အခန်း ၂၀၄၃

အပိုင်း ( 2043 ) အင်မော်တယ်နတ်ဆိုးတိုင်းပြည်၏ ပါရမီရှင်။

"ဘာလဲ... ခင်ဗျားတို့က ကျုပ်ကို မတိုက်ရဲကြတော့ဘူးလား"

ယွမ်ထို့က မထီမဲ့မြင် ပြုံးကာ လှောင်ပြောင်လိုက်၏။

"ကျွန်မ တိုက်မယ်"

တစ်စုံတစ်ယောက်က အော်ဟစ်လိုက်ပြီး ရှေ့သို့ လှမ်းထွက်လာခဲ့သည်။ ထိုသူမှာ လော့ရွှမ်ပင်။

"လှလိုက်တဲ့ မိန်းကလေး...၊ ဟားဟားဟား... စိတ်မပူပါနဲ့။ ကျုပ်က မိန်းမလှလေးတွေကို ညှာတာတတ်တဲ့သူပါ။ ခဏနေရင် ကျုပ် မင်းကို ကြင်ကြင်နာနာ ဆက်ဆံပါ့မယ်"

ယွမ်ထို့က ရယ်မောရင်း ဆိုလိုက်သည်။

"အရှက်မရှိ ပြောရဲလိုက်တာ"

လော့ရွှမ်က အေးစက်စွာ ပြန်ပြောလိုက်၏။ သူက ယွမ်ထို့အပေါ် အလွန်ပင် မကျေမနပ် ဖြစ်နေချေပြီ။

သူတို့နှစ်ဦးမှာ တစ်ဦးနှင့်တစ်ဦး မျက်နှာချင်းဆိုင်ရပ်လိုက်ကြသည်။ သူတို့၏ အရှိန်အဝါများမှာ ပတ်ဝန်းကျင်သို့ ပျံ့နှံ့သွား၏။

တိုက်ပွဲစင်မြင့်ပေါ်တွင် ရှိနေကြသော ပါရမီရှင်များက အောက်သို့ ဆင်းသွားကြပြီး စင်မြင့်အပြင်ဘက်မှ စောင့်ကြည့်နေကြတော့သည်။

"မိန်းမလှလေး... ကျုပ်က အင်မော်တယ်နတ်ဆိုးတိုင်းပြည်မှာ အဆင့် နှစ်ဆယ့်ငါး ရှိတဲ့သူပါ။ မင်းကရော ထာဝရနတ်ဆိုးတိုင်းပြည်မှာ ဘယ်အဆင့်ရှိလဲဆိုတာ သိပါရစေဦးကွယ်"

ယွမ်ထော့က ပြီတီတီဖြင့် မေးလိုက်သည်။

"အဆင့် နှစ်ဆယ့်နှစ်"

လော့ရွှမ်က အေးစက်စွာပင် ပြန်ဖြေလိုက်၏။

"အဆင့် နှစ်ဆယ့်နှစ်... ဟုတ်လား။ ဟားဟားဟား... ဒီလောက်ဆိုရင်တော့ ကျုပ်က မင်းကို အနိုင်ယူနိုင်ပါတယ်"

ယွမ်ထို့ ရယ်မောလိုက်သည်။ သူ့ အရှိန်အဝါမှာ ပိုမိုပြင်းထန်လာပြီး လော့ရွှမ်ထံသို့ ဖြတ်သန်းသွား၏။

"စီရင်ခြင်း"

လော့ရွှမ်က တိုးတိုးလေး ရေရွတ်လိုက်ပြီး သူမ၏ စီရင်ခြင်းနိယာမကို အသုံးပြုကာ ယွမ်ထို့ကို ပြန်လည် ရင်ဆိုင်လိုက်တော့သည်။

"ဝုန်း..."

ကျယ်လောင်သော ပေါက်ကွဲသံကြီး ထွက်ပေါ်လာပြီး သူတို့နှစ်ဦးစလုံး နောက်သို့ လွင့်စင်သွားကြသည်။ သူတို့၏ ခွန်အားမှာ တူညီနေကြပေသည်။

ယွမ်ထို့၏ မျက်နှာက တည်ကြည်သွားပြီး လော့ရွှမ်ထံသို့ တစ်ဖန် ပြန်လည် ပြေးဝင်သွားသည်။ လော့ရွှမ်ကလည်း ပြန်လည် တိုက်ခိုက်လိုက်၏။

သူတို့နှစ်ဦးမှာ အပြင်းအထန် တိုက်ခိုက်နေကြတော့သည်။

ယွမ်ထို့က အလွန် အစွမ်းထက်သည်။ သူ့တွင် ဘုရင်ခန္ဓာရှိပြီး သူ့ခွန်အားက လော့ရွှမ်ထက် မနိမ့်ကျပေ။ သူတို့နှစ်ဦးမှာ တိုက်ကွက်ပေါင်း ဒါဇင်နှင့်ချီကာ ဖလှယ်ခဲ့ကြသော်လည်း အနိုင်အရှုံး မပေါ်ဘဲ ဖြစ်နေသည်။

သို့သော်လည်း ထာဝရနတ်ဆိုးတိုင်းပြည်မှ လူအများ၏ မျက်နှာများမှာမူ ပျက်ယွင်းနေကြပြီ။

ယွမ်ထို့က အင်မော်တယ်နတ်ဆိုးတိုင်းပြည်တွင် အဆင့် နှစ်ဆယ့်ငါးသာရှိသည်ဟု ဆိုထားပြီး လော့ရွှမ်မှာမူ အဆင့် နှစ်ဆယ့်နှစ် ဖြစ်သည်။ အကယ်၍ သူတို့နှစ်ဦးက လက်ရည်တူ ဖြစ်နေပါက၊ ထာဝရနတ်ဆိုးတိုင်းပြည်မှာ ပို၍ အားနည်းနေသည်ဟု ဆိုလိုရာ မရောက်ပေဘူးလား။

"ဝုန်း... ဝုန်း..."

တိုက်ပွဲစင်မြင့်ပေါ်တွင် သူတို့နှစ်ဦးက တိုက်ကွက်ပေါင်း ဒါဇင်နှင့်ချီကာ ဖလှယ်နေကြသော်လည်း လက်ရည်တူနေဆဲ ဖြစ်သည်။

ထိုခဏတွင်၊ ယွမ်ထို့၏ မျက်လုံးများမှာ ရုတ်တရက် အေးစက်သွားသည်။

သူသည် ပထမဆုံး တိုက်ခိုက်ရသူ ဖြစ်သဖြင့် သရေကျနေခြင်းကို လုံးဝ အလိုမရှိပေ။

"ဝှစ်..."

ယွမ်ထို့က သူ၏ တိုက်ကွက်များကို ရုတ်တရက် ပြောင်းလဲလိုက်သည်။ သူ၏ လက်သည်းကုပ်ချက်များမှာ လျှပ်စီးလက်သကဲ့သို့ မြန်ဆန်လှ၏။ ၎င်းက လော့ရွှမ်၏ ရင်ဘတ်နှင့် အခြားသော မိန်းကလေးများ၏ မသင့်လျော်ရာ နေရာများကို ဖမ်းကိုင်ရန် ကြိုးစားလာတော့သည်။

လော့ရွှမ် မျက်နှာပျက်သွားသည်။ သူက အနည်းငယ် ပျာယာခတ်သွားပြီး အားနည်းချက်များလည်း ပေါ်လာတော့သည်။

"ယုတ်မာလိုက်တာ... မင်း ဘယ်လိုတောင် ဒီလို အောက်တန်းကျတဲ့ နည်းလမ်းကို သုံးဝံ့ရတာလဲ"

ထာဝရနတ်ဆိုးတိုင်းပြည်မှ တစ်စုံတစ်ယောက်က အော်ဟစ်လိုက်သည်။

"ရယ်စရာပဲ။ အသက်လုပြီး တိုက်ခိုက်ရတဲ့ တိုက်ပွဲတစ်ခုမှာ ဘယ်နည်းလမ်းမဆို သုံးလို့ရတယ်။ ဒီလို အခြေခံလေးကိုတောင် မသိဘဲနဲ့ နတ်ဆိုးနယ်မြေမှာ ဘယ်လိုလုပ် ကျင့်ကြံနေတာလဲ"

အင်မော်တယ်နတ်ဆိုးတိုင်းပြည်မှ တစ်စုံတစ်ယောက်က လှောင်ပြောင်လိုက်၏။ ထာဝရနတ်ဆိုးတိုင်းပြည်မှ လူများမှာ အလွန်ပင် မကျေမနပ် ဖြစ်သွားကြသော်လည်း မပြောနိုင်တော့ပေ။

"ဝုန်း..."

လော့ရွှမ်မှာလည်း အခြေအနေ ဆိုးရွားလာပြီး နောက်ဆုံးတွင် ပြိုင်ဘက်ကို မယှဉ်နိုင်တော့ပါ။ ပြိုင်ဘက်၏ တိုက်ခိုက်မှုတစ်ခုကို ခံလိုက်ရပြီးနောက် ပါးစပ်ထဲမှ သွေးများ အန်ထွက်လာကာ နောက်သို့ ဆုတ်ခွာသွားရတော့သည်။

"ဝှစ်..."

ယွမ်ထို့က ရူးသွပ်သော တိုက်ခိုက်မှုများကို ဆက်လက် ပြုလုပ်နေဆဲ ဖြစ်သည်။ လော့ရွှမ်မှာလည်း ဒဏ်ရာရရှိသွားပြီး ဦးမမော့နိုင်သည့် အခြေအနေသို့ ရောက်ရှိသွားခဲ့ပြီ။

'မိန်းမလှလေး... ကျုပ်ကို မင်းရဲ့အထိအတွေ့က ဘယ်လိုနေမယ်ဆိုတာ မြည်းစမ်းခွင့် ပေးပါဦး'

ယွမ်ထို့က အကြိမ်ကြိမ် လှောင်ပြောင်နေသည်။ သူက သူမထံသို့ ချဉ်းကပ်လာပြီး အသံပို့လွှတ်၍ ပြောလိုက်၏။

လော့ရွှမ်က ဒေါသတကြီးဖြင့် အံကြိတ်ထားသော်လည်း ပြိုင်ဘက်ကို အမှန်တကယ် မယှဉ်နိုင်ပေ။ တိုက်ကွက်အနည်းငယ် အကြာတွင် သူက ထပ်မံ၍ လွင့်စင်သွားပြန်သည်။

လော့ရွှမ်လည်း အံကြိတ်လိုက်ပြီး တိုက်ပွဲစင်မြင့်အောက်သို့ ပြေးဆင်းသွားတော့သည်။

သူက ဤတိုက်ပွဲတွင် ရှုံးနိမ့်သွားပြီ ဖြစ်ကြောင်း နားလည်လိုက်သည်။ အကယ်၍၊ ဆက်လက် တိုက်ခိုက်နေပါက ပြိုင်ဘက်၏ အရှက်ခွဲမှုကိုသာ ခံရပေလိမ့်မည်။

"ဘယ်ကို သွားမလို့လဲ"

ယွမ်ထို့၏ လှုပ်ရှားမှုမှာ အလွန်တရာ မြန်ဆန်သည်။ သူက လော့ရွှမ်၏ အနီးသို့ ချက်ချင်း ရောက်ရှိသွားပြီး လက်ဝါးရိုက်ချက်တစ်ခု ရိုက်ထုတ်လိုက်၏။

လော့ရွှမ်မှာ ဤတိုက်ခိုက်မှုကို ရှောင်တိမ်းနိုင်ခြင်း မရှိတော့ပေ။

ပွဲကြည့်စင်တွင် ထိုင်နေသော လုမင်မှာ တိုက်ပွဲစင်မြင့်ပေါ်ရှိ အခြေအနေကို သေချာစွာ စောင့်ကြည့်နေခဲ့ခြင်း ဖြစ်သည်။ ထိုခဏတွင် သူ၏ မျက်လုံးများမှာ အေးစက်သွား၏။ သူ့ခန္ဓာကိုယ်ကို တစ်ချက်လှုပ်လိိုက်ပြီး လေးညှို့မှ ပစ်လွှတ်လိုက်သော မြှားတစ်စင်းကဲ့သို့ ခုန်ဝငိသွားတော့သည်။ သူက အဝေးမှပင် လက်ဝါးရိုက်ချက်တစ်ခုကို ရိုက်လွှတ်လိုက်ရာ လက်ဝါးပုံရိပ်တစ်ခု ထွက်ပေါ်လာပြီး ယွမ်ထို့ထံသို့ တိုးဝင်သွားခဲ့သည်။

ဤပွဲမျိုးတွင်၊ သိုင်းဧကရာဇ်နယ်ပယ်နှင့် အထက် ရှိသူများက ဝင်ရောက် စွက်ဖက်နိုင်ခြင်း မရှိပေ။ သို့ရာတွင်၊ မျိုးဆက်သစ် လူငယ်တစ်ဦးအနေဖြင့် သူက ဝင်ရောက် လုပ်ဆောင်နိုင်သည်။

ယွမ်ထို့၏ မျက်နှာအမူအရာမှာ ပြောင်းလဲသွားသည်။ သူက အစွမ်းကုန်သုံးပြီး လုမင်၏ လက်ဝါးပုံရိပ်ကို ပြန်လည် တိုက်ခိုက်လိုက်၏။

ပေါက်ကွဲသံတစ်ချက်နှင့်အတူ သူ့ခန္ဓာကိုယ်က ပြင်းထန်စွာ တုန်ခါသွားကာ နောက်သို့ ခြေလှမ်းအနည်းငယ် ဆုတ်ခွာသွားရတော့သည်။

"ဝှစ်..."

လုမင်က ရှေ့သို့ ပြေးထွက်သွားပြီး လော့ရွှမ်၏ သွယ်လျသော ခါးလေးကို ပွေ့ဖက်ကာ ပွဲကြည့်စင်ပေါ်သို့ ပြန်လည် ခေါ်ဆောင်လာခဲ့သည်။

"ဟေ့ကောင်... မင်းက ငါတို့ရဲ့ တိုက်ပွဲထဲကို ဝင်ရောက် စွက်ဖက်လိုက်တာလား။ မင်း စည်းမျဉ်းတွေကို ချိုးဖောက်ချင်နေတာလား"

ယွမ်ထို့က ပျက်ယွင်းနေသော မျက်နှာဖြင့် ဆိုလိုက်သည်။

"လော့ရွှမ်က တိုက်ပွဲစင်မြင့်ရဲ့ အပြင်ဘက်ကို ရောက်သွားခဲ့ပြီ၊ အဲဒါက ရှုံးနိမ့်မှုကို ဝန်ခံလိုက်တာနဲ့ အတူတူပဲ။ တကယ်လို့ မင်းက ဆက်ပြီး တိုက်ခိုက်နေမယ်ဆိုရင် မင်းကပဲ စည်းမျဉ်းတွေကို အရင်ဆုံး ချိုးဖောက်လိုက်တာ ဖြစ်လိမ့်မယ်"

လုမင်က အေးဆေးစွာပင် ပြောလိုက်၏။

လော့ရွှမ်၏ ခန္ဓာကိုယ်မှာ အမှန်တကယ်ပင် စင်မြင့်အပြင်ဘက်သို့ ရောက်ရှိသွားခဲ့ပြီ ဖြစ်သည်။

သူ့ခန္ဓာကိုယ်က စင်မြင့်အပြင်ဘက်သို့ ရောက်သွားခြင်းက ရှုံးနိမ့်မှုကို ဝန်ခံလိုက်ခြင်းဖြစ်ရာ... ယွမ်ထို့က ဆက်လက် တိုက်ခိုက်နေချိန်တွင် လုမင်အနေဖြင့် ကူညီပေးခြင်းမှာ သဘာဝကျသည်။

"ဟမ့်... ကောင်လေး၊ မင်းက မိန်းမလှလေးကို ကယ်တင်တဲ့ သူရဲကောင်း လုပ်ချင်တာလား။ ဒါဆိုရင် မင်းမှာ ဘာအရည်အချင်း ရှိလဲဆိုတာ ငါ ကြည့်ရသေးတာပေါ့"

ယွမ်ထို့၏ မျက်လုံးများထဲတွင် သတ်ဖြတ်လိုသော အရိပ်အယောင်တစ်ခု ဖြတ်ပြေးသွားခဲ့သည်။ သူ့ထံမှ အားကောင်းသော အရှိန်အဝါ ဖိအားက လုမင်အပေါ် ကျရောက်သွား၏။

လုမင်ကလည်း လော့ရွှမ်ကို လွှတ်ပေးလိုက်ပြီး တိုက်ခိုက်ရန် ပြင်ဆင်လိုက်သည်။

သို့သော်လည်း၊ ထိုအခိုက်တွင် ခက်ထန်သော အသံတစ်သံ ထွက်ပေါ်လာသည်။

"လုမင်... မင်း ဘာလုပ်နေတာလဲ။ ဒါက မင်းနဲ့ မဆိုင်ဘူး။ တိုက်ပွဲစင်မြင့်ပေါ်ကနေ အခုချက်ချင်း ဆင်းသွားစမ်း"

စန်းယန် တိုက်ပွဲစင်မြင့်ပေါ်သို့ ဆင်းသက်လာပြီး လုမင်ကို အေးစက်စွာ ကြည့်လိုက်သည်။ သူက ဆူပူကြိမ်းမောင်းလိုက်၏။

"ပါဝင်ယှဉ်ပြိုင်ဖို့ အရည်အချင်းတောင် မရှိတဲ့သူက ဘယ်တုန်းကများ တိုက်ပွဲထဲကို ဝင်စွက်ဖက်ခွင့် ရသွားတာလဲ။ အင်မော်တယ်နတ်ဆိုးတိုင်းပြည်က ပါရမီရှင်တွေနဲ့ တိုက်ခိုက်ဖို့ဆိုတာ ငါတို့ရဲ့ တာဝန်ပဲ ဖြစ်ရမယ်။ အခုချက်ချင်း ထွက်သွားစမ်း"

လုမင်၏ မျက်လုံးများထဲတွင် အေးစက်သော အလင်းတစ်ခု ဖြတ်ပြေးသွားခဲ့၏။ နောက်ဆုံးတွင်၊ သူက နှာခေါင်းရှုံ့ပြီး ပြောလိုက်သည်။

"ဪ... ကောင်းပြီ၊ အဲဒါဆိုရင် မင်းတို့ပဲ လုပ်လိုက်ကြတော့။ လော့ရွှမ်... သွားကြမယ်"

လုမင်နှင့် လော့ရွှမ်တို့မှာ သူတို့၏ ထိုင်ခုံများဆီသို့ ပြန်သွားခဲ့ကြသည်။

"ခင်ဗျား တိုက်ပွဲကို ဆက်ချင်သေးလား"

စန်းယန်က ယွမ်ထို့ကို ကြည့်ကာ မေးလိုက်သည်။

"ခင်ဗျားက ထာဝရနတ်ဆိုးတိုင်းပြည်မှာ ဘယ်အဆင့် ရှိလဲ"

ယွမ်ထို့က မေးလိုက်သည်။

"တတိယ"

စန်းယန်က ဝင့်ကြွားစွာပင် ပြန်ဖြေသည်။

"ခင်ဗျားက အင်မော်တယ်နတ်ဆိုးတိုင်းပြည်မှာ အဆင့် နှစ်ဆယ့်ငါးပဲရှိတဲ့ ကျုပ်နဲ့ တိုက်ချင်တာလား"

ယွမ်ထို့က လှောင်ပြောင်သရော်ဟန်ဖြင့် ဆိုလိုက်သည်။

"ခင်ဗျား တိုက်ချင်တယ်ဆိုရင်တော့ ကျုပ်က တခြားတစ်ယောက်ကို လွှတ်လိုက်မယ်"

စန်းယန်က ပြောလိုက်၏။ သူသည် လူတိုင်းက သူ၏ အမိန့်ကို နားထောင်ရမည် ဖြစ်သည့်အလား 'လွှတ်လိုက်မယ်' ဟူသော စကားလုံးကို အသုံးပြုလိုက်ခြင်း ဖြစ်သည်။

"ကျုပ်က တစ်ပွဲ နိုင်သွားပြီပဲ။ ကျုပ် ဆက်မတိုက်တော့ဘူး"

ယွမ်ထို့က တစ်ချက်ပြုံးလိုက်ပြီး တိုက်ပွဲစင်မြင့်ပေါ်မှ ထွက်ခွာသွားတော့သည်။

ထို့နောက် အင်မော်တယ်နတ်ဆိုးတိုင်းပြည်မှ အခြားသော လူငယ်တစ်ဦး ပေါ်ထွက်လာခဲ့၏။

"ကျုပ်က အောင်ရွှမ်... အင်မော်တယ်နတ်ဆိုးတိုင်းပြည်မှာ အဆင့် တစ်ဆယ့်ငါးပါ။ ဘယ်သူ ကျုပ်နဲ့ တိုက်ချင်လဲ"

အောင်ရွှမ်၏ အသံမှာ ပဲ့တင်ထပ်သွားသည်။

"ကျုပ် တိုက်မယ်"

ထာဝရနတ်ဆိုးတိုင်းပြည်မှ လူငယ်တစ်ဦးက စင်မြင့်ပေါ်သို့ တက်လာခဲ့သည်။ သူသည်လည်း ထာဝရနတ်ဆိုးတိုင်းပြည်တွင် အဆင့် တစ်ဆယ့်ငါး ဖြစ်၏။

တိုက်ပွဲက စတင်ခဲ့သော်လည်း နောက်ဆုံးရလဒ်မှာ ထာဝရနတ်ဆိုးတိုင်းပြည်မှ လူများကို မျက်နှာပျက်စေခဲ့သည်။

အကွက်ပေါင်း ဒါဇင်အနည်းငယ်အတွင်းမှာပင် ထာဝရနတ်ဆိုးတိုင်းပြည်မှ ပါရမီရှင်မှာ ရှုံးနိမ့်သွားခဲ့ရပေသည်။

သူတို့နှစ်ဦးစလုံးမှာ အဆင့် တစ်ဆယ့်ငါး အသီးသီး ဖြစ်ကြသော်လည်း ထာဝရနတ်ဆိုးတိုင်းပြည်မှ ပါရမီရှင်မှာ အောင်ရွှမ်ကို လုံးဝ မယှဉ်နိုင်ခဲ့ပေ။ ဤသည်မှာ ထာဝရနတ်ဆိုးတိုင်းပြည်မှ ပါရမီရှင်များက အင်မော်တယ်နတ်ဆိုးတိုင်းပြည်၏ ပါရမီရှင်များထက် နိမ့်ကျနေသည်ဟု ဆိုလိုရာ မရောက်ပေဘူးလား။

"ဘယ်သူ ကျုပ်နဲ့ ထပ်တိုက်ချင်သေးလဲ"

အောင်ရွှမ်က အနိုင်ရရှိသွားသော်လည်း နောက်သို့ မဆုတ်သွားဘဲ တိုက်ပွဲကို ဆက်လက် ဆင်နွှဲချင်နေသည်။

ထို့နောက် ထာဝရနတ်ဆိုးတိုင်းပြည်မှ အဆင့် တစ်ဆယ့်သုံးရှိသော ပါရမီရှင်က တက်ရောက် တိုက်ခိုက်ခဲ့ပြန်သည်။

သူတို့နှစ်ဦးက တိုက်ကွက်ပေါင်း ရာနှင့်ချီကာ ဖလှယ်ခဲ့ကြ၏။ သို့သော်လည်း၊ နောက်ဆုံးမှာတော့ အောင်ရွှမ်ကပင် အထက်စီးမှ အနိုင်ရရှိသွားခဲ့ပြန်တော့သည်။

ထို့နောက် ပညာဖလှယ်ပွဲများမှာ ဆက်လက် ကျင်းပနေခဲ့သော်လည်း ထာဝရနတ်ဆိုးတိုင်းပြည်မှ ပါရမီရှင်များမှာ အားနည်းချက် ဖြစ်နေခဲ့ရသည်။

တိုင်းပြည်နှစ်ခုလုံး၏ အဆင့်သတ်မှတ်ချက်များမှာ တူညီနေကြသော်လည်း၊ စင်စစ်တွင် ထာဝရနတ်ဆိုးတိုင်းပြည်မှ အဆင့် အနည်းငယ် ပိုမြင့်သော ပါရမီရှင်များမှာပင် အင်မော်တယ်နတ်ဆိုးတိုင်းပြည်မှ ပါရမီရှင်များကို မယှဉ်နိုင်ကြချေ။ ထာဝရနတ်ဆိုးတိုင်းပြည်မှ အဆင့် သုံးဆင့် သို့မဟုတ် လေးဆင့်ခန့် ပိုမြင့်သော သူများသာလျှင် သူတို့ကို ယှဉ်ပြိုင်နိုင်ခြင်း သို့မဟုတ် အနိုင်ယူနိုင်ခြင်း ပြုလုပ်နိုင်ကြသည်။

တစ်ရက်အကြာတွင်၊ အင်မော်တယ်နတ်ဆိုးတိုင်းပြည်မှ အဆင့်ခြောက်ရှိသော ပါရမီရှင်က ထာဝရနတ်ဆိုးတိုင်းပြည်မှ စတုတ္ထအဆင့်ရှိသော ပါရမီရှင်ကို အနိုင်ယူခဲ့ပေသည်။

"ဝှစ်..."

ထို့နောက် အင်မော်တယ်နတ်ဆိုးတိုင်းပြည်မှ အခြားသော လူငယ်တစ်ဦးက စင်မြင့်ပေါ်သို့ လှမ်းတက်လာခဲ့သည်။ ဤလူငယ်မှာ အင်မော်တယ်နတ်ဆိုးတိုင်းပြည်တွင် စတုတ္ထအဆင့် ဖြစ်၏။

"ထာဝရနတ်ဆိုးတိုင်းပြည်ရဲ့ ထိပ်သီးသုံးဦးက အလွန်တရာ ပါရမီထူးချွန်တဲ့သူတွေလို့ ကျုပ် ကြားထားတယ်။ ဘယ်သူက တတိယအဆင့်လဲ... ထွက်လာပြီး ကျုပ်နဲ့ တိုက်ခိုက်ပါ"

ထိုသူက ပြောလိုက်သည်။

စန်းယန်မှာ မျက်နှာပျက်ပျက်ဖြင့် ရှေ့သို့ လှမ်းထွက်လာခဲ့၏။

"ဝုန်း..."

သူတို့နှစ်ဦးက စတင် တိုက်ခိုက်ကြတော့ရာ ပြင်းထန်သော တိုက်ပွဲကြီးတစ်ခု ဖြစ်ပွားလာတော့သည်။

အင်မော်တယ်နတ်ဆိုးတိုင်းပြည်မှ ပါရမီရှင်ကလည်း နိယာမအလင်းကို လေ့ကျင့်ထားကြောင်း သံသယဖြစ်စရာ မလိုပါ။ သူ၏ တိုက်ခိုက်မှုများက အလွန်အစွမ်းထက်သည်။ သူ၏ တိုက်ခိုက်မှုတိုင်းတွင် နတ်ဆိုးနတ်ဘုရားတစ်ပါး နိုးထလာသကဲ့သို့ ကြောက်မက်ဖွယ်ရာ အသံများ ထွက်ပေါ်နေတော့သည်။