အခန်း ၁၉၇၅

အပိုင်း ( 1975 ) အထွတ်အထိပ် တိုက်ပွဲ။

ဟန်ရှင်းဟဲသည် ယွမ်တောင်ရှိ မျိုးဆက်သစ်လူငယ်များကြားတွင် နံပါတ်တစ်ပါရမီရှင်အဖြစ် လူသိများသည်။

သို့ဆိုလျှင်၊ လက်ရှိလုမင်ကလည်း ယွမ်တောင်၏ မျိုးဆက်သစ်လူငယ်များကြားတွင် အထွတ်အထိပ်သို့ ရောက်ရှိနေပြီဟူသော အဓိပ္ပာယ်ပင် မဟုတ်လော။

ရွှေကျီးကန်းမျိုးနွယ်၊ ဝမ်မျိူးနွယ်နှင့် အခြားသော အင်အားစုများမှ ကျွမ်းကျင်သူများက မျက်နှာများ မှုန်ကုပ်သွားကြသည်။

ဤကမ္ဘာမှ ထွက်လာပြီးသည်နှင့် သူတို့၏ အင်အားစုများကို ချက်ချင်း ပြန်လည်တင်ပြရလိမ့်မည်။

ဤအတိုင်း ဆက်လွှတ်ထားမည်ဆိုလျှင် လုမင်က သူတို့အတွက် အန္တရာယ်ကြီးတစ်ခု ဖြစ်လာတော့မည် ဖြစ်သည်။

လုမင်နှင့် ဟန်ရှင်းဟဲတို့က ဆယ်ကြိမ်ထက်မနည်း ဖလှယ်ခဲ့ကြသော်လည်း အနိုင်ရသူကို ဆုံးဖြတ်ရန် ခက်ခဲနေသေးသည်။

ဟန်ရှင်းဟဲက လော့စန်းချုံး၏ ချပ်ဝတ်တန်ဆာကို ချိုးဖျက်မိပြီး လော့စန်းချုံးကို ထိခိုက်စေမည်အား ကြောက်နေပုံရသည်။

"ဝုန်း"

နောက်ထပ် ပေါက်ကွဲသံတစ်ချက် ထွက်ပေါ်လာပြီးနောက် လော့စန်းချုံး၏ ချပ်ဝတ်တန်ဆာကို ဖုံးအုပ်ထားသော ရွန်းများ ပြိုကျသွားသည်။

"ဝုန်း"

လော့စန်းချုံးက အရူးတစ်ယောက်ကဲ့သို့ လုမင်ကို ဝါးမြိုရန် သိမ်းယူပယ်ဖျက်ခြင်းနိယာမကို အပြည့်အဝ ထုတ်ဖော်လိုက်၏။

လုမင်၏ အမူအရာက အနည်းငယ် ပြောင်းလဲသွားခဲ့သည်။ နောက်ဆုံးတွင်၊ ဟန်ရှင်းဟဲက သူနှင့် ပြင်းပြင်းထန်ထန် အဘယ်ကြောင့်တိုက်ခိုက်ခဲ့မှန်း သူ နားလည်ခဲ့ပြီ။ သူ၏ ရည်ရွယ်ချက်မှာ လော့စန်းချုံး၏ ခန္ဓာကိုယ်ပေါ်ရှိ တံဆိပ်တော်ကို ချိုးဖျက်ပြီး လော့စန်းချုံးကို လွတ်မြောက်စေရန် ဖြစ်သည်။

"ထာဝရဓား ရေစီးကြောင်း"

ဟန်ရှင်းဟဲက ဤအခွင့်အရေးကို လက်လွတ်မခံပါ။ တခဏချင်းမှာပင်၊ သူက ဓားချက်တစ်ထောင်ကျော် ထုတ်ဖော်လိုက်သည်။ အဆုံးမဲ့ ဓားအလင်းများက ရေစီးကြောင်းကဲ့သို့ လုမင်ထံ အဆက်မပြတ် တိုးဝင်လာ၏။ ၎င်းတို့အားလုံးက လုမင်၏ သေကွင်းသေကွက်များဆီသို့ ဦးတည်ခဲ့ကြသည်။

ယခုအချိန်တွင် လုမင်က လော့စန်းချုံးကို ထိန်းချုပ်ပြီး လက်နက်အဖြစ် အသုံးပြုလိုသော်လည်း မဖြစ်နိုင်တော့ပေ။ ဒါက သူ့ကို အန္တရာယ်တောင် ဖြစ်စေနိုင်သည်။

"ဝှစ်"

လုမင်က လော့စန်းချုံးကို လွှတ်လိုက်ပြီး လျင်မြန်စွာ ပြန်ဆုတ်သွားသည်။ သူက လက်သီးချက်များ အဆက်မပြတ် ထုတ်ဖော်လိုက်၏။ ငရဲဖိနှိပ်ကျောက်စာတိုင်ပုံရိပ်များက ပေါ်လာပြီး ဓားအလင်းများကို ပိတ်ဆို့လိုက်တော့သည်။

လော့စန်းချုံးက လွတ်မြောက်လာသည်နှင့် တပြိုင်နက် လုမင်နှင့် အဝေးသို့ ချက်ချင်း ထွက်ပြေးသွားခဲ့သည်။

"လုမင်၊ ငါ ဒါကို မှတ်ထားတယ်။ မင်း စောင့်နေပါ"

လော့စန်းချုံးက ဒေါသတကြီးဖြင့် ပြောလိုက်သည်။

"ငါလည်း ဒါကို မှတ်မိမှာပါ။ နောက်ပြီးတော့ အားလုံးလည်း မှတ်မိကြမယ်လို့ ငါယုံကြည်တယ်"

လုမင်က ပြုံးလျက် ပြောလိုက်၏။

"မင်း..."‌‌

လော့စန်းချုံးက ဒေါသထွက်လွန်းသဖြင့် သွေးအန်တော့မည်။ သူ့ခန္ဓာကိုယ်မှာလည်း ဒေါသကြောင့် တဆတ်ဆတ်တုန်နေသည်။

မမှားပေ၊ ယနေ့ အဖြစ်အပျက်များကို လူတိုင်းမှတ်မိနေပြီဖြစ်ပြီး မကြာမီ ယွမ်တောင်တစ်ခုလုံးသို့ ပျံ့နှံ့သွားတော့မည် ဖြစ်သည်။ နောင်တွင်၊ အခြားသူများက လော့စန်းချုံးကို မြင်သောအခါ၊ ယနေ့မြင်ကွင်းကို တွေးတောမိကြလိမ့်မည်။

သူ လော့စန်းချုံးက ဟာသတစ်ခု ဖြစ်ခဲ့ပြီ ဖြစ်သည်။

သူက‌ ဒေါသထွက်လွန်းသဖြင့် လုမင်ကို အပိုင်းပိုင်း ခုတ်ထစ်ပစ်ရန် မစောင့်နိုင်တော့ပေ။ ယနေ့ဖြစ်ပျက်ခဲ့သည်များကို မျက်မြင်တွေ့သူတိုင်းကိုလည်း သတ်ပစ်ချင်စိတ်တို့ ပေါ်လာခဲ့သည်။

"အမှိုက်ကောင်၊ သွားစမ်း"

လုမင်က လော့စန်းချုံးကို ဂရုမစိုက်တော့ပေ။ သူ့လက်ကို ဝှေ့ယမ်းလိုက်ပြီး ဟန်ရှင်းဟဲကို လှည့်ကြည့်လိုက်သည်။

လော့စန်းချုံးက ဒေါသတကြီးဖြင့် လုမင်ကို ခုန်အုပ်လုနီး ဖြစ်သွားပေသည်။

"လုမင်၊ အခု မင်းမှာ လော့စန်းချုံးလည်း မရှိတော့ဘူး။ မင်း ငါ့ကို ဘယ်လိုရင်ဆိုင်မလဲ ကြည့်ရအောင်"

ဟန်ရှင်းဟဲ၏ ခန္ဓာကိုယ်ပေါ်ရှိ ထာဝရအလင်းရောင်က ပို၍ တောက်ပလာခဲ့သည်။

"အမှိုက်တစ်စလျော့သွားရုံပါပဲ၊ အခုမှ တကယ့်တိုက်ပွဲကို စတင်ရမှာ"

လုမင်က ခပ်တိုးတိုးပြောဆိုရင်း သူတော်စင်စွမ်းအင်ကို ဖြန့်ကျက်လိုက်၏။ ကစဉ့်ကလျား၏အလင်းရောင်က သူ့ကို ဝန်းရံထားပြီး စစ်နတ်ဘုရားကဲ့သို့ ထင်မှတ်ရစေသည်။

"ဝှစ်... ဝှစ်..."

နှစ်ယောက်စလုံးက ပြိုင်တူ လှုပ်ရှားကြပြီး တိုက်ခိုက်လိုက်ကြသည်။

"ထာဝရဓား"

"ကစဉ့်ကလျား ကပ်ဘေးလက်ချောင်း"

ဓားအလင်းတစ်ခုနှင့် ဧရာမ လက်ချောင်းကြီး တစ်ချောင်းက လေထဲတွင် ထိပ်တိုက်တွေ့ဆုံကြပြီး နှစ်ခုစလုံး ပျက်သုဉ်းသွားကြသည်။

လုမင်နှင့် ဟန်ရှင်းဟဲတို့ကလည်း ထိပ်တိုက် တွေ့ခဲ့ကြ၏။

လုမင်က လက်သီးချက် ထုတ်ဖော်လိုက်သောအခါ ငရဲဖိနှိပ်ကျောက်စာတိုင်၏ ပုံရိပ်က ပေါ်လာသည်။ ၎င်းက တောင်လုံးတမျှ ကြီမားပြီး ဟန်ရှင်းဟဲကို ဖိနှိပ်လိုက်၏။

ဟန်ရှင်းဟဲက ဓားချက်ထုတ်ဖော်လိုက်သောအခါ ဓားအလင်းက ငရဲဖိနှိပ်ကျောက်စာတိုင်ပုံရိပ်ကို တိုက်ရိုက် ဖြတ်တောက်သွားတော့သည်။

သို့သော်လည်း သူ ဆက်လက်ကြုံတွေ့ရသည့်အရာမှာ မြောက်မြားစွာသော ငရဲဖိနှိပ်ကျောက်စာတိုင်ပုံရိပ်များ ဖြစ်သည်။

လုမင်က သူ့လက်ကို ဝှေ့ယမ်းလိုက်သည်နှင့် ငရဲဖိနှိပ်ကျောက်စာတိုင် ပုံရိပ်ကိုးခု ပေါ်လာပြီး ဟန်ရှင်းဟဲဆီသို့ ပေါက်ကွဲသွားသည်။

တစ်ချိန်တည်းမှာပင် သူ၏ ဘယ်ဘက်လက်ပေါ်တွင် မရေမတွက်နိုင်သော ရွန်းစာများ ပေါ်လာပြီး ဟန်ရှင်းဟဲဆီသို့ ပျံ့နှံ့သွား၏။

ဒါက တံဆိပ်ခတ်ခြင်း၏ စွမ်းအားဖြစ်ပြီး ဟန်ရှင်းဟဲကို ချုပ်နှောင်ရန် ကြိုးစားလာသည်။

သို့သော်၊ တံဆိပ်ခတ်ခြင်း၏ စွမ်းအားက ဟန်ရှင်းဟဲ၏အနီးသို့ ရောက်သောအခါ ထာဝရအလင်းကို မဖြတ်ကျော်နိုင်ဘဲ ပိတ်ဆို့ခံခဲ့ရပေသည်။ ထို့နောက် ထာဝရအလင်းက တုန်ခါသွားပြီး မရေမတွက်နိုင်သော ရွန်းများအားလုံး ပြိုကျသွားသည်။

"ငါက ထာဝရခန္ဓာကွ။ ဘုရင်နိယာမတစ်ခုက ငါ့ကို ဘာလုပ်နိုင်မှာလဲ"

ဟန်ရှင်းဟဲ၏ အသံထွက်လာသည်။ တစ်ချိန်တည်းမှာပင် ကြောက်မက်ဖွယ်ကောင်းသော ဓားအလင်းတစ်ခုက ထွက်ပေါ်လာပြီး ငရဲဖိနှိပ်ကျောက်စာတိုင်ကိုးခုကို ဖြိုခွဲပစ်လိုက်၏။

ထိုမျှသာမကဘဲ၊ နောက်ထပ် ဓားအလင်းတစ်ခုက လုမင်ထံသို့ ဖြတ်သန်းလာတော့သည်။

သို့သော်လည်း ဓားအလင်းက ကစဉ့်ကလျားအလင်းကို တိုက်မိသောအခါ၊ သံနံရံကို တိုက်မိသွားသကဲ့သို့ပင်။ ဆူဆူညံညံအသံများ ထွက်ပေါ်လာပြီး မီးပွားများက အရပ်ရပ်သို့ ပျံ့လွင့်သွားသည်။

"သတ်"

လုမင်က ဟိန်းဟောက်လိုက်သည်။ သူ၏ သွေးနီရောင်ဆံပင်များက တဖျပ်ဖျပ်ခတ်သွား၏။ သူနှင့် ဟန်ရှင်းဟဲကြားမှ ကွာဟချက်ကို ဖြည့်ဆည်းရန် တတိယသွေးမျိုးဆက်၏စွမ်းအားကို ဆွဲယူခဲ့ကာ အထွတ်အထိပ် တိုက်ပွဲတစ်ခု စတင်ခဲ့တော့သည်။

လုမင်က ငရဲဖိနှိပ်ကောင်းကင်သိုင်း၊ ကစဉ့်ကလျား ကပ်ဘေးလက်ချောင်းနှင့် အစီရင်နိယာမတို့ကို အလျဉ်းသင့်သလို အသုံးပြုခဲ့ပြီး အံ့မခန်း အင်အားမျိုးဖြင့် ထုတ်ဖော်ခဲ့သည်။ ဤတိုက်ခိုက်မှုများက သာမာန်ဧကရာဇ်တစ်ပိုင်းကို တစ်ချက်တည်းဖြင့် သတ်နိုင်စွမ်းရှိပေသည်။

သို့သော်လည်း ဟန်ရှင်းဟဲက အမှန်တကယ် အစွမ်းထက်သည်။ သူ၏ဓားအလင်းက ကောင်းကင်ကို ဖြတ်သန်းနိုင်ပြီး သူ့ခန္ဓာကိုယ်ကလည်း ထာဝရခန္ဓာ ဖြစ်၏။ သူက လုမင်ထက် လုံးဝ အားနည်းသူ မဟုတ်ပေ။ မျက်စိတစ်မှိတ်အတွင်းမှာပင်၊ သူတို့နှစ်ဦးက တိုက်ခိုက်မှုပေါင်းတစ်ရာကျော် အပြန်အလှန်ဖလှယ်ခဲ့ကြသော်လည်း အနိုင်အရှုံးကို မခန့်မှန်းနိုင်သေးပါ။

"ဝုန်း"

သူတို့နှစ်ဦးက နောက်ထပ် တိုက်ခိုက်မှုတစ်ခုကို ဖလှယ်လိုက်ကြသည်။ ထာဝရအလင်းနှင့် ကစဉ့်ကလျားအလင်းတို့က တုန်ခါသွားပြီး သူတို့နှစ်ဦးစလုံး တစ်ချိန်တည်းတွင် ဆုတ်သွားကြရ၏။

"လုမင်၊ မင်းရဲ့ လျှို့ဝှက်ကျင့်စဉ်က တကယ်ကို အစွမ်းထက်ပါတယ်။ ဒါပေမဲ့ နောက်ဆက်တွဲဆိုးကျိုးတွေကလည်း အရမ်းပြင်းထန်ရမယ်။ ဒီအခြေအနေကို မင်းဘယ်လောက်ကြာကြာ ထိန်းထားနိုင်မလဲဆိုတာ ငါသိချင်မိတယ်"

ဟန်ရှင်းဟဲ၏ မျက်လုံးများက စူးရှသော အလင်းများ တောက်ပလာသည်။

လုမင်၏ တတိယသွေးမျိုးဆက်က အလွန်စွမ်းအားကြီး၏။ ထို့ကြောင့် ၎င်းက အချိန်တိုအတွင်း တိုက်ခိုက်နိုင်စွမ်းကို တိုးမြင့်လာစေသော ထူးဆန်းပြီး ကြောက်စရာကောင်းသော လျှို့ဝှက်ကျင့်စဉ်တစ်မျိုးဟု သူယုံကြည်ခဲ့သည်။ သို့သော်လည်း ထိုသို့သော လျှို့ဝှက်ကျင့်စဉ်များက အများအားဖြင့် ကြီးမားသော တန်ပြန်သက်ရောက်မှုများ ရှိတတ်ပေသည်။

"မင်း ဘာဖြစ်လို့ မကြိုးစားကြည့်တာလဲ"

လုမင်က နှုတ်ခမ်းတွန့်ရုံ ပြုံးလိုက်သည်။ သဘာဝအတိုင်း သူက ရှင်းပြမှာ မဟုတ်ပေ။

တတိယသွေးမျိုးဆက်မှ စွမ်းအင်များက အဆုံးမရှိပါ။ သူက မနားတမ်း အသုံးပြုနေလျှင်ပင် မကုန်နိုင်ပေ။

"လုမင်၊ ဒီလျှို့ဝှက်ကျင့်စဉ်ကို အသုံးပြုထားရင်တောင် မင်းက ငါ့ကို မယှဉ်နိုင်သေးဘူး။ ငါ့ရဲ့ အသန်မာဆုံး တိုက်ခိုက်မှုကို မင်းကိုငါပြမယ်"

ဟန်ရှင်းဟဲက အေးစက်စွာ ပြောလိုက်သည်။ သူ့ခန္ဓာကိုယ်ပေါ်ရှိ ထာဝရအလင်းက လောင်ကျွမ်းတော့မည်ကဲ့သို့ ပြင်းထန်စွာ တောက်ပလာ၏။

"ထာဝရ နတ်ဘုရား‌ခေါင်းလောင်း"

ဤအခိုက်တွင် ဟန်ရှင်းဟဲ၏ အရှိန်အဝါက ထပ်မံ တိုးတက်လာသည်။ သူ့ခန္ဓာကိုယ်က အလင်းရောင်များဖြင့် ထွန်းလင်းနေပြီး နောက်ဆုံးတွင် သူ့ကို ဖုံးအုပ်ထားသည့် ခေါင်းလောင်းကြီးအဖြစ် ပြောင်းလဲသွား၏။

"ဒေါင်"

ဧရာမ ခေါင်းလောင်းကြီးက လှုပ်ရှားလာပြီး သာမန်မျက်စိဖြင့် မြင်နိုင်သော အသံလှိုင်းတစ်ခုက လုမင်ဆီသို့ ပြေးဝင်လာတော့သည်။

လုမင်၏ မျက်နှာအမူအရာက ရုတ်တရက် ပြောင်းလဲသွားသည်။ ဤအသံလှိုင်းကို ရင်ဆိုင်ရချိန်တွင် အလွန်အန္တရာယ်များသော ခံစားချက်ကို ရရှိ၏။

ကစဉ့်ကလျား ကပ်ဘေးလက်ချောင်း...

လုမင်က ကစဉ့်ကလျား ကပ်ဘေးလက်ချောင်းဖြင့် အစွမ်းကုန် ထုတ်ဖော်ပြီး ညွှန်ပြလိုက်သည်။

သို့သော်၊ အသံလှိုင်းများ ရောက်လာသောအခါ ကစဉ့်ကလျား ကပ်ဘေးလက်ချောင်းက တိုက်ရိုက်ပေါက်ကွဲသွားသည်။ ကြောက်မက်ဖွယ်ကောင်းသော အသံလှိုင်းက လုမင်ဆီသို့ ဆက်လက် ပြေးလာ၏။

"ဘယ်လောက်တောင် ကြောက်စရာကောင်းလိုက်သလဲ"

လုမင်၏ မျက်နှာက လေးနက်လာသည်။ သူက အမြန်ပြန်ဆုတ်သွားကာ တစ်ချိန်တည်းမှာပင် လက်သီးနှစ်ဖက်လုံးဖြင့် ထိုးနှက်လိုက်၏။ ငရဲဖိနှိပ်ကျောက်စာတိုင်ပုံရိပ်များက ပေါ်လာပြီး သူ့ရှေ့တွင် ပိတ်ဆို့လိုက်တော့သည်။

"ဝုန်း... ဝုန်း..."

ငရဲဖိနှိပ်ကျောက်စာတိုင်ပုံရိပ်များက ဆက်တိုက် ပေါက်ကွဲသွားကြသည်။ လုမင် ခန္ဓာကိုယ်က ပြင်းထန်စွာ တုန်လှုပ်သွား၏။ သူ့ခန္ဓာကိုယ်ကို ဖိချေပစ်တော့မည်ကဲ့သို့ ကြောက်မက်ဖွယ်ကောင်းသော စွမ်းအားတစ်ခုကို သူ ခံစားလိုက်ရသည်။

၎င်းကို သူ့ခန္ဓာကိုယ်ပေါ်မှ ကစဉ့်ကလျား၏အလင်းသည်ပင် မခံနိုင်ပေ။

လုမင်က ဤဖိအားကို တွန်းလှန်ရန် ကြိုးစားရင်း မိုင်တစ်ရာကျော် ဆုတ်ခွာသွားခဲ့ရသည်။

"အားပါး၊ ဒါက ဟန်ရှင်းဟဲရဲ့ စစ်မှန်တဲ့ တိုက်ခိုက်နိုင်စွမ်းလား။ ကြောက်စရာကောင်းလိုက်တာ၊ ဒီအင်အားမျိုးကို သိုင်းဧကရာဇ်နယ်ပယ်အောက်မှာ ဘယ်သူက တားဆီးနိုင်မှာလဲ"

"လုမင် ရှုံးတော့မယ်။ သူက ဟန်ရှင်းဟဲရဲ့ ပြိုင်ဘက်မဟုတ်ဘူး"

"အဓိကအချက်က လုမင်ရဲ့ ကျင့်ကြံမှုဟာ နိမ့်ကျနေသေးတာပဲ။ ထိပ်သီး ပါရမီရှင်တွေ တွေ့ဆုံတဲ့အခါ ကျင့်ကြံမှုကွာဟချက်ကို ကျော်လွှားဖို့က သူ့အတွက် ခက်ခဲပါတယ်"

ပတ်ဝန်းကျင်တွင်၊ လူများက ဖရိုဖရဲ တိုက်ပွဲများတွင် တိုက်ခိုက်နေရသော်လည်း လုမင်နှင့် ဟန်ရှင်းဟဲတို့ကြားမှ တိုက်ပွဲကိုလည်း အာရုံစိုက်နေခဲ့ကြသည်။