အခန်း ၂၀၈၇

အပိုင်း ( 2087 ) ဘယ်သူက ဘယ်သူ့ကို ခြိမ်းခြောက်နေတာလဲ။

လုမင် တုန်လှုပ်သွားသည်ကို မြင်သောအခါ မုယန်က လှောင်ပြုံးပြုံးလိုက်သည်။

ယွမ်တောင်နယ်မြေတွင် ယွမ်ရှင်း၏ ကံကြမ္မာရန်သူဖြစ်သော ကစဉ့်ကလျား၏သားတော် တစ်ဦးရှိကြောင်း သူသိကတည်းက ယွမ်တောင်ကို သူ အမြဲဂရုပြု စောင့်ကြည့်နေခဲ့ခြင်းဖြစ်သည်။ ယွမ်တောင်နယ်မြေမှ ပါရမီရှင်များ နတ်ကံကြမ္မာနယ်မြေသို့ ရောက်လာသောအခါ လုမင်၏ သတင်းကို သိရှိရန်နှင့် လုမင်ကို နှိမ်နင်းရန် သူ စတင်စုံစမ်းခဲ့ပေသည်။

သို့သော်လည်း လုမင်က ရောက်မလာခဲ့ဘဲ လုမင်၏ သူငယ်ချင်းများအကြောင်းကိုသာ သူ သိရှိခဲ့သဖြင့် သူတို့ကို ဖမ်းဆီးရန် လူလွှတ်ခဲ့ခြင်းဖြစ်သည်။

၎င်းမှာ ကြိုတင်ကာကွယ်မှု သက်သက်သာ ဖြစ်သော်လည်း ယခုကဲ့သို့ အသုံးတည့်လာလိမ့်မည်ဟု သူ မမျှော်လင့်ထားခဲ့ချေ။

'ငါ့လက်ထဲမှာ ခွန်အားနိယာကို ထိန်းချုပ်ထားတဲ့လူ နှစ်ယောက်ရှိတယ်၊ တစ်ယောက်က လုံချန်၊ နောက်တစ်ယောက်က ဟွမ်လီတဲ့။ သူတို့နှစ်ယောက်လုံး ငါ့ရဲ့ မုမျိုးနွယ်စုထဲမှာ ရှိနေတယ်။ ဟားဟားဟား... လုမင်၊ မင်း ငါနဲ့အတူ မုမျိုးနွယ်စုကို လိုက်ခဲ့ပြီး ကစဉ့်ကလျားကျမ်း ကို လွှဲပေးလိုက်တော့'

မုယန်က ရယ်မောရင်း လုမင်ထံသို့ အသံလှမ်းပို့လိုက်သည်။

သူ၏ ရင်ထဲတွင်မူ အေးစက်သော သတ်ဖြတ်လိုစိတ်များ ပြည့်နှက်နေသည်။

ယနေ့တွင် လူအများရှေ့၌ လုမင်က သူ့ကို အနိုင်ယူလိုက်၏။ သူ့အမြင်တွင် ၎င်းက ကြီးမားသော အရှက်ရမှုတစ်ခုပင်။ လုမင်သာ မုမျိုးနွယ်စုထဲသို့ ခြေချလိုက်သည်နှင့် လုမင်ကို နောင်တရစေရန် သူ ပြုလုပ်ရလိမ့်မည်။

"မင်း... သေသင့်တယ်"

လုမင်က မုယန်ကို အေးစက်စွာ စိုက်ကြည့်ရင်း ပြောလိုက်သည်။

ထိုအချိန်တွင် သူ၏ သတ်ဖြတ်လိုစိတ်က အလွန်တရာ ပြင်းထန်နေပြီ။

လုံချန်နှင့် ဟွမ်လီတို့မှာ အမှန်တကယ်ပင် မုယန်၏ လက်ထဲသို့ ကျရောက်နေပုံရသည်။

"ဒီအချိန်ထိတောင် မင်းက ငါ့ကို ခြိမ်းခြောက်ရဲသေးတယ်လား"

မုယန်၏ မျက်နှာက မှုန်ကုပ်သွားသည်။

"မင်းက တကယ်ကို ဉာဏ်နည်းတာပဲ၊ ဒီလိုစကားမျိုးကို ဒီအချိန်၊ ဒီနေရာမှာ မင်း မပြောခဲ့သင့်ဘူး"

လုမင်က အေးစက်စွာ ပြောလိုက်၏။

မုယန်၏ မျက်နှာအမူအရာက ရုတ်တရက် ပြောင်းလဲသွားပြီး အော်ဟစ်လိုက်သည်။

"မင်း ဘာလုပ်မလို့လဲ"

တစ်ချိန်တည်းမှာပင် သူသည် အလျင်အမြန် နောက်ဆုတ်ရန် ကြိုးစားလိုက်၏။ သို့သော်၊ အချိန်နှောင်းသွားခဲ့ပြီ။ လုမင်၏ ပုံရိပ်က လျှပ်စီးတန်းတစ်ခုကဲ့သို့ မုယန်ထံသို့ ပြေးဝင်သွားသည်။

"ဝုန်း"

ယခုတစ်ကြိမ်တွင် လုမင်က ဝါးမျိုခြင်းနိယာမကိုပါ ပေါင်းစပ်လိုက်သည်။ သူ၏ တိုက်ခိုက်နိုင်စွမ်းမှာ ပို၍ပင် သန်မာလာ၏။

တိုက်ခိုက်မှု တစ်ခုတည်းဖြင့် မုယန်၏ လက်မောင်းများမှာ တိုက်ရိုက် ပေါက်ကွဲထွက်သွားပြီး အသားစများနှင့် သွေးများမှာ နေရာအနှံ့သို့ လွင့်စင်သွားတော့သည်။

ကြောက်မက်ဖွယ်ကောင်းသော စွမ်းအားမှာ မုယန်၏ အကာအကွယ် နိယာမအလင်းကို တိုက်ရိုက် ထိုးဖောက်သွားသည်။ ထိုမှသာမကဘဲ၊ သူ့ခန္ဓာကိုယ်ကိုပါ ဖောက်ထွက်သွားကာ ထုတ်ချင်းခတ် အပေါက်ကြီးတစ်ခု ဖြစ်ပေါ်သွားစေခဲ့၏။

မုယန်မှာ မြေပြင်ပေါ်သို့ ပစ်လဲကျသွားပြီး နာကျင်စွာ အော်ဟစ်လိုက်တော့သည်။

"ဂျွတ်"

နောက်တစ်ခဏတွင် လုမင်က အနားသို့ ပြေးသွားကာ မုယန်၏ ခြေထောက်များကို နင်းချေလိုက်သဖြင့် ခြေရိုးများ ကျိုးသွားကြပြန်သည်။

မုယန်မှာ စူးစူးဝါးဝါး အော်ဟစ်နေရတော့သည်။

"လုမင်... ငါ မင်းကို သတ်မယ်"

မုယန်က ဟိန်းဟောက်လိုက်သည်။

"ဒုန်း"

နောက်တစ်ခဏတွင် လုမင်က မုယန်၏ မျက်နှာကို နင်းချလိုက်၏။ ဒါက သူ၏ ဦးခေါင်းတစ်ခုလုံး ကြေမွတော့မည့်အလား ဖြစ်သွားစေသည်။ မုယန်မှာ သွေးတစ်လုပ် အန်ထုတ်လိုက်ရပြီး သူ၏ သွားများအားလုံးနီးပါး ကျွတ်ထွက်သွားတော့သည်။

"မင်းရဲ့လူတွေကို အခုချက်ချင်း ခိုင်းလိုက်စမ်း။ ပြီးရင် ငါ့သူငယ်ချင်းတွေကို ဒီကို ခေါ်လာခိုင်း... မင်းနဲ့ လဲရမယ်။ ငါ့သူငယ်ချင်းတွေရဲ့ ဆံပင်တစ်ပင်တောင် ထိခိုက်ခဲ့ရင် ငါ မင်းကို သတ်ပစ်မယ်"

လုမင်က အေးစက်စွာ ပြောလိုက်သည်။

"မင်း... မင်း လုပ်ရဲလား"

မုယန်က ဟိန်းဟောက်လိုက်သည်။

"ဒုန်း"

လုမင်က သူ၏မျက်နှာကို ထပ်မံနင်းချလိုက်၏။ မုယန်မှာ အသည်းခိုက်မတတ် နာကျင်မှုကြောင့် အော်ဟစ်နေရတော့သည်။

ယခုအချိန်တွင် မုယန်မှာ နောင်တများဖြင့် ပြည့်နှက်သွားသည်။ သူသည် ဒေါသထွက်လွန်းသဖြင့် သွေးများပင် အန်ချင်နေမိ၏။

လုံချန်နှင့် ဟွမ်လီတို့ကို သူ ဖမ်းဆီးထားကြောင်းကို တိုက်ပွဲစင်မြင့်ပေါ်တွင် သူ မပြောခဲ့သင့်ပေ။ ထို့ပြင် လုမင်မှာ ဤမျှအထိ ပြတ်သားလိမ့်မည်ဟု သူ မမျှော်လင့်ထားခဲ့ပါ။

အဓိက အကြောင်းရင်းမှာ သူ၏ နောက်ကွယ်ရှိ အင်အားစုမှာ အလွန်တောင့်တင်းသောကြောင့် ဖြစ်သည်။ ထို့ကြောင့် လုမင်က သူ့ကို တစ်စုံတစ်ရာ လုပ်ရဲလိမ့်မည်မဟုတ်ဟု သူက စိတ်ထဲတွင် အလိုအလျောက် ထင်မှတ်ခဲ့ပေသည်။

ထို့ပြင် လုမင်၏ သူငယ်ချင်းမှာ သူ၏လက်ထဲတွင် ရှိနေသည်။ သူသည် အရာအားလုံးကို ထိန်းချုပ်ထားနိုင်သည်ဟု ထင်မှတ်ခဲ့သော်လည်း လုမင်က သူ့ကို တိုက်ရိုက် ချုပ်ကိုင်လိမ့်မည်ဟု မမျှော်လင့်ခဲ့ပေ။

အဓိက အကြောင်းရင်းမှာ လုမင်က အလွန်ပင် ပြတ်သားလွန်းခြင်းကြောင့် ဖြစ်သည်။ မျက်စိတစ်မှိတ်အတွင်းမှာပင် မုယန်ကို ပြန်ပေးဆွဲ၍ သူငယ်ချင်းများကို ကယ်တင်ရန် နည်းလမ်းကို သူ စဉ်းစားမိသွား၏။ သာမန်လူများဆိုပါက ဤသို့ စဉ်းစားမိလိမ့်မည်မဟုတ်သလို ဤမျှလည်း ပြတ်သားလိမ့်မည်မဟုတ်ချေ။

တိုက်ပွဲစင်မြင့် ပတ်ဝန်းကျင်ရှိ လူအများမှာ တစ်ဦးကိုတစ်ဦး ကြည့်လိုက်ကြသည်။

မုယန်သည် လုမင်ထံသို့ အသံလှမ်းပို့၍ ပြောခဲ့ခြင်းဖြစ်သဖြင့် သူတို့မှာ ဇာတ်ကြောင်းတစ်ခုလုံးကို မသိရဘဲ ဇဝေဇဝါဖြစ်သွားကြတော့သည်။

လုမင်က ရုတ်တရက် ရူးသွပ်သွားကာ မုယန်ကို နှိပ်စက်နေရခြင်း အကြောင်းရင်းကို သူတို့ နားမလည်ကြချေ။

"မင်း ဘယ်လိုများ လုပ်ရဲရတာလဲ။ သခင်လေး မုယန်ကို အခုချက်ချင်း လွှတ်စမ်း"

"ဟေ့ကောင်... မင်းက ကစဉ့်ကလျားသားတော် ဖြစ်ရုံနဲ့ ဒီလောက် မာန်တက်လို့ရမယ် မထင်နဲ့။ မုမျိုးနွယ်စုကို စော်ကားရင် မင်း မြေမြှုပ်ဖို့ နေရာတောင် ရှိမှာ မဟုတ်ဘူး"

ထိုနေရာတွင် ရှိနေသော မုမျိုးနွယ်စုမှ ကျွမ်းကျင်သူအချို့က ဟိန်းဟောက်လိုက်ကြသည်။ သူတို့၏ ခန္ဓာကိုယ်မှ ကြောက်မက်ဖွယ် အရှိန်အဝါများ ပေါက်ကွဲထွက်လာ၏။ သူတို့အားလုံးမှာ သိုင်းဧကရာဇ်များ ဖြစ်ကြသည်။

"မင်းတို့တွေ ဆက်ပြီး အော်နေဦးမယ်ဆိုရင် ငါ သူ့ကို အခုချက်ချင်း သတ်ပစ်မယ်"

လုမင်က ထိုသိုင်းဧကရာဇ်များကို အေးစက်စွာ လှမ်းကြည့်ရင်း ပြောလိုက်သည်။ သူ့အသံတွင် အေးစက်သော သတ်ဖြတ်လိုစိတ်များ ပြည့်နှက်နေ၏။

မုမျိုးနွယ်စုမှ သိုင်းဧကရာဇ်များ အားလုံး နှုတ်ဆိတ်သွားကြသည်။

မုယန်မှာ မုမျိုးနွယ်စု၏ နံပါတ်တစ် ပါရမီရှင် ဖြစ်သည်။ သူ၏ ပါရမီမှာ အနှိုင်းမဲ့၏။ သူ့ကို တစ်စုံတစ်ရာ ထိခိုက်ခံ၍ မဖြစ်ပေ။

"ဘာဖြစ်လို့ မင်းရဲ့လူတွေကို မခေါ်ခိုင်းသေးတာလဲ"

လုမင်က ခေါင်းငုံ့ကာ မုယန်ကို ကြည့်လိုက်သည်။

ဤအခိုက်တွင်တွင် မုယန်က လုမင်၏ ခြေထောက်အောက်တွင် နင်းခြေခံထားရသည်။ သူသည် အလွန်ရှက်ရွံ့နေမိ၏။ အကယ်၍ တိုက်ပွဲစင်မြင့်တွင် အက်ကြောင်းတစ်ခုသာ ရှိပါက သူသည် ထိုအက်ကြောင်းထဲသို့ ဝင်၍ ပုန်းနေချင်မိသည်။

သူသည် ဟင်းလင်းပြင်၏သားတော် ဖြစ်သည့်အပြင် သိုင်းဧကရာဇ်အဆင့်သို့ တက်လှမ်းတော့မည့် ပါရမီရှင်တစ်ဦးလည်း ဖြစ်သည်။ သူသည် နယ်မြေဆယ်ခုတိုက်ပွဲတွင် အသန်မာဆုံး အင်အားစုများထဲမှ တစ်ဦးအဖြစ် လူသိများသူ ဖြစ်၏။ သို့သော်လည်း ယခုအချိန်တွင် သူဟာ လုမင်၏ ရက်ရက်စက်စက် နင်းခြေခြင်းကို ခံနေရပြီ။ သူ တကယ်ကို မခံစားနိုင်တော့ချေ။

သို့သော်လည်း လုမင်၏ ခန္ဓာကိုယ်မှ ထွက်ပေါ်နေသော အေးစက်သည့် သတ်ဖြတ်လိုစိတ်က လုမင်ဟာ သူ့ကို တကယ်ပင် သတ်ရဲကြောင်း ဖော်ပြနေသည်။

"သွားကြ... လူတွေကို ဒီကို ခေါ်ခဲ့ကြ"

နောက်ဆုံးတွင် မုယန်က ဟိန်းဟောက်ကာ မုမျိုးနွယ်စုမှ ကျွမ်းကျင်သူများကို လူခေါ်ခိုင်းလိုက်ရတော့သည်။

မုမျိုးနွယ်စုမှ ကျွမ်းကျင်သူများ၏ မျက်နှာမှာ အလွန်ပင် မည်းမှောင်နေသည်။ သို့သော်လည်း နောက်ဆုံးတွင် သူတို့က ထွက်ခွာသွားကြပြီး မုမျိုးနွယ်စုဆီသို့ ပျံသန်းသွားကြတော့သည်။

မုမျိုးနွယ်စု၏ ဌာနချုပ်မှာ အီယွန်မြို့တော်တွင် ရှိသည်။

"မုယန်က လုမင်ရဲ့ သူငယ်ချင်းကို ဖမ်းထားတာ ထင်တယ်"

လုမင်နှင့် မုယန်တို့၏ ပြောစကားများမှတစ်ဆင့် လူအများအပြားမှာ အခြေအနေကို ရိပ်စားမိသွားကြသည်။

လုမင်က ရုတ်တရက် ဒေါသထွက်သွားရသည်ကို သူတို့ မအံ့သြတော့ချေ။

တစ်ချိန်တည်းမှာပင် လူတိုင်းက ပို၍ပင် ထိတ်လန့်သွားကြသည်။ လုမင်၏ စွမ်းအားမှာ အလွန်ပင် သန်မာလှ၏။ ၎င်းက ကြောက်မက်ဖွယ်ကောင်းသော အဆင့်သို့ ရောက်ရှိနေပြီ။

"သူ့ရဲ့ ကျင့်ကြံမှုက တကယ်ပဲ ပြီးပြည့်စုံခြင်းအဆင့် အန္တိမသူတော်စင်နယ်ပယ် ဟုတ်ရဲ့လား။ သူက ဧကရာဇ်တစ်ပိုင်း အဆင့်ကို တကယ်မရောက်သေးဘူးလား"

လူအချို့က မယုံကြည်နိုင်စွာဖြင့် ပြောဆိုလိုက်ကြသည်။

"သူ့ရဲ့ နိယာမက မြစ်တစ်စင်းအဖြစ် မဖွဲ့စည်းရသေးဘူး။ သူက တကယ်ပဲ အန္တိမသူတော်စင်နယ်ပယ် ပြီးပြည့်စုံခြင်းအဆင့်မှာပဲ ရှိသေးတာပါ"

ကျွမ်းကျင်သူတစ်ဦးက လုမင်၏ ကျင့်ကြံမှုကို အတည်ပြုပေးလိုက်၏။ ၎င်းမှာ လူတိုင်းကို အံ့အားသင့်သွားစေသည်။

"လုမင်ရဲ့ ခန္ဓာကိုယ်ကြံ့ခိုင်မှုက အ‌ရမ်းသန်မာတယ်၊ သာမန် ကောင်းကင်သားတော်တွေထက် အများကြီး သာလွန်တယ်။ ကျုပ်အထင်တော့ သူက ကောင်းကင်ကို ဆန့်ကျင်နိုင်တဲ့ ကံကောင်းမှုမျိုးနဲ့ ကြုံတွေ့ခဲ့ပြီး သူ့ရဲ့ ခန္ဓာကိုယ်ကို အံ့မခန်း သန်မာအောင် လုပ်ထားတာ ဖြစ်ရမယ်။ သူ့ရဲ့ တိုက်ခိုက်နိုင်စွမ်းကလည်း အဲဒါကြောင့် အများကြီး တိုးတက်လာတာပဲ"

မျိုးဆက်ဟောင်း ကျွမ်းကျင်သူတစ်ဦးက ပြောလိုက်သည်။ သူတို့က အခြေအနေကို ရိပ်စားမိသွားကြ၏။

"သူ့ရဲ့ ခန္ဓာကိုယ်က သန်မာပေမဲ့ သူ့ရဲ့ နိယာမစွမ်းအားက ပိုပြီး ကြောက်စရာကောင်းတယ်။ သူက ဘက်ပေါင်းစုံမှာ သန်မာပြီး အားနည်းချက် မရှိသလောက်ပဲ"

အခြားသော မျိုးဆက်ဟောင်းမှ ကျွမ်းကျင်သူတစ်ဦးကလည်း မှတ်ချက်ပေးလေသည်။

"မကောင်းဆိုးရွားကောင်ပဲ"

လူအများအပြား သက်ပြင်းချလိုက်ကြသည်။

"ကံကောင်းချင်တော့ ဒီလူရဲ့ ကျင့်ကြံမှုက နိမ့်နေသေးတယ်။ တကယ်လို့ သူ့ရဲ့ ကျင့်ကြံမှုသာ ပိုမြင့်ခဲ့ရင် ဒီနယ်မြေဆယ်ခုတိုက်ပွဲမှာ သူ့ကို ဘယ်သူက ယှဉ်နိုင်မှာလဲ"

"ဒါကတော့ ပြောရခက်ပါတယ်၊ ဒီမျိုးဆက်မှာ ကံကြမ္မာသားတော်တစ်ယောက်တောင် မွေးဖွားလာတယ်ဆိုတာကို မမေ့နဲ့ဦး"

ထိုစကားကြောင့် လူအများအပြားမှာ အကြီးအကျယ် တုန်လှုပ်သွားကြသည်။

ဟုတ်သည်၊ ကံကြမ္မာသားတော် ရှိ၏။

၎င်းက အနှိုင်းမဲ့ ကြောက်မက်ဖွယ်ကောင်းသော ပုံရိပ်တစ်ခု၊ စစ်မှန်သော အနှိုင်းမဲ့ပါရမီရှင်တစ်ဦးပင်။

"ပြီးတော့ ရှေးဟောင်းကျင့်ကြံခြင်းလမ်းစဉ်လည်း ပြန်ပေါ်လာပြီ။ တစ်စုံတစ်ယောက်က အဲဒါကို အရမ်းကြောက်စရာကောင်းတဲ့ အဆင့်အထိ လေ့ကျင့်ထားတယ်တဲ့"

"နောက်ပြီး ကစဉ့်ကလျားရဲ့သားတော် ယွမ်ရှင်း ကလည်း သိုင်းဧကရာဇ်အဆင့်ကို တက်လှမ်းဖို့ တိတ်တဆိတ် ကျင့်ကြံနေတယ်လို့ ကြားတယ်"

ထို့နောက်တွင် လူအချို့က ဆက်လက်ပြောဆိုနေကြပြီး လူတိုင်း၏ ရင်ထဲတွင် ထပ်မံတုန်လှုပ်သွားကြပြန်တော့သည်။

တစ်ချိန်တည်းမှာပင် အချို့သော ကောင်းကင်သားတော်များမှာ အလွန်ပင် တည်ကြည်လေးနက်သော မျက်နှာအမူအရာများ ရှိနေကြသည်။

ယခုတစ်ကြိမ် နယ်မြေဆယ်ခုတိုက်ပွဲမှာ အလွန်တရာ ပြင်းထန်ပေလိမ့်မည်။ ၎င်းမှာ မကြုံစဖူးသော တုန်လှုပ်စရာ ဖြစ်ရပ်တစ်ခု ဖြစ်လာနိုင်သည်။

လုမင်မှာ အကြာကြီး စောင့်ဆိုင်းမနေခဲ့ရချေ။ နာရီဝက်မပြည့်မီမှာပင် လူတစ်စုက ပျံသန်းရောက်ရှိလာသည်။

သူတို့က မုမျိုးနွယ်စုမှ ကျွမ်းကျင်သူများ ဖြစ်ကြ၏။ သူတို့ဟာ လူငယ်နှစ်ဦးနှင့်အတူ ပျံသန်းလာကြခြင်း ဖြစ်သည်။

"လုံချန်... ဟွမ်လီ"

လုမင်၏ မျက်နှာတွင် ဝမ်းသာသွားသော အရိပ်အယောင်များ ပေါ်လာသည်။

ထိုလူငယ်နှစ်ဦးမှာ လုံချန်နှင့် ဟွမ်လီတို့ ဖြစ်၏။

"လုမင်"

လုံချန်နှင့် ဟွမ်လီတို့သည်လည်း လုမင်ကို မြင်သောအခါ ထိတ်လန့်သွားကြသည်။ မုယန်အား လုမင်က နင်းခြေထားသည်ကို မြင်လိုက်ရသောအခါ အခြေအနေကို သူတို့ ရိပ်မိသွားကြတော့သည်။

"လုမင်... ခင်ဗျားလုပ်တာက အရမ်းအန္တရာယ်များတယ်"

လုံချန်က လေးနက်သော မျက်နှာဖြင့် သက်ပြင်းချလိုက်သည်။

"ကျုပ်တို့က သူငယ်ချင်းတွေပဲလေ"

လုမင်က ရိုးရိုးရှင်းရှင်းပြောလိုက်၏။ လုံချန်နှင့် ဟွမ်လီတို့လည်း တိတ်ဆိတ်သွားကြတော့သည်။