အခန်း ၁၉၇၀

အပိုင်း ( 1970 ) တိုးတက်လာသော တိုက်ခိုက်နိုင်စွမ်း။

ဟန်ရှင်းဟဲက သူ့အရှိန်အဝါကို အမြင့်ဆုံးအထိ ထုတ်ဖော်ထားပြီး ထာဝရအလင်းကို ထုတ်လွှတ်လိုက်သည်။ သူက လုမင်ကို တိုက်ခိုက်တော့မည်။

ရုတ်တရက်၊ ဓားအလင်းတစ်ခုက ကောင်းကင်ကိုဖြတ်ပြီး ဟန်ရှင်းဟဲထံသို့ ဖြတ်သန်းလာသည်။

ဤဓားအလင်းတွင် သေခြင်းတရား၏ အငွေ့အသက်များ ပြည့်နေ၏။

ဓားအလင်းများ ဖြတ်သန်းသွားသည့် လမ်းတလျှောက်ရှိ အရာအားလုံး ပျက်စီးသွားရသည်။

ဟန်ရှင်းဟဲ၏ မျက်လုံးများ ကျဉ်းမြောင်းသွားသည်။ သူက လက်ကိုဝှေ့ယမ်းကာ ဓားအလင်းတစ်ခုကို တန်ပြန်ထုတ်လွှတ်လိုက်၏။

"ထန်"

ကျယ်လောင်သော အသံတစ်ခု ထွက်ပေါ်လာသည်။ အဆုံးမဲ့ ဓားစွမ်းအင်များကလည်း နေရာအနှံ့ လွင့်သွား၏။ ဟန်ရှင်းဟဲ၏ ခန္ဓာကိုယ်က အနည်းငယ် တုန်ခါသွားပြီး နောက်သို့ ခြေတစ်လှမ်း ဆုတ်သွားရတော့သည်။

ကောင်းကင်တွင် ပုံရိပ်တစ်ခု ပေါ်လာခဲ့သည်။ သူ့နောက်ကျောဘက်တွင် ဓားတစ်လက်ကို ကိုင်ထား၏။

ထိုသူက မရဏဓားပင်။

သူ့အရှိန်အဝါက အလွန်ကြောက်စရာကောင်းသည်။ သူက အန္တိမသူတော်စင်နယ်ပယ်၏ ပြီးပြည့်စုံခြင်းအဆင့်သို့ ရောက်ခဲ့ပြီ။

ထို့ပြင် သူ့ပတ်ဝန်းကျင်မှာလည်း အလင်းစက်ဝိုင်းတစ်ခု ရှိနေသည်။ ၎င်းက သေခြင်းတရား၏အလင်းပင်။

မရဏဓားကလည်း ဤကာလအတွင်း ကြီးစွာသောတိုးတက်မှုကို ရရှိခဲ့ကြောင်း ထင်ရှားသည်။ သူ၏ ကျင့်ကြံမှုအဆင့်က တိုးတက်လာသည့်အပြင် သေခြင်း၏အလင်းကိုလည်း လေ့ကျင့်နိုင်ခဲ့သေးသည်။

"ဟန်ရှင်းဟဲ၊ ငါက မင်းရဲ့ပြိုင်ဘက်ပဲ"

မရဏဓားက ရှေ့သို့တိုးလာပြီး ဟန်ရှင်းဟဲ၏ရှေ့မှာ ရပ်လိုက်သည်။

"မရဏဓား၊ မင်းပဲ"

ဟန်ရှင်းဟဲ၏ မျက်လုံးများက လူသတ်ချင်စိတ်တို့ ပေါ်လာသည်။

"မရဏဓား၊ မင်းက အန္တိမသူတော်စင်နယ်ပယ် ပြီးပြည့်စုံခြင်းအဆင့်ကို ချိုးဖြတ်ခဲ့ပြီး သေခြင်းရဲ့အလင်းကို လေ့ကျင့်ခဲ့ပေမဲ့ ငါ့ကို မယှဉ်နိုင်သေးဘူး"

"ငါက မင်းရဲ့ပြိုင်ဘက်မဟုတ်ဘူးလား။ ဒါဆိုရင် မင်း ဘာဖြစ်လို့ မတိုက်ခိုက်ကြည့်တာလဲ။ သေခြင်းတရားကောင်းကင်ဓား"

မရဏဓားက အလွန်တိုက်ရိုက်ဆန်သူ ဖြစ်သည်။ သူက ပြောပြီးသည်နှင့် တိုက်ခိုက်လိုက်၏။ သူက သူ၏ဓားကို ဆွဲထုတ်ပြီး ဟန်ရှင်းဟဲကို ခုတ်ချလိုက်တော့သည်။

ဟန်ရှင်းဟဲ၏ မျက်လုံးများက အေးစက်သွားသည်။ သူ့လက်ထဲတွင် ဓားတစ်လက် ပေါ်လာ၏။

သူက အလွန်ယုံကြည်ချက်ရှိပုံရသော်လည်း မရဏဓားကို ရင်ဆိုင်ရသောအခါ သတိလက်လွတ်မဖြစ်ဝံ့ပေ။

မရဏဓားက သေခြင်း၏သားတော် ဖြစ်သည်။ ယခုဆိုလျှင် သူက သေခြင်း၏အလင်းကို လေ့ကျင့်ထားပြီး အန္တိမသူတော်စင်နယ်ပယ်၏ ပြီးပြည့်စုံခြင်းအဆင့်သို့ ရောက်ခဲ့ပြီ။ ထို့ကြောင့် သဘာဝအတိုင်း အထင်မသေးဝံ့တော့ပါ။

စူးရှသော ဓားအလင်းက ကောင်းကင်ကို ထိုးဖောက်သွားသည်။

"ဝုန်း"

ဓားအလင်း နှစ်ခုက ထိပ်တိုက်တွေ့ဆုံကြ၏။ ကောင်းကင်ယံတွင် စူးရှသော အလင်းတန်းများ ပေါက်ကွဲထွက်လာတော့သည်။

ဟန်ရှင်းဟဲနှင့် မရဏဓားတို့က အပြင်းအထန် တိုက်ခိုက်ခဲ့ကြသည်။ သူတို့၏ အရှိန်အဝါများက အလွန်ကြောက်မက်ဖွယ်ကောင်းပြီး မိုင်ရာဂဏန်းအတွင်း မည်သူမျှ မရပ်တည်ဝံ့ကြပေ။

မျက်စိတစ်မှိတ်အတွင်းမှာပင် သူတို့နှစ်ယောက်က တိုက်ခိုက်မှု ဒါဇင်နှင့်ချီပြီး ရင်ဆိုင်ခဲ့ကြပြီး လက်ရည်ညီနေခဲ့ကြသည်။

လုမင် ဆွံ့အသွားသည်။ မူလက သူသည် ဟန်ရှင်းဟဲနှင့် ကြီးမားသောတိုက်ပွဲကို ဆင်နွှဲချင်ခဲ့သော်လည်း မရဏဓားက ရုတ်တရက် ရောက်လာမည်ဟု မမျှော်လင့်ထားပေ။ သို့သော်လည်း ဒါက ကောင်းသည်။ သူ့တွင် တခြားလုပ်စရာများ ရှိသေးသည်။

လုမင်၏ပုံရိပ်က လှုပ်ရှားလာပြီး တစ်နေရာသို့ ပြေးထွက်သွားသည်။

ထိုလမ်းကြောင်းက တာ့လော့ကောင်းကင်ဂိုဏ်းသို့ပင်။

ထိုအချိန်တွင်၊ တာ့လော့ကောင်းကင်ဂိုဏ်းမှ ဧကရာဇ်တစ်ပိုင်းများစွာက ဟွမ်လင်၊ လုံချန်နှင့် အခြားသူများကို တိုက်ခိုက်နေကြသည်။

တာ့လော့ကောင်းကင်ဂိုဏ်းမှ ဧကရာဇ်တစ်ပိုင်းအဆင့် ကျွမ်းကျင်သူ အရေအတွက်မှာလည်း အံ့မခန်းပင်။ ၎င်းတို့က ဟန်မိသားစုထက် နည်းပါးသော်လည်း လူတစ်ရာနီးပါး ရှိသည်။

ထိုအချိန်တွင်၊ လော့စန်းချုံးက သူ့လက်ထဲတွင် တံဆိပ်တော်တစ်ခုကိုင်ကာ လေထဲတွင်ရပ်နေသည်။ ၎င်းက သိမ်းယူပယ်ဖျက်ခြင်း နတ်ဘုရားတံဆိပ်တော်ပင်။

သိမ်းယူပယ်ဖျက်ခြင်း နတ်ဘုရားတံဆိပ်တော်က ပတ်ဝန်းကျင်တစ်ခုလုံးရှိ စွမ်းအင်များကို အဆက်မပြတ် ဝါးမျိုသွားနိုင်သည်။ အချိန်ကြာလာသည်နှင့်အမျှ စွမ်းအင်များ စုဆောင်းလာလေလေ၊ ၎င်း၏ စွမ်းအားက ပိုကြောက်စရာကောင်းလေပင်။

ထိုအချိန်တွင်၊ လော့စန်းချုံးက သူ၏ထိန်းချုပ်မှုကန့်သတ်ချက်သို့ မရောက်မချင်း စွမ်းအင်များကို အဆက်မပြတ် ထုတ်ယူနေသည်။

"သေလိုက်ကြစမ်း"

လော့စန်းချုံးက အော်ဟစ်ပြီး သိမ်းယူပယ်ဖျက်ခြင်း နတ်ဘုရားတံဆိပ်တော်ကို တွန်းထုတ်လိုက်၏။ သိမ်းယူပယ်ဖျက်ခြင်း နတ်ဘုရားတံဆိပ်တော်က တောင်တစ်လုံးကဲ့သို့ ရှေ့သို့ ထိုးဆင်းသွားတော့သည်။

သို့သော်၊ လုမင်၏ပုံရိပ်က သိမ်းယူပယ်ဖျက်ခြင်း နတ်ဘုရားတံဆိပ်တော်၏ရှေ့တွင် ရုတ်တရက် ပေါ်လာပြီး လက်ညှိုးညွှန်ပြလိုက်သည်။

ကစဉ့်ကလျား ကပ်ဘေးလက်ချောင်းများ ပေါက်ကွဲထွက်ပြီး သိမ်းယူပယ်ဖျက်ခြင်း နတ်ဘုရားတံဆိပ်တော်ကို တိုက်ခိုက်လိုက်၏။

"ဝုန်း"

ကျယ်လောင်သော ပေါက်ကွဲသံနှင့်အတူ သိမ်းယူပယ်ဖျက်ခြင်း နတ်ဘုရားတံဆိပ်တော်က ပေါက်ကွဲသွားတော့သည်။ လုမင်သည်လည်း အဝေးသို့ လွင့်သွားသည်။

လော့စန်းချုံးမှ စုဆောင်းထားသော စွမ်းအင်များဖြင့် သိမ်းယူပယ်ဖျက်ခြင်း နတ်ဘုရားတံဆိပ်တော်၏ စွမ်းအားက အမှန်တကယ် ကြောက်မက်ဖွယ်ကောင်းသည်။ လုမင်၏ လက်ရှိတိုက်ခိုက်နိုင်စွမ်းဖြင့်ပင် တွန်းထုတ်ခံလိုက်ရသေးသည်။

"လုမင်၊ မင်း...မင်း... မင်းတကယ်ပဲ ငါ့ရဲ့ သိမ်းယူပယ်ဖျက်ခြင်း နတ်ဘုရားတံဆိပ်တော်ကို ပိတ်ဆို့နိုင်တယ်လား..."

လော့စန်းချုံးက မယုံကြည်နိုင်စွာ အော်ဟစ်လိုက်သည်။

သူသည် ထိုတိုက်ခိုက်မှုအတွက် အချိန်အတော်ကြာအောင် စွမ်းအင်စုဆောင်းထားခဲ့သည်။ ထို့ကြောင့် ၎င်း၏စွမ်းအားက အံ့မခန်းအဆင့်သို့ ရောက်ရှိသွားခဲ့၏။ သာမာန်ဧကရာဇ်တစ်ပိုင်းက ၎င်းကို မတားဆီးနိုင်ဘဲ အလွယ်တကူ အသတ်ခံရမည်မှာ သေချာသည်။

သို့သော်လည်း ယခုအချိန်မှာတော့ လုမင်က ၎င်းကို ထိပ်တိုက်ရင်ဆိုင်ပြီး ပိတ်ဆို့လိုက်ပြီ။ သူ မည်ကဲ့သို့ မတုန်လှုပ်ဘဲနေမည်နည်း။

"လော့စန်းချုံး၊ ဒီနေ့ မင်းရဲ့အသက်ကို ငါယူမယ်"

လုမင်က အေးစက်စွာ ပြောလိုက်သည်။

ချင်ယွဲ့က ဒဏ်ရာအပြင်းအထန်ရကာ သတိလစ်နေသေးသည်။ လော့စန်းချုံးကို သူ လုံးဝ အလွတ်မပေးနိုင်ပါ။

လော့စန်းချုံးက မဟာဧကရာဇ်၏ မြေး ဖြစ်လျှင်ပင် ဂရုမစိုက်တော့ပေ။

လုမင်က လော့စန်းချုံးထံသို့ ပြေးသွားသည်။ လော့စန်းချုံးက ထိတ်လန့်တကြားဖြင့် နောက်ဆုတ်သွား၏။

"လုမင်၊ နောက်ဆုံးတစ်ခေါက်က မင်း ထွက်ပြေးနိုင်ခဲ့ပေမဲ့ ဒီတစ်ကြိမ်မှာ မင်းကိုငါသတ်မယ်"

ထွားကျိုင်းသော လူရိပ်တစ်ခုက လုမင်၏ရှေ့မှာ ပေါ်လာခဲ့သည်။ သူက လုမင်ကို ဧရာမတူကြီးဖြင့် ထုချလိုက်၏။

ထိူလူက ဟင်းလင်းပြင်တုန်ခါခြင်းနယ်မြေတွင် လုမင်နှင့် တိုက်ခိုက်ခဲ့သော ကျွမ်းကျင်သူ ဖြစ်သည်။ သူ့တွင် အဆင့်မြင့် ကောင်းကင်ဝိညာဉ်ခန္ဓာရှိပြီး အလွန်အစွမ်းထက်၏။

နောက်ဆုံးအကြိမ်တွင် လုမင်က သူ၏ဖိနှိပ်ခြင်းကို ခံခဲ့ရပြီး ပြန်မတိုက်ခိုက်နိုင်ပေ။

သို့သော်... ဤတစ်ကြိမ်မှာတော့ မတူတော့ပါ။

"သတ်"

လုမင်က အော်လိုက်သည်။ အေးစက်သော အလင်းများက သူ့မျက်လုံးတွင် လင်းလက်လာသည်။ တစ်ချိန်တည်းမှာပင် အလင်းစက်ဝိုင်းတစ်ခုက ထွက်ပေါ်လာ၏။ သူက လက်ညိုးထိုးလိုက်ရာ ဧရာမ လက်ချောင်းကြီးတစ်ခု ပေါ်လာတော့သည်။

ကြီးမားသော ကစဉ့်ကလျား ကပ်ဘေးလက်ချောင်းက တစ်ဖက်လူ၏ ဧရာမတူကြီးကို ထိမှန်ပြီး ပြန်လွင့်သွားစေခဲ့သည်။

"မင်းရဲ့ စွမ်းအားက..."

လူထွားကြီးက တုန်လှုပ်သွားသည်။

အပြန်အလှန် ထိုးနှက်ပြီးနောက် လုမင်၏ တိုက်ခိုက်နိုင်စွမ်းက ယခင်ကထက် ပိုမိုအားကောင်းလာသည်ဟု သူခံစားရ၏။

နောက်ဆုံးတစ်ခေါက်က လုမင်သည် သူ့ရှေ့တွင် လုံးဝ အားသာချက်မရှိပေ။ သို့သော်လည်း ယခုအချိန်တွင် သူက အားနည်း‌နေခဲ့ပြီ ဖြစ်သည်။

လုမင်၏ ခွန်အားက အချိန်တိုအတွင်းမှာ ဤမျှလောက် တိုးတက်လာနိုင်ပါသလော။

"ကစဉ့်ကလျားရဲ့အလင်း... မင်းက ကစဉ့်ကလျားရဲ့အလင်းကို လေ့ကျင့်ပြီးပြီ"

လူထွားကြီးက အော်လိုက်သည်။

"ဒီနေ့ မင်းလည်းသေရမယ်"

လုမင်က အေးစက်စွာပြောပြီး ကစဉ့်ကလျား ကပ်ဘေးလက်ချောင်းကို ဆက်လက်အသုံးပြုခဲ့သည်။

ကစဉ့်ကလျား အငွေ့အသက်များဖြင့် ကြီးမားသော လက်ချောင်းကြီးတစ်ခုက ပေါ်လာ၏။ ၎င်းက နတ်ဘုရား၏လက်ညှိုးကဲ့သို့ ရုတ်တရက် ပေါ်လာပြီး တစ်ဖက်လူဆီသို့ ဖိချလာတော့သည်။

လူထွားကြီးက ဟိန်းဟောက်ပြီး လုမင်၏ တိုက်ခိုက်မှုကို တားဆီးရန် သူ၏ ဧရာမတူကြီးဖြင့် အစွမ်းကုန် ထုနှက်လိုက်သည်။

သို့သော်၊ ထိုအချိန်တွင် အဆုံးမရှိသော ရွန်းများက လုမင်၏ ဘယ်ဘက်လက်တွင် ပေါ်လာသည်။ ထို့နောက် အစစ်အမှန်နဂါးတစ်ကောင်က လူထွားကြီးကို ခုန်အုပ်လိုက်၏။

၎င်းက အစီရင်နိယာမ၏ ကျမ်းစာလိပ်ကိုးခုအနက်မှ တစ်ခုဖြစ်သော ပုံရိပ်ယောင်ဝိညာဉ်ကျမ်း ဖြစ်သည်။ ရွန်းများက ပေါင်းစပ်လာပြီး ကြောက်မက်ဖွယ် စွမ်းအားများဖြင့် အစစ်အမှန်နဂါးအဖြစ်သို့ ပြောင်းလဲသွားခြင်းပင်။

လူထွားကြီး၏ ဧရာမတူကြီးက ကစဉ့်ကလျား ကပ်ဘေးလက်ချောင်းနှင့် ပြင်းထန်စွာ တိုက်မိသွားသည်။

ယခုအချိန်တွင် သူက ကစဉ့်ကလျား ကပ်ဘေးလက်ချောင်းကို တားဆီးရန် သူ၏ခွန်အားရှိသမျှ အသုံးပြုခဲ့ရသည်။ ပုံရိပ်ယောင်ဝိညာဉ်ကျမ်း၏ တိုက်ခိုက်မှုကို ဟန့်တားရန် မည်သို့ အာရုံစိုက်နိုင်မည်နည်း။

အစစ်အမှန်နဂါးကြီးက ဟိန်းဟောက်ပြီး လူထွားကြီးကို ကုပ်ဆွဲလိုက်သည်။

"ဝုန်း"

လူထွားကြီး၏ ခန္ဓာကိုယ်ကပြင်းထန်စွာ တုန်ခါသွားသည်။ နာကျင်စွာ ညည်းညူသံနှင့်အတူ သွေးများ အန်ထွက်လာ၏။

"သတ်"

လုမင်က အလျင်အမြန် လိုက်လာပြီး သူ့လက်ကို ဝှေ့ယမ်းလိုက်သည်။ ကြီးမားသော ငရဲဖိနှိပ်ကျောက်စာတိုင်ပုံရိပ်က ကောင်းကင်မှ ဆင်းသက်လာပြီး လူထွားကြီးကို ဖိချလိုက်ပြန်တော့သည်။

လူထွားကြီးက သေငယ်ဇောဖြင့် အော်ဟစ်လိုက်ရသည်။ သူ့တစ်ကိုယ်လုံးမှ အရိုးကျိုးသံများ ထွက်လာ၏။ ဤအခိုက်တွင် သူ့အရိုးများ ဘယ်လောက်ထိကျိုးသွားသလဲ မသိနိုင်တော့ပေ။

ထို့နောက် လုမင်၏ ဘယ်ဘက်လက်မှ ရွန်းများက လင်းလက်သွားပြီး အစစ်အမှန်နဂါး နောက်တစ်ကောင် ထွက်သွားသည်။ ၎င်းက လူထွားကြီးကို ဖမ်းဆွဲကာ ခွန်အားအပြည့်ဖြင့် ဆွဲဖြဲလိုက်၏။

သွေးများ ဒရဟောထွက်ကျပြီး လူထွားကြီး၏ ခန္ဓာကိုယ်က ထက်ခြမ်းကွဲသွားတော့သည်။

လူထွားကြီး အဆင့်မြင့် ကောင်းကင်ဝိညာဉ်ခန္ဓာဖြင့် ဧကရာဇ်တစ်ပိုင်းအဆင့် ကျွမ်းကျင်သူဖြစ်သော်လည်း လုမင်၏ တိုက်ခိုက်မှုများကြောင့် သေဆုံးခဲ့ရပြီ ဖြစ်သည်။

'အစီရင်နိယာမရဲ့ ကျမ်းစာလိပ်ကိုးတွဲက တကယ်ကို လျှို့ဝှက်ဆန်းကြယ်တာပဲ။ ငါသာ ဖျက်ဆီးခြင်းကျမ်း၊ ပုံရိပ်ယောင်ဝိညာဉ်ကျမ်းနဲ့ တံဆိပ်ခတ်ခြင်းကျမ်းတို့ကို ပေါင်းစပ်နိုင်ရင် သူ့ရဲ့ စွမ်းအားက အဆမတန် တိုးလာမှာ သေချာတယ်'

လုမင်၏ စိတ်ထဲတွင် အတွေးတစ်ခု ပေါ်လာခဲ့သည်။