အခန်း ၁၂၁

အခန်း (၁၂၁) - အခြေခံတည်ဆောက်ခြင်းအဆင့်

လင်းဖန်သည် သွေးနှင့်ချီ ပြန်လည်အားဖြည့်ဆေးလုံးများကို ထပ်မံ သောက်သုံးလိုက်ပြန်သည်။

သူ၏ ချီနှင့် စွမ်းအင်များ ပြန်လည်ပြည့်ဝလာချိန်တွင် စိတ်ထဲရှိ အချက်အလက်ပြဇယားကို ခေါ်ထုတ်လိုက်လေသည်။

[လက်ရှိ သားရဲစွမ်းရည်- ၃/၃]

[တောယုန်စွမ်းရည်အဆင့်- ၁/၃]

[ဝံပုလွေစွမ်းရည်အဆင့်- ၂/၃]

[မီးပုတ်သင်စွမ်းရည်အဆင့်- ၂/၃]

[လက်ရှိ ခန္ဓာကိုယ်ကြံ့ခိုင်မှုအဆင့်- ၅ (အဆင့်မြှင့်တင်ရန် ကလဲ့စားချေအမှတ် ၁၆၀၀ လိုအပ်ပါသည်)]

[လက်ရှိ ကလဲ့စားချေအမှတ်- ၁၂၃၀]

သူ ပိုင်ဆိုင်ထားသော ကလဲ့စားချေအမှတ်များကို ကြည့်လိုက်ရာ နောက်တစ်ဆင့်သို့မြှင့်တင်ရန် အတော်လေး လိုအပ်နေသေးသဖြင့် တောယုန်စွမ်းရည်ကိုသာ အစားထိုးအဆင့်မြှင့်တင်ရန် ဆုံးဖြတ်လိုက်သည်။

‘တောယုန်စွမ်းရည်ကို အဆင့်မြှင့်တင်မယ်’

လင်းဖန် စိတ်ထဲမှ တွေးလိုက်သည်။

[ဒင်...]

[တောယုန်စွမ်းရည် အဆင့်မြှင့်တင်ခြင်း အောင်မြင်ပါသည်။]

[တောယုန်၏ အကြားအာရုံမှာ ယခုအခါ အသံမှတ်ဉာဏ်အဖြစ် ပြောင်းလဲသွားပါပြီ - ၂ ကီလိုမီတာ အကွာအဝေးအထိရှိသော အသံများကို ကြားနိုင်စွမ်းရှိသည်။ ကြားဖူးသမျှ အသံအားလုံးကို မှတ်သားထားနိုင်ပြီး ပြန်လည်ဖွင့်ပြနိုင်သည်။ ယခင်က ကြားဖူးသော အသံများကို အခြားသူများပါ ကြားနိုင်သည့် ပဲ့တင်သံများအဖြစ် ပြန်လည်ဖန်တီးနိုင်ပါလိမ့်မည်။]

[ခြေမြန်စွမ်းရည်မှာ ယခုအခါ သဏ္ဍာန်မဲ့ခြေလှမ်းအဖြစ် ပြောင်းလဲသွားပါပြီ - ရန်သူများ၏ခန္ဓာကိုယ်နှင့် အတားအဆီးများကို လျင်မြန်သော အရိပ်တစ်ခုကဲ့သို့ ဖြတ်သန်းသွားနိုင်ပြီး ၎င်းတို့ကို ထိရောက်စွာ ဖောက်ထွက်နိုင်မည် ဖြစ်သည်။]

[အံ့ဖွယ်ခုန်ပျံခြင်းမှာ ယခုအခါ ဆက်တိုက်ခုန်ပျံခြင်းအဖြစ် ပြောင်းလဲသွားပါပြီ - လေထဲတွင် အကြိမ်ကြိမ်ခုန်ပျံနိုင်ပြီး ပျံသန်းနေသည့်အလား လမ်းကြောင်းမျိုးစုံသို့ ဆက်တိုက် ရွေ့လျားသွားလာနိုင်မည် ဖြစ်သည်။]

[လက်ရှိ သားရဲစွမ်းရည်- ၃/၃]

[တောယုန်စွမ်းရည်အဆင့်- ၂/၃]

[ဝံပုလွေစွမ်းရည်အဆင့်- ၂/၃]

[မီးပုတ်သင်စွမ်းရည်အဆင့်- ၂/၃]

[လက်ရှိ ခန္ဓာကိုယ်ကြံ့ခိုင်မှုအဆင့်- ၅ (အဆင့်မြှင့်တင်ရန် ကလဲ့စားချေအမှတ် ၁၆၀၀ လိုအပ်ပါသည်)]

[လက်ရှိ ကလဲ့စားချေအမှတ်- ၇၃၀]

ဘုန်း...

လင်းဖန်သည် လေထဲသို့ခုန်တက်လိုက်ပြီး မြေကြီးပေါ်သို့မကျမီမှာပင် ထပ်မံခုန်ပျံလိုက်ကာ လေဟုန်ကိုနင်း၍ သစ်ပင်တစ်ပင်ဆီသို့ ရှေ့ဆက်သွားလေသည်။

သစ်ပင်ကြီးနှင့် ပိုမိုနီးကပ်လာသောအခါ လင်းဖန်သည် သဏ္ဍာန်မဲ့ခြေလှမ်းစွမ်းရည်ကို အသက်သွင်းလိုက်သည်။

ဝှစ်...

သူသည် သစ်ပင်ကြီးကို အရိပ်တစ်ခုကဲ့သို့ ဖောက်ထွက်သွားပြီး သစ်ပင်၏အနောက်ဘက်သို့ ဆင်းသက်လိုက်လေသည်။

‘စွမ်းရည်အဆင့်မြင့်သွားတဲ့ခံစားချက်… ကလဲ့စားချေအမှတ်တွေ ပေးရကျိုးနပ်တာပဲ’

လင်းဖန် စိတ်ထဲမှ တွေးလိုက်သည်။

ဟိုကျဲ့ ပြန်ရောက်လာချိန်တွင် သူတို့နှစ်ဦး ညစာစားခဲ့ကြပြီးနောက် လင်းဖန်သည် တစ်ညလုံး နှစ်နှစ်ခြိုက်ခြိုက် အိပ်ပျော်သွားတော့သည်။

သူ ဖိအားကင်းကင်းဖြင့် အိပ်စက်နိုင်ခဲ့သည်မှာ အချိန်အတော်ကြာမြင့်ခဲ့ပြီ ဖြစ်သည်။

…

နောက်တစ်နေ့…

ခန္ဓာကိုယ်ကြံ့ခိုင်ရေးတောင်ထွတ်...

လင်းဖန်က စွန်းဟိုင်ကိုတွေ့လိုက်ရချိန်တွင် ထိုလူမှာ ပုံမှန်ထက်ပို၍ ရွှင်မြူးနေသည်ကို သတိထားမိလိုက်သည်။

“မင်း မရှိတဲ့အချိန် သတင်းကောင်းတစ်ခု ရထားတယ်။ ငါတို့ရဲ့ တောင်ထွတ်သခင် ကျန်းရီနျန် တံခါးပိတ်ကျင့်ကြံရာကနေ မကြာခင် ထွက်လာတော့မယ်”

စွန်းဟိုင်က ဝမ်းသာအားရ ပြောလိုက်သည်။

“တောင်ထွတ်သခင် ကျန်းရီနျန်”

လင်းဖန်က မေးလိုက်သည်။

“ဟုတ်တယ်။ မင်း မေ့နေမှာစိုးလို့၊ သူက ကျန်းရှီရဲ့ အဖေပဲ။ သူ ထွက်လာတဲ့အခါ ဝိညာဉ်ပြောင်းလဲခြင်းအဆင့်ကို ရောက်နေလောက်ပြီ။ တခြား တောင်ထွတ်သခင်တွေနဲ့ တန်းတူဖြစ်သွားမှာပေါ့”

စွန်းဟိုင်က လင်းဖန်ကို ရှင်းပြလိုက်လေသည်။

ယင်းမှာ လင်းဖန်အတွက်လည်း သတင်းကောင်းတစ်ခု ဖြစ်ပေသည်။

တောင်ထွတ်သခင် ရှိနေမည်ဆိုလျှင် ခန္ဓာကိုယ်ကြံ့ခိုင်ရေးတောင်ထွတ်သည် မကြာမီ တပည့်များစွာဖြင့် စည်ကားလာနိုင်ချေရှိလေသည်။

ထို့အပြင် လင်းဖန်အနေဖြင့် ကျန်းရီနျန်ထံမှ ခန္ဓာကိုယ်ကျင့်ကြံခြင်းအကြောင်းကို ပိုမိုလေ့လာသင်ယူနိုင်မည်မှာ သေချာလှသည်။

“ဂိုဏ်းတူအစ်ကိုကြီး၊ ကောင်းကင်အမြုတေဆေးလုံးတွေအကြောင်း ကြားဖူးလား”

လင်းဖန်က မေးလိုက်သည်။

လင်းဖန်ထံမှ မေးခွန်းကို ကြားလိုက်ရချိန်တွင် စွန်းဟိုင်၏မျက်နှာမှာ ဝင်းလက်သွားတော့သည်။

လင်းဖန်အား သင်ကြားပေးမှုများမှာ နောက်ဆုံးတွင် အရာထင်လာပြီ ဖြစ်သည်။ ဤဂိုဏ်းတူညီငယ်လေးမှာ ယခုအခါ နှိမ့်ချတတ်လာပြီး သင်ယူလိုစိတ် ပြင်းပြနေချေပြီ။

တောင်ထွတ်သခင် ကျန်းရီနျန် တံခါးပိတ်ကျင့်ကြံရာမှ ထွက်လာချိန်တွင် သူ၏လုပ်ဆောင်ချက်အတွက် အလွန်ဂုဏ်ယူနေပေလိမ့်မည်။

“မင်း သင်ယူချင်စိတ်ရှိတာ ကောင်းတဲ့အချက်ပဲ”

“ကောင်းကင်အမြုတေဆေးလုံးက သားရဲအမြုတေမလိုအပ်ဘဲ ချီစုစည်းမှုအဆင့်ကနေ အခြေခံအုတ်မြစ်တည်ဆောက်ခြင်းအဆင့်ကို ချိုးဖြတ်တက်လှမ်းဖို့ ကူညီပေးနိုင်တဲ့ ရှားပါးဆေးလုံးတစ်လုံးပဲ”

“မင်းအတွက် ကံဆိုးတာက ဒီဆေးက အရမ်းရှားပါးလွန်းတော့ မင်းရဖို့ဆိုတာ မဖြစ်နိုင်တာပဲ”

စွန်းဟိုင်က လင်းဖန်၏ပခုံးပေါ်သို့ လက်တင်လိုက်ပြီးနောက် ဆက်ပြောလေသည်။

“ဒါနဲ့ မင်း ကြိုးကြိုးစားစားကျင့်ကြံပြီး နောက်တစ်ဆင့်ကို မြန်မြန်ချိုးဖြတ်နိုင်အောင် လုပ်ရမယ်။ ငါ မင်းအရွယ်တုန်းကဆိုရင်...”

လင်းဖန်ကို ပိုမိုကြိုးစားလာစေရန် လှုံ့ဆော်သည့်အနေဖြင့် သူက အဖြူရောင်လိမ်ဆင်တစ်ခုကို ဖန်တီးလိုက်ခြင်းပင်။

လက်ရှိ လင်းဖန်၏ တိုးတက်မှုနှုန်းမှာ အံ့မခန်းဖြစ်နေသည်ကိုတော့ သူသိပေသည်။

အခြားတပည့်များသာဆိုလျှင် လင်းဖန်၏ လက်ရှိအဆင့်သို့ရောက်ရန် အနည်းဆုံး တစ်နှစ်ခန့် အချိန်ယူရပေလိမ့်မည်။

သို့သော် လင်းဖန်မှာမူ ယခုအခါ ချီစုစည်းမှုအဆင့် (၉) သို့ ရောက်ရှိနေချေပြီ။

နောက်တစ်ဆင့်သို့ ချိုးဖြတ်တက်လှမ်းရန် လက်တစ်ကမ်းအလိုသာ လိုတော့သည်။

“ကျွန်တော့်ဆီမှာ တစ်လုံးရှိတယ်။ အဲဒါ အစစ်ဟုတ်မဟုတ် စစ်ဆေးပေးလို့ ရမလား”

လင်းဖန်က မေးလိုက်သည်။

ထိုဆေးလုံးမှာ အစစ်အမှန်ဖြစ်ပြီး သူ၏ခန္ဓာကိုယ်ကို ထိခိုက်မှုတစ်စုံတစ်ရာမဖြစ်စေကြောင်း သေချာစေချင်၍ဖြစ်သည်။

“အေးပါ၊ ကောင်းကင်အမြုတေဆေးလုံး တစ်လုံးရဖို့ဆိုတာ တော်တော်လေး ခက်ခဲတဲ့ကိစ္စပဲ။ ဒါကြောင့် ကြိုးကြိုးစားစားသာ...”

လင်းဖန်က ဆေးပုလင်းတစ်လုံး ထုတ်ယူလိုက်သည်ကို မြင်လိုက်ရသောအခါ စွန်းဟိုင်၏စကားများ ရပ်တန့်သွားလေသည်။

လင်းဖန်က ဆေးပုလင်းကို စွန်းဟိုင်ထံကမ်းပေးလိုက်ပြီး ပုလင်းအဆို့ကို ဖွင့်လိုက်ချိန်တွင် စွန်းဟိုင်၏မျက်လုံးများ ပြူးကျယ်သွားတော့သည်။

ဆေးလုံး၏ရနံ့က လေထုထဲသို့ ချက်ချင်း ပျံ့နှံ့သွားသည်။

စွန်းဟိုင်က ထိုရနံ့ကို ရှူရှိုက်ကြည့်လိုက်သည်။

အနံ့မှာ မွှေးပျံ့နေပြီး ဆွဲဆောင်မှုရှိလှပေသည်။

‘ဒီရနံ့က သေချာပေါက် ကောင်းကင်အမြုတေဆေးလုံးပဲ”

စွန်းဟိုင် စိတ်ထဲမှ တွေးလိုက်သည်။

မှားယွင်းနိုင်စရာအကြောင်း မရှိပေ။

လင်းဖန်က စွန်းဟိုင်၏အဖြေကို စောင့်ဆိုင်းနေလေသည်။

အတန်ကြာပြီးနောက် စွန်းဟိုင်က လင်းဖန်ကိုကြည့်ကာ ပြောလိုက်သည်။

“မင်း ဒါကို ဘယ်ကနေ ရလာတာလဲ။ အချိန်ဖြုန်းမနေနဲ့တော့၊ အခြေခံတည်ဆောက်ခြင်းအဆင့်ကိုချိုးဖြတ်နိုင်ဖို့ အဆင်သင့်ဖြစ်အောင် ပြင်ဆင်ကြစို့”

လင်းဖန်၏ကံကောင်းမှုကို သူ မယုံကြည်နိုင်အောင် ဖြစ်နေမိသည်။

ကောင်းကင်အမြုတေဆေးလုံးသည် ဂိုဏ်းတွင်သာ ရနိုင်မည်ဆိုပါက အနည်းဆုံး စွမ်းဆောင်ရည်အမှတ် ငါးရာခန့် ပေးရမည့် ပစ္စည်းမျိုးဖြစ်သည်။

ဆေးတောင်ထွတ်တွင်ပင် ရှားပါးပါဝင်ပစ္စည်းများ မရှိသောကြောင့် လိုအပ်ချက်ကို မဖြည့်ဆည်းပေးနိုင်ချေ။

ဆေးတောင်ထွတ်တွင်သာမက မှောင်ခိုဈေးတွင်ပင် ဤဆေးမျိုးကို ရှာမတွေ့နိုင်ပေ။

“စီမာလျန်ဆီ သွားလည်တုန်းက ခင်မင်ခဲ့ရတဲ့ မိတ်ဆွေတချို့ဆီကနေ ရခဲ့တာပါ”

လင်းဖန်က အခြားသူများကို ဆေးလုံးရလာသည့် နေရာအမှန်အား မသိစေချင်သောကြောင့် အကြောင်းပြချက်ပေးလိုက်သည်။

“မင်းရဲ့ မိတ်ဆွေတွေက တော်တော်အလုပ်ဖြစ်တာပဲ။ ကဲ... ငါတို့ အလုပ်စကြတာပေါ့”

စွန်းဟိုင်က အောက်ခြေသိမ်းတပည့်များကို သစ်သားစည်ပိုင်းများ ပြင်ဆင်ထားရန် အမိန့်ပေးလိုက်လေသည်။

သူတို့သည် ချက်ချင်းဆိုသလိုပင် ဆေးဘက်ဝင်အပင်များနှင့် ဆေးရည်များကို သယ်ဆောင်လာကာ သစ်သားစည်ပိုင်းအတွင်းသို့ လောင်းထည့်ရင်း အလုပ်ရှုပ်သွားကြသည်။

သစ်သားစည်ပိုင်း ပူလာသောအခါ အရည်များထဲမှ ရေနွေးငွေ့များ တထောင်းထောင်းထလာသည်။

“ဝင်လိုက်တော့။ အခြေခံတည်ဆောက်ခြင်းအတွက် ဒီဆေးချိုးရည်က မင်းရဲ့ တန်းထျန်ကို တည်ငြိမ်စေပြီး မင်းရဲ့ချီအတွက် ခိုင်မာတဲ့အုတ်မြစ်ဖြစ်လာဖို့ ကူညီပေးလိမ့်မယ်”

စွန်းဟိုင်က ရှင်းပြရင်း လင်းဖန်ကို သစ်သားစည်ပိုင်းထဲသို့ဝင်ရန် လက်ဟန်ပြလိုက်သည်။

လင်းဖန်က စည်ပိုင်းထဲသို့ဝင်ကာ ကောင်းကင်အမြုတေဆေးလုံးကို သောက်သုံးလိုက်လေသည်။

ချက်ချင်းဆိုသလိုပင် သူ၏တန်းထျန်မှ အပြင်ဘက်သို့ စွမ်းအင်များ ဖြာထွက်လာသည်ကို ခံစားလိုက်ရသည်။

၎င်းမှာ ပိုမိုကျယ်ပြန့်လာစေရန် ကြိုးပမ်းနေခြင်းပင်။

ဤဖြစ်စဉ်က သူ၏ချီစွမ်းအင်များကို ကုန်ခမ်းစေသော်လည်း သူ၏ ခန္ဓာကိုယ်ကြံ့ခိုင်ရေးအဆင့်ရှိ ချီကို အလိုအလျောက် စုပ်ယူနိုင်သောစွမ်းရည်က စွမ်းအင်များကို ပြန်လည်ဖြည့်တင်းပေးလေသည်။

ထို့နောက် ဆေးချိုးရည်က လင်းဖန်၏တန်းထျန် ကျယ်ပြန့်လာတိုင်း တည်ငြိမ်သွားစေရန် ကူညီပေးပေသည်။

ဤဖြစ်စဉ်က ဆက်တိုက်ဖြစ်ပေါ်နေပြီး လင်းဖန်၏ တန်းထျန်အရွယ်အစားမှာ ယခင်ကထက် သုံးဆခန့် ပိုမိုကြီးမားလာသည်ကို ခံစားလိုက်ရသည်။

နောက်ဆုံးတွင် ကျယ်ပြန့်လာမှုက ရပ်တန့်သွားပြီး သူ၏တန်းထျန်ကို တဖြည်းဖြည်းချင်း ခိုင်မာလာစေရန်သာ ပြုလုပ်ပေးတော့သည်။

အရာအားလုံး ပြီးဆုံးသွားချိန်တွင် လင်းဖန်က မျက်လုံးများကို ဖွင့်လိုက်ကာ မတ်တပ်ရပ်လိုက်လေသည်။

သူက လက်နှစ်ဖက်ကို မြှောက်လိုက်ပြီး လက်သီးဆုပ်လိုက်သည်။

တန်းထျန်ထဲတွင်ရှိနေသော ချီစွမ်းအင်အားလုံးကို ရှင်းလင်းစွာ ခံစားနေရသည်။

ယခုဆိုလျှင် ရှစ်ကွက်အင်းသားရဲတူသိုင်း၏ ကျန်ရှိနေသော တိုက်ကွက်နှစ်ကွက်ကို သူ ကျင့်ကြံနိုင်မည်မှာ သေချာလှပေသည်။

“အခြေခံတည်ဆောက်ခြင်းအဆင့်ကို ရောက်ရှိသွားတဲ့အတွက် ဂုဏ်ယူပါတယ်”

စွန်းဟိုင်က ခေါင်းညိတ်ကာ ပြောလိုက်လေသည်။

သူသည် ခံစားချက်ကိုမဖော်ပြရန် ကြိုးစားနေသော်လည်း နှုတ်ခမ်းများကမူ အလိုလို ပြုံးယောင်သန်းနေတော့သည်။

လင်းဖန်နှင့် ခန္ဓာကိုယ်ကြံ့ခိုင်ရေးတောင်ထွတ်အတွက်မူ ကြီးကျယ်ခမ်းနားလှသော အနာဂတ်တစ်ခုက ကြိုလင့်နေချေပြီ။