အခန်း ၁၉၇၁

အပိုင်း ( 1971 ) ဘုရင်ခန္ဓာကို သတ်ခြင်း။

ယခုအချိန်တွင် အစီရင်နိယာမကို လုမင်အတွက် အထောက်အပံ့အဖြစ်သာ အသုံးပြုနိုင်သည်။ ကစဉ့်ကလျား ကပ်ဘေးလက်ချောင်းနှင့် နှိုင်းယှဉ်ပါက ၎င်းတို့မှာ အားနည်းနေသေးသည်။

သို့သော်လည်း သူက ဖျက်ဆီးခြင်းကျမ်း၊ ပုံရိပ်ယောင်ဝိညာဉ်ကျမ်းနှင့် တံဆိပ်ခတ်ခြင်းကျမ်းတို့ကို ပေါင်းစည်းနိုင်ပါက ၎င်း၏စွမ်းအားမှာ များစွာ တိုးမြင့်လာမည် ဖြစ်သည်။

ဖျက်ဆီးခြင်း၏ စွမ်းအားနှင့် တံဆိပ်ခတ်ခြင်းတို့၏ စွမ်းအားများ ပါဝင်သော အစစ်အမှန်နဂါးတစ်ကောင်ကို ထုတ်ဖော်မည်ဆိုလျှင်၊ တိုက်ခိုက်မှုက မည်မျှ အားကောင်းလာမလဲဆိုတာ တွေးကြည့်ရန်ပင် မလွယ်ပေ။

ထိုအကြောင်းကို တွေးမိသောအခါ လုမင်က မျှော်လင့်ခဲ့မိသည်။

ထိုအချိန်တွင်၊ လော့စန်းချုံး၏ မျက်လုံးများက မယုံကြည်နိုင်စွာ ပြူးကျယ်သွားသည်။

လုမင်က အဆင့်မြင့် ကောင်းကင်ဝိညာဉ်ခန္ဓာဖြင့် ဧကရာဇ်တစ်ပိုင်းအဆင့် အကျော်အမော်ကို သတ်နိုင်မည်ဟု သူ မမျှော်လင့်ထားပေ။ ဒါက သူ့ကို အကြောအချဉ်များ အေးစက်သွားစေသည်။

လုမင်က‌ လော့စန်းချုံးကို အေးစက်စက်ဖြင့် ကြည့်လိုက်သည်။ သူက လုံးဝ မရပ်တန့်ဘဲ လော့စန်းချုံးကို တိုက်ခိုက်လိုက်၏။

"လာကြစမ်း၊ လုမင်ကိုသတ်... သူ့ကိုသတ်ကြ"

လော့စန်းချုံးက သွေးပျက်စွာ ဆုတ်ခွာသွားရင်း အော်ဟစ်လိုက်သည်။

လော့ဖိုခုန်းကလည်း သူနှင့်အတူ ဆုတ်ခွာသွားတော့သည်။

"ဝှစ်... ဝှစ်..."

ချက်ချင်းဆိုသလို၊ ဧကရာဇ်တစ်ပိုင်းအဆင့် ကျွမ်းကျင်သူ ဆယ်ဦးထက်မနည်း လုမင်ကို တိုက်ခိုက်ခဲ့ကြသည်။

ကြောက်မက်ဖွယ်ရာ တိုက်ခိုက်မှုမျိုးစုံက လုမင်အပေါ် ကျရောက်လာ၏။

သို့သော်လည်း လုမင်က ဤတိုက်ခိုက်မှုများကို ရိုးရှင်းစွာ လျစ်လျူရှုခဲ့သည်။

ကစဉ့်ကလျား၏အလင်းက သူ့ခန္ဓာကိုယ်ဝန်းကျင်တွင် လှည့်ပတ်နေ၏။ ထိုတိုက်ခိုက်မှုများက ကစဉ့်ကလျား၏အလင်းအပေါ် ကျရောက်သောအခါတွင် ၎င်းတို့အားလုံးကို ပိတ်ဆို့ထားခဲ့သည်။

ကစဉ့်ကလျား၏အလင်းက တိုက်ခိုက်ခြင်းနှင့် ကာကွယ်ရေး နှစ်မျိုးလုံးတွင် အသုံးပြုနိုင်ပေသည်။

"ဝုန်း... ဝုန်း... ဝုန်း..."

လုမင်က လက်သီးချက်အနည်းငယ်ကို ဆက်တိုက် ထုတ်ဖော်လိုက်သည်။ လက်သီးအင်အားများက လေထုကို ဖြတ်သန်းသွား၏။ ဧကရာဇ်တစ်ပိုင်းအဆင့် အကျော်အမော်သုံးဦးက တိုက်ရိုက်ပေါက်ကွဲသွားတော့သည်။

"ဝုန်း..."

ထို့နောက် လုမင်က ကစဉ့်ကလျား ကပ်ဘေးလက်ချောင်းကို အဆက်မပြတ် ထုတ်ဖော်လိုက်သည်။ ကြီးမားသော လက်ချောင်းကြီး ခြောက်ခုက ဧကရာဇ်တစ်ပိုင်းအဆင့် လူခြောက်ယောက်ထံ ထိုးခွင်းသွား၏။

လက်ချောင်းခြောက်ချောင်းက ပြဲ့ကျဲနေသော်လည်း သာမန် ဧကရာဇ်တစ်ပိုင်းများနှင့် ဆက်ဆံရန် လုံလောက်သည်။

ဧကရာဇ်တစ်ပိုင်းအဆင့် လူခြောက်ဦးစလုံး လွင့်စဉ်သွားကြသည်။ သူတို့၏မျက်နှာများက ဖြူဖျော့ပြီး သွေးများ အန်ထွက်လာတော့သည်။

ပထမဆုံး သူဟာ ဧကရာဇ်တစ်ပိုင်း သုံးဦးကို တိုက်ရိုက် သတ်ဖြတ်ခဲ့သည်။ ထို့နောက် ဧကရာဇ်တစ်ပိုင်းခြောက်ပါးကို တစ်ချက်တည်းဖြင့် ဒဏ်ရာရစေခဲ့၏။ ထိုကဲ့သို့ တိုက်ခိုက်နိုင်စွမ်းမှာ အံ့အားသင့်စရာပင်။

လော့စန်းချူံနှင့် လော့ဖိုခုန်းတို့က ပို၍ပင် ပို၍ပင် တုန်လှုပ်သွားကြသည်။

သူတို့နှစ်ယောက်က လုမင်ကို လုံးဝ မတိုက်ခိုက်ဝံ့ဘဲ ကသောကမျော ဆုတ်သွားကြတော့သည်။

သို့သော်လည်း လော့စန်းချုံး၏ ကျင့်ကြံမှုက ပိုမြင့်မားသောကြောင့် ပို၍ လျင်မြန်စွာ ဆုတ်ခွာသွားခဲ့သည်။

"မင်းထွက်သွားလို့မရဘူး"

လုမင်က လျစ်လျူရှုစွာ ပြောလိုက်သည်။ သူက တာ့လော့ကောင်းကင်ဂိုဏ်းမှ ကျွမ်းကျင်သူများစွာကို ရှောင်ရှားရင်း လျှပ်စီးလက်သကဲ့သို့ ပြေးလိုက်သွား၏။

နောက်အခိုက်အတန့်တွင် လုမင်က လော့ဖိုခုန်းကို ဖမ်းမိခဲ့သည်။

လော့ဖိုခုန်းက တုန်လှုပ်သွားသည်။ သူ့လက်ထဲမှ လှံရှည်တစ်လက်ပေါ်လာပြီး လုမင်ကို ပစ်ထိုးလိုက်၏။

ဒါက ဧကရာဇ်လက်မက် ဖြစ်သည်။ လော့ဖိုခုန်း၏ ထိုးဖောက်ခြင်းနိယာမနှင့်အတူ ၎င်း၏စွမ်းအားက အမှန်တကယ် ကြောက်မက်ဖွယ်ကောင်းပေသည်။

သို့သော်လည်း လော့ဖိုခုန်း၏ ကျင့်ကြံမှုက လုမင်ကဲ့သို့ပင် အန္တိမသူတော်စင်နယ်ပယ် အဆင့်မြင့်အဆင့် ဖြစ်သည်။

တူညီသောအဆင့်တွင် သူက မည်မျှပင် အားကောင်းပါစေ၊ လုမင်ကို မယှဉ်နိုင်ပါ။

လုမင်က လှံထိပ်ကို လက်သီးဖြင့် ထိုးလိုက်သည်။

လော့ဖိုခုန်း၏ ထိုးဖောက်ခြင်းနိယာမက လုမင်အ‌တွက် အသုံးမဝင်ပေ။

လှံရှည်က ကွေးညွတ်သွားသည်။ ထို့နောက် ပြင်းထန်စွာ ကန်ထွက်သွားပြီး လော့ဖိုခုန်းကို ထိမှန်သွား၏။ လော့ဖိုခုန်းက အော်ဟစ်ပြီး နောက်ပြန်ဆုတ်သွားရတော့သည်။

သူ့နှလုံးသားထဲတွင် လုံးဝ မယုံကြည်နိုင်သလို ခံစားရသည်။ သူက အိပ်မက်မက်နေသကဲ့သို့ပင်။

ထိုစဉ်အခါက သူတို့ ပထမဆုံးအကြိမ် တွေ့ဆုံသောအခါ လုမင်သည် သူ့ကို အနိုင်ယူရန် ကြိုးစားအားထုတ်ခဲ့ရသည်။

သို့သော်လည်း ယခုအချိန်မှာတော့ လုမင်က သူ့ကို အလွယ်တကူ အနိုင်ယူနိုင်ခဲ့ပြီ။ ပေါ့ပေါ့ပါးပါး လှုပ်ရှားမှုတစ်ခုဖြင့် သူ့ကို ဒဏ်ရာရစေနိုင်သည်။

အချိန်ကြာလာသည်နှင့်အမျှ သူတို့နှစ်ယောက်ကြားမှ ကွာဟမှုက ပိုကြီးလာသည်။

ဒါက ပါရမီရှင်ဟု ခံယူထားသော လော့ဖိုခုန်းအတွက် လက်ခံနိုင်ရန် ခက်ခဲပေသည်။

လုမင်က မရပ်တန့်သွားဘဲ လော့ဖိုခုန်းကို တိုက်ခိုက်လိုက်သည်။ အေးစက်သော လူသတ်ချင်စိတ်တို့ကြောင့် လော့ဖိုခုန်း၏ ခန္ဓာကိုယ်က တုန်ယင်သွား၏။

"လုမင်၊ မင်း ငါ့ကို ဘယ်လိုတောင် ထိဝံ့တာလဲ။ ငါက တာ့လော့ကောင်းကင်ဂိုဏ်းရဲ့ ပါရမီရှင်တစ်ယောက်ပဲ။ ငါ့ကိုထိဝံ့ရင် ယွမ်တောင်မှာ ဘယ်သူမှ မင်းကို မကယ်တင်နိုင်ဘူး"

လော့ဖိုခုန်းက အော်ဟစ်လိုက်သည်။

တာ့လော့ကောင်းကင်ဂိုဏ်းတွင် မဟာဧကရာဇ်ကြီးတစ်ပါး ရှိသည်။ လုမင်က သူ့ကို တကယ် ထိဝံ့မည်ဟု သူမယုံပေ။

သူ့ကိုထိရင် လုမင် သေရမည် ဖြစ်သည်။

"ငါ့ဘ၀မှာ ငါ့ကို ခြိမ်းခြောက်တဲ့သူတွေ အများကြီးပဲ။ ဒါပေမဲ့ နောက်ဆုံးတော့ သူတို့အားလုံး သေကုန်ကြပြီး ငါကပဲ အသက်ရှင်ကျန်ခဲ့တယ်"

လုမင်က လျစ်လျူရှုစွာ ပြောလိုက်သည်။ သူတော်စင်စွမ်းအင်က ပေါက်ကွဲထွက်လာပြီး ကစဉ့်ကလျားနိယာမကိုပါ အသက်သွင်းလိုက်၏။ သူက လက်သီးချက် ထုတ်ဖော်လိုက်သည်နှင့် ငရဲဖိနှိပ်ကျောက်စာတိုင်အရိပ်က လော့ဖိုခုန်းကို ဖိချလိုက်တော့သည်။

"ဝုန်း"

လော့ဖိုခုန်းက မြေပြင်ပေါ်သို့ ပြင်းထန်စွာ ပြုတ်ကျသွားပြီး ဆယ်မိုင်အထိ နက်ရှိုင်းသော ကျင်းကြီးတစ်ခု ဖြစ်ပေါ်လာခဲ့သည်။

ကျင်းကြီးထဲတွင် လော့ဖိုခုန်းက သွေးအလိမ်းလိမ်းဖြင့် လဲကျနေ၏။

ဤတိုက်ခိုက်မှုက သူ့ခန္ဓာကိုယ်ထဲမှ အရိုးအားလုံးကို ကျိုးသွားစေခဲ့သည်။ သူ၏ သူတော်စင်နှလုံးသားပင်လျှင် အက်ကွဲသွားချေပြီ။

ဤအခိုက်အတန့်တွင် သူက အလွန်ထိတ်လန့်သွားသည်။ အဆုံးမရှိသော အကြောက်တရားက သူ့ကို ဖုံးလွှမ်းသွား၏။

လုမင်က သူ့ကို တကယ်သတ်ချင်နေသည်။ သူက တာ့လော့ကောင်းကင်ဂိုဏ်းကို လုံးဝ မကြောက်ပေ။

ဤအခိုက်တွင်၊ သူက သေရမည်ကို ကြောက်လာသည်။

လုမင်က ဧရာမကျင်းကြီးအထက်တွင် ပေါ်လာပြီး အေးစက်စက်ဖြင့် လော့ဖိုခုန်းကို ငုံ့ကြည့်လိုက်သည်။

"မလုပ်နဲ့... မလုပ်ပါနဲ့"

လော့ဖိုခုန်းက သွေးများဖြင့် သနားစဖွယ် အော်လိုက်သည်။

"ရပ်လိုက်စမ်း၊ သူ့ကိုသတ်ဝံ့ရင် တာ့လော့ကောင်းကင်ဂိုဏ်းက မင်းကို အလွတ်ပေးမှာ မဟုတ်ဘူး"

တာ့လော့ကောင်းကင်ဂိုဏ်းမှ ဧကရာဇ်တစ်ပိုင်းအဆင့် လူတစ်ယောက်ကလည်း အော်ဟစ်လိုက်၏။

လော့ဖိုခုန်းက တာ့လော့ကောင်းကင်ဂိုဏ်း၏ ဘုရင်ခန္ဓာဖြစ်သောကြောင့် သူ့ကို အသေမခံနိုင်ပေ

"ဟားဟားဟားဟား...."

လုမင် ဟားတိုက်ရယ်မောလိုက်သည်။

တာ့လော့ကောင်းကင်ဂိုဏ်းက သူ့ကို အလွတ်မပေးဘူးလား။ တာ့လော့ကောင်းကင်ဂိုဏ်းက သူ့ကို အလွတ်ပေးလျှင်ပင် သူက ခွင့်လွှတ်လိုက်မည် မဟုတ်ပါ။ ဒါက ချင်ယွဲ့ကို ကတိပြုထားခြင်း ဖြစ်သည်။

အနာဂတ်တွင်၊ သူက မည်သို့သောတန်ကြေးကို ပေးရသည်ဖြစ်စေ တာ့လော့ကောင်းကင်ဂိုဏ်းကို ဖျက်ဆီးပစ်ရမည်။

လုမင်က ဧကရာဇ်လက်နက် လှံရှည်တစ်လက်ကိုကိုင်ပြီး လော့ဖိုခုန်းထံသို့ လျှောက်သွားသည်။

"မဟုတ်ဘူး..."

လော့ဖိုခုန်းက ထိတ်လန့်တကြား အော်ဟစ်ကာ ထွက်ပြေးရန် ကြိုးစားလိုက်သည်။

သို့သော်လည်း ဧကရာဇ်လက်နက် လှံရှည်က လော့ဖိုခုန်း၏ မျက်ခုံးနှစ်ခုကြားသို့ ထိုးဖောက်ပြီး သူ့ကို မြေပြင်ပေါ်သို့ ရိုက်ချလိုက်၏။

လော့ဖိုခုန်းက မကျေနပ်မှုတို့ဖြင့် မျက်လုံးများ ပြူးကျယ်ကာ အသက်ပျောက်သွားတော့သည်။

အနီးပတ်ဝန်းကျင်ရှိ လူအများလည်း ထိတ်လန့်သွားကြသည်။

လော့ဖိုခုန်းက တာ့လော့ကောင်းကင်ဂိုဏ်း၏ ဘုရင်ခန္ဓာဖြစ်သော်လည်း လုမင်မှ သတ်ဖြတ်ခြင်း ခံခဲ့ရသည်။ ဤသတင်း ပြန့်သွားလျှင် တာ့လော့ကောင်းကင်ဂိုဏ်းမှ လူများ ရူးသွပ်သွားလိမ့်မည်။

သို့သော်လည်း လုမင်၏မျက်လုံးများတွင် ဓားသွားကဲ့သို့ အေးစက်သော လူသတ်ချင်စိတ်တို့ ပြည့်နေဆဲ ဖြစ်သည်။

"ဒါကအစပဲ"

လုမင်က ခပ်တိုးတိုးလေး ပြောလိုက်သည်။ သူက ဧကရာဇ်လက်နက် လှံရှည်ကို ဆွဲကိုင်ကာ ကောင်းကင်သို့ ပြေးတက်သွား၏။

ထိုအချိန်တွင်၊ လော့စန်းချုံးက အသည်းအသန်ပြေးလွှားနေပြီး ဤနေရာတွင် ဆက်မနေဝံ့တော့ပေ။

'ပေါင်ပေါင်၊ ငါ့ကိုကူညီပေးပါ'

လုမင်က ပေါင်ပေါင်ထံသို့ အသံပို့လွှတ်လိုက်သည်။

'ကောင်းပြီ'

‌တာ့ယန်ဆေးမီးဖိုအောက်တွင် ပေါင်ပေါင်က တုံ့ပြန်ခဲ့၏။ သူက လက်ကိုဝှေ့ယမ်းလိုက်ရာ အချိန်ဟင်းလင်းပြင် နိယာမ၏ စွမ်းအားတစ်ခုက လုမင်ကို ဖုံးအုပ်လိုက်တော့သည်။

လုမင်က ဟင်းလင်းပြင်ကို ခုန်ကျော်သကဲ့သို့ အမြန်နှုန်းဖြင့် လော့စန်းချုံး၏နောက်သို့ ပြေးလိုက်သွားခဲ့သည်။

ပေါင်ပေါင်၏ အချိန်ဟင်းလင်းပြင်နိယာမ အကူအညီဖြင့် လုမင်၏အရှိန်က အံ့မခန်းဖြစ်ပြီး‌ လော့စန်းချုံးထံ လျင်မြန်စွာ ချဉ်းကပ်လာတော့သည်။

"သေစမ်း"

တာ့လော့ကောင်းကင်ဂိုဏ်း၏ ဧကရာဇ်တစ်ပိုင်းအဆင့် ကျွမ်းကျင်သူအားလုံးက ဟွမ်လင်တို့ကို တိုက်ခိုက်ခြင်းမပြုတော့ဘဲ လုမင်၏နောက်သို့ ပြေးလိုက်ခဲ့ကြသည်။

လော့ဖိုခုန်း၏ သေဆုံးခြင်းက လက်ခံနိုင်သေးသည်။ သို့ရာတွင်၊ လော့စန်းချုံး အသတ်ခံရပါက မဟာဧကရာဇ်၏ ဒေါသအောက်တွင် သူတို့အားလုံး သေရမည် ဖြစ်သည်။

သူတို့က လုမင်နောက်သို့ အရူးအမူး လိုက်ခဲ့ကြသော်လည်း သူတို့၏ အရှိန်မှာ လုမင်နှင့် အဝေးကြီး ဖြစ်သည်။ သူတို့က လုံးဝ လိုက်မမီနိုင်ကြပေ။

လုမင်က အရိပ်တစ်ခုကဲ့သို့ ဖြစ်နေပြီး မကြာမီ လော့စန်းချုံးနှင့် နီးကပ်လာသည်။

"ဝှစ်"

လုမင်က ကစဉ့်ကလျား ကပ်ဘေးလက်ချောင်းကို အသုံးပြုပြီး လက်ညှိုးတစ်ချက်ညွှန်ပြလိုက်သည်။ ကြီးမားသော လက်ချောင်းတစ်ချောင်းက လော့စန်းချုံးထံ တိုးဝင်သွား၏။

"ချိုးဖြတ်"

လော့စန်းချုံး၏ လက်ထဲတွင် ပုဆိန်တစ်လက် ပေါ်လာသည်။

ဤပုဆိန်က အလွန်အားကောင်းပြီး သာမာန် ဧကရာဇ်လက်နက် မဟုတ်ပေ။

သူက ပုဆိန်ဖြင့်ခုတ်ပြီး လုမင်၏လက်ချောင်းကို တားဆီးလိုက်သည်။ သို့ရာတွင် သူ့တကိုယ်လုံး တုန်ယင်သွားပြီး လွင့်စဉ်သွား၏။

သူ၏ ကျင့်ကြံမှုအခြေခံက အန္တိမသူတော်စင်နယ်ပယ် ပြီးပြည့်စုံခြင်းအဆင့်သို့ ရောက်ရှိသွားသော်လည်း တိုက်ခိုက်နိုင်စွမ်းမှာတော့ လုမင်ထက် များစွာ အားနည်းသည်။