အခန်း ၈၂

အခန်း။ ၈၂

တရားသူကြီး ကျောက်ကျီချောင်က "တိတ်တိတ်နေကြ" ဟု အမိန့်ပေးလိုက်သည်။

"ဇောင်လဲ့လဲ့ မင်း တရားခွင်ကို ဆက်ပြီးနှောင့်ယှက်နေမယ်ဆိုရင် တရားဥပဒေအရ ပြင်းထန်စွာ အရေးယူခြင်း ခံရလိမ့်မယ်"

ထိုသို့ကြားရသောအခါ ဇောင်လဲ့လဲ့မှာ ပို၍ပင် ဒေါသထွက်သွားသည်။

"ဒါက တရားခွင်နှောင့်ယှက်တာ ဟုတ်လား ကျွန်မက ကျွန်မရဲ့ အခွင့်အရေးကို ခုခံကာကွယ်နေတာ" ဟု အော်ဟစ်ကာ စားပွဲကို လက်ဖဝါးဖြင့် ထုလိုက်သည်။

"ကျွန်မက တရားသူကြီးကို ကြောက်ရမှာလား သတ္တိရှိရင် ကျွန်မကို သတ်ပစ်လိုက်လေ"

တရားသူကြီး ကျောက်ကျီချောင်က ဘာမျှ ပြန်မပြောဘဲ "အခု ဒီအမှုအတွက် အမိန့်ချမှတ်ချက်ကို ကြေညာမယ်" ဟု ကြေညာလိုက်သည်။

တိုက်ရိုက်ထုတ်လွှင့်မှုကို ကြည့်ရှုနေသူများမှာ စိတ်လှုပ်ရှားနေကြသည်။

[နောက်ဆုံးတော့ အမိန့်ချတော့မယ်]

[ရှေ့နေဂူချန် တကယ်တော်တာပဲ ဇောင်လဲ့လဲ့ကို ထောင်ချလိုက်တော့]

[သူမ မောက်မာလွန်းတယ် တရားသူကြီးကိုတောင် ပြန်ဆဲရဲတယ်ပေါ့လေ]

[ထောင်ဒဏ်ချမှတ်ရမယ် ဂူချန် တကယ်ကို အံ့သြဖို့ကောင်းတယ်]

တရားခွင်တွင် ချိုင်ချန်းမှာ ဇောင်လဲ့လဲ့၏ အပြုအမူများကို ကြည့်ကာ သူကိုယ်သူပင် မယုံနိုင်ဖြစ်နေသည်။

ထိုသို့သော အမျိုးသမီးမျိုးကိုမှ ချစ်မိခဲ့သည့်အတွက် နောင်တရနေမိသည်။

ချိုင်ချန်း၏ မိခင် ယန်ကွေးကျန်းမှာလည်း သူမ၏ သားဖြစ်သူ အပြစ်ကင်းစင်ကြောင်း ကြေညာပေးမည်ကို မျှော်လင့်နေသည်။

တရားသူကြီး ကျောက်ကျီချောင်က ဆက်ပြောလိုက်သည်။

"ပထမအချက်... ဇောင်လဲ့လဲ့က ချိုင်ချန်းကို မုဒိမ်းမှုနဲ့ စွပ်စွဲထားတဲ့အမှုမှာ တရားရုံးရဲ့ စစ်ဆေးချက်အရ ချိုင်ချန်းမှာ မုဒိမ်းကျင့်ဖို့ ရည်ရွယ်ချက်လည်းမရှိသလို ကျူးလွန်တဲ့ အပြုအမူလည်း မရှိကြောင်း တွေ့ရှိရတဲ့အတွက် ချိုင်ချန်းကို အပြစ်မရှိဘူးလို့ ဆုံးဖြတ်ပါတယ်"

"ဒုတိယအချက်... ဇောင်လဲ့လဲ့နဲ့ ချိုင်ချန်းတို့က အိမ်ထောင်ဖက်တွေ မဟုတ်ကြပါဘူး။ ချိုင်ချန်းက ဇောင်လဲ့လဲ့ကို ပေးခဲ့တဲ့ တင်တောင်းငွေ ၃ သိန်းနဲ့ ပတ်သက်ပြီး အထောက်အထား ခိုင်လုံတာကြောင့် ဇောင်လဲ့လဲ့က ဒီအမှုပြီးဆုံးပြီး သုံးရက်အတွင်း ချိုင်ချန်းဆီကို အဆိုပါငွေတွေကို ခြွင်းချက်မရှိ ပြန်ပေးရပါမယ်"

"တတိယအချက်... ဇောင်လဲ့လဲ့က ချိုင်ချန်းကို မုဒိမ်းမှုနဲ့ တိုင်ကြားရာမှာ သက်သေအထောက်အထားအတုတွေ ဖန်တီးပြီး ပိုင်ဆိုင်မှုတွေ လွှဲပြောင်းပေးဖို့ ခြိမ်းခြောက်ခဲ့ပါတယ်။ ဒါက ငွေညှစ်မှုနဲ့ မဟုတ်မမှန် စွပ်စွဲမှုမြောက်ပြီး ချိုင်ချန်းအပေါ် ပြင်းထန်တဲ့ ထိခိုက်နစ်နာမှုတွေ ဖြစ်စေခဲ့ပါတယ်"

"အထောက်အထားတွေအရ ဇောင်လဲ့လဲ့က နှစ်ရှည်လများ အိမ်ထောင်ရေးလိမ်လည်မှုတွေ၊ တင်တောင်းငွေနဲ့ ပိုင်ဆိုင်မှုတွေကို လိမ်လည်ရယူမှုတွေ ကျူးလွန်ခဲ့ကြောင်း၊ အဲဒီလုပ်ရပ်တွေက သွယ်ဝိုက်ပြီး လူသေဆုံးမှုတွေအထိ ဖြစ်ပေါ်စေခဲ့ကြောင်း တွေ့ရှိရပါတယ်။ ဇောင်လဲ့လဲ့မှာ လူသတ်ဖို့ ရည်ရွယ်ချက် မရှိခဲ့ရင်တောင်မှ သူမရဲ့ လိမ်လည်မှုတွေက အရမ်းပဲ ပြင်းထန်ပြီး

ဆိုးရွားလွန်းတယ်"

"ရာဇဝတ်ကျင့်ထုံး ဥပဒေပုဒ်မတွေအရ ဇောင်လဲ့လဲ့ကို လိမ်လည်မှု၊ မဟုတ်မမှန် စွပ်စွဲမှု၊ ငွေညှစ်မှုနဲ့ လူသေဆုံးမှုအတွက် တာဝန်ရှိမှုတို့နဲ့ ပြစ်မှုပေါင်းများစွာ ကျူးလွန်ကြောင်း ဆုံးဖြတ်လိုက်တယ်။ ဒါ့အပြင် နိုင်ငံတော်ဝန်ထမ်းကို စော်ကားခြင်းနဲ့ နောင်တမရတဲ့ အပြုအမူတွေကြောင့်... ဇောင်လဲ့လဲ့ကို သေဒဏ်ချမှတ်ပြီး နိုင်ငံရေးအရ အခွင့်အရေးတွေကိုပါ တစ်သက်တာ ပိတ်ပင်လိုက်ပါတယ်။ လိမ်လည်ရယူထားတဲ့ ပိုင်ဆိုင်မှုအားလုံးကိုလည်း အပြီးအပိုင် ပြန်ပေးရပါမယ်"

"ဇောင်ရီဖိန်က ဇောင်လဲ့လဲ့နဲ့ ပူးပေါင်းပြီး လိမ်လည်မှု၊ ငွေညှစ်မှုနဲ့ သက်သေအတုတွေ ဖန်တီးခဲ့တဲ့အတွက် ပြစ်မှုပေါင်းများစွာ ကျူးလွန်ကြောင်း တွေ့ရှိရပါတယ်။ ဒါပေမဲ့လည်း ပြစ်မှုထင်ရှားစီရင်ခြင်းအပေါ် ဝန်ခံပြီး နောင်တရတဲ့ အမူအရာရှိတာကြောင့် ပြစ်ဒဏ်လျှော့ပေါ့ပြီး ထောင်ဒဏ် (၁၆) နှစ် ချမှတ်ပါတယ်"

"ဇောင်လဲ့လဲ့နဲ့ ပူးပေါင်းလိမ်လည်ခဲ့တဲ့ ဒူယူလုပ်ငန်းက အဓိကတရားခံ ယန်ခိုင်ကိုတော့ ထောင်ဒဏ် (၃) နှစ်နဲ့ ငွေဒဏ် နှစ်သိန်း ချမှတ်ပါတယ်"

"ဒီအမှုရဲ့ စီရင်ချက်က ပြီးဆုံးပါပြီ"

စီရင်ချက် ကြေညာလိုက်သည်နှင့် တရားခွင်မှာ ဆူညံသွားသည်။

ချိုင်ချန်းမှာ ဝမ်းသာအားရ ခုန်ပေါက်လိုက်မိသည်။

ငါ တကယ်ပဲ အပြစ်ကင်းစင်သွားပြီ။

ငါ အပြစ်ကင်းစင်သွားပြီ။

မိခင်ဖြစ်သူ ယန်ကွေးကျန်းမှာလည်း မျက်ရည်များဖြင့် ဝမ်းသာနေသည်။

သူမ၏ သားလေးမှာ အပြစ်ကင်းစင်ကြောင်း သက်သေပြနိုင်ခဲ့ပြီ ဖြစ်သည်။

တိုက်ရိုက်ထုတ်လွှင့်မှု၏ မှတ်ချက်ပေးကဏ္ဍများတွင် ကြည့်ရှုသူများ၏ အောင်ပွဲခံသံများဖြင့် ပြည့်နှက်နေသည်။

[စီရင်ချက်က တရားမျှတတယ် ဇောင်လဲ့လဲ့ကို သေဒဏ်ပေးလိုက်တာ အကုန်လုံးက ဒီလိုပဲဖြစ်သင့်တာ]

[ဇောင်ရီဖိန်ကို ထောင်ဒဏ် ၁၆ နှစ် ချမှတ်တာလည်း မှန်တယ်။ သားသမီး ဖျားနာတာက လိမ်လည်ဖို့ အကြောင်းပြချက် မဟုတ်ဘူး။ ဥပဒေဆိုတာ ဥပဒေပဲ]

[ဇောင်လဲ့လဲ့က တရားသူကြီးကိုတောင် ပြန်ခြိမ်းခြောက်ရဲသေးတယ် သေဒဏ်ပေးတာ မများပါဘူး]

[ရှေ့နေဂူချန် တကယ်တော်တာပဲ။ တရားလိုဖြစ်သူကိုတောင် ထောင်ထဲ ပို့လိုက်နိုင်တာ တကယ့် ဥပဒေမဲ့မိုက်ရူးရဲပဲ]

တရားခွင်တွင် ဇောင်ရီဖိန်မှာ လက်ထိတ်ခတ်ခံလိုက်ရပြီး သူမ၏ ထောင်ဒဏ် ၁၆ နှစ်အတွက် ပြင်ဆင်နေရပြီ ဖြစ်သည်။

သူမ၏ သွေးကင်ဆာဝေဒနာရှင် သားငယ်အတွက်မူ လူမှုအဖွဲ့အစည်းမှ ကူညီပေးနိုင်မည့်လမ်းစ ပေါ်လာနိုင်သော်လည်း ဇောင်လဲ့လဲ့အတွက်မူ ကံကြမ္မာမှာ ဆုံးဖြတ်ပြီးသား ဖြစ်သည်။

တရားသူကြီး ကျောက်ကျီချောင်သည် ဇောင်လဲ့လဲ့၏ အတင့်ရဲမှု၊ တရားခွင်ကို စော်ကားမှု၊ ရဲဝန်ထမ်းအား ရိုက်နှက်မှု၊ အပြစ်မဝန်ခံမှုနှင့် အလွန်ကြီးမားသော လိမ်လည်မှု ပမာဏတို့ကြောင့် တွန့်ဆုတ်ခြင်းမရှိဘဲ သေဒဏ်ကိုသာ ချမှတ်ခဲ့သည်။

စီရင်ချက်ကို ကြားလိုက်ရသည့်အခါ ဇောင်လဲ့လဲ့မှာ မျက်နှာသွေးမရှိတော့အောင် ဖြူဖျော့သွားသည်။

သူမ ယုံကြည်နိုင်ခြင်း မရှိပေ။

"ဒါ ဘယ်လိုလုပ် ဖြစ်နိုင်မှာလဲ ငါက တရားလိုလေ။ တရားလိုကို သေဒဏ်ပေးရမှာလား။ ငါ အမှုရုပ်သိမ်းထားတာလေ"

သူမသည် ဇိမ်ခံကားများ၊ အမှတ်တံဆိပ်ပါ အိတ်များနှင့် ဇိမ်ကျကျ နေထိုင်လိုသေးသည်။ တစယခုလို လိမ်လည်ခြင်းက ဒီလောက်အထိ ပြင်းထန်ရလားဟု သူမ မေးခွန်းထုတ်နေမိသည်။

"ကျွန်မ အပြစ်မရှိဘူး ဇောင်ရီဖိန်က ကျွန်မကို သွေးထိုးပေးလို့ လုပ်တာ။ ဒါတွေအားလုံး သူမလုပ်တာ ကျွန်မနဲ့ ဘာမှမဆိုင်ဘူး"

ဇောင်လဲ့လဲ့သည် လက်ထိတ်ခတ်ခံရစဉ် ရုန်းကန်ရင်း အော်ဟစ်နေသည်။

"ကျွန်မမှာ ပိုက်ဆံမှ မရှိတော့တာကို ဘာပြန်ပေးရမှာလဲ ဘဏ်အကောင့်ထဲမှာလည်း မရှိဘူး။ ပိုင်ဆိုင်မှုတွေလည်း ကုန်ပြီ။ ပြန်ပေးရမယ်ဆိုတာ အိပ်မက်မက်မနေနဲ့"

သူမသည် ဒုတိယအယူခံဝင်မည်ဟု အော်ဟစ်နေသည်။

သို့သော် တရားသူကြီး ကျောက်ကျီချောင်က သူမအား အေးစက်စက် အကြည့်ဖြင့်သာ ကြည့်လိုက်သည်။ သူမ၏ ကျူးလွန်ထားသော ပြစ်မှုပေါင်းများစွာ၊ တရားရုံးအား စိန်ခေါ်မှုများနှင့် နိုင်ငံတော်ဝန်ထမ်းအား စော်ကားမှုတို့ကြောင့် မည်သည့်အယူခံတင်တင် သေဒဏ်မှာ ပြောင်းလဲသွားမည်မဟုတ်ကြောင်း လူတိုင်းသိရှိလိုက်ကြသည်။

ဇောင်လဲ့လဲ့မှာ ရုန်းကန်ရင်းဖြင့် တရားခွင်မှ ထွက်ခွာသွားရတော့သည်။

ဤအမှုမှာ ရှေ့နေဂူချန်၏ ထက်မြက်မှုဖြင့် တရားဥပဒေ၏ အောင်ပွဲကို ပြသလိုက်ခြင်းပင်။