အခန်း ၂၅၆

🍋 Chapter 256

ဤကဲ့သို့သော ပြောက်ကျားစစ်ဆင်ရေး ဆန်ဆန် ရုန်းရင်းဆန်ခတ် ဖြစ်ရပ်များမှာ ကျောင်းဝန်းအတွင်း ထူးခြားသော မြင်ကွင်းတစ်ခု ဖြစ်လာခဲ့ပြီး ကျောင်းသားများအတွက်မူ အလွန်ပင် စိတ်လှုပ်ရှား ပျော်ရွှင်စရာ ကောင်းနေခဲ့သည်။

နေ့စဉ်နှင့်အမျှ ကြောင်နှင့်ကြွက် လိုက်တမ်းကစားပွဲကြီး ဆင်နွှဲနေကြရာ အသက်အရွယ် ရာထူးရနေပြီဖြစ်သော ထိုလုံခြုံရေးဝန်ထမ်းများအနေဖြင့် အသက်တစ်ဆယ်ကျော်၊ နှစ်ဆယ်အစောပိုင်းအရွယ် ကျောင်းသားလူငယ်များကို မည်သို့မှ အမှီလိုက်နိုင်ချေ မရှိပေ။

ထို့ပြင် အပြင်အစားအစာ ပါဆယ်များကို စုစည်းလက်ခံပေးသည့် ပရော်ဖက်ရှင်နယ်အဖွဲ့များပင် တဖြည်းဖြူး ပေါ်ပေါက် လာခဲ့သေးသည်။

ကျောင်းသားများသည် မဟာမိတ်အဖွဲ့များ ဖွဲ့စည်းကာ ကင်းစောင့်ခြင်း၊ လုံခြုံရေးဝန်ထမ်းများ အာရုံပြောင်းအောင် ပြုလုပ်ခြင်းနှင့် ပါဆယ်များကို စုပေါင်း၍ သွားရောက်ယူဆောင်ခြင်းတို့ကို လုပ်ဆောင်ခဲ့ကြသည်။

ဤအသက်အရွယ်ရှိ ကျောင်းသားများမှာ သဘာဝအတိုင်း ပုန်ကန်လိုစိတ် ရှိကြရာ တစ်စုံတစ်ခုကို ပိတ်ပင်တားဆီးလေလေ၊ ၎င်းတို့က ပိုလုပ်ဆောင်လိုလေလေ ဖြစ်သည်။

ဤအခြေအနေက ၎င်းတို့၏တက်ကြွမှုကို ပိုမိုမီးမွှေးပေးခဲ့သည်။

သို့သော်လည်း ကျောင်းသားဟူသည် ကျောင်းသားမျှသာ ဖြစ်ချေသည်။

၎င်းတို့အနေဖြင့် ဒုက္ခကြားမှ ပျော်စရာရှာသည်ဖြစ်စေ၊ ဉာဏ်စမ်းပွဲများ ဆင်နွှဲသည်ဖြစ်စေ လုပ်ဆောင်နိုင်သည်မှာ ကျောင်းစည်းကမ်း၏ စည်းမျဉ်းများကို ထပ်ဖန်တလဲလဲ ကျော်နင်းရုံမျှသာရှိပြီး နောက်ဆုံးတွင် ကျောင်းတော်ကြီး၏ သံမဏိလက်သီးကို ယှဉ်ပြိုင်နိုင်စွမ်း မရှိကြချေ။

တစ်လခန့် ကြာပြီးနောက်တွင် ကျောင်း၏ သံပြာဂါတ်ခြံစည်းရိုး အားလုံးကို ယခုမြင်တွေ့နေရသည့် အလွန်စိပ်သော သံတိုင်ခြံစည်းရိုးအသစ်များဖြင့် အစားထိုးလဲလှယ်ခြင်း ခံလိုက်ရသည်။

ယခုမူ ဤခြံစည်းရိုးများက တံတိုင်းကို ဖြတ်ကျော်၍ အစားအစာ ပါဆယ်ပေးပို့နိုင်မည့် အခွင့်အလမ်းကို လုံးဝ ချေမှုန်းပစ်လိုက်ပြီ ဖြစ်သည်။

ဤပါးနပ်လှသော အကြံဉာဏ်ကိုမူ ပညာရှိလှသော ဒုကျောင်းအုပ်ခုန်းဖန်က စီစဉ်ခဲ့ခြင်းဖြစ်ပြီး စားသောက်ဆိုင်များနှင့် ကျောင်းသားများ၏ ခုခံမှုအားလုံးကို တစ်ကွက်တည်းဖြင့် အပြတ်အသတ် အနိုင်ယူလိုက်ခြင်းပင်။

ဤစီမံကိန်းအပေါ် အခြားသော ကျောင်းအကြီးအကဲကလည်း လွန်စွာကျေနပ်အားရခဲ့ကြသည်။

၎င်းတို့သည် ကျောင်းဝန်းအတွင်းသို့ အပြင်မှ ပါဆယ်ပို့သမား အမြောက်အမြား ဝင်ထွက်သွားလာနေကြခြင်းအပေါ် ယခင်ကတည်းက မကျေမနပ် ဖြစ်နေခဲ့ကြရာ ယခုအခါ ထိုပြဿနာမှာ လုံးဝပြေလည်သွားခဲ့သည်။

ကျောင်းခြံစည်းရိုးတစ်ခုလုံးကို ပြန်လည်တပ်ဆင်ရန်အတွက် ငွေကြေးအမြောက်အမြား ကုန်ကျခဲ့သည်မှာ မှန်သော်လည်း ၎င်းက ကျောင်း၏ပုံရိပ်အပေါ် ကောင်းမွန်သော သက်ရောက်မှုရှိစေသဖြင့် ဤကုန်ကျစရိတ်မှာ ပြောပလောက်သည့် အရာမဟုတ်ပေ။

ဤခြံစည်းရိုးလဲလှယ်ရေး စီမံကိန်းကို စတင်အကောင် အထည်ဖော်သူအဖြစ် အလုပ်များနေခဲ့သော ခုန်းဖန်သည် သဘာဝအတိုင်း ငွေကြေးအမြောက်အမြားကို ကိုယ်ပိုင်အိတ်ထဲသို့ ထည့်သွင်းနိုင်ခဲ့သည်။

ဆောက်လုပ်ရေးကုမ္ပဏီက ကော်မရှင်ခ ၂၀ ရာခိုင်နှုန်း ပေးအပ်ခဲ့ရာ ၎င်းတို့အားလုံးမှာ သူ့ အိတ်ကပ်ထဲသို့ ရောက်ရှိသွားခဲ့ခြင်း ဖြစ်သည်။

ထို့ကြောင့်ပင် ကျိုးထျန်းက ထိုလူအား လွန်စွာပါးနပ်လွန်းလှပြီး ခြေလှမ်းတိုင်းတွင် ငွေရှာနိုင်သူဟုပြောဆိုခဲ့ခြင်းဖြစ် သည်။

ပထမတွင် သူသည် မိမိ၏အာဏာကို အသုံးပြု၍ မစ္စတာကုအား ထမင်းစားဆောင်ကန်ထရိုက်ရရှိအောင် ပြုလုပ်ပေးခဲ့သည်။

သူ၏ စီးပွားရေး ကောင်းမွန်စေရန်နှင့် ငွေကြေးအမြောက် အမြားရရှိရန်အတွက် ခိုင်လုံပုံရသော အကြောင်းပြချက်ကို အသုံးပြုကာ အပြင်မှ ပါဆယ်ပို့သမားများ ဝင်ရောက်ခြင်းကို ပိတ်ပင်ခဲ့သည်။

သူသည် အစပိုင်းတွင် ပါဆယ်ပို့သမားများထံမှ ငွေကြေးညှစ်ယူရန် စီစဉ်ခဲ့သော်လည်း ၎င်းတို့က အုပ်စုဖွဲ့၍ ငြင်းဆန်ခဲ့ကြသည့်အပြင် ကျောင်းသားများနှင့်ပါ ပူးပေါင်းကာ ပြောက်ကျားစစ် ဆင်နွှဲခဲ့ကြသည်။

ဤကဲ့သို့သော အခြေအနေမျိုးကို ဆက်လက်ခွင့်ပြုထား၍ မရပေ။

သေချာပေါက် ခွင့်မပြုနိုင်ရာ ခြံစည်းရိုးလဲလှယ်ခြင်း ကိစ္စရပ်ပေါ်ပေါက်လာခဲ့တော့သည်။

သူသည် နေရာတိုင်းမှ ငွေရှာနိုင်စွမ်းရှိပြီး ဤနေရာတွင် မရလျှင် အခြားနေရာတစ်ခုကို ရှာဖွေတတ်ရာ သူသည် အမြဲ တမ်း အလုပ်မလုပ်ဘဲ အလကားရယူနေခဲ့ခြင်းဖြစ်သည်။

ကျောင်းမှ ဆက်ကြေးတောင်းခံနေကြောင်း စွပ်စွဲထားသည့် ဤ Weibo ပို့စ်မှာ အမြောက်အမြား ပြန်လည်မျှဝေခြင်းခံခဲ့ရပြီး ကျောင်း၏ ဦးဆောင်မှုပိုင်းကို တိုက်ရိုက်ပစ်မှတ်ထားလာခဲ့သည်။

ထို့ပြင် အစားအသောက် လုပ်ငန်းရှင်များနှင့် ပါဆယ်ပို့ဆောင်ရေး လုပ်ငန်းပလက်ဖောင်း အမြောက်အမြားကလည်း ဤလုပ်ရပ်ကို ဆန့်ကျင်ရန်အတွက် အတူတကွ ရပ်တည်ခဲ့ကြသည်။

၎င်းတို့၏နောက်ကွယ်တွင်မူ ကျိုးထျန်း ရှိနေခဲ့ခြင်းဖြစ် သည်။

သူသည် ရှန်ဟိုင်း အဆင့်မြင့်စားသောက်ကုန်အသင်း၏အဖွဲ့ဝင်များဖြစ်ကြသော သူဌေးကျန်း အစရှိသူတို့၏အကူအညီကို ရယူခဲ့ခြင်းဖြစ်သည်။

Weibo ပို့စ်တစ်ခုကို ပြန်လည်မျှဝေပေးရုံမျှသာဖြစ်သဖြင့် ၎င်းတို့က သူ့အား သေချာပေါက်မျက်နှာသာပေးခဲ့ကြသည်။

သို့သော်လည်း အရေအတွက် များပြားလာသောအခါ အရည် အသွေး ပြောင်းလဲမှုကိုဖြစ်ပေါ်စေခဲ့ပြီး ဤ Weibo ပို့စ်၏ မြင့်မားသော ရေပန်းစားမှုက အထက်အာဏာပိုင်များအား လွယ်လင့်တကူသတိပြုမိစေခဲ့သည်။

ကျောင်းအကြီးအကဲ အစုလိုက်အပြုံလိုက် အစာအဆိပ်သင့်မှု ဖြစ်ရပ်ကြောင့် စိတ်ရှုပ်ထွေးနေရပြီဖြစ်သော ကျောင်းအုပ်ကြီးရှုသည် စားပွဲကို လက်သီးဖြင့် ထပ်မံရိုက်လိုက်ပြန် သည်။

သူသည် ဤအကြောင်းကို ကြားသိရသောအခါ ၎င်းကို အဘိုးကြီးခုန်း ကိုင်တွယ်ခဲ့ခြင်းဖြစ်ကြောင်း မှတ်မိလိုက်သည်။

သူသည် နေ့စဉ်နှင့်အမျှ အလုပ်ကိစ္စ အမြောက်အမြားကို ကိုင်တွယ်နေရသူဖြစ်ရာ အစားအစာ ပါဆယ်ပို့ဆောင်ခြင်းကဲ့သို့ သေးငယ်သော ကိစ္စရပ်တစ်ခုကို လိုက်လံ မဖြေရှင်းနိုင်ပေ။

ထို့ပြင် ၎င်းကို လွန်ခဲ့သောအချိန်ကတည်းက စုံလင်စွာ ဖြေရှင်းပြီးသားဖြစ်နေခဲ့ရာ ယခုမှသာ ရုတ်တရက်ကြီး ပြန်လည် ပေါ်ပေါက်လာသည်။

ထို့အပြင် အချက်အလက်များမှာ လွန်စွာအပျက်သဘောဆောင်လှရာ ‘ငါတို့ကျောင်းရဲ့ ပုံရိပ်က ဘယ်လိုမျိုး ဖြစ်သွားပြီလဲ၊ လူမိုက်တွေပဲ ဆက်ကြေးတောင်းတတ်ကြတာ၊ ဒါမျိုးက ဖြစ်သင့်လို့လား’

သူသည် ခုန်းဖန်ထံသို့ ချက်ချင်း ဆက်သွယ်ပြီး ရှင်းလင်း ချက်ပေးရန် တောင်းဆိုခဲ့သည်။

ခုန်းဖန်မှာမူ သဘာဝအတိုင်း ဆင်ခြေများကို ကြိုတင်ပြင် ဆင်ထားပြီးဖြစ်ရာ တာဝန်အားလုံးကို လုံးဝရှောင်လွှဲလိုက်သည်။

သူသည် မိမိအနေဖြင့် ငွေတစ်ပြားတစ်ချပ်မျှ လက်ခံရရှိခဲ့ခြင်းမရှိကြောင်းနှင့် မည်သည့်ငွေကြေးကိုမျှ တောင်းခံရန် ပြောကြားခဲ့ခြင်းမရှိကြောင်း ပြတ်ပြတ်သားသား ကြေညာခဲ့သည်။

အင်တာနက်ပေါ်တွင် ပျံ့နှံ့နေသော အရာများနှင့် ပတ်သက်၍မူ ၎င်းမှာ နားလည်မှုလွဲမှားခြင်း သို့မဟုတ် ကျောင်းလုံခြုံရေး ဝန်ထမ်းများ၏ အမှားအယွင်းသာ ဖြစ်ရမည်ဖြစ်ပြီး ကျောင်းအကြီးအကဲအနေဖြင့် ဆက်ကြေးတောင်းခံရန် ရည်ရွယ်ချက် လုံးဝမရှိကြောင်း သူက အခိုင်အမာ ပြောဆိုခဲ့သည်။

ခုန်းဖန်သည် အပြစ်များကို အောက်ခြေဝန်ထမ်းများထံသို့ တိုက်ရိုက် လွှဲချလိုက်ခြင်းဖြစ်ပြီး ၎င်းမှာ ၎င်းတို့၏ ပုံမှန်လုပ်ရိုးလုပ်စဉ်အတိုင်းပင်။ အခြေအနေများ ငြိမ်သက်သွားစေရန် ယာယီဝန်ထမ်းများကို အသုံးချ၍ အကာအကွယ်ယူခြင်းဖြစ်ပေသည်။

ကျောင်းအုပ်ကြီး ရှုကလည်း ၎င်းမှာ ကောင်းမွန်သော အကြံဉာဏ်တစ်ခုဟု ထင်မြင်ခဲ့သည်။

အနည်းဆုံးတော့ ဦးဆောင်မှုပိုင်းကို အပြစ်မှ ကင်းလွတ်အောင် ပြုလုပ်ရမည်ဖြစ်ပြီး သို့မဟုတ်ပါက ပုံရိပ်မှာ လွန်စွာ ဆိုးရွားသွားပေလိမ့်မည်။

သို့သော် ၎င်းတို့နှစ်ဦး ဖုန်းပြောဆို၍ပင် မပြီးဆုံးသေးမီမှာပင် ကျောင်းအုပ်ကြီးရှု၏ လက်ထောက်က သူ့ အနားသို့ အပြေးအလွှား ရောက်ရှိလာခဲ့သည်။

"ကျောင်းအုပ်ကြီး... ကျောင်းထဲမှာ ကိစ္စအကြီးကြီး ဖြစ်နေပြီ"

...

ကျောင်းဝန်းအတွင်း၌မူ ဒေါသတကြီးဖြစ်နေကြသော ကျောင်းသား ရာပေါင်းများစွာတို့သည် ကျောင်း၏လုံခြုံရေး ဂိတ်တဲကို ဝန်းရံထားကြသည်။

"ငါတို့ကို ဘာဖြစ်လို့ ပါဆယ်မှာစားခွင့် မပေးတာလဲ၊ ကျောင်းထမင်းစားဆောင်က ကျောင်းအုပ်ကြီးကိုတောင် ဆေးရုံပို့လိုက်ပြီလေ၊ အခုချိန်မှာ ဘယ်သူက အဲဒီမှာ စားရဲတော့မှာလဲ"

"ဟုတ်တယ်၊ ငါတို့ကို အစာမစားခိုင်းတော့ဘူးလား"

"ငါကတော့ ကျောင်းထမင်းစားဆောင်မှာ လုံးဝ မစားတော့ဘူး"

ကျောင်းသားအုပ်စုကြီးသည် လုံခြုံရေးဝန်ထမ်း အချို့ကို ဝန်းရံထားကြသည်။ ၎င်းတို့အရွယ် လူငယ်များသည် သဘာဝအတိုင်း စိတ်တိုလွယ်ကြသည်။

ပုံမှန်အချိန်တွင် ပါဆယ်မှာစားခြင်းကို ပိတ်ပင်ထားသည်မှာ တစ်ကြောင်း၊ ယခုအခါ ကျောင်း၌ ယခုကဲ့သို့ ပြင်းထန်သော ဖြစ်ရပ်မျိုး ဖြစ်ပွားခဲ့ပြီး ဖြစ်သော်လည်း အပြင်အစားအစာ စားသုံးခြင်းကိုပါ ပိတ်ပင်ထားဆဲ ဖြစ်နေခြင်းမှာ ၎င်းတို့အား အသက်အန္တရာယ်ပြုရန် ကြိုးပမ်းခြင်းဖြစ်နေသည်။

ကျောင်းအုပ်ကြီးနှင့် အခြားလူများသည် အထူးချက်ပြုတ်ထားသော အစားအစာများကို သုံးဆောင်ကြပြီး ယခုအခါတွင် အစာအဆိပ်သင့်မှုဖြင့် ဆေးရုံ ရောက်နေကြရပြီဖြစ်သည်။

ပုံမှန်အားဖြင့် သာမန်အစားအစာများကိုသာ စားသုံးကြရသည့် ကျောင်းသားများ၏ အခြေအနေမှာ တွေးလို့ပင် မရတော့ချေ။

အရှေ့ကျောင်းဝန်း ထမင်းစားဆောင် ဖြစ်ရပ်ကြောင့် ကျောင်းသားများသည် ထမင်းစားဆောင်အားလုံးအပေါ် ယုံကြည်မှု ပျောက်ဆုံးသွားခဲ့ကြရသည်။

အရှေ့ကျောင်းဝန်း ထမင်းစားဆောင်သာမက အခြားသော ထမင်းစားဆောင်များအားလုံးသည်လည်း လူသူကင်းမဲ့ ခြောက်ကပ်သွားခဲ့သည်။

ဤအချိန်တွင် ကျောင်းသားများသမဂ္ဂ၏ ယာယီ ဒုဥက္ကဋ္ဌဖြစ်သော ကျိုးထျန်းသည် သဘာဝအတိုင်း ကျောင်းသားများ၏ အခြေအနေကို နားလည်ပေးရန်နှင့် ၎င်းတို့၏လိုအပ်ချက်များကို ထည့်သွင်းစဉ်းစားပေးရန် လိုအပ်လာခဲ့သည်။

ကျောင်းသားများသမဂ္ဂ၏ နာမည်ကို အသုံးပြု၍ သူသည် ထမင်းစားဆောင်များကို မယုံကြည်ကြတော့သည့် ကျောင်း သားအားလုံးကို စုစည်းလိုက်ပြီး ကျောင်းပြင်ပရှိစားသောက် ဆိုင်များမှ အစားအစာများကို မှာယူခဲ့သည်။

သူ မျှော်လင့်ထားသည့်အတိုင်းပင် ပါဆယ်ပို့သမားကို တံခါးဝ၌ လုံခြုံရေးဝန်ထမ်းများက တားဆီးခဲ့ကြသဖြင့် နေ့လယ် စာကို စိတ်အားထက်သန်စွာ စောင့်ဆိုင်းနေကြသည့် ကျောင်း သားများသည် ပုန်ကန်လာခဲ့ကြတော့သည်။

လူတို့အတွက် အစားအစာသည် အရေးအကြီးဆုံး အရာဖြစ်ချေသည်။

ဆာလောင်နေသော ကျောင်းသားလူငယ် ရာပေါင်းများစွာကို ဒေါသထွက်အောင် ပြုလုပ်ခြင်း၏နောက်ဆက်တွဲရလဒ်မှာ ခန့်မှန်း၍ မရပေ။

ကျောင်းအုပ်ကြီးရှုနှင့် ခုန်းဖန်တို့ပင်လျှင် အရှေ့ဘက်မုခ်ဦး၌ ဖြစ်ပွားခဲ့သည့် အံ့အားသင့်ဖွယ် မြင်ကွင်းကို မျှော်လင့်မထားခဲ့ကြေပေ။

ကျောင်းလုံခြုံရေး ဝန်ထမ်းများနှင့် ထိုထိပ်တန်းကျောင်း သားများသည် လုံးထွေးသတ်ပုတ်ခဲ့ကြသဖြင့် ရာပေါင်းများစွာသော နေ့လယ်စာပါဆယ်ဘူးများမှာ နေရာအနှံ့သို့ လွင့်စင်သွားခဲ့ကြပြီး လုံခြုံရေးဂိတ်တဲနှင့် ကျောင်းတံခါးဝရှိ သံမဏိ ဆိုင်းဘုတ်ကြီးကိုပင် သွားရိုက်မိသည်။

ရှန်ဟိုင်း၏ ထိပ်တန်းတက္ကသိုလ်ကြီးဆီသို့ ဦးတည်ထားသည့် တစ်ချိန်က ပညာဂုဏ်သတင်းကြီးမားသော လမ်းမထက်တွင် ယခုအခါ အစားအစာ အကြွင်းအကျန်များဖြင့် ရှုပ်ပွနေသည်။

ထောင့်ချိုးတစ်ခုတွင် ပုန်းအောင်းနေသော ကျိုးထျန်းသည် ဤပြဇာတ်ကွက်ကို တိတ်ဆိတ်စွာ စောင့်ကြည့်နေခဲ့ပြီး ဖြစ်ရပ်တစ်ခုလုံးကို သူ့ဖုန်းဖြင့် ဗီဒီယိုရိုက်ကူးထားခဲ့သည်။

ကျောင်းသားများနှင့် သတ်ပုတ်ခဲ့ကြသည့် လုံခြုံရေးဝန်ထမ်းများမှာ အသစ်များ ဖြစ်ကြသည်။

အကြောင်းမူကား ယခင်က လုံခြုံရေးဝန်ထမ်းများကို ကျိုးထျန်းက "ထွက်ခွာသွားရန်" တောင်းဆိုခဲ့ပြီး ဖြစ်သော ကြောင့်ပင်။

သဘာဝအတိုင်း ၎င်းတို့ မထွက်ခွာမီအချိန်တွင် ကျိုးထျန်းသည် ၎င်းတို့အား အနီးနားရှိ စားသောက်ဆိုင်များထံမှ "ကာကွယ်ခကြေးငွေ" ကောက်ခံခြင်း အပါအဝင် ခုန်းဖန်နှင့် ပတ်သက်သည့် ကိစ္စရပ်အချို့ကို ဝန်ခံထွက်ဆိုခိုင်းထားခဲ့သည်။

ဤလုံခြုံရေးဝန်ထမ်းအသစ်များသည် အသက်အရွယ် အတော်အတန် ငယ်ရွယ်ကြပြီး စိတ်တိုလွယ်ကြသည်။

ကျောင်းသားများကို တွန်းထိုးပြီးနောက်တွင် ၎င်းတို့သည် အမှန်တကယ်ပင် စတင်ရိုက်နှက်ခဲ့ကြပြီး ကျောင်းသားများကို ထိုးနှက်ရန်အတွက် ၎င်းတို့၏ နံပါတ်တုတ်များကိုပင် ထုတ်ယူခဲ့ကြသည်။

ကျောင်းသားအချို့မှာ ခါးနှင့် ခြေထောက်များကို ရိုက်နှက်ခြင်း ခံခဲ့ရသဖြင့် ကြမ်းပြင်ပေါ်တွင် ဒူးထောက်လဲကျသွားခဲ့ကြရသည်။

မြင်ကွင်းမှာ ပိုမို၍ ရုန်းရင်းဆန်ခတ် ဖြစ်လာခဲ့သည်။

ကျိုးထျန်း မျက်မှောင်ကြုတ်လိုက်ပြီး ယခုအချိန်သည် ရပ်တန့်ရန် အချိန်တန်ပြီဟု ခံစားလိုက်ရသည်။

သူသည် မျက်နှာကို ရိုက်နှက်ခံလိုက်ရသဖြင့် သွေးချင်းချင်းနီလျက် ကွန်ကရစ်ကြမ်းပြင်ပေါ်တွင် လဲလျောင်းနေသည့် ကျောင်းသားလူငယ်တစ်ဦးကို မြင်တွေ့လိုက်ရသည်။

အကယ်၍ သူ ယခုအချိန်တွင် ဝင်ရောက်မစွက်ဖက်ပါက ဆိုးဆိုးရွားရွား ဖြစ်ပွားသွားနိုင်ချေရှိသည်။

"အားလုံး လူစုခွဲကြစမ်း၊ လူတစ်ယောက် သတိလစ်သွားပြီ"

သူသည် အော်ဟစ်လိုက်ရင်း ရှေ့သို့ ပြေးထွက်သွားခဲ့ကာ လူအုပ်ကြီးအတွင်း၌ ရှိနေကြသော ချိုက်ကျန်းသုန်နှင့် အခြားသော ကျောင်းသားများသမဂ္ဂ အဖွဲ့ဝင်အချို့ကို ၎င်းတို့အား လူစုခွဲရန်၊ ထိုကျောင်းသားကို ပွေ့ချီ၍ ဆေးပေးခန်းသို့ အပြေးအလွှား သွားရောက်ရန် ညွှန်ကြားလိုက်သည်။

ထို့နောက် သူသည် ခုနကတင် ရပ်တန့်သွားခဲ့သော လုံခြုံရေးဝန်ထမ်း၏ရှေ့တွင် မတ်တတ်ရပ်လိုက်ပြီး ကျောင်းသားအားလုံးကို လှည့်၍ပြောလိုက်သည်။

"ကျောင်းက ငါတို့ကို အစာစားခွင့်မပေးဘူး၊ တရားမျှတမှုကော ရှိရဲ့လား"

"မရှိဘူး"

"လုံခြုံရေးဝန်ထမ်းတွေက ကျောင်းသားတွေကို ရိုက်နှက်တယ် ဟုတ်လား၊ တရားမျှတမှုကော ရှိရဲ့လား"

"မရှိဘူး"

"ငါ ကျောင်းသားရေးရာဌာနကို သွားပြီးတော့ ဒါကိုတိုင် ကြားမယ်၊ ငါနဲ့အတူ ဘယ်သူ လိုက်ချင်လဲ"

"သွားမယ်"

"အတူတူ သွားကြမယ်"

"သူတို့က ငါတို့ကို ရိုက်ဝံ့တယ်ပေါ့၊ ငါ တစ်ခါမှ အဲ့လို အရိုက်မခံဖူးဘူး"

ကျောင်းသား ရာပေါင်းများစွာတို့သည် ကျောင်းသားရေးရာ အဆောက်အအုံဆီသို့ ချီတက်ခဲ့ကြပြီး အများစုမှာ အဝတ်အ စားများ စုတ်ပြဲလျက် ကြမ်းပြင်ပေါ်တွင် လှိမ့်ခဲ့ကြသဖြင့် ဖုန်မှုန့်များ ပေကျံနေခဲ့ကြသည်။

ယခင်က ကြည့်ကောင်းနေခဲ့ကြသည့် ကျောင်းသားများသည် ယခုအခါတွင်မူ ဖုန်တောထဲတွင် နစ်မွန်းနေခဲ့ကြရပြီး ၎င်းတို့၏မျက်နှာအမူအရာများမှာလည်း ဒေါသများဖြင့် ပြည့်နှက်နေသည်။

ရှေ့ဆုံးမှ ဦးဆောင်လမ်းပြနေခဲ့သော ကျိုးထျန်းသည် ဖြည်းညှင်းစွာ နောက်ဆုတ်လိုက်ပြီး လူအုပ်ကြီးအတွင်းသို့ ဝင်ရောက်ပျောက်ကွယ်သွားသည်။