အခန်း ၂၀၀၅

အပိုင်း ( 2005 ) ဟန်မိသားစုနှင့် ဟဲမိသားစုတို့ ပြန်ပေါ်လာကြပြီ။

ငရဲဖိနှိပ်ကျောက်စာတိုင် သွေးမျိုးဆက်က မူလ အပိုင်းအစနှစ်ခုနှင့် ပေါင်းစပ်ပြီးခဲ့ပြီ ဖြစ်သည်။ ယခုအချိန်တွင်၊ ငရဲဖိနှိပ်ကျောက်စာတိုင်ပေါ်ရှိ စားလုံးနှစ်ခုက စူးစူးရှရှ တောက်ပလျက်ရှိ၏။ ၎င်းတို့က ကြီးမားသော ဖိနှိပ်ခြင်းအင်အားတို့ကို ထုတ်လွှတ်နေကာ မိစ္ဆာနတ်ဘုရားမျိုးနွယ်ဝင် အစစ်အမှန်ဧကရာဇ်ကို ဖိချလိုက်တော့သည်။

"မဟုတ်ဘူး..."

မိစ္ဆာနတ်ဘုရားမျိုးနွယ်ဝင် အစစ်အမှန်ဧကရာဇ်က သွေးပျက်ချောက်ချားစွာ အော်ဟစ်လိုက်သည်။

မိစ္ဆာနတ်ဘုရားမျိုးနွယ်ဝင် အစစ်အမှန်ဧကရာဇ်သည် မူလကပင် ပြင်းထန်စွာ ဒဏ်ရာရရှိနှင့်ပြီး ဖြစ်သည်။ ယခုအချိန်တွင်၊ သူက ရုန်းကန်၍ ထရပ်ပြီး သူ၏လက်ကျန်ခွန်အားဖြင့် ငရဲဖိနှိပ်ကျောက်စာတိုင်ကို ခုခံရန် ကြိုးစားလိုက်၏။

"ဝုန်း..."

မိစ္ဆာနတ်ဘုရားမျိုးနွယ်ဝင် အစစ်အမှန်ဧကရာဇ်က လက်နှစ်ဖက်ကို မြှောက်ကာ သူ့အစွမ်းကုန် ပေါက်ကွဲထုတ်ခဲ့သည်။ သို့သော် သူ၏လက်ဖဝါးများက ငရဲဖိနှိပ်ကျောက်စာတိုင်နှင့် ထိမိသောအခါ သူ့ခန္ဓာကိုယ် ပြင်းထန်စွာ တုန်ခါသွားသည်။ သူ့မျက်နှာပေါ်ရှိ ထိတ်လန့်တုန်လှုပ်မှုများမှာလည် ပိုမိုပြင်းထန်လာတော့သည်။

မိစ္ဆာနတ်ဘုရားမျိုးနွယ်ဝင် အစစ်အမှန်ဧကရာဇ်၏ ခန္ဓာကိုယ်မှ ပေါက်ကွဲသံများ အဆက်မပြတ် ထွက်ပေါ်လာသည်။ အသက်ရှူချိန် အနည်းငယ် ကြာမြင့်ပြီးနောက် သူ့ခန္ဓာကိုယ်က လုံးဝ ပေါက်ကွဲသွား၏။ သူ့တကိုယ်လုံး ပြာကျသွားကာ သိုလှောင်လက်ကောက်တစ်ခုနှင့် ပုဆိန်တစ်လက်သာ ကျန်ရစ်ခဲ့တော့သည်။

လုမင်က သူ့လက်ကိုဝှေ့ယမ်းပြီး သိုလှောင်လက်ကောက်ကို ဆွဲယူလိုက်သည်။

အခြားသူများလည်း သက်ပြင်းရှည်ကြီးကို မှုတ်ထုတ်လိုက်ကြလေသည်။ အစစ်အမှန်ဧကရာဇ်တစ်ပါးနှင့် ရင်ဆိုင်ရသည့်အခါ မည်သည့်ဖိအားမျှ မခံစားရဟု ပြောရန် မဖြစ်နိုင်ပေ။

ကံကောင်းထောက်မစွာပင်၊ တစ်ဖက်လူက အစောပိုင်းမှာ ပြင်းထန်စွာ ဒဏ်ရာရရှိခဲ့ပြီး သူ၏ တိုက်ခိုက်ရေးစွမ်းရည်က သိသိသာသာ လျော့ကျနေခဲ့သည်။ မဟုတ်လျှင်၊ သူတို့အားလုံး တိုက်ခိုက်ကြလျှင်ပင် သူ့ကို ယှဉ်နိုင်စရာ မရှိပါ။

အစစ်အမှန်ဧကရာဇ်က အစစ်အမှန်ဧကရာဇ်သာ ဖြစ်သည်။ ဗလာနယ်ဧကရာဇ်အဆင့်သို့ ကျဆင်းသွားသည့်တိုင်အောင် အလွန်ကြောက်စရာကောင်းနေသေးသည်။

"ဒီနေရာမှာပဲ အရင် အနားယူကြရအောင်"

ချိုင့်ဝှမ်းကို လှည့်ပတ်ကြည့်ရှုပြီးနောက် လုမင်က ပုံမှန်မဟုတ်သောအရာ တစ်ခုခုကို မတွေ့ရတော့ပါ။ ထို့ကြောင့် သူသည် ဤနေရာတွင် ဦးစွာ ပြန်လည်ကုသရန်နှင့် စွမ်းအင်ပြန်လည်ဖြည့်တင်းရန် စီစဉ်ခဲ့သည်။

လူတိုင်းက ခေါင်းညိတ်ပြပြီး တင်ပျဉ်ခွေထိုင်ကာ ပြန်လည်ကုသလိုက်ကြလေသည်။

လုမင်က တောင်နှင့်မြစ် ပန်းချီကားထဲသို့ ဝင်ရောက်ပြီး ကောင်းကင်ဧကရာဇ်၏ခန္ဓာအနီးသို့ ရောက်ရှိလာခဲ့သည်။

လွန်ခဲ့သော နှစ်လအတွင်း လုမင်သည် မိစ္ဆာနတ်ဘုရားမျိုးနွယ်ဝင်များကို သတ်ဖြတ်ပြီး ၎င်းတို့၏ကျောက်ကြမ်းများကို ရရှိလာသည်နှင့် ကောင်းကင်ဧကရာဇ်၏ခန္ဓာထဲကို သန့်စင်စုပ်ယူစေခဲ့သည်။

ယခုအခါ ကောင်းကင်ဧကရာဇ်၏ ခန္ဓာကိုယ်တွင် သိုလှောင်ထားသော စွမ်းအင်က တစ်ဆယ်ရာခိုင်နှုန်းထက် ကျော်လွန်သွားခဲ့ပြီ။ ယခုဆိုလျှင် လုမင်က ကောင်းကင်ဧကရာဇ်၏ ခန္ဓာကိုယ်ကို အပြည့်အဝ ထိန်းချုပ်နိုင်ပြီ ဖြစ်သည်။

သို့သော်လည်း အဆိုးဆုံးအခြေအနေမဟုတ်လျှင် လုမင်က ကောင်းကင်ဧကရာဇ်၏ခန္ဓာကို အလွယ်တကူ အသုံးမပြုပေ။ အသုံးပြုပြီးနောက် ထိုစွမ်းအင်များကို ပြန်လည်ဖြည့်တင်းရန်မှာ ကြောက်စရာကောင်းသော အရင်းမြစ်ပမာဏကို လိုအပ်သည်။

လုမင်က မိစ္ဆာနတ်ဘုရားမျိုးနွယ်ဝင် အစစ်အမှန်ဧကရာဇ်၏ သိုလှောင်လက်ကောက်ကို ထုတ်ယူလိုက်သည်။ နောက်အခိုက်တွင်၊ မြေပြင်ပေါ်မှာ သလင်းကျောက်အပုံလိုက်ကြီး ပေါ်လာ၏။

"သိုင်းဧကရာဇ်တွေမှာ တကယ်ကို အရင်းအမြစ်အများကြီးရှိတာပဲ"

သလင်းကျောက်အပုံကြီးကိုကြည့်ရင်း လုမင်၏ မျက်နှာထက်တွင် အပြုံးတစ်ခု ပေါ်လာသည်။

"ဝုန်း... ဝုန်း..."

ထို့နောက် လုမင်က သူ၏ ကျင့်ကြံမှုနည်းလမ်းကို အသက်သွင်းလိုက်ရာ သလင်းကျောက်များ ပေါက်ကွဲသွား၏။ ထို့နောက် ၎င်းတို့၏ စွမ်းအင်များကို ကောင်းကင်ဧကရာဇ်၏ခန္ဓာက စုပ်ယူသွားခဲ့သည်။

ကျောက်ကြမ်းများ၏ စွမ်းအင်အားလုံးကို စုပ်ယူပြီးနောက် ကောင်းကင်ဧကရာဇ်၏ခန္ဓာတွင် သိုလှောင်ထားသော စွမ်းအင်မှာ တစ်ဆယ့်နှစ် ရာခိုင်နှုန်းသို့ ရောက်ရှိခဲ့သည်။

"ငါသာ အခုချိန် ကောင်းကင်ဧကရာဇ်ရဲ့ခန္ဓာကို ထိန်းချုပ်လိုက်ရင် ဘယ်လောက်တောင် ကြမ်းလိုက်မလဲ"

လုမင်က တကယ်ကို မျှော်လင့်နေခဲ့သည်။

ဒါက ကောင်းကင်ဧကရာဇ်၏ခန္ဓာပင်။ ၎င်းထံမှ ထွက်ပေါ်လာသော စွမ်းအားက မယုံနိုင်စရာကောင်းလွန်းသည်။

ထို့နောက် လုမင်က စွမ်းအင်အရင်းမြစ် ကျောက်ကြမ်းတချို့ကို ထုတ်ယူပြီး သန့်စင်ကာ သူ၏ အထွတ်အထိပ်အခြေအနေကို ပြန်လည်ရောက်ရှိစေခဲ့သည်။

လူတိုင်းက သူတို့၏ အကောင်းဆုံးအခြေအနေသို့ ပြန်လည်ကောင်းမွန်လာသောအခါ ကောင်းကင်ဧကရာဇ်မြို့တော်သို့ ပြန်သွားကြလေသည်။

ဤကာလအတွင်းတွင် ကောင်းကင်ဧကရာဇ်မြို့တော်ရှိ မိစ္ဆာနတ်ဘုရားမျိုးနွယ်စုက အခြေခံအားဖြင့် ရှင်းလင်းသွားခဲ့သည်။ ကောင်းကင်ဧကရာဇ်မြို့တော်က ပြန်လည်ပြင်ဆင်မှုများ စတင်ခဲ့၏။ ယွမ်တောင်မြင့်မြတ်သောကျောင်းတော်ကိုလည်း ပြန်လည်ဖွင့်လှစ်ခဲ့လေသည်။

"မဟာမိတ်ခေါင်းဆောင်၊ ဝေ့မျိုးနွယ်က ပြန်လည်ထူထောင်ရေးတွေ စတင်နေတာကြောင့် ကျုပ်က ဝေ့မျိုးနွယ်ကို ပြန်ရမယ်။ အချိန်ရမယ်ဆိုရင် ဝေ့မျိုးနွယ်ကို လာလည်ဖို့ ဖိတ်ခေါ်ပါတယ်"

ဝေ့ရှန်းက ပြုံးရွှင်စွာ ပြောလိုက်သည်။

"ကောင်းပါပြီ၊ ဝေ့မျိုးနွယ် ပြန်လည်နိုးထလာနိုင်မယ်လို့ မျှော်လင့်ပါတယ်"

လုမင်က ဝေ့ရှန်း၏ ပခုံးကို ပုတ်လိုက်လေသည်။

ဝေ့မျိုးနွယ်စုသည် မူလက ကောင်းကင်ဧကရာဇ်မြို့တော်တွင် အတော်လေး အင်အားကြီးသော အင်အားစုတစ်ခုဖြစ်ခဲ့ပြီး အစစ်အမှန်ဧကရာဇ်တစ်ပါးမှ ခေါင်းဆောင်သည်။

သို့သော်လည်း ဝေ့မျိုးနွယ်စု၏ တည်နေရာက မူလကောင်းကင်ဧကရာဇ်တောင်နှင့် အလွန်နီးကပ်၏။ မိစ္ဆာနတ်ဘုရားမျိုးနွယ် တိုက်ခိုက်သောအခါ ဝေ့မျိုးနွယ်စုက အများဆုံး သက်ရောက်မှုကို ခံခဲ့ရပေသည်။

ထိုတိုက်ပွဲတွင် ဝေ့မျိုးနွယ်စု၏ ထိပ်တန်း အကျော်အအော် အားလုံးနီးပါး ပျောက်ကွယ်သွားခဲ့သည်။ သိုင်းဧကရာဇ်နယ်ပယ်ရှိ အကျော်အမော်များအားလုံးကို မိစ္ဆာနတ်ဘုရားမျိုးနွယ်က သတ်ဖြတ်ခဲ့၏။ ဝေ့မျိုးနွယ်စုက ပျက်သုဉ်းလုနီးပါး ဖြစ်ခဲ့ရပေသညါ။

ဝေမျိုးနွယ်စုတွင် မရှိနေသော မျိုးနွယ်စုဝင် အနည်းငယ်သာ ၎င်းတို့၏အသက်ကို ကယ်တင်နိုင်ခဲ့သည်။

ဥပမာအားဖြင့် ဝေ့ရှန်းသည် ထိုစဉ်က ယွမ်တောင်မြင့်မြတ်သောကျောင်း‌တော်တွင် ရှိနေခဲ့သည်။ ထို့ကြောင့် သူက လွတ်မြောက်ခဲ့ပေသည်။

ယခုအခါ ဝေ့မျိုးနွယ်စု၏ ကျန်ရှိနေသော အဖွဲ့ဝင်များက မျိုးနွယ်စုကို ပြန်လည်တည်ဆောက်နေကြပြီ ဖြစ်သည်။

ဝေ့ရှန်း ထွက်သွားပြီးနောက် လုမင်နှင့် အခြားသူများက ကောင်းကင်ဧကရာဇ်မြို့တော်တစ်ဝိုက်တွင် လှည့်လည်ကြည့်ရှုခဲ့ကြသည်။

ကောင်းကင်ဧကရာဇ်မြို့တော်က ကြီးမားသော တိုက်ပွဲတစ်ခုနှင့် ရင်ဆိုင်ခဲ့ရပြီး ပြင်းထန်စွာ ပျက်စီးဆုံးရှုံးခဲ့သည်။ ၎င်းတို့ကို ပြန်လည်ပြုပြင်ရန် မည်မျှကြာမည်ကို မည်သူမျှ မသိပေ။

"ဝုန်း"

ရုတ်တရက် ကျယ်လောင်သော ပေါက်ကွဲသံတစ်ခု ကြားလိုက်ရပြီး ပြိုကျနေသော နန်းတော်ထဲမှ ပုံရိပ်များစွာ လွင့်ထွက်လာကြသည်။

"မင်းတို့ ဘာလုပ်ကြတာလဲ၊ ဒါက ငါ့လျိုမျိုးနွယ်ရဲ့ နေအိမ်ပဲ"

သူတို့ထဲမှ တစ်ယောက်က နန်းတော်ထဲသို့ကြည့်ကာ အော်ဟစ်လိုက်သည်။

"အခုချိန်ကစပြီး ဒါက ငါ့ဟန်မိသားစုရဲ့ အိမ်တော်ပဲ"

အေးစက်စက်အသံတစ်ခုကို ကြားလိုက်ရသည်။ ထို့နောက် လူဆယ်ယောက်ကျော် ထွက်လာပြီး လေထဲတွင် ပေါ်လာ၏။

"ဟန်မိသားစုကလူတွေ"

လုမင်နှင့် အခြားသူများ၏ မျက်လုံးထဲတွင် အေးစက်သော အလင်းရောင်တစ်ခု လက်သွားသည်။

ထိုစဉ်က တိုက်ပွဲကြီးအတွင်းမှာ ဟန်မျိုးနွယ်စုဝင် တစ်ဦးကိုမျှ မတွေ့ခဲ့ရပေ။ ယခုတော့ တိုက်ပွဲပြီးဆုံးသွားကာ မိစ္ဆာနတ်ဘုရားမျိုးနွယ်လည်း ဖျက်ဆီးခံလိုက်ရပြီးမှ ဟန်မျိုးနွယ်ဟာ ပြန်လည်ပေါ်ထွက်လာကြသည်။

ထို့ပြင်၊ သူတို့၏ အသွင်အပြင်အရ သူတို့ဟာ တခြားအင်အားစုများ၏ နယ်မြေကို ကျူးကျော်ချင်နေပုံရသည်။

"မင်းတို့ ဟန်မျိုးနွယ်က တကယ်ကို စက်ဆုပ်ရွံရှာဖွယ်ကောင်းပြီး အရှက်မရှိတာပဲ။ မိစ္ဆာနတ်ဘုရားမျိုးနွယ်နဲ့ တိုက်ပွဲအတွင်းမှာ ဘာလို့ မင်းတို့ မလှုပ်ရှားခဲ့တာလဲ။ အခု တိုက်ပွဲပြီးသွားမှ ထွက်လာပြီး ငါ့လျိုမျိုးနွယ်ရဲ့ နေအိမ်ကို သိမ်းပိုက်ချင်နေတယ်။ တကယ် ရွံစရာကောင်းတယ်"

လျိုမျိုးနွယ်စုထဲမှ လူငယ်တစ်ယောက်က ဒေါသတကြီး အော်ဟစ်လိုက်သည်။

"ငါ့ရဲ့ ဟန်မျိုးနွယ်ကို စော်ကားဝံ့တယ်လား၊ မင်းသေသင့်တယ်"

ဟန်မျိုးနွယ်စုမှ ကျွမ်းကျင်သူတစ်ဦးက ငေါက်ငမ်းလိုက်သည်။ ဓားအလင်းတစ်ခု ထွက်ပေါ်လာပြီး လျိုမျိုးနွယ်စုမှ လူငယ်ထံ ခုတ်ထစ်လိုက်၏။

ဟန်မျိုးနွယ်စုမှ တိုက်ခိုက်ခဲ့သူမှာ အန္တိမသူတော်စင်နယ်ပယ် ပြီးပြည့်စုံခြင်းအဆင့် ကျင့်ကြံမှုရှိသည်။ လျိုမျိုးနွယ်မှ လူငယ်က လုံးဝ ဆန့်ကျင်နိုင်ခြင်းမရှိပေ။

"ဝုန်း"

ရုတ်တရက်... လက်သီးအင်အားတစ်ခုက လေဟာနယ်ကို ဖြတ်ကျော်ပြီး ဟန်မျိုးနွယ်စုဝင် ကျွမ်းကျင်သူ၏ ဓားအလင်းကို ချေဖျက်ပစ်လိုက်သည်။

လှုပ်ရှားမှုခဲ့သူက ဟွမ်လီပင်။ ဤအခိုက်တွင် သူ့မျက်လုံးများက ဒေါသများဖြင့် ပြည့်နှက်နေသည်။

"ဘယ်သူလဲကွ၊ ငါ့ဟန်မိသားစုရဲ့ အရေးကိစ္စတွေကို ဘယ်လိုတောင်ဝင်စွက်ဖက်ဝံ့တာလဲ။ သေချင်နေတာပဲ"

ဟန်မျိုးနွယ်စုမှ ကျွမ်းကျင်သူများက ဟွမ်လီကို လှမ်းကြည့်လိုက်ပြီး လုမင်နှင့် အခြားသူများကိုပါ ဝေ့ကြည့်လိုက်သည်။

ရုတ်တရက်၊ လူတစ်ယောက်၏ မျက်နှာအမူအရာက ပြောင်းလဲသွားသည်။

"လုမင်... သူက လုမင်ပဲ"

"မင်းရဲ့ ဟန်မိသားစုက စက်ဆုပ်ရွံရှာဖွယ်ကောင်းပြီး အရှက်မရှိတာ အမှန်တရားပဲ။ ဒါကို တခြားသူတွေက ပြောခွင့်မပြုဘူးလား"

လုမင်က အထင်မြင်သေးစွာ ပြောလိုက်၏။

"လုမင်၊ ငါ့ဟန်မိသားစုရဲ့ကိစ္စတွေကို ဝင်စွက်ဖက်ချင်တာ သေချာပြီလား"

ဟန်မိသားစု၏ ဧကရာဇ်တစ်ပိုင်းတစ်ဦးက လုမင်ကို အေးစက်စွာ ကြည့်လိုက်သည်။

"ထွက်သွား"

လုမင်က ရုတ်တရက် ရှေ့သို့ ခြေတစ်လှမ်း လှမ်းလိုက်သည်။ ဟန်မိသားစုဝင် လူဆယ်ယောက်ခန့်အပေါ် ပြင်းထန်သော ဖိအားတစ်ခု ကျရောက်လာ၏။ ဟန်မိသားစုဝင်များ၏ မျက်နှာအမူအရာများက သိသိသာသာ ပြောင်းလဲသွားသည်။ ဤဖိအားအောက်တွင် သူတို့က မဟန်နိုင်ဘဲ အဆက်မပြတ် ဆုတ်ခွာသွားရတော့သည်။

သူတို့၏ မျက်လုံးများတွင် ကြောက်ရွံ့မှုတို့ ပေါ်လာခဲ့သည်။

လုမင်က ပိုပိုပြီး ကြောက်စရာကောင်းလာခဲ့၏။ သာမန်ဧကရာဇ်တစ်ပိုင်းများ လုမင်နှင့် ရင်ဆိုင်ရသောအခါ ခုခံရန်ပင် မစွမ်းနိုင်ကြပေ။

"လုမင်၊ မင်းစောင့်နေပါ"

ဟန်မိသားစု၏ ဧကရာဇ်တစ်ပိုင်းအဆင့် ကျွမ်းကျင်သူတစ်ဦးက ကြိမ်းမောင်းလိုက်သည်။ ထို့နောက်မှာတော့ သူ့လူများနှင့်အတူ ကမန်းကတန်း ထွက်သွားတော့သည်။

"ကျေးဇူးတင်ပါတယ်"

လျိုမျိုးနွယ်စုမှ လူများက လုမင်နှင့် အခြားသူများကို ကျေးဇူးတင်စကားဆိုလိုက်ကြသည်။

လုမင်လည်း ခေါင်းခါပြီး ဘာမှမပြောတော့ဘဲ ဟွမ်လီနှင့် အခြားသူများနှင့်အတူ ဆက်လက်ထွက်ခွာခဲ့လေသည်။

သူက လျိုမျိုးနွယ်စုကို ယာယီသာ ကူညီနိုင်မည်ဖြစ်ကြောင်း သူနားလည်သည်။ ဟန်မိသားစုက ပြန်လာပြီး လျိုမျိုးနွယ်စုကို သိမ်းပိုက်ချင်နေလျှင် လျိုမျိုးနွယ်စုကို ကယ်တင်နိုင်မည် မဟုတ်ပေ။

သူတို့က ဆက်လက်၍ လှည့်လည်နေကြသည်။ သို့သော်လည်း နောက်ထပ်မြင်တွေ့ရသည့်အရာက သူတို့အား ဒေါသဖြင့် ပြည့်နှက်စေခဲ့သည်။

ဟန်မိသားစုပြန်လာရုံသာမက ဟဲမိသားစုလည်း ပြန်ပေါ်လာခဲ့သည်။

ကောင်းကင်ဧကရာဇ်မြို့တော်တွင် ဤမိသားစုနှစ်ခုက မဟာဧကရာဇ်အဆင့် အင်အားစုများ ဖြစ်ကြသည်။ သူတို့သည် အလွန်အင်အားကြီးမား၏။

သို့သော်လည်း၊ ဤမိသားစုနှစ်ခု၏ ပုံရိပ်များကို ယခင်တိုက်ပွဲတွင် မည်သည့်နေရာတွင်မျှ မတွေ့ခဲ့ရပါ။ တိုက်ပွဲပြီးဆုံးပြီးမှ ဤမိသားစုနှစ်စုမှ လူများ ပြန်ပေါ်လာခဲ့သည်။

အရေးကြီးဆုံးအချက်က ဟန်မိသားစုနှင့် ဟဲမိသားစုတို့သည် အခြေအနေကို အခွင့်ကောင်းယူကာ အခြား အင်အားစုများ၏ နယ်မြေများကို သိမ်းပိုက်ရန် ကြိုးစားနေခြင်းပင်။

အတိတ်ကာလတွင် ဟန်မိသားစုနှင့် ဟဲမိသားစုက ရန်သူများ ဖြစ်ခဲ့သည်။ ကောင်းကင်ဧကရာဇ်မြို့တော်ရှိ အခြားအင်အားစုများကလည်း အလွန်အားကောင်းကြ၏။ ၎င်းတို့အတူတကွ လက်တွဲလိုက်ပါက ထိုမိသားစုကြီးနှစ်ခုကို ယှဉ်ပြိုင်နိုင်သေးသည်။

သို့သော်လည်း မိစ္ဆာနတ်ဘုရားမျိုးနွယ်စုနှင့် တိုက်ပွဲအပြီးတွင် ကောင်းကင်ဧကရာဇ်မြို့တော်ရှိ အင်အားစုများစွာက ကြီးမားသောဆုံးရှုံးမှုများ ကြုံတွေ့ခဲ့ရပြီး ဟန်မိသားစုနှင့် ဟဲမိသားစုတို့ကို တိုက်ခိုက်နိုင်ခြင်း မရှိတော့ပေ။