အခန်း ၁၉၅၄

အပိုင်း ( 1954 ) အချိန်၏စွမ်းအား။

"အဲဒါက ငါ့ဥစ္စာ"

"ငါ့ဟာပဲကွ"

ချက်ချင်းပင်၊ လူအချို့က အချိန်နတ်ဘုရားတောင်ဆီသို့ ပြေးသွားကြသည်။

သို့သော်... ရှေ့သို့ ပြေးသွားကြသော လူများက ရုတ်တရက် နာကျင်စွာ အော်ဟစ်လိုက်ကြသည်။

ထိတ်လန့်စရာ မြင်ကွင်းတစ်ခု ပေါ်လာသည်။ အရှေ့ဘက်မှ လူအနည်းငယ်က လေထဲတွင် ရပ်သွားကာ ထိတ်လန့်တကြား အော်ဟစ်လိုက်ကြ၏။ သူတို့၏ အိုမင်းသော ခန္ဓာကိုယ်များက ပို၍ပင် ရှုံ့သွားကြသည်။ သူတို့၏ အနှစ်သာရက တခဏချင်း ဝါးမျိုခံရသလို ပိန်ရှုံ့လာတော့သည်။

ထို့နောက်တွင် သူတို့၏ဆံပင်များက ကျွတ်ကျလာခဲ့သည်။ သူတို့၏ အဝတ်အစားများ ဆွေးမြေ့လာပြီး သူတို့ခန္ဓာကိုယ်များကလည်း အရိုးကျလာ၏။ ထို့နောက်မှာတော့ သူတို့၏ ခန္ဓာကိုယ်တွင် အငွေ့အသက်များကို မခံစားရတော့ပေ။

နောက်ဘက်မှ လူအချို့က အမူအရာပြောင်းလဲသွားကာ ကမန်းကတန်း နောက်ပြန်ဆုတ်သွားကြသည်။

သို့သော်လည်း ဆုတ်ခွာသွားပြီးသည့်တိုင် သူတို့တစ်ဦးစီက အသက်ကြီးလာပုံရသည်။

အသက်ရှူချိန် အနည်းငယ်မျှဖြင့် နှစ်တစ်သောင်းခန့် သက်တမ်းကုန်ဆုံးသွားပုံရပေသည်။

ရှေ့ဆုံးမှ ပြေးသွားသူများကို ကြည့်မိသောအခါ အရိုးစုများ ဖြစ်သွားကြတာကို တွေ့လိုက်ရသည်။

"ဘာတွေဖြစ်နေတာလဲ၊ ငါ့ရဲ့သက်တမ်းက ကုန်တော့မယ်"

ဆံပင်များ ကျိုးတို့ကျဲတဲဖြစ်သွားသော အဘိုးအိုတစ်ယောက်က အော်လိုက်သည်။

"ကျုပ်စကားမပြီးသေးဘူးလေ၊ ခင်ဗျားတို့က လောကြီးလွန်းတာကိုး။ အချိန်နတ်ဘုရားတောင်မှာ အချိန်ရဲ့ စွမ်းအားတွေနဲ့ ပြည့်နေတယ်။ သက်ရှိတွေက တောင်ပေါ်တက်တဲ့အခါ အချိန်စီးဆင်းမှု မြန်ဆန်တာကြောင့် သက်တမ်းကုန်ဆုံးတာ မြန်လိမ့်မယ်"

"အချိန်နတ်ဘုရားတောင်မှာ အချိန်စီးဆင်းမှုက အရမ်းမြန်တယ်"

သူတော်စင်သခင်က အေးအေးဆေးဆေး ပြောလိုက်သည်။

"အချိန်စီးဆင်းမှုက တကယ်ကို မြန်လွန်းတယ်"

ရှေ့သို့ ပြေးမိသူများက အော်ဟစ်လိုက်ကြသည်။ ဤတစ်ကြိမ်မှာ သူတို့က ဆုံးရှုံးမှုကြီးကို ကြုံတွေ့ခဲ့ရသည်။

ရှေ့ကိုမတိုးမိဘဲ နောက်ကျခဲ့သူများကတော့ ဝမ်းသာသွားကြလေသည်။ ကံကောင်းထောက်မစွာ၊ သူတို့က ခြေတစ်လှမ်း နောက်ကျနေခဲ့သည်။ မဟုတ်လျှင်၊ အကျိုးဆက်များက ပြင်းထန်လိမ့်မည်။

လုမင်၊ ပေါင်ပေါင်နှင့် အခြားလူငယ်အချို့ကလည်း ယခုလေးတင် ရှေ့ကိုမတိုးခဲ့ကြပါ။

သူတို့သည် ငယ်ရွယ်သေး၏။ သက်တမ်းတိုးမြှင့်ခြင်းကဲ့သို့ အရာများက သူတို့အတွက် ဆွဲဆောင်မှု မရှိပါ။

"တွိ... တွိ..."

လုမင်၏ ပခုံးပေါ်တွင်၊ ပေါင်ပေါင်က အချိန်နတ်ဘုရားတောင်ပေါ်ရှိ သစ်ပင်လေးကို စိုက်ကြည့်ရင်း အော်လိုက်ကြသည်။

"ပေါင်ပေါင်၊ ဒီသစ်ပင်လေးက မင်းအတွက် တော်တော်အသုံးဝင်တာလား"

လုမင်က ပေါင်ပေါင်ကို အသံပို့လွှတ်ပြီး ပြောလိုက်သည်။

"ဟုတ်တယ်၊ တွိ... တွိ"

ပေါင်ပေါင်က အကြိမ်ကြိမ် ခေါင်းညိတ်လိုက်၏။

လုမင် နားလည်သွားသည်။ ပေါင်ပေါင်က အချိန်ဟင်းလင်းပြင်ဝိညာဉ်ကြွက် ဖြစ်သည်။ ထိုသစ်ပင်လေးက အချိန်၏စွမ်းအား ရှိ၏။ ၎င်းက ပေါင်ပေါင်အတွက် အလွန် အသုံးဝင်တာ အံ့ဩစရာမရှိပေ။

သို့ရာတွင်၊ သူက မည်သို့ရယူရမည်နည်း။

လုမင်က တိတ်တဆိတ် တွေးလိုက်သည်။

"ကျုပ်တို့က အချိန်နတ်ဘုရားတောင်ကို မတက်နိုင်ဘူးလား"

တစ်ယောက်ယောက်က မနေနိုင်ဘဲ မေးလိုက်သည်။

မတက်နိုင်လျှင် ဤနေရာကို လာရခြင်းက ဘာများထူးခြားဦးမည်နည်း။ အခြား အပျက်အယွင်းများကို အမြန်ဆုံး သွားရောက်လေ့လာခြင်းက ပိုကောင်းသည်။

"ကျုပ်တို့က လုံးဝ မတက်နိုင်တာတော့ မဟုတ်ပါဘူး။ ကျုပ်နောက်ကို လိုက်ခဲ့"

သူတော်စင်သခင်က ပြောဆိုပြီးနောက် အချိန်နတ်ဘုရားတောင်၏ အခြားတစ်ဖက်သို့ ပျံသန်းသွားသည်။

မကြာမီ၊ သူတော်စင်သခင်က ရပ်သွား၏။

"ဒီမှာ တောင်ကြားလမ်းတစ်ခု ရှိတယ်။ သုံးလကြာတိုင်းမှာ ဒီတောင်ကြားရဲ့ စွမ်းအားက အနိမ့်ဆုံးကို ကျသွားလိမ့်မယ်။ အဲဒီအချိန်မှာ ခင်ဗျားတို့က ဒီတောင်ကြားကို ဖြတ်သွားနိုင်တယ်"

"ဒီတောင်ကြားရဲ့အဆုံးမှာ ယဇ်ပလ္လင်ရှိတယ်။ အဲဒီပလ္လင်ကို ဖျက်ဆီးလိုက်သရွေ့ အချိန်ရဲ့ စွမ်းအားက အဆများစွာ အားနည်းသွားလိမ့်မယ်။ အဲဒီအချိန်မှာ တောင်ထိပ်ပေါ် ခြေချပြီး အချိန်နတ်ဘုရားသစ်ပင်ကို ရယူနိုင်တယ်"

"ဒါဆိုရင် ခင်ဗျားတို့ အချိန်နတ်ဘုရားကျွန်းကလူတွေက ဘာဖြစ်လို့ မတက်ကြတာလဲ"

တစ်ယောက်က သံသယဖြင့် သူတော်စင်သခင်ကို ကြည့်လိုက်သည်။

တခြားသူများကလည်း အလားတူပင်။ တချို့က မျက်လုံးထဲမှာ အေးစက်သော အရိပ်အယောင်များပင် ပေါ်လာသည်။

သူတော်စင်သခင်၏ စကားများတွင် လွဲမှားမှု တစ်စုံတစ်ရာ ရှိခဲ့ပါက သို့မဟုတ် ကြံစည်မှု တစ်စုံတစ်ရာ ရှိခဲ့ပါက ၎င်းတို့သာ အန္တရာယ် ကျရောက်မည် ဖြစ်သည်။

ဧကရာဇ်တစ်ပိုင်းများနှင့် သူတော်စင်များစွာတို့က အချိန်အတော်ကြာနေထိုင်ခဲ့ကြသောကြောင့် အလွန်ပါးနပ်ကြသည်။ သဘာဝအတိုင်း၊ သူတို့က သူတော်စင်သခင်ကိူ အလွယ်တကူ ယုံကြည်ကြမည် မဟုတ်ပါ။

"ဘာဖြစ်လို့လဲဆို​တော့ ကျုပ်တို့​က လုံလောက်​အောင် မသန်​မာဘူး"

သူတော်စင်သခင်က ပြောလိုက်သည်။

လူများစွာ၏ မျက်လုံးများ အရောင်ပြောင်းသွား၏။

သူတော်စင်သခင်၏ စကားများကို သူတို့ မချေပနိုင်ပေ။

အဆုံးမဲ့ပင်လယ်ကမ္ဘာ၏ ကျင့်ကြံမှုက ယွမ်လုနှင့် သဘာဝအတိုင်း နှိုင်းယှဉ်၍မရနိုင်ပါ။ ကွာခြားချက်က ကြီးလွန်းသည်။

အချိန်နတ်ဘုရားကျွန်းတွင် အသန်မာဆုံးက ဧကရာဇ်တစ်ပိုင်းများ ဖြစ်သည်။ ထို့ပြင် အများအပြား မရှိပါ။ သူတို့ မလုပ်နိုင်တာက ပုံမှန် ဖြစ်သည်။

"ဒီတောင်ကြားမှာ အချိန်စွမ်းအားတွေ အားနည်းသွားဖို့က အချိန်ဘယ်လောက်ကြာဦးမလဲ"

တစ်ယောက်ယောက်က မေးသည်။

"လဝက်ပဲ"

သူတော်စင်သခင်က ပြောလိုက်၏။

"ကောင်းပြီ၊ ဒါဆိုရင် ကျုပ်က ဒီမှာစောင့်နေမယ်"

တစ်စုံတစ်ယောက်က တင်ပျဉ်ခွေထိုင်လိုက်သည်။

တချို့လူများကလည်း ထိုသို့ပြုလုပ်ကြ၏။ သူတို့က တင်ပျဉ်ခွေထိုင်ကာ ငြိမ်သက်စွာ စောင့်ဆိုင်းလိုက်ကြသည်။

အချို့သောလူများက အချိန်နတ်ဘုရားတောင်ပတ်ပတ်လည်ကို လှည့်ပတ်ကြည့်ရှုကြ၏။

လုမင်နှင့် ပေါင်ပေါင်တို့လည်း လှည့်ပတ်သွားကြသည်။

ရုတ်တရက်၊ တစ်စုံတစ်ယောက်က ရှေ့သို့ လှမ်းလာပြီး အချိန်နတ်ဘုရားတောင်ဆီသို့ လျှောက်သွားသည်။ ၎င်းက လူအများ၏ အာရုံကို ဆွဲဆောင်ခဲ့ပေသည်။

တစ်စုံတစ်ယောက်က မအောင့်နိုင်ဘဲ သူ့ဘာသာသူ စမ်းကြည့်ချင်နေပုံရသည်။

သို့သော်လည်း ထိုလူက အလွန်သတိရှိသည်။ သူက တစ်လှမ်းချင်း ဖြည်းညှင်းစွာ လျှောက်သွား၏။

အကွာအဝေးတစ်ခုသို့ သူဝင်ရောက်လာသောအခါ ကြောက်မက်ဖွယ်ကောင်းသော စွမ်းအားတစ်ခု၏ ဖုံးအုပ်ခံရသကဲ့သို့ သူ့အမူအရာမှာ ပြောင်းလဲသွားသည်။

ထိုလူက ဧကရာဇ်တစ်ပိုင်း ဖြစ်သည်။ သူ့ခန္ဓာကိုယ်ကို နိယာမမြစ်ကြီးက ဝန်းရံထား၏။ ၎င်းက အချိန်စွမ်းအားကို တွန်းလှန်ရန် အတတ်နိုင်ဆုံးကြိုးစားရင်း သူတော်စင်စွမ်းအင်ဖြင့် သူ့ခန္ဓာကိုယ်တစ်ခုလုံးကို လွှမ်းခြုံလိုက်သည်။

ထို့နောက် တစ်ဆင့်ပြီးတစ်ဆင့် အနီးဆုံးအပင်ဆီသို့ လျှောက်သွားလေသည်။

လူအများ၏ မျက်လုံးများက တောက်ပလာသည်။

အချိန်နတ်ဘုရားတောင်တွင် တောင်ထိပ်သို့ တောင်ထိပ်သို့ နီးကပ်လေလေ၊ အချိန်စွမ်းအားက ပို၍ ပြင်းထန်လာလေ ဖြစ်သည်။ အစွန်အဖျားရှိ အချိန်၏စွမ်းအားကိုပင် တွန်းလှန်ရန် မလွယ်ကူပေ။

သို့သော်လည်း အချိန်၏စွမ်းအားကို တွန်းလှန်နိုင်သရွေ့ အပင်အချို့ကို ရရှိနိုင်မည် ဖြစ်သည်။ ဤအပင်များက လူတစ်ယောက်၏ သက်တမ်းကို တိုးစေနိုင်ပြီး တန်ဖိုးမဖြတ်နိုင်ပေ။

ချက်ခြင်းပင်၊ လူများစွာက ရှေ့သို့ တိုးလာကာ အချိန်နတ်ဘုရားတောင်သို့ ဖြည်းညှင်းစွာ လျှောက်သွားကြသည်။

"အား"

သို့သော်လည်း မကြာမီတွင် တစ်စုံတစ်ယောက်က မထိန်းနိုင်တော့ဘဲ အော်လိုက်သည်။ ထိုလူ၏ အသားအရေသည် တဖြည်းဖြည်း ခြောက်သွေ့လာ၏။ ထိုလူက အလွန်ထိတ်လန့်သွားပြီး လျင်မြန်စွာ ပြန်ဆုတ်သွားတော့သည်။

ပထမဆုံး ကြိုးစားသူက အနီးဆုံးအပင်ကိုတောင် မရောက်နိုင်ပါ။ အချိန်၏တိုက်စားမှုကို မတွန်းလှန်နိုင်ဘဲ လက်လျှော့ပြီး ဆုတ်ခွာသွားခဲ့သည်။

ထို့နောက် အခြားသူများက နည်းအမျိုးမျိုးသုံးကာ ကြိုးစားခဲ့ကြသော်လည်း မထူးပေ။ သူတို့၏ ဧကရာဇ်လက်နက်များပင်လျှင် အချိန်၏စွမ်းအားကို မခုခံနိုင်ခဲ့ပါ။ အပင်တစ်ပင်မှ မရရှိခဲ့ဘဲ တစ်ယောက်ပြီးတစ်ယောက် ပြန်ဆုတ်သွားကြသည်။

"အစ်ကိုကြီး လုမင်၊ ကျွန်မ ကြိုးစားကြည့်ချင်တယ်။ ဒီနေရာရဲ့ အချိန်စွမ်းအားကို အသုံးပြုပြီး ကျွန်မကိုယ်ကိုလည်း လေ့ကျင့်နိုင်တယ်။ တွိ...တွိ..."

ထိုအချိန်တွင် ပေါင်ပေါင်က ပြောလိုက်သည်။

"ကောင်းပြီ၊ အတူတူသွားရအောင်"

လုမင် ခေါင်းညိတ်လိုက်၏။ အချိန်နတ်ဘုရားတောင်၌ အချိန်၏စွမ်းအားက မည်မျှပြင်းထန်သည်ကိုလည်း သူမြင်ချင်သည်။

"ဒုန်း... ဒုန်း"

လုမင်က ရှေ့သို့ ခြေလှမ်းပြီး အချိန်နတ်ဘုရားတောင်သို့ လျှောက်သွားသည်။

လူတော်တော်များများက လုမင်ကို ကြည့်လိုက်ကြ၏။

ကစဉ့်ကလျား၏သားတော်က မည်မျှအထိ သွားနိုင်သည်ကို သူတို့လည်း မြင်ချင်ကြသည်။

လုမင်က ရှေ့ကို တစ်လှမ်းပြီးတစ်လှမ်း လျှောက်သွားသည်။ နေရာတစ်ခုသို့ သူဝင်ရောက်လာသောအခါတွင် လျှို့ဝှက်ဆန်းကြယ်သော စွမ်းအားတစ်ခု သူ့ခန္ဓာကိုယ်ပေါ်သို့ ကျရောက်လာသည်။

၎င်းက အချိန်စွမ်းအား ဖြစ်၏။ ၎င်းက ပေါင်ပေါင်၏ ခန္ဓာကိုယ်ရှိ အချိန်စွမ်းအားနှင့် အလွန်ဆင်တူသည်။

အချိန်၏စွမ်းအားက အလွန်ကြောက်စရာကောင်းသည်။ ၎င်းက လုမင်၏သက်တမ်းကို ဝါးမျိုလိုသကဲ့သို့ သူ့ခန္ဓာကိုယ်ထဲကို စိမ့်ဝင်လာ၏။

"ဝုန်း"

လုမင်က သူ့အရှိန်အဝါတို့ကို ထုတ်လွှတ်လိုက်သည်။ သူတော်စင်စွမ်းအင်က သူ့ခန္ဓာကိုယ်ကို ဝိုင်းရံထား၏။ ကစဉ့်ကလျားနိယာမကလည်း ပျံ့နှံ့သွားပြီး ပြင်ပကမ္ဘာရှိ အချိန်၏စွမ်းအားကို ပိတ်ဆို့လိုက်တော့သည်။

အချိန်စွမ်းအားက အချိန်နိယာမနှင့် ဆက်စပ်နေသည်။ ဒါက အလွန်အစွမ်းထက်သော ဘုရင်နိယာမတစ်ခု ဖြစ်သော်လည်း ပေါင်ပေါင်၏ အချိန်ဟင်းလင်းပြင် နိယာမနှင့် မနှိုင်းယှဉ်နိုင်ပါ။ သဘာဝအတိုင်း၊ လုမင်၏ ကစဉ့်ကလျားနိယာမနှင့်လည်း နှိုင်းယှဉ်၍မရပေ။

ထို့ကြောင့်၊ ကစဉ့်ကလျားနိယာမက ပြင်ပကမ္ဘာရှိ အချိန်၏စွမ်းအားကို ပိတ်ဆို့ထားခဲ့သည်။

လုမင်က ရှေ့သို့ တစ်လှမ်းပြီးတစ်လှမ်း လှမ်းကာ အပင်ဆီသို့ လျှောက်သွားခဲ့သည်။

သူသည် အလွန်လျင်မြန်စွာ လျှောက်လှမ်းခြင်း မရှိသော်လည်း တစ်လှမ်းပြီးတစ်လှမ်း တည်ငြိမ်စွာ လျှောက်လှမ်းခဲ့၏။

အပေါ်သို့ နက်ရှိုင်းလေလေ၊ အချိန်၏ စွမ်းအားက အားကောင်းလေ ဖြစ်သည်။ သို့သော်လည်း လုမင်က နောက်ဆုံးတွင် ၎င်းကို ပိတ်ဆို့ထားဆဲပင်။

ပေါင်ပေါင်ကမူ လုမင်၏ ပခုံးပေါ်တွင် ထိုင်နေပြီး ပြင်ပကမ္ဘာရှိ အချိန်၏စွမ်းအားကို လေးနက်စွာ အာရုံခံစားနေပုံရသည်။

မကြာမီ၊ လုမင်က ​​ပထမအပင်ဆီ ချဉ်းကပ်သွားသည်။

"ကစဉ့်ကလျားရဲ့ သားတော်က မျှော်လင့်ထားတဲ့အတိုင်းပါပဲ။ သူက ကစဉ့်ကလျား နိယာမကို ထိန်းချုပ်နိုင်ပြီး အချိန်ရဲ့စွမ်းအားကိုတောင် တားဆီးနိုင်တယ်"

တစ်ယောက်က ပြောလိုက်သည်။