အခန်း ၄၁၄

အခန်း (၄၁၄) မြေကမ္ဘာနတ်ဆိုးနယ်ပယ် အစဦးအဆင့်

"နန်းတော်က သိပ်ကြာကြာ တောင့်ခံနိုင်တော့မှာ မဟုတ်ဘူး..."

ကျောက်လင်ကလည်း သတင်းရရှိထားပြီး ဒုတိယခန်းမသခင် ရွှမ်ယွမ်ဖေးဟယ်သည် နန်းတော်ကို နာရီဝက်ကြာအောင် ဆက်လက်တိုက်ခိုက်နေကြောင်း သိရှိထား၏။

အကြံပေးအမတ်ကြီး တာ့ဝါထံမှ ကမ္ဘာ့အမြုတေကို ရယူရန်အတွက် ဒုတိယခန်းမသခင် ရွှမ်ယွမ်ဖေးဟယ်သည် ဆိတ်ငြိမ်စွာ နေတော့မည်မဟုတ်ဘဲ အကြံပေးအမတ်ကြီး တာ့ဝါကို ထွက်လာစေရန် နန်းတော်ကို ပေါ်တင်တိုက်ခိုက်မည်ဖြစ်ကြောင်း ကျောက်လင် သဘာဝကျစွာ နားလည်ထား၏။

အကြံပေးအမတ်ကြီးတာ့ဝါ သေဆုံးသွားကြောင်းကို ကျောက်လင်ပင်လျှင် မသိရှိခဲ့ပေ။

သို့သော်လည်း ထိုအရာက အရေးမကြီးပေ။

နန်းတော် ပြိုကျတော့မည်ကို သိရှိထားသရွေ့ ကျောက်လင်သည် နန်းတော်အတွင်းသို့ လျှို့ဝှက်ဝင်ရောက်ကာ တော်ဝင်ရတနာတိုက်ကို ဦးစွာ သိမ်းပိုက်နိုင်မည် ဖြစ်သည်။

တန်းနျီမိသားစု၏ ဝိညာဉ်ရတနာများနှင့်ပတ်သက်၍မူ ၎င်းတို့သည် အတွင်းရတနာတိုက်မှ ရတနာများကို အသုတ်လိုက် ရွှေ့ပြောင်းထားပြီးဖြစ်ကြောင်းကိုမူ ကျောက်လင် မသိရှိထားပေ။

"နန်းတော်ကို နဝမအဆင့် အစီအရင်က ကာကွယ်ထားတာဆိုတော့ ဒုတိယခန်းမသခင် ရွှမ်ယွမ်ဖေးဟယ်အနေနဲ့ အချိန်တိုအတွင်း ဖောက်ထွင်းနိုင်မယ့် ကိစ္စမျိုးတော့ မဟုတ်ဘူး..."

"နန်းတော်ဘေးက မြို့ထဲရှိ တောင်ကုန်းတစ်ခုပေါ်မှာ စောင့်ကြည့်ဖို့ လင်းယုန်တစ်ကောင်ကို ငါ ထားခဲ့တယ်..."

"နန်းတော် ပြိုကျခါနီးအချိန်ကျရင် အဲ့ဒီကို ချက်ချင်း ဟင်းလင်းပြင် တည်နေရာပြောင်းရွှေ့ခြင်းနဲ့ သွားရမယ်..."

ကျောက်လင်က တည်ငြိမ်သော လေသံဖြင့် ရေရွတ်လိုက်၏။

ထိုအခိုက်တွင် ကျောက်လင်က စနစ်မျက်နှာပြင်ကို ကြည့်ရှုနေခဲ့သည်။

[ကျင့်ကြံခြင်းအမှတ်များ - +၂၀၅]

ပြီးခဲ့သော ရက်အနည်းငယ်အတွင်း ကျောက်လင်နှင့် သူ၏ ဇနီးများသည် တစ်လှည့်စီ ကျင့်ကြံခဲ့ကြပြီး စနစ်မှ ဆုချီးမြှင့်သော ကျင့်ကြံခြင်းအမှတ်များသည် နှစ်ပေါင်း (၂၀၅)နှစ်အထိ ရောက်ရှိလာခဲ့ပြီ ဖြစ်သည်။

ယခုအခါ ကျောက်လင်သည် ထိုကျင့်ကြံခြင်းအမှတ်များကို အသုံးပြု၍ ဟင်းလင်းပြင်လမ်းစဉ်ကို နားလည်သဘောပေါက်ရန် ကြိုးပမ်းတော့မည် ဖြစ်၏။

"စနစ်... ကျင့်ကြံခြင်းအမှတ် နှစ်တစ်ရာ့ငါးဆယ်ကို အသုံးပြုပြီး ဟင်းလင်းပြင်လမ်းစဉ်ကို နားလည်သဘောပေါက်စေ..."

ကျောက်လင်သည် ကြွက်လေး ပေးပို့ထားသော သွေးအမြုတေကို ထုတ်ယူလိုက်ပြီး စိတ်ထဲမှ ချက်ချင်း အမိန့်ပေးလိုက်သည်။

ချက်ချင်းပင် ထိုသွေးအမြုတေသည် ပျောက်ကွယ်သွားပြီး တစ်ချိန်တည်းမှာပင် ကျောက်လင်၏ စိတ်ထဲတွင် အလင်းတန်းများ ပေါ်လာကာ ဘောလုံးတစ်လုံးအသွင် စုစည်းသွား၏။

အချိန်တိုအတွင်း ကျောက်လင်သည် ပြည့်စုံသော ဟင်းလင်းပြင်လမ်းစဉ်၏ နက်နဲသော လျှို့ဝှက်ချက် စွမ်းအားအားလုံးကို နားလည်သဘောပေါက်သွားခဲ့သည်။

"ကောင်းပြီ..."

"အခုဆို ငါက တာအိုရှစ်ခုလုံးရဲ့ စွမ်းအားနဲ့ နက်နဲတဲ့ လျှို့ဝှက်ချက်တွေကို နားလည်သဘောပေါက်သွားပြီဆိုတော့ သတ္တမအဆင့်ကို ချိုးဖြတ်ဝင်ရောက်နိုင်ပြီ..."

ကျောက်လင်က ဝမ်းသာအားရဖြင့် ပြောလိုက်၏။

သတ္တမအဆင့်သို့ ချိုးဖြတ်ဝင်ရောက်ရန်အတွက် တာအိုတစ်ခုစီ၏ စွမ်းအားနှင့် ၎င်း၏ နက်နဲသော လျှို့ဝှက်ချက်ကို သေချာပေါက် နားလည်သဘောပေါက်ရမည်ဖြစ်သည်။ ပေါင်းစပ်ခြင်းဖြင့် တစ်ခုတည်းအဖြစ် ပေါင်းစည်းသွားကာ ပြည့်စုံသော တာအိုတစ်ခု ဖြစ်ပေါ်လာစေ၏။

အကယ်၍ ကျောက်လင်သာ ဤတာအိုရှစ်ခုကို ကိုယ်တိုင် ပေါင်းစပ်မည်ဆိုပါက ရွေးချယ်စရာတစ်ခု ဖြစ်နိုင်သော်လည်း အလွန်ရှည်လျားသော အချိန်တစ်ခု ယူရမည်ဖြစ်ပြီး သူ့တွင် ထိုကဲ့သို့သော သည်းခံနိုင်စွမ်းမျိုး မရှိပေ။

"ငါ့ဆီမှာ ကျင့်ကြံခြင်းအမှတ် ငါးဆယ့်ငါးနှစ် ကျန်သေးတယ်... တာအိုရှစ်ခုလုံးကို ပေါင်းစပ်ဖို့ အဲ့ဒါဆို လုံလောက်လောက်တယ်..."

ကျောက်လင်သည် တာအိုရှစ်မျိုးလုံးကို ပေါင်းစပ်ရန်အတွက် စနစ်၏ စွမ်းရည်များကို သဘာဝကျစွာ အသုံးပြုလိုခဲ့သည်။

ထိုအခိုက်တွင် ကျောက်လင်သည် ဝမ့်ရှန်းတောင်တန်းရှိ တောင်ကြီးတစ်လုံးပေါ်တွင် ရောက်ရှိနေပြီး တောင်ထွတ်ရှိ ကျောက်တုံးကြီးတစ်တုံးပေါ်တွင် ထိုင်နေ၏။

"စနစ်... ငါးဆယ့်ငါးနှစ်ကို အသုံးပြုပြီး ငါ နားလည်သဘောပေါက်ထားတဲ့ တာအိုရှစ်ခုကို တစ်ခုတည်းအဖြစ် ပေါင်းစပ်လိုက်စမ်း..."

ကျောက်လင်သည် သူ၏ စိတ်ထဲမှနေ၍ ချက်ချင်း အမိန့်ပေးလိုက်သည်။

ချက်ချင်းပင် ကျောက်လင်သည် မျက်လွှာချလိုက်ပြီး အနားယူနေသည့်ဟန် ပေါ်ပေါက်သွား၏။

ရုတ်တရက် ကျောက်လင်၏ တစ်ကိုယ်လုံး ရွှေရောင်အလင်းတန်းများ တောက်ပသွားပြီး သူ၏ အငွေ့အသက်ကလည်း သိသိသာသာ ပြောင်းလဲသွားသည်။

ထို့နောက် အပြာရောင် အလင်းတန်းတစ်ခု ထပ်မံထွက်ပေါ်လာ၏။ ၎င်းနောက် အနီရောင်အလင်းတန်းတစ်ခု ရုတ်ခြည်း ပေါ်လာပြန်သည်။

အဝါရောင် အလင်းတန်းတစ်ခုလည်း ရုတ်တရက် ပေါ်ထွက်လာ၏။ အနက်ရောင် အရိပ်တစ်ခုကလည်း ဝန်းရံလာခဲ့သည်။ နေရောင်ခြည်ထဲတွင် ရေချိုးနေရသကဲ့သို့ ဖြစ်သွားသည်။ လောကကြီးထဲမှ ပျောက်ကွယ်သွားသကဲ့သို့ စွမ်းအင်ကင်းမဲ့မှုတစ်ခုက အရာအားလုံးကို လွှမ်းခြုံသွား၏။ ဖြစ်စဉ်ရှစ်ခုသည် တသီတတန်းတည်း ပေါ်ပေါက်လာခဲ့သည်။

ဤသည်မှာ အချိန်တိုအတွင်း စနစ်က ကျောက်လင်အား တာအိုရှစ်ခုလုံးကို တစ်ခုတည်းအဖြစ် ပေါင်းစပ်ရာတွင် ကူညီပေးခဲ့သည်ဟူသော အဓိပ္ပာယ်ပင် ဖြစ်သည်။

ကျောက်လင်၏ စိတ်ထဲတွင် တာအိုရှစ်ခုသည် တစ်ပြိုင်နက်တည်း တည်ရှိနေပြီး ၎င်းတို့သည် အတူတကွပင် လည်ပတ်နေကြ၏။

ကျောက်လင်က ရုတ်တရက် မျက်လုံးဖွင့်လိုက်သည်။

လင်းယုန်မျက်လုံးများအတွင်း လျှပ်စီးတန်းများ ပုန်းအောင်းနေသည့်အလား အလင်းရောင်တစ်ချက် လက်သွား၏။

သူ၏ စိတ်စွမ်းအားကို ဖြန့်ကျက်လိုက်သည်နှင့် တစ်ကီလိုမီတာ ပတ်လည်ရှိ အရာအားလုံးသည် ကျောက်လင်၏ ခံစားသိမြင်နိုင်စွမ်း နယ်ပယ်ထဲသို့ ရောက်ရှိသွားပြီး အသေးစိတ်တိုင်းကို ရှင်းလင်းစွာ မြင်တွေ့နေရသည်။

ခန္ဓာကိုယ်အတွင်းရှိ လျှို့ဝှက်သွေးကြောစုံချက်များ၏ အရေအတွက်သည် ဆယ်ဆခန့် တိုးလာခဲ့၏။

တစ်ချိန်တည်းမှာပင် လကို ဝန်းရံနေသည့် ကြယ်မှုန်များကဲ့သို့သော လျှို့ဝှက်ဂူနေရာလွတ်သည် ဝမ်းဗိုက်အတွင်းရှိ ဒန်တျန်ကို ကောင်းကင်ဖွင့်ပုဆိန်ရှစ်လက်ကဲ့သို့ စဉ်ဆက်မပြတ် ရိုက်ခတ်နေသော ဝိညာဉ်စွမ်းအင်များကို ထုတ်လွှတ်ကာ ဒန်တျန်နေရာလွတ်ကို ဖန်တီးလိုက်သည်။

ဒန်တျန်နေရာလွတ်သည် လျှို့ဝှက်နေရာလွတ် ၃၆ ခု ပေါင်းစပ်ထားသည်ထက် ဆယ်ဆမျှ ပိုမို ကြီးမားနေသည်။

"ငါ့ရဲ့ ဒန်တျန်နေရာလွတ်က သာမန်မြေကမ္ဘာနတ်ဆိုးနယ်ပယ် အစဦးအဆင့်တွေနဲ့ ယှဉ်လိုက်ရင်... နေနဲ့လလို ကွာခြားနေတာပဲ..."

"ငါက မြေကမ္ဘာနတ်ဆိုးနယ်ပယ်ကို ပြီးပြည့်စုံစွာ ချိုးဖြတ်ဝင်ရောက်နိုင်ခဲ့သူပဲ... ဒန်တျန်နေရာလွတ်က သာမန်အဋ္ဌမအဆင့် မဟာကောင်းကင်နယ်ပယ်ရဲ့ ဒန်တျန်နေရာလွတ် အရွယ်အစားလောက် ရှိလိမ့်မယ်..."

"မြေကမ္ဘာနတ်ဆိုးနယ်ပယ်မှာ ငါက ပြိုင်ဘက်ကင်းပဲ..."

ကျောက်လင်သည် သူ၏ ခန္ဓာကိုယ်တွင်းရှိ စွမ်းအား အပြောင်းအလဲများကို ခံစားလိုက်ရပြီး အလွန် ဂုဏ်ယူနေခဲ့၏။

ချက်ချင်းပင် ကျောက်လင်သည် စနစ်မျက်နှာပြင်ကို ကြည့်ရှုလိုက်သည်။

[ပိုင်ရှင် - ကျောက်လင်]

[ဇနီး - ၁၁၉]

[ကျွမ်းကျင်မှုများ - အမဲလိုက်ကျွမ်းကျင်မှု၊ ပန်းချီစွမ်းရည်၊ ရှန်းနုန်ဆေးဖက်ဝင်အပင်မှတ်တမ်း...]

[အထူးစွမ်းရည်များ - လင်းယုန်မျက်လုံး၊ ကံကြမ္မာနတ်ဘုရားအဆင့်စာရင်း]

[ကျင့်စဉ် - မူလဝိညာဉ်ကျင့်စဉ် (ဆဋ္ဌမအဆင့်)၊ သွေးနတ်ဘုရားဓား (ဆဋ္ဌမနယ်ပယ်)၊ မရဏကမ္ဘာ၏ ဆေးဖက်ဝင်လက် (ဆဋ္ဌမအဆင့်)၊ နတ်ဘုရား အမြန်နှုန်း (ဆဋ္ဌမအဆင့်)]

[နယ်ပယ် - မြေကမ္ဘာနတ်ဆိုးနယ်ပယ် (အစဦးအဆင့်)]

[ကျင့်ကြံခြင်းအမှတ်များ - ၀]

မြေကမ္ဘာနတ်ဆိုးနယ်ပယ်သို့ ချိုးဖြတ်ဝင်ရောက်ပြီးသည်နှင့် ဆဋ္ဌမအဆင့် ဟောက်ယန်ကျင့်စဉ်သည် ကျောက်လင်အတွက် သင့်လျော်မှု မရှိတော့သဖြင့် စနစ်က ၎င်းကို ထပ်မံပြသထားခြင်း မရှိတော့ပေ။

"နောက်ထပ် မြေကမ္ဘာနတ်ဆိုးနယ်ပယ် အဆင့်တက်တာက ဒန်တျန်နေရာလွတ်ကို ကျယ်ပြန့်လာစေလိမ့်မယ်..."

"ငါ့ရဲ့ လက်ရှိ ဒန်တျန်နေရာလွတ်က မဟာကောင်းကင်နယ်ပယ်ရဲ့ အစဦးအဆင့်နဲ့တောင် နှိုင်းယှဉ်လို့ ရနေပြီ... ငါသာ မြေကမ္ဘာနတ်ဆိုးနယ်ပယ် အမြင့်ဆုံးအဆင့်ကို ရောက်သွားခဲ့ရင် ဒန်တျန်နေရာလွတ်က ဘယ်လောက်တောင် ကြီးမားသွားမလဲ မသိဘူး..."

ကျောက်လင်က ဖြည်းညင်းစွာ ပြောလိုက်ပြီး သူ၏ ရင်ထဲတွင် ဂုဏ်ယူမှုများ ပြည့်နှက်နေခဲ့သည်။

ထိုအခိုက်တွင် ကျောက်လင်သည် ဝိညာဉ်သလင်းကျောက်နှစ်ခုကို ထုတ်ယူလိုက်၏။

"စုပ်ယူ..."

မျက်စိတစ်မှိတ်အတွင်း ကျောက်လင်သည် ဝိညာဉ်သလင်းကျောက် နှစ်ခုထဲမှ ဝိညာဉ်စွမ်းအင်အားလုံးကို စုပ်ယူလိုက်ပြီး ၎င်းတို့အားလုံးကို ဒန်တျန်နေရာလွတ်ဆီသို့ ပို့ဆောင်လိုက်သည်။

မူလက တောင်ကြားအလွတ်တစ်ခုနှင့်တူသော အသစ်ဖန်တီးထားသည့် ဒန်တျန်နေရာလွတ်သည် ရုတ်တရက် ဝိညာဉ်စွမ်းအင်များဖြင့် ပြည့်နှက်သွားပြီး နေရာလွတ်၏ နံရံများကလည်း ပိုမို တည်ငြိမ်လာခဲ့၏။

"ငါ နားလည်ပြီ... အခုမှ ဖန်တီးထားတဲ့ ဒန်တျန်နေရာလွတ်မှာ အားနည်းပြီး မတည်ငြိမ်တဲ့ ဟင်းလင်းပြင်နံရံတွေ ရှိနေလို့ အဲ့ဒါကို တည်ငြိမ်စေဖို့ လုံလောက်တဲ့ ဝိညာဉ်စွမ်းအား လိုအပ်တာပဲ..."

"ပြီးတော့ အနာဂတ်မှာ ဒန်တျန်နေရာလွတ်ကို ချဲ့ထွင်ချင်တယ်ဆိုရင် ဟင်းလင်းပြင်နံရံ ဆွဲဆန့် ရှည်ထွက်လာပြီး နည်းနည်းချင်း ကျယ်လာဖို့အတွက် ဧရာမဝိညာဉ်စွမ်းအားပမာဏကို သုံးပြီး ဟင်းလင်းပြင်နံရံကို အဆက်မပြတ် ရိုက်ခတ်ရမှာပဲ..."

ကျောက်လင်သည် သူ၏ နောက်ထပ် ကျင့်ကြံခြင်းနည်းလမ်းကို လျင်မြန်စွာ သိရှိသွားခဲ့သည်။

ရည်ရွယ်ချက်က ဝိညာဉ်သလင်းကျောက်များ၏ ဝိညာဉ်စွမ်းအားကို အသုံးပြု၍ ဒန်တျန်နေရာလွတ်ကို ချဲ့ထွင်ရန်ဖြစ်သောကြောင့် ဤအရာသည် ကျောက်လင်အတွက် အလွန်လွယ်ကူလှပေသည်။

ဝိညာဉ်စွမ်းအားကို လျင်မြန်စွာ ရယူလိုသော အခြားသော သတ္တမအဆင့် မြေကမ္ဘာနတ်ဆိုးနယ်ပယ် ကျင့်ကြံသူများသည် ဝိညာဉ်ဆေးလုံးတစ်လုံးကို စားသုံးရန် သို့မဟုတ် သတ္တမအဆင့် ဝိညာဉ်ဆေးပင်တစ်ခုကို ရယူရန် လိုအပ်သော်လည်း ဤဒန်တျန်နေရာလွတ် ချဲ့ထွင်သည့်နည်းလမ်းမှာ အချိန်များစွာနှင့် လုံလောက်သော ဝိညာဉ်ဆေးလုံးများ စုဆောင်းရန် လိုအပ်လှ၏။

ယွင်လန်တိုက်ကြီးမှ မြေကမ္ဘာနတ်ဆိုးနယ်ပယ် ကျင့်ကြံသူများသည် ၎င်းတို့၏ ကျင့်ကြံခြင်းတွင် အလွန် နှေးကွေးစွာ တိုးတက်ကြသည်ဟု ဆိုနိုင်ပေသည်။

သို့သော် ကျောက်လင်ကတော့ ကွဲပြားသည်။ သူ့တွင် စနစ်ရှိပြီး ၎င်းက စနစ်အမှတ်များကို အသုံးပြုကာ ဈေးဆိုင်မှ ဝိညာဉ်သလင်းကျောက် အမြောက်အမြားကို ဝယ်ယူနိုင်စေသောကြောင့် သူ လိုချင်သည့်အချိန်တိုင်း ဒန်တျန်နေရာလွတ်ကို ချဲ့ထွင်နိုင်ပေသည်။

"ဒါပေမဲ့ ငါက မြေကမ္ဘာနတ်ဆိုးနယ်ပယ်ကို အခုမှ ချိုးဖြတ်ဝင်ရောက်ထားတာ... အခုမှ ပွင့်လာတဲ့ ဒန်တျန်ဟင်းလင်းပြင်အတားအဆီးက နည်းနည်း အားနည်းနေသေးတယ်... အခုအချိန်မှာ ဟင်းလင်းပြင်အတားအဆီးကို ရိုက်ခတ်ဖို့ ဝိညာဉ်စွမ်းအင်ကို အမြောက်အမြား စုပ်ယူတာက အကြံကောင်း မဟုတ်သေးဘူး..."

"ဟင်းလင်းပြင်အတားအဆီးကို ချဲ့ထွင်ဖို့ တစ်ဆင့်ချင်းနဲ့ တည်တည်ငြိမ်ငြိမ် ဆက်လုပ်သွားဖို့ လိုသေးတယ်..."

ကျောက်လင်သည် အလျင်စလို မရှိခဲ့ပေ။ သူ့တွင် ဝိညာဉ်သလင်းကျောက် အရင်းအမြစ် လုံလောက်စွာ ရှိနေသောကြောင့် မြေကမ္ဘာနတ်ဆိုးနယ်ပယ်၏ အမြင့်ဆုံးအဆင့်သို့ ချိုးဖြတ်ဝင်ရောက်နိုင်ရေးမှာ မလွဲမသွေပင် ဖြစ်သည်။

ထိုအခိုက်တွင် ကျောက်လင်သည် သူ၏ ရင်ခွင်ထဲတွင် အိပ်ပျော်နေသော ကြွက်လေးကို ထုတ်ယူလိုက်၏။

"ဖက်တီး... အခုမြေကမ္ဘာနတ်ဆိုးနယ်ပယ်ကို ချိုးဖြတ်ဝင်ရောက်တဲ့နေရာမှာ မင်းက အများကြီး ကူညီပေးခဲ့တာပဲ..."

"ဒီတစ်ကြိမ်တော့ မင်း ကောင်းကောင်း အဝစားနိုင်အောင် ဝိညာဉ်သလင်းကျောက် တစ်ရာ ပေးမယ်..."

ကျောက်လင်က ရယ်မောလိုက်သည်။

သူ စကားပြောပြီးသည်နှင့်တစ်ပြိုင်နက် ကျောက်လင်သည် ဝိညာဉ်သလင်းကျောက် တစ်ရာကို ဝယ်ယူရန် စနစ်အမှတ် သန်း (၁၀,၀၀၀)ကို အသုံးပြုလိုက်ပြီးနောက် မြေပြင်ပေါ်တွင် ပုံထားလိုက်၏။

"ကျွီ..."

အိပ်ပျော်နေဆဲဖြစ်သော ကြွက်လေးသည် ကြီးမားလှသော ဝိညာဉ်စွမ်းအင် အတက်အကျများကို ခံစားမိသွားပြီး ချက်ချင်း နိုးလာခဲ့သည်။

"ဖက်တီး... ဒါတွေက မင်းအတွက်ပဲ..."

ကျောက်လင်က ရယ်မောလိုက်၏။

ကြွက်လေးသည် ဝမ်းသာအားရ ပြုံးရွှင်သွားပြီး ချက်ချင်း ပါးစပ်ဟကာ ဝိညာဉ်သလင်းကျောက် တစ်ရာလုံးကို သူ၏ အတွင်းနေရာလွတ်ထဲသို့ စုပ်ယူလိုက်သည်။

ဤဝိညာဉ်သလင်းကျောက် တစ်ရာဖြင့် ကြွက်လေးသည် သတ္တမအဆင့် ဝိညာဉ်သားရဲအဖြစ်သို့ ချိုးဖြတ်ဝင်ရောက်နိုင်ပေသည်။