နိုင်ငံရေးဆိုတာ ဒါလား (၁)

တော်ဝင်မြေးတော်သည် အလွန်အမင်း ထိတ်လန့်တုန်လှုပ်သွားခဲ့ရသဖြင့် ကျောက်ဖျာကြမ်းပြင်ပေါ်သို့ ဘုန်းခနဲ ဟူသော အသံအကျယ်ကြီးနှင့်အတူ ဒူးထောက်၍ ဝပ်စင်းလိုက်တော့သည်။

“အဘိုး၊ ကျွန်တော်မျိုး တော်ဝင်အဘွားအပေါ်မှာ ဘာတစ်ခုမျှ ရိုသေလေးစားမှု မရှိဘဲ စော်ကားမော်ကော် ပြုလိုတဲ့ စိတ်ရည်ရွယ်ချက် လုံးဝမရှိပါဘူး ဘုရား”

ဘေးနားရှိ အိမ်ရှေ့စံမင်းသမီးက သူ့အား အသည်းအသန် လှမ်းဆွဲ၍ တားဆီးဖို့ ကြိုးစားနေသည့်ကြားကပင် သူ၏ ပါးစပ်က စကားလုံးများမှာမူ တရစပ် ဗြောင်ကျကျ ထွက်ပေါ်လာခဲ့ချေပြီ။

“ကျွန်တော်မျိုး ပြောချင်တဲ့ သဘောက အားကျန်းနဲ့ တော်ဝင်အဘွားတို့က အသက်အရွယ်အရ မျိုးဆက်တစ်ခုလုံး ကွာခြားနေကြတာပါ၊ တော်ဝင်အဘွားက အခုဆိုရင် အသက်ခြောက်ဆယ်ကျော် ရှိနေပြီဖြစ်လို့ သူတို့နှစ်ယောက် ကြားမှာ ဘယ်လိုနည်းနဲ့များ ပတ်သက်မှု ရှိနိုင်ပါ့မလဲ ဘုရား၊ အားကျန်းက တော်ဝင်အဘွားကို လူကြီးသူမ တစ်ဦးလို တကယ့်ကို ရိုသေလေးစားပြီး မိဘသဖွယ် ဝတ္တရားကျေပွန်စွာနဲ့ ပြုစုစောင့်ရှောက်ချင်တာ သေချာ ပါတယ် ဘုရား၊ ပြီးတော့ နောင်တစ်ချိန်ကျရင်လဲ သူမက ကျွန်တော်မျိုးနဲ့အတူ တော်ဝင်အဘွား သက်တော် ရာကျော် ရှည်သည်အထိ ဘဝရဲ့ နေဝင်ချိန်အဆုံးသတ်အထိ အနီးကပ် နှလုံးစိတ်ဝမ်း အေးချမ်းအောင် လုပ်ကျွေး ပြုစုသွားမှာပါ ဘုရား”

အပေါ်ယံ စကားလုံးများအရ ကြည့်မည်ဆိုလျှင် ၎င်းစကားများမှာ တကယ့်ကို ပတ်ဝန်းကျင်ကို ငဲ့ညှာ တွေးတော ပေးတတ်ပြီး စနစ်တကျ ရှိလှသည်ဟု ထင်မှတ်ရပေလိမ့်မည်၊ သို့သော်

အိမ်ရှေ့စံမင်းသားသည် ဤအခြေအနေကို ဆက်လက်၍ မကြည့်ရက်တော့ဟန်ဖြင့် သူ၏ သေရည်ခွက်ကို အသာအယာ မြှောက်လိုက်ရင်းက မိမိ၏ မျက်နှာတစ်ခုလုံးကို ဘာမှမသိသလိုမျိုး တိတ်တဆိတ် ဖုံးကွယ် ထားလိုက်တော့သည်။

မျှော်လင့်ထားသည့်အတိုင်းပင် နောက်ထပ် ခဏချင်းအတွင်းမှာတင် တစ်နန်းဆောင်လုံး၌ ရိုးအိနေကျဖြစ်သော ရင်ထဲကနေ အားပါးတရ အော်ဟစ်ကာ လှိုက်လှိုက်လှဲလှဲ ရယ်မောလိုက်သည့် ဟာသအသံကြီးက လေထုထဲ၌ ဝုန်းခနဲ ပျံ့နှံ့ထွက်ပေါ်လာခဲ့ချေပြီ။

[ဟားဟားဟားဟားဟား၊ ဒီတော်ဝင်မြေးတော်က တကယ်ပဲ ဘာမှမသိတာလား၊ ဧကရာဇ်အိုကြီးက မိဖုရားခေါင်ကြီးထက် အသက် ငါးလပဲ ပိုပြီး ကြီးတာကို သူ မသိဘူးလား မသိဘူး၊ ပြီးတော့ ချင်ကျန်းကလဲ ဟိုးအရင်တုန်းက ဧကရာဇ်အိုကြီးရဲ့ ကိုယ်လုပ်တော်ဟောင်း ဖြစ်ခဲ့တာကိုကော သူ လုံးဝ မမှတ်မိတော့ဘူးလား၊ ဟားဟားဟားဟား၊ မျိုးဆက်ချင်း ကွာခြားတာ ဟုတ်လား၊ ရိုသေလေးစားတာ ဟုတ်စ၊ မိဘသဖွယ် လုပ်ကျွေးတာ ဟုတ်လား၊ ဘဝနေဝင်ချိန်အထိ ပြုစုစောင့်ရှောက်မှာ ဟုတ်လား၊ ဟားဟားဟား၊ သူ ပြောလိုက်တဲ့ စကားလုံးတိုင်း၊ စာသားတိုင်းက ဧကရာဇ်အိုကြီးရဲ့ နှလုံးသားကို ဓားမြှောင်နဲ့ တရစပ် ထိုးစိုက်လိုက်သလို အသေအလဲ ထိမှန်သွားစေတာပဲ]

တော်ဝင် မြေးတော်သည် မိမိ၏ အဘိုးဖြစ်သူ ဧကရာဇ်၏ မျက်နှာတစ်ခုလုံး ယခင်ကထက်ပင် ပိုမို၍ တဖြည်းဖြည်း မည်းမှောင် ခက်ထန်လာသည်ကို ရုတ်တရက် သတိပြုမိသွားခဲ့ရပြီး နန်းဆောင်တစ်ခုလုံး၏ လေထုကြီးမှာလဲ အလွန်အမင်း ထူးဆန်းဆန်းပြားလှသော အခြေအနေသို့ ကူးပြောင်းသွားသဖြင့် ဇဝေဇဝါ ဖြစ်လျက် ကြောင်အမ်းအမ်း ကြည့်နေမိတော့သည်။

*ငါ တစ်ခုခု မှားပြောမိလို့လား*

သူသည် တော်ဝင်မြေးတော်တစ်ဦး ဖြစ်ပြီး ကောင်းကင်ဘုံ ပူဇော်ပွဲကြီးများနှင့် သူ၏ တရားဝင် ရာထူးခန့်အပ်ခြင်း အခမ်းအနားများ ကဲ့သို့သော ကြီးကျယ်ခမ်းနားလှသည့် နန်းတွင်းပွဲတော်ကြီးများတွင် ကိုယ်တိုင်ကိုယ်ကျ ပါဝင် ဆင်နွှဲခဲ့ဖူးသော်လည်း အိမ်ရှေ့စံမင်းသား၏ အရိပ်အာဏာအောက်တွင်သာ အမြဲလိုလို မှေးမှိန်နေခဲ့ရရှာသည်။ အိမ်ရှေ့စံ မင်းသားကသာလျှင် တော်ဝင်မင်းသား တံဆိပ်တော်ကို ပိုင်ဆိုင်ထားပြီး ကိုယ်ပိုင်နန်းဆောင် နှင့်တကွ အုပ်ချုပ်ခွင့်ရထားသည့် စစ်မှန်သော ထီးနန်းဆက်ခံသူ ဖြစ်ပေသည်။ သို့သော် မြေးတော်မှာမူ “အိမ်ရှေ့စံ မြေးတော်” ဟူသော ဘွဲ့အမည်နာမမျှကိုသာ ရရှိထားခြင်း ဖြစ်ပြီး အိမ်ရှေ့စံမင်းသား ကွယ်လွန်သွားခဲ့မှသာလျှင် ၎င်းအခွင့်ထူးများနှင့် အာဏာများကို ဆက်ခံရရှိနိုင်မည် ဖြစ်၏။ ထိုကဲ့သို့သော အဆင့်အတန်း ကွာခြားချက်များ ကြောင့်လည်း သူသည် ရှုရန်မြောင်၏ ရင်တွင်းက ကမ္ဘာဖျက်အော်ဟစ်သံများကို ဘယ်လိုနည်းနဲ့မျှ ကြားနိုင်စွမ်း မရှိခဲ့ခြင်း ဖြစ်ပေသည်။

ဧကရာဇ်အိုကြီး၏ မျက်ဝန်းအစုံမှာမူ အလွန်အမင်း မကျေမနပ်ဖြစ်လှသော ဒေါသမီးလျှံများဖြင့် တောက်လောင်လို့ နေခဲ့ချေပြီ။

ဤမျှအထိ တုံးအပြီး အမြော်အမြင်မရှိလှသော မြေးတော်သည် တိုင်းပြည်ကို အုပ်ချုပ်မည့် ဧကရာဇ်တစ်ပါးအဖြစ် လုံးဝ မထိုက်တန်၊ မသင့်တော်ပါလားဟူသောအချက်ကို မိမိအနေဖြင့် ဘာဖြစ်လို့ ဟိုးအရင်ကတည်းက ကြိုတင်၍ သတိမပြုမိခဲ့ရသနည်း။

တစ်ဖက်က ပြန်တွေးကြည့်မည်ဆိုလျှင် ယခုကဲ့သို့ ချင်ကွေ့ရန်နှင့် ပတ်သက်သည့် ရှုပ်ထွေးလှသော ပြဿနာ ဆိုးကြီး ပေါ်ပေါက်လာခဲ့ခြင်းကြောင့်သာ မိမိအနေဖြင့် နစ်နာမှုများကို အချိန်မီ ဖြတ်တောက်ပစ်နိုင်ခဲ့ခြင်း ဖြစ်သဖြင့် တကယ့်ကို ကံကောင်းလှသည်ဟု ဆိုရပေလိမ့်မည်။ မဟုတ်ပါက မိမိတို့ ပင်ပန်းကြီးစွာ တည်ထောင် ခဲ့ရသော မဟာရှ မင်းဆက်ကြီးမှာ မျိုးဆက် သုံးဆက် အတွင်းမှာတင် ဗုန်းခနဲ ပြိုလဲပျက်စီး သွားရတော့မည် မဟုတ်ပါလား။

ထိုစဉ် မိဖုရားခေါင်ကြီးသည် ဘေးနားမှနေ၍ သူ၏ လက်ကို အသာအယာ ဆုပ်ကိုင်ပေးလိုက်ရာ သူမ၏ လက်ဖဝါးထံမှ နွေးထွေးမှုများကြောင့် ဧကရာဇ်၏ ရင်ထဲက ဒေါသမီးလျှံများမှာ တဖြည်းဖြည်းနှင့် ပြန်လည် ငြိမ်းအေး အေးချမ်းသွားခဲ့ရတော့သည်။ ဧကရာဇ်သည် တည်ငြိမ်အေးစက်လှသော လေသံဖြင့် မိန့်ကြား လိုက်တော့သည်။

“ငါ နားလည်ပြီ”

ထိုစကားကို ကြားလိုက်ရသည့် တစ်ခဏ အတွင်းမှာပင် တော်ဝင်မြေးတော်သည် ရင်ထဲက အလုံးကြီး ဗုန်းခနဲ ကျသွားသကဲ့သို့ ချက်ချင်းပင် သက်ပြင်းတစ်ချက်ချရင်း စိတ်အေးသွားခဲ့တော့သည်။

သူသည် အိမ်ရှေ့စံ မင်းသားနှင့် အိမ်ရှေ့စံ မင်းသမီးတို့၏ တိတ်တဆိတ် သက်ပြင်းချလိုက်သံများ သို့မဟုတ် နန်းတွင်းအရာရှိကြီး အတော်များများ၏ မျက်နှာပေါ်တွင် ပေါ်လွင်နေသော ထူးဆန်းလှသည့် အမူအရာများ ကိုပါ လုံးဝ သတိမပြုမိခဲ့ပေ။

ဝဲဘက် တပ်မတော်၏ ဒုတိယတပ်မှူးကြီးကမူ သူ၏ ဘေးနားက လုပ်ဖော်ကိုင်ဖက်အား လက်တံတောင်ဖြင့် ဖြတ်ခနဲ တွန်းလိုက်ရင်း မျက်စိကို တမင်တကာ မှိတ်ပြလျက် တီးတိုးပြောလိုက်တော့သည်။

“အရှင်မင်းကြီးကတော့ အဲဒီကောင်စုတ်လေးကို စွန့်ပယ်ဖို့အတွက် အပြီးသတ် ဆုံးဖြတ်ချက် ချက်ချင်း ချမှတ်လိုက်ပြီ”

ရှေ့တန်း တပ်မတော်၏ ဒုတိယတပ်မှူးကြီးကလည်း လေသံခပ်တိုးတိုးဖြင့် ရေရွတ်ပြန်သည်။

“အချိန်တန်ပြီလေ၊ ဟိုးလွန်ခဲ့တဲ့ အချိန်တုန်းက ဘေးဒုက္ခသည်တွေကို ကယ်ဆယ်ထောက်ပံ့ဖို့အတွက် အိမ်ရှေ့စံ မင်းသမီးက သူ့ကို ငွေအသပြာ ၃,၀၀၀ တောင် ပေးအပ်ခဲ့တာကို မင်း မှတ်မိသေးလား၊ အဲဒီတုန်းက သူက ဘေးဒုက္ခသည်တွေကို အကုန်မပေးဘဲ သူ့ရဲ့ ကိုယ်ပိုင်အိတ်ကပ်ထဲကို ငွေ ၅၀၀ တောင် ကြားကနေ ဖြတ်ပြီး ခိုးဝှက်ခဲ့တာ၊ နောင်တစ်ချိန်ကျလို့သာ ဒီလိုလူနောက်ကနေ လိုက်ပါအမှုထမ်းရမယ်ဆိုရင် ငါတို့တစ်စု ဆယ်ရက်မှာ ကိုးရက်လောက် ထမင်းငတ်မသေရုံတမ်း ဖြစ်ကုန်ကြတော့မှာ အမှန်ပဲ”

တီးတိုး ပြောဆိုသံများ။

ကြမ်းတမ်းလှသော အသံပိုင်ရှင် တပ်မှူးကြီးနှစ်ဦးစလုံးသည် အသံကို အတတ်နိုင်ဆုံး လျှော့ကာ တိုးတိုး တိတ်တိတ် အတင်းပြောရန် ကြိုးပမ်းနေကြသော်လည်း သူတို့၏ ကြိုးပမ်းမှုကြီးမှာမူ ထိရောက်မှုနှင့် အလှမ်း ဝေးကွာလွန်းနေ၏။

တစ်ချိန်တည်းမှာပင် မင်းသမီး ချင်းဟယ်သည် အပြင်ပန်းတွင်မူ တည်ငြိမ်ရင့်ကျက်ပြီး ခန့်ညားထည်ဝါလှသော ဟန်ပန်ကို အပြည့်အဝ ထိန်းသိမ်းထားသော်လည်း သူမအနေဖြင့် ထိုဘက်ဆီသို့ မျက်ဝန်းအစုံကို မသိမသာ ဖြတ်ခနဲ လှမ်းကြည့်လိုက်မိပြီးနောက်တွင်မူ ရုတ်တရက်ဆိုသလို သဘောကျစွာဖြင့် ပြုံးမိသွားခဲ့ရတော့သည်။

*အလို … တကယ့်ကို ပျော်စရာကောင်းလွန်းလှပါလား၊ အစတုန်းကတော့ ငါက နန်းတွင်းစာပေပညာရှင် အမတ်ကြီးတွေရဲ့ ဆန်းပြားလှတဲ့ ဟာသအပြောအဆိုတွေကပဲ စိတ်ဝင်စားစရာ ကောင်းတယ်လို့ ထင်မှတ် ထားခဲ့တာ၊ ဒါပေမဲ့ အခုကြည့်ရတာ ဒီစစ်သူကြီးတွေရဲ့ တီးတိုးပြောဆိုချက်တွေကလဲ တကယ့်ကို ရယ်မောစရာ အဆင့်အတန်း မြင့်မားလွန်းလှတာပဲ၊ ယခုကဲ့သို့ နှစ်သစ်ကူးပွဲတော် အခမ်းအနားကြီးကြောင့် ခမည်းတော်ရဲ့ စူးစမ်းတတ်တဲ့ မျက်လုံးကြီးတွေကလဲ နည်းနည်း လျော့ပါးနေတဲ့ အချိန်နဲ့ တိုက်ဆိုင်နေတာမို့လို့ ငါ့အနေနဲ့ နက်ဖြန်ကျရင် စိတ်ကူးယဉ် ဇာတ်ကောင်အသွင်ဆောင် ကစားနည်းမျိုးစုံကို ပျော်ပျော်ပါးပါး ဆင်နွှဲနိုင်ဖို့အတွက် သေသေချာချာ ကြိုတင်စီမံထားရတော့မယ်*

ဧကရာဇ်သည် သူ၏ ဒုတိယမြောက် သမီးတော်၏ သိမ်မွေ့နူးညံ့လှသော အပြုံးကို သတိပြုမိသွားခဲ့ရသောအခါ ရုတ်တရက် ဆိုသလို ရင်ထဲ၌ အလွန်အမင်း စိတ်သက်သာရာရကာ ကြီးမားလှသော နှစ်သိမ့်မှုလှိုင်းလုံးကြီးတစ်ခု ဖြတ်သန်း စီးဆင်းသွားခဲ့ရတော့သည်။

“အာ … ငါ့ရဲ့ သမီးတော်လေး၊ ဘာပဲပြောပြော သမီးမိန်းကလေးတွေကတော့ အကောင်းဆုံးပဲ၊ ပြဿနာ နည်းတာပေါ့”

သူသည် မိဖုရားခေါင်ကြီးထံသို့ ကိုယ်ကို အသာအယာ ကိုင်းညွတ်လိုက်ရင်းက လေသံခပ်တိုးတိုးဖြင့် တီးတိုး ရေရွတ်လိုက်တော့သည်။

“ဟိုးအရင်တုန်းက ငါ မင်းကို ပြောခဲ့ဖူးတယ် မဟုတ်လား မိဖုရား၊ ငါတို့ရဲ့ ဒုတိယသမီးတော်လေးက ဟိုတလောတုန်းက ဘဝရဲ့ အပြောင်းအလဲ ကာလတစ်ခုကြောင့် ခေတ္တခဏလေးပဲ စိတ်ကစားခဲ့တာပါလို့၊ အခု သူမကိုပဲ ပြန်ကြည့်စမ်းပါဦး၊ တကယ့်ကို အိန္ဒြေသိက္ခာနဲ့ ပြည့်စုံပြီးတော့ သိပ်ကို ကျော့မော့လွန်းနယ်၊ ငါကိုယ်တိုင် သေသေချာချာ ပြုစုပျိုးထောင်ခဲ့တဲ့ သားသမီးပဲ၊ တိုင်းပြည်ရဲ့ စံပြပုဂ္ဂိုလ်တစ်ဦး ဖြစ်မလာစရာ အကြောင်းကို လုံးဝမရှိဘူးဆိုတာ ငါ အစကတည်းက ကောင်းကောင်းကြီး သိနေခဲ့တာပေါ့”

မိဖုရားခေါင်ကြီးသော်: “…”

အမှန်အတိုင်း ပြောရမည်ဆိုလျှင် သူမသည် မိမိတို့၏ သားသမီးများအားလုံး၏ စစ်မှန်သော စရိုက် လက္ခဏာဆိုး များနှင့် ပုံစံအမှန် မျိုးစုံကို ဟိုးလွန်ခဲ့သော အချိန်တုန်းကတည်းက ကောင်းကောင်းကြီး ရိပ်မိ နားလည် ထားခဲ့ ပြီးသား ဖြစ်ပေသည်။ ၎င်းတို့ သားသမီးများ၏ ထူးဆန်းဆန်းပြားလှသော အလေ့အထများနှင့် ပတ်သက်၍ အမှန်တရားကို လက်မခံဘဲ ငြင်းဆန်နေသူဟူ၍ တစ်နန်းတော်လုံးတွင် ၎င်းတို့၏ ခမည်းတော် ဧကရာဇ် တစ်ဦးတည်းသာ ရှိချေတော့သည်။ သူသည် သားသမီးများအားလုံးမှာ မိမိ၏ ထူးခြားဆန်းပြားပြီး ကပ်စေးနှဲ တတ်လှသော စရိုက်ဆိုးမျိုးစုံကို အပြည့်အဝ ဆက်ခံရရှိထားကြခြင်း ဖြစ်သည်ဟူသောအချက်ကိုမူ ဇွတ်အတင်း မျက်ကွယ်ပြုလျက် ဝန်ခံရန် အစဉ်တစိုက် ငြင်းဆန်နေခဲ့ခြင်း ဖြစ်ပေတော့သည်။

ရှုရန်မြောင်သည် သူ၏ ပါးစပ်ကို အသာအယာ သုတ်လိုက်ပြီးနောက် သူ၏ ထိုင်ခုံနေရာမှာ အနောက်ဘက် အကျဆုံးတွင် ရှိနေသည့် အားသာချက်ကို အသုံးချကာ ကိုယ်ကို နိမ့်နိုင်သမျှ နိမ့်အောင် ကုန်းကုန်းကွကွဖြင့် နန်းဆောင်အပြင်ဘက်ရှိ သန့်စင်ခန်းဆီသို့ တိတ်တဆိတ် ထွက်ခွာသွားခဲ့တော့သည်။

သူ ထွက်ခွာသွားပြီးနောက် လက်ဖက်ရည်တစ်ခွက်စာမျှသော အချိန်ပင် မရှိသေးမီမှာတင် မိန်းမစိုးငယ်တစ်ဦးက တော်ဝင်မြေးတော်ထံသို့ အလောတကြီး ပြေးလွှားရောက်ရှိလာခဲ့ပြီး သူ၏ နားအနားသို့ ကပ်လျက် လေသံ ခပ်တိုးတိုးဖြင့် သတင်းစကား တစ်ခုကို လာရောက် လျှောက်တင်တော့သည်။ ထိုအခါ မြေးတော်၏ လေသံမှာ အလွန်အမင်း စိတ်လှုပ်ရှားကာ မယုံကြည်နိုင်လောက်အောင် ဖြစ်သွားခဲ့ရပြီး အသံကျယ်သွားခဲ့ရရှာသည်။

“ဒါ… ဒါ တကယ်ပဲလား”

မိန်းမစိုးက ခေါင်းကို အသာအယာ ညိတ်ပြလိုက်၏။

တော်ဝင်မြေးတော်သည် ဝမ်းသာအားရဖြင့် ရယ်မောလိုက်မိတော့သည်။

“ဟား”

“နောက်ဆုံးတော့ … အဲဒီကောင် နန်းဆောင်ကြီးထဲကနေ ထွက်သွားခဲ့ပြီ”

သူသည် သူ၏ ကျောပြင်ကြီးကို မတ်လိုက်ရင်းက တမင်သက်သက် လုပ်ယူထားသော လေးနက် တည်ကြည် လှသည့် အမူအရာမျိုးဖြင့် အသံကျယ်ကျယ်ဖြင့် လျှောက်တင်လိုက်တော့သည်။

“အရှင်မင်းကြီး၊ ကျွန်တော်မျိုး လျှောက်ထားစရာ အရေးကြီးကိစ္စတစ်ခု ရှိပါတယ် ဘုရား”

ရှေ့တန်းတပ်မတော်၏ ဒုတိယတပ်မှူးကြီးသည် ၎င်းမြင်ကွင်းကြောင့် ဝင်သက်ကို ရှူးခနဲ အသံထွက်အောင် ပြင်းထန်စွာ ရှူသွင်းလိုက်မိပြီးနောက် ဝဲဘက်တပ်မတော်၏ ဒုတိယတပ်မှူးကြီးထံသို့ ကိုယ်ကို ကိုင်းညွတ်လျက် တီးတိုးပြောတော့သည်။

“ငါ့ရဲ့ ဘဝတစ်လျှောက်လုံးမှာ ဘယ်သူ့ကိုမှ မလေးစားခဲ့ဖူးဘူး၊ ဒါပေမဲ့ ဒီတော်ဝင်မြေးတော်ကိုတော့ဖြင့် တကယ့်ကို လက်ဖျားခါပြီး အသိအမှတ်ပြုရတော့မယ်၊ သူက အခုထိ သူ ဘာတွေမှားယွင်းခဲ့သလဲဆိုတာကို လုံးဝ မရိပ်မိသေးတာလား၊ ပြီးတော့ ဘာမဟုတ်တာနဲ့ ပြဿနာတွေကို တရစပ် လာပြီး ဖန်တီးနေသေးတယ်၊ ကြည့်စမ်း၊ ရှောင်ပိုင်ကျီတောင်မှ ငြိမ်ငြိမ်လေး နေနေတာကို၊ သူကတော့ဖြင့် ဘာတစ်ခုမှ မသိဘဲ ကမောက်ကမတွေ ဇွတ်လုပ်နေတုန်းပဲ”

ဧကရာဇ်သည် သူ၏ မြေးတော်အား စေ့စေ့စပ်စပ် စိုက်ကြည့်လိုက်ရာ သူ၏ စိတ်အခြေအနေမှာမူ ထူးဆန်း အံ့ဩစရာ ကောင်းလောက်အောင်အထိ တည်ငြိမ်လို့နေခဲ့ပြီး သူ့အား စကားပြောဆိုခွင့် ပေးရန် သဘောထားကြီးစွာဖြင့် ဆုံးဖြတ်လိုက်တော့သည်။

“ဘာကိစ္စလဲ”

ကြီးကျယ်ခမ်းနားလှသော ကပြဖျော်ဖြေရေး စင်မြင့်ထက်သို့ အနီရောင် ကတ္တီပါလိုက်ကာကြီး တစ်ခုကို လှပ်ခနဲ ဆွဲတင်လိုက်သကဲ့သို့ လည်းကောင်း နောက်ခံမှနေ၍ ဗုံသံများက တရစပ် တီးခတ်ပေးလိုက်သကဲ့သို့ လည်းကောင်း တော်ဝင်မြေးတော်သည် ရဲဝံ့ပြတ်သားလှသော အမူအရာဖြင့် ဗြောင်ကျကျ ထုတ်ဖော်ကြေညာလိုက်တော့သည်။

“အရှင်မင်းကြီး၊ ကျွန်တော်မျိုး ပြတ်ပြတ်သားသား စပြစ်တင် လျှောက်ထားအပ်ပါတယ်၊ နန်းပြင်က အရာရှိ တစ်ဦးက တော်ဝင်နန်းတွင်း ဖိဖုရားဆောင်ထဲကို မတရား ကျူးကျော်ဝင်ရောက်နေပါတယ် ဘုရား”

နန်းတွင်း အစဉ်အလာ ဥပဒေစည်းမျဉ်းများအရ နန်းတော်ကြီးအတွင်းရှိ အမျိုးသမီးမှန်သမျှသည် ဧကရာဇ်နှင့် သံဝါသ ပြုဖူးသည်ဖြစ်စေ၊ မပြုဖူးသည် ဖြစ်စေ အားလုံးမှာ ဧကရာဇ်၏ ပိုင်ဆိုင်မှုများအဖြစ်သာ သတ်မှတ်ထားခြင်း ဖြစ်ပေသည်။ နန်းတွင်း မိန်းမစိုး တစ်ဦးနှင့် နန်းတွင်း အစေခံ အမျိုးသမီးတစ်ဦးတို့အကြား တီးတိုး ရည်ငံ နေကြသည် ဟူသော ကောလာဟလ သတင်းစကားမျှဖြင့်တင် ဧကရာဇ်၏ တော်ဝင်အမျက်ဒေါသ မီးလျှံကို အပြင်းအထန် ပေါက်ကွဲစေနိုင်သည်ဖြစ်ရာ နန်းပြင်က အရာရှိတစ်ဦးအနေဖြင့် မိဖုရားဆောင်ဝင်း အတွင်းသို့ ကျူးကျော်ဝင်ရောက်ခြင်းမှာမူ တကယ့်ကို ခေါင်းဖြတ်သတ်ရမည့် ကြီးလေးလှသော ရာဇဝတ်မှုအစစ်အမှန်ပင် ဖြစ်ချေတော့သည်။

ဤကဲ့သို့သော ကမ္ဘာပျက်မည့် ပေါက်ကွဲစေတတ်လှသော စွပ်စွဲချက်ကြီး ထွက်ပေါ်လာခဲ့ပြီးတဲ့နောက်တွင် နန်းဆောင်ကြီးအတွင်းရှိ အရာရှိကြီး မြောက်မြားစွာတို့၏ မျက်နှာတစ်ခုလုံးမှာ သိသိသာသာကြီး ဖြူလျော် တုန်လှုပ်သွားခဲ့ကြရတော့သည်။

*ဒီလောက်အထိ ပျော်စရာကောင်းလှတဲ့ နှစ်သစ်ကူး အချိန်ကြီးမှာ ပြဿနာရှာတတ်လှတဲ့ ရှောင်ပိုင်ကျီတောင်မှ ဘာတစ်ခုမှ မလုပ်ဘဲ ငြိမ်ငြိမ်လေး မုန့်ထိုင်စားနေတာကို၊ မင်းက ဘာဖြစ်လို့ ဒီလိုမျိုး ကမောက်ကမ ကိစ္စတွေကို အခုအချိန်မှ ကောက်ပြီး ထုတ်ပြောနေရတာလဲ၊ အဲဒါကို နှစ်သစ်ကူးကာလကြီး ပြီးဆုံးသွားတဲ့အထိ စောင့်ပြီးမှ တင်ပြလို့ မရဘူးလား၊ ဘာဖြစ်လို့ ဧကရာဇ်ကို အသားလွတ် ဒေါသထွက်အောင် ဇွတ်အတင်း လုပ်ပြီးတော့ ငါတို့အားလုံးကိုပါ ဒီနှစ်သစ်ကူး အကြိုညကြီးမှာ အပျော်ပျက်ပြီး ဒူးထောက်တောင်းပန်ရအောင် လာပြီး ဖိအားပေး နေရတာလဲ၊ ဒီလိုမျိုး လုပ်လို့ကော မင်းအတွက် ဘာအကျိုးအမြတ်တွေ ရရှိသွားမှာမို့လို့လဲ*

*ပြီးတော့ မင်း … နန်းတွင်းထဲမှာ တရားမဝင် လျှို့ဝှက်အရှုပ်တော်ပုံမျိုးစုံနဲ့ တိုက်ရိုက်ပတ်သက်နေတဲ့ကောင် ဖြစ်ပြီးတော့ ဘယ်လိုသတ္တိမျိုးနဲ့များ တခြားလူတွေကို ကျင့်ဝတ်သိက္ခာပျက်ပြားပါတယ်ဆိုပြီး လာပြီး စွပ်စွဲရဲ ရတာလဲ*

ဧကရာဇ်အိုကြီးသည် ခေတ္တမျှ ရေငုံနှုတ်ပိတ်ကာ ငြိမ်သက်သွားခဲ့ပြီးနောက်မှ အေးစက်လှသော လေသံဖြင့် မေးမြန်း လိုက်တော့သည်။

“အဲဒါ ဘယ်သူလဲ”

တော်ဝင်မြေးတော်သည် ဝင်သက်ကို အပြည့်အဝ ရှူသွင်းလိုက်ပြီးနောက် သူ၏ အသံကို တစ်နန်းဆောင်လုံး ကြားရလောက်အောင်အထိ မြှင့်တင်လျက် အော်ဟစ်လိုက်တော့သည်။

“နန်းတွင်းအရာရှိခန့်ထားရေး ဝန်ကြီးဌာနက…”

[ကူညီကြပါဦးဗျ၊ ကျွန်တော့်ကို ကယ်ကြပါဦး၊ ဒီဘက်ကို ထပ်ပြီးတော့ မကပ်ပါနဲ့တော့၊ အား]

သွေးပျက်မတတ် အော်သံကြီးက အရာရှိကြီးများအားလုံး၏ စိတ်ထဲ၌ နားကွဲလုမတတ် ထွက်ပေါ်လာ၏။

ယခုအကြိမ်၌ စိတ်ထဲမှ အသံသည် ကျယ်ရုံသာမက နားပင် ကွဲသွားနိုင်လောက်ပြီး မသိလျှင် နားကွဲအောင် လုပ်သည်ဟုပင် ထင်မှတ်မှားရလောက်သည်။

ယခင်တစ်ခေါက် ယွီလုံဘုရားကျောင်းတွင် ဖြစ်ပွားခဲ့သော စိတ်တွင်းပေါက်ကွဲမှုကြီးနှင့် နှိုင်းယှဉ်လျှင်ပင် ယခုတစ်ကြိမ် တပြိုင်နက်တည်း ထွက်ပေါ်လာသည့် ရင်တွင်းအော်ဟစ်သံများက အဆပေါင်းမြောက်မြားစွာ ပိုမို၍ ကျယ်လောင်လှပေသည်။ အကယ်၍ ယွီလုံဘုရားကျောင်းတုန်းက ဖြစ်ရပ်က တောင်ကုန်းအနောက်ဘက်ကနေ ဘုရားကျောင်း မုခ်ဦးဝအထိသာ ပဲ့တင်ထပ်ခဲ့သည်ဟုဆိုလျှင် ယခုတစ်ကြိမ်တွင်မူ ၎င်းသွေးပျက်သံကြီးများက တော်ဝင် ရွှေနန်းမြို့တော်ကြီး တစ်ခုလုံးကိုပါ တုန်ဟီးသွားစေလောက်အောင်အထိ တရစပ် မြည်ဟီး ပျံ့နှံ့ သွားခဲ့ခြင်း ဖြစ်၏။

တော်ဝင်မြေးတော်သည် သူ၏ ပြတ်သားလှသော စွပ်စွဲချက်ကြီးကို အားပါးတရ အဆုံးသတ်လိုက်တော့သည်။

“…နန်းတွင်းအရာရှိခန့်ထားရေး ဝန်ကြီးဌာနရဲ့ နဝမအဆင့် အရာရှိ ရှုရန်မြောင်ပဲ ဖြစ်ပါတယ် ဘုရား”

နန်းတွင်း ဝန်ကြီးချုပ်မှစ၍ အောက်ခြေအဆင့်နိမ့် အရာရှိငယ်လေးများအထိ အားလုံးသော လူများ၏ မျက်နှာ တစ်ခုလုံးမှာ တကယ့်ကို သရဲတစ္ဆေတစ်ကောင်အလား တုန်လှုပ်ခြောက်ခြားလျက် ဖြူလျော် သွားခဲ့ကြရ ရှာတော့သည်။ အချို့သောအရာရှိကြီးများမှာ မတ်တတ်ရပ်နေရင်းကနေ ခြေလှမ်းများ ယိုင်နဲ့ကာ လဲပြိုလုမတတ် ဖြစ်သွားခဲ့ရပြီး အချို့မှာမူ ရုတ်တရက် ကြုံတွေ့လိုက်ရသော ထိတ်လန့်မှုကြောင့် နေရာမှာတင် ဗုန်းခနဲ သတိလစ် မေ့မြောသွားခဲ့ကြရတော့သည်။

ရှေ့တန်းတပ်မတော်၏ ဒုတိယတပ်မှူးကြီးသည် နန်းဆောင်ကြီး၏ ထွက်ပေါက်ဝဆီသို့ အလွန်အမင်း ပူပန် သောက ရောက်လှသော မျက်ဝန်းများဖြင့် အသည်းအသန် လှမ်းကြည့်လိုက်မိတော့သည်။ ကြည့်ရတာ သူ၏ စိတ်ထဲ၌မူ ယခုအချိန်တွင် ဤနေရာမှနေ၍ အပြင်ဘက်သို့ အမြန်ဆုံး ခြေဦးတည့်ရာ ထွက်ပြေး လွတ်မြောက် သွားချင်စိတ်များ တရစပ် ပေါက်ကွဲနေခဲ့ချေပြီ။

အကယ်၍ သူသာ ရှုရန်မြောင် တစ်ယောက် ဘယ်နေရာမှာ ရှိနေသလဲဆိုတာကို ကြိုသိခဲ့ပါက အခုအချိန်မှာ ဘာကိုမှ ဂရုမစိုက်တော့ဘဲ အပြင်ဘက်ဆီသို့ အသက်လုလျက် ပြေးထွက်သွားခဲ့လောက်သည်။ သူ အနောက်သို့ ပြန်လှည့်ကြည့်လိုက်မိသည့် အခါတွင်မူ တော်ဝင်မြေးတော်၏ မျက်နှာပေါ်တွင် ဘယ်လိုမှ ဖုံးကွယ်ထား၍ မရနိုင်လောက်အောင်အထိ အတိုင်းသား ပေါ်လွင်နေသော အောင်နိုင်သူတစ်ယောက်အလား မောက်မာ ဝင့်ကြွား လှသည့် အပြုံးကြီးကို မြင်တွေ့လိုက်ရတော့သည်။

“ဂျွတ်”

ဧကရာဇ်၏ လက်ထဲတွင် တင်းတင်းဆုပ်ကိုင်ထားသော အဖိုးတန် ကျောက်စိမ်း သေရည်ခွက်ကြီးမှာ သူ၏ ပြင်းထန်လှသော လက်အားကြောင့် အက်ကြောင်းများ တရစပ် ထင်ဟပ်လျက် အစိပ်စိပ် ကြေမွသွားခဲ့ ရတော့သည်။

*ဒီအရူး*

*ဒီသစ္စာဖောက်ကောင်*

ရုတ်တရက် တစ်စုံတစ်ယောက်က ထရပ်လာသည်။