အခန်း ၆

အခန်း (၆) - အဝတ်တွေအကုန်လုံးကို ယူလာခဲ့ရင်

အရည်အချင်း ဆိုသည့်စကားကို ကျန်းမန် ယခုမှ ပထမဆုံးအကြိမ် ကြားဖူးခြင်းဖြစ်သည်။

အရင်က သူ့တွင် မည်သည့်အရည်အချင်းမျှ မရှိခဲ့သလို၊ ချီဆွဲသွင်းဖို့တောင် မလုပ်နိုင်ခဲ့ရာ ဤကိစ္စများကို မေးမြန်းနေရန် မလိုအပ်ခဲ့ပေ။

သို့သော် ယခုအချိန်က အရင်နှင့်မတူတော့ပေ။ ထိုအရည်အချင်းကို သူ မဖြစ်မနေ ရယူရမည်။ မဟုတ်လျှင် ပြိုင်ဘက်ကင်း ပါရမီရှင် ကံကြမ္မာဇယားကို ကျော်ဖြတ်နိုင်မည် မဟုတ်ပေ။ နွားဝါကြီး ပြောစကားအရဆိုလျှင် လော့ယွင်မြို့၏ အရင်းအမြစ်က ပါရမီရှင် ကံကြမ္မာဇယား၏ နောက်တစ်ကြိမ် တောင်းဆိုမှုကို ထောက်ပံ့နိုင်မည် မဟုတ်ပေ။

သိချင်စိတ်ဖြင့် ကျန်းမန်က ဖန်ယုံကို ကြည့်ကာ မေးလိုက်သည်။

"ဘယ်လောက်အဆင့်ရောက်မှ အရည်အချင်းရှိတယ်လို့ သတ်မှတ်တာလဲ"

ဖန်ယုံက ကျန်းမန်ကို ကြည့်ကာ အေးစက်စက် ပြုံးလိုက်သည်။ သူက မေးခွန်းကို မဖြေပေ။

ကျန်းမန်ကလည်း စိတ်မပျက်ဘဲ နောက်ထပ်မေးခွန်းတစ်ခု ထပ်မေးလိုက်သည်။

"သခင်လေးဖန်က ဒီလောက်တောင် တော်နေတာဆိုတော့၊ ချီကျင့်စဉ် ဘယ်နှစ်ဆင့် ရောက်နေပြီလဲ"

ဒီတစ်ကြိမ်တွင်တော့ တစ်ဖက်လူက မြန်မြန်ဆန်ဆန် ဖြေလိုက်သည်။

"ခုနစ်ဆင့်၊ ဒီဇင်ဘာလ မတိုင်ခင် ရှစ်ဆင့်ရောက်မှာ၊ မင်းမှာ မျှော်လင့်ချက် ရှိတယ်လို့ ထင်နေသေးလား"

ကျန်းမန်က စမ်းကြည့်ချင်တယ်လို့ ပြောလိုက်သည်။

ဖန်ယုံကလည်း ဂရုမစိုက်ဘဲ မည်သည့်စကားများကို ပြောသင့်ပြီး မည်သည့်စကားများကို မပြောသင့်ကြောင်းသာ သတိပေးလိုက်သည်။ အဓိပ္ပာယ်မှာ မြင်းတင်းကုပ်တွင် တွေ့ခဲ့သည့်ကိစ္စကို အပြင်တွင် မပြောရန်ဖြစ်သည်။ ဆဋ္ဌမမြောက် ခြံဝင်းငယ်ရှိ လူများအမြင်တွင် သူ၏ ပုံရိပ်ကို ထိခိုက်စေမည် စိုး၍ဖြစ်သည်။

ထို့နောက် ကျန်းမန်လည်း မြန်မြန်ဆန်ဆန် ထွက်ခွာလာခဲ့သည်။ သက်ကယ်တဲအိမ်သို့ ပြန်ရောက်သောအခါ မြင်းတင်းကုပ်ရှိ မြင်းအချို့ကို အစာကျွေးရဦးမည်။ ထို့အပြင် မြင်းများကို နေရာအနှံ့ လမ်းလျှောက်ထွက်ခိုင်းပြီး ကိုယ်လုံးကို ပွတ်တိုက်ဆေးကြောပေးရဦးမည်။ ဤအရာအားလုံး ပြီးစီးမှသာ ကျန်းမန်သည် သူ၏ နေ့လယ်စာကို စတင် ပြင်ဆင်တော့သည်။ သူ၏ မှတ်ဉာဏ်ထဲတွင် လွန်ခဲ့သော နှစ်နှစ်တာကာလလုံး ဤကဲ့သို့ပင် ဖြတ်သန်းခဲ့ရသည်။ အခြား မည်သည့်နေရာကိုမျှ မသွားခဲ့ဖူးပေ။

ထမင်းစားပြီးနောက် ကျန်းမန်သည် မြက်စားနေသော နွားဝါကြီးကို သွားရှာလိုက်သည်။

"စီနီယာ... အဲဒီနတ်သမီးက စီနီယာ့ကို တစ်ခုခု လုပ်သေးလား"

"ဒီနေ့ အကြိမ်တစ်ရာ ပြည့်ပြီလားဆိုတာကို အရင်စဉ်းစားတာ ပိုကောင်းမယ်"

နွားဝါကြီးက မြက်စားရင်း စိတ်မရှည်စွာဖြင့် ပြောလိုက်သည်။

ကျန်းမန်က ပြုံးလျက် ပြောလိုက်သည်။

"အကြိမ်တစ်ရာဆိုတာ လွယ်လွယ်လေးပါ၊ ဒါပေမယ့် စီနီယာ့ အကူအညီလိုတဲ့ ကိစ္စတစ်ခုတော့ ရှိတယ်"

ထိုစကားကို ကြားသောအခါ နွားဝါကြီးက အနည်းငယ် မော့ကြည့်ကာ ကျန်းမန်ကို ကြည့်ရင်း ပြောလိုက်သည်။

"မင်းကို ကျင့်ကြံဖို့ သင်ပေးရမှာလား။ မဖြစ်နိုင်ဘူး အဆောက်အအုံ သုံးခုနဲ့ အဆောင် ခြောက်ခုက အတော်လေး တင်းကျပ်တာ"

"မဟုတ်ပါဘူး"

ကျန်းမန်က ရိုးသားစွာ ပြောလိုက်သည်။

"မီးနင်းဝိညာဉ်မြင်းရဲ့ အားနည်းချိန်ကို ဖြေရှင်းနိုင်မယ့် ကျွေးမွေးနည်းကို သိချင်လို့ပါ"

နွားဝါကြီးက နားမလည်စွာ ကြည့်နေသဖြင့် ကျန်းမန်က ယနေ့ ဖြစ်ပျက်ခဲ့သမျှကို အမှန်အတိုင်း ပြောပြလိုက်သည်။

"ဒီနည်းလမ်းကို သုံးပြီး တစ်နှစ်စာ ကျင့်စဉ်ကြေးနဲ့ လဲမယ်ဟုတ်လား"

နွားဝါကြီးက အနည်းငယ် အံ့ဩသွားသည်။

ကျန်းမန်က ခေါင်းညိတ်ပြလိုက်သည်။

နွားဝါကြီးက ရယ်မောကာ ပြောလိုက်သည်။

"မင်း ဘယ်လောက်တောင် ရှုံးနေလဲဆိုတာ သိရဲ့လား"

ကျန်းမန်က ခေါင်းခါလိုက်သည်။

"မသိဘူး၊ ဒါပေမယ့် ဆက်နေခွင့်ရရင် အနည်းဆုံးတော့ အသက်တစ်ချောင်းကို ခဏတော့ ကယ်ထားနိုင်မှာပဲ"

ချင်းယွင်ဆောင်မှ ထွက်ခွာသွားပါက သူ၏ အနာဂတ်မှာ ကောင်းနိုင်မည် မဟုတ်ပေ။ အပြင်ရောက်သွားလျှင် ဝမ်းရေးကိုပင် အနိုင်နိုင် ဖြေရှင်းရမည်ဖြစ်ရာ ဆက်လက် ကျင့်ကြံဖို့ဆိုသည်မှာ ပို၍ပင် ဝေးကွာသွားပေလိမ့်မည်။ ကျင့်ကြံရေး အရင်းအမြစ်များ ရရှိရန်ဆိုသည်မှာ ကောင်းကင်သို့ တက်ရသကဲ့သို့ ခက်ခဲလှသည်။

ထို့အပြင် ယွင်ချန်ဌာနရှိ အဆောက်အအုံ သုံးခုနှင့် အဆောင် ခြောက်ခုစလုံးမှာ စောင့်ရှောက်မှုများ ရှိနေသည်။ ထိုနေရာသို့ ဝင်ရောက်လာသူများမှာ အနည်းနှင့်အများတော့ အာမခံချက် ရှိကြသည်။ ဤနေရာရှိ လူများမှာ အပြင်လူများထက် အခွင့်အရေး ပိုရကြသည်။

ဘာကြောင့်လဲဆိုတော့ အခြေအနေတွေက မသေချာမရေရာသေးဘဲ သူတို့ထဲက တစ်ယောက်ယောက်က ရုတ်တရက် ထူးချွန်လာနိုင်လို့ပဲ။ အပြင်ရောက်သွားရင်တော့ အနာဂတ်က အတော်လေး သေချာသွားပြီ၊ ဆင်းရဲဒုက္ခကို ကျော်လွှားဖို့ဆိုတာ မဖြစ်နိုင်သလောက်ပဲ၊ အကာအကွယ်ပေးမယ့်သူလည်း မရှိတော့ဘဲ သွေးထွက်သံယိုများတဲ့ ဘဝကို ရင်ဆိုင်ရတော့မှာ။

ဒါကြောင့် ကျွေးမွေးနည်းက တန်ဖိုးမဖြတ်နိုင်အောင် ကြီးမားနိုင်ပေမယ့် လက်ရှိအချိန်မှာတော့ သူ့အတွက် နောက်ထပ် အချိန်အတိုင်းအတာတစ်ခုအထိ လုံခြုံမှုရဖို့အတွက် အသုံးချရတာက အတန်ဆုံးပဲ။

အခြားလူများနှင့် အရောင်းအဝယ် လုပ်မည်ဆိုလျှင် အရင်းအမြစ်များ ပိုမိုရရှိနိုင်ကောင်း ရရှိနိုင်ပေမည်။ သို့သော် ကျောက်လဲ့မင်နှင့် နှိုင်းယှဉ်လျှင် ထိုသူတို့မှာ ပို၍ပင် ယုံကြည်ရခက်ပေသည်။ အဓိကအချက်မှာ သူကိုယ်တိုင်က တန်းတူညီမျှ အရောင်းအဝယ်လုပ်ခွင့် အရည်အချင်း မရှိခြင်းပင်ဖြစ်သည်။ အားနည်းသူများက အမြဲတမ်း အရှုံးပေါ်ရန်သာ ရှိသည်။

နွားဝါကြီးက အခြားဘာမှ ဆက်မပြောတော့ဘဲ အရှုံးအမြတ်ကိစ္စကို အမှတ်တမဲ့သာ ပြောလိုက်ခြင်း ဖြစ်သည်။ ထို့နောက် ကျန်းမန်ကို နည်းလမ်း ပြောပြလိုက်သည်။ နည်းလမ်းတွင် အပိုင်းနှစ်ပိုင်း ပါဝင်သည်။ ပထမအပိုင်းက တစ်ကြိမ် အားနည်းခြင်းကို ဖြေရှင်းရန်ဖြစ်သည်။ ဒုတိယအပိုင်းက ပိုလျှံနေသော အားနည်းခြင်းများကို ဖြေရှင်းရန်ဖြစ်သည်။

အချို့သော ဝိညာဉ်မြင်းများတွင် အားနည်းချိန် နှစ်ကြိမ် ရှိတတ်သည်။ ဒုတိယအပိုင်းက ထိုအရာအတွက် ဖြစ်သည်။

ကျန်းမန်သည် ပထမအပိုင်းကိုသာ ကူးယူလိုက်သည်။ ထို့အပြင် နွားဝါကြီးကို ဒုတိယအပိုင်းတွင် လျှို့ဝှက်ချက်အချို့ ထည့်သွင်းထားရန် ပြောလိုက်သည်။ သာမန်လူများ နားမလည်နိုင်အောင်နှင့် စာရွက်စာတမ်းများကို ရှာဖွေဖတ်ရှုမှသာ နားလည်နိုင်ရန် သေချာအောင် လုပ်ခိုင်းလိုက်သည်။ ဤသို့ပြုလုပ်ပြီးမှသာ ကျန်းမန် သက်ပြင်းချနိုင်တော့သည်။

ကျွေးမွေးနည်းကို ကြည့်ရင်း ကျန်းမန်က အတော်လေး သိချင်သွားသည်။ ဤနည်းလမ်းကို မှတ်တမ်းတင်ရန် ထိုက်တန်မှု ရှိမရှိကို သိချင်နေသည်။ ထို့နောက် သူသည် ကောင်းကင်ဘုံ မှတ်တမ်းကျမ်းကို ဆက်သွယ်လိုက်သည်။

စာအုပ်က အမြန်လှန်သွားပြီး နောက်ဆုံးစာမျက်နှာတွင် ရပ်တန့်သွားသည်။

【အမှိုက်တွေပဲ။】

ကျန်းမန်: "..."

ဒီစာအုပ်က ဘယ်လိုအရာမျိုးကိုများ မှတ်တမ်းတင်မှာလဲ။ ကျန်းမန်သည် ရှေးဟောင်းပစ္စည်းများ သို့မဟုတ် ကိုးကွယ်ပူဇော်ခံ နတ်ဘုရားပစ္စည်းတစ်ခုခုကို ရှာဖွေရမည်ဟု ထင်နေသည်။ သို့သော် လော့ယွင်မြို့တွင် အထူးတလည် နာမည်ကြီးသော အရာများ မရှိပေ။ ဂိုဏ်းထဲဝင်ပြီး ပိုမိုကောင်းမွန်သော ပတ်ဝန်းကျင်သို့ သွားကာ ပိုမိုအစွမ်းထက်သော လူများနှင့် တွေ့ဆုံရန် လိုအပ်ပေမည်။ မဟုတ်ပါက ကံကြမ္မာဇယားအတွက် လိုအပ်သောအရာများကို ရရှိနိုင်မည်မဟုတ်ဘဲ ကောင်းကင်ဘုံ မှတ်တမ်းကျမ်းသည်လည်း အလကားဖြစ်သွားပေလိမ့်မည်။

ထို့နောက် ကျန်းမန်သည် ကျင့်ကြံရန် ပြင်ဆင်လိုက်သည်။ ရုတ်တရက် နွားဝါကြီးကို သိချင်စိတ်ဖြင့် လှမ်းကြည့်ကာ မေးလိုက်သည်။

"စီနီယာ... ပြိုင်ဘက်ကင်း ပါရမီရှင်ဆိုတာ ဘယ်လိုပုံစံမျိုးလဲ"

"မမြင်ဖူးဘူး"

ခဏရပ်ပြီးနောက် နွားဝါကြီးက ကျန်းမန်ကို ကြည့်ကာ ပြောလိုက်သည်။

"မင်း ငါ့ကို မင်းလိုလူမျိုးလို့များ ပြောမလို့လား"

"စီနီယာကတော့ သင်ခန်းစာ မယူတတ်ဘူးပဲ" ကျန်းမန်က ပြုံးလျက် ဖြေလိုက်သည်။

ထို့နောက် သူသည် ချီကျင့်စဉ်ကို စတင် ကျင့်ကြံလိုက်သည်။ ချီကျင့်စဉ် အဆင့်ကို ဆက်လက် မြှင့်တင်နေခဲ့သည်။

မွန်းလွဲပိုင်းတွင် ကျန်းမန်သည် အခြား မည်သည့်အရာကိုမျှ မလုပ်တော့ပေ။ ကျင့်ကြံခြင်းကိုသာ အာရုံစိုက်နေခဲ့သည်။

သုံးဆယ့်နှစ်ခေါက် ကျင့်ကြံပြီးနောက်…..ချီကျင့်စဉ် အဆင့်ခြောက် ရောက်သွားသည်။

သန်းခေါင်ယံအချိန်….

ခြောက်ဆယ့်လေးခေါက် ကျင့်ကြံပြီးနောက်…..ချီကျင့်စဉ် အဆင့်ခုနစ် ရောက်သွားသည်။

တစ်ရက်တည်းနှင့် ဖန်ယုံကို လိုက်မီသွားသည်။ သို့သော် ချီကျင့်စဉ် အဆင့်သာ လိုက်မီခြင်းဖြစ်ပြီး ကျင့်ကြံမှုစွမ်းရည်ကတော့ အများကြီး ကွာခြားနေသေးသည်။ ချီကျင့်စဉ် အဆင့်ခုနစ်သို့ ရောက်သောအခါ ခန္ဓာကိုယ်ပတ်လည်တွင် ပါးလွှာသော အလင်းရောင်တစ်ခု ဖြစ်ပေါ်လာသည်။ ဒါက ဝိညာဉ်စွမ်းအင်၏ အလင်းရောင်ဖြစ်သည်။ ရင်းနှီးသွားပါက ပြန်လည်ရုပ်သိမ်းနိုင်မည် ဖြစ်သည်။

သို့သော် နွားဝါကြီးကတော့ မြင်သွားခဲ့သည်။ ရက်အနည်းငယ်အတွင်းမှာပင် ၎င်းကို ဘဝအပေါ် သံသယဝင်သွားအောင် အကြိမ်ကြိမ် လုပ်နိုင်ခဲ့သည်။

"အခြေခံချီကျင့်စဉ် အဆင့်ခုနစ် ရောက်သွားပြီလား"

နွားဝါကြီးက ကျန်းမန်ကို ကြည့်ကာ မေးလိုက်သည်။

ကျန်းမန်ကလည်း ဖုံးကွယ်မထားဘဲ ခေါင်းညိတ်ပြလိုက်သည်။

"ဟုတ်တယ်၊ ခုနစ်ဆင့် ရောက်သွားပြီ"

"မင်း အရင်က ခိုးကျင့်ထားတာလား"

နွားဝါကြီးက ကျန်းမန်၏ မျက်နှာကို ကြည့်ကာ အဖြေတစ်ခုခု ရရန် ကြိုးစားနေသည်။

ကျန်းမန်က တစ်ဖက်လူကို ကြည့်ကာ ဘာမှမပြောဘဲ ပြုံးသာ ပြုံးနေလိုက်သည်။

"တကယ်တော့ ဘယ်လိုလုပ်လိုက်တာလဲ"

နွားဝါကြီးက လုံးဝ နားမလည်နိုင်အောင် ဖြစ်နေသည်။

"မိန်းမရလိုက်လို့ ဖြစ်မယ်"

ကျန်းမန်က ပေါ့ပေါ့ပါးပါး ဖြေလိုက်သည်။

နွားဝါကြီး: "..."

ရုတ်တရက် ကျန်းမန်က တစ်ခုခုကို သတိရသွားပြီး သိချင်စိတ်ဖြင့် မေးလိုက်သည်။

"စီနီယာ... တကယ်လို့ တောင်နောက်ဘက်မှာ ကျွန်တော် တွေ့သမျှ အဝတ်တွေ အကုန်လုံးကို ယူလာခဲ့ရင် ဘာဖြစ်မလဲ"

နွားဝါကြီးက အံ့ဩသွားပြီး ကျန်းမန်ကို လှမ်းကြည့်ကာ ပြောလိုက်သည်။

"မင်းက... တော်တော်လောဘကြီးတာပဲ"

ကျန်းမန်က ရှက်ကိုးရှက်ကန်း ပြုံးလိုက်ပြီး စကားလွှဲလိုက်သည်။

"စီနီယာက ပြိုင်ဘက်ကင်း ပါရမီရှင်ဆိုတာ မမြင်ဖူးဘူးလို့ ပြောတယ်မဟုတ်လား။ အခု မြင်နေရပြီလေ အားလုံးက ပါရမီကြောင့်ချည်းပါပဲ"

နွားဝါကြီး: "..."

နည်းနည်း မယုံချင်ပေမယ့် တကယ်တော့ အံ့ဩသွားရသည်။

"မင်းရဲ့ ပါရမီက ပါရမီရှင် ကံကြမ္မာဇယားရဲ့ တောင်းဆိုချက်တွေကို ချောချောမွေ့မွေ့ ပြီးမြောက်နိုင်ပါစေလို့ မျှော်လင့်ပါတယ်"

နွားဝါကြီးက စိတ်ပျက်လက်ပျက်ဖြင့် ပြောလိုက်သည်။

"ဒီလောက်ဆို မလုံလောက်သေးဘူးလား"

ကျန်းမန်က အနည်းငယ် နားမလည်နိုင်စွာဖြင့် မေးလိုက်သည်။

ထိုစကားကို ကြားသောအခါ နွားဝါကြီးက ပြုံးရုံသာ ပြုံးပြီး မည်သည့်စကားမှ မဆိုပေ။

"နောက်ကျရင် မင်း သိလာမှာပါ"

အတူတူ စကားဝှက် ဝှက်တမ်း ကစားနေကြတာလား။

ကျန်းမန်က ဂရုမစိုက်တော့ဘဲ အိပ်စက်ရန် ပြင်ဆင်လိုက်သည်။ ယနေ့အတွက် အကြိမ်တစ်ရာ ကျင့်ကြံခြင်း ပြီးဆုံးသွားပြီ ဖြစ်သည်။ ယခု သူ၏ ခန္ဓာကိုယ်က အားနည်းနေသေးသဖြင့် ညဘက်တွင် အနားယူရန် လိုအပ်သည်။

နောက်တစ်နေ့တွင်...

ကျန်းမန်သည် ချင်းယွင်ဆောင်၏ ဆဋ္ဌမမြောက် ခြံဝင်းငယ်သို့ ရောက်ရှိလာသည်။ ဤတစ်ကြိမ်တွင်လည်း ဖန်ယုံနှင့် ယခင်လူစုကို ထပ်မံတွေ့ရှိရပြန်သည်။

"ဘယ်မှာ အားနည်းချိန် ရှိလို့လဲ။ ပြီးခဲ့တဲ့ တစ်ခေါက်က သခင်လေးဖန် မျက်နှာကြောင့် အဲဒီကိစ္စကို လွှတ်ပေးလိုက်တာ"

အရပ်ပုပု လူက ခေါင်းခါရင်း သက်ပြင်းချကာ ပြောလိုက်သည်။

"ဒါပေမယ့် သခင်လေးဖန်နဲ့ အဲဒီလူက တော်တော်လေး ရင်းနှီးနေတော့ ငါတို့နဲ့ အဲဒီလူကြားမှာ အထင်လွဲမှုလေးတွေ ရှိနေတယ်။ သခင်လေးဖန်ကို အခက်မတွေ့စေချင်လို့ ငါတို့ သိပ်မပတ်သက်တာ ပိုကောင်းမယ်"

ပြောရင်းနှင့် အရပ်ပုပု လူက သူ့လူများကို ခေါ်ကာ ထွက်သွားသည်။

ဖန်ယုံက ဘယ်လိုပဲ ရှင်းပြရှင်းပြ အလကားဖြစ်သွားသည်။ သူနှင့် ကျန်းမန်ကြားတွင် မည်သည့်ပတ်သက်မှုမျှ မရှိကြောင်း ပြောသော်လည်း အချည်းနှီးသာ ဖြစ်သည်။

အရပ်ပုပု လူက ထွက်သွားချိန်တွင် ကျန်းမန်ကို ဖြတ်သွားရင်း အမှတ်တမဲ့ တစ်ချက်ကြည့်လိုက်ရာ သူ၏ နှုတ်ခမ်းထောင့်တွင် လှောင်ပြောင်သည့် အပြုံးတစ်ခု ရှိနေသည်။ ပြဇာတ်တစ်ခုကို ကြည့်ရန် စောင့်နေပုံရသည်။ သို့သော် အပြင်ပန်းတွင်တော့ သိပ်မသိသာအောင် ယဉ်ကျေးသည့် အပြုံးတစ်ခုကိုသာ ပြသထားသည်။

လူတွေ ထွက်သွားပြီးနောက် ဖန်ယုံသည် ကျန်းမန်ကို ရန်ငြိုးဖွဲ့သော မျက်လုံးများဖြင့် ကြည့်လိုက်သည်။ အဲဒီတုန်းက ဘာလို့ အပြစ်မခံရတာလဲဆိုပြီး သူ့ကို အပြစ်တင်နေတာ ဖြစ်သည်။

ထိုအချိန်တွင် အမျိုးသားတစ်ဦးက လျှောက်လာပြီး အားကျဟန်ဖြင့် မေးလိုက်သည်။

"သခင်လေးဖန်၊ ခုလေးတင် သခင်လေးယန်က ခင်ဗျားဆီ လာလည်တာလား"

ထိုစကားကို ကြားသောအခါ ဖန်ယုံသည် ကျန်းမန်ကို ကြည့်နေသည့် ရန်ငြိုးဖွဲ့သော မျက်လုံးများကို ရုပ်သိမ်းလိုက်ပြီး လာသူကို ပြုံးလျက် ကြည့်ကာ ပြောလိုက်သည်။

"အဲဒီလောက်တော့ မဟုတ်ပါဘူး၊ ကိုယ်ရေးကိုယ်တာ ကိစ္စလေးတွေ နည်းနည်းပါးပါး ပြောနေကြတာပါ"

လာသူမှာ လေးစားအားကျသွားသည်။ ဒီလိုလူမျိုးတွေက သူတို့နဲ့ အဆင့်အတန်းချင်း လုံးဝ မတူဘူး၊ စကားပြောဖို့ဆိုတာ မဖြစ်နိုင်ဘူးလေ။

ကျန်းမန်: "..."

ဖန်ယုံရဲ့ ပစ်မှတ်ထားတာကို ခံရတော့မယ်။ ဒါပေမယ့် တရားခံအစစ်က အဲဒီ သခင်လေးယန် ဆိုတဲ့သူပဲ။ သူက ချက်ချင်း စိတ်ကူးပေါက်လို့ လုပ်လိုက်တာလား၊ ဒါမှမဟုတ် တမင် သက်သက် ပစ်မှတ်ထားတာလား ဆိုတာတော့ မသိဘူး။ ပထမတစ်ခုဆိုရင် တော်သေးတယ်၊ ဒုတိယတစ်ခုဆိုရင်တော့ ပြဿနာ နည်းနည်း ကြီးသွားပြီ။ ကျင့်ကြံမှုအဆင့်ကို တရားဝင် စတင် မမြှင့်တင်ရသေးဘူး၊ ပစ်မှတ်ထားခံရရင် တိုးတက်မှုနှုန်းကို ထိခိုက်လိမ့်မယ်။