အခန်း ၂၄၂

အပိုင်း (၂၄၂.၁)

ဝံပုလွေတပ်ဖွဲ့ဝင်များသည် ဒီအတိုင်း နောက်မဆုတ်သွားရဲကြချေ။ အနောက်ဘက်မှ လူများကို အရင်ဆုတ်ခွာရန် လေချွန်၍ အချက်ပြလိုက်ပြီး အရှေ့ဘက်တွင် ကပ်လျက်လိုက်ပါနေသော၊ ရှောင်းလိ၏ ကိုယ်ရံတော်များနှင့် မခြားနားသည့် ဝံပုလွေတပ်ဖွဲ့ဝင်များကမူ မြင်းဗိုက်ကို အားကုန်ညှစ်၍ အနောက်မှ လိုက်ပါသွားကြသည်။

မြားများသည် ကျိုင်းကောင်အုပ်ကြီးအလား အဆက်မပြတ် ကျဆင်းလာ၏။ ရှောင်းလိနှင့် ဝံပုလွေတပ်ဖွဲ့ဝင်များသည် မြင်းကျောပေါ်တွင် ဝပ်လိုက်ကြပြီး မြားပျံများကို လက်နက်များဖြင့် ကာကွယ်ရင်း အရှေ့ဘက်သို့ အလျင်အမြန် တိုးကပ်သွားကြ၏။

သဲပြင်ပေါ်တွင် စွန့်ပစ်ခံလိုက်ရသော နီရူသည် ရက်စက်စွာ ကျိန်ဆဲလိုက်ပြီးနောက် မြားများကို ရှောင်တိမ်းရန် မြေပြင်ပေါ်တွင် လိမ့်ချလိုက်သော်လည်း အသက်ရှူကြိမ် အနည်းငယ်အတွင်းမှာပင် ချွန်ထက်သော မြားများ စိုက်ဝင်လာကာ ဖြူကောင်တစ်ကောင်အလား ဖြစ်သွားခဲ့လေသည်။

နီရူ မြားအပစ်ခံရသည်ကို မျက်မြင်ကိုယ်တွေ့ မြင်လိုက်ရပြီး ရှောင်းလိတို့အဖွဲ့သည်လည်း မြားမိုးထဲတွင် ပိတ်မိနေသော်လည်း ရှေ့သို့ ဆက်ထိုးဖောက်တိုက်ခိုက်လာနေဆဲ ဖြစ်ရာ ဖေစုန့်အနောက်တွင် ရပ်နေသော သိမ်းငှက်အမဲလိုက်ခွေးများက အလျင်စလို ပြောလိုက်ကြသည်။ "ကျူကျွင်း... ဒီနေရာက အန္တရာယ်များတယ်။ ကျွန်တော်တို့ ကျူကျွင်းကို ကာကွယ်ပြီး အရင် ခဏလောက် ရှောင်နေကြမလား"

ဖေစုန့်သည် အရှေ့ဘက်မှ မြားမိုးများ ဖုံးလွှမ်းခံနေရပြီး ဘေးနှစ်ဖက်မှ ရှီးလင်စစ်တပ်၏ တဖြည်းဖြည်း ဝိုင်းရံပိတ်ဆို့ခြင်းကို ခံနေရသော ရှောင်းလိတို့အဖွဲ့ကို မျက်လုံးမှေးကျဉ်းကာ ကြည့်နေပြီး စကားတစ်ခွန်းမှ မပြောခဲ့ပေ။

သတင်းပို့စစ်သည်က သူတို့ကို နီရူအား ပြန်ကယ်ရန် သတင်းလာပို့ချိန်ကတည်းက နီရူ အရှင်လတ်လတ် ဖမ်းဆီးခံလိုက်ရသည့် အဖြစ်အပျက်ကို ဖေစုန့် ကြိုသိလိုက်သည်။

အခု ရှောင်းလိက အရင်ကလှည့်ကွက်ကို ပြန်သုံးချင်နေတာပဲ။

သို့သော် နှစ်ဖက်စစ်တပ် ထိပ်တိုက်ရင်ဆိုင်ရချိန်တွင် တစ်ဖက်စီက မြင့်မားပြေပြစ်သော တောင်ကုန်းများပေါ်တွင် အသီးသီး ရှိနေကြသည်။ ရှောင်းလိက လူများကို ဦးဆောင်၍ တိုက်ခိုက်လာချိန်တွင် နှစ်ဖက်စစ်တပ် အကွာအဝေးက မူလကတည်းက အလွန်ဝေးကွာနေပြီး လေးသည်တော်များကလည်း မြားများဖြင့် ကြမ်းတမ်းစွာ ပိတ်ဆို့တားဆီးထားကြ၏။

ရှောင်းလိတစ်ယောက် မြားမိုးများအောက်တွင် ဖျက်ဆီးခံလိုက်ရလေမည်လား။ သို့တည်းမဟုတ် ဖေစုန့်က နောက်ဆုံးအနေဖြင့် အသေအလဲ တိုက်ခိုက်ရလေမည်လားဆိုသည်ကတော့ စဉ်းစားကြည့်လျှင် ပထမအချက်က ပိုဖြစ်နိုင်ရှိသည်မှာ သိသာနေသည်။

ပြင်းထန်သော နေရောင်အောက်တွင် လက်နက်များ၏ အေးစက်သော အလင်းရောင်က အလွန် မျက်စိကျိန်းစရာ ကောင်းလှသည်။ ဖေစုန့်သည် အကြည့်လွှဲလိုက်ပြီး ပေါ့ပေါ့ပါးပါး စကားပြောရန် ပြင်လိုက်သော်လည်း အောက်ဘက်ရှိ တိုက်ခိုက်နေသော စစ်တပ်စခန်းများထဲမှ ရေခဲမြားများကဲ့သို့ အေးစက်နေသည့် အကြည့်နှစ်ချက်က သူ့ထံသို့ ရုတ်တရက် စူးစိုက်လာသည်ကို ခံစားလိုက်ရလေသည်။

သူ နောက်သို့ ပြန်ကြည့်လိုက်သည်တွင် ရှောင်းလိ၏အကြည့်များနှင့် တွေ့ဆုံသွားတော့သည်။

အကြိမ်ပေါင်းများစွာတွင် ဖေစုန့်သည် သူနှင့် ထိုဝိန်းအမျိုးသမီး၏ မျက်ဝန်းများကို အလွန်အမင်း မုန်းတီးခဲ့သည်။

ဥပမာအားဖြင့် ယခုအချိန်တွင် တစ်ဖက်လူ၏ အကြည့်များသည် လသာနေသော ထိုညက မြင်းလှည်းကို ဓားတစ်ချက်တည်းဖြင့် ခွဲခြမ်းကာ သူ့ကို လာရောက်လုပ်ကြံချိန်ကကဲ့သို့ ကြမ်းကြုတ်ရက်စက်နေသော်လည်း လော့ယန်ကို တိုက်ခိုက်ချိန်တွင် မြို့ရိုးအောက်၌ သူ့အား မျက်နှာချင်းဆိုင် ကြည့်ခဲ့စဉ်ကလို အေးတိအေးစက်နိုင်မှုနှင့် မဖြစ်မနေ အောင်မြင်ရမည်ဟူသော အငွေ့အသက်များလည်း ပါဝင်နေ၏။

ဝန်မခံချင်သော်ငြား လော့ယန်တွင် ပိတ်မိခဲ့ချိန်ကစပြီး သူသည် ဤလူရိုင်းနှင့် ထိုဝိန်းမိသားစု အကြွင်းအကျန်တို့၏ ထက်မြက်မှုကို အမြဲတမ်း ရှောင်လွှဲနေခဲ့ခြင်း ဖြစ်သည်။

ဖေစုန့်၏ မေးရိုးများသည် အလိုအလျောက် တင်းမာသွားပြီး သူ့နှလုံးသားထဲတွင် ပြည့်နှက်နေသော အမည်မသိ ခံစားချက်များကို ဝါးမြိုရင်း မနာလိုမှုများနှင့် ရောယှက်နေသော မကျေနပ်ချက် တစ်ရပ်က ရုတ်တရက် ပေါ်ထွက်လာခဲ့လေသည်။

ထိုသိမ်းငှက်အမဲလိုက်ခွေးသည် ဖေစုန့်ထံမှ အကြောင်းပြန်ချက် မရရှိသဖြင့် နောက်တစ်ကြိမ် ထပ်မေးမြန်းလိုက်သည်။ "သခင်"

ဖေစုန့်၏ နှုတ်ခမ်းထက်မှ အပြုံးများက အေးစက်သွား၏။ "မင်း ဆိုလိုချင်တာက ဒီအမတ်ချုပ်က အဲ့ဒီရှုံးနိမ့်နေတဲ့ ခွေးကို ရှောင်ပေးရဦးမယ်လို့ ပြောချင်တာလား"

သိမ်းငှက်အမဲလိုက်ခွေးသည် သူ့စကားက ဖေစုန့်၏ တားမြစ်ချက်ကို ချိုးဖောက်မိသွားမှန်း နောက်ကျမှ သိရှိသွားပြီး အလျင်စလို ခေါင်းငုံ့ကာ မဝံ့ရဲပါဟု ပြောလိုက်လေသည်။

ဖေစုန့်၏ နှုတ်ခမ်းထက်တွင် အပြုံးများက တွဲခိုနေဆဲဖြစ်ပြီး ပေါ့ပေါ့ပါးပါး ပြောလိုက်သည်။ "အမိန့်ပေးလိုက်။ ရန်သူ့တိုက်ခိုက်မှု ရှိတယ်။ စစ်တပ်တစ်ခုလုံး ဒီဘက်ကို လာပြီး ရန်သူကို ခုခံကြလို့"

သိမ်းငှက်အမဲလိုက်ခွေးက မှင်သက်သွား၏။ သူတို့၏ စစ်သည်ငါးထောင်က မျက်နှာချင်းဆိုင်ရှိ စစ်သည်တစ်ထောင်ကျော်ကို ရင်ဆိုင်ရသည်မှာ လုံးဝ အမှားအယွင်းမရှိနိုင်သည့် ကိစ္စဖြစ်နေပြီကို ယခု ဖေစုန့်က မိုင်အနည်းငယ်အကွာရှိ သောင်းချီသော စစ်တပ်ကြီးကိုပါ ခေါ်ယူပြီး ဤမြင်းစီးတပ်ဖွဲ့ကို ဝိုင်းရံနှိမ်နင်းရန် ကြိုးစားနေခြင်းကြောင့် တစ်ဖက်လူများကတော့ အတောင်ပံပေါက်နေရင်တောင် လွတ်မြောက်နိုင်တော့မည် မဟုတ်ပေ။

သိမ်းငှက်အမဲလိုက်ခွေးက အလျင်စလို လက်နှစ်ဖက်ကို ယှက်ကာ အမိန့်ပေးရန် ထွက်သွားတော့သည်။

ထိုအခါမှသာ ဖေစုန့်သည် မြင်းကို အရှေ့သို့ ခြေလှမ်းအနည်းငယ် တိုးသွားလိုက်ပြီး အောက်ဘက်ရှိ စစ်မြေပြင် အခြေအနေကို စောင့်ကြည့်နေသော နူဂယ်ကို ပြောလိုက်၏။ "နီရူ သေသွားပြီ"

နူဂယ်က သူ့ကို ကြည့်လိုက်သည်။ ဖေစုန့်၏ အကြည့်များက အောက်ဘက်ရှိ စစ်မြေပြင်ဆီသို့ ကျရောက်နေဆဲဖြစ်ပြီး နှုတ်ခမ်းထောင့်များက အနည်းငယ် ကွေးတက်သွားကာ မြှောက်ပင့်ပေးသည့်ဟန်ဖြင့် ပြောလိုက်၏။ "နောင်ကျရင် စစ်သူကြီး နူဂယ်ကပဲ စစ်တပ်ရဲ့ အဓိကစစ်သူကြီး ဖြစ်လာတော့မှာပါ"

ဤအချိန်တွင် ဖေစုန့် ပြောလိုက်သော စကား၏ ရည်ရွယ်ချက်ကို နူဂယ်က သေချာ မသိရှိသဖြင့် အသံမထွက်ဘဲ နေလိုက်သည်။

ဖေစုန့်သည် ခေါင်းကို စောင်းလိုက်ပြီး မျက်နှာပေါ်တွင် အပြုံးတစ်ခုကို ဆောင်ထားကာ ပြောလိုက်လေသည်။ "ဒီတစ်ခေါက် အတူလိုက်ပါလာတဲ့သူတွေ အားလုံးက စစ်သူကြီးရဲ့ ယုံကြည်ရတဲ့ လက်အောက်ခံတွေချည်းပဲမို့ စစ်သူကြီးနဲ့အတူ အောင်မြင်မှုတွေ၊ ဆုံးရှုံးမှုတွေကို အတူတူ မျှဝေခံစားကြမှာပဲ။ သူတို့ရဲ့ ပါးစပ်ကို ပိတ်ဖို့ဆိုတာ ခက်ခဲတဲ့ကိစ္စ မဟုတ်ပါဘူး။ ဒါပေမယ့် အဲ့ဒီရှောင်းသူခိုးကို ထွက်ပြေးခွင့်ပြုလိုက်လို့ နောင်ကျရင် မင်းသမီးကို တစ်ခုခု သွားပြောခဲ့ရင် ကျွန်တော်က တစ်ယောက်တည်းမို့ အသက်သေသွားလည်း ကိစ္စမရှိပေမယ့် စစ်သူကြီးရဲ့ ဆွေမျိုးတစ်စုလုံးရဲ့ ဂုဏ်သိက္ခာနဲ့ ဘေးကင်းလုံခြုံရေးကတော့ စစ်သူကြီးအပေါ်မှာပဲ မူတည်နေတယ်နော်"

နူဂယ်က မည်သည့်စကားများဖြင့် ပြန်လည် ချေပလာမည်ကို သိရှိနေသကဲ့သို့ ဖေစုန့်သည် မျက်လွှာကို အနည်းငယ် ချလိုက်ပြီး လေးနက်စွာ ပြောလိုက်၏။ "ဘုရင်ရဲ့ စိတ်ကို ခန့်မှန်းရခက်တယ်လေ။ စစ်သူကြီးက နီရူရဲ့ နေရာကို အစားထိုးဝင်ယူလိုက်တော့ မင်းသမီးဟယ်ယီဘက်ကလည်း စစ်သူကြီးရဲ့ အားနည်းချက်တစ်ခုကို လက်ထဲမှာ ဆုပ်ကိုင်ထားနိုင်မှ စိတ်ချနိုင်မှာပေါ့"

နူဂယ်သည် ရုတ်တရက် ဒေါသမထိန်းနိုင်ဖြစ်သွားပြီး အော်ဟစ်လိုက်သည်။ "စစ်သူကြီး နီရူကို သွားမကယ်ချင်တာက မင်း ဖြစ်နေတာ သိသာကြီးကို"

အရင်က သူသည် ဖေစုန့်၏ မြှူဆွယ်မှုကို ခံခဲ့ရသဖြင့် ခေါင်းထဲတွင် အများကြီး မစဉ်းစားနိုင်ခဲ့ဘဲ မိမိကိုယ်ကို ကာကွယ်ရန် မတတ်သာဘဲ ရွေးချယ်မှုတစ်ခုကို ပြုလုပ်ခဲ့ရခြင်း ဖြစ်သည်။ သို့သော် ယခုတွင်တော့ ဖေစုန့်က သူ့ကို ထပ်မံ ခြိမ်းခြောက်လာခဲ့ပြန်သည်။

ဟုတ်သားပဲ။ ဟယ်ယီရဲ့ စိတ်နေသဘောထားအရဆိုရင် ငါ့ကို ဖယ်ရှားချင်သွားပြီဆိုတာနဲ့ အဲ့ဒီရှောင်းဆိုတဲ့လူ ပြောတဲ့စကားက အမှန်လား၊ အမှားလားဆိုတာ ဂရုစိုက်နေမှာ မဟုတ်ဘူး။ အမှားဖြစ်နေရင်တောင် ငါ့ကို ဖယ်ရှားဖို့ အကြောင်းပြချက်တစ်ခု ဖြစ်လာနိုင်တာပဲ။

နူဂယ်၏ နှလုံးသားထဲရှိ လျှို့ဝှက်ထားသော စိုးရိမ်မှုများသည် ယခုအခါတွင် ဒေါသတရားများနှင့်အတူ တစ်ပြိုင်နက်တည်း မီးတောက်လောင်လာခဲ့တော့သည်။

ဒေါသများ ပေါက်ကွဲနေသည့် နူဂယ်နှင့်ယှဉ်လျှင် ဖေစုန့်ကတော့ အများကြီး ပိုတည်ငြိမ်နေပြီး အပြုံးလေးကို ဆင်မြန်းကာ ဆက်ပြောလိုက်လေသည်။ "ဒါပေမယ့် စစ်သူကြီးလည်း လူသွားကယ်ဖို့ နောက်ကြောင်း ပြန်မလှည့်ခဲ့ဘူး မဟုတ်ဘူးလား။ စစ်သူကြီး နီရူကို မြားတွေနဲ့ ပစ်သတ်ဖို့ စစ်မိန့်ပေးခဲ့တာကတောင် စစ်သူကြီးပဲလေ"

ဖေစုန့်ကို ကြည့်နေသော နူဂယ်၏ အကြည့်များထဲတွင် ရက်စက်မှု အငွေ့အသက်များ ပါဝင်နေပြီ ဖြစ်သည်။ ထိုအခါမှသာ ဖေစုန့်သည် သဘောကောင်းသော အမူအရာကို ပြသလိုက်ပြီး ပြောလိုက်၏။ "စစ်သူကြီး စိုးရိမ်နေစရာ မလိုပါဘူး။ ကျွန်တော်က အစကနေ အဆုံးအထိ စစ်သူကြီးနဲ့ လှေတစ်စင်းတည်း စီးနေတဲ့သူပါ"

ဤစကားကို ပြောလိုက်ချိန်တွင် ဖေစုန့်၏ အကြည့်များက အောက်ဘက်ရှိ စစ်တပ်စခန်းထဲတွင် ထိုးဖောက်တိုက်ခိုက်နေသော ရှောင်းလိတို့အဖွဲ့အပေါ်သို့ ပြန်လည် ကျရောက်သွားခဲ့သည်။

သူ့မျက်တောင်များအောက်မှတစ်ဆင့် မျက်လုံးထဲရှိ မကောင်းဆိုးဝါးဆန်သော အငွေ့အသက်များက ယိုဖိတ်ကျလာလေသည်။ "စစ်သူကြီးကို ဒီစကားတွေ ပြောရတာကလည်း အဲ့ဒီရှောင်းသူခိုးတို့အဖွဲ့ကို လုံးဝ အသက်ရှင်ခွင့် ပေးထားလို့ မရဘူးဆိုတာကို ပြောပြချင်ရုံ သက်သက်ပါ"

ရှီးလင်စစ်တပ်သည် ဘေးနှစ်ဖက်မှ ဝိုင်းရံပိတ်ဆို့လာခဲ့ပြီး ဝံပုလွေတပ်ဖွဲ့၏ ဆုတ်ခွာမည့်လမ်းကို လုံးဝ ပိတ်ဆို့ရန် ကြိုးစားနေကြသည်။ နောက်သို့ ဆုတ်ခွာနေသော ဝံပုလွေတပ်ဖွဲ့ဝင်များသည် ရှီးလင်စစ်တပ် ဝိုင်းရံလာမည့် ဆုံမှတ်နေရာတွင် ပိတ်ဆို့ထားကြပြီး ရှောင်းလိတို့အဖွဲ့ကို ဝိုင်းရံမထာနိုင်အောင် တားဆီးနေကြသည်။

ရှောင်းလိသည် မြင်းတစ်ကောင်ဖြင့် လူတစ်ကိုယ်တည်း အရှေ့ဆုံးမှ ထိုးဖောက်ဝင်ရောက်လာပြီး အလွန်ထူထပ်စွာ ပစ်ခတ်လာသော မြားများကို ဓားရှည်ဖြင့် ကာကွယ်နေလေသည်။ လုယူလာခဲ့သော ဤရှီးလင်စစ်မြင်းများ၏ ခန္ဓာကိုယ်ပေါ်တွင်လည်း သံချပ်ကာများ ဖုံးအုပ်ထားခြင်းကြောင့်သာ တော်သေးသည်။ ထိုသို့မဟုတ်ပါက လူက ပစ်သွင်းလာသည့်မြားများ၏ ဒဏ်ကို မခံရလျှင်တောင်မှ စစ်မြင်းများက ထိုထူထပ်လှသော မြားများ၏ ပစ်ခတ်ခြင်းကို ခံရကာ သေဆုံးသွားလိမ့်မည်။

ရာဂဏန်းခန့်ရှိသော ဝံပုလွေတပ်ဖွဲ့ဝင်များသည် သူ့အနောက်မှ ကပ်လျက်လိုက်ပါလာကြပြီး မြားမိုးများ၏ ပိတ်ဆို့မှုကို သူနှင့်အတူ ဖြတ်ကျော်ပြီးနောက် မြားပစ်ရန် ပြင်ဆင်နေကြသေးသော လေးသည်တော်များကို မြင်းများဖြင့် အားကုန် ဝင်တိုက်လိုက်ကြသဖြင့် ရှီးလင်စစ်တပ်၏ လူတံတိုင်းကြီးတွင် ကြီးမားသော ဟာကွက်ကြီးတစ်ခု အောင်မြင်စွာ ဖြစ်ပေါ်သွားစေခဲ့သည်။

အနောက်ဘက်ရှိ လှံရှည်များကို ကိုင်ဆောင်ထားသော ခြေလျင်စစ်သည်များသည် အော်ဟစ်ကာ လှံများဖြင့် တိုက်ခိုက်လာချိန်တွင် ဝံပုလွေတပ်ဖွဲ့ဝင်များက ဓားကောက်များကို ဆွဲထုတ်လိုက်ကြပြီး စောင်းငဲ့ကာ ခုတ်ပိုင်းလိုက်သဖြင့် လှံထိပ်ဖျားများ ပြတ်ကျသွားပြီးနောက် မြင်း၏အရှိန်ကို အသုံးချကာ ရှောင်းလိကို ဝိုင်းရံလျက် အောက်ဘက်ရှိ စစ်သူကြီးအလံ ရှိရာဆီသို့ ဆက်လက် တိုက်ခိုက်လာကြ၏။

နူဂယ်သည် စစ်မြေပြင်တွင် အတွေ့အကြုံ ရင့်ကျက်သူ ဖြစ်သော်ငြား ဤအခြေအနေကို ကြည့်ပြီးနောက် အနည်းငယ် စိုးရိမ်ထိတ်လန့်သွားခဲ့သည်။

ဖေစုန့်၏ အစောပိုင်းက စကားများကို ပြန်လည်တွေးတောမိသွားပြီး သူတို့ဘက်တွင် လူအင်အားအရ လုံးဝ အသာစီးရနေသဖြင့် ချက်ချင်းပင် အော်ဟစ်ကာ အမိန့်ပေးလိုက်လေသည်။ "ငါ့အတွက် သတ်ကြစမ်း။ အဲ့ဒီသူခိုးခေါင်းဆောင်ရဲ့ ခေါင်းကို ဖြတ်နိုင်တဲ့သူကို ရွှေတစ်ထောင် ဆုချမယ်"

အောက်ဘက်ရှိ စစ်သည်များသည် အော်ဟစ်ကာ ရှောင်းလိနှင့် ထိုဝံပုလွေတပ်ဖွဲ့ဝင် ရာကျော်ဆီသို့ ပျားအုံတစ်ခုလို ဝိုင်းအုံသွားကြသည်။ နူဂယ်က ဓားရှည်ကို ဆွဲထုတ်လိုက်သော်လည်း ကိုယ်တိုင်ကတော့ မြင်းကို စီးကာ အောက်ဘက်စစ်မြေပြင်ဆီသို့ ဝင်ရောက်မသွားခဲ့ချေ။

နီရူ အရှင်လတ်လတ် ဖမ်းဆီးခံလိုက်ရသည့် ရှေ့ပြေးသာဓကလည်း ရှိနေပြီး ရှောင်းလိတို့အဖွဲ့က ပစ်ခွင်းလိုက်သည့်မြားများကို အန်တုကာ ထိုးဖောက်တိုက်ခိုက်ပုံကို မျက်မြင်ကိုယ်တွေ့ မြင်တွေ့ထားရသဖြင့် သူသည် မိမိကိုယ်ကို အထင်မကြီးရဲပေ။

ရှောင်းလိသည်လည်း ရှီးလင်ဘက်မှ ရည်ရွယ်ချက်ကို သတိထားမိသွား၏။ ဝံပုလွေတပ်ဖွဲ့ဝင်များသည် သူနှင့်အတူ မြားစခန်းများထဲမှ ထိုးဖောက်တိုက်ခိုက်လာခဲ့ရသဖြင့် လူနှင့်မြင်း အမြောက်အမြား ဆုံးရှုံးခဲ့ရပြီး ကျန်ရှိနေသူများသည်လည်း ပုရွက်ဆိတ်အုပ်ကြီးအလား အုံခဲလာသော ရှီးလင်စစ်သည်များ၏ ဝိုင်းရံတိုက်ခိုက်မှုအောက်တွင် မကြာမီ ပင်ပန်းနွမ်းနယ်လာကြတော့မည်။

တစ်ဖက်လူတွေက လူအင်အား အသာစီးရနေတာကို အသုံးချပြီး ငါတို့ကို အရှင်လတ်လတ် အင်အားကုန်ခန်းပြီး သေသွားအောင် လုပ်ချင်နေကြတာပဲ။

သံချပ်ကာ ဖုံးအုပ်ထားသော ထိုရှီးလင်စစ်မြင်းများသည် အရှေ့ဘက်ရှိ မြားမိုးများထဲတွင် မသေဆုံးခဲ့သော်လည်း နောက်ဆုံးတွင်တော့ ရှီးလင်စစ်သည်များက ရင်ဘတ်နှင့် ဗိုက်ဆီသို့ ထိုးစိုက်လာသော လှံရှည်များအောက်တွင် အသက်မရှင်နိုင်တော့ပေ။

ရှောင်းလိသည် မည်မျှကြာအောင် တိုက်ခိုက်နေခဲ့မှန်း မသိတော့သော်လည်း သူ၏အနောက်တွင် အထောက်အပံ့ပေးနေသော ဝံပုလွေတပ်ဖွဲ့ဝင်များကို မမြင်ရတော့ချေ။

သူ၏ မျက်ခွံများပေါ်မှ ချွေးစက်များ စီးကျလာ၏။ သူသည် မြင်းကို စွန့်ပစ်လိုက်ပြီး ရှီးလင်စစ်သည် တစ်စုကို ဓားတစ်ချက်တည်းဖြင့် ခုတ်လှဲလိုက်ပြီးနောက် ပြင်းထန်သော နေရောင်အောက်တွင် မြင့်မားသော တောင်ကုန်းပေါ်၌ စိုက်ထူထားသည့် ရှီးလင်စစ်သူကြီးအလံကို မော့ကြည့်လိုက်လေသည်။ သွေးစွန်းနေသော ထိုမျက်နှာက ယခင်အတိုင်း မာနထောင်လွှားကာ ကြမ်းကြုတ်ရက်စက်နေဆဲပင်။

"အစ်ကိုက ကျွန်မကို လော့ယန်ကနေ ထွက်ခွာဖို့ ပို့ဆောင်ပေးတုန်းက ကျွန်မကို အိမ်ပြန်ခေါ်ဖို့ လာခဲ့မယ်လို့ ပြောခဲ့တယ်"

ထွက်ခွာမည့်နေ့က ဝိန်းယွီ သူ့ကို နောက်ဆုံးပြောခဲ့သော စကားများက ရုတ်တရက် နားထဲတွင် ကြားယောင်လာခဲ့သည်။

နောက်ထပ် ရှီးလင်စစ်သူကြီးငယ် တစ်ဦးက မြင်းဖြင့် တိုက်ခိုက်လာပြန်ရာ ရှောင်းလိက ရှီးလင်စစ်သည် တစ်ဦး၏ လက်ထဲမှ အလွယ်တကူ လုယူထားသော လှံရှည်ဖြင့် လူရောမြင်းပါ လဲကျသွားအောင် လုပ်လိုက်၏။

"အစ်ကိုက ကတိဖျက်သွားခဲ့ပြီ"

ပခုံးနှင့် ကျောပြင်တွင် ဓားခုတ်ခံလိုက်ရသဖြင့် ရှောင်းလိက လက်ပြန်ဖြင့် ဓားတစ်ချက် ဝှေ့ယမ်းလိုက်ရာ သူ့ကို အလစ်ဝင်တိုက်ခိုက်သူ၏ လည်ပင်းမှ သွေးများ ချက်ချင်း ပန်းထွက်သွားလေသည်။

"ကျားချောင်တောင်ကြားဂိတ်က ရန်သူတွေကို ဆုတ်ခွာသွားအောင် လုပ်ပြီးရင် ကျွန်မကို တာ့လျန်ကို ပြန်ခေါ်ဖို့ ရှင် လာခဲ့ပါ"

သူ့ထံသို့ ပြိုင်တူ ထိုးစိုက်လာသော လှံရှည်များကို လက်တစ်ဖက်ဖြင့် ဖိချထားလိုက်ပြီး ဓားကို မြှောက်ကာ လှံထိပ်ဖျားများကို ခုတ်ပိုင်းလိုက်သည်တွင် လက်နက်များကို အားကုန်ပြန်ဆွဲယူရန် ကြိုးစားနေကြသော ရှီးလင်စစ်သည်များသည် ရုတ်တရက် တစ်ယောက်ကိုတစ်ယောက် တိုက်မိကာ အစုလိုက်အပြုံလိုက် လဲကျသွားကြတော့သည်။

"ကတိဖျက်လို့ မရဘူးနော်"

ရှောင်းလိသည် နေရောင်အောက်တွင် ဓားကို ကိုင်ဆောင်လျက် ရပ်နေပြီး အသက်ရှူသံများက ပြင်းထန်လေးလံနေ၏။ သူ၏အကြည့်များက စစ်သူကြီးအလံအောက်တွင် မြင်းဖြင့် ရပ်နေသော ဖေစုန့်ဆီသို့ ကြည့်နေဆဲဖြစ်ပြီး သွေးများနှင့် ရောနှောနေသော ချွေးပေါက်များသည် သူ့ဘေးတိုက်မျက်နှာပြင်မှတစ်ဆင့် ကွေ့ကောက်ကာ ကျဆင်းနေလေသည်။

လှံများကို ကိုင်ဆောင်ကာ သူ့ကို မျက်နှာမူထားကြဆဲဖြစ်သော ရှီးလင်စစ်သည် တစ်စုသည် သူ့ခြေအောက်က အလောင်းပုံများကို ကြည့်ကာ အခိုက်တန့် ကြောက်ရွံ့သွားကြပြီး သေမင်းဆီသို့ လွယ်လွယ်ကူကူ ထပ်မံ မတိုးရဲကြတော့ချေ။

ပြင်းထန်သော နေရောင်ကြောင့် ရှောင်းလိသည် မျက်လုံးများကို မှေးကျဉ်းလိုက်ပြီး နှုတ်ခမ်းထက်တွင် သွေးညှီနံ့များ ပါဝင်နေသော အပြုံးတစ်ခုက ရှားရှားပါးပါး ပေါ်ထွက်လာခဲ့သည်။

သူက ဒီတစ်ဘဝမှာ ငါ့ဆီကနေ ပထမဆုံးအကြိမ် ကတိတောင်းခဲ့တာကို ငါက ဘယ်လိုလုပ် ကတိဖျက်လို့ ရပါ့မလဲ။

ရှီးလင်စစ်သည်များသည် နူဂယ်၏ အော်ဟစ်အမိန့်ပေးခြင်းအောက်တွင် သူ့ထံသို့ ဆက်လက် တိုက်ခိုက်ရန် မတတ်သာဘဲ ကြိုးစားလိုက်ချိန်တွင် သူ၏ အော်ဟစ်လိုက်သော အသံသည် တောတောင်ထဲမှ ကျားတစ်ကောင် ဟိန်းဟောက်လိုက်သကဲ့သို့ ကောင်းကင်နှင့် မြေကြီးကိုပင် တုန်လှုပ်သွားစေလေသည်။ ဓားရှည်ကို တစ်ဖန် ပြန်လည် ဆုပ်ကိုင်လိုက်ကာ လှောင်အိမ်ထဲမှ ထွက်လာသော ကျားသစ်တစ်ကောင်အလား အရှိန်အဟုန်ဖြင့် ခုန်အုပ်တိုက်ခိုက်လိုက်လေသည်။

အောက်ဘက်ရှိ ရှီးလင်စစ်သည်များသည် သူ၏ ဤအငွေ့အသက်ကြောင့် ထိတ်လန့်သွားကြပြီး နောက်တစ်ကြိမ် ကြောက်ရွံ့တုန်လှုပ်သွားကြကာ သူ၏ ဖိအားအောက်တွင် တစ်လှမ်းချင်း နောက်ဆုတ်သွားကြတော့သည်။

ပြေပြစ်သော တောင်ကုန်းပေါ်မှနေ၍ ရှောင်းလိက တိုက်ခိုက်လေလေ ပိုရဲရင့်လာလေလေ ဖြစ်နေသည်ကို မျက်မြင်ကိုယ်တွေ့ မြင်လိုက်ရသဖြင့် ဖေစုန့်နှင့် နူဂယ်တို့၏ မျက်ခုံးများကြားတွင် စိုးရိမ်ပူပန်မှုနှင့် မှုန်မှိုင်းမှုများ အနည်းငယ် ဖြစ်ပေါ်လာခဲ့၏။

သိမ်းငှက်အမဲလိုက်ခွေးသည် ရှောင်းလိ၏ လက်ထဲတွင် ဒုက္ခရောက်ခဲ့ဖူးသဖြင့် တစ်စုံတစ်ခု ဖြစ်လာမည်ကို စိုးရိမ်ကာ ဖေစုန့်ကို ခဏရှောင်နေရန် နောက်တစ်ကြိမ် အကြံပေးချင်သော်လည်း ဖေစုန့်၏ ဒေါသကို ဆွမိမည်ကို ကြောက်ရွံ့နေပြန်သည်။ သူက တုံ့ဆိုင်းနေစဉ် ရုတ်တရက် ဖေစုန့်က ပြောလိုက်သည်ကို ကြားလိုက်ရလေသည်။ "ဒူးလေး ယူခဲ့"

သိမ်းငှက်အမဲလိုက်ခွေးသည် စက်ယန္တရားတပ်ဆင်ထားသော ဒူးလေးတစ်လက်ကို အလျင်အမြန် ယူဆောင်လာခဲ့သည်။ ဖေစုန့်သည် ၎င်းကို လှမ်းယူလိုက်ပြီးနောက် မြားထည့်သည့်နေရာကို ချိန်ညှိကာ မြှောက်၍ ရှောင်းလိဆီသို့ ချိန်ရွယ်ထားလိုက်ပြီး မျက်လုံးများထဲတွင် ရေခဲတမျှ အေးစက်ကာ ရက်စက်ကြမ်းကြုတ်လုနီးပါး ဖြစ်နေသော သတ်ဖြတ်လိုစိတ်များ အပြည့်ပင်။

မောင်းကို ဆွဲဖြုတ်လိုက်ချိန်တွင် အလွှာလိုက် ထပ်နေသော စစ်သည်များ၏ ဝိုင်းရံတိုက်ခိုက်ခြင်းကို ခံနေရသည့် ရှောင်းလိသည် ပြင်းထန်သော နေရောင်အောက်တွင် အဆိပ်လူးထားသကဲ့သို့ အေးစက်နေသော အလင်းရောင်ကို မြင်တွေ့လိုက်ရသည်။ သူသည် အပ်များကဲ့သို့ သူ့ထံသို့ ပစ်ခတ်လာသော မြားတိုများကို ဓားရှည်ဖြင့် ကာကွယ်လိုက်စဉ် ဘေးဘက်မှ နူဂယ်၏ အချက်ပြမှုကို ရရှိထားသော စစ်သူကြီးငယ် တစ်ဦးက မြင်းကို စီးကာ လှံရှည်ကို မြှောက်၍ သူ့ထံသို့ ခုတ်ပိုင်းတိုက်ခိုက်လာလေသည်။

သူသည် မြေပြင်ပေါ်တွင် လိမ့်ချကာ ထိုဓားချက်ကို ရှောင်တိမ်းလိုက်သော်လည်း စစ်မြင်း ပြေးသွားသည့် ကြားကာလလေးအတွင်း မြင်းကုန်းနှီးကြိုးကို ခုတ်ဖြတ်ကာ အားကုန် ဆွဲချလိုက်သဖြင့် မြင်းကျောပေါ်ရှိ ရှီးလင်စစ်သူကြီးငယ်မှာ ကုန်းနှီးနှင့်အတူ လိမ့်ကျသွားတော့သည်။ ရှောင်းလိကမူ မြင်း၏ လည်ဆံမွေးများကို ဆွဲကိုင်ကာ မြင်းကျောပေါ်သို့ လွှဲတက်လိုက်ပြီး တစ်ပြိုင်နက်တည်းမှာပင် လေထဲသို့ ခုန်ပျံတက်သွားချိန်တွင် စစ်သည်တစ်ဦး ကိုင်ဆောင်ထားသော လှံရှည်ကို ခြေထောက်ဖြင့် အားကုန် ကန်ချလိုက်၏။

ဖေစုန့်၏ လက်ထဲရှိ ဒူးလေးမှ မြားတိုများ ကုန်သွားခဲ့ပြီ ဖြစ်သည်။ သူသည် ဒေါသတကြီးဖြင့် မြားထပ်ထည့်ရန် မြားအိမ်ကို ဖွင့်လိုက်ချိန်တွင် ရုတ်တရက် အရှေ့ဘက်မှ ပြင်းထန်သော လေပြင်းများက အေးစက်သော သတ်ဖြတ်လိုစိတ်များကို သယ်ဆောင်လာသည်ကို ခံစားလိုက်ရသည်။

မျက်လုံးပင့်ကြည့်လိုက်သည်တွင် တားဆီး၍မရနိုင်သော အရှိန်အဟုန်ဖြင့် လှံရှည်တစ်ချောင်းက အရှေ့သို့ လျင်မြန်စွာ ရောက်ရှိလာခဲ့လေသည်။

နူဂယ်က "သတိထား" ဟု ကျယ်လောင်စွာ အော်ဟစ်လိုက်ပြီး လူကို ကယ်တင်ရန် ခုန်အုပ်လာခဲ့သော်လည်း အချိန်မမီတော့ချေ။

ဖေစုန့်သည် ဘာမှပင် မစဉ်းစားတော့ဘဲ သိမ်းငှက်အမဲလိုက်ခွေး တစ်ဦးကို ဆွဲယူကာ သူ့အရှေ့တွင် ကာကွယ်လိုက်လေတော့သည်။

...

အပိုင်း (၂၄၂.၂)

လှံရှည်သည် ထိုသိမ်းငှက်အမဲလိုက်ခွေး၏ ခန္ဓာကိုယ်ကို ချက်ချင်း ထိုးဖောက်သွားပြီး ကျောဘက်မှ လှံထိပ်ဖျားနှင့် လှံရိုးအနည်းငယ်ပင် ထွက်လာသည်အထိ အားက ပြင်းလှသည်။ ထိုလှံရှည်၏ အဆုံးကို နူဂယ်က အမိအရ ဆွဲကိုင်ထားလိုက်သောကြောင့်သာ အရှေ့သို့ ဆက်မထိုးဝင်သွားခြင်း ဖြစ်လေသည်။

နေရောင်အောက်တွင် ဖေစုန့်၏မျက်နှာသည် အနည်းငယ် ဖြူရော်နေပြီး လက်နှင့်ခြေထောက်များတွင် အေးစက်မှုများ ရုတ်တရက် စိမ့်ဝင်လာကာ ကြက်သီးမွေးညင်းများ ထသွားခြင်းက မည်သို့သော အရသာဖြစ်ကြောင်းကို ပထမဆုံးအကြိမ် တကယ်ကို ခံစားလိုက်ရ၏။

အောက်ဘက်ရှိ သိမ်းငှက်အမဲလိုက်ခွေးများသည်လည်း ထိတ်လန့်နေဆဲဖြစ်ပြီး အလျင်စလို အကြံပေးလိုက်ကြသည်။ ကျူကျွင်း... ပညာရှိသူတစ်ယောက် အန္တရာယ်ရှိတဲ့ နေရာမှာ မရပ်ရဘူးတဲ့။ ကုန်းစွန်းလူကြီးမင်းအတွက်ပဲဖြစ်ဖြစ် ကျူကျွင်း အရင် ခဏလောက် ရှောင်နေလိုက်ပါ"

ကုန်းစွန်းချိုသာ ရှိနေသေးပါက ဤကဲ့သို့သော အခြေအနေမျိုးတွင် ဖေစုန့်ကို သေချာပေါက် တားဆီးလိမ့်မည်။

ဖေစုန့်၏မျက်နှာသည် ရှက်ရွံ့မှုကြောင့် တင်းမာနေပြီး နောက်ဆုံးတွင် ပြောလိုက်၏။ "ငါနဲ့ ဆရာ့ကြားမှာ ဖြည့်ဆီးရမဲ့ ကတိရှိသေးတယ်။ ဆုတ်ကြ"

ထိုတိုက်ခိုက်မှုက ဖေစုန့်၏အသက်ကို မယူနိုင်ခဲ့သဖြင့် ရှောင်းလိ၏မျက်နှာပေါ်ရှိ ရက်စက်ကြမ်းကြုတ်မှုက ပိုလို့ပင် ပြင်းထန်လာခဲ့သည်။ သို့သော် သူသည် ယခုအချိန်အထိ အသေအလဲ တိုက်ခိုက်နေခဲ့ရသဖြင့် အင်အားအနည်းငယ် ကုန်ခန်းနေပြီဖြစ်ပြီး ပုရွက်ဆိတ်အုပ်ကြီးနှင့်တူသည့် ရှီးလင်စစ်သည်များ၏ ဝိုင်းရံတိုက်ခိုက်ခြင်းကို ထပ်မံခံနေရသောကြောင့် ထိုအခိုက်တွင် ဖေစုန့်နောက်သို့ ဆက်လက် လိုက်လံတိုက်ခိုက်ရန် တကယ်ကို မဖြစ်နိုင်တော့ချေ။

အရှေ့ဘက်မှ ခရာမှုတ်သံများ ထွက်ပေါ်လာပြီး ခြေအောက်ရှိ သဲဝါများပင် အနည်းငယ် တုန်ခါသွားလေသည်။ ရှောင်းလိသည် မြင်းကျောပေါ်မှ နောက်သို့ လှည့်ကြည့်လိုက်သောအခါ မြောက်ဘက်မှ မည်းမှောင်နေသော ရှီးလင်စစ်ကူများ ဖြန့်ကျက်ဝင်ရောက်လာသည်ကို မြင်လိုက်ရ၏။

နူဂယ်သည် စစ်တပ်ကြီးကို မြင်သောအခါ ရုတ်တရက် ယုံကြည်မှုများ အဆမတန် တိုးပွားလာပြီး အော်ဟစ်လိုက်သည်။ "ဒီသူခိုးခေါင်းဆောင်ကို သတ်ဖို့ ငါ့နောက်ကို လိုက်ခဲ့ကြ"

သို့သော် အနောက်ဘက်မှ မိုးခြိမ်းသံကဲ့သို့သော မြင်းခွာသံများ ထပ်မံ ထွက်ပေါ်လာပြီး ရှီးလင်စစ်ကူများ၏ မြင်းခွာသံများနှင့် ရောနှောသွားလေသည်။ အောက်ဘက်ရှိ တုန်ခါနေသော သဲဝါများသည် မည်သည့်ဘက်မှ စစ်တပ်ကြောင့်ဖြစ်ကြောင်း ခွဲခြား၍မရနိုင်တော့သော်လည်း အဝေးက အနောက်ဘက်မှ လာနေသော စစ်ကူမြင်းစီးတပ်ဖွဲ့များနှင့်အတူ ပါလာသည့် သဲဝါများက ကောင်းကင်နှင့် နေမင်းကိုပင် ဖုံးကွယ်သွားစေသည်ကို မြင်တွေ့ရ၏။ ဤအခြေအနေကို ကြည့်ရသည်မှာ စစ်ကူများက သောင်းနှင့်ချီ ရှိနေမည်ကို မသိနိုင်ချေ။

အသေအလဲ တိုက်ခိုက်နေဆဲဖြစ်သော ရှီးလင်စစ်တပ်နှင့် ယခုလေးတင် ရောက်ရှိလာသော ရှီးလင်စစ်ကူများသည် ခုနလေးတင် မြင့်တက်လာသော စိတ်ဓာတ်အင်အားများ ရုတ်တရက် ပြန်လည် ကျဆင်းသွားကြတော့သည်။

သိမ်းငှက်အမဲလိုက်ခွေးများနှင့်အတူ ဆုတ်ခွာသွားသော ဖေစုန့်သည် အနောက်ဘက်ရှိ စစ်ကူများ၏ အခင်းအကျင်းကို မြင်သောအခါ မျက်လုံးများကို မှေးကျဉ်းကာ ပြောလိုက်သည်။ "ရှောင်းဆိုတဲ့ကောင် လက်ထဲမှာ ဒီလောက် စစ်သည်တွေ အများကြီးရှိနေရင် ဒီလောက်အထိ အန္တရာယ်ခံမှာ မဟုတ်ဘူး။ စစ်သူကြီး နူဂယ်ဆီ သတင်းပို့လိုက်။ ဒီအထဲမှာ လှည့်ကွက်ရှိတာ သေချာတယ်။ အသေဖြစ်ဖြစ် အရှင်ဖြစ်ဖြစ် အဲ့ဒီရှောင်းဆိုတဲ့ကောင်ကို သတ်ဖို့က အရေးကြီးဆုံးပဲ"

သိမ်းငှက်အမဲလိုက်ခွေးသည် မြင်းကို ရိုက်နှင်ကာ သတင်းပို့ရန် အလျင်စလို ပြန်ပြေးသွားလေသည်။ နူဂယ်သည် အနောက်ဘက်တွင် ရှောင်းလိကို အထပ်ထပ် ဝိုင်းရံထားသော ရှီးလင်စစ်တပ်ကို ချက်ချင်း လှည့်ကာ အရှိန်အဟုန်ပြင်းစွာ လာနေသော ထိုမြင်းစီးတပ်ဖွဲ့ကို ခုခံတိုက်ခိုက်ရန် အမိန့်ပေးနေစဉ် ထိုစကားကို ကြားလိုက်ရသဖြင့် မြင်းကျောပေါ်တွင် ထိုသိမ်းငှက်အမဲလိုက်ခွေး၏ ရင်ဘတ်ကို အမိအရ ဆွဲကိုင်လိုက်ပြီး ရက်စက်စွာ ပြောလိုက်၏။

"အဲ့ဒီ ဖေ ဆိုတဲ့ကောင် ဘာကြံနေလဲဆိုတာ ငါ မသိဘူးမှတ်နေလား။ သူက ငါတို့ ရှီးလင်စစ်သည်တွေကို လူလို့တောင် မသတ်မှတ်ထားတာ။ ငါတို့ ရှီးလင်ရဲ့ အင်အားကို အသုံးချပြီး သူ့ကိုယ်ပိုင် ရန်ငြိုးကို ဖြေရှင်းဖို့ အဲ့ဒီ မြင်းစီးတပ်ဖွဲ့ သူခိုးခေါင်းဆောင်ကို သတ်ချင်နေတာပဲ ရှိတာ"

နှစ်ဖက် အင်အားကွာဟနေချိန်တွင် စစ်သည်အချို့ကို စတေးပြီး ရှောင်းလိကို ဝိုင်းရံသတ်ဖြတ်ခြင်းအပေါ် နူဂယ်က ဘာမှ မပြောလိုသော်လည်း ယခု တစ်ဖက်ရန်သူ၏ စစ်ကူအင်အားက သူတို့ထက် တစ်ဝက်မျှပင် မလျော့နည်းသည်ကို မြင်နေရလျက်နှင့် လက်အောက်ရှိ လူများကို ရှောင်းလိကိုသာ သေချာဝိုင်းရံထားရန် အမိန့်ပေးကာ အင်အားကြီးမားသော ရန်သူကို ခုခံရန် စစ်တပ်ကို မခွဲထုတ်ခြင်းက နူဂယ်အမြင်တွင် မိမိကိုယ်ကို သေကြောင်းကြံနေခြင်းပင် ဖြစ်လေသည်။

နောက်ဆုံး နီရူသည် စစ်မြေပြင်တွင် သေဆုံးသွားခဲ့ပြီဖြစ်ပြီး သူက နီရူနေရာတွင် အစားထိုးနိုင်ခဲ့သည်။ ထိုမြင်းစီးတပ်ဖွဲ့မှ သူခိုးခေါင်းဆောင် သေဆုံးသွားလျှင်တောင်မှ မြင်းစီးတပ်ဖွဲ့ထဲတွင် ထိုခေါင်းဆောင်ကို အစားထိုးနိုင်မည့်သူ မရှိဘူးဟု မည်သူက သိနိုင်မည်နည်း။

ရှောင်းလိသည် ကောင်းကင်အနှံ့ လွင့်ပျံနေသော သဲဝါများကို မြင်လိုက်ချိန်တွင် ကျန်းဟူတို့ လာနေပြီဖြစ်ကြောင်းကို သိလိုက်လေသည်။

သူ့ကို ဝိုင်းရံတိုက်ခိုက်နေသော ရှီးလင်စစ်တပ်သည် "အင်အားကြီးသော ရန်သူ"ကို ခုခံတိုက်ခိုက်ရန် လူအင်အား အမြောက်အမြားကို ခွဲထုတ်လိုက်သဖြင့် ရောက်ရှိလာသော ရှီးလင်စစ်ကူများက လွတ်သွားသည့်နေရာကို ပြန်ဖြည့်ရန်က အချိန်အနည်းငယ် လိုအပ်နေသေးသည်။ ယခင်ကတည်းက အနောက်ဘက်တွင် ဆုတ်ခွာမည့်လမ်းကို ဖွင့်ထားပေးသော ဝံပုလွေတပ်ဖွဲ့ဝင်များက စူးရှသော လေချွန်သံကို မှုတ်လိုက်ကြပြီး ဆုတ်ခွာရန် လျှို့ဝှက်အချက် ပြလိုက်ကြ၏။

ဖေစုန့်ကို သတ်ဖြတ်ရန် မျှော်လင့်ချက် မရှိတော့သဖြင့် ရှောင်းလိသည်လည်း တုံ့ဆိုင်းမနေဘဲ မြင်းကို ရိုက်နှင်ကာ တစ်လျှောက်လုံး တိုက်ခိုက်ရင်း နောက်သို့ ပြန်ပြေးသွားတော့သည်။

ဝိုင်းရံပိတ်ဆို့မှုမှ အောင်မြင်စွာ ဖောက်ထွက်ပြီးနောက် မြင်းစီးတပ်ဖွဲ့ နှစ်ခု ပေါင်းဆုံသွားကာ စစ်မြေပြင်ဆီသို့ လာနေဆဲဖြစ်သော ရှီးလင်စစ်တပ်ကို ထားရစ်ခဲ့ပြီး ဆုတ်ခွာသွားကြ၏။

ရှီးလင်စစ်တပ် အင်အားသုံးသောင်းတွင် မြင်းစီးတပ်ဖွဲ့က ငါးထောင်ကျော်သာ ရှိပြီး ဤတိုက်ပွဲကြောင့် အများအပြား ဆုံးရှုံးသွားခဲ့ရသည်။ လက်ရှိအချိန်တွင် တစ်ဖက်က ဆုတ်ခွာသွားသည်ကို မြင်သောအခါ အနောက်ဘက်ရှိ ခြေလျင်စစ်တပ်နှင့် အကွာအဝေး အလွန် ဝေးကွာသွားပြီး တစ်ဖက်လူ၏ ခြုံခိုတိုက်ခိုက်မှုကို ခံရကာ အကူအညီမဲ့သွားမည်ကို စိုးရိမ်သဖြင့် အတင်းအကျပ် လိုက်လံတိုက်ခိုက်ခြင်း မပြုရဲကြတော့ချေ။

ရှောင်းလိတို့အဖွဲ့ အောင်မြင်စွာ ဆုတ်ခွာသွားပြီးနောက် နူဂယ်နှင့် ဖေစုန့်တို့က တပ်များကို ဦးဆောင်ကာ လိုက်လာချိန်တွင် သဲဝါများထဲတွင် မြေပြင်အနှံ့ ကျကျန်ရစ်ခဲ့သော ဆူးခြုံကိုင်းများကို မြင်သောအခါ မနေနိုင်ဘဲ အော်မေးလိုက်လေသည်။ "ဒါ ဘာတွေလဲ"

"မေးနေဖို့ လိုသေးလို့လား။ ဒါက အဲ့ဒီ လျန်ပြည်နယ်က သူခိုးတွေက အင်အားကြီးဟန်ဆောင်ဖို့ သုံးထားတဲ့ ပစ္စည်းတွေပေါ့"

ဖေစုန့်၏ လေသံတွင် လှောင်ပြောင်မှုများ ပြည့်နှက်နေ၏။ ရှောင်းလိကို အသေအလဲ ဝိုင်းရံသတ်ဖြတ်နိုင်ရန် အနည်းငယ်သာ လိုတော့သည့်အခြေအနေကို တွေးမိလိုက်တိုင်း သူ၏ နှလုံးသားထဲတွင် အပ်ချွန်ထောင်သောင်းမက ထိုးစိုက်နေသကဲ့သို့ ခံစားရပြီး နူဂယ်နှင့် စကားပြောရာတွင်လည်း လေသံက မကျေမနပ် ပိုဖြစ်လာတော့သည်။ "ကျွန်တော်က စစ်သူကြီးဆီ သတင်းပို့ပြီး လှည့်ကွက်ရှိတာကို သတိထားဖို့ ပြောခဲ့တယ် မဟုတ်လား။ စစ်သူကြီးကရော ကျွန်တော့်ကို ဘယ်လို ပြန်ဖြေခဲ့လဲ"

ဤမျှများပြားသော စစ်သူကြီးငယ်များ ရှေ့တွင် နူဂယ်သည် သည်ကိစ္စကို သူ့အမှားဖြစ်ကြောင်းကို သဘာဝကျကျ ဝန်မခံနိုင်သဖြင့် ဖေစုန့်၏ အဆင့်အတန်းကိုသာ ငဲ့ကွက်၍ ခပ်မာမာ ပြောလိုက်သည်။ "လျန်သူခိုးတွေရဲ့ စစ်ကူတွေက ရုတ်တရက် ရောက်လာတော့ တကယ်ကို အဘက်ဘက်ကနေ မစဉ်းစားနိုင်ခဲ့ပါဘူး။ ကြင်ရာတော်က မင်းသမီးကိုယ်စား အပြစ်ပေးပါ"

သူက ဟယ်ယီကို ထုတ်သုံးလိုက်ခြင်းမှာ ဖေစုန့်တွင် စစ်တပ်ထဲ၌ အမှန်တကယ် အာဏာမရှိကြောင်းကို ဖေစုန့်အား ပြောပြလိုခြင်းသာ ဖြစ်လေသည်။

မူလက အလွန် ဒေါသထွက်နေသော ဖေစုန့်သည် ရုတ်တရက် ရယ်မောလိုက်ပြီး လှောင်ပြောင်ခြင်းလား၊ တကယ် ချီးကျူးခြင်းလား ဆိုသည်ကို လူများ ခွဲခြားမရနိုင်သော လေသံဖြင့် ပြောလိုက်၏။ "စစ်သူကြီးက တကယ်ကို တာဝန်ယူတတ်တာပဲ"

နူဂယ်က ခေါင်းငုံ့ထားပြီး အသံမထွက်ခဲ့ချေ။

ဖေစုန့်သည် သူ့ဘေးမှ ဖြတ်လျှောက်သွားချိန်တွင် ပြောလိုက်လေသည်။ "အခု အဲ့ဒီ မြင်းစီးတပ်ဖွဲ့က ကျွန်တော်တို့ ချီတက်တာကို တားဆီးဖို့ဆိုတာ သေချာသွားပြီ။ နောက်ကျရင် တစ်ဖက်က ထပ်ပြီး နှောင့်ယှက်လာလည်း ဂရုစိုက်နေဖို့ မလိုတော့ဘူး။ နောက်ထပ် စစ်တပ်ကြီး တစ်သောင်းခွဲနဲ့ ပေါင်းပြီးတာနဲ့ ကျားချောက်တောင်ကြားဂိတ်ဆီကို အရှိန်အပြည့်နဲ့ ချီတက်ကြတာပေါ့"

သူ့မျက်လုံးအောက်ခြေတွင် ဖုံးကွယ်ထားသည်မှာ ရက်စက်ကြမ်းကြုတ်မှုနှင့် အေးစက်မှုများသာ ဖြစ်လေသည်။

နီရူက ယခုလေးတင် သေဆုံးသွားခဲ့ပြီဖြစ်ရာ သူသည် စစ်တပ်ကို ထိန်းချုပ်ရန် နူဂယ်ဆိုသော ဤရုပ်သေးရုပ်ကို အသုံးပြုရန် လိုအပ်နေသေးသဖြင့် ဤအရူးကို ခဏလောက် ထပ်ထားပေးထားလိုက်ဦးမည်။

ရှောင်းလိတို့အဖွဲ့သည် လိုက်လံတိုက်ခိုက်သူများကို နောက်ချန်ခဲ့ပြီးနောက် ဆယ်မိုင်နီးပါး ထပ်ပြေးလာပြီးမှသာ ခဏလောက် အနားယူရန် ရပ်တန့်လိုက်ကြ၏။

ကျန်းဟူသည် ရေဘူးထဲမှ ရေကို ခေါင်းမော့ကာ မျက်နှာပေါ်သို့ လောင်းချလိုက်ပြီး အပူဒဏ်ကို အနည်းငယ် သက်သာစေရန် လုပ်လိုက်ကာ အသက်ပြင်းပြင်း ရှူရင်း ပြောလိုက်သည်။ "တော်သေးတယ်။ ငါတို့ လာရာလမ်းမှာ ဆယ်မိုင်အကွာကနေ ဒီဘက်ကို လာနေတဲ့ နောက်ထပ် ရှီးလင်စစ်တပ် တစ်ခုနဲ့ ထပ်တွေ့ခဲ့သေးတယ်။ တကယ်လို့ သူတို့က ခေါင်းနဲ့အမြီး ညှပ်လိုက်မယ်ဆိုရင် ဒီနေ့ အသက်ရှင်လျက် ဖောက်ထွက်နိုင်ပါဦးမလားဆိုတာ တကယ်ကို မသိနိုင်တော့ဘူး"

ကျောက်ယိုချိုက်သည် အရိပ်ရသော နေရာတွင် အားပျော့စွာ ထိုင်ချလိုက်ပြီး ညစ်ပတ်နေသော အင်္ကျီလက်ဖြင့် နဖူးပေါ်မှ ချွေးများကို သုတ်လိုက်ကာ ပြောလိုက်လေသည်။ "ကျူကျွင်းက ဒီနေ့ ကျွန်တော့်ကို တကယ်ကို လိပ်ပြာလွင့်မတတ် လန့်သွားအောင် လုပ်တာပဲ။ အစ်ကိုဟူက ကျူကျွင်း လူတစ်ထောင်လောက်ပဲ ခေါ်ပြီး ရှီးလင်စစ်စခန်းထဲကို တိုက်ရိုက် ဝင်သွားတယ်လို့ ပြောတော့ ကျွန်တော် လန့်ပြီး မြင်းပေါ်ကနေတောင် ပြုတ်ကျမလို့ပဲ"

သူသည် ဖြူလျော့နေသော မျက်နှာဖြင့် စိုးရိမ်တကြီး ပြောလိုက်၏။ "အစ်ကိုဟူရဲ့ အကူအညီနဲ့ အဲ့ဒီရှီးလင်စစ်တပ်ကို ဖြေရှင်းပြီးလို့ နောက်ကြောင်းပြန်လှည့်လာတော့ ကျူကျွင်းက အဲ့ဒီ ရှီးလင်စစ်သူကြီးကို အရှင်လတ်လတ် ဖမ်းမိပြီး ဖေစုန့်နောက်ကို လိုက်သွားပြီလို့ ကြားလိုက်ရတယ်။ မြင်းကျာပွတ်ကို ပြတ်တဲ့အထိ ရိုက်ပြီး လိုက်လာခဲ့ရတာ အခုမှပဲ အမီလိုက်နိုင်တော့တယ်။ ဒါပေမယ့် ကျူကျွင်းက သောင်းချီတဲ့ စစ်တပ်ကြီးထဲမှာ ပိတ်မိနေတာကို မြင်လိုက်ရတယ်။ ကျူကျွင်းက ရဲရင့်လို့သာ သောင်းချီတဲ့ စစ်တပ်ကြီးထဲကနေ အသေအလဲ တိုက်ခိုက်ပြီး ပြန်ထွက်လာနိုင်ခဲ့တာပေါ့..."

ကျောက်ယိုချိုက်သည် မျက်နှာကို သုတ်လိုက်ပြီး ညှိုးငယ်စွာ ပြောလိုက်သည်။ "ကျွန်တော် မနက်ဖြန် သေသွားရင်တောင် ဒီနေ့ လန့်လွန်းလို့ သေသွားတာ သေချာတယ်"

"တော်စမ်းပါ။ မင်းက စကားကို တတ်လွန်းတယ်" ကျန်းဟူက ပြုံးကာ ကျိန်ဆဲလိုက်ပြီးနောက် ကျန်နေသော ရေတစ်ဝက်ကို သူ့ထံ ပစ်ပေးလိုက်ရာ ကျောက်ယိုချိုက်က အလျင်စလို လက်နှစ်ဖက်ဖြင့် ဖမ်းယူကာ ကျေးဇူးတင်စကား ပြောလိုက်လေသည်။

ဘေးအန္တရာယ်မှ လွတ်မြောက်လာပြီးနောက် ကျန်းဟူသည်လည်း မနေနိုင်ဘဲ လိုက်ပါ ရယ်မောလိုက်၏။ "ဖေမျိုးနွယ် ခွေးသူခိုးက နောက်တစ်ကြိမ် လွတ်သွားခဲ့ပေမယ့် အစ်ကို(၂)က ဒီနေ့ တစ်ချက်တည်းနဲ့ တစ်ဖက်က အဓိကစစ်သူကြီးကို သတ်နိုင်ခဲ့တာက တကယ်ကို ဝမ်းသာစရာပဲ"

ဝံပုလွေတပ်ဖွဲ့ဝင်များသည်လည်း စိတ်အားထက်သန်မှုများ မြင့်တက်လာကြသော်လည်း ဘေးတစ်ဖက်တွင် ထိုင်ကာ ခန္ဓာကိုယ်ပေါ်ရှိ ဒဏ်ရာများကို ဖြစ်သလို ကုသနေသော ရှောင်းလိကမူ ပြောလိုက်သည်။ "ဖေစုန့်က ငါတို့လက်ထဲက စစ်အင်အားကို အကဲခတ်မိသွားပြီ။ ဒီနေ့ သူ့ကို သတ်ဖို့ ကျရှုံးသွားတော့ နောက်ပိုင်း ကျားချောက်တောင်ကြားဂိတ်ကို သွားမယ့် ဒီလမ်းတစ်လျှောက်မှာ သူ့ကို လမ်းခုလတ်ကနေ တိုက်ခိုက်ဖို့ဆိုတာ မဖြစ်နိုင်တော့ဘူး"

ကျန်းဟူ၏ မျက်နှာပေါ်ရှိ ဝမ်းသာမှုများ အနည်းငယ် လျော့ပါးသွားပြီး သူတို့ ထွက်ပြေးစဉ် မြင်းမြီးမှ ဖြတ်ချလိုက်သော ထိုကန္တရခြုံသစ်ကိုင်းများကြောင့် သူတို့၏ အင်အား ပေါ်လွင်သွားခြင်း ဖြစ်နိုင်ကြောင်းကို ချက်ချင်း နားလည်သွားလေသည်။

အရင်က သူတို့သည် ဤနည်းလမ်းကို အသုံးပြုကာ ရှီးလင်စစ်တပ်ကို ခြုံခိုတိုက်ခိုက်မည့် ဧရိယာထဲသို့ တွန်းပို့ပြီးနောက် ထိုရှီးလင်စစ်တပ်ငယ်ကို ဝိုင်းရံသတ်ဖြတ်ပြီးတိုင်း ကန္တာရခြုံသစ်ကိုင်းများကို ယူဆောင်သွားကာ နေရာတစ်ခုရှာ၍ မီးရှို့ဖျက်ဆီးပစ်လေ့ရှိကြသည်။ ၎င်းမှာ ရှီးလင်ဘက်မှ သူတို့၏ စစ်အင်အား မည်မျှရှိကြောင်းကို မသိရှိနိုင်စေရန်နှင့် ထိုမှတစ်ဆင့် ကြောက်ရွံ့မှုများ ဖြစ်ပေါ်လာစေကာ စစ်တပ်အတွင်း ကြောက်ရွံ့မှုများ ပျံ့နှံ့သွားစေရန် ပိုမို လွယ်ကူစေရန်အတွက် ဖြစ်လေသည်။

ယနေ့တွင် အင်အား သုံးသောင်းနီးပါး ပေါင်းစပ်ထားသော ရှီးလင်စစ်တပ် နှစ်ခု၏ လိုက်လံဖမ်းဆီးမှုကို ရှောင်ရှားနိုင်ရန် သူတို့သည် မြင်းမြီးတွင် ချည်နှောင်ထားသည့် ကန္တာရခြုံသစ်ကိုင်းများကို ဖြတ်တောက်ပစ်လိုက်ရသည်။

ဖေစုန့်က သူတို့၏ စစ်အင်အားကို အကဲခတ်မိသွားပြီး သူတို့၏ အကြိမ်ကြိမ် နှောင့်ယှက်မှု ရည်ရွယ်ချက်ကိုလည်း သိရှိသွားခဲ့သဖြင့် နောက်ပိုင်းတွင် ရှီးလင်စစ်တပ်ကို ဆက်လက် ဟန့်တားရန်ဆိုသည်မှာ အဆင်ပြေတော့မည် မဟုတ်ချေ။

ကျန်းဟူသည် ရုတ်တရက် အနည်းငယ် စိတ်ပျက်လက်ပျက် ဖြစ်သွားပြီး တစ်ခဏမျှ တိတ်ဆိတ်နေပြီးနောက် ဖြေသိမ့်ကာ ပြောလိုက်သည်။ "အစ်ကို(၂)... ငါတို့ အစွမ်းကုန် ကြိုးစားခဲ့ပြီးပြီပဲ..."

"တချို့ကိစ္စတွေက အစွမ်းကုန် ကြိုးစားရုံနဲ့ မရဘူးလေ" ရှောင်းလိသည် သွေးစွန်းနေသော ပတ်တီးကို သူ၏လက်ပေါ်တွင် တစ်ပတ်ပြီးတစ်ပတ် ရစ်ပတ်ကာ ဒဏ်ရာကို ဖုံးအုပ်လိုက်ပြီး ဤစကားကို ပြောလိုက်ချိန်တွင် အလွန် တည်ငြိမ်နေခဲ့၏။

ကျန်းဟူသည် ရှီးလင်က ကျားချောက်တောင်ကြားဂိတ်ကို တိုက်ခိုက်မည့်အရေးကို တားဆီးခြင်းက တာ့လျန်အတွက် မည်မျှ အရေးကြီးကြောင်းကို သဘာဝကျကျ သိရှိထားသဖြင့် အသက်ကို စွန့်လွှတ်တော့မည့်ဟန်ဖြင့် ပြောလိုက်သည်။ "နောက်ပိုင်း ဘာဆက်လုပ်ရမလဲဆိုတာကိုသာ အစ်ကို(၂) ပြောလိုက်"

ရှောင်းလိသည် သွားများဖြင့် ပတ်တီးကို ကိုက်ကာ လက်ခုံပေါ်တွင် အထုံးတစ်ခု ထုံးလိုက်၏။ ပတ်တီးပေါ်ရှိ သွေးကွက်များသည် နှုတ်ခမ်းနှင့် သွားများကြားတွင် အရည်ပျော်သွားပြီး ဖန်ကာ ညှီစော်နံနေလေသည်။

ပတ်တီးစည်းထားသော ထိုလက်သည် ဓားရှည်ကို တစ်ဖန် ပြန်လည် ဆုပ်ကိုင်လိုက်ပြီး ပြောလိုက်၏။ "ဖေစုန့်ထက် အရင် ကျားချောက်တောင်ကြားဂိတ်ကို ရောက်အောင်သွားပြီး ရှီးလင်စစ်တပ် လာနေတဲ့အကြောင်းနဲ့ ကျားချောက်တောင်ကြားဂိတ်ထဲမှာ ဖေစုန့်ရဲ့ အတွင်းလူ ရှိနေတယ်ဆိုတဲ့အကြောင်း။ အဲ့ဒီအချိန်ကျရင် ရှီးလင်နဲ့ အပြင်အတွင် ပူးပေါင်းပြီး တိုက်ခိုက်လိမ့်မယ်ဆိုတဲ့ သတင်းကို ဖြန့်လိုက်"

ကျောက်ယိုချိုက်သည် ထိုစကားကို ကြားလိုက်သည်နှင့် မြေပြင်ပေါ်မှ လျင်မြန်စွာ ခုန်ထလိုက်ပြီး ပေါင်ကိုရိုက်ကာ အော်ဟစ်လိုက်လေသည်။ "ကောင်းလိုက်တာ။ ငါတို့ ရှီးလင်စစ်တပ်ကြီးကို အချိန်ဆွဲလို့ မရတော့ဘူးဆိုရင် ကြိုတင်ပြီး ကျားချောက်တောင်ကြားဂိတ်ထဲကို သတင်းပို့လိုက်မယ်။ ဖေစုန့်ရဲ့ အတွင်းလူက ယန်ရှော့ ဟုတ်သည်ဖြစ်စေ၊ မဟုတ်သည်ဖြစ်စေ ဒီသတင်း ထွက်သွားတာနဲ့ အရင်ဆုံး သံသယဝင်ခံရမဲ့သူက သူပဲ။ တကယ်လို့ သူက အတွင်းလူ မဟုတ်ဘူးဆိုရင်တောင် သူ့ရဲ့ နာမည်ကောင်းကို သက်သေပြဖို့အတွက် အဲ့ဒီအတွင်းလူကို သေချာ ရှာဖွေဖော်ထုတ်လိမ့်မယ်။ တကယ်လို့ သူကသာ အဲ့ဒီအတွင်းလူ ဖြစ်နေမယ်ဆိုရင် မြို့ထဲက ပြည်သူတွေ အားလုံးက အတွင်းလူက ဖေစုန့် ကျားချောက်တောင်ကြားဂိတ်ကို တိုက်ဖို့ ကူညီပေးနေတယ်ဆိုတာကို သိသွားကြမှာပဲ။ ကျားချောက်တောင်ကြားဂိတ် ကျသွားတာနဲ့ သူ ယန်ရှော့က မျိုးဆက်ပေါင်းများစွာ နိုင်ငံတော် သစ္စာဖောက်ဆိုတဲ့ နာမည်ဆိုးကို ခံရတော့မှာ။ သူ ရဲမရဲ ကြည့်ကြသေးတာပေါ့"

ကျောက်ယိုချိုက်၏ ဤမြှောက်ပင့်စကားသည် တော်တော်လေး ရှည်လျားသွားသော်လည်း ရှောင်းလိက စကားထပ်မပြောတော့ဘဲ နေဝင်ဆည်းဆာ အလင်းရောင်အောက်တွင် အနောက်တောင်ဘက်သို့ တစ်ချက်မျှ ကြည့်လိုက်၏။

သူ နန်းတော်မှာ ဘယ်လိုများ ရှိနေမလဲ မသိဘူး။

ကောလဲ့မြို့။

ဝိန်းယွီသည် အစည်းဝေးခန်းမအတွင်း ထိုင်ကာ မုယိုလျန် တင်ပြလာသော မကြာသေးမီက စစ်ရေးအခြေအနေများကို နားထောင်နေလေသည်။ ဤနယ်စပ်သို့ အလျင်စလို လာရောက်ခဲ့ရသည့်အချိန်မှစ၍ သူမ ကိုယ်တိုင် ဖတ်ရှုကိုင်တွယ်ဖြေရှင်းရမည့် ကိစ္စရပ်များသည် နွားမွှေးများကဲ့သို့ များပြားလှပြီး စစ်ရေးအခြေအနေများကလည်း တစ်ခဏလေးပင် အချိန်ဆွဲ၍ မရနိုင်သဖြင့် ဝိန်းယွီသည် အချိန်အတော်ကြာ ကောင်းကောင်း မအိပ်စက်ခဲ့ရချေ။

ဆက်တိုက် စုဆောင်းလာခဲ့သော ပင်ပန်းနွမ်းနယ်မှု အရိပ်အယောင်များသည် သူမ၏ မျက်ခုံးများကြားတွင် စုပုံနေသော်လည်း ထိုအေးစက်သော ဩဇာတိက္ကမကြောင့်သာ ဖိနှိပ်ထားနိုင်သဖြင့် သိပ်မသိသာချေ။

"...အချိန်အတော်ကြာ မိုးမရွာတော့ သဲကန္တာရထဲက စိမ်းလန်းတဲ့ နေရာငယ်လေးတွေ တော်တော်များများလည်း ခန်းခြောက်ကုန်ပြီ။ ဒီနှစ် ချန်နိုင်ငံမှာ တိုက်ပွဲတွေ ဆက်တိုက်ဖြစ်နေတော့ ဒေသခံ သိုးထိန်းတွေ ရွှေ့ပြောင်းတာကလည်း အနောက်ဘက်ကိုချည်းပဲ သွားနေကြတယ်။ ဒီနှစ် အနောက်ဘက်နယ်စပ်ရဲ့ ကုန်သွယ်ရေးကတော့ လုပ်လို့ရတော့မှာ မဟုတ်ဘူး..."

မုယိုလျန်၏ စကားသံ မဆုံးမီမှာပင် ကျောင်းပိုင်သည် အပြင်ဘက်မှ အလျင်စလို ခြေလှမ်းများဖြင့် ဝင်ရောက်လာခဲ့သည်။ အရေးပါသော စစ်သူကြီးများ ရှိနေသည်ကို မြင်သောအခါ သူမသည် အလွန်အကျွံ ရိုင်းပြခြင်းမဖြစ်စေရန် တစ်ဖက်လူကို ခေါင်းညိတ်ပြရုံသာ ခေါင်းညိတ်ပြလိုက်ပြီး ချက်ချင်းပင် မျက်နှာပျက်ကာ ဝိန်းယွီအား ပြောလိုက်၏။ "မင်းသမီး... ဟယ်ယီက ရှီးလင်နယ်မြေထဲကနေ စစ်သည် ငါးသောင်းကို ထပ်ခေါ်လိုက်ပြန်ပြီ။ စစ်တပ်ကြီး တစ်သိန်းနှစ်သောင်းက မြို့ကို ဝိုင်းထားတော့ ကောလဲ့မြို့က သိပ်ကြာကြာ တောင့်ခံထားနိုင်တော့မှာ မဟုတ်ဘူး"

ဘေးတစ်ဖက်တွင် ရပ်ကာ နားထောင်နေသော ကုရှီးယွင်သည်လည်း ထိုစကားကို ကြားသောအခါ မျက်နှာပျက်သွားပြီး အမူအရာပျက်ယွင်းစွာ အော်ဟစ်လိုက်လေသည်။ "တစ်သိန်းနှစ်သောင်း ဟုတ်လား"

လူတိုင်းက ဝိန်းယွီဆီသို့ ပြိုင်တူ ကြည့်လိုက်ကြသော်လည်း ဝိန်းယွီတစ်ယောက်သာ ယခင်ကအတိုင်း တည်ငြိမ်နေဆဲဖြစ်ပြီး မုယိုလျန်ကိုပင် ပြန်မေးလိုက်၏။ "သိုးထိန်းတွေက အနောက်ဘက်ကို စပြီး ရွှေ့ပြောင်းနေကြပြီလား"

မုယိုလျန်က ခေါင်းညိတ်ပြကာ ဟုတ်မှန်ကြောင်း တရိုတသေ ပြန်ဖြေလိုက်လေသည်။

ဝိန်းယွီသည် မျက်လုံးများကို အနည်းငယ် မှေးစင်းထားလိုက်ပြီး ဆက်ပြောလိုက်တော့သည်။ "မှန်းထားတာထက် စောနေတာပဲ။ တစ်လတိတိ ကာကွယ်ထားဖို့ မလိုတော့ဘူး။ ဒါပေမယ့် ရက်နှစ်ဆယ်တော့ မဖြစ်မနေ ကာကွယ်ထားရမယ်"

...