အခန်း ၂၄၁

အပိုင်း (၂၄၁)

သတင်းပို့စစ်သည်က စစ်စခန်းမှ ထွက်ခွာသွားပြီး နာရီဝက်ကျော်ကြာသည်အထိ မည်သည့်သတင်းမှ ပြန်မပို့လာခဲ့ချေ။ ဆန့်ကျင်ဘက်အနေဖြင့် ဝံပုလွေတပ်ဖွဲ့မှ ကင်းထောက်က သတင်းသစ်တစ်ခုကို ယူဆောင်လာခဲ့လေသည်။ "ကျူကျွင်း... အဲ့ဒီ ရှီးလင်စစ်တပ်က ကျားချောက်တောင်ကြားဂိတ်ဘက်ကို ဆက်ပြီး ချီတက်နေပါတယ်"

သစ်ပင်အရိပ်အောက်တွင် လက်ပိုက်ကာ ရပ်နေသော ရှောင်းလိသည် မျက်လုံးများကို ဖွင့်လိုက်ပြီး သဲပြင်ပေါ်တွင် တင်းကျပ်စွာ ကြိုးတုပ်ခံထားရကာ နေပူလှန်းခံနေရသော နီရူကို ကြည့်လိုက်၏။

နီရူသည် နေလောင်ခံရသဖြင့် နှုတ်ခမ်းများ ခြောက်သွေ့ကွဲအက်နေပြီး မည်သို့ဖြစ်ပျက်နေသည်ကို သူ၏စိတ်ထဲတွင် အကြမ်းဖျင်း နားလည်နေပြီ ဖြစ်သည်။ သူသည် စိတ်ထဲတွင် ကြိတ်ပြီး ဒေါသထွက်နေသော်လည်း လက်ရှိအချိန်တွင်တော့ ဂရုမစိုက်သည့်ပုံစံ ဟန်ဆောင်ကာ ကျယ်လောင်စွာ ရယ်မောပြီး လှောင်ပြောင်လိုက်လေသည်။ "ငါ အရင်က ဘာပြောခဲ့လဲ"

သူသည် ခြောက်သွေ့ဖြူဖျော့နေသော နှုတ်ခမ်းကို လျှာဖြင့် သပ်လိုက်ပြီး ရှောင်းလိကို ပြောလိုက်၏။ "မြန်မြန်လေး... ငါ့ကို ဓားတစ်ချက်တည်းနဲ့ အဆုံးသတ်ပေးလိုက်စမ်းပါ"

မြားတစ်ပစ်စာအကွာတွင် ရပ်တန့်ရန် အမိန့်ပေးခံထားရသော ရှီးလင်စစ်သူကြီးများကတော့ အလောတကြီး အော်ဟစ်လိုက်ကြလေသည်။ "မလုပ်နဲ့။ မလုပ်နဲ့"

ရှီးလင် စစ်သူကြီးငယ်တစ်ဦးသည် စကားပြောရင်း နောက်ဆုတ်သွားကာ မြင်းကို ဆွဲ၍ ပြောလိုက်သည်။ "ကျွန်တော်ကိုယ်တိုင် ကြင်ရာတော်တို့အဖွဲ့နောက်ကို လိုက်သွားပြီး ဒီကိစ္စကို သတင်းပို့လိုက်ပါ့မယ်"

ရှောင်းလိသည် နေမင်းကို တစ်ချက်ကြည့်လိုက်ပြီး အေးစက်စွာ ပြောလိုက်၏။ "မင်းတို့ နောက်ကို မိုင်ငါးဆယ်လောက် ဆုတ်သွားကြ"

အဝေးမှ ရှီးလင်စစ်သူကြီးများသည် တစ်ယောက်ကိုတစ်ယောက် ကြည့်လိုက်ကြပြီး ဘယ်သူမှ အသံမထွက်ရဲကြချေ။

ရှောင်းလိသည် မေးစေ့ကို အနည်းငယ် ပင့်လိုက်ရာ ဘေးနားရှိ ကိုယ်ရံတော်နှစ်ဦးက ချက်ချင်း ရှေ့တိုးလာပြီး သဲပြင်ပေါ်တွင် နေပူလှန်းခံနေရသော နီရူကို ဆွဲထူလိုက်ကာ အရင်က အသားတစ်ဖဲ့ လှီးဖြတ်ခံထားရသော သူ့လည်ပင်းကို ဓားဖြင့် ထောက်ထားလိုက်ကြသည်။

ပြင်းထန်သော နေရောင်ကြောင့် ခြောက်သွေ့နေသော ဒဏ်ရာကို ဓားကိုယ်ထည်က နောက်တစ်ကြိမ် ဖိချလိုက်သဖြင့် နာကျင်မှုက ခံမရပ်နိုင်အောင် ဖြစ်သွား၏။ နီရူသည် အံကြိတ်ကာ အသံမထွက်သော်လည်း နာကျင်မှုကြောင့် သူ၏မျက်နှာက ရှုံ့မဲ့သွားလေသည်။

ရှောင်းလိသည် မျက်နှာချင်းဆိုင်တွင် တုံ့ဆိုင်းနေကြသော ရှီးလင်စစ်သူကြီးတစ်စုကို စိုက်ကြည့်လိုက်သည်။ "မင်းတို့ရဲ့ စစ်သူကြီး အသားတစ်ဖဲ့ ထပ်အလှီးခံရတာကို မမြင်ချင်ဘူးဆိုရင် ပြောတဲ့အတိုင်း လုပ်"

ရှီးလင်စစ်သူကြီးများသည် မာနမထောင်လွှားရဲကြတော့ဘဲ အချင်းချင်း တစ်ချက်ကြည့်လိုက်ကြပြီးနောက် နောက်ဆုံးတွင် အမိန့်ပေးလိုက်ကြ၏။ "နောက်ကို မိုင်ငါးဆယ် ဆုတ်"

ရှီးလင်စစ်တပ်ကြီးသည် စခန်းရုပ်သိမ်းကာ နောက်သို့ ဆုတ်ခွာသွားကြသည်။ စစ်သူကြီးများသည် ကိုယ်ရံတော်များကို ခေါ်ဆောင်ကာ ဆုတ်ခွာနေရင်း ဤဘက်သို့ အဆက်မပြတ် လှည့်ကြည့်နေကြလေသည်။

ရှောင်းလိသည် လုံးဝ မမြင်ဟန်ပြုနေပြီး လက်ညှိုးကို နှုတ်ခမ်းနားတေ့ကာ ရှည်လျားသော လေချွန်သံတစ်ခုကို မှုတ်ထုတ်လိုက်ရာ အဝေးတွင် မြက်ခြောက်များကို ဝါးစားနေသော မြင်းက ချက်ချင်း ပြေးလာခဲ့သည်။

ရှောင်းလိသည် ကုန်းနှီးကြိုးကို ဆွဲကိုင်ကာ မြင်းပေါ်သို့ တက်ခွလိုက်ပြီး ပြောလိုက်၏။ "လူကို ခေါ်ခဲ့ပြီး ဖေစုန့်နောက်ကို လိုက်ကြမယ်"

လက်အောက်ရှိ ဝံပုလွေတပ်ဖွဲ့ဝင်များသည် သူ၏ရည်ရွယ်ချက်ကို ချက်ချင်း နားလည်သွားကြလေသည်။

ရှီးလင်ဘက်မှ လူများကို ဖေစုန့်ထံ သွားရောက်တားဆီးခိုင်းပါက သွားလိုက်ပြန်လိုက်ဖြင့် အချိန်မည်မျှ နှောင့်နှေးသွားလိမ့်မည်ကို မသိနိုင်ချေ။ ထို့အပြင် ဖေစုန့်ကသာ နီရူ၏အသက်ရှင်သေရေးကို လျစ်လျူရှုရန် ဆုံးဖြတ်ထားပါက ထိုသတင်းကို ပို့လိုက်ရခြင်းကလည်း အချည်းနှီးသာ ဖြစ်သွားလိမ့်မည်။

ထို့ကြောင့် သူတို့ကိုယ်တိုင် နီရူကို ခေါ်ဆောင်ကာ ဖေစုန့်ဦးဆောင်သွားသော ထိုစစ်တပ်ကြီးကို ကိုယ်တိုင် သွားရောက်တားဆီးခြင်းက ပိုကောင်းပေသည်။

အတူလိုက်ပါသွားသော ရှီးလင်စစ်သူကြီးများထဲတွင် နီရူကို သိရှိသူများ သေချာပေါက် ရှိနေလိမ့်မည်။

ဤရှီးလင်စစ်တပ် အင်အားသုံးသောင်းကို အနှောင့်အယှက်ပေးပြီး အချိန်ဆွဲနေခဲ့သော နေ့ရက်များအတွင်း ရှောင်းလိသည် စစ်တပ်ကို ဦးဆောင်သော အဓိကစစ်သူကြီးကို စုံစမ်းရန် သူတို့ကို အစောကြီးကတည်းက စေခိုင်းထားခဲ့သည်။ ဤနီရူသည် ရှီးလင်၏ အရေးကြီးသော စစ်သူကြီးဖြစ်ပြီး ရှီးလင်မင်းသမီး ဟယ်ယီ၏ ယုံကြည်ရသူလည်း ဖြစ်သည်။

ဟယ်ယီက သူ့ကို စစ်တပ်ဦးဆောင်ကာ လိုက်ပါစေခဲ့ခြင်းမှာ ဖေစုန့်ကို အပြည့်အဝ မယုံကြည်သေးကြောင်း သိသာထင်ရှားနေသည်။ ရှောင်းလိက အစောပိုင်းတွင် ထိုရှီးလင်စစ်သူကြီးငယ် ယူဆောင်လာသော သတင်းသည် ဖေစုန့်နှင့် သက်ဆိုင်ကြောင်း လှည့်စားပြောဆိုလိုက်ချိန်တွင် တစ်ဖက်လူက ချက်ချင်းပင် နှုတ်ဆိတ်သွားပြီး ထပ်မမေးတော့ခြင်းကလည်း ဤအချက်ကို သက်သေပြနေ၏။

ဖေစုန့်သည် ရှီးလင်စစ်တပ်ထဲတွင် နေထိုင်ခဲ့သည့် အချိန်တိုတောင်းလှသဖြင့် ရှီးလင်စစ်သည်အားလုံးကို သူ့စကား နားထောင်လာစေရန် စွမ်းဆောင်နိုင်စွမ်း မရှိသေးချေ။

လူတစ်စုသည် တင်းကျပ်စွာ ကြိုးတုပ်ခံထားရသော နီရူကို ဆွဲမကာ ရှီးလင်ဘက်မှ လုယူလာသော စစ်မြင်းများပေါ်သို့ တက်ခွပြီး ကျာပွတ်ကို ရိုက်ကာ ထွက်ခွာသွားကြလေသည်။

အကွာအဝေးတစ်ခုအထိ ပြေးသွားပြီးနောက် ဝံပုလွေတပ်ဖွဲ့ဝင်တစ်ဦးက အနောက်ဘက်ရှိ လှုပ်ရှားမှုကို သတိထားမိသွားပြီး ရှောင်းလိကို မြင်းဖြင့် လိုက်မီကာ ပြောလိုက်သည်။ "ကျူကျွင်း... အနောက်ဘက်မှာ ရှီးလင်ကင်းထောက်တွေ လိုက်လာတယ်။ ရှင်းပစ်လိုက်ရမလား"

ရှောင်းလိသည် အရှိန်ပြင်းပြင်း ပြေးနေစဉ် နောက်သို့ တစ်ချက်လှမ်းကြည့်လိုက်ပြီး ပြောလိုက်၏။ "ဂရုစိုက်စရာ မလိုဘူး"

နီရူ အရှင်လတ်လတ် ဖမ်းဆီးခံလိုက်ရသဖြင့် လက်အောက်ရှိ စစ်သူကြီးငယ်များသည် မိုင်ငါးဆယ် ဆုတ်ခွာရန် အမိန့်ပေးခံရပြီးနောက်တွင် နီရူကို လုံးဝ လျစ်လျူရှုထားရန် မဖြစ်နိုင်ချေ။

ရှောင်းလိက သူတို့ကို နောက်သို့ ဆုတ်ခွာခိုင်းရခြင်းမှာလည်း နီရူကို ခေါ်ဆောင်ကာ ဖေစုန့်လက်ထဲရှိ ထိုရှီးလင်စစ်တပ်နောက်သို့ လိုက်မီသွားပြီးနောက် ဝံပုလွေတပ်ဖွဲ့က အရှေ့အနောက်မှ နှစ်ဖက်ညှပ်မတိုက်ခိုက်ခံရအောင် ဖြစ်သည်။

ဤမိုင်ပေါင်းများစွာသော ခရီးစဉ်ကပင် အချိန်ပေးရသဖြင့် ရှီးလင်စစ်တပ်က ကင်းထောက်များမှတစ်ဆင့် သူတို့၏ လှုပ်ရှားမှုကို အချိန်မီ သိရှိသွားခဲ့လျှင်တောင်မှ ထိုအချိန်ကျလျှင် ဝိုင်းရံတိုက်ခိုက်ရန် ကြိုးစားသော်လည်း အချိန်မီတော့မည် မဟုတ်ချေ။

မွန်းတည့်ချိန်သို့ ရောက်ရှိလာရာ နေရောင်က ပိုပိုပြီး ပြင်းထန်လာခဲ့ပြီး ရိက္ခာများကို သယ်ဆောင်ကာ ရှေ့သို့ ချီတက်နေသော ရှီးလင်ခြေလျင်တပ်များထဲတွင် စစ်သည်ငယ်အချို့ပင် နေလောင်၍ သတိလစ်သွားကြလေသည်။

အတူလိုက်ပါလာသော စစ်သည်များသည်လည်း ဤအပူချိန်မြင့်မားသော ရာသီဥတုနှင့် အချိန်ကြာမြင့်စွာ ခရီးနှင်လာရသောကြောင့် အလွန်အမင်း ပင်ပန်းနွမ်းနယ်နေကြပြီး လုပ်ဖော်ကိုင်ဖက် လဲကျသွားသည်ကို မြင်သောအခါမှ အလျင်စလို အော်ခေါ်လိုက်ကြ၏။ "စစ်သူကြီး။ စစ်သူကြီး။ လူတစ်ယောက် နေလောင်ပြီး သတိလစ်သွားပြီ"

တပ်ကို ကြီးကြပ်နေသော စစ်သူကြီးငယ်သည် သံချပ်ကာကို ဝတ်ဆင်ထားသော်လည်း နဖူးတစ်ပြင်လုံး ချွေးများ ရွှဲနစ်နေပြီး မြင်းဖြင့် ပြေးလာကာ အော်ဟစ်လိုက်သည်။ "သူ့ကို ရေနည်းနည်း တိုက်လိုက်"

လက်အောက်ရှိ စစ်သည်ငယ်များက ရေဘူးကို ထုတ်ယူကာ ထိုစစ်သည်ငယ်ကို ရေတိုက်ရန် ကြိုးစားကြသော်လည်း သားရေရေဘူး တစ်ခုလုံးကို ပြောင်းပြန်လှန်ချလိုက်သော်လည်း အထဲမှ ရေအနည်းငယ်မျှသာ ထွက်ကျလာခဲ့သည်။ ထိုစစ်သည်ငယ်က ခြောက်သွေ့ကွဲအက်နေသော နှုတ်ခမ်းကို လျှာဖြင့် သပ်ရင်း ပြောလိုက်၏။ "စစ်သူကြီး... ကျွန်တော်တို့ ရေလည်း ကုန်သွားပြီ"

စစ်သူကြီးငယ်သည် လှံများကို ထောက်ထားမှသာ မလဲကျဘဲ ရပ်နေနိုင်သော စစ်သည်များအားလုံးကို တစ်ချက် ကြည့်လိုက်ပြီး သူ၏မြင်းကျောပေါ်မှ တစ်ဝက်ခန့် ကျန်သေးသော ရေဘူးကို ဆွဲယူလိုက်သည်။ သူက ခဏတုံ့ဆိုင်းသွားပြီးနောက် ထိုစစ်သည်ငယ်ထံသို့ ပစ်ပေးလိုက်ပြီး မြင်းကို လှည့်ကာ အော်ဟစ်လိုက်လေသည်။ "ငါ သွားပြီး ကြင်ရာတော်ကို သတင်းပို့လိုက်မယ်"

ပြင်းထန်သော နေရောင်အောက်တွင် နာရီပေါင်းများစွာ ခရီးနှင်လာခဲ့ရသော စစ်သည်ငယ်များမှာ ထိုအခါမှသာ မျှော်လင့်ချက်ကို မြင်တွေ့လိုက်ရသကဲ့သို့ မျက်နှာပေါ်တွင် မျှော်လင့်ချက် ရောင်ခြည်များ ပေါ်လွင်လာကြတော့သည်။

သိမ်းငှက်အမဲလိုက်ခွေးသည် မြေပုံကို လက်ဖြင့် ကိုင်ထားပြီး ဖေစုန့်နှင့် ယှဉ်လျက် မြင်းစီးကာ မြေပုံကို ပြသရင်း ပြောလိုက်သည်။ "...အရှေ့ဘက်က လမင်းသောင်ပြင်ပဲ။ အဲဒီမှာ ရေအရင်းအမြစ်နဲ့ စိမ်းလန်းတဲ့ နေရာလေး တစ်ခုရှိတယ်။ တကယ်လို့ ညနေမတိုင်ခင် စစ်တပ်ကြီးက အဲဒီနေရာကို ရောက်နိုင်ရင် ဒီည အဲဒီမှာ စခန်းချလို့ ရပါပြီ"

နေရောင်က အဆုံးအစမဲ့ သဲကန္တာရကြီးထဲသို့ ကျရောက်နေပြီး ပတ်ဝန်းကျင်တစ်ခုလုံးက အပူလှိုင်းများ ဖြာထွက်နေသော အဖြူရောင် လင်းထိန်မှုကြီးအဖြစ် ပြောင်းလဲသွားသကဲ့သို့ မျက်စိကျိန်းစရာ ကောင်းလှသည်။ ဖေစုန့်သည် မျက်လုံးများကို အနည်းငယ် မှေးကျဉ်းလိုက်ပြီး မေးလိုက်၏။ "ဝူဆယ်မြို့က အဲဒီနေရာနဲ့ ဘယ်လောက် ဝေးလဲ"

သိမ်းငှက်အမဲလိုက်ခွေးသည် မြေပုံကို တစ်ချက်ကြည့်လိုက်ပြီး ပြောလိုက်သည်။ "မြောက်ဘက်ကို မိုင်သုံးဆယ်လောက် ထပ်ပြီး ချီတက်ဖို့ လိုပါသေးတယ်"

ဖေစုန့်သည် ဇက်ကြိုးကို လက်ဖြင့် ဆွဲကိုင်ထားပြီး ချက်ချင်းပင် ဆုံးဖြတ်ချက် ချလိုက်၏။ "အရှိန်အပြည့်နဲ့ ချီတက်ကြ။ ဒီည ဝူဆယ်မြို့မှာ အနားယူမယ်"

သိမ်းငှက်အမဲလိုက်ခွေးသည် မြေပုံကို ကြည့်ကာ တစ်ခုခု ပြောချင်ပုံရသော်လည်း နောက်ဆုံးတွင်တော့ စကားကို မြိုချလိုက်ပြီး အနောက်ဘက်သို့ ညွှန်ကြားလိုက်လေသည်။ "အမိန့်ပေးလိုက်။ အရှိန်အပြည့်နဲ့ ချီတက်ကြ။ ဒီည ဝူဆယ်မြို့မှာ အနားယူမယ်"

သတင်းပို့စစ်သည်များသည် စစ်မိန့်ကို ပို့ဆောင်ရန် အနောက်ဘက်သို့ မြင်းဖြင့် အပြေးအလွှား သွားရန် ပြင်နေစဉ် အစောပိုင်းက ထိုစစ်သူကြီးငယ်သည် မြင်းကို ရိုက်နှင်ကာ လိုက်မီလာခဲ့ပြီး အသနားခံလိုက်သည်။ "ကြင်ရာတော်... ဒီနေရာမှာပဲ ခဏလောက် အနားယူကြရအောင်ပါ။ စစ်သည်တွေက နာရီပေါင်းများစွာ ခရီးနှင်လာရလို့ ရေဘူးတွေလည်း ကုန်နေပြီ။ တကယ်ကို ဆက်မလျှောက်နိုင်ကြတော့ဘူး။ အနောက်ဘက်မှာ စစ်သည်တွေ နေလောင်ပြီး သတိလစ်သွားတဲ့သူတွေတောင် ရှိနေပါပြီ"

ဖေစုန့်သည် ထိုရှီးလင်စစ်သူကြီးငယ်ကို စောင်းငဲ့ကြည့်လိုက်ပြီး အေးစက်စွာ ပြောလိုက်၏။ "ချီတက်မယ့် အရှိန်ကို နှောင့်နှေးစေပြီး စစ်ရေးအခွင့်အရေးကို လက်လွတ်သွားရင် ဒီတာဝန်ကို ဘယ်သူယူမလဲ"

စစ်သူကြီးငယ်သည် ဖေစုန့်၏ အကြည့်ကို ရင်ဆိုင်ရင်း မြင်းကျောပေါ်တွင် ဘယ်ဘက်လက်မောင်းကို ရင်ဘတ်ပေါ် တင်လိုက်သည်။ သူက ဒေါသထွက်နေသော်လည်း စကားမပြောရဲဘဲ စိတ်ပျက်လက်ပျက်ဖြင့် ထွက်ခွာရန် ပြင်နေစဉ် အနောက်ဘက်မှ အသံတစ်သံ ထွက်ပေါ်လာလေသည်။ "ဒီစစ်သူကြီးဖြစ်တဲ့ ငါက တာဝန်ယူမယ်"

စစ်သူကြီးငယ်သည် နောက်သို့ လှည့်ကြည့်လိုက်သည်တွင် ဒုစစ်သူကြီး နူဂယ်ဖြစ်နေသည်ကို မြင်လိုက်ရသဖြင့် အလွန် ဝမ်းသာသွားတော့သည်။ "စစ်သူကြီး"

နူဂယ်သည် လက်ဟန်ပြကာ ထိုစစ်သူကြီးငယ်ကို ပြန်သွားရန် အချက်ပြလိုက်ပြီး ဖေစုန့်ကို စိုက်ကြည့်ရင်း စကားကိုမူ ထိုစစ်သူကြီးငယ်ထံသို့ ပြောလိုက်၏။ "တပ်မတော်သုံးရပ်လုံးကို အမိန့်ပေးလိုက်။ ဒီနေရာမှာပဲ အနားယူကြမယ်"

စစ်သူကြီးငယ်သည် ချက်ချင်းပင် မြင်းဖြင့် ထွက်ခွာရန် ပြင်လိုက်သော်လည်း အနောက်ဘက်ရှိ သိမ်းငှက်အမဲလိုက်ခွေးများက လမ်းကို ပိတ်ဆို့လိုက်ကြသည်။

နူဂယ်သည် တုန်လှုပ်ခြင်း မရှိသော်လည်း သူနှင့်အတူ လိုက်ပါလာသော ကိုယ်ရံတော်များနှင့် ယုံကြည်ရသော စစ်သူကြီးငယ်များသည်လည်း မြင်းများကို စီးကာ ထွက်လာကြပြီး သိမ်းငှက်အမဲလိုက်ခွေးများနှင့် ထိပ်တိုက်ရင်ဆိုင်လိုက်ကြလေသည်။

ဖေစုန့်သည် မြင်းကျောပေါ်တွင် မျက်လုံးများကို မှေးကျဉ်းလိုက်ပြီး ပေါ့ပေါ့ပါးပါး ပြောလိုက်၏။ "ဒုစစ်သူကြီးက ခဏခဏ ချီတက်တာကို နှောင့်နှေးစေပြီး မင်းသမီးရဲ့ အစီအစဉ်ကြီးကို ဖျက်ဆီးချင်နေတာက ဒီကြင်ရာတော်ကို ဒုစစ်သူကြီးရဲ့ ရည်ရွယ်ချက်အပေါ် တကယ်ပဲ သံသယဝင်စေတယ်နော်"

နူဂယ်က အော်ဟစ်လိုက်သည်။ "မင်းက ကိုယ်ကျိုးအတွက် ငါတို့ ရှီးလင်သားတွေရဲ့ အသက်ကို လျစ်လျူရှုနေတာ သိသာနေတာပဲ"

"အို... ဒီကြင်ရာတော်မှာ ဘာကိုယ်ကျိုး ရှိနေလို့လဲ"

ဖေစုန့်သည် အေးအေးဆေးဆေးဖြင့် နူဂယ်ကို ကြည့်ကာ လေသံမှာ ပေါ့ပါးနေဆဲပင်။ "မင်းသမီးရဲ့ အမိန့်ကို နာခံပြီး ကျားချောက်တောင်ကြားဂိတ်ကို တိုက်ခိုက်ဖို့ စစ်တပ် စေလွှတ်တာက ကိုယ်ကျိုးလား။ ဒါမှမဟုတ် စစ်သူကြီး နီရူရဲ့ ညွှန်ကြားချက်အရ ရှောင်းသူခိုးထက် အရင် ကျားချောက်တောင်ကြားဂိတ်ကို ရောက်အောင် အရှိန်အပြည့်နဲ့ ချီတက်တာက ကိုယ်ကျိုးလား"

နူဂယ်သည် စကားအချေအတင် ပြောဆိုရာတွင် မကျွမ်းကျင်သဖြင့် ချက်ချင်းပင် ဖေစုန့်၏ စကားပိတ်မှုကြောင့် မျက်နှာများ နီရဲသွားကာ ဒေါသတကြီး ပြောလိုက်၏။ "မင်းက စစ်သူကြီး နီရူဘက်က အကူအညီတောင်းတာကို လျစ်လျူရှုပြီး..."

ဖေစုန့်၏ မှေးကျဉ်းထားသော မျက်လုံးများသည် ပိုရှည်လျားကျဉ်းမြောင်းသွားပုံရသည်။ "ဒုစစ်သူကြီးကို မေးပါရစေဦး၊ လူတစ်ထောင်ကျော်က စစ်သူကြီး နီရူ လက်ထဲက စစ်တပ်ကြီး တစ်သောင်းခွဲကို ဘယ်လိုလုပ် အနိုင်ယူနိုင်မှာလဲ။ စစ်သူကြီး နီရူက ဒုစစ်သူကြီး မျက်စိထဲမှာ သတ္တိသာရှိပြီး အကြံအစည်မရှိတဲ့ လူမိုက်တစ်ယောက်လိုများ ဖြစ်နေလား"

နှစ်ဖက် ထိပ်တိုက်ရင်ဆိုင်နေသော စစ်တပ်များသည် အနိုင်အရှုံး မခွဲခြားရသေးမီ အနောက်ဘက်မှ ကင်းထောက်တစ်ဦးက အလျင်စလို ပြေးလာပြီး သတင်းပို့လိုက်လေသည်။ "သတင်းပို့ပါတယ်။ မိုင်ငါးမိုင် အကွာမှာ ကျွန်တော်တို့ဘက်က မြင်းစီးတပ်ဖွဲ့ တစ်ဖွဲ့ ပေါ်လာပါတယ်"

နူဂယ်က ချက်ချင်း အော်ဟစ်လိုက်၏။ "စစ်သူကြီး နီရူ လွှတ်လိုက်တာ သေချာတယ်။ ဘာကိစ္စလဲဆိုတာ ငါနဲ့အတူ သွားကြည့်ရအောင်"

သူသည် လက်အောက်ရှိ လူများကို ခေါ်ဆောင်ကာ ထွက်ခွာရန် ပြင်လိုက်သော်လည်း အနောက်ဘက်မှ ဖေစုန့်၏ အသံထွက်ပေါ်လာသည်။ "ဖြည်းဖြည်းပေါ့"

နူဂယ်က ဒေါသကို မြိုသိပ်ကာ နောက်သို့ လှည့်ကြည့်လိုက်ချိန်တွင် သူက အလျင်စလို မရှိဘဲ ပြောလိုက်၏။ "ဒုစစ်သူကြီးက စိုးရိမ်လွန်းတော့ အမှားပါသွားနိုင်တယ်။ လှည့်ကွက်တွေ ရှိနေနိုင်လို့ ဒီကြင်ရာတော်လည်း အတူတူ သွားကြည့်မယ်"

ကင်းထောက် ယူဆောင်လာသော သတင်းအရ ထိုမြင်းစီးတပ်ဖွဲ့တွင် လူတစ်ထောင်ကျော်သာ ရှိသဖြင့် ဖေစုန့်တို့ အဖွဲ့သည်လည်း ထိပ်တန်းမြင်းစီးစစ်သည် ငါးထောင်ကိုသာ ရွေးချယ်ခေါ်ဆောင်သွားပြီး စစ်တပ်ကြီးကို အနောက်တွင် အသင့်စောင့်ဆိုင်းနေခိုင်းလိုက်သည်။

နှစ်ဖက်စစ်တပ်သည် မြားနှစ်ပစ်စာ အကွာအဝေးမှ အဝေးလှမ်းကြည့်လိုက်ချိန်တွင် နူဂယ်သည် လက်အောက်ရှိ အလံကိုင်အရာရှိကို အလံပြရန် အချက်ပြလိုက်လေသည်။

မျက်နှာချင်းဆိုင်ရှိ ထိုမြင်းစီးတပ်ဖွဲ့သည် အလံအချက်ပြမှုကို မြင်သော်လည်း မျှော်လင့်မထားဘဲ အလံဖြင့် ပြန်လည် မတုံ့ပြန်ခဲ့ချေ။ ဆန့်ကျင်ဘက်အနေဖြင့် တင်းကျပ်စွာ ကြိုးတုပ်ခံထားရသော လူတစ်ယောက်ကို တပ်ရှေ့သို့ ခေါ်ဆောင်လာပြီး ရှီးလင်ဘာသာစကားဖြင့် အော်ဟစ်လိုက်ကြသည်။ "မင်းတို့ရဲ့ အဓိကစစ်သူကြီး ဒီမှာ ရှိတယ်။ ချက်ချင်း တပ်ဆုတ်ပြီး ရှီးလင်ကို ပြန်သွားကြ"

နူဂယ်သည် တပ်ရှေ့တွင် ကြိုးတုပ်ခံထားရသော နီရူကို မြင်သောအခါ အလွန် ထိတ်လန့်သွားတော့သည်။ "စစ်သူကြီး နီရူပဲ"

သူနှင့်အတူ လိုက်ပါလာသော စစ်သူကြီးငယ်များသည်လည်း အသီးသီး မျက်နှာများ ပျက်သွားကြသော်လည်း ဖေစုန့်၏ မျက်လုံးများကသာ နောက်တစ်ကြိမ် မှေးကျဉ်းသွားပြီး သူ၏ ပတ်ဝန်းကျင်မှ အငွေ့အသက်များလည်း ရုတ်တရက် အေးစက်လေးလံသွားခဲ့သည်။

သူ့အကြည့်သည် မျက်နှာချင်းဆိုင်ရှိ လူတစ်ယောက်အပေါ် တင်းကျပ်စွာ စူးစိုက်ထားသော်လည်း ထိုလူသည် နီရူမဟုတ်ဘဲ စုတ်ပြဲနေသော ရှီးလင်စစ်သည်ငယ် ဝတ်စုံကို ဝတ်ဆင်ထားသော်လည်း ဖိအားအပြည့်ပေးနိုင်စွမ်း ရှိနေသေးသော ရှောင်းလိပင်။

သူသည် ထိုလူ၏ လက်ထဲတွင် အသက်သေလုနီးပါး ဖြစ်ခဲ့ဖူးပြီး ပြင်းပြင်းထန်ထန် ကြိုးစားအားထုတ် တည်ဆောက်ခဲ့သမျှ အရာအားလုံးသည်လည်း ထိုလူနှင့် လျန်အမျိုးသမီးတို့ ပူးပေါင်းမှုကြောင့် တစ်စစီ ပျက်စီးသွားခဲ့ရသည်။

ဖေစုန့်သည် ရင်ထဲတွင် သူ့ကိုယ်သူ ဆွဲဖြဲနေသော အမုန်းတရားဟု ခေါ်သည့် ခံစားချက်ကို အချိန်တော်တော်ကြာမှ တစ်ဖန် ပြန်လည် ခံစားလိုက်ရ၏။

မျက်နှာချင်းဆိုင်ရှိ ထိုလူအပေါ် သူ၏ အမုန်းတရားသည် လွန်ခဲ့သောနှစ်များက ချင်မိသားစု တစ်စုလုံး မတရား စွပ်စွဲခံရပြီး ထောင်ချခံရချိန်တွင် ဝိန်းတော်ဝင်မင်းဆက်အပေါ် သူ ထားရှိခဲ့သော အမုန်းတရားထက် တစ်ဝက်မျှပင် မလျော့နည်းခဲ့ချေ။

နူဂယ်က တစ်ဖက်လူအား နီရူကို လွှတ်ပေးရန် ကျယ်လောင်စွာ အော်ဟစ်နေသော်လည်း ဖေစုန့်ကမူ ထိုအချိန်လေးအတွင်း မျက်စောင်းထိုးကာ သူ၏ အနောက်ဘက်ရှိ သိမ်းငှက်အမဲလိုက်ခွေးများကို အကြည့်တစ်ချက် ပေးလိုက်လေသည်။

ဖြူလွတ်နေအောင် တောက်ပနေသော နေရောင်က မျက်စိကျိန်းစေသည်။ ရှီးလင်ဘက်မှ ဆူညံစွာ အော်ဟစ်နေမှုများကို ရင်ဆိုင်ရင်း ရှောင်းလိသည် မြင်းကျောပေါ်တွင် မြင့်မားစွာ နေရာယူထားကာ သူ၏ သည်းခံနိုင်စွမ်း မကုန်ဆုံးမီ အေးစက်စွာဖြင့် စကားနှစ်ခွန်းကိုသာ ထပ်ခါတလဲလဲ ပြောလိုက်၏။ "တပ်ဆုတ်"

နူဂယ် နောက်တစ်ကြိမ် အော်ဟစ်ရန် ပြင်လိုက်ချိန်တွင် ဖေစုန့်က သူ့ကို တားဆီးလိုက်သည်။ နူဂယ်၏ ဒေါသတကြီး စိုက်ကြည့်မှုကို ရင်ဆိုင်ရင်း သူက ရုတ်တရက် အလွန်သဘောကောင်းသော လေသံဖြင့် ပြောလိုက်လေသည်။ "မင်းသမီးကို သတင်းပို့ရင်တောင်မှ တပ်ဆုတ်ဖို့က မဖြစ်နိုင်ပါဘူး။ ဒုစစ်သူကြီးက စစ်သူကြီး နီရူကို ကယ်ချင်တယ်ဆိုရင် သူတို့ကို တခြား အပေးအယူတချို့ တောင်းဆိုခိုင်းတာ ပိုမကောင်းဘူးလား"

နူဂယ်ကလည်း ဤအချက်ကို ကောင်းကောင်း နားလည်ထားသည်။ သူ နောက်တစ်ကြိမ် အော်ဟစ်လိုက်ချိန်တွင် ရှောင်းလိသည်လည်း သူ့အား အကြံပေးနေသော ဖေစုန့်ကို မြင်တွေ့လိုက်ရ၏။

ထိုအခိုက်အတန့်တွင် သူက ပြုံးလိုက်သယောင် ရှိပြီး ဇက်ကြိုးကို လက်ငါးချောင်းဖြင့် အားကုန် ဆုပ်ကိုင်လိုက်သည်။ နူဂယ်က အခြား အပေးအယူတချို့ တောင်းဆိုရန် အဆိုပြုပြီးနောက် သူက အေးစက်ကြမ်းတမ်းစွာ ပြောလိုက်လေသည်။ "ကောင်းပြီလေ၊ နယ်စားဖြစ်တဲ့ ငါက မင်းတို့ရဲ့ ကြင်ရာတော် ခေါင်းကို လိုချင်တယ်"

အခြေအနေသည် တစ်ဖန်ပြန်လည် တင်းမာသွားခဲ့ပြန်သည်။

ဖေစုန့်နှင့် နီရူကို လဲလှယ်ရန် နူဂယ်သည် သူ၏စိတ်ထဲတွင် သေချာပေါက် သဘောတူလိုသော်လည်း သူတို့၏ ယခုတစ်ကြိမ် ကျားချောက်တောင်ကြားဂိတ်ကို တိုက်ခိုက်ရာတွင် ဖေစုန့်၏ အတွင်းစည်းအကူအညီ လိုအပ်နေသေးသည်။ ဖေစုန့်သာ သေဆုံးသွားပါက သူတို့သည် ကျားချောက်တောင်ကြားဂိတ် အတွင်းပိုင်းမှ အကူအညီကို ဆုံးရှုံးသွားလိမ့်မည်။

ဖေစုန့်သည် သူ၏ အကြီးမားဆုံး အားသာချက်ကို သဘာဝကျကျ ရှင်းလင်းစွာ သိနေသည်။ လက်ရှိအချိန်တွင် အရှေ့ကိုသာ ကြည့်ကာ ပြုံးရုံသာ ပြုံးရင်း နူဂယ်ကို ပြောလိုက်၏။ "စစ်သူကြီး သေချာ စဉ်းစားပါ။ နီရူ သေသွားရင် ကျားချောက်တောင်ကြားဂိတ်ကို အောင်မြင်စွာ သိမ်းပိုက်ပြီးတဲ့နောက် သူ့ရဲ့ နေရာက စစ်သူကြီးရဲ့ နေရာ ဖြစ်လာမှာပဲ။ တာ့လျန်ရဲ့ တံခါးပေါက်ကို ဖွင့်ပေးနိုင်တဲ့ ဒီလို အောင်မြင်မှုမျိုး ရှိနေရင် မင်းသမီးကလည်း အများကြီး အပြစ်တင်မှာ မဟုတ်ပါဘူး"

သူက စကားကို လမ်းကြောင်းပြောင်းလိုက်သည်။ "ဒါပေမယ့် ကျွန်တော် သေသွားရင်တော့ စစ်သူကြီးဆီမှာ ကျားချောက်တောင်ကြားဂိတ်ကို ဝင်တိုက်ဖို့ သော့ချက် မရှိတော့ဘူး။ အဲဒီအချိန်ကျရင် မင်းသမီးက အပြစ်တင်လာခဲ့ရင် စစ်သူကြီး ထင်သလား၊ စစ်သူကြီး နီရူက ဒီနေ့ ကျေးဇူးကြောင့် မင်းသမီးဆီမှာ အပြစ်တွေ အကုန်လုံးကို တာဝန်ယူပြီး စစ်သူကြီးကို ကာကွယ်ပေးပါ့မလား"

သူသည် နူဂယ်ကို အလွန် သဘောကောင်းသော အမူအရာဖြင့် ကြည့်လိုက်၏။ "စစ်သူကြီးက စောစောက ကျွန်တော်နဲ့ သဘောထား ကွဲလွဲခဲ့ပြီးတဲ့နောက်မှာတောင် ကိုယ့်ဘာသာ စစ်တပ်ကို ဦးဆောင်ပြီး နောက်မဆုတ်သွားခဲ့တာက ကျွန်တော်နဲ့ အစီအစဉ် တူနေလို့ မဟုတ်ဘူးလား"

တစ်ဖက်လူ၏ မျက်နှာပေါ်တွင် ယခင်ကကဲ့သို့ ရန်လိုမှုများ မရှိတော့ဘဲ လျှို့ဝှက်ထားသော စိတ်ကူးတစ်ခုကို ဖော်ထုတ်ခံလိုက်ရသကဲ့သို့ ရုတ်တရက် အနည်းငယ် စိုးရိမ်မှုနှင့် ဒေါသများ ပေါ်ထွက်လာခဲ့သည်။

သို့သော် ဖေစုန့်သည် သဘောကောင်းစွာ ပြုံးရင်း ဆက်ပြောလိုက်၏။ "စစ်သူကြီး နီရူ သေဆုံးမှုရဲ့ အပြစ်ကို ကျွန်တော်က မင်းသမီးဆီမှာ တစ်ယောက်တည်း တာဝန်ယူပေးနိုင်ပါတယ်"

နူဂယ်သည် သူ၏အကြည့်ကို မျက်နှာချင်းဆိုင်သို့ တဖြည်းဖြည်း ရွှေ့လိုက်ပြီး တစ်စုံတစ်ခုကို ဆုံးဖြတ်လိုက်သကဲ့သို့ မျက်လုံးများက ရက်စက်ကြမ်းကြုတ်လာကာ လေးနက်စွာ အော်ဟစ်လိုက်လေသည်။ "သူတို့ လက်ထဲက စစ်သူကြီး နီရူက အတုပဲ။ ဒီလို လှည့်ကွက်မျိုးနဲ့ ဒီစစ်သူကြီးဖြစ်တဲ့ ငါ့ကိုတောင် လှည့်စားရဲတယ်ပေါ့။ မြားတွေနဲ့ ပစ်သတ်ကြစမ်း"

နီရူကို သိရှိသော စစ်သူကြီးငယ်များသည် ရုတ်တရက် တစ်ယောက်ကိုတစ်ယောက် ကြည့်လိုက်မိကြသော်လည်း နူဂယ်က အမိန့်ပေးလိုက်ပြီဖြစ်သဖြင့် ၎င်းသည် ဘက်ရွေးချယ်မှုနှင့် ဆုံးဖြတ်ချက်တစ်ခု ဖြစ်နေပြီဆိုတာကို သူတို့ ချက်ချင်း သဘောပေါက်လိုက်ကြသည်။

တပ်ရှေ့တွင် ကြိုးတုပ်ခံထားရသော နီရူသည် သူ မည်သို့ အာဏာဆုံးရှုံးသွားခဲ့ရသည်ကို ကိုယ်တိုင် မျက်မြင်ကိုယ်တွေ့ ကြုံလိုက်ရသကဲ့သို့ပင်။ သူသည် သေရန် စိတ်ပိုင်းဖြတ်ထားသော်လည်း လက်ရှိအချိန်တွင်တော့ မအောင့်အည်းနိုင်ဘဲ ကျိန်ဆဲလိုက်မိလေသည်။ "ခွေးမသား"

ဝံပုလွေတပ်ဖွဲ့ဝင်များသည်လည်း ဤရှီးလင်စစ်တပ်က သူတို့၏ အဓိကစစ်သူကြီးကို အသိအမှတ်မပြုတော့မည်ဟု မမျှော်လင့်ထားခဲ့သဖြင့် ရှောင်းလိကို အလျင်စလို ကြည့်လိုက်ကြ၏။ "ကျူကျွင်း"

ရှောင်းလိ၏ အကြည့်သည် မျက်နှာချင်းဆိုင်ရှိ ဖေစုန့်အပေါ်တွင် တင်းကျပ်စွာ စူးစိုက်ထားဆဲဖြစ်ပြီး ပတ်ဝန်းကျင်တစ်ခုလုံးတွင် ရက်စက်မှုများ ရစ်သိုင်းနေကာ အေးစက်ကြောက်မက်ဖွယ် ကောင်းနေလေသည်။

သူက ပြောလိုက်၏။ "ဆုတ်"

သို့သော် သူကိုယ်တိုင်ကမူ မြင်းဗိုက်ကို ရုတ်တရက် ညှစ်လိုက်ပြီး မြင်းကို အပြေးနှင်ကာ ရှေ့သို့ ပြေးထွက်သွားခဲ့သည်။ ထိုပုံစံက သောင်းချီသည့် စစ်တပ်ကြီးရှေ့တွင် ဖေစုန့်၏ ခေါင်းကို သွားရောက်ယူဆောင်တော့မည့်ပုံပင်။

...