အခန်း ၃၄၈

အခန်း (၃၄၈) - နောက်ထပ်ကြေညာချက်များ

ယုမေသည် သူမ၏ နှလုံးသားကြေးမုံကို တစ်စိတ်တစ်ပိုင်းသာ ဖွင့်လှစ်နိုင်ခဲ့သေးသော်လည်း ထိုမျှနှင့်ပင် သူမ၏အဖွဲ့မှာ တောင်တက်ခရီးတွင် အခြားသူများထက် ခြေတစ်လှမ်းသာရန် လုံလောက်နေပေပြီ။

နှလုံးသားကြေးမုံသည် ပတ်ဝန်းကျင်ကို အသေးစိတ် စူးစမ်းထောက်လှမ်းနိုင်သည့်အပြင် အလင်းနှင့်အမှောင်၏ သက်ရောက်မှုကိုလည်း မခံရသဖြင့် စိတ်ဝိညာဉ်အာရုံနှင့် ဆင်တူလှပေသည်။

သို့သော် စိတ်ဝိညာဉ်အာရုံနှင့် နှလုံးသားကြေးမုံကြားတွင် ကွာခြားချက်အချို့ရှိနေပြီး ထိုအထဲမှတစ်ခုမှာ တိုက်ပွဲပြင်ပတွင် အသုံးပြုရာ၌ စိတ်ဝိညာဉ်အာရုံသည် နှလုံးသားကြေးမုံထက် ပိုမိုအသုံးဝင်လှပေသည်။

၎င်းကို သတ္တုရိုင်းများ၊ ရတနာလက်နက်များကို စုံစမ်းစစ်ဆေးရန်မှစ၍ ဆေးဖက်ဝင်အပင်များနှင့် ဝိညာဉ်အပင်များ၏ ဖွဲ့စည်းတည်ဆောက်ပုံကို သုတေသနပြုသည့်နေရာအထိ အသုံးချနိုင်လေသည်။

သို့သော် နှလုံးသားကြေးမုံကိုမူ ထိုကဲ့သို့စုံစမ်းစစ်ဆေးမှုများတွင် အသုံးပြု၍မရချေ။

တိုက်ပွဲအပြင်ဘက်ကိစ္စရပ်များ၌ ၎င်းသည် အသုံးမဝင်လှသော်လည်း ဤအချက်သည်ပင် တကယ့်ထူးခြားချက် ဖြစ်ပေသည်။

နှလုံးသားကြေးမုံဖြင့် ကျင့်ကြံသူသည် ဖုံးကွယ်ထားသော တိုက်ခိုက်မှုများကို စွမ်းအင်လှိုင်းအတက်အကျများမှတစ်ဆင့် သိရှိနိုင်ပြီး ကျင့်ကြံသူ၏ အာရုံငါးပါးကို ပိတ်ဆို့ရန် ကြိုးပမ်းသော အချို့တိုက်ခိုက်မှုသိုင်းကွက်များကိုပင် ထိုးဖောက်မြင်နိုင်လေသည်။

နှလုံးသားကြေးမုံ၏ အတိုင်းအတာနှင့် စွမ်းအားသည် အသုံးပြုသူ၏ ကျင့်ကြံမှုအဆင့်နှင့် သူတို့၏ အထူးခန္ဓာကိုယ်စွမ်းရည် မည်မျှနိုးထလာသည်အပေါ်တွင် တိုက်ရိုက်သက်ရောက်လျက်ရှိသည်။

ယုမေ၏ အခြေအနေတွင်မူ သူမ၏ အာရုံခံနိုင်စွမ်းမှာ ၂၅ မီတာပတ်လည်အတွင်းသာ ကန့်သတ်ထားပြီး နှလုံးသားကြေးမုံမှတစ်ဆင့် မြင်တွေ့ရသည်များမှာလည်း တစ်ခါတစ်ရံတွင် ဝေဝါးနေဆဲဖြစ်၏။

ချီသန့်စင်ခြင်းနယ်ပယ် အထွတ်အထိပ်တွင်ရှိသော ကျွမ်းကျင်လှည့်စားတတ်သည့် လုပ်ကြံသတ်ဖြတ်သူတစ်ဦးသာ ဆိုပါက သူမ တုံ့ပြန်ရန် အချိန်မရမီမှာပင် သတ်ဖြတ်ခံရနိုင်လေသည်။

ထို့ပြင် သူမသည် ဤအထူးစွမ်းရည်ကို အသုံးပြုခဲ့သည်မှာ မကြာသေးသဖြင့် တုံ့ပြန်မှုနှင့် ဆုံးဖြတ်ချက်များကို ထိုအာရုံခံစားမှုနှင့်အညီ အပြည့်အဝ မထိန်းချုပ်နိုင်သေးချေ။

ဤအချက်ကိုမူ သူမ၏ စွမ်းအား၊ တိုက်ပွဲစွမ်းရည်နှင့် ခန္ဓာကိုယ်လှုပ်ရှားမှုတို့အား စဉ်ဆက်မပြတ် လေ့ကျင့်ပြီးမှသာ ဖြည့်ဆည်းနိုင်ပေလိမ့်မည်။

သို့သော် ထိုသို့သောအားနည်းချက်များ ရှိနေစေကာမူ နှလုံးသားကြေးမုံသည် တောင်ပေါ်သို့ တက်ရာလမ်းတစ်လျှောက်တွင် ချုံခိုတိုက်ခိုက်မှုများ၊ ထောင်ချောက်များနှင့် အလွန်အန္တရာယ်များသော နေရာများကို ရှောင်ကွင်းရန် လုံလောက်လှပေသည်။

၎င်းက သူတို့အဖွဲ့ကို ရှေ့သို့ အလျင်အမြန် တိုးတက်စေခဲ့ပြီး တောင်ထိပ်သို့ ရောက်ရှိမည့်အချိန်ကို များစွာလျှော့ချပေးခဲ့၏။

ထိပ်ဆုံး ၁၅ ယောက်စာရင်းတွင် ၉ နေရာသာ ကျန်တော့သည်။

အကယ်၍ သူတို့သာ စာရင်းထဲမ၀င်ခဲ့ပါက သေလုမတတ် ညှဉ်းပန်းနှိပ်စက်သော လေ့ကျင့်ခန်းများကို တစ်လတိတိ ဖြတ်သန်းရပေလိမ့်မည်။

ထိုလေ့ကျင့်ခန်းမှာ မည်မျှအထိ ဆိုးရွားမည်ကို မသိနိုင်သော်လည်း စိတ်ကူးဖြင့်ပင် ခန့်မှန်းကြည့်နိုင်ပေသည်။

ထို့ကြောင့် သူတို့တွင် ထိပ်ဆုံး ၁၅ ယောက်စာရင်းဝင်ရန် လုံလောက်သော တွန်းအားများ ရှိနေကြပြီး ယုမေ၏ နှလုံးသားကြေးမုံက ထိုရည်မှန်းချက်ကို အကောင်အထည်ဖော်ရန် အလွန် အထောက်အကူဖြစ်စေခဲ့၏။

...

ကြေညာချက်ထွက်ပေါ်လာပြီးနောက် တစ်နာရီခွဲခန့် ကုန်ဆုံးသွားခဲ့ပြီဖြစ်ရာ ကျိုးရီနှင့် သူ၏အဖွဲ့မှာ တောင်၏တစ်ဝက်သို့ပင် ရောက်ရှိနေပြီ ဖြစ်၏။

လမ်းတစ်လျှောက်ရှိ သတိပေးနှိုးဆော်ချက်များက သူတို့ တောင်တစ်ဝက်ခရီးသို့ ရောက်ရှိနေပြီဖြစ်ကြောင်း အသိပေးနေကြသည်။

ကျိုးရီနှင့် အခြားသူများသည် ပျားရည်ကုက္ကိုပင်အောက်တွင် ခေတ္တအနားယူရင်း စိတ်လှုပ်ရှားကာ တက်ကြွနေကြသည်။

သူတို့သည် အသက်ရှူနှုန်းကို ပြန်လည်ထိန်းညှိနေကြပြီး ကိုယ်ပေါ်တွင် အနည်းငယ်ပွန်းပဲ့ရုံမှလွဲ၍ တစ်ကိုယ်လုံး ကောင်းမွန်ကာ တက်ကြွမြူးတူးနေကြဆဲဖြစ်၏။

သူတို့သည် အနီရောင်သရဖူနှုတ်သီးရှည်ငှက်နှင့် မိုးမခပင်တို့ထက် ပိုမိုရက်စက်ကြမ်းကြုတ်သော ဝိညာဉ်သားရဲများ၊ အဆိပ်ရှိသော ဝိညာဉ်ဆေးပင်များနှင့် ရင်ဆိုင်ခဲ့ရသေးသည်။

သို့သော် သူတို့၏ မြင့်မားလာသော ကျင့်ကြံမှုနယ်ပယ်ကြောင့် တိုးတက်လာသည့် ခွန်အားများ၊ ဆောင်းဦးရွက်ကြွေသိုင်းစဉ် ၁၀၈ ချက်ကို လေ့ကျင့်ရာမှ ရရှိလာသော ပေါက်ကွဲအားပြင်းသည့် စွမ်းရည်များနှင့် သူတို့ကြားရှိ အပြစ်ပြောစရာမရှိသော စည်းလုံးညီညွတ်မှုတို့ကြောင့် အလွယ်တကူ ဖြတ်ကျော်နိုင်ခဲ့ကြပေသည်။

ထို့ပြင် သူတို့သည် လက်နက်များနှင့် ရိက္ခာများကိုလည်း အလုံအလောက် စုဆောင်းထားခဲ့ကြသည်။

ရာစုနှစ်သံကျောက်ခဲသည် အထူးဇုန်နယ်မြေအတွင်း မည်သည့်အရာနှင့်မျှ မယှဉ်နိုင်သော ယုံကြည်စိတ်ချရသည့် လက်နက်အဖြစ် ရှိနေဆဲဖြစ်သော်လည်း ယခုအခါတွင် သူတို့၌ သာမန်လူသားများ အသုံးပြုသည့် လက်နက်မျိုးစုံလည်း ရှိနေပြီဖြစ်၏။

ထိုလက်နက်များတွင် ဟယ်ရှန်း၏ လက်ရာဖြစ်သော အဆိပ်များ လူးထားသောကြောင့် ရန်သူများကို ကောင်းစွာဒုက္ခပေးနိုင်လေသည်။

ဟယ်ရှန်းတစ်ယောက် အဆိပ်များကို မပင်မပန်းဘဲ အလွယ်တကူ ဖော်စပ်နိုင်ခဲ့ပုံနှင့် ထိုသို့ဖော်စပ်နေစဉ် မျက်နှာတွင် ပေါ်လွင်နေသည့် အေးချမ်းသာယာပြီး ပျော်ရွှင်နေသော အမူအရာကို မြင်သောအခါ ကျိုးရီမှာ ကျောချမ်းသွားရ၏။

သူတို့သည် မြှားများ၊ လှံတိုများနှင့် ကျိုးရီနှင့် ယုမေကိုင်ဆောင်ထားသော ဓားများပေါ်တွင် အဆိပ်အမျိုးမျိုးကို လူးထားခဲ့ကြသည်။

ဟယ်ရှန်းသည် အဆိပ်များကို ပါးစပ်ထဲငုံထားပြီး ဝိညာဉ်သားရဲများကို ဆွဲဆောင်ရန် သားကောင်အဖြစ် ဟန်ဆောင်ကာ သားရဲများ အနီးသို့ ရောက်လာချိန်တွင် မှုတ်ထုတ်ရန်အထိ ရူးသွပ်သော အကြံဉာဏ်ကိုပင် ပေးခဲ့သေးသည်။

ဤအစီအစဉ်ကို အဖွဲ့ဝင်များက ပြင်းပြင်းထန်ထန် ငြင်းပယ်ခဲ့ကြပြီး အဆိပ်ဖော်စပ်ခြင်းနှင့် အသုံးချခြင်းများတွင် သူ၏ ပါရမီထူးချွန်မှုကိုသာ မတွေ့မြင်ခဲ့ရပါက ဝိုင်းဝန်းရိုက်နှက်ကြမည်မှာ သေချာလှပေသည်။

"ဒီအတိုင်းသာ ဆက်သွားမယ်ဆိုရင် ငါတို့ နောက်ထပ်နာရီအနည်းငယ်အတွင်းမှာ တောင်ထိပ်ရောက်တော့မှာပဲ"

ကျိုးရီက မောဟိုက်နေရင်း မျက်နှာထက်တွင် လှိုက်လှဲစွာပြုံးလျက် ပြောလိုက်၏။

"ကျေးဇူးတင်ပါတယ် အစ်မကြီးယုမေရာ၊ အစ်မရဲ့စွမ်းရည်က တကယ့်ကို ကယ်တင်လိုက်တာပဲ"

ကျိုးလီချင်းက ယုမေကို လက်မထောင်ပြရင်း ပြောလိုက်သည်။

"မင်းတို့တွေ စောစောစီးစီး မပျော်လိုက်ကြနဲ့ဦး၊ ငါတို့ သတိထားဖို့ လိုသေးတယ်။ တောင်ရဲ့ ဒုတိယတစ်ဝက်ခရီးက ငါတို့ ကြုံတွေ့ခဲ့ရတာတွေထက် ပိုပြီး အန္တရာယ်များပြီး ခက်ခဲလိမ့်မယ်"

ဟယ်ရှန်းက ပျော်ရွှင်စရာလေထုကို ရေအေးနှင့် ပက်ဖျန်းလိုက်သကဲ့သို့ အေးစက်စက်ပြောလိုက်လေသည်။

"တကယ့်ကို စိတ်ပျက်စရာလူကြီးပဲ"

ကျိုးရီက တိုးတိုးရေရွတ်ရင်း နှာခေါင်းရှုံ့လိုက်သည်။ ဟယ်ရှန်းကမူ ဘာကိုမျှ ဂရုမစိုက်ဟန်ဖြင့် နားဖာချေးကို အေးအေးလူလူ ကော်ထုတ်ပြီးနောက် ကျိုးရီရှိရာဘက်သို့ ပစ်ထုတ်လိုက်လေသည်။

"သွားကြစို့"

ကျိုးရီက မတ်တတ်ရပ်လိုက်ပြီး အခြားသူများသည်လည်း လေးနက်ခိုင်မာသော မျက်နှာပေးများဖြင့် ထရပ်လိုက်ကြသည်။

သူတို့သည် တောင်၏ ဒုတိယတစ်ဝက်ခရီးကို ဖြတ်ကျော်ရန် အကောင်းဆုံးအခြေအနေသို့ ရောက်ရှိစေရန်အတွက် ဆယ့်ငါးမိနစ်ခန့် ခေတ္တအနားယူရန် ဆုံးဖြတ်ခဲ့ကြသည်။

ဟယ်ရှန်းပြောခဲ့သကဲ့သို့ပင် ဒုတိယတစ်ဝက်ခရီးသည် လွယ်ကူမည်မဟုတ်ကြောင်း အားလုံး သိရှိထားကြသဖြင့် ၎င်းကို ကျော်ဖြတ်နိုင်ရန် ကျန်းမာကြံ့ခိုင်မှုကို အကောင်းဆုံးအဆင့်တွင် ထိန်းသိမ်းထားရန် လိုအပ်လေသည်။

သူတို့ တောင်ထိပ်သို့ ဦးတည်၍ ဒုတိယတစ်ဝက်ခရီးကို စတင်ဖြတ်သန်းပြီး ဆယ်မိနစ်ခန့်အကြာတွင် ယန်ချင်း၏ နောက်ထပ်ကြေညာသံ ထွက်ပေါ်လာပြီး သတ္တမမြောက်အောင်မြင်သူအဖြစ် ရှန်လုဟူသော အမည်ကို ကြေညာလိုက်လေသည်။

ထို့နောက် ငါးမိနစ်အကြာတွင် နောက်ထပ်ကြေညာချက်တစ်ခု ထွက်ပေါ်လာပြီး အဋ္ဌမမြောက် အောင်မြင်သူမှာ ရှီဟုန် အမည်ရသူဖြစ်ကြောင်း ကြေညာလိုက်ပြန်၏။

ယခုအခါ နေရာ ၇ နေရာသာ ကျန်ရှိတော့သဖြင့် အဖွဲ့ဝင်များမှာ စိုးရိမ်ပူပန်လာကြတော့သည်။

သူတို့အဖွဲ့တွင် လူ ၄ ဦး ရှိနေသဖြင့် အခွင့်အရေးမှာ အလွန်နည်းပါးသွားပြီဖြစ်၏။