အခန်း ၃၉၅

အခန်း (၃၉၅) လက်ထပ်မဟာမိတ်ပြုခြင်း

နှင်းနတ်ဘုရားမြို့၏ ဗဟိုချက်တွင် သဘာဝတောင်ကုန်းတစ်ခုရှိ၏။

ကောင်းဖန်နိုင်ငံ၏ ဘိုးဘေးများသည် တောင်ကုန်းကို စတုရန်းပုံ ကျောက်တံတိုင်းဖြင့် ကာရံခဲ့ပြီး တောင်ပေါ်တွင် ခမ်းနားထည်ဝါသော အဆောက်အအုံအမျိုးမျိုးကို တည်ဆောက်ခဲ့ကာ ၎င်းသည် နန်းတော် ဖြစ်လာခဲ့သည်။

တန်းနျီချင်းရွှယ်သည် နန်းတော်သို့ ပြန်လည်ပျံသန်းလာပြီး နန်းတွင်းစာကြည့်ဆောင်သို့ တိုက်ရိုက် သွားရောက်ခဲ့၏။

ကောင်းဖန်နိုင်ငံ၏ ဧကရာဇ် တန်းနျီဟုန်ဖေးသည် အတွင်း၌ စာရွက်စာတမ်းများကို စစ်ဆေးနေသည်။

မကြာသေးမီက ရှေ့တန်းမှ ကောင်းဖန်စစ်တပ် ပြန်လည်ပို့ဆောင်လာသော စာရွက်စာတမ်းများသည် သတင်းဆိုးများချည်းသာ ဖြစ်နေ၏။

တန်းနျီဟုန်ဖေး၏ မျက်နှာသွင်ပြင်မှာ အလွန်ဆိုးရွားနေပြီး သူ၏ မျက်ခုံးထက်တွင် မှိုင်းညို့သော အငွေ့အသက်များ ဖုံးလွှမ်းနေသည်။

"တပ်မှူး ကျောက်ကဲစန်း... အဲ့ဒီခွေးကောင်က ငါ့ရဲ့ ယုံကြည်မှုကို သစ္စာဖောက်ပြီး စစ်ပွဲကို ရှုပ်ထွေးသွားအောင် လုပ်ပစ်ခဲ့တယ်..."

"ဒါက ကောင်းဖန်နိုင်ငံရဲ့ အခြေခံအုတ်မြစ်ကို ဖျက်ဆီးပစ်တော့မှာပဲ..."

တန်းနျီဟုန်ဖေးက ရုတ်တရက် စားပွဲကို လက်ဖြင့် ရိုက်ချလိုက်ပြီး ဒေါသတကြီး အော်ဟစ်လိုက်၏။

ဘေးတွင် ရပ်နေသူမှာ ဖြူစင်သော မုတ်ဆိတ်မွေးများနှင့် မိန်းမစိုးကြီးတစ်ဦးဖြစ်ပြီး သူက မျက်ခွံများ တွဲကျနေကာ မျက်လုံးကြားတွင် အလွန်သေးငယ်သော အဟလေးတစ်ခုသာ ချန်ထားလျက် တည်ငြိမ်စွာ ရပ်နေသည်။

မိန်းမစိုးကြီးသည် မျက်လုံးများကို ဖွင့်မထားသကဲ့သို့ ထင်ရသော်လည်း သူသည် ထိုစာအုပ်ရှိ အကြောင်းအရာအားလုံးကို မြင်တွေ့ထားပြီး ဖြစ်၏။

ယခုလေးတင် စာရွက်စာတမ်းကို တပ်မှူး ကျောက်ကဲစန်းက ပေးပို့လိုက်ခြင်းဖြစ်ပြီး ကောင်းဖန်စစ်တပ်၏ ထောက်ပံ့ရေးပစ္စည်းများ လုယက်ခံရကြောင်း၊ မဟာလီစစ်တပ်က ရုတ်တရက် ပျောက်ကွယ်သွားကြောင်းနှင့် ကောင်းဖန်စစ်တပ်က နိုင်ငံတွင်းသို့ ဆုတ်ခွာခဲ့ရကြောင်း ပါရှိသည်။

တစ်နည်းအားဖြင့် ကောင်းဖန်နိုင်ငံသည် ဤနိုင်ငံစစ်ပွဲတွင် ရှုံးနိမ့်သွားခဲ့သည်။

"အရှင်မင်းမြတ်... ကျွန်တော်တို့ ကောင်းဖန်နိုင်ငံက ထုံထျန်းကုန်းပြင်မြင့်ကို သီးသန့် ပိုင်ဆိုင်ထားပါတယ်... ဒီနိုင်ငံစစ်ပွဲ ရှုံးနိမ့်မှုက နိုင်ငံရဲ့ အခြေခံအုတ်မြစ်ကို မထိခိုက်စေပါဘူး... နှစ်အနည်းငယ်အတွင်းမှာပဲ ကျွန်တော်တို့ ကောင်းဖန်နိုင်ငံက ယခင် ခမ်းနားမှုဆီ ပြန်လည်ရောက်ရှိနိုင်မှာပါ..."

မိန်းမစိုးကြီးက ဂရုမစိုက်ဟန်ဖြင့် ပြောလိုက်၏။

ဤသည်ကို ကြားသောအခါ တန်းနျီဟုန်ဖေးထံတွင် အသက်ဝင်နေသည့် အရိပ်အယောင် လုံးဝ မပြသတော့ပေ။

အဘယ်ကြောင့်ဆိုသော် မိန်းမစိုးကြီးသည် ကောင်းဖန်နိုင်ငံ၏ အဋ္ဌမအဆင့် ရေခဲစစ်သည် ငါးဦးအနက်မှ တစ်ဦးဖြစ်သောကြောင့် ဖြစ်၏။ သူသည် နန်းတော်တွင် အမြဲတမ်း တာဝန်ထမ်းဆောင်ခဲ့ပြီး တန်းနျီဟုန်ဖေး၏ အယုံကြည်ရဆုံးလူ ဖြစ်သည်။

"ဟူး... မဟာချင်မင်းဆက်က ယွင်လန်တိုက်ကြီးရှိ အသီးနှံအဖြစ်ထွန်းဆုံး မြေနေရာကို သိမ်းပိုက်ထားတယ်... အငြင်းပွားဖွယ်ရာ မြေနေရာလို့ ခေါ်ဆိုဖို့ တကယ့်ကို ထိုက်တန်ပါတယ်... မဟာချင်မင်းဆက်ရဲ့ အစောပိုင်းကာလတွေမှာ ကျွန်တော်တို့ ရှီးလန်စီရင်စုကို သိမ်းပိုက်ဖို့ ပျက်ကွက်ခဲ့တယ်... အနာဂတ်မှာ နောက်ထပ်အခွင့်အရေးရဖို့ ခက်ခဲလိမ့်မယ်..."

တန်းနျီဟုန်ဖေးက သက်ပြင်းချကာ မလိုလားစွာဖြင့် ပြောလိုက်၏။

"ပြောရခက်ပါတယ်... မဟာချင်မင်းဆက်က ခုမှ စတင်တည်ထောင်ခါစဖြစ်ပြီး အင်အားစုများစွာက ထိုးဖောက်ဝင်ရောက်နေပါတယ်... သေချာ မကိုင်တွယ်နိုင်ဘူးဆိုရင် မဟာချင်မင်းဆက်လည်း ကမောက်ကမဖြစ်သွားမှာပါ... ကျွန်တော်တို့ ကောင်းဖန်နိုင်ငံမှာ အခွင့်အရေး ရှိနေပါသေးတယ်..."

မိန်းမစိုးကြီးက တည်ငြိမ်စွာ ပြောလိုက်၏။

တန်းနျီဟုန်ဖေးက ပြန်မဖြေဘဲ ထိုနေရာတွင် နက်ရှိုင်းစွာ တွေးတောလျက် ထိုင်နေသည်။

ထိုစဉ် တန်းနျီချင်းရွှယ်၏ ပုံရိပ်က နန်းတွင်းစာကြည့်ဆောင်အတွင်းသို့ ပျံသန်းဝင်ရောက်လာ၏။

"ခမည်းတော်..."

တန်းနျီချင်းရွှယ် ဝင်လာသည်နှင့် တစ်ပြိုင်နက် အော်ခေါ်လိုက်သည်။

တန်းနျီဟုန်ဖေးက သူ၏ ချစ်လှစွာသော သမီးတော် ရောက်လာသည်ကို မြင်သောအခါ သူ၏ မျက်နှာအမူအရာက ချက်ချင်း ပြေလျော့သွားပြီး တန်းနျီချင်းရွှယ်ကို ကြည့်ကာ ပြုံးလိုက်၏။

"ခမည်းတော်... မဟာချင်မင်းဆက်က ကျင့်ကြံသူတစ်ယောက် သမီးတော်ကို ပြန်ပေးဆွဲသွားခဲ့တယ်... သူက ကျွန်တော်တို့ရဲ့ ကောင်းဖန်စစ်တပ်ဟာ မဟာချင်စစ်တပ်ရဲ့ အမြစ်ပြတ်ချေမှုန်းတာကို ခံလိုက်ရပြီလို့ သမီးတော်ကို ပြောခဲ့တယ်..."

"ဒါ့အပြင် မဟာချင်မင်းဆက်က ကျင့်ကြံသူများစွာဟာ ကောင်းဖန်နိုင်ငံထဲကို ဝင်ရောက်လာပြီး မြို့အသီးသီးမှာ ထောက်ပံ့ရေးပစ္စည်းတွေကို လုယက်နေကြတယ်..."

တန်းနျီချင်းရွှယ်က သူမ လာရောက်ရသည့် ရည်ရွယ်ချက်ကို ချက်ချင်း ရှင်းပြလိုက်သည်။

ဝုန်း…

တန်းနျီဟုန်ဖေးက သူ၏ ညာလက်ဖြင့် စားပွဲကို ရိုက်ချလိုက်ကာ မတ်တတ်ရပ်၍ တန်းနျီချင်းရွှယ်ကို ဒေါသတကြီး စိုက်ကြည့်လိုက်၏။

ရှင်းလင်းစွာပင် တန်းနျီဟုန်ဖေးသည် ဤသတင်းအချက်အလက်ကို မယုံကြည်ပေ။

"မင်းသာ ငါ့ရဲ့ အချစ်ရဆုံး သမီးတော် မဟုတ်ခဲ့ရင် ခုနက စကားတွေကြောင့် မင်းကို ငါ သတ်ပစ်ပြီးပြီ..."

တန်းနျီဟုန်ဖေးက အနည်းငယ် ဒေါသထွက်စွာဖြင့် ပြောလိုက်သည်။

“သူမ လိမ်နေတာမဟုတ်ဘူး”

ရုတ်တရက် ဟင်းလင်းပြင်နယ်ပယ်မှ ပုံရိပ်တစ်ခု ထွက်ပေါ်လာ၏။ ၎င်းမှာ အခြားသူမဟုတ်ဘဲ အကြံပေးအမတ်ကြီး တာ့ဝါ ပင်ဖြစ်သည်။

ဤအခိုက်အတန့်တွင် အကြံပေးအမတ်ကြီး တာ့ဝါသည် ယခင်ကကဲ့သို့ ခန့်ညားထည်ဝါခြင်း မရှိတော့ပေ။ သူသည် ပြင်းထန်သော ဖျားနာမှုမှ ယခုလေးတင် ပြန်လည်သက်သာလာသကဲ့သို့ ပင်ပန်းနွမ်းနယ်နေပုံရသည်။

ဒုတိယခန်းမသခင် ရွှမ်ယွမ်ဖေးဟယ်က အကြံပေးအမတ်ကြီး တာ့ဝါထံမှ ကမ္ဘာ့အမြုတေ အနည်းငယ်ကို ဖြတ်တောက်ယူငင်သွားခဲ့ရာ သူ့ကို ပြင်းထန်စွာ ဒဏ်ရာရစေခဲ့၏။

အကြံပေးအမတ်ကြီး တာ့ဝါသည် နဝမအဆင့်တွင် ရှိနေဆဲဖြစ်သော်လည်း သူသည် နဝမအဆင့်နယ်ပယ်သို့ ယခုလေးတင် ချိုးဖြတ်ဝင်ရောက်လာသော ကျင့်ကြံသူများထက် အနည်းငယ်မျှသာ ပို၍ အားကောင်းတော့သည်။

အကယ်၍ နဝမအဆင့်ရှိသူတစ်ဦးကသာ ဤအခိုက်အတန့်တွင် ခိုးကြောင်ခိုးဝှက် တိုက်ခိုက်လာပါက အကြံပေးအမတ်ကြီး တာ့ဝါအနေဖြင့် နောက်ထပ် ကမ္ဘာ့အမြုတေ အနည်းငယ်ကို ဖြတ်တောက်ရဖွယ်ရှိပြီး ၎င်းက သူ့ကို အဋ္ဌမအဆင့်နယ်ပယ်သို့ ပြန်လည်ကျဆင်းသွားစေနိုင်၏။

"ဘာ..."

"စစ်သည် နှစ်သိန်းလုံး သေကုန်ပြီလား..."

အကြံပေးအမတ်ကြီး၏ စကားကို ကြားသောအခါ တန်းနျီဟုန်ဖေးက သံသယကင်းစွာ ယုံကြည်သွားပြီး အလွန်အမင်း တုန်လှုပ်စွာဖြင့် ချက်ချင်း မတ်တတ်ရပ်လိုက်သည်။

၎င်းမှာ ကောင်းဖန်နိုင်ငံရှိ အထူးချွန်ဆုံး စစ်တပ်ဖြစ်ပြီး သူတို့အားလုံး သေဆုံးသွားခဲ့ပြီ ဖြစ်၏။

ထို့အပြင် မဟာချင်မင်းဆက်မှ ကျင့်ကြံသူများသည် ကောင်းဖန်နိုင်ငံတွင်းသို့ အလုံးအရင်းဖြင့် ဝင်ရောက်လာကာ မြို့အသီးသီးမှ လူများကို သတ်ဖြတ်ပြီး အရေးကြီးသော အရင်းအမြစ်အမျိုးမျိုးကို သိမ်းပိုက်နေကြရာ ကောင်းဖန်နိုင်ငံကို ကြီးမားသော ဘေးအန္တရာယ်ကြီးထဲသို့ ကျဆင်းသွားစေခဲ့သည်။

"အကြံပေးအမတ်ကြီး... ခင်ဗျားရဲ့ စွမ်းအားတွေက..."

ဤအခိုက်အတန့်တွင် မိန်းမစိုးကြီးက အကြံပေးအမတ်ကြီး တာ့ဝါ၏ ချီစွမ်းအင် အပြောင်းအလဲကို အာရုံခံမိသွားပြီး စိုးရိမ်တကြီး မေးမြန်းလိုက်၏။

"ကိစ္စမရှိပါဘူး... ငါ့ရဲ့ စွမ်းအားက နဝမအဆင့်မှာ ရှိနေဆဲပါ..."

"အခု ပြဿနာက မဟာချင်မင်းဆက်ရဲ့ ဒေါသကို ဘယ်လို ချေဖျက်ရမလဲ၊ မဟာချင်စစ်တပ်က ကောင်းဖန်နိုင်ငံထဲ ဝင်ရောက်လာတာကို ဘယ်လို တားဆီးရမလဲနဲ့ ကောင်းဖန်နိုင်ငံရဲ့ အခြေခံအုတ်မြစ် ဖျက်ဆီးခံရမယ့်အရေးကနေ ဘယ်လို ကာကွယ်ရမလဲဆိုတာပဲ..."

အကြံပေးအမတ်ကြီး တာ့ဝါက တည်ငြိမ်စွာ ပြောလိုက်သည်။

ချက်ချင်းပင် တန်းနျီဟုန်ဖေးနှင့် မိန်းမစိုးကြီးတို့မှာ ပြဿနာ ကြီးမားနေကြောင်း နားလည်သွားကာ တိတ်ဆိတ်သွားကြ၏။

မဟာချင်မင်းဆက်မှ ကျင့်ကြံသူများသည် ယခုအခါ ကောင်းဖန်နိုင်ငံ နယ်မြေအတွင်းရှိ အရင်းအမြစ်များကို ရမ်းကားစွာ လုယက်နေကြသည်။ အကယ်၍ မဟာချင်စစ်တပ်သာ ကောင်းဖန်နိုင်ငံတွင်းသို့ ဝင်ရောက်လာပါက သူတို့သည် ၎င်း၏ နယ်မြေကို သိမ်းပိုက်ကြမည်ဖြစ်ပြီး ၎င်းသည် တိုင်းပြည်၏ အခြေခံအုတ်မြစ်ကို အမှန်တကယ် ခြိမ်းခြောက်လာပေလိမ့်မည်။

"တစ်ခုတည်းသော ရွေးချယ်စရာက မဟာချင်မင်းဆက်နဲ့ ငြိမ်းချမ်းရေးရယူဖို့ပဲ..."

"နယ်မြေကို မစွန့်လွှတ်ရသရွေ့တော့ လျော်ကြေးအဖြစ် ငွေကြေးပမာဏ အမြောက်အမြားကို ငါတို့ ပေးချေနိုင်ပါတယ်..."

ရုတ်တရက် တန်းနျီဟုန်ဖေးက တည်ငြိမ်စွာ ပြောလိုက်၏။

ဤအချိန်တွင် ကောင်းဖန်နိုင်ငံ၏ အခြေခံအုတ်မြစ် တုန်လှုပ်မသွားစေရန်အတွက် တန်းနျီဟုန်ဖေး၌ အလျှော့ပေးလိုက်လျောရန်မှတစ်ပါး အခြားရွေးချယ်စရာ မရှိတော့ပေ။

"မဟာချင်ဧကရာဇ်နဲ့ ငြိမ်းချမ်းရေး ဆွေးနွေးဖို့အတွက် မဟာချင်မင်းဆက်ဆီ ကျွန်တော်မျိုးကိုယ်တိုင် သွားရောက်လိုပါတယ်..."

မိန်းမစိုးကြီးကလည်း တုံ့ဆိုင်းမှုမရှိဘဲ ပြောဆိုလိုက်သည်။

အချိန်က မည်သူ့ကိုမျှ မစောင့်ပေ။

မဟာချင်စစ်တပ်၏ တိုက်ခိုက်မှုကို ရပ်တန့်ရန်အတွက် အဋ္ဌမအဆင့် ရေခဲစစ်သည်ဖြစ်သော မိန်းမစိုးကြီးသည် အမြင့်ဆုံးအမြန်နှုန်းဖြင့် ခရီးသွားရတော့မည်ဖြစ်၏။ တန်းနျီဟုန်ဖေး၏ ယုံကြည်ရသူတစ်ဦးအနေဖြင့် သူသည် ကောင်းဖန်နိုင်ငံ၏ ရိုးသားမှုကို ပြသရန်နှင့် ငြိမ်းချမ်းရေး စည်းကမ်းချက်အမျိုးမျိုးကို ချက်ချင်း အတည်ပြုနိုင်ရန်အတွက် ငြိမ်းချမ်းရေး ဆွေးနွေးရမည် ဖြစ်သည်။

ဤအခိုက်အတန့်တွင် အကြံပေးအမတ်ကြီး တာ့ဝါက သူ၏ဘေးရှိ တန်းနျီချင်းရွှယ်ကို တစ်ချက် ကြည့်လိုက်သည်။

"မင်းသမီးကိုလည်း မဟာချင်မင်းဆက်ဆီ ခေါ်သွားကြတာပေါ့..."

"မဟာချင်မင်းဆက်ရဲ့ ဧကရာဇ်မှာ မင်းသားအချို့ ရှိတယ်လို့ ကြားရတယ်... အရှင်မင်းမြတ်... မင်းသမီးတွေကို သူတို့နဲ့ လက်ထပ်ဖို့ ပေးပို့ခြင်းအားဖြင့် ကျွန်တော်တို့ ကောင်းဖန်နိုင်ငံရဲ့ အကြီးမားဆုံးသော ရိုးသားမှုကို ပြသနိုင်ပါတယ်..."

အကြံပေးအမတ်ကြီး တာ့ဝါက ဖြည်းညင်းစွာ ပြောလိုက်ပြီး သူ၏ မျက်နှာအမူအရာမှာ ငြင်းဆန်ခွင့် မပေးသည့်ပုံ ပေါက်နေ၏။

"ရှင်..."

တန်းနျီချင်းရွှယ်က နှင်းနတ်ဘုရားနန်းတော်၏ သခင်ဖြစ်သလို သူမ၏ ဆရာလည်းဖြစ်သော အကြံပေးအမတ်ကြီး တာ့ဝါကို အံ့သြတကြီး စိုက်ကြည့်နေသည်။

သူမကို အမှန်တကယ်ပင် ထိုကဲ့သို့ ရောင်းစားလိုက်ခြင်းဖြစ်၏။

သို့သော် သေချာစွာ ပြန်လည်စဉ်းစားကြည့်ပါက လက်ထပ်မဟာမိတ်ပြုခြင်းသည် အမှန်တကယ်ပင် အကြီးမားဆုံးသော ရိုးသားမှုကို ပြသခြင်း ဖြစ်ပေသည်။

သို့ဖြစ်၍ ကောင်းဖန်နိုင်ငံသည် အမှန်တကယ်တွင် မဟာချင်မင်းဆက်ထက် နိမ့်ကျနေပြီး တန်းနျီချင်းရွှယ်မှာ ဓားစာခံတစ်ဦးဖြစ်လာခဲ့ကာ ၎င်းက မဟာချင်မင်းဆက်ကို စိတ်အေးသွားစေမည် ဖြစ်၏။

"အရမ်းကောင်းမွန်ပါတယ်..."

မိန်းမစိုးကြီးက ခေါင်းညိတ်လိုက်သည်။

သူ၏ ချစ်လှစွာသော သမီးတော်နှင့် သူမ၏ ရင်သပ်ရှုမောဖွယ် အလှတရားကိုကြည့်ရင်း တန်းနျီဟုန်ဖေး၏ ရင်ထဲတွင် မလိုလားမှုများ ပြည့်နှက်သွားသော်လည်း သူ၏ တိုင်းပြည်အုပ်ချုပ်ရေးနှင့် မိသားစု ဆက်လက်တည်တံ့ရေးအတွက် သူမကို မလိုလားစွာဖြင့် ခွဲခွာရုံမှတစ်ပါး အခြားရွေးချယ်စရာ မရှိတော့ပေ။

"သမီးတော်... ခမည်းတော် မင်းအပေါ် တာဝန်မကျေခဲ့ဘူး..."

တန်းနျီဟုန်ဖေးကလည်း ဤအခြေအနေကို သဘောတူလိုက်၏။

ချက်ချင်းပင် တန်းနျီချင်းရွှယ်၏ မျက်လုံးများတွင် မျက်ရည်များ ပြည့်လျှံလာပြီး သူမ၏ ပါးပြင်ပေါ်သို့ စီးကျလာသည်။

သူမ၏ မင်းသမီးဟူသော အဆင့်အတန်းနှင့် နှင်းနတ်ဘုရားနန်းတော်၏ သူတော်စင်မ ဟူသော ဂုဏ်ပုဒ်များသည် စည်းကမ်းချက်တစ်ခုမျှသာ ဖြစ်နေကြောင်း ပေါ်လွင်သွား၏။

သူမက အလွန်အမင်း မလိုလားပေ။

သို့သော် ကံမကောင်းစွာဖြင့်ပင်။

ကောင်းဖန်နိုင်ငံအတွက် သူမကိုယ်သူမ စတေးရန် ဆန္ဒရှိနေသည်။

တစ်ချိန်တည်းမှာပင် ကျောက်လင်၏ အပြုံးက တန်းနျီချင်းရွှယ်၏ စိတ်ထဲတွင် ပေါ်လာပြီး ထူးဆန်းသော အတွေးတစ်ခုက သူမ၏ ရင်ထဲတွင် ဖြစ်တည်လာ၏။

*ဟိုလူ... သူ ငါ့ကို ပြန်ပေးဆွဲသွားမှာ မဟုတ်ဘူးမလား…*

"အရှင်မင်းမြတ်... ကျေးဇူးပြုပြီး ယုံကြည်လွှဲအပ်စာတစ်စောင် ရေးပေးပါ... ကျွန်တော် ချက်ချင်း ထွက်ခွာပါ့မယ်..."

ထို့နောက် မိန်းမစိုးကြီးက တိုက်တွန်းလိုက်သည်။