အခန်း ၂၀၄၅

အပိုင်း ( 2045 ) ရှေးဟောင်း ကျင့်ကြံခြင်းစနစ်။

ရှေးနတ်ဆိုးက လက်သီးဖြင့် ထိုးနှက်လိုက်ရာ သူ၏လက်သီးပေါ်တွင် အနက်ရောင်အလင်းတန်းတစ်ခု ဖုံးလွှမ်းသွားသည်။

"ဝုန်း"

ထိုလက်သီးချက်က ဟင်းလင်းပြင်ကို ဆွဲဖြတ်လိုက်သည့်အလား ဟင်းလင်းပြင်နိယာမနှင့် ထိပ်တိုက်တွေ့ဆုံသွား၏။

အံ့ဩစရာကောင်းအောင် ထိုလက်သီးချက်က ဟင်းလင်းပြင်နိယာမပေါ်သို့ ကျရောက်သွားချိန်တွင်၊ ဟင်းလင်းပြင်နိယာမက ရှေးနတ်ဆိုး၏ လက်သီးဒဏ်ကြောင့် ဆုတ်ဖြဲခံရတော့မည့်အလား ပြင်းထန်စွာ တုန်ခါသွားတော့သည်။

"တကယ်ကို ကြောက်စရာကောင်းတဲ့ တိုက်ခိုက်မှုပဲ။ ဒါပေမဲ့ သူ့ဆီကနေ နိယာမလှိုင်းကို ဘာဖြစ်လို့ မခံစားရတာလဲ"

"ကျုပ်လည်း မခံစားရဘူး။ ဘာတွေဖြစ်နေတာလဲ"

လူအချို့က အံ့အားသင့်စွာ ပြောဆိုလိုက်ကြသည်။

လုမင်၏ မျက်လုံးများက တောက်ပသွားသည်။ သူ အံ့အားသင့်သွားမိ၏။

သူသည်လည်း ရှေးနတ်ဆိုးထံမှ နိယာမစွမ်းအားကို မခံစားရပေ။ နိယာမအားလုံးကို ဆုတ်ဖြဲနိုင်စွမ်းရှိသည့် အလွန်တရာ သိပ်သည်းလှသော ပေါက်ကွဲအားနှင့် တိုက်ခိုက်ရေးစွမ်းအားကိုသာ သူ ခံစားလိုက်ရသည်။

"ဖြစ်နိုင်တာက..."

မျိုးဆက်ဟောင်း ပုဂ္ဂိုလ်အချို့မှာမူ တစ်စုံတစ်ခုကို သဘောပေါက်သွားပုံရပြီး အံ့သြမှင်တက်သွားကြတော့သည်။

"သတ်"

ထာဝရနတ်ဆိုးတိုင်းပြည်မှ ဟင်းလင်းပြင်သားတော်က ဟိန်းဟောက်လိုက်သည်။ ဟင်းလင်းပြင်အလင်းက ထွက်ပေါ်လာပြီး သူ့ခန္ဓာကိုယ်ကို ဝန်းရံလိုက်၏။ သူက အစွမ်းကုန် အသုံးထုတ်နေပြီ။ ဟင်းလင်းပြင်နိယာမနှင့် သူတော်စင်စွမ်းအင်တို့ ပေါင်းစပ်သွားပြီး နတ်ဆိုးဓားတစ်လက်အဖြစ် ပြောင်းလဲသွားခဲ့သည်။

"ဟင်းလင်းပြင်ဓားသွား... အရာအားလုံးကို ဗလာနတ္ထိအဖြစ် ပြောင်းလဲစေ"

ဟင်းလင်းပြင်သားတော်၏ မျက်လုံးများတွင် အေးစက်သော သတ်ဖြတ်လိုစိတ်များ ပြည့်နှက်နေသည်။ သူက လက်ကို ဝှေ့ယမ်းလိုက်ရာ ဟင်းလင်းပြင်ဓားသွားများက ရှေးနတ်ဆိုးထံသို့ ဖြတ်သန်းသွား၏။

ထိုဟင်းလင်းပြင်ဓားသွားများ၏ ထိမှန်မှုကို ခံရသည်နှင့် အရာခပ်သိမ်းက ဗလာနတ္ထိအဖြစ်သို့ ပြောင်းလဲသွားမည်ဖြစ်သည်။ အခြေခံအကျဆုံး အမှုန်အမွှားလေးပင် ကျန်ရှိတော့မည် မဟုတ်ပေ။

ဤသည်မှာ ဟင်းလင်းပြင်နိယာမ၏ ကြောက်မက်ဖွယ်ကောင်းသော အစွမ်းပင် ဖြစ်သည်။

သို့သော်လည်း ရှေးနတ်ဆိုးမှာမူ အနည်းငယ်မျှ ကြောက်ရွံ့ခြင်း မရှိပေ။ သူ့ခန္ဓာကိုယ်ကို အနက်ရောင်နတ်ဆိုးအလင်းတန်းများ ဖုံးလွှမ်းနေပြီး လက်သီးဖြင့် အဆက်မပြတ် ထိုးနှက်နေသည်။

"ဒုန်း... ဒုန်း..."

သူ၏ လက်သီးများက ဟင်းလင်းပြင်ဓားသွားများနှင့် အဆက်မပြတ် ထိပ်တိုက်တွေ့သွားသည်။ ကောင်းကင်ထက်တွင် နားကွဲမတတ် ကျယ်လောင်သော အသံများ ထွက်ပေါ်လာ၏။

မျက်စိတစ်မှိတ်အတွင်းမှာပင် သူတို့နှစ်ဦးက တိုက်ကွက်ပေါင်း တစ်ဒါဇင်ကျော် ဖလှယ်ခဲ့ပြီးပြီ။

"ဝုန်း... ဝုန်း"

တိုက်ကွက်ပေါင်း တစ်ဒါဇင်ကျော်အကြာတွင် ဟင်းလင်းပြင်ဓားသွားများက ရှေးနတ်ဆိုး၏ လက်သီးဒဏ်ကြောင့် အစိတ်စိတ်အမြွှာမြွှာ ကွဲအက်သွားတော့သည်။

ရှေးနတ်ဆိုးက လေထုကို နင်းကာ တက်လှမ်းလာသည်။ နတ်ဆိုးအလင်းတန်းများက သူ့ကို ဝန်းရံထားပြီး အလွန်တရာ ဝင့်ကြွား၏။ သူ့ကိုကြည့်ရသည်မှာ ရှေးဟောင်းနတ်ဆိုးနတ်ဘုရားကြီးတစ်ပါး နိုးထလာသကဲ့သို့ပင်။

"ဝုန်း..."

ရှေးနတ်ဆိုးက မုန်တိုင်းတိုက်ခတ်သကဲ့သို့ ပြင်းထန်သော တိုက်ခိုက်မှုများကို စတင်လိုက်သည်။ ဟင်းလင်းပြင်သားတော်က ခဏချင်း ဖိနှိပ်ခံလိုက်ရပြီး နောက်သို့ ဆုတ်ခွာသွားရတော့သည်။

ထာဝရနတ်ဆိုးတိုင်းပြည်မှ မျိုးဆက်သစ်လူငယ်များမဆိုထားဘိ၊ ဧကရာဇ်အဆင့် ကျွမ်းကျင်သူများပင် တုန်လှုပ်နေကြပြီ ဖြစ်သည်။

ဟင်းလင်းပြင်သားတော်က တိုက်ကွက်ပေါင်း ဒါဇင်အနည်းငယ်အတွင်းမှာပင် ဖိနှိပ်ခံလိုက်ရခြင်း ဖြစ်၏။

ဤသည်မှာ ပထမအဆင့် ရရှိထားသော သေခြင်း၏သားတော်ပင်လျှင် မလုပ်ဆောင်နိုင်သည့် အရာဖြစ်သည်။

ထို့ပြင် ရှေးနတ်ဆိုး၏ ခန္ဓာကိုယ်မှ မည်သည့် နိယာမလှိုင်းကိုမျှ သူတို့ မခံစားရပေ။

"သူက ဘယ်လိုလုပ်ပြီး ဒီလောက် ကြောက်စရာကောင်းနေရတာလဲ။ သူ့ရဲ့ကျင့်ကြံမှုက အန္တိမသူတော်စင်နယ်ပယ် ပြီးပြည့်စုံခြင်းအဆင့်မှာပဲ ရှိတာကို ကျုပ် ရှင်းရှင်းလင်းလင်းခံစားရတယ်... ဒါပေမဲ့ သူက ဘာဖြစ်လို့ ကောင်းကင်သားတော်ထက်တောင် ပိုပြီး အစွမ်းထက်နေရတာလဲ"

"သူက ဘယ်လိုနိယာမကို ထိန်းချုပ်ထားတာလဲ"

"ကျုပ်က နိယာမစွမ်းအားကို လုံးဝ မခံစားရဘူး"

မယုံကြည်နိုင်သော အသံများမှာ တစ်သံပြီး တစ်သံ ထွက်ပေါ်နေတော့သည်။

"ဒါ... ရှေးဦးနတ်ဆိုးကျင့်ကြံသူများလား"

"ဟုတ်ရမယ်... အဲဒါ ရှေးဦးနတ်ဆိုးကျင့်ကြံသူပဲ ဖြစ်ရမယ်။ အဲဒါကြောင့်သာ ဒီလောက် ကြောက်စရာကောင်းတဲ့ စွမ်းအားရှိနေတာပေါ့။ ယွမ်လုမှာ ရှေးဦးနတ်ဆိုးကျင့်ကြံသူ ပေါ်လာလိမ့်မယ်လို့ ကျုပ်မထင်ထားခဲ့ဘူး"

ထိုခဏတွင် ဆံပင်ဖြူအဖိုးအိုအချို့က တုန်လှုပ်ချောက်ချားစွာ ပြောလိုက်ကြသည်။

"ရှေးဦးနတ်ဆိုးကျင့်ကြံသူ... ဟုတ်လား"

လူအများက အံ့ဩသွားကြသည်။ ဤဝေါဟာရကို သူတို့ ပထမဆုံးအကြိမ် ကြားဖူးခြင်းပင်။

"ကောင်းကင်လောကရဲ့ ကျင့်ကြံမှု သမိုင်းကြောင်းက ယွမ်လု(ရှေးဦးလောက)ထက် အများကြီး ပိုစောပါတယ်။ ဒဏ္ဍာရီတွေအရဆိုရင် ကောင်းကင်လောကရဲ့ ရှေးခေတ် ကျင့်ကြံမှုစနစ်ဟာ အခုခေတ် ကျင့်ကြံမှုစနစ်နဲ့ လုံးဝ ကွဲပြားတယ်"

"အဲဒီအချိန်တုန်းက ကျင့်ကြံသူတွေဟာ နိယာမစွမ်းအားတွေကို မကျင့်ကြံဘူး။ အဲဒီအစား ကိုယ့်ရဲ့ ခန္ဓာကိုယ်ကိုပဲ အဓိကထားပြီး လေ့ကျင့်ကြတယ်။ ကျင့်ကြံမှု အောင်မြင်တဲ့သူတွေက အရမ်း ကြောက်စရာကောင်းတဲ့ တိုက်ခိုက်ရေးစွမ်းအားတွေ ရှိနိုင်တယ်။ အကြွင်းမဲ့ခွန်အား တစ်ခုတည်းက နည်းလမ်းပေါင်းစုံကို ဖြိုခွဲနိုင်တယ်ဆိုတဲ့ ဆိုရိုးစကားတောင် ရှိခဲ့သေးတယ်"

"ရှေးဦးကျင့်ကြံမှုစနစ်ကို အမျိုးအစားများစွာ ခွဲခြားထားတယ်။ အဲဒီခေတ်က ရှေးဦးနတ်ဆိုးကျင့်ကြံသူတွေဟာ စစ်မှန်တဲ့ နတ်ဆိုးကျင့်ကြံသူတွေပဲ။ သူတို့ရဲ့ နတ်ဆိုးစွမ်းအားက တုန်လှုပ်စရာကောင်းသလို သူတို့ရဲ့ တိုက်ခိုက်ရေးစွမ်းအားကလည်း ပြိုင်ဘက်ကင်းပဲ"

အဖိုးအိုတစ်ဦးက ရှင်းပြလိုက်သည်။

လူတိုင်းမှာလည်း အံ့အားသင့်သွားကြ၏။ ရှေးနတ်ဆိုးက ထိုရှေးဦးကျင့်ကြံမှုစနစ်ကို ကျင့်ကြံထားခြင်း ဖြစ်မည်လော။

"ရှေးနတ်ဆိုးက ရှေးဦးနတ်ဆိုးလမ်းစဉ်ကို လေ့ကျင့်နေတာ ဖြစ်ရမယ်။ ဒါပေမဲ့ ရှေးဦးကျင့်ကြံမှုစနစ်က ကျင့်ကြံဖို့ အရမ်းခက်ခဲသလို အောင်မြင်ဖို့ဆိုရင် ပိုခက်ခဲတယ်လေ။ နောက်ပိုင်း နိယာမစနစ် ထွန်းကားလာတဲ့အခါ ရှေးဦးကျင့်ကြံမှုစနစ်က တဖြည်းဖြည်း ပျောက်ကွယ်သွားခဲ့ရတယ်။ အခု ကောင်းကင်လောကမှာတောင် အလွန်ရှားသွားပြီလေ။ ဒါက ယွမ်လုမှာ ပြန်ပေါ်လာလိမ့်မယ်လို့ မထင်ထားဘူး"

လုမင်တို့၏ ဘေးတွင်ရှိသော လော့မျိုးနွယ်ခေါင်းဆောင်က သက်ပြင်းချရင်း ပြောလိုက်သည်။ သူသည်လည်း ထိုအကြောင်းအရာအချို့ကို ကြားဖူးပေသည်။

မျိုးဆက်ဟောင်း ကျင့်ကြံသူအချို့မှာမူ သက်ပြင်းချနေမိကြသည်။ စင်စစ်တွင်၊ ယခုခေတ် နတ်ဆိုးကျင့်ကြံသူများကို စစ်မှန်သော နတ်ဆိုးကျင့်ကြံသူများဟု မသတ်မှတ်နိုင်တော့ပါ။

လော့ရွှမ်၊ ဝူရှီနှင့် အခြားသူများလည်း တုန်လှုပ်နေခဲ့ကြရသည်။

ယခုအချိန်တွင် ရှေးနတ်ဆိုးက အပြည့်အဝ အသာစီးရနေသည်။ ဟင်းလင်းပြင်သားတော်မှာ ဆက်တိုက် ဆုတ်ခွာနေရ၏။ နောက်ဆုံးတွင် ရှေးနတ်ဆိုးက ဟင်းလင်းပြင်နိယာမကို လက်သီးဖြင့် ထိုးဖောက်လိုက်တော့သည်။

ဟင်းလင်းပြင်နိယာမက အရာအားလုံးကို ဟင်းလင်းပြင်အဖြစ် ပြောင်းလဲနိုင်သည်ဟု ဆိုသော်လည်း ရှေးနတ်ဆိုး၏ ခန္ဓာကိုယ်ပေါ်ရှိ နတ်ဆိုးအလင်းတန်းကိုမူ မဖြိုခွဲနိုင်ပေ။ ဆန့်ကျင်ဘက်အနေဖြင့်၊ နတ်ဆိုးအလင်းတန်းကသာ ဟင်းလင်းပြင်နိယာမကို ထိုးဖောက်သွားခြင်း ဖြစ်သည်။

တစ်ချိန်တည်းမှာပင် နတ်ဆိုးအလင်းက ဟင်းလင်းပြင်သားတော်၏ နိယာမအလင်းကို ဆုတ်ဖြဲပစ်လုနီးပါး ဖြစ်သွားခဲ့၏။ ဟင်းလင်းပြင်သားတော်မှာ ဒယီးဒယိုင်ဖြင့် ဆုတ်ခွာလိုက်ရပြီး သွေးတစ်လုပ် အန်လိုက်ရတော့သည်။

"ခင်ဗျား ရှုံးသွားပြီ"

ရှေးနတ်ဆိုးက လေထဲတွင် ရပ်တန့်ပြီး အေးဆေးစွာ ပြောလိုက်သည်။ သူ့ရုပ်ရည်က သာမန်ဖြစ်သော်လည်း သူ့ဟန်ပန်မှာ ပြိုင်ဘက်ကင်းသော ယုံကြည်ချက်များဖြင့် ပြည့်နှက်နေပေသည်။

ဟင်းလင်းပြင်သားတော်၏ မျက်နှာမှာ ဖြူလျော်သွားသည်။ သူသည် တိုက်ကွက်အနည်းငယ်အတွင်းမှာပင် ရှုံးနိမ့်သွားခဲ့ရခြင်း ဖြစ်၏။

ထို့ပြင် ပြိုင်ဘက်၏ ကျင့်ကြံမှုမှာလည်း သူ့ထက် မြင့်မားမနေပေ။ သူတို့က အဆင့်တူများသာ ဖြစ်ကြသည်။ ဤသည်မှာ သူ့အတွက် ကြီးမားသော ထိုးနှက်ချက်တစ်ခုပင်။

ကောင်းကင်သားတော်တိုင်းမှာ ပြိုင်ဘက်ကင်းသော ယုံကြည်ချက် ရှိကြသည်။ အစွမ်းထက်သော ပြိုင်ဘက်အားလုံးကို အနိုင်ယူကာ အထွတ်အထိပ်သို့ တက်လှမ်းနိုင်မည်ဟု ယုံကြည်ထားကြ၏။

သူက သေခြင်း၏သားတော်ထံတွင် ရှုံးနိမ့်ခဲ့ရခြင်းမှာ သေခြင်း၏သားတော်က သူ့ထက်စော၍ အန္တိမသူတော်စင်နယ်ပယ် ပြီးပြည့်စုံခြင်းအဆင့်သို့ ရောက်ရှိခဲ့ပြီး နိယာမကိုလည်း ပိုမိုကျွမ်းကျင်သောကြောင့် ဖြစ်သည်ဟု သူ ယူဆထားသည်။

သူသာ ထိုအဆင့်သို့ ရောက်ရှိသွားပါက ရှုံးနိမ့်မည် မဟုတ်ဟု ထင်ထားခဲ့ခြင်းပင်။

သို့သော်လည်း ယခုမူ သူက ရှေးနတ်ဆိုးထံတွင် ရှုံးနိမ့်သွားခဲ့ချေပြီ။

ဟင်းလင်းပြင်သားတော်၏ မျက်နှာအမူအရာမှာ အမျိုးမျိုး ပြောင်းလဲသွားပြီးနောက် နောက်ဆုံးတွင် ခေါင်းခါကာ သက်ပြင်းချလိုက်သည်။ သူက ထိုင်ခုံတစ်ခုပေါ်သို့ ဆင်းသက်လိုက်ပြီး ဒဏ်ရာများကို ကုသရန် စွမ်းအင်များကို လည်ပတ်စေလိုက်တော့သည်။

ထိုခဏတွင် ရှေးနတ်ဆိုးက သေခြင်း၏သားတော်ကို လှည့်ကြည့်လိုက်သည်။

"ခင်ဗျားကရော တိုက်ချင်သေးလား"

ရှေးနတ်ဆိုးက အေးဆေးစွာပင် မေးလိုက်သည်။

ထာဝရနတ်ဆိုးတိုင်းပြည်မှ သေခြင်းရဲ့သားတော်၏ အမည်မှာ ကောလုံ ဖြစ်သည်။ ဤအခိုက်တွင် သူ၏ မျက်နှာအမူအရာမှာ လေးနက်နေ၏။

ရှေးနတ်ဆိုး၏ ဆိုလိုရင်းမှာ ရှင်းလင်းသည်။ ကောလုံက ဟင်းလင်းပြင်သားတော်ထက် အနည်းငယ်မျှသာ ပို၍ အစွမ်းထက်သော်လည်း ရှေးဟောင်းနတ်ဆိုးကမူ ဟင်းလင်းပြင်သားတော်ကို အလွယ်တကူ အနိုင်ယူနိုင်ခဲ့ခြင်း ဖြစ်သည်။

မည်သူက ပို၍ အစွမ်းထက်သည်မှာ ထင်ရှားလှပေသည်။

"တိုက်မယ်"

ကောလုံက ပွင့်လင်းသည်။ သူက ရှေ့သို့ လှမ်းထွက်လာခဲ့ပြီး သေဆုံးခြင်း၏ အလင်းက သူ့ခန္ဓာကိုယ်ကို ဝန်းရံလိုက်၏။

"ကျုပ်တို့ တစ်ကွက်တည်းနဲ့ပဲ ဆုံးဖြတ်ကြရအောင်။ တကယ်လို့ ကျုပ်က ခင်ဗျားကို တစ်ကွက်တည်းနဲ့ မနိုင်ရင် ကျုပ် ရှုံးနိမ့်မှုကို ဝန်ခံလိုက်မယ်"

ကောလုံက ရှေးနတ်ဆိုးကို စိုက်ကြည့်ကာ ပြောလိုက်သည်။

"ဆန္ဒရှိသလိုပဲ"

ရှေးနတ်ဆိုးက ယုံကြည်မှုအပြည့်ရှိပြီး အေးဆေးစွာပင် ပြန်ပြောလိုက်၏။

ထာဝရနတ်ဆိုးတိုင်းပြည်မှ လူအများမှာတော့ အလွန် စိတ်လှုပ်ရှားနေကြချေပြီ။

ကောလုံက သူတို့၏ နောက်ဆုံး မျှော်လင့်ချက် ဖြစ်သည်။ အကယ်၍၊ ကောလုံသာ ရှုံးနိမ့်သွားပါက ထာဝရနတ်ဆိုးတိုင်းပြည်မှာ အရှက်တကွဲ ရှုံးနိမ့်ရမည်မှာ အမှန်ပင်။

ထာဝရဧကရာဇ်၏ မျက်နှာမှာလည်း မည်းမှောင်နေပြီ ဖြစ်သည်။

အင်မော်တယ်ဧကရာဇ်က သူ့မျက်နှာကို လာရောက် ရိုက်နှက်နေခြင်း ဖြစ်ကြောင်း သူ ကောင်းစွာ သိရှိ၏။

သူက ကပ်ဘေးဒုက္ခကို ကျော်ဖြတ်နိုင်ခဲ့ပြီး တစ်တိုင်းပြည်လုံး ပျော်ရွှင်နေချိန်တွင်၊ အင်မော်တယ်ဧကရာဇ်က အရှက်ခွဲရန် ရောက်ရှိလာခြင်း ဖြစ်သည်။

တိုက်ပွဲစင်မြင့်ပေါ်တွင်၊ ကောလုံနှင့် ရှေးနတ်ဆိုးတို့က မျက်နှာချင်းဆိုင် ရပ်နေကြသည်။

သူတို့၏ အရှိန်အဝါများက တဖြည်းဖြည်း ပြင်းထန်လာပြီး အထွတ်အထိပ်သို့ ရောက်ရှိသွား၏။ ထိုအချိန်တွင် ကောလုံက စတင် လှုပ်ရှားလိုက်တော့သည်။

"သေခြင်းတရားရဲ့ ချောက်ကမ်းပါး"

ကောလုံက လက်ကို ဝှေ့ယမ်းလိုက်သည်။ ဟင်းလင်းပြင်ထဲမှ ကြီးမားလှသော ချောက်ကမ်းပါးကြီးတစ်ခု ပေါ်ထွက်လာ၏။

ထိုချောက်ကမ်းပါးက အလွန်ကြီးမားပြီး မှင်ကဲ့သို့ မည်းနက်နေကာ သေခြင်းတရား အငွေ့အသက်များ ပြည့်နှက်နေသည်။ ၎င်းက အရာခပ်သိမ်းကို မြှုပ်နှံပစ်တော့မည့်အလားပင်။

ကောလုံနှင့် မရဏဓားတို့ နှစ်ဦးစလုံးက သေဆုံးခြင်းနိယာမကို ထိန်းချုပ်ထားကြသော်လည်း သူတို့ အသုံးပြုသည့် ပုံမှာမူ အလွန်ပင် ကွဲပြားသည်။

‌

နောက်ဆုံးမှာတော့ လက်ချောင်းများပင် အတိုအရှည် ရှိကြသေးသည် မဟုတ်လော။ တူညီသော နိယာမဖြစ်သော်လည်း မတူညီသော လူများအတွက် အသုံးပြုပုံ ကွာခြားခြင်းမှာ သဘာဝ ဖြစ်သည်။