အခန်း (၂၃၆၁-၂၃၆၂)

အခန်း (၂၃၆၁) - ဆူလုံ ကောင်းကင်အရှင်ကြီး

ထိုအရိပ်က သူ့ကို ပေးစွမ်းသည့် ခံစားချက်မှာ အလွန်ရင်းနှီးနေပြီး ဟင်းလင်းပြင် ကွပ်မျက်သူ တစ်ဦး ဖြစ်သည်မှာ သေချာနေသည်။ အလွန်ပင် ဖြစ်နိုင်သည်မှာ ဖန့်ချန် အရင်က ပိတ်ကာကြီး ထဲတွင် တစ်ချက်မျှ လှမ်းမြင်လိုက်ရသည့် ထိုသူပင် ဖြစ်ပေမည်။

ထိုအချိန်တွင် ဤ ဟင်းလင်းပြင် ကွပ်မျက်သူ က တိတ်တဆိတ်ဖြင့် နဂါးဓား တားမြစ်နယ်မြေ ထဲသို့ ရောက်လာသည်။ ရည်ရွယ်ချက်မှာ အဘယ်နည်း။ လူသတ်ရန် ဖြစ်သည်။ ဖန့်ချန် က ထိုအပြင် အခြားသော ရည်ရွယ်ချက်ကို မတွေးတောတတ်တော့ပေ။

“သူက တစ်စုံတစ်ယောက်ရဲ့ ကျွန်ပြုခြင်းကို ခံထားရတာ၊ ဒါဆိုရင် ဟင်းလင်းပြင် ကွပ်မျက်သူ ကို အသုံးပြုပြီး ကရုဏာတောင်က သူတော်စင်တွေကို သတ်ဖို့ နောက်ကွယ်ကနေ ကြိုးကိုင်နေတာပေါ့ ဘာလို့လဲ”

ဖန့်ချန် ၏ မျက်နှာအမူအရာမှာ ယခင်ကထက် ပိုမို တင်းမာလာသည်။ သူ၏ ထိုသို့သော ခန့်မှန်းချက်မှာ အကြောင်းမဲ့ မဟုတ်ပေ။ အရင်ဆုံး လီရွှမ်ရှု က ရွှမ်ရှင်းပင်လယ် မှာ အစအနမကျန် ပျောက်ဆုံးသွားသည်။ ထို့နောက် ဝမ်ယန်။ ယခုအခါ သူတို့က ကျန်းတောက်ယွဲ့ တို့ကိုပါ ပစ်မှတ်ထားလာပြန်ပြီ…… ဤသည်မှာ တိုက်ဆိုင်မှု မဖြစ်နိုင်၊ တမင် ရည်ရွယ်ချက်ရှိရှိ လုပ်ဆောင်ခြင်း ဖြစ်သည်။

ကျန်းတောက်ယွဲ့ တို့အဖွဲ့ နဂါးဓား တားမြစ်နယ်မြေ သို့ သွားရောက်မည့် ကိစ္စကိုပင် သူတို့က တွက်ချက်ထားပြီး ဖြစ်သည်။ သူတို့မှာ နဂါးဓား တားမြစ်နယ်မြေ ၏ တည်နေရာကိုလည်း ကြိုတင် ရရှိထားပြီး အမြဲတစေ ချုံခိုတိုက်ခိုက်ရန် စောင့်ဆိုင်းနေခဲ့ခြင်း ဖြစ်သည်။

လီဝူ နှင့် ချီယန် သူတော်စင် တို့၏ မျက်နှာအမူအရာမှာလည်း အလွန်ပင် တင်းမာသွားကြသည်။ သူတို့မှာ အောက်ဘက်တွင် ဟင်းလင်းပြင် ကွပ်မျက်သူ ၏ စွမ်းဆောင်ရည်ကို မြင်တွေ့ဖူးကြသည်။ ထိုသူမှာ ဟင်းလင်းပြင် ထဲတွင် ငါးကရေကို ရသကဲ့သို့ ကျင်လည်နိုင်စွမ်းရှိသည်။

အရင်ခေတ်က ရှေးဟောင်းကျမ်းဂန်များ၏ မှတ်တမ်းအရ ထိုသို့သော သတ္တဝါမျိုးက သူတော်စင်များကို သတ်ဖြတ်ခြင်းမှာ ကွပ်မျက်ခြင်းကဲ့သို့ပင် လွယ်ကူလှသည်။ အဘယ်ကြောင့်ဆိုသော် သူတို့မှာ အတွင်းကမ္ဘာ အဝင်ဝ များ၏ ဟန့်တားခြင်းကို မခံရသောကြောင့် ဖြစ်သည်။

သူတော်စင်တို့မှာ သန်မာသော်လည်း အတွင်းကမ္ဘာ ထက်သာလွန်သော တည်ရှိမှုများသာ ဖြစ်ပြီး အမှန်တကယ်တွင် စိတ်ကူးထားသည်ထက် ပိုမို ပျက်စီးလွယ်သည်။

“အကယ်၍ လီရွှမ်ရှု လည်း ဒီ ဟင်းလင်းပြင် ကွပ်မျက်သူ လက်ချက်နဲ့ သေဆုံးခဲ့တာဆိုရင် သူ့ရဲ့ စွမ်းအားက… အနည်းဆုံးတော့ ကောင်းကင်နိမိတ်ဖြစ်စဥ် အဆင့် ကို ရောက်နေပြီ…”

ဖန့်ချန် သည် ထိုအရိပ်ကို အကြည့်မလွှဲဘဲ စူးစိုက်ကြည့်နေသည်။ အကယ်၍ ထိုသူမှာ တစ်ဦးတည်း ဖြစ်ပါက ကျန်းတောက်ယွဲ့၊ လီမော့ နှင့် ဝမ်ချုံစန်း တို့မှာ သူ့၏ ပြိုင်ဘက် မဟုတ်ဘဲ တိုက်ရိုက် ကွပ်မျက်ခြင်းကို ခံရလိမ့်မည်။ အရင်နှစ်ကြိမ်၏ အတွေ့အကြုံအရ သူတို့၏ ဝိညာဉ်များမှာ ယင်လောက သို့ပင် ရောက်နိုင်မည် မဟုတ်ပေ ကရုဏာတောင် ကို ပစ်မှတ်ထားနေသူမှာ အမှန်တကယ်တွင် မည်သူနည်း ကွပ်မျက်ခံလိုက်ရသည့် ဝိညာဉ်များသည် တိုက်ရိုက် စားသောက်ခံလိုက်ရသလော သို့မဟုတ် အခြားနေရာသို့ ပို့ဆောင်လိုက်သလော သူတို့က ဝိညာဉ်ခေါ်ဆောင်သူများကို ဘယ်လိုများ ရှောင်တိမ်းသွားသနည်း။

ထိုအချိန်တွင် ဟင်းလင်းပြင် ကွပ်မျက်သူ လှုပ်ရှားလာသည်။ သူသည် ဟင်းလင်းပြင် ထဲတွင် ပုန်းကွယ်ရင်း ကျန်းတောက်ယွဲ့ နှင့် လီမော့ တို့ဘက်သို့ ရွေ့လျားသွားသည်။ ထိုသူနှစ်ဦးမှာ လေထဲတွင် မတ်တတ်ရပ်လျက် ဝမ်ချုံစန်း တို့ကို ကြည့်ကာ စကားပြောနေကြပြီး နောက်ကွယ်မှ ရောက်လာတော့မည့် အန္တရာယ်ကို လုံးဝ မသိရှိကြပေ။

ဖန့်ချန် မှာ ကြည့်နေရုံသာ တတ်နိုင်ပြီး သူသည် အခု နဂါးဓား တားမြစ်နယ်မြေ သို့ ရောက်သွားရင်တောင် ဘာမှ လုပ်ပေးနိုင်မည် မဟုတ်ပေ။ လီဝူ မှာ အလွန်ပင် စိတ်မကောင်း ဖြစ်မိသည်။ ဝမ်ချုံစန်း တို့မှာ ရှန်းဟုန် မျိုးနွယ်စုမှ တပည့်များ ဖြစ်ပြီး ပါရမီ အလွန်ကောင်းမွန်သူများ ဖြစ်ကြောင်း သူ သိထားသည်။

ထိုတစ်ကြိမ်တွင်မူ အားလုံး အညွန့်တုံးသွားတော့မည့်ပုံ ပေါက်နေပြီး ပြန်လည် လူဝင်စားရန် အခွင့်အရေးပင် ရရှိနိုင်မည် မဟုတ်ပေ။

“အခု အထက်ပိုင်းမှာ ဒေါသထွက်နေကြပြီ၊ ကရုဏာတောင်က နောက်ပိုင်းမှာ တပည့်တွေကို အများအပြား လက်ခံတော့မှာ၊ အရင်လို တိတ်ဆိတ်စွာ ကျင့်ကြံလို့ မရတော့ဘူး။ အစ်ကိုကြီး စိတ်ပြင်ဆင်ထားပြီးပြီလား ”

လီမော့ က မေးသည်။ ကျန်းတောက်ယွဲ့ က ခေါင်းညိတ်သည်။

“အမြဲတမ်း ပြင်ဆင်ထားပါတယ်။ ဒါပေမဲ့ ငါလည်း ကရုဏာတောင် မှာ ကြာကြာ မရှိနိုင်တော့ပါဘူး၊ နောက်ပိုင်းမှာတော့ ဖန့်ညီလေးကိုပဲ လွှဲအပ်ရမှာပေါ့။”

“ဖန့်ညီလေးက အခု စွမ်းအင်စုစည်းခြင်း အလယ်အဆင့် ပဲ ရှိသေးတယ်၊ ကမ္ဘာကြီး သူတော်စင် အထိ လမ်းကြောင်းက ဝေးပါသေးတယ်။”

လီမော့ က ပြောသည်။

“ဖန့်ညီလေးရဲ့ လက်ရှိ တည်တည်ငြိမ်ငြိမ် မြင့်တက်လာနေတဲ့ အရှိန်အဟုန်အရ ဆိုရင် နှစ်ပေါင်း ထောင်ချီအတွင်းမှာ ကမ္ဘာကြီး အဆင့်ကို ရောက်ဖို့ မျှော်လင့်ချက် ရှိပါတယ်။”

ကျန်းတောက်ယွဲ့ ပြုံးကာ ပြောလိုက်သည်။

“ငါတို့အတွက်တော့ နှစ်ပေါင်း ထောင်ချီ ဆိုတာ မကြာပါဘူး၊ တရားကျင့်ကြံတဲ့ အကြိမ်နည်းနည်းနဲ့တင် ကုန်ဆုံးသွားမှာပါ။”

စကားပြောပြီးနောက် သူသည် ဝမ်ချုံစန်း တို့ဘက်သို့ ကြည့်ကာ

“ဒီတပည့်တွေထဲက တစ်ယောက်ယောက်သာ နဂါးဓား စွမ်းအား ကို နားလည်နိုင်ရင် နေမင်းခုနှစ်ပါး ခန်းမ ထဲကို ဝင်ရောက်နိုင်မယ့် အခွင့်အရေး ရှိတယ်။ နှစ်ပေါင်းများစွာ ကြာတဲ့အခါ နေမင်း ခုနှစ်ပါး ခန်းမ ထဲမှာ ငါတို့ ကရုဏာတောင်က တပည့် ဘယ်နှစ်ယောက် ရှိမလဲ မသိဘူး။”

ထိုအချိန်တွင် ထက်ရှသော စွမ်းအင်တစ်ခုသည် သူတို့နှစ်ဦး၏ လည်ပင်းဆီသို့ ရုတ်တရက် ရောက်လာသည်။ သူတို့နှစ်ဦးမှာ အတွင်းကမ္ဘာ ထဲသို့ ဝင်မထားသဖြင့် လက်ရှိတွင် မည်သည့် ကာကွယ်မှုမျှ မရှိပေ။

ထက်ရှသော စွမ်းအင် ရောက်ရှိလာချိန်တွင် တုံ့ပြန်ရန် အချိန်မမီတော့ပေ။ သို့သော် ကျန်းတောက်ယွဲ့ နှင့် လီမော့ တို့သည် တစ်ဦးကိုတစ်ဦး ကြည့်ကာ ပြုံးလိုက်ကြပြီး ဘာမှ မလုပ်ဆောင်ကြပေ။

ဟင်းလင်းပြင် ထဲတွင် ရုတ်တရက် လက်ကြီး တစ်ခု ပေါ်လာပြီး ထိုအရိပ်မည်းကို ဖမ်းဆုပ်လိုက်သည်။ ကိုယ်လုံးမှာ သံရောင်ဖြစ်ပြီး နတ်ဆိုးကဲ့သို့ ကြောက်မက်ဖွယ်ကောင်းသော ဟင်းလင်းပြင် ကွပ်မျက်သူ မှာ ထိုလက်ကြီး၏ ဖမ်းဆုပ်ခြင်းကို ခံလိုက်ရပြီး လုံးဝ မလှုပ်ရှားနိုင်တော့ပေ။

သူ အတော်ဆုံးဖြစ်သည့် ဟင်းလင်းပြင် ထဲသို့ ပုန်းကွယ်ခြင်းကိုပင် မလုပ်ဆောင်နိုင်တော့ပေ။ ဖန့်ချန် သည် ပိတ်ကာကြီး ထဲမှ ထိုမြင်ကွင်းကို မြင်လိုက်ရပြီး လီဝူ တို့နှင့် အလိုအလျောက် အကြည့်ချင်း ဆုံလိုက်ကြကာ အံ့ဩမှုများ ဖြစ်ပေါ်လာသည်။

ဤသည်မှာ… ထောင်ချောက်လော ကျန်းတောက်ယွဲ့ နှင့် လီမော့ တို့သည် လှည့်၍ ထိုလက်ကြီးကို လက်ယှက်ကာ အရိုအသေပြုလိုက်ကြသည်။

“တပည့်တော် ဆူလုံ ကောင်းကင်အရှင်ကြီး ကို ဂါရဝပြုပါတယ်”

ထိုအချိန်တွင် ဟင်းလင်းပြင် ကွပ်မျက်သူ မှာ ထွက်ပြေးရန် အမျိုးမျိုး ကြိုးစားနေသည်။ သို့သော် လက်ကြီးက ရုတ်တရက် ဆုပ်နယ်လိုက်ရာ ဟင်းလင်းပြင် ကွပ်မျက်သူ မှာ ပြာမှုန့်အဖြစ် ပြောင်းလဲသွားပြီး ကောင်းကင်နှင့် မြေကြီးကြားတွင် ပျောက်ကွယ်သွားသည်။

ထို့နောက် အသံတစ်သံ ထွက်ပေါ်လာသည်။

“လီရွှမ်ရှု နှင့် ဝမ်ယန် တို့ရဲ့ ဝိညာဉ်တွေကို ရှာတွေ့ပြီ၊ အခု ပြန်လည်ဝင်စားခြင်းဌာန ကို ပို့ဆောင်ပြီး လူဝင်စားစေတော့မယ်။ ဒီကိစ္စ ဒီမှာတင် ပြီးဆုံးပါစေတော့၊ ကရုဏာတောင် ဘက်ကလည်း ဆက်လက် ရှုပ်ယှက်မခတ်ပါနဲ့တော့။”

“ဟုတ်ကဲ့”

ကျန်းတောက်ယွဲ့ တို့နှစ်ဦးမှာ ထပ်မံ၍ အရိုအသေပြုကာ အလွန်ပင် ရိုသေစွာဖြင့် ဖြေကြားလိုက်သည်။ နောက်တစ်စက္ကန့်တွင် ကြီးမားသော လက်မှာ ပျောက်ကွယ်သွားသည်။

ကျန်းတောက်ယွဲ့ က လီမော့ ကို ကြည့်ကာ ပြုံး၍ ပြောသည်။

“ဒီကိစ္စ ခဏတော့ ပြီးဆုံးသွားပြီ။”

“တရားခံကို မဖမ်းမိသရွေ့ မပြီးဆုံးသေးပါဘူး၊ ဒါပေမဲ့ ငါတို့ကတော့ အလျှော့ပေးရမှာပဲ…”

လီမော့ က ခေါင်းညိတ်လိုက်သည်။ ထို့နောက် သူတို့နှစ်ဦးမှာ အရင်က ဖြစ်ပျက်ခဲ့သည်များကို ဘာမှ မသိသကဲ့သို့ ဝမ်ချုံစန်း တို့ကို ဆက်လက် စောင့်ကြည့်နေကြသည်။

……

ဖန့်ချန် ပိတ်ကာကြီး မှ အာရုံကို ပြန်ရုပ်သိမ်းလိုက်ရာ အလွန်ပင် တုန်လှုပ်သွားသည်။ လီရွှမ်ရှု ကိစ္စမှာ စုံစမ်းစစ်ဆေးခြင်း မရပ်တန့်ခဲ့ဘဲ နောက်ဆုံးတွင် ထိုသို့သော ပုံစံဖြင့် ပြီးဆုံးသွားသည်။

“သူတို့က ဒီ ဟင်းလင်းပြင် ကွပ်မျက်သူ နောက်ကွယ်က လူကို လိုက်လံ မစုံစမ်းတော့ဘူးလား စုံစမ်းဖို့ ခက်လို့လား ဒါမှမဟုတ် သူက အခြားတစ်ယောက်ရဲ့ ကျွန်ပြုခြင်းကို ခံထားရမှန်း မသိတာလား ”

ထိုအချိန်တွင် လီဝူ က မျက်နှာတင်းမာစွာဖြင့်

“အရှင်သခင်၊ ဆူလုံ ကောင်းကင်အရှင်ကြီး ဆိုတာက ချင်းမင် အဆင့်မြင့်ဆုံး မဟာမိတ်အဖွဲ့ ရဲ့ တရားစီရင်ရေးဌာန က အသက်အရွယ် အကြီးဆုံး ဂုဏ်ထူးဆောင် ကောင်းကင်အရှင် တစ်ပါးပဲ။ ချင်းမင် နယ်မြေ ထဲမှာ ကောင်းကင်အရှင်ကြီး လို့ ခေါ်ဆိုနိုင်တဲ့သူက လက်ချိုးရေလို့ ရတယ်…”

“အဲဒါဆိုရင် သူ့ရဲ့ စွမ်းအားက ဟော်ဆွေ့ ဘိုးဘေး ထက် အများကြီး သာလွန်တယ်ပေါ့”

ဖန့်ချန် မျက်လုံး အရောင်လက်သွားသည်။ လီဝူ က ခေါင်းခါလိုက်သည်။

“သာလွန်တာထက် ပိုတယ်၊ ကောင်းကင်အရှင် ရဲ့ သူတော်စင်အဆင့် မှာလည်း အဆင့် (၃) ဆင့် ရှိတယ်၊ တတိယအဆင့် ရောက်မှသာ ကောင်းကင်အရှင်ကြီး လို့ ခေါ်ဆိုနိုင်တာ။ ကောင်းကင် (၅) ပါး ထဲမှာ ကောင်းကင်အရှင်ကြီး တွေက ရေတွက်လို့ ရတယ်။ ဟော်ဆွေ့ ဘိုးဘေး ဆိုတဲ့ ခွေးအိုကြီးက မကြာသေးခင်ကမှ ကောင်းကင်အရှင် သူတော်စင် ဖြစ်လာတာ၊ ပထမအဆင့် ပဲ ရှိသေးတယ်။ ဆူလုံ ကောင်းကင်အရှင်ကြီး နဲ့ လုံးဝ ယှဉ်လို့ မရဘူး။”

“အဲဒါဆိုရင် ကရုဏာတောင် က ဆူလုံ ကောင်းကင်အရှင်ကြီး ကို ပင့်ဖိတ်ပြီး ထောင်ချောက်ဆင်နိုင်လောက်အောင် အရည်အချင်း ရှိတာပေါ့၊ ဒါပေမဲ့ သူက ဒီကိစ္စ ဒီမှာတင် ပြီးဆုံးပါစေ လို့ ပြောလိုက်တာ၊ နောက်ကွယ်မှာ အကြောင်းရင်း တစ်ခုခု ရှိနေဦးမှာပဲ… ဒီကိစ္စ ဟော်ဆွေ့ ဘိုးဘေး က ကြိုးကိုင်တာ ဖြစ်နိုင်မလား ”

ဖန့်ချန် က လီဝူ ကို ကြည့်သည်။

လီဝူ က မျက်လုံးထဲတွင် အတွေးများဖြင့် ပြုံးလိုက်သည်။

“မဖြစ်နိုင်တာတော့ မဟုတ်ဘူး၊ ဒီကောင်က အတွင်းတိုက်ပွဲ ဆင်နွှဲတဲ့နေရာမှာ အတော်ဆုံးပဲ။”

“အဲဒါဆိုရင် သူ ဒီလို လုပ်တာက ကရုဏာတောင် နဲ့ တကယ်ပဲ ရန်ငြိုးရှိလို့လား ဒါမှမဟုတ် ငါတို့ ရှိနေတာကို သူ သိသွားပြီလား။”

ဖန့်ချန် က မေးသည်။

“အဲဒါတော့ ပြောရခက်တယ်…”

လီဝူ မျက်လုံး အရောင် ပြောင်းသွားသည်။

“ဖြစ်နိုင်ခြေ ရှိတာပဲ။”

“ဆူလုံ ကောင်းကင်အရှင်ကြီး က ယန်တန်းမျိုးနွယ်စု လား ”

“အို၊ ယန်တန်းမျိုးနွယ်စု မဟုတ်ဘူး၊ ဝိညာဉ် မျိုးနွယ်စု က ဆင်းသက်လာတာ။”

“ဝိညာဉ် မျိုးနွယ်စု ကလား”

ဖန့်ချန် ၏ အတွေးများမှာ ရှုပ်ထွေးသွားပြီး ကြိုးမျှင်အချို့ ရောထွေးနေသလို ခံစားလိုက်ရသည်။

အခန်း (၂၃၆၂) - မည်သူက ကျားပါးစပ်ထဲမှ သွားကို နှုတ်ရဲသနည်း

“ဆူလုံ ကောင်းကင်အရှင်ကြီး က ဝိညာဉ် မျိုးနွယ်စု၊ ကရုဏာတောင် က သူ့ကို ပင့်ဖိတ်ပြီး အကူအညီ တောင်းနိုင်တယ်၊ ပြီးတော့ ဆရာ ကလည်း အထက်က ဘိုးဘေးတွေက ယင်လောက မှာ လမ်းကြောင်း တစ်ခု ရှိတယ်လို့ ပြောခဲ့တယ်…”

“ကရုဏာတောင် နဲ့ ဝိညာဉ် မျိုးနွယ်စု က ဆက်ဆံရေး အလွန်ကောင်းမွန်တာလား”

ဖန့်ချန် ၏ စိတ်ထဲတွင် ရှုပ်ထွေးနေသော ကြိုးမျှင်များမှာ တဖြည်းဖြည်းနှင့် ရှင်းလင်းလာသကဲ့သို့ ခံစားလိုက်ရသည်။ အဘိုးအိုတို့အဖွဲ့၏ သေရာပါ လမ်းကြောင်းကို ရွေးချယ်ခဲ့ခြင်းမှာ ဝိညာဉ် မျိုးနွယ်စု နှင့် သက်ဆိုင်နေသည်။

အဘယ်ကြောင့်ဆိုသော် ယင်နတ်သားရဲ ‘ယဲ့’ ကြောင့် အဘိုးအိုတို့အဖွဲ့မှာ ယင်လောက ထဲတွင် လမ်းကြောင်း တစ်ခု ရှိနေသည်နှင့် တူနေသည်။ ထို့နောက် သူသည် အဖြူရောင် ဝတ်စုံနှင့် ပုဂ္ဂိုလ်ကြီး၏ ပို့ဆောင်ပေးမှုဖြင့် ရွှေဟွေး ပညာသင်ကျောင်းတော် သို့ ရောက်ရှိခဲ့ပြီး နောက်ဆုံးတွင် ကရုဏာတောင် သို့ ဝင်ရောက်ခဲ့ခြင်း ဖြစ်သည်။ နှစ်ဖက်စလုံးက ယင်လောက နှင့် အလွန် နီးစပ်သည့် ဆက်ဆံရေး ရှိနေခြင်းမှာ တိုက်ဆိုင်မှုသက်သက် ဖြစ်နိုင်ပါ့မလား။

“ဖြစ်နိုင်တာက တိုက်ဆိုင်မှုပါပဲ၊ ဒါပေမဲ့ အဘိုးအိုတို့က ငါ့ရဲ့ လမ်းကြောင်းတွေကို ကြိုတင် စီစဉ်ပေးထားတာမျိုးရော ဖြစ်နိုင်မလား ”

ဖန့်ချန် မျက်နှာအမူအရာမှာ ထူးဆန်းသွားသည်။ အဘိုးအိုတို့သည် သေရာပါ လမ်းကြောင်းကို ရွေးချယ်ပြီးနောက် သူ၏ နောက်ဆုံး ဆုတ်ခွာရမည့် လမ်းကြောင်းကိုပင် ကြိုတင် စဉ်းစားပေးထားခဲ့ပုံရသည်။ မည်သို့ပင်ဖြစ်စေ ရွှေဟွေး ပညာသင်ကျောင်းတော်ရှိ လူသားမျိုးနွယ်စု ပညာသင်ကျောင်းတော်မှ တောင်ထိပ်များစွာထဲတွင် ကရုဏာတောင် မှာ အမှန်တကယ်ပင် စိတ်အေးချမ်းဆုံး ဖြစ်ပြီး အထက်က ဆရာများမှာလည်း တပည့်ကို အလွန် အကာအကွယ် ပေးကြသည်။ အစ်ကိုကြီး၊ အစ်မတော်များကြား ဆက်ဆံရေးမှာလည်း ရှုပ်ထွေးမှု နည်းပါးသည်။

ဖန့်ချန် စိတ်အာရုံကို လွှတ်လိုက်ရာ ပိတ်ကာကြီး ထဲမှ မြင်ကွင်းများမှာ မြူခိုးများ တလိပ်လိပ် တက်လာပြီး လျင်မြန်စွာ ပြောင်းလဲသွားကာ နောက်ဆုံးတွင် တည်ငြိမ်သွားသည်။

“ချင်ဖိုကျား၊ မင်း ဘာဖြစ်တာလဲ မျက်နှာက ဘာလို့ ရုတ်တရက် ဒီလောက် ကြည့်မကောင်း ဖြစ်သွားတာလဲ”

ပန်းခြံ တစ်နေရာတွင် ထိုင်နေကြသော လူ ၇ ဦး၊ ၈ ဦးခန့်မှာ မတူညီသည့် မျိုးနွယ်စုများမှ ဖြစ်ကြသည်။ သူတို့ထဲမှ တစ်ဦးမှာ တစ်ကိုယ်လုံး နီရဲနေပြီး အရေပြားအောက်တွင် မီးတောင်ချော်ရည်များ လှုပ်ရှားနေသကဲ့သို့ ရှိသည်။ သူသည် ချင်ဖိုကျား ကို စိုးရိမ်တကြီး ကြည့်ကာ မေးလိုက်သည်။

ဖန့်ချန် ထိုသူမှာ ‘ကျင့်ယန် မျိုးနွယ်စု’ မှ ဖြစ်ကြောင်း မှတ်မိလိုက်သည်။ ကျင့်ယန် မျိုးနွယ်စု မှာ ချင်းမင် အဆင့်မြင့်ဆုံး မဟာမိတ်အဖွဲ့ ထဲတွင် လူသားမျိုးနွယ်စုထက် အဆင့်အတန်း ပိုမိုမြင့်မားသည်။ သူတို့တွင်လည်း ကောင်းကင်အရှင် သူတော်စင် တစ်ပါးတည်းသာ ရှိသော်လည်း ၎င်းတို့၏ အရည်အချင်းမှာ ဟော်ဆွေ့ ဘိုးဘေး ထက် ပိုမို သက်တမ်းရင့်ပြီး မျိုးနွယ်စု၏ အခြေခံအုတ်မြစ်မှာလည်း လူသားမျိုးနွယ်စုထက် ပိုမို ခိုင်မာသည်။

အနီးအနားရှိ အခြားသူများမှာလည်း အလားတူပင်။ အချို့မှာ ကျင့်ယန် မျိုးနွယ်စု နှင့် တူညီပြီး အချို့မှာ လူသားမျိုးနွယ်စုထက် အနည်းငယ် အားနည်းသော်လည်း အားလုံးတွင် ကောင်းကင်အရှင် သူတော်စင် များ ရှိကြသည်။

သူတို့မှာ ကျင့်ကြံခြင်း ကိစ္စများ၊ မဟာမိတ်အဖွဲ့၏ တာဝန်များ၊ ရှေ့တန်း စစ်မြေပြင် အခြေအနေများ သို့မဟုတ် ဒေသအသီးသီးရှိ ဟင်းလင်းပြင် အဝင်ဝ များ၏ အခြေအနေများကို စကားစမြည် ပြောနေကြခြင်း ဖြစ်သည်။ ရုတ်တရက် ချင်ဖိုကျား ၏ မျက်နှာမှာ ဖြူဖျော့သွားပြီး တစ်ကိုယ်လုံးမှ ချွေးအေးများ စီးကျလာသည်။

ဤသည်မှာ အဆင့်မြင့် သူတော်စင် တစ်ဦးအတွက် မဖြစ်သင့်သည့် ကိစ္စ ဖြစ်သည်။ သူတို့အားလုံးမှာ ချင်ဖိုကျား တစ်စုံတစ်ယောက်၏ တိုက်ခိုက်ခြင်းကို ခံလိုက်ရသည်ဟု သံသယ ဖြစ်သွားကြသည်။

ချင်ဖိုကျား ၏ မျက်နှာမှာ မိဘသေဆုံးသွားသကဲ့သို့ ကြည့်မကောင်းလှပေ။ စက္ကန့် ဆယ်ဂဏန်းခန့် ကြာပြီးနောက်မှ သူသည် သက်ပြင်းချလိုက်သည်။ သူသည် အသက်ပြင်းပြင်း ရှူလိုက်ပြီး မျက်နှာတွင် အတင်းအဓမ္မ အပြုံးတစ်ခုကို ဖန်တီးကာ အားလုံးကို လက်ယမ်းပြလိုက်သည်။

“ဘာမှ မဖြစ်ပါဘူး၊ ငါ အဝေးတစ်နေရာမှာ ထားခဲ့တဲ့ နည်းလမ်းတစ်ခုကို တစ်စုံတစ်ယောက်က ဖျက်ဆီးလိုက်လို့ ကိုယ့်ကိုယ်ကိုယ် ပြန်ထိခိုက်သွားတာပါ။”

သူတို့အားလုံးမှာ နားလည်သွားကြသည်။

ကျင့်ယန် မျိုးနွယ်စု မှ ထိုသူက မျက်နှာတင်းမာစွာဖြင့်

“ချင်ဖိုကျား၊ မင်းရဲ့ နည်းလမ်းကို ဘယ်သူက ဖျက်ရဲတာလဲ ငါတို့ ချင်းမင်ဌာန ကို အထင်သေးနေတာလား”

“ဟုတ်တယ်၊ ချင်ဖိုကျား၊ ဖြစ်ပျက်တာကို အမှန်အတိုင်း ပြောပြ၊ ငါတို့ မင်းအတွက် အကြောင်းရင်းကို သွားမေးပေးမယ်။”

“ငါတို့က ချင်းမင်ဌာန ရဲ့ ဒေသအသီးသီးမှာ တာဝန်ယူထားတဲ့ ဒု-ဌာနမှူးတွေပဲ၊ ဘယ်သူကများ ကျားပါးစပ်ထဲက သွားကို နှုတ်ရဲမှာလဲ ”

“လူယိုး ညီလေး၊ စိတ်မတိုပါနဲ့။”

ချင်ဖိုကျား က ကျင့်ယန် မျိုးနွယ်စု မှ ထိုသူကို လက်ယှက်၍ ပြောလိုက်သည်။

“အားလုံးလည်း စိတ်မတိုကြပါနဲ့၊ ဒါက ငါ့ရဲ့ ကိုယ်ရေးကိုယ်တာ ကိစ္စပါ၊ နည်းလမ်း ပျက်သွားတာက ပျက်သွားတာပေါ့၊ ပြဿနာ မရှိပါဘူး။ အခု ရှေ့တန်း စစ်မြေပြင် မှာ အခြေအနေ တင်းမာနေတော့ ငါတို့ လူအင်အား ပိုခွဲပြီး ပုရွက်ဆိတ်အသိုက် တွေကို ရှာဖို့ လိုနေပြီ၊ ကျွန်စစ်သည်တွေ မလုံလောက်တော့ဘူး။”

“ဒါကတော့ လွယ်ပါတယ်၊ လွန်ခဲ့တဲ့ နှစ်အနည်းငယ်က ငါ့လက်အောက်က ချင်းမင်သံတမန် တစ်ယောက်က ပုရွက်ဆိတ်အသိုက် တစ်ခုကို တွေ့ထားတယ်၊ ဒါပေမဲ့ အဲဒီနေရာမှာ သူတော်စင်အဆင့် တက်လှမ်းသူ ရှိနေလို့ မဟာမိတ်အဖွဲ့ စည်းကမ်းအရ အတင်းအဓမ္မ သိမ်းပိုက်လို့ မရဘူး။”

လူယိုး က တွေးတောရင်း ပြောသည်။ ဒု-ဌာနမှူး တစ်ဦးက ပြုံးလျက် ပြောလိုက်သည်။

“ဒါက ဘာခက်လို့လဲ၊ စည်းကမ်းအတွင်းမှာပဲ ဖိအားပေးလိုက်ပေါ့၊ အဲဒီသူကို ငါတို့ ချင်းမင် မှာ နေပြီး ကျင့်ကြံဖို့ စီစဉ်ပေးလိုက်၊ ပုရွက်ဆိတ်အသိုက် ထဲက ကျန်တဲ့သူတွေကိုတော့ ကျွန်စစ်သည်တွေအဖြစ် သတ်မှတ်လိုက်ရင် ပြီးတာပဲ။”

“အခုက အရင်လို မဟုတ်တော့ဘူး၊ ဝိညာဉ် မျိုးနွယ်စု က ဝိညာဉ်ခေါ်ဆောင်သူတွေ ကို ထိန်းချုပ်ရတာ ခက်တယ်၊ အရင်ကဆိုရင် မင်လော့ မျိုးနွယ်စု က ဝိညာဉ်ခေါ်ဆောင်သူတွေ နဲ့ ဆက်ဆံရေး ကောင်းခဲ့တာ။

ဒါပေမဲ့ နောက်ဆုံးတစ်ခါ မင်လော့ မျိုးနွယ်စုက သူတော်စင် တစ်ယောက် ပုန်ကန်သွားကတည်းက ပိုင်ဇီ မျိုးနွယ်စု နဲ့ မင်လော့ မျိုးနွယ်စု ကြားမှာ အပြိုင်အဆိုင် ဖြစ်နေကြတယ်။ သူတို့လည်း အပြစ်ရှာခံရမှာ ကြောက်လို့ ဘာမှ မလုပ်ရဲကြတော့ဘူး။ ဝိညာဉ်ခေါ်ဆောင်သူတွေရဲ့ အကူအညီ မပါဘဲ ငါတို့လုပ်ဆောင်တာတွေက လျှို့ဝှက်ချက်မမြဲနိုင်ဘူး။”

လူယိုး က သက်ပြင်းချသည်။

ထိုစကား ထွက်ပေါ်လာသည်နှင့် အနီးအနားရှိ ဒု-ဌာနမှူးများ အားလုံး ချင်ဖိုကျား ကို ကြည့်လိုက်ကြသည်။ ထိုကိစ္စမှာ လူသားမျိုးနွယ်စု နှင့် အနည်းငယ် သက်ဆိုင်နေသောကြောင့် ဖြစ်သည်။ လူသားမျိုးနွယ်စု ထဲတွင် ပျံ့နှံ့မှု မရှိသော်လည်း မဟာမိတ်အဖွဲ့ အတွက်၊ အာဏာရှိသူများအတွက်မူ ဤသည်မှာ လျှို့ဝှက်ချက် မဟုတ်ပေ။

ချင်ဖိုကျား ၏ မျက်နှာမှာ ပိုမို ကြည့်မကောင်း ဖြစ်လာသည်။ ဖန့်ချန် ထိုစကားကို ကြားပြီးနောက် ပိုင်ဇီဝမ်ချင်း မှာ ယင်နတ်သားရဲ ‘ယဲ့’ ဖြစ်ဖို့ များကြောင်း ခန့်မှန်းမိသည်။ အကယ်၍ မဟုတ်ပါကလည်း ထိုအချိန်က ကူညီခဲ့သော ဝိညာဉ် မျိုးနွယ်စုမှာ ပိုင်ဇီ မျိုးနွယ်စု ဖြစ်ရမည်၊ သူတို့က မင်လော့ မျိုးနွယ်စု ကို တာဝန်ယူခိုင်းပြီး အပြစ်တွေကို မင်လော့ မျိုးနွယ်စု ခေါင်းပေါ် ပုံချလိုက်ခြင်း ဖြစ်သည်။

လူယိုး က သူ့ကို ကြည့်ကာ

“ချင်ဖိုကျား၊ ပြောရရင် အဲဒီ ပုရွက်ဆိတ်အသိုက် က မင်းတို့ လူသားမျိုးနွယ်စု နဲ့ သက်ဆိုင်နေနိုင်တယ်၊ ဒါပေမဲ့ ဟော်ဆွေ့ မျိုးနွယ်စု က အမွေဆက်ခံသူလား ဒါမှမဟုတ် ရှန်းဟုန် မျိုးနွယ်စု က အမွေဆက်ခံသူလား ဆိုတာတော့ မသိဘူး။”

“အင်း”

ချင်ဖိုကျား ခေါင်းမော့လိုက်သည်။ ဖန့်ချန် ၏ အကြည့်များမှာလည်း လူယိုး ထံသို့ ရောက်သွားသည်။

“ငါ့ လက်အောက်က ချင်းမင်သံတမန် ပြောတာကတော့ သူ လူသားမျိုးနွယ်စု အကြောင်း သိပ်မသိဘူးတဲ့၊ ဒါပေမဲ့ ကြည့်ရတာ မင်းတို့ လူသားမျိုးနွယ်စု နဲ့ ဆင်တူတယ်လို့ ပြောတယ်။”

လူယိုး က

“ငါ ကိုယ်တိုင် သွားကြည့်လိုက်မယ်၊ အကယ်၍ သေချာရင် အဲဒီနေရာကို ချင်ဖိုကျား ကိုပဲ တာဝန်ယူခိုင်းလိုက်မယ်လေ။”

“လူယိုး ညီလေးကို အားနာလိုက်တာ၊ အဲဒီနေရာကို သွားဖို့ ဘယ်လောက် ကြာမလဲ ”

ချင်ဖိုကျား က စိုးရိမ်တကြီးဖြင့် မေးသည်။

“အဲလောက် မကြာပါဘူး၊ အဆင်ပြေရင် နှစ်ပေါင်း (၆၀၀) လောက်ပေါ့။”

“ဒါဆိုရင် အဝေးကြီး မဟုတ်ဘူးပဲ။”

ချင်ဖိုကျား ခေါင်းညိတ်သည်။

“လူယိုး ညီလေးကိုပဲ အားကိုးပါတော့မယ်၊ အကယ်၍ ရှန်းဟုန် မျိုးနွယ်စု က ကျန်ရှိသူတွေ ဆိုရင် ငါ ဟော်ဆွေ့ ဘိုးဘေး ကို တင်ပြပြီး လူယိုး ညီလေးကို ကျေးဇူးတင်စကား ဆိုပေးပါ့မယ်။”

“ကောင်းပါပြီ၊ ကောင်းပါပြီ။”

လူယိုး ရယ်မောလိုက်သည်။ ကောင်းကင်အရှင် သူတော်စင် ၏ ကျေးဇူးကို သူ အမှန်တကယ် လိုချင်မိသည်။

“နှစ်ပေါင်း (၆၀၀)…… အဲဒီအချိန်ကျရင် ငါလည်း စွမ်းအင်စုစည်းခြင်း အဆင့် နောက်ဆုံးပိုင်း ကို ရောက်တော့မှာပဲ…”

ဖန့်ချန် တွေးလိုက်သည်။

ထို့နောက် ချင်ဖိုကျား တို့အဖွဲ့မှာ တာဝန်ကိစ္စများကို ဆက်ပြောကြပြီး မကြာမီမှာပင် ထွက်ခွာသွားကြသည်။

……

“အရှင်သခင်၊ ဟင်းလင်းပြင် ကွပ်မျက်သူ နောက်ကွယ်က လူက ချင်ဖိုကျား ပဲ ဖြစ်ဖို့ များပါတယ်။”

လီဝူ မျက်နှာ အေးစက်စက်ဖြင့်

“သူက ဝမ်ချုံစန်း တို့အဖွဲ့ ရှန်းဟုန် မျိုးနွယ်စု က ဖြစ်နေတာကို သံသယ ဝင်သွားတာလား ”

“ဖြစ်နိုင်တယ်၊ ဒါပေမဲ့ သူက ကရုဏာတောင် နဲ့ အရင်ကတည်းက ရန်ငြိုးရှိနေတာ ဖြစ်ဖို့ ပိုများတယ်။ အရင်က ကရုဏာတောင် ဘိုးဘေး နဲ့ လောင်းကစား လုပ်ပြီး တပည့်တွေကို ကောင်းကင်ငါးပါး စစ်မြေပြင် မသွားရအောင် လုပ်တာ သူပဲ ဖြစ်လိမ့်မယ်။”

ဖန့်ချန် ခန့်မှန်းသည်။

ချင်ဖိုကျား မှာ အထွတ်ထိပ်တာအို ပထမအဆင့် ဖြစ်သည်။ ထိုစွမ်းအားမှာ ချင်းမင် အဆင့်မြင့်ဆုံး မဟာမိတ်အဖွဲ့ တွင် အာဏာရှိသော နေရာတစ်ခုဖြစ်သည်။ ကရုဏာတောင် ဘိုးဘေး မှာလည်း ဤစွမ်းအား ရှိနိုင်သည်။

ရှန်းဟုန် က ပြောခဲ့သလို သူတို့ လောင်းကစား လုပ်ခဲ့ခြင်း ဖြစ်ပါက ချင်ဖိုကျား နှင့် ဖြစ်ခြင်းမှာ ဖြစ်နိုင်ချေ ရှိသည်။ ထိုသူမှာ ကောင်းကင်အရှင် အရိုက်အရာ ဆက်ခံသူ ဖြစ်ပြီး တူညီသည့် အဆင့်တွင် ထိပ်တန်း အဆင့်ဖြစ်ကာ လွယ်ကူသည့် ပုဂ္ဂိုလ် မဟုတ်ပေ။

“ဘယ်သူလဲ ဆိုတာ သိရင်တော့ နည်းလမ်းရှာပြီး ဒီကောင်ကို ပြန်တိုက်ခိုက်ဖို့ အခွင့်အရေး ရှိမှာပါ။”

ဖန့်ချန် သည် လင်ယောင် အဆင့်မြင့်ဆုံး မဟာမိတ်အဖွဲ့ ၏ မန်ရှန်း လမ်းကြောင်း သို့ ထွက်ခွာရန် ပြင်ဆင်လိုက်သည်။ အခု သူ၏ အတွင်းကမ္ဘာ အခြေအနေမှာ ပြည့်စုံခြင်းသို့ ရောက်နေပြီ ဖြစ်သည်။ သန့်စင်သော အဆင့် အသကန့်သက်ကို ကျော်လွန်နိုင်မလား စမ်းကြည့်ရမည်။ ကျင့်ယန် မျိုးနွယ်စု မှ လူယိုး ပြောသော ရှန်းဟုန် မျိုးနွယ်စု နှင့် ပတ်သက်၍မူ နှစ်ပေါင်း (၆၀၀) လောက် ရှိသေးသဖြင့် စိုးရိမ်ရန် မလိုသေးပေ။