အခန်း ၆၅

အခန်း (၆၅)

အာဘောဂျီ ဆာရာယိုဂျူဆယ်ယို

ကောင်းယွမ်၏ စကားများကြောင့် လီပင်းရှီးနှင့် သူ၏ ချစ်သူတို့မှာ လုံးဝ ဆွံ့အသွားခဲ့ကြလေသည်။

ဘာတွေ ဖြစ်ကုန်တာလဲဟု တွေးလိုက်မိကြလေ၏။

ပြန်ပေးဆွဲခံရသော ဓားစာခံက ပြန်ပေးဆွဲသူများကို လှည့်၍ ကူညီချင်နေသည်တဲ့လား။ သူတို့များ ရူးသွားကြပြီလားဟု တွေးမိသွားကြလေသည်။

ထိုအချိန်တွင် အမျိုးသမီးက သတိထား၍ မေးလိုက်လေ၏။

"ကျွန်မတို့ ဘာလုပ်ပေးဖို့ လိုအပ်လဲ..."

"အမေရိကန်မှာ အရောင်းနဲ့ ဖြန့်ချိရေး လမ်းကြောင်းတစ်ခု တည်ဆောက်ဖို့ ကျွန်တော့်ကို ကူညီပေးပါ... ခင်ဗျားတို့ သေချာပေါက် လုပ်နိုင်မယ်ဆိုတာ ကျွန်တော် သိတယ်... ဟုတ်တယ်မလား... သေချာတာပေါ့ ခင်ဗျားတို့ ငြင်းပယ်ဖို့ ရွေးချယ်နိုင်ပါတယ်... ဒါပေမဲ့ လီကျန်းကျီကတော့..."

ဤစကားဆိုလျှင် လုံလောက်ပြီ ဖြစ်ပေသည်။

ဤစကားကို ကြားသောအခါ လီကျန်းကျီ၏ မျက်နှာမှာ စိုးရိမ်ပူပန်မှုများ ပေါ်လွင်သွားခဲ့လေသည်။ စည်းကမ်းချက်များကို သဘောတူညီသရွေ့ သူ အသက်ရှင်နိုင်ခြေ အများဆုံးဖြစ်ကြောင်း သူ သိထား ခဲ့လေ၏။

အကယ်၍ ဆွေးနွေးမှုသာ ပျက်ပြားသွားပါက။

လီကျန်းကျီသည် လေထဲတွင် လွင့်ပျံသွားခဲ့သော သွေးမြူခိုးများကို ပြန်လည် သတိရလိုက်လေသည်။

သူက ဘေးမှနေ၍ အော်ဟစ်လိုက်လေ၏။

"အာဘောဂျီ... ဆာရာယိုဂျူဆယ်ယို..."

ဖုန်း၏ အခြားတစ်ဖက်မှ လူနှစ်ဦးမှာ တစ်စုံတစ်ခုကို ဆွေးနွေးနေကြပုံ ရလေသည်။

ကောင်းယွမ်သည် အလျင်စလို မဖြစ်ဘဲ လီကျန်းကျီကို ဆွဲထုတ်သွားရန် အန်းရီကို အချက်ပြလိုက် လေ၏။

မိနစ်အနည်းငယ်ကြာပြီးနောက် အမျိုးသမီးက စကားပြောလာခဲ့လေသည်။

"ဥက္ကဋ္ဌကောင်း... ရှင် တကယ် ပြောနေတာလား... ရှင့်ကို ကျွန်မတို့ ဘယ်လို ယုံကြည်ရမလဲ..."

"သေချာတာပေါ့ အမှန်ပါပဲ... ခင်ဗျားတို့ဘက်က ကိုယ်စားလှယ်တစ်ယောက်ကို ငါးရံ့နက် နည်းပညာ စက်မှုဇုန်ဆီ စေလွှတ်ပြီး ကျွန်တော်တို့နဲ့ အရင်းအမြစ် ဖလှယ်ရေး သဘောတူညီချက်ကို လက်မှတ် လာထိုးလို့ ရပါတယ်... ဘယ်လိုလဲ..."

"တကယ်လား..."

အမျိုးသမီးက မေးလိုက်လေ၏။

ကြယ်ကိုးစင်းအုပ်စုသည် ယခုအခါ ရှနိုင်ငံ ဈေးကွက်တွင် လက်တွေ့အားဖြင့် လုံးဝ ပျောက်ကွယ်နေပြီ ဖြစ်လေသည်။ သူတို့သည် လုံးဝ ဆုတ်ခွာသွားခြင်း မရှိသေးသော်လည်း လက်တွေ့တွင် မရှိသလောက် ပင် ဖြစ်နေခဲ့ပေ၏။

ယခုအခါ ကမ္ဘာ့အကြီးဆုံး စမတ်ဖုန်း ထုတ်လုပ်ရေး အခြေစိုက်စခန်းဖြစ်ပြီး အကြီးဆုံး စမတ်ဖုန်း ဈေးကွက်လည်းဖြစ်သော ရှနိုင်ငံ ဈေးကွက်သို့ ပြန်လည်ဝင်ရောက်ရန် အခွင့်အရေး ရရှိလာခဲ့ပြီ ဖြစ်လေသည်။

ရှနိုင်ငံ ဈေးကွက်ကို ဆုံးရှုံးပြီးနောက် ကြယ်ကိုးစင်းအုပ်စု၏ မိုဘိုင်းဖုန်း လုပ်ငန်းမှာ ပထမအဆင့်မှ နေ၍ တတိယအဆင့်သို့ တိုက်ရိုက် ကျဆင်းသွားခဲ့ပေသည်။

သူတို့သည် ငါးရံ့နက်ချစ်ပ်ပြားနှင့် ပတ်သက်၍ ရည်မှန်းချက် ကြီးမားနေကြပြီး သူတို့၏ အမြင့်ဆုံး အခြေအနေသို့ ပြန်လည်ရောက်ရှိရန် အလိုရှိနေကြလေသည်။ ယခု ကောင်းယွမ်က ကတိပေးလာ သောကြောင့် သူတို့ သဘောမတူစရာ အကြောင်း လုံးဝ မရှိတော့ပေ။

ကောင်းယွမ်၏ စည်းကမ်းချက်များနှင့် ပတ်သက်၍မူ။

သူတို့က ကြီးမားသော ပြဿနာတစ်ခုဟု မထင်ခဲ့ကြပေ။

ကြယ်ကိုးစင်းအုပ်စုသည် အမေရိကန်တွင် အခြေခံအားဖြင့် သီးခြားရပ်တည်နေသည်ဖြစ်ရာ ငါးရံ့နက် နည်းပညာကုမ္ပဏီကို အမေရိကန်၌ အရောင်းလမ်းကြောင်း တည်ဆောက်ရာတွင် ကူညီပေးခြင်းမှာ ထူးခြားသည့် ကိစ္စရပ် မဟုတ်ပေ။

"ဥက္ကဋ္ဌကောင်း... ကျန်းကျီ... နေကောင်းရဲ့လား..."

"စိတ်မပူပါနဲ့... ကျွန်တော်တို့က မိတ်ဖက်တွေပဲ... ပြီးတော့ ကျန်းကျီကလည်း သဘာဝကျကျပဲ ကျွန်တော့်ရဲ့ တူအရွယ်လေးပါ... သူ့ရဲ့ ဦးလေး တစ်ယောက်အနေနဲ့ သူ့ကို ဘယ်လိုလုပ် အကြမ်းဖက် ရက်မှာလဲ... ဒါပေမဲ့... ဒီဖြစ်ရပ်က နောက်ဆုံးအကြိမ် ဖြစ်ဖို့ မျှော်လင့်ပါတယ်..."

"အရမ်းကို ကျေးဇူးတင်ပါတယ် ဥက္ကဋ္ဌကောင်း..."

...

ဖုန်းချပြီးနောက် ကောင်းကင်ယံတွင် ကယ်ဆယ်ရေး ရဟတ်ယာဉ် တစ်ဖြည်းဖြည်း နီးကပ်လာသည်ကို ကောင်းယွမ် မြင်လိုက်ရလေသည်။

သူသည် ကျန်းပိုင်ရီကို ကြည့်လိုက်၏။

"လောင်ကျန်း... ပြင်ဆင်ထား..."

"ဘာကို ပြင်ဆင်ရမှာလဲ... လောင်ကောင်း... မင်း တကယ်ပဲ ကြယ်ကိုးစင်းအုပ်စုနဲ့ ပူးပေါင်းမလို့တော့ မဟုတ်ဘူးမလား..."

"သေချာတာပေါ့... ဘာလို့ မပူးပေါင်းရမှာလဲ... ဘာပဲဖြစ်ဖြစ် ငါတို့ရဲ့ လက်ပတ်ဖုန်းက မကြာခင် ဈေးကွက်ထဲ ရောက်တော့မှာလေ... ရှနိုင်ငံက မိုဘိုင်းဖုန်း လုပ်ငန်းတွေ အားလုံးကို သူတို့ကို ပေးလိုက် လို့ ရတယ်... အဲဒါက ပြည်တွင်း ထုတ်လုပ်သူတွေ သူတို့ရဲ့ ဆုံးရှုံးမှုတွေကို ပြန်လည်ရယူဖို့ ကူညီပေးနိုင် သလို စက်ပစ္စည်း လမ်းကြောင်းတွေကိုလည်း သူတို့ဆီ ဈေးကောင်းကောင်းနဲ့ ရောင်းချနိုင်မှာပေါ့..."

ဤစကားကို ကြားသောအခါ။

ကျန်းပိုင်ရီသည် လက်မထောင်ပြလိုက်လေ၏။

"မင်းက တကယ် မိုက်တာပဲ... သောက်ကျိုးနည်း... ဟိုကောင်က ဒီနေရာမှာ ရှိနေတုန်းပဲလေ... ငါတို့ ပြောတာကို သူ ကြားသွားရင် ဘယ်လိုလုပ်မလဲ..."

ကောင်းယွမ်သည် ပြုံးကာ ပြောလိုက်လေသည်။

"လျှို့ဝှက်ချက် တစ်ခုကို ထာဝရ ဘယ်လို ထိန်းသိမ်းရမလဲဆိုတာ မင်း သိလား..."

ဤစကားစုကို ရုပ်ရှင်များနှင့် ရုပ်မြင်သံကြား ဇာတ်လမ်းတွဲ အမျိုးမျိုးတွင် လူကြမ်းများက ပြောဆိုလေ့ ရှိကြောင်းကို ကျန်းပိုင်ရီ သေချာပေါက် သိထားလေသည်။ ၎င်းမှာ ဇာတ်လိုက်ကို သတ်ရန် ကြိုးစား သည့် ရိုးရှင်းသော နည်းလမ်းတစ်ခုပင် ဖြစ်ပေ၏။

"ဒါပေမဲ့... ငါတို့က ကြယ်ကိုးစင်းအုပ်စုနဲ့ အတူတူမှ မဟုတ်တာ..."

သဘောတူညီချက် ရသွားကြောင်း ကြားလိုက်ရချိန်တွင် လီကျန်းကျီသည် ခါးမတ်ကာ မတ်တတ်ရပ် လိုက်သော်လည်း ယခုအခါ ကောင်းယွမ်က ဤစကားများကို သူ့ရှေ့၌ မည်သည့် တုံ့ဆိုင်းမှုမျှမရှိဘဲ ပြောဆိုနေသည်ကို ကြားလိုက်ရသဖြင့် သူသည် တဖြည်းဖြည်း ပြန်လည် ကျုံ့ဝင်သွားကာ မြေပြင်ပေါ်၌ ကိုယ်ပျောက်နေသူ တစ်ဦးအလား ဆောင့်ကြောင့် ပြန်ထိုင်လိုက်လေတော့သည်။

"ဟုတ်တယ်... လီကျန်းကျီကို အသက်ရှင်ခွင့်ပေးမယ်လို့ ငါ ရည်ရွယ်ခဲ့တာ မှန်တယ်... ဒါပေမဲ့... ဘယ် လီကျန်းကျီလဲဆိုတာတော့ ငါ မပြောခဲ့ဘူးလေ... အန်းရီ... အန်းအာ့..."

လုံခြုံရေးစက်ရုပ် နှစ်ရုပ်သည် ကောင်းယွမ်၏ ရည်ရွယ်ချက်များကို အာရုံခံမိသွားကြလေသည်။

သူတို့သည် အချင်းချင်း ကလိကာ စတင် ပြုပြင်လိုက်ကြပြီး မကြာမီမှာပင် ထိုနှစ်ရုပ်၏ ရုပ်သွင်မှာ ပြောင်းလဲသွားခဲ့လေ၏။ ထိုးဖောက်ဝင်ရောက်ခြင်းနှင့် အသွင်ယူခြင်းတို့မှာ လုံခြုံရေးစက်ရုပ်၏ လုပ်ငန်း နယ်ပယ်ထဲတွင် ပါဝင်ပေသည်။

ဤအချိန်တွင် အန်းရီသည် လီကျန်းကျီ အဖြစ်သို့ ပြောင်းလဲသွားခဲ့ပြီး လီကျန်းကျီ၏ ဘေးတွင် ရပ်လိုက်သောအခါ သူတို့သည် အမြွှာညီအစ်ကိုများအလား တူညီနေခဲ့လေသည်။ အန်းအာ့မှာမူ လီကျန်းကျီ၏ သက်တော်စောင့်အဖြစ် ပြောင်းလဲသွားခဲ့လေ၏။

ကောင်းယွမ်က လက်ဝှေ့ယမ်းပြလိုက်လေသည်။

"သွား... မှတ်ဉာဏ်တွေကို ကူးယူလိုက်..."

မှတ်ဉာဏ် ကူးယူခြင်းသည် ဦးနှောက်လှိုင်းပုံရိပ်ဖော်ကိရိယာ၏ အဆင့်မြှင့်တင်ထားသော အသုံးချမှု တစ်ခု ဖြစ်လေသည်။ အန်းရီသည် လီကျန်းကျီထံသို့ လျှောက်သွားကာ သူမ၏ လက်ဖဝါးထဲမှ ကြိုးမျှင် အချို့ကို ဆန့်ထုတ်လိုက်ပြီး လီကျန်းကျီ၏ ဦးခေါင်းပေါ်ရှိ အဓိက နေရာအချို့တွင် တပ်ဆင်လိုက်လေ ၏။

ထို့နောက် ဖတ်ရှုမှုကို စတင်လိုက်လေတော့သည်။

ဤကြိုးမျှင်များသည် အထူးရောင်ခြည်တစ်ခုကို ထုတ်လွှတ်ကာ လီကျန်းကျီ၏ ဦးနှောက်ကို အရှိန် အဟုန်ဖြင့် လည်ပတ်စေရန် လှုံ့ဆော်ပေးလေသည်။ အန်းရီသည် ဦးနှောက်လှိုင်းများကို ဖတ်ရှုကာ သူ၏ ဗဟိုကွန်ပျူတာစနစ်ထဲတွင် ပုံရိပ်ဖော်၍ သိမ်းဆည်းလိုက်လေ၏။

လုပ်ငန်းစဉ်တစ်ခုလုံးမှာ အလွန် မြန်ဆန်လှပေသည်။

ထို့နောက် ကောင်းယွမ်သည် သူ၏ အကာအကွယ်ဝတ်စုံကို ချွတ်လိုက်ပြီး ကိရိယာအားလုံးကို ယာဉ်ပျံ ထဲသို့ ထည့်လိုက်ကာ တစ်ကိုယ်တော်သုံး သယ်ဆောင်ရလွယ်ကူသော ယာဉ်ပျံငယ် နှစ်စီးကိုသာ ချန်ထားခဲ့လေသည်။

ကျန်းပိုင်ရီသည် သူ၏ လှုပ်ရှားမှုများကို သတိပြုမိသွားပြီး မေးလိုက်လေ၏။

"လောင်ကောင်း... မင်း ဘာလုပ်နေတာလဲ..."

"အဓိပ္ပာယ်မရှိတာတွေ ပြောမနေနဲ့... မြန်မြန် လုပ်စရာရှိတာ လုပ်..."

"အို..."

ထို့နောက် ကောင်းယွမ်သည် ယာဉ်ပျံထဲတွင် အဆင့်မြင့်နည်းပညာများစွာ ပါဝင်နေသဖြင့် အန်းအာ့ကို ယာဉ်ပျံအား မောင်းနှင်ကာ အနာဂတ်ကမ္ဘာသို့ ပြန်၍ သိမ်းဆည်းခိုင်းလိုက်လေသည်။

ထို့နောက် သူနှင့် ကျန်းပိုင်ရီတို့သည် ရွာထဲသို့ ပြန်ဝင်လာခဲ့ကြပြီး အန်းအာ့ကို သူတို့နှစ်ဦးစလုံးအား ကြိုးဖြင့် တုပ်ခိုင်းလိုက်လေ၏။

အန်းအာ့ ထွက်ခွာသွားပြီးနောက် အန်းရီသည် လီကျန်းကျီ၏ မှတ်ဉာဏ်များကို ဖတ်ရှုပြီးစီးသွားခဲ့ လေပြီ။

ဤအချိန်တွင် လီကျန်းကျီမှာ အသိလွတ်နေသူ တစ်ဦးအလား လုံးဝ ကြောင်အမ်းအမ်း ဖြစ်နေခဲ့ ပေသည်။

မှတ်ဉာဏ်များ ဖတ်ရှုခံရပြီးနောက် လီကျန်းကျီမှာ အသုံးမဝင်တော့သဖြင့် အန်းရီက သူ့ကို အန္တရာယ် ကင်းကင်း ရှင်းလင်းပစ်လိုက်လေ၏။

အန်းရီသည် အထက်သို့ မော့ကြည့်လိုက်ရာ ကယ်ဆယ်ရေးအဖွဲ့၏ ရဟတ်ယာဉ် ရောက်ရှိလာသည်ကို မြင်လိုက်ရလေသည်။ ပန်ကာရဟတ်များကြောင့် တိုက်ခတ်လာသော လေပြင်းများမှာ အလွန် ပြင်းထန် လှသဖြင့် လူများပင် မတ်တတ်ရပ်ရန် ခက်ခဲနေခဲ့ပေ၏။

ထို့ကြောင့် သူနှင့် အန်းအာ့တို့သည် တစ်ကိုယ်တော်သုံး သယ်ဆောင်ရလွယ်ကူသော ယာဉ်ပျံငယ်များကို ဝတ်ဆင်ကာ 'ထွက်ပြေး' သွားခဲ့ကြလေတော့သည်။

ဆယ်မိနစ်ခန့် ကြာပြီးနောက်။

ကယ်ဆယ်ရေး အဖွဲ့ဝင်များသည် ရွာထဲသို့ ပြေးဝင်လာကြပြီး စိတ်ဓာတ်ကျနေပုံရသော ကောင်းယွမ်နှင့် ကျန်းပိုင်ရီတို့ကို ကယ်တင်ခဲ့ကြလေသည်။

တစ်ချိန်တည်းမှာပင် ကယ်ဆယ်ရေးအဖွဲ့သည် 'လီကျန်းကျီ' နှင့် သူ၏ သက်တော်စောင့်များ ထွက်ပြေး သွားသည်ကို တွေ့ရှိခဲ့ကြလေ၏။

လိုက်လံ ဖမ်းဆီးမှုများ စတင်ခဲ့သော်လည်း မမျှော်လင့်ဘဲ မည်သည့်နေရာ၌ ထုတ်လုပ်ထားမှန်း မသိရ သော တစ်ကိုယ်တော်သုံး ယာဉ်ပျံငယ်များမှာ အလွန် မြန်ဆန်ပြီး ပို၍ သွက်လက်လှသဖြင့် ရဟတ် ယာဉ်မှာ လုံးဝ မမီနိုင်ခဲ့ပေ။ နာရီဝက်ခန့် လိုက်လံ ဖမ်းဆီးပြီးနောက် သူတို့သည် မျက်ခြည်ပြတ်သွားခဲ့ လေတော့သည်။

ကောင်းယွမ်နှင့် ကျန်းပိုင်ရီတို့ကို လားရှိုးသို့ ခေါ်ဆောင်သွားခဲ့ကြပြီး ဆေးရုံတွင် အပြည့်အစုံ ဆေးစစ်မှု များ ခံယူပြီးနောက် ရှနိုင်ငံ၏ ကယ်ဆယ်ရေး စစ်ဆင်ရေး စစ်ဦးစီးချုပ်နှင့် တွေ့ဆုံခဲ့ကြလေသည်။

"ဥက္ကဋ္ဌကောင်း... ဒုတိယဥက္ကဋ္ဌကျန်း... ကျွန်တော်က မီးသတ်နှင့် ကယ်ဆယ်ရေးတပ်ဖွဲ့ရဲ့ အထူးစစ်ဆင် ရေးတပ်စု (၃) ရဲ့ ခေါင်းဆောင် ကျန်းကျိုချီ ပါ... ခင်ဗျားတို့အားလုံး ဘေးကင်းကင်းနဲ့ ရှိနေတာကို မြင်ရတဲ့အတွက် ဝမ်းသာပါတယ်..."

"ခေါင်းဆောင်ကျန်း... မင်္ဂလာပါ..."

"ခင်ဗျားတို့ ပြန်ပေးဆွဲခံရတဲ့ အကြောင်းကို ပြောပြပေးနိုင်မလား... တစ်ယောက်ယောက်က ဥက္ကဋ္ဌ ကောင်း လေယာဉ်ပေါ်ကနေ ခုန်ချသွားတာကို မြင်လိုက်တယ်လို့ ပြောကြတယ်... ခင်ဗျားတို့ ဘယ်လို အဖမ်းခံလိုက်ရတာလဲ..."

ကောင်းယွမ်သည် သူ့ကိုယ်သူ တည်ငြိမ်အောင် ထိန်းလိုက်ပြီး အတိတ်ကို ပြန်လည် တမ်းတရန် အလွန် နာကျင်ရပုံ ပေါ်နေခဲ့လေသည်။

သူသည် သက်ပြင်းရှည်ကြီး တစ်ချက်ချလိုက်လေ၏။

"ခေါင်းဆောင်ကျန်း... ဒါက တစ်စိတ်တစ်ပိုင်းအားဖြင့် ကျွန်တော့်ရဲ့ အမှားပါ... ဒီနိုင်ငံခြား ရန်သူ့တပ်ဖွဲ့ တွေက မြို့တော်ထဲမှာတင် လေယာဉ်တစ်စီးကို ပြန်ပေးဆွဲရဲလောက်အောင် အဲဒီလောက် ရူးသွပ်နေကြ လိမ့်မယ်လို့ ကျွန်တော် မမျှော်လင့်ထားခဲ့ဘူး... ခင်ဗျား သိတဲ့အတိုင်းပဲ ကျွန်တော့်ကုမ္ပဏီမှာ အရေးကြီး တဲ့ နည်းပညာတချို့ ရှိနေတယ်လေ... အဲဒီအချိန်တုန်းက ကျွန်တော် သေသွားရင်တောင် ဒီနည်းပညာ တွေကို ရန်သူ့လက်ထဲ အကျခံလို့မဖြစ်ဘူးလို့ တွေးလိုက်မိတယ်... ဒါကြောင့် ဘာမှ မတွေဝေနေဘဲ လေယာဉ်ပေါ်ကနေ ခုန်ချခဲ့တာပါ... ကျွန်တော် သေချာပေါက် သေရတော့မယ်လို့တောင် ထင်ခဲ့တာ..."

"ဒါပေမဲ့ ရန်သူက အောက်ကနေ စောင့်နေလိမ့်မယ်လို့ မမျှော်လင့်ထားခဲ့ဘူး... သူတို့ဆီမှာ ကျောမှာ လွယ် ထားလို့ရတဲ့ သယ်ဆောင်ရလွယ်ကူတဲ့ ယာဉ်ပျံလေးတွေ ရှိနေခဲ့တယ်... လူနှစ်ယောက် ပျံတက် လာပြီး ကျွန်တော့်ကို လေထဲမှာ ဖမ်းချုပ်လိုက်တာကိုပဲ မြင်လိုက်ရတယ်... မြေပြင်ပေါ် ရောက်လာပြီး နောက်မှာတော့ ကျွန်တော် ဒီနေရာကို အခေါ်ခံခဲ့ရတာပါပဲ..."

ကျန်းကျိုချီသည် ခေါင်းညိတ်လိုက်လေ၏။ ထိုသယ်ဆောင်ရလွယ်ကူသော ယာဉ်ပျံကို သူ ကိုယ်တိုင် မြင်တွေ့ခဲ့ပြီး ဖြစ်ပေသည်။ အမှန်တကယ်ပင် ၎င်းသည် အလွန် မြန်ဆန်လှပြီး ကောင်းယွမ်၏ ပြောပြ ချက်မှာ ယုတ္တိတန်နေခဲ့လေသည်။

"ဥက္ကဋ္ဌကောင်း... ခင်ဗျား အဖမ်းခံရပြီးတဲ့နောက် ခင်ဗျားဆီလာပြီး ဘာတွေများ ပြောခဲ့သေးလဲ... ခင်ဗျားကို ပြန်ပေးဆွဲရတဲ့ သူတို့ရဲ့ ရည်ရွယ်ချက်က ဘာလဲ... ဒါကို ဘယ်သူက စီစဉ်ခဲ့တာလဲ..."