အခန်း ၅

အခန်း (၅) အွန်လိုင်း ကြည့်ရှုသူ ၅၀,၀၀၀... သရုပ်ပြသမှု စတင်ပြီ...

"အမြောက်ဆန်ရဲ့ ပင်မကိုယ်ထည်ကိုတော့ လက်နဲ့ ပုံသွင်းလို့ ပြီးသွားပြီ..."

"ဒါပေမဲ့ ငါတို့ ပစ္စည်းတချို့ လိုနေသေးတယ်ဆိုတော့ ဒီနေ့အတွက်က အမြောက် ပစ်ပြတာကိုပဲ သရုပ်ပြနိုင်မယ်..."

သူကိုယ်တိုင် လက်ဖြင့် ဖန်တီးထားသော စက္ကူ တိကျစွာ ပစ်မှတ်ရှာနိုင်သော အမြောက်ဆန်ကို ကြည့်ကာ ချန်မိုက သူသာလျှင် ကြားနိုင်သော အသံဖြင့် တိုးညင်းစွာ ရေရွတ်လိုက်၏။

ယနေ့၏ လိုက်ဖ်လွှင့်မှုမှာ အလွန် အလျင်စလို စတင်ခဲ့ရပြီး တိကျစွာ ပစ်မှတ်ရှာနိုင်သော အမြောက်ဆန်အတွက် ပစ္စည်းများစွာ လိုအပ်ပေသည်။

ယမန်နေ့က ချန်မိုသည် အမြောက်ဆန်၏ ပင်မကိုယ်ထည်ကို လက်ဖြင့် ပုံသွင်းရန် လုံလောက်သော ပစ္စည်းများကို စူပါမားကတ်တွင် ဝယ်ယူခဲ့သည်။ ယင်းကို 'မျက်လုံးများ' တပ်ဆင်ပေးပြီး တိကျစွာ လမ်းညွှန်မှုကို အမှန်တကယ် ရရှိစေရန်အတွက်မူ ပစ္စည်းများ ပိုမို လိုအပ်သေး၏။

ချန်မိုသည် ထိုပစ္စည်းများကို အွန်လိုင်း ဈေးဝယ်ပလပ်ဖောင်းတစ်ခုမှ ကြိုတင်မှာယူထားပြီး ဖြစ်သည်။

ရောင်းချသူက ချက်ချင်း ပို့ပေးမည်ဆိုလျှင်ပင် အနည်းဆုံး မနက်ဖြန်အထိ အချိန်ယူရပေမည်။

[ဒင်... ဂုဏ်ယူပါတယ် ပိုင်ရှင်... ပိုင်ရှင်ရဲ့ လက်ရှိ လိုက်ဖ်လွှင့်မှုကို ကြည့်ရှုသူ အရေအတွက် ၅၀,၀၀၀ ပြည့်သွားပါပြီ...]

[ပိုင်ရှင်ကို စနစ်ပွိုင့် ၁၀,၀၀၀ ချီးမြှင့်လိုက်ပါတယ်... ဆက်လက် ကြိုးစားပါ...]

ချန်မို အတွေးလွန်နေချိန်မှာပင် စနစ်၏ အသိပေးသံက ထပ်မံ ထွက်ပေါ်လာခဲ့သည်။

ဤစကားကို ကြားလိုက်ရချိန်တွင် ချန်မို အနည်းငယ် အံ့အားသင့်သွားပြီး သူ၏ ဖုန်းမျက်နှာပြင်ဆီသို့ အလျင်အမြန် အကြည့်လွှဲလိုက်၏။

မျက်နှာပြင်၏ ညာဘက်အပေါ်ထောင့်ရှိ လိုက်ဖ်လွှင့်မှုကို ဝင်ရောက်ကြည့်ရှုသူ အရေအတွက်မှာ ၅၀,၀၀၀ ဟု ရှင်းလင်းစွာ ပြသနေပေသည်။

တစ်ချိန်တည်းမှာပင်။

လိုက်ဖ်လွှင့်မှုထဲရှိ ကြည့်ရှုသူများကလည်း ထု်အရာကို သတိထားမိသွားကြပြီး မှတ်ချက်များဖြင့် ဆက်တိုက် ရေးသားလာကြသည်။

"၅၀,၀၀၀... အားလုံးပဲ ငါတို့ လိုက်ဖ်ကြည့်တဲ့သူ ၅၀,၀၀၀ ကျော်သွားပြီ..."

"မိုက်တယ်... ဒီစထရမ့်မာ ရဲ့ တင်ဆက်မှုက တကယ်ကို အံ့မခန်းပဲ..."

"ငါက ဒီစထရမ့်မာ ကို အားပေးလာတာ ကြာပြီ... ဘယ်သူ ထင်မှာလဲ... ဒီမနက်ကမှ ကြည့်တဲ့သူ နည်းနည်းလေးပဲ ရှိတဲ့ လိုက်ဖ်အသေးလေးကနေ အခု အွန်လိုင်း ၅၀,၀၀၀ တောင် ဖြစ်သွားပြီ... ဒုံးပလိုလိအမြန်နှုန်းပဲ..."

မျက်နှာပြင်တစ်ခုလုံးသည် အံ့မခန်းပဲ ဟူသော မှတ်ချက်များဖြင့် ပြည့်နှက်နေပြီး ကြည့်ရှုသူ အသစ်ရော အဟောင်းများ၏ အံ့အားသင့်မှုများနှင့် ရောယှက်နေပေ၏။

လိုက်ဖ်လွှင့်မှု၏ ရေပန်းစားမှုက ကုန်သည်အချို့၏ တရားဝင် အကောင့်များကိုပင် အာရုံစိုက်လာစေခဲ့သည်။

ဤကုန်သည်များ၏ တရားဝင် အကောင့်များသည် ချန်မို၏ လိုက်ဖ်လွှင့်မှုထဲတွင် လက်ဆောင်များကို အခမဲ့ ရထားသည့်အလား ပစ်ပေါက်ပေးနေကြသည်။

ချန်မိုက ခေါင်းငုံ့ကြည့်လိုက်ရာ လိုက်ဖ်လွှင့်မှု၏ ကြည့်ရှုသူ အရေအတွက် စာရင်းတွင် ထိပ်ဆုံး ဆယ်ဦးစလုံးမှာ တရားဝင် ကုန်သည်အကောင့်များ ဖြစ်နေကြောင်း တွေ့လိုက်ရ၏။

...

ပေကျင်းမြို့၊ Douyin Live ဌာန။

ကြီးကြပ်ရေးမှူးများ၏ ရုံးခန်းဧရိယာ။

"အထွေထွေမန်နေဂျာ ကျိုး... ဒီစထရမ့်မာ ရဲ့ လိုက်ဖ်လွှင့်မှုက ကြည့်ရှုသူ ၅၀,၀၀၀ တောင် ပြည့်သွားပြီ..."

မန်နေဂျာဝမ်က အနည်းငယ် တွန်းလိုက်ရာ ခုံတွင်ထိုင်နေသော အထွေထွေမန်နေဂျာ ကျိုးသည် အံ့အားသင့်သွားပုံပေါ်သည်။

"ငါ့ကို မတွန်းနဲ့... ငါ သိတယ်..."

မန်နေဂျာဝမ် တွန်းလိုက်ပြီးနောက် ပြုတ်ကျလုနီးပါး ဖြစ်သွားသော မျက်မှန်ကို တည့်မတ်လိုက်ရင်း အထွေထွေမန်နေဂျာ ကျိုး၏ မျက်နှာပေါ်တွင် ဖုံးကွယ်မရသော အံ့အားသင့်မှုများ ပေါ်လွင်နေခဲ့၏။

ကြည့်ရှုသူ တစ်ဦးအနေဖြင့် ကျိုးမင် သည်လည်း ချန်မို၏ လိုက်ဖ်လွှင့်မှုအတွင်းမှ စိတ်လှုပ်ရှားဖွယ် အခြေအနေများကို သဘာဝကျကျပင် ကိုယ်တိုင် မြင်တွေ့ခဲ့ရသည်။

ကနဦးတွင် သူသည် ချန်မို၏ လိုက်ဖ်လွှင့်မှု အကြောင်းအရာကို အနည်းငယ်မျှသာ စိတ်ဝင်စားခဲ့ခြင်း ဖြစ်၏။

သို့သော် မမျှော်လင့်ဘဲ စတင်ကြည့်ရှုမိလိုက်သည်နှင့် တစ်ပြိုင်နက် တစ်နာရီကျော်ကြာသည်အထိ အလွန်အမင်း နစ်မြုပ်သွားခဲ့လေသည်။

ချန်မို၏ လိုက်ဖ်လွှင့်မှုတွင် ကြည့်ရှုသူ အရေအတွက်မှာ ၂၀,၀၀၀ မှ ၅၀,၀၀၀ သို့ ခုန်တက်သွားခဲ့ချေပြီ။

"ရုံးပိတ်ရက် မဟုတ်တဲ့ နေ့ခင်းကြောင်တောင်ကြီးမှာ အွန်လိုင်းကနေ ကြည့်နေတဲ့သူ ၅၀,၀၀၀ တောင် ရှိတယ်..."

ကျိုးမင်က ဖုံးကွယ်မရသော စိတ်လှုပ်ရှားမှုများ အပြည့်ပါဝင်နေသည့် လေသံဖြင့် တိုးညင်းစွာ ပြောလိုက်၏။

သူ၏ မျက်လုံးများက မျက်နှာပြင်ပေါ်တွင် စူးစိုက်နေပြီး သူ၏ လက်ချောင်းများက ကုလားထိုင်လက်တန်းကို ဖွဖွလေး ခေါက်နေသည်။

"ဒီဒေတာတွေနဲ့ဆိုရင် ငါတို့က သူတို့ကို နည်းနည်းလေး ထပ်ပံ့ပိုးပေးလိုက်တာနဲ့ ကြည့်ရှုသူ ၁၀၀,၀၀၀ ကျော်ဖို့ဆိုတာ ပြဿနာ မဟုတ်တော့ဘူး..."

Douyin Live ၏ အကြီးအကဲ တစ်ယောက်အနေဖြင့် ကျိုးမင်သည် ပါရမီရှင်များကို ရွေးချယ်ရာတွင် အလွန်ထက်မြက်ပေသည်။

ချန်မို၏ လိုက်ဖ်လွှင့်မှု ချန်နယ်တွင် ရှိနေသော အလားအလာများကို သူ ချက်ချင်းပင် အသိအမှတ်ပြုလိုက်၏။

ပလပ်ဖောင်းသည် လက်ရှိတွင် အရည်အသွေးမြင့် လက်မှုပညာ စထရမ့်မာ တစ်စုကို အားတက်သရော ပံ့ပိုးပေးရန် ရှာဖွေနေပြီး ဖျော်ဖြေရေး စထရမ့်မာ များ၏ လက်ဝါးကြီးအုပ်မှုကို ချိုးဖျက်ကာ လိုက်ဖ်လွှင့်မှု ပလပ်ဖောင်းများအတွက် ကွဲပြားစုံလင်သော အခင်းအကျင်းတစ်ခုကို ဖန်တီးရန် ရည်ရွယ်ထားသည်။

ဤရည်ရွယ်ချက်အတွက် ကျိုးမင်သည် ဒြပ်မဲ့ယဉ်ကျေးမှု အမွေအနှစ်များကို ဆက်ခံသူ အမျိုးမျိုးထံသို့ ကိုယ်တိုင် သွားရောက်ခဲ့ပြီး သူတို့ကို Douyin ပလပ်ဖောင်းတွင် လိုက်ဖ်လွှင့်ရန် ဖိတ်ခေါ်ခဲ့ဖူး၏။

သို့သော် ဤကြိုးပမ်းမှုများအားလုံး အပြီးတွင် လက်မှုပစ္စည်းများမှာ သာမန်သာဖြစ်ပြီး ဆန်းသစ်မှု မရှိခြင်း သို့မဟုတ် လိုက်ဖ်လွှင့်မှု အကြောင်းအရာမှာ ပျင်းစရာကောင်းပြီး အပြန်အလှန် ဆက်သွယ်မှု အားနည်းခြင်းတို့ကြောင့် ကျိုးမင်အတွက် ထိုးဖောက်အောင်မြင်ရန် အလွန်ခက်ခဲနေခဲ့သည်။

ယင်းနှင့် ဆန့်ကျင်ဘက်အနေဖြင့် ချန်မို၏ လိုက်ဖ်လွှင့်မှုမှာ အလွန် ထူးခြားသော အကြောင်းအရာများ ပါဝင်ပြီး အလွန် ဖျော်ဖြေမှုပေးနိုင်စွမ်း ရှိပေသည်။

ဤအရာက ကျိုးမင်အတွက် အကျပ်အတည်းကို ချိုးဖျက်နိုင်မည့် မျှော်လင့်ချက် ရောင်ခြည်တစ်ခု ဖြစ်လာစေခဲ့၏။

ထို့နောက် ကျိုးမင်သည် နောက်ကွယ် စနစ်မှတစ်ဆင့် ချန်မို၏ အကောင့် အချက်အလက်များကို စစ်ဆေးလိုက်သည်။

ချန်မိုသည် သူတို့ ပလပ်ဖောင်း၏ စာချုပ်ချုပ်ဆိုထားသော စထရမ့်မာ တစ်ဦး မဟုတ်သေးကြောင်း သူ တွေ့ရှိသွားချိန်တွင် စူပါအက်ဒမင် မန်နေဂျာဝမ်ထံသို့ ချက်ချင်းလှည့်ကာ ပြတ်သားပြီး အရေးတကြီး လေသံဖြင့် အမိန့်ပေးလိုက်၏။ "မန်နေဂျာဝမ်... မင်းကို ခက်ခဲတဲ့ တာဝန်တစ်ခု ငါ ပေးမယ်..."

"ချန်မိုလို့ ခေါ်တဲ့ ဒီစထရမ့်မာ လိုက်ဖ်လွှင့်လို့ ပြီးတာနဲ့ ငါတို့ သူ့ကို ချက်ချင်း ဆက်သွယ်ပြီး ငါတို့ ပလပ်ဖောင်းရဲ့ စာချုပ်ချုပ် စထရမ့်မာ ဖြစ်လာဖို့ ဖိတ်ခေါ်ရမယ်..."

"တကယ်လို့ သူက Douyin Live နဲ့ စာချုပ်ချုပ်ဖို့ သဘောတူမယ်ဆိုရင် Follower ၁၀၀,၀၀၀ ကျော်ရှိတဲ့ စထရမ့်မာ တစ်ယောက်နဲ့ တန်းတူ ခံစားခွင့်တွေ၊ အခွင့်အရေးတွေ ရမယ်လို့ သူ့ကို ပြောလိုက်..."

"မင်းသာ ချန်မိုကို စာချုပ်ချုပ်နိုင်ခဲ့ရင် အခုကစပြီး မင်းက စူပါ ကြီးကြပ်ရေးဌာနရဲ့ အကြီးအကဲ ဖြစ်လာလိမ့်မယ်..."

ချန်မိုသည် Douyin နှင့် စာချုပ် မချုပ်ရသေးသဖြင့် ကျိုးမင်မှာလည်း စိုးရိမ်ပူပန်လာခဲ့သည်။

အကယ်၍ အခြား လိုက်ဖ်လွှင့်မှု ပလပ်ဖောင်းများက ဤအကြောင်းကို သိသွားပြီး ချန်မိုကို ခိုးယူသွားပါက ကျိုးမင်တစ်ယောက် သေလောက်အောင် နောင်တရရပေလိမ့်မည်။

မည်သို့ပင်ဆိုစေ ကြည့်ရှုသူ ၁၀၀,၀၀၀ ကျော် ရရှိနိုင်စွမ်းရှိသော စထရမ့်မာ တစ်ဦးသည် ပလပ်ဖောင်းအတွက် ကြီးမားလှသော အကျိုးအမြတ်များကို ယူဆောင်လာပေးနိုင်ပေသည်။

ထို့ကြောင့် ကျိုးမင်သည် ချန်မိုကို သူတို့၏ Douyin Live ချန်နယ်တွင် စာချုပ်ချုပ်နိုင်ရန် အထူးကြိုးပမ်းခဲ့ပြီး ကြည့်ရှုသူ ၁၀၀,၀၀၀ ကျော်ရှိသော စထရမ့်မာ တစ်ဦး ဖြစ်လာစေရန် အရင်းအမြစ်များစွာ ရင်းနှီးမြှုပ်နှံပေးရန် ပြင်ဆင်ထားခြင်း ဖြစ်၏။

ဤရည်ရွယ်ချက်အတွက် ကျိုးမင်သည် စူပါအက်ဒမင် မန်နေဂျာဝမ်ကို ကြီးမားသော ကတိတစ်ခု ပေးခဲ့ခြင်းပင်။

"စိတ်မပူပါနဲ့ သူဌေး... ကျွန်တော် ဒီတာဝန်ကို ပြီးမြောက်အောင် လုပ်မယ်လို့ အာမခံပါတယ်..."

ကျိုးမင်၏ ကတိစကားကို ကြားလိုက်ရချိန်တွင် မန်နေဂျာဝမ်သည် အစပိုင်း၌ အံ့အားသင့်သွားသော်လည်း အလွန်အမင်း ဝမ်းသာပျော်ရွှင်စွာဖြင့် ပြန်လည် ဖြေကြားလိုက်၏။

မန်နေဂျာဝမ်သည် ကျိုးမင်အနေဖြင့် ကတိစကားများကို အလွယ်တကူ ပြောဆိုလေ့မရှိကြောင်း သိထားသော်လည်း ယခုအချိန်၌ သူသည် ၎င်းကို ဝမ်းမြောက်စွာ လက်ခံလိုက်သည်။

သူသည် ကျိုးမင်နှင့်အတူ လိုက်ဖ်လွှင့်မှု လုပ်ငန်းကို စတင်ခဲ့သော ဝါရင့်ဝန်ထမ်းများထဲမှ တစ်ဦးဖြစ်ရာ ကျိုးမင်၏ စရိုက်ကို အလွန် ကောင်းစွာ သိရှိထားပေသည်။

ကျိုးမင်သည် မိမိ၏ လက်အောက်ငယ်သားများကို အချည်းနှီး ကတိများ အလွယ်တကူ ပေးလေ့မရှိသော်လည်း တစ်ကြိမ် ပေးပြီးပါက သေချာပေါက် တည်မြဲအောင် လုပ်ဆောင်ပေးမည်ဖြစ်ကြောင်း မန်နေဂျာဝမ် ကောင်းစွာ သိထားသည်။

ယခုအခါ မန်နေဂျာဝမ်သည် စူပါ ကြီးကြပ်ရေးဌာန၏ အကြီးအကဲရာထူးကို ရယူနိုင်ရန်အတွက် ချန်မိုအား ချက်ချင်း ဆက်သွယ်ရန် အလွန် စိတ်အားထက်သန်နေချေပြီ။

...

ကျိုးမင်နှင့် မန်နေဂျာဝမ်တို့ စကားပြောနေချိန်မှာပင်။

လိုက်ဖ်လွှင့်မှု ကင်မရာရှေ့ရှိ ချန်မိုသည် ကြည့်ရှုသူများ၏ လက်ဆောင်များအတွက် ကျေးဇူးတင်စကား ပြောကြားပြီးနောက် လှုပ်ရှားမှုအသစ်တစ်ခုကို ပြုလုပ်လိုက်၏။

လိုက်ဖ်လွှင့်မှုသည် ရုတ်တရက် အခြား မျက်နှာပြင်တစ်ခုသို့ ပြောင်းသွားသည်။

ချန်မို၏ လိုက်ဖ်လွှင့်မှု နောက်ခံသည် ရှုပ်ပွနေသော ဆိုင်ခန်းထဲမှ ဆိုင်အနီးရှိ ပန်းခြံတစ်ခုအတွင်းမှ မြေကွက်လပ်တစ်ခုဆီသို့ ပြောင်းလဲသွားခဲ့၏။

ထို့နောက် သူပြုလုပ်ထားသော စက္ကူတင့်ကားများကို ဤမြေကွက်လပ်ဆီသို့ ရွှေ့ပြောင်းလာခဲ့သည်။

အကြောင်းမှာ နောက်တစ်ဆင့်အနေဖြင့် စက္ကူတင့်ကား မည်သို့ ရွေ့လျားပြီး အမြောက်ဆန်များကို မည်သို့ ပစ်ခတ်မည်ကို ပရိသတ်များအား သရုပ်ပြသတော့မည် ဖြစ်သောကြောင့်ပင်။

"ချစ်လှစွာသော အင်တာနက် အသုံးပြုသူများခင်ဗျာ... အခု သရုပ်ပြမှုကို စတင်တော့မှာ ဖြစ်ပါတယ်..."

"ဟေး မင်း... ကီးဘုတ်လူမိုက်... မင်း လိုက်ဖ်ထဲမှာ ဆက်နေပြီး သေချာ ကြည့်ထားတာ ပိုကောင်းမယ်နော်..."

စက္ကူတင့်ကားကို တပ်ဆင်ပြီးနောက် ချန်မိုက ကင်မရာရှေ့သို့ လာကာ လိုက်ဖ်လွှင့်မှုထဲရှိ ကြည့်ရှုသူများကို ပြောလိုက်သည်။

ထို့နောက် ချန်မိုသည် အစစ်အမှန် အရွယ်အစားရှိ စက္ကူတင့်ကားဆီသို့ လျှောက်သွားကာ တင့်ကား၏ အနောက်ဘက်ပိုင်းကို အချိန်အတန်ကြာ ကလိနေခဲ့၏။

ချန်မိုက လိုက်ဖ်လွှင့်မှု ကင်မရာမှ ထွက်ခွာသွားချိန်တွင် မြေကွက်လပ်၌ ရပ်ထားသော စက္ကူတင့်ကားသည် သူ့အလိုလို ဖြည်းညင်းစွာ စတင် ရွေ့လျားလာခဲ့သည်။

ယင်းသည် စက္ကူပုံတူဖြစ်သောကြောင့် ချန်မိုက ဤတင့်ကားအတွက် စွမ်းအင်စနစ်ကို ရှုပ်ထွေးသော စက်မှု ဂီယာ တည်ဆောက်ပုံမှတစ်ဆင့် ဒီဇိုင်းဆွဲထားခြင်းဖြစ်ပြီး ၎င်းက ရိုးရှင်းသော ရွေ့လျားနိုင်စွမ်းကို ရရှိစေခြင်း ဖြစ်သည်။

ဝိုး... ဒီစက္ကူတင့်ကားကြီးက တကယ်ကြီး ရွေ့လျားနေတယ်...

"စထရမ့်မာ... မင်းရဲ့ စွမ်းရည်တွေက အံ့မခန်းပဲ... မင်းကို အမိုက်ဆုံး ဒြပ်မဲ့ယဉ်ကျေးမှု အမွေအနှစ် လက်မှုပညာ စထရမ့်မာ လို့ ငါ ခေါ်မယ်..."

"မျက်နှာပြင် မှတ်တမ်းတင်တာ ပြီးသွားပြီ... နောက်မှ လိုက်ဖ်ကို ပြန်ပြီး ကြည့်ဦးမယ်..."

"အပေါ်ကလူ... လက်လျှော့လိုက်တာပဲ ကောင်းမယ်... မင်းကိုယ်မင်း စထရမ့်မာ လို ပါရမီရှင်တစ်ယောက်လို့ တကယ်ကြီး ထင်မနေဘူးမလား..."

"တကယ်လို့ ဒီတင့်ကားက ရွေ့နိုင်တယ်ဆိုရင် စထရမ့်မာ ခုနက ပြောသွားတဲ့ အမြောက်ဆန် ပစ်မယ်ဆိုတာကရော တကယ်ပဲ လုပ်နိုင်မှာလား...”