အခန်း ၂၀၈၆
Vol. 144 Ch. 2086
အပိုင်း ( 2086 ) လုမင် တုန်လှုပ်သွားသည်။
နိယာမတစ်ခုတည်းနှင့် မလုံလောက်ပါက နှစ်ခုအသုံးပြုမည်။
လုမင်၏ သူတော်စင်စွမ်းအင်များ တိုးမြင့်လာသည်နှင့်အမျှ သူ၏ ကြွက်သားများမှာလည်း ဖောင်းကားလာသည်။ သူသည် အစီရင်နိယာမကို ကစဉ့်ကလျားနိယာမထဲသို့ တိတ်တဆိတ် ပေါင်းစပ်လိုက်၏။
"ဝုန်း"
လုမင်၏ လက်ဝါးအင်အားက ရုတ်တရက် တိုးတက်လာသည်။ သူက ရှေ့သို့ ရိုက်ထုတ်လိုက်ရာ မုယန်၏ ဟင်းလင်းပြင်နိယာမမှာ ချိုးဖျက်ခံလိုက်ရတော့သည်။
မုယန်၏ မျက်နှာအမူအရာက ချက်ချင်းပြောင်းလဲသွားသည်။ သူ့ခန္ဓာကိုယ်မှာလည်း တုန်ခါသွားကာ နောက်သို့ဆုတ်ပေးလိုက်ရတော့သည်။
"မင်းရဲ့ စွမ်းအားက... ဒါ ဘယ်လိုဖြစ်နိုင်မှာလဲ"
မုယန်က ထိတ်လန့်တကြား မေးလိုက်သည်။
လုမင်၏ စွမ်းအားမှာ အဘယ်ကြောင့် ရုတ်တရက် တိုးလာသနည်း။ သူသည် ယခင်ကထက် များစွာ ပိုမိုသန်မာလာခဲ့ပြီ ဖြစ်သည်။
ဟုတ်သည်၊ လုမင်က နိယာမနှစ်မျိုးကို ပေါင်းစပ်အသုံးပြုလိုက်ခြင်းဖြစ်သည်ကိုမူ သူ မသိရှိချေ။
အဆုံးမဲ့နတ်ဆိုးနယ်မြေရှိ နတ်ဆိုးပင်လယ်မှ ချောက်ကမ်းပါးထဲတွင် လုမင်သည် နှစ်နှစ်ကျော်ကြာ နေထိုင်ခဲ့သည်။ ထိုအချိန်က၊ နေ့စဉ်နှင့်အမျှ သူသည် စိန်ခေါ်မှုများကို ရင်ဆိုင် တိုက်ခိုက်ခဲ့၏။ သူက နိယာမများကို အသုံးပြုရာတွင် အလွန်ပင် ကျွမ်းကျင်နေပြီဖြစ်သည်။
သူက နိယာမအမျိုးမျိုးကို အသုံးပြုရာတွင် ကစဉ့်ကလျားနိယာမကို အသုံးပြု၍ အခြားသော နိယာမများကို ဖုံးကွယ်ထားနိုင်သည်။
ဟုတ်သည်၊ အကယ်၍ သူသည် အသန်မာဆုံးနိယာမ နှစ်မျိုးကို တစ်ပြိုင်နက်တည်း အသုံးပြုလျှင်တော့ မတူတော့ပေ။ ၎င်းတို့မှာ အလွန်တရာ အစွမ်းထက်လှသဖြင့် ဖုံးကွယ်ထားရန် ခဲယဉ်းပေလိမ့်မည်။
သို့သော်လည်း အသန်မာဆုံးနိယာမတစ်ခုနှင့် ဘုရင်လမ်းစဉ်နိယာမတစ်ခုကို ပေါင်းစပ်အသုံးပြုပါက အခြားသူများ မမြင်နိုင်အောင် ဖုံးကွယ်ထားနိုင်သည်။
ထို့ကြောင့်ပင် လုမင်၏ စွမ်းအားက ဤမျှအထိ အဘယ်ကြောင့် တိုးတက်လာသည်ကို မုယန် နားမလည်နိုင်ခြင်းပင်။
တိုက်ပွဲစင်မြင့် ပတ်ဝန်းကျင်ရှိ လူအများမှာလည်း တုန်လှုပ်သွားကြသည်။ လုမင်၏ စွမ်းအားက ရုတ်တရက် ပေါက်ကွဲထွက်လာပြီး မုယန်ကို နောက်သို့ ဆုတ်သွားစေခဲ့၏။
"လုမင်က ငါနဲ့ တိုက်တုန်းက သူ့အစွမ်းတွေကို တကယ်ပဲ ဖုံးကွယ်ထားခဲ့တာပဲ"
ယုဟဲက စိတ်ပျက်လက်ပျက်ဖြင့် သက်ပြင်းချလိုက်မိသည်။ သူသည် နယ်မြေဆယ်ခုတိုက်ပွဲတွင် လုမင်ကို အနိုင်ယူရန် ကြံရွယ်ထားသေးသော်လည်း ယခုကြည့်ရသည်မှာ ထိုသို့လုပ်ရန်မှာ ခဲယဉ်းပေလိမ့်မည်။
"အမိတ္တဘ"
ရဟန်း ဝူချန်က ဗုဒ္ဓအမည်ကို ရွတ်ဆိုလိုက်သည်။
အခြားသော ကောင်းကင်သားတော်များမှာမူ လေးနက်သော မျက်လုံးများဖြင့် လုမင်ကို ကြည့်လိုက်ကြ၏။ လုမင်၏ တိုက်ခိုက်နိုင်စွမ်းက အလွန်သန်မာပြီး သာမန်အသိအမြင်များထက် ကျော်လွန်နေပြီ။
"သတ်"
တိုက်ပွဲစင်မြင့်ပေါ်တွင် လုမင်က ဟိန်းဟောက်ကာ မုယန်ထံသို့ ပြေးဝင်သွားသည်။ သူ၏ လှုပ်ရှားမှုတိုင်းတွင် ကစဉ့်ကလျားနိယာမနှင့် အစီရင်နိယာမတို့ ပေါင်းစပ်မှု စွမ်းအားများ ပါဝင်နေ၏။ ၎င်း၏ စွမ်းအားက တယ်ကို အံ့မခန်းပင်။
ထို့ပြင် အစီရင်နိယာမမှာ ပြီးပြည့်စုံနေပြီဖြစ်သဖြင့် ၎င်း၏ စွမ်းအားမှာ ပို၍ ကြီးမားသည်။ နိယာမများ ပေါင်းစပ်လိုက်ခြင်းမှာ တစ်ပေါင်းတစ်ကဲ့သို့ မရိုးရှင်းပေ။ ၎င်းက အဆပေါင်းများစွာ တိုးတက်သွားခဲ့ခြင်း ဖြစ်သည်။ နိယာမများကို ပိုမိုပေါင်းစပ်နိုင်လေ စွမ်းအားက ပို၍သန်မာလာလေပင်။
"ဝုန်း... ဝုန်း..."
လုမင်နှင့် မုယန်တို့ ထပ်မံတိုက်ခိုက်လိုက်ကြသည်။ ယခုတစ်ကြိမ်တွင် မုယန်မှာ လုံးဝ ဖိနှိပ်ခံလိုက်ရပြီး အားနည်းချက် ဖြစ်သွား၏။ သူသည် လုမင်၏ ပြိုင်ဘက် မဟုတ်တော့ချေ။ သူတို့ ရိုက်ခတ်မိတိုင်း မုယန်၏ ခန္ဓာကိုယ်မှာ ရှေးဟောင်း နတ်ဘုရားတောင်တန်းကြီးတစ်ခုနှင့် အတိုက်ခံရသကဲ့သို့ ပြင်းထန်စွာ တုန်ခါသွားရသည်။
သူ၏ အနှိုင်းမဲ့ သန်မာသော သူတော်စင်စွမ်းအားမှာလည်း အသုံးမဝင်တော့ချေ။ သူသည် လုမင်၏ တိုက်ကွက်များကို မတားဆီးနိုင်တော့ပါ။
"မဖြစ်နိုင်တာ... ဒါ ဘယ်လိုဖြစ်နိုင်မှာလဲ"
မုယန်က ဤအချက်ကို လုံးဝ လက်မခံနိုင်အောင် ဖြစ်နေသည်။ သူက ကမ္ဘာငယ်တစ်ခုကိုပင် စတင်ဖော်ဆောင်နေပြီ။ အချိန်တန်လျှင် သူက သိုင်းဧကရာဇ်အဆင့်သို့ တက်လှမ်းနိုင်တော့မည် ဖြစ်သည်။
သူသည် သိုင်းဧကရာဇ်အဆင့်နှင့် အလွန်ပင် နီးစပ်နေပြီဖြစ်သည့်အပြင် ထိပ်တန်းပါရမီရှင် တစ်ဦးလည်း ဖြစ်သေးသည်။ သူက ဧကရာဇ်တစ်ပိုင်းအဆင့်သို့ ရောက်ရုံသာ ရှိသေးသည့် အခြားသော ထိပ်တန်းပါရမီရှင်များထက်ပင် များစွာ ပိုမိုသန်မာသည်။
သို့သော်လည်း လုမင်မှာမူ အန္တိမသူတော်စင်နယ်ပယ် ပြီးပြည့်စုံခြင်းအဆင့်သာ ရှိသေးသည်။ သူ၏ ကစဉ့်ကလျားနိယာမမှာလည်း မြစ်တစ်စင်းအဖြစ်သို့ မရောက်ရှိသေးချေ။ သူက အဘယ်ကြောင့် ဤမျှ သန်မာနေရသနည်း။
မုယန်မှာ လုံးဝ မယုံကြည်နိုင် ဖြစ်နေသည်။ သူသည် ဒေါသတကြီး ဟိန်းဟောက်ပြီး သူ့အစွမ်းရှိသမျှကို ထုတ်သုံးသော်လည်း လုမင်၏ ဖိနှိပ်ခြင်းကို ခံနေရဆဲပင်။
"ဟင်းလင်းပြင်ပင်လယ်"
နောက်ဆုံးတွင် မုယန်က သူ၏ အသန်မာဆုံး တိုက်ကွက်ကို အသုံးပြုလိုက်သည်။ ၎င်းမှာ အတိုင်းအဆမဲ့ စွမ်းအားများ ပါဝင်သည့် ကြောက်မက်ဖွယ်ကောင်းသော နတ်ဘုရားစွမ်းရည်တစ်ခု ဖြစ်၏။ ၎င်းက ဟင်းလင်းပြင်နိယာမ၏ စွမ်းအားကို အစွမ်းကုန် မြှင့်တင်လိုက်ပြီး အရာအားလုံးကို ဝါးမြိုသွားမည့် ဟင်းလင်းပြင်ပင်လယ်ကြီးတစ်ခုကို ဖန်တီးလိုက်သည်။
၎င်းက အရာအားလုံးကို ဘာမျှမရှိခြင်းအဖြစ် ပြောင်းလဲပစ်ရန် ကြိုးစားလာတော့သည်။
အမှန်စင်စစ်တွင် ဧကရာဇ်တစ်ပိုင်းအဆင့်သို့ ရောက်ရှိပြီးနောက် လူအများအပြားမှာ နတ်ဘုရားစွမ်းရည် တစ်ခုထက်မက တတ်မြောက်ထားကြသည်။ ဧကရာဇ်တစ်ပိုင်းအဆင့်သို့ ရောက်ရှိကာ နိယာမများ အထွတ်အထိပ်သို့ ရောက်ရှိသွားချိန်တွင် အခြားသော နတ်ဘုရားစွမ်းရည်များကို လွယ်ကူစွာ တတ်မြောက်နိုင်ပြီး ၎င်းတို့ကို အစွမ်းကုန် မြှင့်တင်နိုင်ပေသည်။
၎င်းမှာ လုမင်က ကစဉ့်ကလျား နတ်ဘုရားလက်ဝါးကို ကျင့်ကြံသကဲ့သို့ပင် ဖြစ်သည်။ ဟုတ်သည်၊ ထိုသို့လုပ်ရန် သက်ဆိုင်ရာ နတ်ဘုရားစွမ်းရည်ကို ပိုင်ဆိုင်ထားရန် လိုအပ်ပေသည်။
ဤ 'ဟင်းလင်းပြင်ပင်လယ်'မှာ မုယန်၏ နောက်ဆုံးဝှက်ဖဲပင် ဖြစ်သည်။
"ဝုန်း"
ရိုက်ခတ်လာသော လှိုင်းလုံးကြီးများ၏ အသံနှင့်အတူ လုမင်သည်လည်း ထိုဟင်းလင်းပြင်ပင်လယ်ကြီး၏ ဝါးမျိုခြင်းကို ခံလိုက်ရတော့သည်။
"နထ္ထိနယ်အဖြစ် ပြောင်းလဲသွားစမ်း"
မုယန်က ဟိန်းဟောက်လိုက်သည်။ သူ့အသံတွင် အတိုင်းအဆမရှိသော သတ်ဖြတ်လိုစိတ်များ ပြည့်နှက်နေ၏။ ယခုအချိန်တွင် သူက လုမင်ထံမှ ကစဉ့်ကလျားကျမ်းကို မလိုချင်တော့ပေ။ လုမင်ကို သတ်ပစ်ရန်သာ ဆန္ဒရှိတော့သည်။
နယ်မြေဆယ်ခုတိုက်ပွဲ မစတင်မီတွင် သူ ရှုံးနိမ့်၍ မဖြစ်ပါ။ အကယ်၍ သူ ရှုံးနိမ့်သွားပါက နယ်မြေဆယ်ခုတိုက်ပွဲတွင်လည်း သူသည် ပြင်းထန်သော ရှုံးနိမ့်မှုနှင့် ကြုံတွေ့ရမည် ဖြစ်သည်။
"တကယ့်ကို ကြောက်စရာကောင်းတဲ့ နတ်ဘုရားစွမ်းရည်ပဲ။ လုမင် အန္တရာယ်ရှိနေပြီ"
တစ်စုံတစ်ယောက်က အော်လိုက်သည်။
ဟင်းလင်းပြင်နိယာမက ပင်လယ်ကြီးတစ်ခုအဖြစ် ပြောင်းလဲသွားကာ ပတ်ဝန်းကျင်တစ်ခုလုံးကို ဖုံးလွှမ်းသွား၏။ ၎င်းက အလွန်ပင် ကြောက်မက်ဖွယ်ကောင်းလှသဖြင့် လူအများမှာ လုမင်အတွက် စိုးရိမ်မကင်း ဖြစ်နေကြတော့သည်။
"မုယန်ကို နယ်မြေဆယ်ခုတိုက်ပွဲမှာ ထိပ်တန်းဆယ်ယောက်စာရင်းထဲ ဝင်နိုင်တဲ့ ပါရမီရှင်တစ်ယောက်လို့ ပြောလို့ရတယ်။ သူသာ စွမ်းအားအပြည့် ထုတ်သုံးလိုက်ရင် သူ့ရဲ့ တိုက်ခိုက်နိုင်စွမ်းက တကယ်ကို တုန်လှုပ်စရာပဲ"
"ဟုတ်တယ်၊ အရင်ကဆိုရင် မုယန်က နတ်ကံကြမ္မာနယ်မြေမှာ အနှိုင်းမဲ့နီးပါးပဲ။ လူငယ်မျိုးဆက်ထဲမှာ သူ့ကို အနိုင်ယူနိုင်တဲ့သူ လက်ချိုးရေလို့ ရတယ်"
လူအချို့က ပြောဆိုလိုက်ကြသည်။
သို့သော်လည်း ချင်ယွဲ့နှင့် ချောင်ခိုင်းတို့၏ မျက်လုံးများမှာမူ တည်ငြိမ်နေဆဲ ဖြစ်သည်။
သူတို့၏ မျက်လုံးများတွင် စိုးရိမ်မှုများ အရိပ်အယောင်ပင် မတွေ့ရချေ။
ချင်ယွဲ့က လုမင် စွမ်းအားအပြည့် ထုတ်သုံးလိုက်လျှင် မည်မျှ သန်မာသည်ကို ကောင်းကောင်း သိထားသည်။ ချောင်ခိုင်းကမူ လုမင် တိုက်ခိုက်သည်ကို ယခင်က မြင်ဖူးထား၏။
လုမင်က သူ၏ စွမ်းအားအပြည့်ကို မထုတ်ရသေးကြောင်း သူတို့ သိထားကြပေသည်။
"ဝုန်း"
မုယန်က ဟင်းလင်းပြင်ပင်လယ်ကြီး၏ အထက်တွင် ရပ်နေသည်။ လုမင်အား ဘာမျှမရှိခြင်းအဖြစ် ပြောင်းလဲသွားစေရန် သူ၏ ဟင်းလင်းပြင်နိယာမကို အဆက်မပြတ် အသုံးပြုနေ၏။ သို့သော်လည်း နောက်တစ်ခဏတွင် မုယန်၏ မျက်နှာအမူအရာမှာ ပြောင်းလဲသွားခဲ့သည်။
အကြောင်းမူ၊ ဟင်းလင်းပြင်ပင်လယ်ကြီးမှာ စတင်တုန်ခါလာသောကြောင့်ပင်။ ၎င်းမှာ ဧရာမ သားရဲကြီးတစ်ကောင်က လှိုင်းတံပိုးများထစေရန် မွှေနှောက်နေသည့်အလား ခံစားရစေသည်။
"ဝုန်း"
နောက်ဆုံးတွင် နတ်ဘုရားတစ်ပါး၏ လက်ချောင်းကဲ့သို့ အနှိုင်းမဲ့ ကြီးမားလှသော လက်ချောင်းကြီးတစ်ခုက ဟင်းလင်းပြင်ပင်လယ်ထဲမှ ပေါက်ကွဲထွက်လာတော့သည်။
"ဝုန်း... ဝုန်း..."
ထို့နောက်တွင် ကစဉ့်ကလျား ကပ်ဘေးလက်ချောင်းများမှာ ဟင်းလင်းပြင်ပင်လယ်၏ နေရာအနှံ့မှ ထွက်ပေါ်လာခဲ့သည်။ ဟင်းလင်းပြင်ပင်လယ်ကြီးမှာ ပျားအုံတစ်ခုကဲ့သို့ အပေါက်များစွာ ဖြစ်ပေါ်သွား၏။ နောက်ဆုံးတွင် ပြင်းထန်သော ပေါက်ကွဲမှုနှင့်အတူ လုံးဝ ပျက်စီးသွားတော့သည်။
"မဖြစ်နိုင်ဘူး"
မုယန်က မယုံကြည်နိုင်စွာဖြင့် အော်ဟစ်လိုက်မိသည်။ သူ့ခန္ဓာကိုယ်မှာ ပြင်းထန်စွာ တုန်ခါသွားပြီး နောက်သို့ ဆုတ်လိုက်ရ၏။ သူ၏ ပါးစပ်ထဲမှ သွေးများ အန်ထွက်လာတော့သည်။
"မဖြစ်နိုင်တာ ဘာမှမရှိဘူး။ သေစမ်း"
ဟင်းလင်းပြင်ပင်လယ်ကြီး ပျောက်ကွယ်သွားပြီး လုမင်၏ ပုံရိပ် ပေါ်ထွက်လာသည်။ သူသည် ဒဏ်ရာတစ်စုံတစ်ရာ မရရှိထားဘဲ မုယန်ထံသို့ ပြေးဝင်သွား၏။
"ဝုန်း"
ကြီးမားသော လက်ဝါးကြီးက ဖိနှိပ်ချလိုက်သည်။ မုယန်မှာ ဒဏ်ရာရရှိထားပြီးဖြစ်သဖြင့် လုမင်၏ ပြိုင်ဘက် မဟုတ်တော့ချေ။ သူဟာ မီတာပေါင်းများစွာ လွင့်ထွက်သွားပြီး သွေးတစ်လုပ် အန်ထုတ်လိုက်ရသည်။
လုမင်က အလွတ်မပေးဘဲ နောက်မှ ထပ်ကြပ်မကွာ လိုက်သွားသည်။ သူသည် မုယန်ကို အသက်ရှူခွင့်ပင် မပေးဘဲ တိုက်ကွက်များကို အရှိန်အဟုန်ဖြင့် ဆက်တိုက်ထုတ်ဖော်လိုက်၏။
မုယန်မှာ ဒဏ်ရာရထားသဖြင့် လုမင်ကို မယှဉ်နိုင်တော့ပေ။ လုမင်နှင့် တိုက်ကွက်အချို့ ဖလှယ်ပြီးနောက် သူ့လက်မောင်းက ကျိုးတော့မည့်အလား ခံစားလိုက်ရပြီး သွေးများကို ဆက်တိုက် အန်နေရတော့သည်။
"ဝုန်း"
နောက်ဆုံးတွင် သူက မတားဆီးနိုင်တော့ပါ။ လုမင်၏ လက်ဝါးရိုက်ချက်က သူ၏ ရင်ဘတ်ပေါ်သို့ တိုက်ရိုက် ကျရောက်သွားခဲ့သည်။ သူ၏ ရင်ဘတ်မှာ ဧရာမ အပေါက်ကြီးတစ်ခု ဖြစ်ပေါ်တော့မည့်အလား ချိုင့်ဝင်သွားတော့သည်။
အကယ်၍ နိယာမအလင်းတန်းနှင့် အံ့မခန်း ခုခံနိုင်စွမ်းသာ မရှိပါက သူ့ခန္ဓာကိုယ်မှာ ဤတိုက်ကွက်ကြောင့် ပေါက်ကွဲထွက်သွားပေလိမ့်မည်။ သို့သော်လည်း သူက မြေပြင်ပေါ်တွင် လဲကျသွားပြီး သွေးများကို အန်ထုတ်နေရသည်။ သူက ပြင်းထန်စွာ ဒဏ်ရာရရှိသွားခဲ့ပြီ။
"ဒီလောက် အစွမ်းနဲ့များ ငါ့ဆီက ကစဉ့်ကလျားကျမ်းကို လိုချင်သေးတယ်လား။ ယွမ်ရှင်းကို ကိုယ်တိုင်ပဲ လာခိုင်းလိုက်ပါ"
လုမင်က မုယန်အား အထင်အမြင်သေးစွာဖြင့် ငုံ့ကြည့်ပြီး ပြောလိုက်သည်။
မုယန်မှာမူ ဒေါသနှင့် မုန်းတီးမှုတို့ကြောင့် ရူးမတတ် ဖြစ်နေပြီ။ လုမင်ကို တစ်စစီ ဆုပ်ဖြဲပစ်ချင်စိတ်တို့ပင် ဖြစ်နေမိသည်။
'လုမင်... မင်းကို ငါပြောပြမယ်၊ ငါ မင်းအကြောင်းကို အကုန်စုံစမ်းပြီးပြီ။ မင်းမှာ ယွမ်တောင်နယ်မြေက သူငယ်ချင်းတွေ အများကြီး ရှိတယ်မလား။ အခု ငါ့ရဲ့ မုမျိုးနွယ်စုမှာ အထူးဧည့်သည်အဖြစ် ရောက်နေတဲ့သူ အချို့ ရှိနေတယ်။ မင်း ကောင်းကောင်းမွန်မွန်နဲ့ ကစဉ့်ကလျားကျမ်းကို လွှဲပေးပြီး ငါနဲ့အတူ မုမျိုးနွယ်စုဆီကို လိုက်ခဲ့တာ ပိုကောင်းလိမ့်မယ်။ မဟုတ်ရင်တော့ မင်းရဲ့ သူငယ်ချင်းတွေအားလုံး သေရလိမ့်မယ်'
မုယန်က ရုတ်တရက် အေးစက်စွာ ပြောလိုက်သည်။ ဟုတ်သည်၊ သဘာဝအတိုင်း သူသည် ထိုစကားကို လုမင်ထံသို့သာ အသံပို့လွှတ်၍ လှမ်းပြောခြင်းပင်။
"ဘာကွ"
လုမင် တုန်လှုပ်သွားခဲ့သည်။
သူ့သူငယ်ချင်းများက မုယန်၏လက်သို့ ကျရောက်သွားပြီလား။ ယင်းက ဖြစ်နိုင်သည်။ နတ်ကံကြမ္မာနယ်မြေသို့ ရောက်စကတည်းက လုံချန်၊ ဟွမ်လီနှင့် အခြားသူများကို သူ မတွေ့ခဲ့ရပေ။