အခန်း ၈၁

အခန်း။ ၈၁

လက်နက်ကိုင်ရဲတပ်ဖွဲ့ဝင်မှာ ပြန်လည်ခုခံခြင်း မပြုပေ။

ဇောင်လဲ့လဲ့ကမူ အောင်နိုင်သူကဲ့သို့ ရန်လိုသည့်အကြည့်ဖြင့် ကြည့်နေဆဲပင်။

တရားသူကြီး ကျောက်ကျီချောင်က တူဖြင့် ထုကာ "တိတ်တိတ်နေကြ" ဟု အမိန့်ပေးလိုက်သည်။

ရှေ့နေဂူချန်က ဘာမျှမပြောဘဲ တိတ်ဆိတ်နေသည်။

ဇောင်လဲ့လဲ့၏ အပြုအမူမှာ နိုင်ငံတော်ဝန်ထမ်းကို စော်ကားခြင်းနှင့် တရားဥပဒေလုပ်ငန်းစဉ်ကို နှောင့်ယှက်ခြင်းမြောက်ရာ အပြစ်ဒဏ်ကျခံရမည်မှာ သေချာနေပြီဖြစ်သည်။

တိုက်ရိုက်ထုတ်လွှင့်မှုကို ကြည့်ရှုနေသူများမှာမူ ဒေါသထွက်လွန်း၍ ဇောင်လဲ့လဲ့အား ဝိုင်းဝန်းဆဲဆိုနေကြသည်။

[တရားခွင်ထဲမှာ ဖုန်းသုံးတယ် ရဲကိုပါ ရိုက်တယ် ထောင်ချကို ချရမယ်]

[ဇောင်လဲ့လဲ့ရဲ့ မောက်မာမှုက အထွတ်အထိပ်ပဲ။ ထောင်ဒဏ်ပဲ ပေးသင့်တယ်]

[ဇောင်လဲ့လဲ့ကို အထဲပို့လိုက်ကြစမ်းပါ]

[ကျွန်မ မိန်းမသားတစ်ယောက်ဖြစ်ပေမဲ့ ဒီလိုမိန်းမမျိုးကို လက်မခံနိုင်ဘူး။ ချိုင်ချန်းတော့ တကယ့်ကို သနားစရာပါပဲ]

တရားသူကြီး ကျောက်ကျီချောင်က "ဇောင်လဲ့လဲ့ အခု မင်းရဲ့ နောက်ဆုံးထွက်ဆိုချက်ကို ပြောနိုင်ပါတယ်" ဟု ပြောလိုက်သည်။

ဇောင်လဲ့လဲ့က "ဘာကို ထွက်ဆိုရမှာလဲ ကျွန်မ ဒီအမှုကို ပြန်ရုပ်သိမ်းလိုက်ပြီလေ။ ချိုင်ချန်းကို မတရားစွဲတော့ဘူး။ တင်တောင်းငွေလည်း ပြန်မပေးဘူး။ အဲဒီငွေတွေက ကျွန်မရဲ့ အရည်အချင်းနဲ့ ရထားတာ။ သူက ကျွန်မကို လုပ်ခဲ့တာပဲဟာ" ဟု ပြန်မေးသည်။

"ဒီအမှုကို ပိတ်သိမ်းလိုက်ပါ။ ကျန်တဲ့ ရှေ့နေပြောနေတဲ့ အကြောင်းအရာတွေက ကျွန်မနဲ့ မဆိုင်ဘူး။ ကျွန်မက လိမ်စားတဲ့သူမှ မဟုတ်တာ။ တခြားသူတွေက အိမ်တွေ လွှဲပေးတာက သူတို့သဘောနဲ့ သူတို့ လွှဲပေးတာ။ အဲဒီအမှုတွေကို အရင်ကတည်းက တရားစွဲပြီးသား ဒါတွေက အိမ်ထောင်ရေး လိမ်လည်မှု မဟုတ်ဘူး။ ကျွန်မက သူတို့နဲ့ မှတ်ပုံတင်တောင် မတင်ခဲ့တာ ဘာလိမ်တာလဲ တွဲပြီးမှ လမ်းခွဲတာ သဘာဝပဲလေ"

"ဒီနေ့ တရားခွင်က ပြီးပြီ ကျွန်မ ပြန်တော့မယ်။ ညနေပိုင်းမှာ အလုပ်တွေ ရှိသေးတယ်။ ကျွန်မရဲ့ အချိန်ကို မဖြုန်းကြပါနဲ့။ ကျွန်မ တစ်ရက်ကို ဘယ်လောက်တန်လဲ သိလား" ဟု မောက်မာစွာ ပြောလိုက်သည်။

ဇောင်လဲ့လဲ့သည် ဂူချန်တင်ပြခဲ့သော အထောက်အထားများ၊ အမှုတွဲများကို ဂရုမစိုက်ပေ။

သူမသည် အပြစ်ကင်းသည်ဟုသာ ယုံကြည်နေပြီး အချိန်ဖြုန်းနေရသည်ဟုသာ ယူဆနေသည်။ သူမစိတ်ထဲတွင် နောက်ဆုံးပေါ် လက်ကိုင်အိတ်အသစ် ဝယ်ရန်၊ ဇိမ်ခံကားအသစ်ဖြင့် ကြွားဝါရန်သာ ရှိနေသည်။

ငွေကြေး အဆင်မပြေမှုအတွက်မူ ချိုင်ချန်းကိုသာ အပြစ်တင်နေသည်။

ချိုင်ချန်းသာ အိမ်ကို လွှဲပေးခဲ့လျှင် သူမမှာ Porsche ကား၊ အမှတ်တံဆိပ်ပါ အိတ်များ ဝယ်နိုင်မည်ဟု တွက်ချက်နေမိသည်။

ယခုအခါ ချိုင်ချန်းဆီမှ အိမ်မရနိုင်တော့သည်ကို သိသဖြင့် အမှုရုပ်သိမ်းပြီး နောက်ထပ် ချမ်းသာသည့် သားကောင်းတစ်ဦးကို ချိတ်ဆက်ရန်သာ သူမ ကြံစည်နေတော့သည်။

ဇောင်လဲ့လဲ့၏ စကားအဆုံးတွင် တိုက်ရိုက်ထုတ်လွှင့်မှုကို ကြည့်ရှုနေသူများမှာ သူမအား အံ့အားသင့်စွာဖြင့်သာ ကြည့်နေကြသည်။

[ဒီမိန်းမ တကယ်ပဲ သူရာဇဝတ်မှု ကျူးလွန်နေတယ်ဆိုတာ မသိတာလား]

[သူတရားလို ဖြစ်နေရုံနဲ့ အပြစ်က လွတ်မယ်ထင်နေတာလား တရားခွင်မှာ ဖုန်းသုံးတယ်၊ ရဲကို ပါးရိုက်တယ်... သူမကို ချက်ချင်း ဖမ်းသင့်တာ]

[သူမက အခုထိ အပြစ်မရှိဘူးလို့ ထင်နေတုန်းပဲ။ ချိုင်ချန်းကို တင်တောင်းငွေ ပြန်မပေးဘူးတဲ့လား]

တရားသူကြီး ကျောက်ကျီချောင်က "တရားရုံးအနေနဲ့ မိနစ် ၃၀ ခဏရပ်နားမှာဖြစ်ပြီး တရားခွင်

ပြန်စရင် အမိန့်ချမှတ်မယ်" ဟု ကြေညာလိုက်သည်။

တရားခွင်အတွင်းရှိသူများ အားလပ်ချိန်ယူနေကြစဉ် ဇောင်လဲ့လဲ့မှာ ဖုန်းကို ဆွဲယူကာ ဖုန်းဆက်နေသည်။

"အရမ်းရှုပ်တာပဲ ကျွန်မ အမှုရုပ်သိမ်းပြီးပြီလေ။ စီရင်ချက်ချဖို့ ဘာလို့ မိနစ် ၃၀ ကြာတာလဲ မြန်မြန်လုပ်ပေးပါ အချိန်မဖြုန်းပါနဲ့။ မနက်ဖြန် ကျွန်မမှာ ချိန်းထားတာ ရှိသေးတယ်" ဟု စိတ်မရှည်စွာ ပြောဆိုနေသည်။

သူမသည် ကျောက်မီးသွေးတွင်းပိုင်ရှင်၏ သားဖြစ်သူနှင့် WeChat မှတစ်ဆင့် စကားပြောနေသည်။

သို့သော် ထိုသူက သူမအား "မင်းနဲ့ တွဲရမှာလား မလုပ်ပါဘူး။ မင်းက နောက်ကျရင် ငါ့ကို မုဒိမ်းမှုနဲ့ စွပ်စွဲပြီး ငါ့မိသားစု ပိုင်ဆိုင်မှုတွေကို လိမ်ယူသွားမှာ ကြောက်တယ်။ ဝေးဝေးသွားစမ်းပါ" ဟု ပြန်ပြောလိုက်သည်။

ဇောင်လဲ့လဲ့က "ကျွန်မက ဘာလို့ မုဒိမ်းမှုနဲ့ စွပ်စွဲရမှာလဲ ကျွန်မက အိမ်နာမည်ပေါက်တောင် မတောင်းပါဘူး" ဟု ပြန်ပြောသော်လည်း ထိုသူက တရားခွင်ကို ရိုက်ထားသည့် Screenshot များကို ပို့လိုက်သည်။

ဇောင်လဲ့လဲ့သည် ချက်ချင်း ဒေါသထွက်သွားသည်။

"ဘယ်သူက ဒီတရားခွင်ကို တိုက်ရိုက်ထုတ်လွှင့်ခွင့် ပေးလိုက်တာလဲ ကျွန်မရဲ့ ကိုယ်ရေးကိုယ်တာကို ဘာလို့ မလေးစားတာလဲ။ ကျွန်မ သူတို့ကို တရားစွဲမယ်။ တရားသူကြီးကိုပါ တိုင်မယ်။ ဒါက ကျွန်မရဲ့ အခွင့်အရေးကို ချိုးဖောက်တာပဲ" ဟု အော်ဟစ်နေသည်။

သူမသည် ရှေ့နေတစ်ဦးကို ဆက်သွယ်ရန် ကြိုးစားသော်လည်း အရင်က သူမနှင့် လုပ်ဖူးသည့် ရှေ့နေများအားလုံးက သူမကို WeChat တွင် Block လုပ်ထားကြသည်။

သူမ ချိတ်ဆက်ထားသည့် သူဌေးသားကလည်း သူမကို Block လုပ်ထားသည်။

ဇောင်လဲ့လဲ့မှာ ဒေါသထွက်လွန်း၍ ရူးမတတ်ပင် ဖြစ်နေသည်။

"ငါ့ကို Block လုပ်ရအောင် ငါ ပိုက်ဆံမပေးနိုင်လို့လား ငါ ရှေ့နေ မငှားနိုင်တော့ဘူးလား" ဟု တွေးကာ အမျက်ထွက်နေသည်။

သူမသည် သူမ၏ ကိုယ်ရေးကိုယ်တာချိုးဖောက်မှုအတွက် နိုင်ငံတော်ထံမှ လျော်ကြေးငွေ သိန်းရာချီ တောင်းမည်ဟု ကြံစည်နေသည်။

မိနစ် ၃၀ ပြည့်မြောက်သွားသောအခါ တရားခွင် ပြန်စသည်။

ဇောင်လဲ့လဲ့က တရားခွင်သို့ ရောက်သည်နှင့် "ကျွန်မ ကန့်ကွက်ပါတယ် တရားရုံးက တိုက်ရိုက်ထုတ်လွှင့်တာက ကျွန်မရဲ့ ကိုယ်ရေးကိုယ်တာ အခွင့်အရေးကို ထိခိုက်ပါတယ်။ ကျွန်မ နောက်ထပ် ချိန်းတွေ့လို့ မရတော့ရင် ဘယ်သူ တာဝန်ယူမှာလဲ ကျွန်မကို သိန်းတစ်ရာ လျော်ပေးရမယ် တရားရုံးမှာ လူတွေက ကျွန်မကို ဆဲဆိုနေကြတယ်။ ဒါက ကျွန်မရဲ့ အခွင့်အရေးကို ချိုးဖောက်တာပဲ" ဟု အော်ဟစ်ကာ ကန့်ကွက်နေသည်။

သူမ ဆက်ပြောရန် ပြင်ဆင်နေချိန်တွင် တရားသူကြီး ကျောက်ကျီချောင်က တူဖြင့် ပြင်းထန်စွာ ထုလိုက်သည်။

တရားခွင်အတွင်းရှိ တရားသူကြီးများနှင့် ဝန်ထမ်းများအားလုံးက ဇောင်လဲ့လဲ့အား အေးစက်စက် အကြည့်များဖြင့် ကြည့်နေကြသည်။

စီရင်ချက် ချမှတ်တော့မည့်အချိန်တွင် ဇောင်လဲ့လဲ့မှာ ယခုထိတိုင် ရူးသွပ်သကဲ့သို့ ပြုမူနေဆဲပင်။