အခန်း ၆၆

အခန်း။ ၆၆

တရားသူကြီးချုပ် ကျောက်ကျီချောင်က တူဖြင့် ခုံကို ထုလိုက်ပြီး "တရားလိုရှေ့နေရဲ့ တောင်းဆိုချက်ကို ပယ်ချလိုက်တယ်။ တရားလိုရှေ့နေကို တစ်ကြိမ် သတိပေးလိုက်တယ်။ နောက်ထပ် သတိပေးချက် သုံးကြိမ် ပြည့်သွားရင် တရားခွင်ကနေ ချက်ချင်း ထွက်သွားပေးရမယ်" ဟု ပြတ်သားစွာ ပြောလိုက်သည်။

ထို့နောက် တရားရုံးခန်းတစ်ခုလုံးကို ဝေ့ကြည့်ရင်း "တရားလိုရှေ့နေအနေနဲ့ တရားဝင်ပြီး ကျိုးကြောင်းဆီလျော်တဲ့ လျှောက်လဲချက်တွေကိုပဲ တင်ပြပေးပါ။

ဒီရုံးတော်မှာ ပုဂ္ဂိုလ်ရေးအရ တိုက်ခိုက်တာတွေကို ခွင့်မပြုဘူး။

ဆက်ပြီးတော့ ပုဂ္ဂိုလ်ရေးအရ တိုက်ခိုက်နေဦးမယ်ဆိုရင် တရားလိုရှေ့နေရဲ့ ကာကွယ်ခွင့် အရည်အချင်းကို ရုပ်သိမ်းသွားမယ်" ဟု သတိပေးလိုက်သည်။

ထိုအချိန်တွင် တိုက်ရိုက်ထုတ်လွှင့်မှုကို ကြည့်ရှုနေသည့် ပရိသတ်များမှာ ရယ်မောနေကြသည်။

[ဟားဟားဟား ရှေ့နေဂူချန်တော့ တိုက်စစ်ဆင်နေပြီ]

[ထိပ်တန်းရှေ့နေဖြစ်တိုင်း အနိုင်ရမယ် ထင်နေတာလား။ ရှေ့နေဂူချန် လက်ချက်နဲ့ ထောင်ထဲ ရောက်သွားဦးမယ် သတိထားဦး]

[ဂူချန်တော့ တကယ်မိုက်တယ်။ ပြန်ချေပသွားတာ အားရစရာပဲ]

ဇောင်ယွီ၏ မျက်နှာမှာ မည်းမှောင်သွားသည်။

သူက "ဒါဆိုရင် ကျွန်တော် ရှေ့နေဂူချန်ရဲ့ အချက်ကို တိုက်ရိုက် ပြန်ချေပမယ်" ဟု ပြောလိုက်သည်။

"DNA စစ်ဆေးချက်အရ ဇောင်လဲ့လဲ့ရဲ့ ခန္ဓာကိုယ်မှာ ချိုင်ချန်းရဲ့ DNA ရှိနေတာကို တွေ့ရတဲ့အတွက် နှစ်ယောက်သား လိင်ဆက်ဆံခဲ့ကြတာ သေချာပါတယ်။

ဇောင်လဲ့လဲ့က မုဒိမ်းမှုလို့ တိုင်ကြားထားတဲ့အတွက် ဒါက သူမဆန္ဒမပါဘဲ ကျူးလွန်ခဲ့တာပါ။ ဒါကြောင့် ချိုင်ချန်းက မုဒိမ်းမှု ကျူးလွန်သူဖြစ်တာ သေချာပြီး သူအပြစ်ကင်းတယ်လို့ ပြောလို့မရပါဘူး"

ဂူချန်က "သူတို့ လိင်ဆက်ဆံခဲ့ကြတာတော့ မှန်ပါတယ်။ ဒါပေမဲ့ အဲဒါက သူတို့ စေ့စပ်ပြီးနောက်မှ ဖြစ်ခဲ့တာပါ။ တကယ်လို့ မုဒိမ်းမှုသာ ဖြစ်မယ်ဆိုရင် ဇောင်လဲ့လဲ့က ဘာလို့ ချက်ချင်း ရဲစခန်းမတိုင်ရတာလဲ ဘာလို့ ၃ ရက်ကြာမှ တိုင်ကြားရတာလဲ" ဟု ပြန်မေးလိုက်သည်။

"ဖြစ်စဉ်ပြီးပြီးချင်း ဘာလို့ မတိုင်ရတာလဲ အဲဒီ ၃ ရက်အတွင်းမှာ ဘာလို့ အိမ်ထောင်မပြုခင်က ဝယ်ထားတဲ့ အိမ်ကို သူမနာမည် ပြောင်းပေးဖို့ တောင်းဆိုနေတာလဲ။ ချိုင်ချန်းက ငြင်းလိုက်တဲ့အခါမှ မုဒိမ်းမှုလို့ တိုင်ကြားတာ မဟုတ်ဘူးလား"

"အဲဒီ ၃ ရက်အတွင်းမှာ သူမ ရဲစခန်းကို မသွားနိုင်ခဲ့ဘူးလား ၃ ရက်ကြာမှ တိုင်ကြားတယ်ဆိုတာ ချိုင်ချန်းကို လိင်ဆက်ဆံဖို့ အတင်းအကျပ် ဆွဲဆောင်ပြီးမှ အိမ်နာမည် ပြောင်းပေးဖို့ ခြိမ်းခြောက်တာပါ။ ချိုင်ချန်းက မလုပ်ပေးလို့ တိုင်လိုက်တာပဲလေ"

ထုတ်လွှင့်မှုကို ကြည့်ရှုသူများမှာ ဂူချန်ဘက်မှ တစ်ခဲနက် ရပ်တည်နေကြသည်။

[ရှေ့နေဂူချန် ပြောတာ မှန်တယ်။ ဒီမိန်းမက အိမ်ကိုပဲ လိုချင်နေတာ။ တကယ်သာ မုဒိမ်းမှုဖြစ်ရင် ဖြစ်တဲ့နေ့ကပဲ တိုင်မှာပေါ့]

[ရွံစရာကြီးအဲ့မိန်းမက အိမ်ကို သူ့နာမည်ပေါက် ဖြစ်စေချင်နေတာ]

[ဒါတင်မကသေးဘူး။ အိမ်ကို သူ့နာမည်ပေါက် ဖြစ်ပေးမှပဲ ဒီကိစ္စကို ကျေအေးပေးမယ်လို့ ပြောနေတာ။ ရွံဖို့ကောင်းလိုက်တာ။ တမင်လုပ်နေတာပါ]

ဇောင်လဲ့လဲ့က "ကျွန်မက ချိုင်ချန်းကို အမှားပြင်ဖို့ အခွင့်အရေးပေးချင်လို့ပါ။ သူ ဝန်ခံရင် ကျွန်မ မတိုင်ပါဘူး။ မိန်းကလေးတစ်ယောက်ရဲ့ ပထမဆုံးအကြိမ်ဆိုတာ အဖိုးတန်တယ်လေ။ သူက ကျွန်မဆန္ဒမပါဘဲ ယူသွားတာမို့ တောင်းပန်စေချင်တာပါ။ ဒါပေမဲ့ သူက မတောင်းပန်ဘဲ ပိုဆိုးသွားတယ်" ဟု ပြောသည်။

"သူသာ တောင်းပန်ရင် ကျွန်မ မတိုင်ပါဘူး။ ဒါက သူ ကျွန်မကို ဂရုမစိုက်လို့ပါ။ နောက်ပြီး သူ ကျွန်မနဲ့ တွဲနေရင်း တခြားမိန်းကလေးတွေနဲ့ ဖောက်ပြန်နေတာကို သိရတယ်။ သူက ဖောက်ပြန်တာ ဒါကြောင့် ကျွန်မ တိုင်ရတာပဲ သူက ကျွန်မကို မုဒိမ်းကျင့်ပြီး ဘာမှလည်း မတောင်းပန်ဘူး"

ဇောင်လဲ့လဲ့ စကားဆုံးသောအခါ ချိုင်ချန်းက မနေနိုင်တော့ဘဲ "ဘာပထမဆုံးအကြိမ်လဲ နင်ကိုယ်တိုင်လည်း ဘယ်လောက်တောင် အတွေ့အကြုံရှိလဲဆိုတာ သိနေတာပဲ။ ဘာလာပြောနေတာလဲ ပြီးတော့ တခြားမိန်းကလေးတွေနဲ့ ဖောက်ပြန်တယ်ဆိုတဲ့ သက်သေရှိလား" ဟု ပြန်ပြောသည်။

ဇောင်လဲ့လဲ့က "Screenshot ရိုက်ဖို့ မေ့သွားတယ်။ ဒါပေမဲ့ နင် ဖောက်ပြန်တာတော့ သေချာတယ်" ဟု ပြန်အော်သည်။

တရားခွင်အတွင်း သူတို့နှစ်ဦး တိုက်ရိုက် စကားများနေကြသည်။

တရားသူကြီးချုပ် ကျောက်ကျီချောင်က တူဖြင့် ထုလိုက်သည်။

"တရားခွင်မှာ အော်ဟစ်ပြီးမပြောပါနဲ့"

နှစ်ဦးစလုံး တိတ်ဆိတ်သွားသည်။

တရားသူကြီးချုပ်က "တရားလိုရှေ့နေ ဆက်ပြောပါ" ဟု ခွင့်ပြုလိုက်သည်။

ဇောင်ယွီက "တရားသူကြီးချုပ်ခင်ဗျာ ဂူချန် ပြောသွားတာတွေက အထောက်အထားမရှိတဲ့ ပုဂ္ဂိုလ်ရေး ခန့်မှန်းချက်တွေပါ။ ဘယ်ရက်မှာ တိုင်တယ်ဆိုတာက မုဒိမ်းမှု ကျူးလွန်တဲ့ အဓိက ဖြစ်စဉ်ကို မပြောင်းလဲစေပါဘူး။ နောက်ပြီး ချိုင်ချန်း ကိုယ်တိုင် ဝန်ခံထားတဲ့ အသံဖိုင်ရှိနေတာမို့ ဒီအမှုကို ဆုံးဖြတ်လို့ ရပါပြီ" ဟု ပြောသည်။

တရားသူကြီးချုပ်က "တရားခံရှေ့နေမှာ ကန့်ကွက်စရာ ရှိသေးလား" ဟု မေးသည်။

ဂူချန်က "ကျွန်တော် အဲဒီအသံဖိုင်ကို နားထောင်ပြီးပါပြီ။ ချိုင်ချန်း ရဲစခန်းမှာ ရှိနေတုန်းက သူ မုဒိမ်းကျင့်ကြောင်း ဝန်ခံထားတာ မရှိသလို ဇောင်လဲ့လဲ့ကို မုဒိမ်းကျင့်ကြောင်းလည်း အတိအလင်း ပြောထားတာ မရှိပါဘူး" ဟု ပြန်ပြောသည်။

"ဒါက ဇောင်ရီဖိန်က ချိုင်ချန်းကို ဝန်ခံအောင် တမင် လမ်းညွှန်ပြီး အသံဖိုင်ရအောင် လုပ်ထားတာပါ။ အသံဖိုင်ထဲမှာ ဇောင်ရီဖိန်က ချိုင်ချန်းကို မုဒိမ်းမှုလို့ အတည်ပြုခိုင်းနေတာကို တွေ့ရမှာပါ။ သူမက တမင်သက်သက် လျှို့ဝှက်မှတ်တမ်းတင်ဖို့ ကြိုပြင်ဆင်ထားတာလေ မဟုတ်ရင် ဘာလို့ အသံဖိုင် စတင်ရိုက်ကူးရမှာလဲ"

"ပြီးတော့ ၁ မိနစ်စာပဲရှိတဲ့ အသံဖိုင်က အပြည့်အစုံ မဟုတ်ဘူး။ တမင် အပိုင်းအစတွေကို ဖြတ်ညှပ်ကပ်လုပ်ထားတာမို့ ဒီအထောက်အထားက တရားဝင်မှု မရှိဘူးလို့ ယူဆပါတယ်"

ဂူချန်က ချိုင်ချန်းကို ကြည့်ပြီး "တရားသူကြီးချုပ်ခင်ဗျာ ချိုင်ချန်းကို ပြောခွင့်ပေးဖို့ တောင်းဆိုပါတယ်။ ဇောင်ရီဖိန်နဲ့ ဇောင်လဲ့လဲ့မိသားစု ဘာတွေ ပြောခဲ့လဲဆိုတာ သူပြောပြပါလိမ့်မယ်" ဟု တောင်းဆို သည်။

တရားသူကြီးချုပ်က ခွင့်ပြုလိုက်သည်။

ချိုင်ချန်းက "လိင်ဆက်ဆံပြီးတဲ့အခါ ဇောင်လဲ့လဲ့က ရုတ်တရက် ဒေါသထွက်ပြီး တံခါးကို ဆောင့်ပိတ်ပြီး ထွက်သွားတယ်။ ဒါပေမဲ့ လိင်ဆက်ဆံနေစဉ်မှာ သူက သဘောကျနေတာပါ။ ပြီးတော့ ကျွန်တော် သူ့ကို ချော့တဲ့အခါ ဇောင်ရီဖိန်က ကျွန်တော့်ကို အမှားဝန်ခံရင် စေ့စပ်ပေးမယ်လို့ ပြောခဲ့တယ်" ဟု ပြောသည်။

"ကားပေါ်မှာ ၁ နာရီလောက် စကားပြောကြတယ်။ သူတို့က ကျွန်တော့်ကို အမှားဝန်ခံလိုက်ရင် ဘာမှ မဖြစ်ဘူး။ မိန်းကလေးတွေကို ချော့ရတာပဲလို့ ပြောပြီး ဦးနှောက်ဆေးခဲ့ကြတယ်။ နောက်ဆုံးတော့ ကျွန်တော်လည်း ဘယ်လိုမှန်းမသိဘဲ ဝန်ခံလိုက်မိတာပါ။

တကယ်တမ်းတော့ ကျွန်တော် မုဒိမ်းမကျင့်ခဲ့ပါဘူး။

ဇောင်လဲ့လဲ့က အတွေ့အကြုံရှိပြီးသားပါ။ သူကိုယ်တိုင် စိတ်ပါလက်ပါ ပူးပေါင်းခဲ့တာပါ။ ပြောချင်တာ ပြီးပါပြီ"

ချိုင်ချန်း ပြောပြီးချိန်တွင် ဇောင်ယွီက ချက်ချင်းပင် "ဒါက ချိုင်ချန်းရဲ့ ကိုယ်ပိုင် ထွက်ဆိုချက်သက်သက်ပါ။ ဥပဒေအရ အကျိုးသက်ရောက်မှု မရှိဘူး။ အမှန်တရားကို သိဖို့ဆိုရင် အထောက်အထားကိုပဲ ကြည့်ရမှာပါ" ဟု ပြောလိုက်သည်။

"အသံဖိုင် မမှန်ဘူးဆိုရင်တောင် ဟိုတယ် ကင်မရာမှတ်တမ်းက ဘာလဲ ဇောင်လဲ့လဲ့ ထွက်ပြေးဖို့ ကြိုးစားတာကို ချိုင်ချန်းက အတင်း ဆွဲခေါ်သွားတာ ဗီဒီယိုထဲမှာ အထင်အရှားပဲလေ။ DNA အထောက်အထားနဲ့ ပေါင်းစပ်လိုက်ရင် သူ မုဒိမ်းကျင့်တာ သေချာနေပါပြီ"

ဇောင်လဲ့လဲ့ကတော့ ကျေနပ်နေသည်။

ဂူချန် ဘယ်လောက်ပဲ ချေပနေပါစေ ဒါက မုဒိမ်းမှုပဲ။

ပုဂ္ဂလိက ဟိုတယ်အခန်းထဲမှာ ကင်မရာမရှိတော့ သူ ဘာမှ လုပ်လို့မရတော့ဘူး။

သို့သော် နောက်တစ်စက္ကန့်မှာပင် ဂူချန်က မတ်တတ်ရပ်လိုက်ပြီး အိတ်ထဲက USB တစ်ခုကို ထုတ်လိုက်သည်။

"တရားသူကြီးချုပ်ခင်ဗျာ ကျွန်တော့်မှာ အထောက်အထား ရှိပါတယ်"