတာလေ..."

"အကယ်၍ ကျုပ်ကသာ ကောင်းဖန်စစ်တပ်ကို ရက်ရက်စက်စက် အမြစ်ဖြတ်လိုက်မယ်ဆိုရင် ဒါဟာ ကောင်းဖန်နိုင်ငံရဲ့ နိုင်ငံတော်ကံကြမ္မာကို ထိုးနှက်လိုက်တာဖြစ်ပြီး အဲ့ဒီအကြံပေးအမတ်ကြီးရဲ့ စွမ်းအားကိုပါ ထိခိုက်စေမှာပဲ... သူက သေချာပေါက် လက်ပိုက်ကြည့်နေမှာ မဟုတ်ဘူး..."

"တာအိုနဝမအဆင့်မှာ သေမျိုးတွေရဲ့ စစ်ပွဲတွေထဲ တိုက်ရိုက်ပါဝင်ပတ်သက်ခြင်း မပြုရဘူးဆိုတဲ့ မပြောဝံ့တဲ့ စည်းမျဉ်းတစ်ခု ရှိတယ်ဆိုတာ ကျုပ် သိပါတယ်..."

"ဒါပေမဲ့ ကျုပ်က ကောင်းဖန်စစ်တပ်ရဲ့ အဓိကအင်အားစုကို တကယ် အမြစ်ဖြတ်လိုက်မယ်ဆိုရင် ဒီအကြံပေးအမတ်ကြီးက ကျုပ်ရဲ့ ကျားဖြူစစ်တပ်တစ်သိန်းကို ဘယ်လိုလုပ် အသက်ရှင်ခွင့် ပေးပါ့မလဲ..."

"ကျုပ်က ဧကရာဇ်မင်းမြတ်ရဲ့ အမိန့်တော်အတိုင်းပဲ လိုက်နာမှာပါ... ဒီစစ်ပွဲက ရှီးလန်စီရင်စုကို ပြန်လည်သိမ်းပိုက်ဖို့ သက်သက်ပါပဲ..."

သူ၏ ရပ်တည်ချက်ကို ရှင်းလင်းစွာ သိစေလိုသဖြင့် ချောင်ချင်းကန်းက အလွန် လေးနက်စွာ ပြန်ဖြေလိုက်၏။

၎င်းကို ကြားသောအခါ ဒုတိယခန်းမသခင် ရွှမ်ယွမ်ဖေးဟယ်က ခပ်ဖွဖွ ပြုံးလိုက်သည်။

"အဲ့လိုဆိုမှတော့ ကျုပ်က ကျားဖြူစစ်တပ်ကို လျှို့ဝှက်စွာ ဆက်ပြီး ကာကွယ်ပေးထားပါ့မယ်..."

ချောင်ချင်းကန်း၏ သဘောထားကို သိရှိသွားပြီးနောက် ဒုတိယခန်းမသခင် ရွှမ်ယွမ်ဖေးဟယ်သည် ဘာမျှဆက်မပြောတော့ဘဲ ချက်ချင်း ပျောက်ကွယ်သွားတော့၏။

လောင်းရှန်းတောင်မှ ထွက်ခွာလာပြီးနောက် ကျောက်လင်သည် တာ့လျန်တောင်တန်းသို့ အလျင်အမြန် သွားရောက်ခဲ့သည်။

အစွမ်းထက်လက်နက်ဖြစ်သော စနိုက်ပါရိုင်ဖယ်များ ထပ်တိုးလာခြင်းနှင့် တန်ထိုက်ပေါင်ပေါင်နှင့် သူ၏အဖွဲ့မှာ ကျောက်စိမ်းခန္ဓာနယ်ပယ်သို့ တက်လှမ်းသွားနိုင်ခဲ့ခြင်းတို့ကြောင့် ဟေးလုံစခန်းသည် ဓားပြစခန်း အများအပြားကို တိုက်ခိုက်ချေမှုန်းနိုင်ခဲ့၏။

ယခုအခါ ဟေးလုံစခန်းရှိ အဖွဲ့ဝင်အရေအတွက်မှာ ငါးထောင်အထိ ရောက်ရှိလာခဲ့ပြီ ဖြစ်သည်။

ရုတ်တရက် ဟေးလုံစခန်း၏ ရိက္ခာများမှာ ထပ်မံ၍ ရှားပါးလာပြန်၏။

ထိုအခိုက်တွင် တန်ထိုက်ပေါင်ပေါင်၊ တန်ထိုက်ရှုံ့ရင်၊ တုယွီထောက်နှင့် ချန်ဖန်ဟိုင်တို့ အတူတကွ ထိုင်နေကြသည်။

"ခေါင်းဆောင်က ဟေးလုံစခန်းကို မလာတာ တော်တော်ကြာနေပြီပဲ..."

တန်ထိုက်ရှုံ့ရင်က အနည်းငယ် ညည်းတွားလိုက်၏။

ကျောက်လင် ရောက်လာတိုင်း သူက သူ့အား အကျိုးအမြတ်အချို့ ပေးလေ့ရှိသည်။ သူ၏ ယောက္ခထီးဖြစ်သူ တန်ထိုက်ရှုံ့ရင်က ကျောက်လင်ကို ဟေးလုံစခန်းသို့ မကြာခဏ လာရောက်စေချင်နေ၏။

"ကျုပ် တလောက ခေါင်းဆောင်ရဲ့ ထင်းရှူးနက်ကျေးရွာကို သွားခဲ့ရာမှာ နေရာတိုင်း အဆောက်အအုံတွေ ဆောက်လုပ်နေတာ တွေ့ခဲ့ရတယ်... ခေါင်းဆောင်ရဲ့ စီးပွားရေး လုပ်ငန်းကွန်ရက်က တကယ့်ကို ကြီးမားကျယ်ပြန့်တာပဲ..."

"ကျုပ် ပိုပြီး လေးစားမိတာကတော့ ခေါင်းဆောင်က ဒုက္ခသည် ငါးသိန်းကိုတောင် ထောက်ပံ့ကျွေးမွေးထားနိုင်တာပါပဲ..."

"အကယ်၍ ခေါင်းဆောင်သာ ရောက်လာခဲ့ရင် ဟေးလုံစခန်းက ညီအစ်ကို ငါးထောင်ကို ကျွေးမွေးဖို့ ကိစ္စကို အေးအေးဆေးဆေး ဖြေရှင်းပေးနိုင်မှာ အသေအချာပဲ..."

မျက်လုံးများ တောက်ပလျက် တုယွီထောက်က ပြောလိုက်ရာ ထင်းရှူးနက်ကျေးရွာသို့ သွားရောက်ပြီးနောက် သူသည် ကျောက်လင်အပေါ် ပို၍ပင် ရိုသေလေးစားလာခဲ့ကြောင်း ရှင်းလင်းစွာ မြင်တွေ့နေရသည်။

"သမီး... သမီးက မနေ့ကတည်းက အန်နေတာ... သမီးမှာ ကိုယ်ဝန်ရှိနေပြီလား..."

ရုတ်တရက် တန်ထိုက်ရှုံ့ရင်က သူ၏ဘေးတွင် ထိုင်နေသော သမီးဖြစ်သူမှာ စိတ်မဝင်စားသကဲ့သို့ ရှိနေသည်ကို သတိထားမိလိုက်သဖြင့် မေးခွန်းထုတ်လိုက်ခြင်း ဖြစ်၏။

တန်ထိုက်ပေါင်ပေါင်မှာ ချက်ချင်းပင် မျက်နှာရဲတက်သွားပြီး ရှက်ရွံ့စွာ ခေါင်းညိတ်ပြလိုက်သည်။

ရိုးရိုးသားသားပြောရလျှင် တန်ထိုက်ပေါင်ပေါင်၏ စိတ်သဘောထားမှာ အလွန် ယအပြစ်ကင်းစင်ဆဲဖြစ်ကာ သူမသည် တစ်နေ့တွင် မိခင်တစ်ဦး ဖြစ်လာလိမ့်မည်ဟု ဘယ်သောအခါကမှ မတွေးထားခဲ့ပေ။

ထို့ကြောင့် မနေ့က ကိုယ်ဝန်ဆောင် လက္ခဏာများ စတင်ခံစားရပြီးနောက် တန်ထိုက်ပေါင်ပေါင်သည် အနည်းငယ် တွေဝေသွားခဲ့၏။

"ပေါင်ပေါင်... မင်း တကယ်ပဲ ငါ့ကိုယ်ဝန်ကို လွယ်ထားရတာလား..."

ထိုအခိုက် အရပ်ရှည်ရှည် ပုံရိပ်တစ်ခုက လေထဲမှ ပျံသန်းလာကာ သူတို့လေးယောက်ရှေ့သို့ လျှပ်စီးပမာ ဆင်းသက်လာခဲ့သည်။

ကျောက်လင်တွင် စနစ်တစ်ခုရှိရာ သူတို့၏ မင်္ဂလာဦးညတွင်ကတည်းက တန်ထိုက်ပေါင်ပေါင် ကိုယ်ဝန်ရသွားပြီဆိုသည်ကို သူ သိထားပြီး ဖြစ်၏။

ထိုအချိန်က ကျောက်လင် ထိုသို့အော်ပြောလိုက်ခြင်းမှာ တန်ထိုက်ပေါင်ပေါင်၏ ရှက်သွေးဖြာနေသော မျက်နှာလေးကို မြင်တွေ့ချင်ရုံ သက်သက်သာ ဖြစ်သည်။

မျှော်လင့်ထားသည့်အတိုင်းပင် တန်ထိုက်ပေါင်ပေါင်က ၎င်းကို ကြားလိုက်ရသောအခါ သူမ၏ ခေါင်းကို ဒူးအောက်အထိ ငုံ့ချလိုက်လေတော့၏။

"ခေါင်းဆောင်..."

"ခေါင်းဆောင်..."

တန်ထိုက်ရှုံ့ရင်၊ တုယွီထောက်နှင့် ချန်ဖန်ဟိုင်တို့က ချက်ချင်း မတ်တပ်ရပ်လိုက်ကြသည်။

ကျောက်လင်က သူတို့သုံးယောက်ကို ပြန်ထိုင်ရန် လက်ဟန်ပြလိုက်၏။

"ခင်ဗျားတို့ရဲ့ မျက်နှာထားတွေကို ကြည့်ရတာ တစ်ခုခု စိတ်ပူနေပုံပဲ... ကျုပ်ကို ပြောပြကြပါဦး..."

ကံကြမ္မာနတ်ဘုရားအဆင့်စာရင်းကို ပိုင်ဆိုင်ထားသော ကျောက်လင်သည် သူတို့သုံးဦး၏ အမြင်များမှတစ်ဆင့် ဟေးလုံစခန်း ရင်ဆိုင်နေရသော အခက်အခဲများကို ကြိုတင် သိရှိနေပြီး ဖြစ်သည်။

၎င်းမှာ ရိက္ခာပြဿနာမှလွဲ၍ အခြားမရှိပေ။

"ခေါင်းဆောင်... ဟေးလုံစခန်းက သိမ်းဆည်းထားတဲ့ ရိက္ခာတွေက လက်ကျန် နည်းနေပြီ..."

"ကျွန်တော်တို့ ဟေးလုံစခန်းက ညီအစ်ကိုတွေက အခုဆို ငါးထောင်ကျော်နေပြီ... ဒါပေမဲ့ ကျွန်တော်တို့ရဲ့ ရိက္ခာ သိုလှောင်ထားမှုက တစ်လလောက်ပဲ ခံတော့မယ်လို့ ခန့်မှန်းရတယ်..."

တန်ထိုက်ရှုံ့ရင်က သူ၏ သဘောဆန္ဒအလျောက် ဖွင့်ပြောလာ၏။

"ရိက္ခာ..."

ကျောက်လင်သည် လူတိုင်းကို စိတ်လှုပ်ရှားစေရန် တမင်တကာပင် စကားပြောရန် တွန့်ဆုတ်နေဟန် ပြလိုက်သည်။

"ခေါင်းဆောင်... ဖြေရှင်းဖို့ ခက်ခဲနေလို့လား..."

တုယွီထောက်က ချက်ချင်း မေးလိုက်ရာ သူ တကယ့်ကို စိုးရိမ်နေပုံရ၏။

ခေါင်းဆောင်သုံးဦး၏ မျက်နှာပေါ်ရှိ စိုးရိမ်ပူပန်နေသော အမူအရာများကို မြင်တွေ့ပြီးနောက် ကျောက်လင်က ကျေနပ်စွာ ပြုံးလိုက်သည်။

"ဒီနေ့ ကျုပ် ဒီကို ရောက်လာတာက ခင်ဗျားတို့ကို ခေါ်ပြီး အလုပ်ကြီးတစ်ခု သွားလုပ်ချင်လို့ပဲ..."

"ဒါက ရူးသွပ်ရာကျပေမဲ့ အကျိုးအမြတ်တွေကတော့ သေချာပေါက် များပြားလိမ့်မယ်..."

"အနည်းဆုံးတော့ ခင်ဗျားတို့ တစ်နှစ်စာ ရိက္ခာအတွက် ပူပန်စရာမလိုအောင် ကျုပ် အာမခံတယ်..."

ကျောက်လင်က ပြုံး၍ ပြောလိုက်၏။

ချက်ချင်းပင် တန်ထိုက်ရှုံ့ရင်၊ တုယွီထောက်နှင့် ချန်ဖန်ဟိုင်တို့မှာ အံ့အားသင့်စွာဖြင့် မတ်တပ်ရပ်လိုက်ကြသည်။

"ခေါင်းဆောင်... သာပြောလိုက်ပါ... ကျွန်တော်တို့ ခေါင်းဆောင်အတွက် သေချာပေါက် အလုပ်လုပ်ပေးမှာပါ..."

တန်ထိုက်ရှုံ့ရင်က ခိုင်မာသော ယုံကြည်ချက်ဖြင့် ပြောလိုက်၏။

"ကိစ္စတွေက ဘယ်လောက်ပဲ ရူးသွပ်ဖို့ကောင်းနေပါစေ... ကျွန်တော်တို့ ဟေးလုံစခန်းက ခေါင်းဆောင်ရဲ့နောက်ကို အမြဲတမ်း လိုက်ပါမှာပါ..."

တုယွီထောက်ကလည်း သူ၏ ရင်ဘတ်ကိုပုတ်ကာ ထိုသို့ပြောလိုက်သည်။

"ခေါင်းဆောင်နောက်ကို လိုက်နေရသရွေ့ ကျွန်တော်တို့က မဟာချင်မင်းဆက်ရဲ့ ဧကရာဇ်ကိုတောင် သတ်ရဲတယ်..."

ချန်ဖန်ဟိုင်၏ စကားများက ပို၍ပင် ရူးသွပ်နေသေး၏။

ကျောက်လင်က လက်ကိုမြှောက်ကာ ရယ်မောလိုက်ပြီးနောက်

"ကျုပ်မှာ ဟေးလုံစခန်းက လူတိုင်းကို ဝင်ဆံ့နိုင်တဲ့ ဝိညာဉ်ရတနာလို့ခေါ်တဲ့ ဟင်းလင်းပြင် ရှေးဟောင်းပစ္စည်းတစ်ခု ရှိတယ်..."

"လတ်တလောမှာ ကောင်းဖန်နိုင်ငံက မဟာချင်မင်းဆက်ကို ကျူးကျော်ဝင်ရောက်လာခဲ့ပြီး စစ်တပ်နှစ်ခုက ရှီးလန်စီရင်စုမှာ အကြိတ်အနယ် ဖြစ်နေကြတယ်..."

"လက်ရှိအချိန်မှာ ကောင်းဖန်နိုင်ငံရဲ့ စစ်ရေးအင်အားက အားနည်းနေပြီး ရေခဲစစ်သည် အရေအတွက်ကလည်း သိသိသာသာ လျော့ကျသွားခဲ့ပြီ..."

"ကောင်းဖန်စစ်တပ်က မဟာချင်စစ်တပ်နဲ့ အလုပ်ရှုပ်နေချိန်မှာ ကျုပ်တို့ ကောင်းဖန်နိုင်ငံထဲ ဝင်သွားနိုင်သရွေ့ အဲ့ဒီက ကောက်နှံတွေအားလုံးက ကျုပ်တို့အတွက်ပဲ... ကျုပ်တို့ လိုချင်သလောက် လုယက်ယူငင်လို့ ရတယ်..."

ကျောက်လင်က သူ လာရောက်ရသည့် ရည်ရွယ်ချက်ကို ရှင်းပြလိုက်၏။

"ဝိုး..."

"အရမ်းကောင်းတယ်..."

"လုပ်ကြတာပေါ့..."

၎င်းကို ကြားပြီးနောက် ခေါင်းဆောင်သုံးဦးမှာ မည်သည့် ကြောက်ရွံ့မှုမျိုးကိုမျှ မပြသခဲ့ဘဲ ဆန့်ကျင်ဘက်အနေဖြင့် သူတို့သည် အလွန်အမင်း စိတ်လှုပ်ရှားနေကြသည်။

၎င်းကိုမြင်သောအခါ ကျောက်လင်က ဘာမျှဆက်မပြောတော့ပေ။

"ကောင်းပြီ... ညီအစ်ကိုတွေ အားလုံးကို ချက်ချင်း စုစည်းလိုက်... ပြီးရင် ရိက္ခာတွေ သိမ်းပိုက်ဖို့အတွက် ကျုပ်နဲ့အတူ ကောင်းဖန်နိုင်ငံကို လိုက်ခဲ့ကြ..."

ကျောက်လင်က အမိန့်ပေးလိုက်၏။