အခန်း ၁၆

အခန်း (၁၆) ဖက်တီးလေး - ရှောင်ကျန်း စိတ်မလှုပ်ရှားနဲ့၊ သေချာ ဖြေ

သက်တောင့်သက်သာနှင့် အနည်းငယ် ဂုဏ်ယူနေသော ဖက်တီးလေးကို ကြည့်ရင်း၊

ဒါက ယုံကြည်မှုရှိတဲ့ လက္ခဏာပဲဆိုတာ ကျန်းမန် သိလိုက်သည်။

ရုတ်တရက် အထက်စီးမှ ဆက်ဆံလာခြင်း၊ အကဲဖြတ်စစ်ဆေးမှု မတိုင်မီ ကြိုတင်မေးမြန်းခြင်း…..

ဒါတွေအားလုံးက ဖက်တီးလေး၏ ကျင့်ကြံမှုအဆင့် တက်သွားပြီဆိုသည့် အချက်ကို သံသယဖြစ်စရာ မလိုအောင် ပြသနေသည်။

ယခင်က သူသည် ချီသန့်စင်ခြင်း အဆင့်တစ် ဖြစ်ပြီး၊ ယခုအခါ အဆင့်နှစ်သို့ ရောက်သွားရန် ရာခိုင်နှုန်း ကိုးဆယ်ခန့် သေချာနေသည်။

သူကိုယ်တိုင်ကတော့ ယခင်က ကျင့်ကြံမှုအဆင့် လုံးဝမရှိခဲ့ရာ၊ အဆင့်တစ်သို့ တက်လှမ်းနိုင်ခဲ့လျှင်တောင် ဖက်တီးလေးကို မီနိုင်ဦးမည် မဟုတ်ပေ။

ဒီရက်ပိုင်း သူ သေချာ လေ့လာထားခဲ့သည်။

ချီသန့်စင်ခြင်း အဆင့်တစ်ကို ရောက်ပါက ရှစ်မှတ် ရရှိမည် ဖြစ်ပြီး၊ ချီသန့်စင်ခြင်း ကျင့်စဉ်၊ သွေးကြောအင်အား ကျင့်စဉ်၊ စိတ်ကူးပုံဖော်ခြင်း ကျင့်စဉ်တို့တွင် တစ်ဆင့် တက်တိုင်း တစ်မှတ်စီ ရရှိမည် ဖြစ်သည်။

သီအိုရီအရ၊ ကျင့်ကြံမှုအဆင့်က ချီသန့်စင်ခြင်း အဆင့်ကိုး ရောက်သွားပြီး၊

ချီသန့်စင်ခြင်း ကျင့်စဉ်၊ သွေးကြောအင်အား ကျင့်စဉ်၊ စိတ်ကူးပုံဖော်ခြင်း ကျင့်စဉ်တို့ကလည်း အဆင့်ကိုးသို့ အသီးသီး ရောက်ရှိသွားပါက ကိုးဆယ့်ကိုးမှတ် ရရှိမည် ဖြစ်သည်။

အနောက်ခြံဝင်းတွင် ကိုးဆယ့်ကိုးမှတ်အထိ ရရှိသူမှာ အလွန် ရှားပါးသည်ဟု ဆိုကြသည်။

ယခုအခါ ဖက်တီးလေးသည် အနည်းဆုံးတော့ ဆယ့်ခြောက်မှတ် ရရှိနေပြီ ဖြစ်သည်။

တစ်ကျော့တည်း ရှစ်မှတ် တက်သွားတာ၊ ယုံကြည်ချက် မရှိဘဲ နေပါ့မလား။

ယခုလို ဖြစ်နေသော ဖက်တီးလေးကို ကြည့်ကာ ကျန်းမန်က ပြုံးလျက် "တကယ်ကို ပင်ပန်းပါတယ်" ဟုသာ ဖြေလိုက်သည်။

"ကိစ္စမရှိပါဘူး၊ အခု ပင်ပန်းထားတာလည်း ကောင်းပါတယ်။ နောက်ပိုင်းမှာ စားမကုန်တဲ့ အခက်အခဲတွေ ရှိသေးတာဆိုတော့၊ စောစောစီးစီး အသားကျအောင် လုပ်ထားတာပေါ့"

ဖက်တီးလေးက ကျန်းမန်၏ ပခုံးကို ပုတ်ကာ ဆက်ပြောသည်။

"ငါက ရှေ့ကနေ ဖြည်းဖြည်းချင်း လျှောက်သွားမယ်၊ မင်းက နောက်ကနေ ငါ့ကို လိုက်မီအောင် ကြိုးစားပေါ့"

ကျန်းမန်က ရိက္ခာခြောက်ကို စားရင်း ကျေးဇူးတင်ကြောင်း ခေါင်းညိတ်ပြလိုက်သည်။

ဖက်တီးလေး ဒီလောက် ပျော်နေတာ အခဲမကြေစရာ မရှိပါဘူး။

သူ့ကို နှစ်ရက်လောက် ပျော်ပါစေဦး။

ယခုအခါ သူသည် တတိယမြောက် "ဘူးသီးခြောက်ဘူး" ကို အပြည့် ဖြည့်ပြီးသွားပြီ ဖြစ်သည်။ တိုးတက်မှုနှုန်းက အလွန် မြန်ဆန်သော်လည်း ခန္ဓာကိုယ်ကတော့ ခံနိုင်ရည် မရှိသလောက် ဖြစ်နေပြီ။

ခန္ဓာကိုယ်၏ အင်အားများကိုလည်း အသုံးချ၍ မရတော့ပေ။

ဤသို့သော တိုးတက်မှုမျိုးက တစ်ခါတစ်ရံတွင် ဆိုးကျိုးများပင် ဖြစ်လာတတ်သည်။

ကျင့်ကြံရေး စနစ်ကြီးက သူ၏ ပါရမီကို ကန့်သတ်ထားသလို ဖြစ်နေသည်။

မဟုတ်လျှင် ချီသန့်စင်ခြင်း အဆင့်လေးသို့ စောစောစီးစီး ရောက်နေလောက်ပြီ။

ထို့အပြင် အနာအဆာကင်း ဝိညာဉ်စုဆောင်းခြင်း ဆေးလုံးလည်း ကုန်သွားပြီဖြစ်ရာ ပါရမီက ထပ်မံ၍ ကန့်သတ်ခံလိုက်ရပြန်သည်။

ကံကောင်းသည်မှာ ဝိညာဉ်ကျောက်တုံး အများအပြား ရှိနေခြင်းပင် ဖြစ်သည်။

စုစုပေါင်း တစ်ထောင့်နှစ်ရာ့သုံးဆယ် ရှိပြီး၊ ယနေ့ည လော်ရွှမ် ခြံဝင်းသို့ သွားရောက် အလုပ်လုပ်ပါက ဝိညာဉ်ကျောက်တုံး တစ်ထောင့်သုံးရာ ပြည့်သွားမည် ဖြစ်သည်။

ယွင်ချန်ဌာနရှိ သာမန် အလုပ်သမားတစ်ယောက်၏ လစာနှင့် နီးပါးတူသွားပြီ ဖြစ်သည်။

ဤသည်မှာ သူ၏ လက်ရှိ ယုံကြည်မှုဖြစ်ပြီး၊ ဝိညာဉ်စုဆောင်းခြင်း ဆေးလုံး လေးလုံး ဝယ်ယူရန် လုံလောက်သည်။

အရည်အသွေးကတော့ နည်းနည်း သာမန်ဖြစ်သွားပေလိမ့်မည်။

"ရှောင်ကျန်း၊ နောက်ရက်တွေမှာလည်း ဆက်ကြိုးစားပါ၊ ရမှတ်စာရင်း ထွက်လာရင်လည်း အရမ်းကြီး စိတ်မပျက်သွားနဲ့ဦး"

ဖက်တီးလေးက စေတနာဖြင့် နှစ်သိမ့်စကား ပြောလိုက်သည်။

ထိုသို့ပြောရင်း ကျန်းမန်ကို အမဲခြောက် တစ်တုံး ပေးလိုက်သေးသည်။

လူကောင်းလေးပါလား။

ကျန်းမန် အတော်လေး စိတ်လှုပ်ရှားသွားပြီး၊ နောက်ရက်အနည်းငယ် ကြာလျှင်ကော ဖက်တီးလေးက သူ့ကို ဒီလို ဆက်ဆံပါဦးမလားဟု တွေးနေမိသည်။

ထို့နောက် ကျန်းမန်သည် နတ်ခြေလှမ်း ကျင့်စဉ်ကို ဆက်လက် လေ့ကျင့်လေသည်။

နတ်ခြေလှမ်း ကျင့်စဉ်သည် သိုင်းပညာရပ်အားလုံးထဲတွင် အခြေခံအကျဆုံးဖြစ်ပြီး စုစုပေါင်း အဆင့်ခြောက်ဆင့် ရှိသည်။

သိုင်းပညာရပ် မွေးရာပါချီ၏ အကူအညီဖြင့် တစ်ခေါက် ကျင့်တာနဲ့ အခြေခံဝင်တယ်။

နှစ်ခေါက် ကျင့်တာနဲ့ အဆင့်နှစ် ရောက်တယ်။

လေးခေါက် ကျင့်တာနဲ့ အဆင့်သုံး ရောက်တယ်။

မကြာခင်မှာပဲ အထွတ်အထိပ် အဆင့်ခြောက်ကို ရောက်သွားခဲ့သည်။

ဘယ်လို ဖိအားမှ မရှိပါဘူး။

မနက်ဖြန် အကဲဖြတ်စစ်ဆေးမှု စတင်တော့မည်မို့ တော်သေးသည်။ မဟုတ်လျှင် သူ ဆက်ကျင့်စရာ ဘာမှ မရှိတော့ပေ။

နောက်တစ်နေ့….

စက်တင်ဘာ ၁၅ ရက်နေ့….

အကဲဖြတ် စစ်ဆေးမည့်နေ့…..

ယနေ့ ချင်းယွင်ဆောင်၏ အနောက်ခြံဝင်းမှာ အတော်လေး တည်ငြိမ် လေးနက်နေသည်။

ပြီးခဲ့သည့်လက ကျင့်ကြံရေး အစီအစဉ်များ စတင်ဆွဲခဲ့ပြီးကတည်းက၊ လစဉ်လတိုင်း အကဲဖြတ်စစ်ဆေးမှုများကို ပြုလုပ်ရမည် ဖြစ်သည်။

ဒါကလည်း လူအများအပြားအတွက် သူတို့၏ ကျင့်ကြံမှု ရလဒ်များကို အတည်ပြုရမည့် အချိန်လည်း ဖြစ်သည်။

နောက်ကလူတွေအတွက်ကတော့ ပထမနဲ့ ဒုတိယ နေရာက လူတွေနဲ့ ဘယ်လောက် ကွာဟနေလဲဆိုတာကို သိရှိစေဖို့ ဖြစ်သည်။

တချို့က ကြိုးစားပြီး လိုက်မီအောင် လုပ်ကြပေမယ့် တချို့ကတော့ လက်ရှိအခြေအနေမှာပဲ ရောင့်ရဲပြီး ကိုယ့်ရဲ့ သာမန်ဖြစ်တည်မှုကို လက်ခံလိုက်ကြတယ်။

တစ်ခါတစ်ရံ အင်မော်တယ်လမ်းစဉ်ကြီးက မျက်စိရှေ့မှာ ရှိနေပေမယ့် လျှောက်ဖို့ ခြေလှမ်းတောင် မလှမ်းရဲကြဘူး။

လူအများစုအတွက်ကတော့ ကျင့်ကြံခြင်းဆိုတာ ထင်ထားတာထက် အများကြီး ပိုခက်ခဲပါတယ်။

ယနေ့တွင် လော်ရွှမ်နှင့် ချန်ယွီတို့ အတူတူ ဆဋ္ဌမမြောက် ခြံဝင်းငယ်သို့ သွားကြသည်။

လမ်းတွင် ချန်ယွီက သိချင်စိတ်ဖြင့် မေးလိုက်သည်။

"လော်ရွှမ်၊ အဲဒီကျန်းမန်က နင့်ဆီက ဝိညာဉ်ကျောက်တုံးတွေ အများကြီး ယူသွားတာ၊ တစ်ခုခု အကျိုးသက်ရောက်မှု ရှိရဲ့လား"

"သူက ကျင့်ကြံတာ အရမ်းကြိုးစားတော့၊ ငါလည်း မဖြစ်မနေ လိုက်ကျင့်ရတာပေါ့။ အဲဒီရှုထောင့်က ကြည့်ရင်တော့ အတိုင်းအတာ တစ်ခုအထိ အကျိုးသက်ရောက်မှု ရှိပါတယ်"

လော်ရွှမ်က အနည်းငယ် စဉ်းစားပြီးနောက် ဖြေလိုက်သည်။

"ဒါပေမယ့် ဖန်ယုံအပေါ် အကျိုးသက်ရောက်မှုနဲ့ ယှဉ်လိုက်ရင်တော့ ဘာမှ မဟုတ်ပါဘူး"

"တကယ်ပဲ အကျိုးသက်ရောက်မှု ရှိပုံရတယ်။ ငါ ခိုးကြည့်ဖူးတယ်၊ ဖန်ယုံက ကျန်းမန်ကို ကြည့်တဲ့ အကြည့်က သိပ်မမှန်ဘူး။ ပြီးတော့ ပုံမှန်ထက်လည်း ပိုပြီး စိတ်တိုလွယ်လာတယ်၊ တကယ်ပဲ ထိခိုက်သွားပုံရတယ်"

ချန်ယွီက ပြောလိုက်သည်။

"တကယ်လို့ ဒီတစ်ခေါက် ကျန်းမန်က နည်းနည်း တိုးတက်လာခဲ့ရင် ပိုပြီးတော့တောင် ကောင်းသေးတယ်"

လော်ရွှမ်က တည်ငြိမ်စွာဖြင့် ပြောလိုက်သည်။

"နှမြောစရာကောင်းတာက သူ့ရဲ့ နောက်ခံက အရမ်း ဆင်းရဲပြီး ပါရမီကလည်း သာမန်ပဲ ဖြစ်နေတာ။ မဟုတ်ရင် သူ့ကို အထူးအခွင့်အရေးအနေနဲ့ ငါ့ရဲ့ သက်တော်စောင့် လုပ်ခိုင်းလို့ ရတယ်။"

"ငါ့အတွက် အသက်စွန့်ခိုင်းဖို့လေ"

"သူက ဘာအရည်အချင်း ရှိလို့ နင့်ရဲ့ အထင်ကြီးမှုကို ခံရမှာလဲ။ သူသာ သိသွားရင် ပျော်လွန်းလို့ အိပ်တောင် ပျော်မှာ မဟုတ်ဘူး"

ချန်ယွီက အတော်လေး စပ်စုချင်စိတ်ဖြင့် မေးလိုက်သည်။

"နင့်ဆီ လာကျင့်တာ အကြိမ်ကြိမ်ပဲ ရှိပြီ၊ သူ တစ်ခုခု မရိုးမသား ကြံစည်တာမျိုးကော ရှိလား"

"ဒီလိုကိစ္စမျိုးကို ငါ စိတ်ဝင်စားဖို့ မထိုက်တန်ပါဘူး၊ သူက ဝိညာဉ်ကျောက်တုံးယူပြီး သူ့အလုပ် သူသေချာလုပ်ရင်၊ ငါ့ကို အနှောင့်အယှက် မပေးရင်၊ ငါ့အနေနဲ့ သူ့ကို ပိုပြီး ဂရုစိုက်ဖို့ မလိုအပ်ပါဘူး"

လော်ရွှမ်က ခေါင်းခါရင်း ပြောလိုက်သည်။

"ဟုတ်သားပဲ၊ သူက ရွာလေးတစ်ရွာက လာတာ၊ ပြီးတော့ ရွာကလည်း သူ့ကို စွန့်လွှတ်လိုက်ပြီလို့ ကြားတယ်။ ဘယ်လောက်ပဲ ကြိုးစားကြိုးစား အနာဂတ်မှ မရှိတော့တာ"

ချန်ယွီက ပခုံးတွန့်ကာ ပြောလိုက်သည်။

အခြားတစ်ဖက်တွင်၊ ကျန်းမန်သည် မြင်းတင်းကုပ်မှ ထွက်လာသည်နှင့် ဖန်ယုံကို တွေ့လိုက်ရသည်။

တစ်ဖက်လူ၏ မျက်နှာက မှုန်ကုပ်နေသည်။

"ဖန်သခင်လေး ကျွန်တော့်ကို ရှာတာလား"

ကျန်းမန်က မေးလိုက်သည်။

တစ်ဖက်လူက ချီသန့်စင်ခြင်း အဆင့်ခြောက်၊ သူက အဆင့်သုံး။

ကျင့်ကြံမှုအဆင့် ကွာဟချက်ကြောင့်၊ သူ သတိထားပြီး စကားပြောရသည်။

အကယ်၍ တစ်ဖက်လူ စိတ်မတည်ငြိမ်ဘဲ သူ့ကို တိုက်ရိုက် ကိုယ်ထိလက်ရောက် ကျူးလွန်လာလျှင်….

သူက တစ်ဖက်လူ၏ တိုက်ခိုက်မှုကို ခံနိုင်ရည် ရှိမည်မဟုတ်ပေ။

ပြိုင်ဘက်ကင်း ပါရမီက ထပ်ပြီး ဒုက္ခခံရဦးမယ်။

"မင်းလည်း လော်ရွှမ်ကို သွားရှာခဲ့တာပဲ၊ ငါနဲ့ ဘာကွာလို့လဲ"

ဖန်ယုံက ပြောလိုက်သည်။

ကျန်းမန် နားမလည်နိုင်အောင် ဖြစ်သွားသည်။

"သူ့ကို မရှာရင် မင်း တိုးတက်နိုင်မှာလား"

ဖန်ယုံက ထပ်ပြောသည်။

ကျန်းမန် တိတ်ဆိတ်သွားသည်၊ ဒါတော့ ဟုတ်တယ်။

သူ့အတွက် အလုပ်မလုပ်ပေးရင်၊ ဒီလောက်များတဲ့ ဝိညာဉ်ကျောက်တုံးတွေ တကယ်ပဲ ရှာနိုင်မှာ မဟုတ်ဘူး။

"မင်း နည်းနည်း တိုးတက်လာတယ် ဆိုရင်တောင် ဘာအသုံးကျမှာလဲ။ ဝင်ခွင့်မှ မရနိုင်တာ"

ဖန်ယုံ၏ မျက်လုံးထဲတွင် အထင်သေးမှုများ ရောယှက်နေသည်။

"ဝင်ခွင့်မရှိရင် မင်းက ဘာမှ မဟုတ်ဘူး။"

"နောက်နှစ်ရက်နေရင် ရမှတ်စာရင်း ထွက်လာလိမ့်မယ်၊ မင်းက နောက်ဆုံးအဆင့် မဖြစ်ဖို့ပဲ ဆုတောင်းလိုက်၊ မဟုတ်ရင် ခြံဟောင်းမှာ သွားပြီး သန့်ရှင်းရေး လုပ်ရလိမ့်မယ်။"

ထိုသို့ပြောပြီးနောက် တစ်ဖက်လူက လှည့်ထွက်သွားခဲ့သည်။

ကျန်းမန်လည်း တစ်ဖက်လူ ဘာကြောင့် ဒီလောက် စကားတွေ အများကြီး လာပြောနေရသလဲဆိုတာ နားမလည်နိုင်အောင် ဖြစ်ရသည်။

သူ့စိတ်ထဲ သက်သာရာ ရသွားစေဖို့ ဖြစ်ကောင်း ဖြစ်နိုင်မည်။

သို့သော် ဆဋ္ဌမမြောက် ခြံဝင်းငယ်သို့ ရောက်ခါနီးတွင်၊ ဖန်ယုံက ချန်သခင်လေးတို့ လူစုရှေ့၌ ရပ်နေသည်ကို သူ တွေ့လိုက်ရသည်။

တစ်ခုခု ရှင်းပြနေပုံရသည်။

သူတို့က ပြုံးရုံသာ ပြုံးလိုက်ပြီး၊ ဖန်ယုံ၏ ပခုံးကို ပုတ်ကာ လှည့်ထွက်သွားကြသည်။

ထိုလူများ၏ လှောင်ပြောင်နေသော အပြုံးများကို မြင်သောအခါ၊ ကျန်းမန် စိတ်ထဲတွင် သက်ပြင်းချလိုက်မိသည်။

ဒီလူတွေ ငါ့ကို မျက်စိမကျဖို့ပဲ မျှော်လင့်ရတော့မယ်။

ခဏအကြာတွင်……

ကျန်းမန်သည် ဆဋ္ဌမမြောက် ခြံဝင်းငယ်သို့ ဝင်ရောက်လာခဲ့သည်။

ယခုအခါ ဆဋ္ဌမမြောက် ခြံဝင်းငယ်တွင် စားပွဲများကို စီစဉ်ထားပြီး၊ တစ်ယောက်ကို စားပွဲတစ်လုံးစီ ဖြစ်သည်။

နေရာများကို အဆင့်သတ်မှတ်ချက်အလိုက် စီစဉ်ထားသည်။

ကျန်းမန်ကတော့ သဘာဝကျကျပင် နောက်ဆုံးတန်းတွင် ဖြစ်သည်။

"ရှောင်ကျန်း လာတာ တော်တော် နောက်ကျတယ်နော်"

ဖက်တီးလေးက ပြုံးလျက် နှုတ်ဆက်လိုက်သည်။

ကျန်းမန်ကလည်း အပြုံးဖြင့် ပြန်လည် တုံ့ပြန်လိုက်သည်။

ဖက်တီးလေးက ဆက်လက်၍ ပြုံးလျက် "စိတ်အေးအေးထားပါ၊ ငါ့ရဲ့ ရမှတ်က မင်းလိုက်မမီနိုင်တဲ့ အမြင့်မှာ ရှိနေပေမယ့်၊ ငါ မင်းကို အမြဲတမ်း စောင့်နေမှာပါ။ နောက်တစ်ခေါက် ကျရင် ဆက်ကြိုးစားပေါ့"

ကျန်းမန်က တစ်ဖက်လူကို ကြည့်ကာ အလေးအနက်ထား၍ ပြောလိုက်သည်။

" သေချာပေါက် ကြိုးစားပါ့မယ်"

ထိုစကားကို ကြားသောအခါ ဖက်တီးလေးမှာ သူ၏ အတ္တစိတ်များ ပြည့်ဝသွားသလို ခံစားလိုက်ရသည်။

ထို့နောက် ကျောက်လဲ့မင် ဝင်ရောက်လာခဲ့သည်။

လက်ထဲတွင် စာရေးတံများနှင့် စာအုပ်အချို့ကို ကိုင်ဆောင်ထားသည်။

သူ ဝင်လာပြီး ဆဋ္ဌမမြောက် ခြံဝင်းငယ်ရှိ လူနှစ်ဆယ့်ခြောက်ယောက်ကို ကြည့်လိုက်ရာ အနည်းငယ် အံ့ဩသွားမိသည်။

ဒီလူတွေ ဒီရက်ပိုင်းအတွင်း တော်တော်လေး တိုးတက်လာကြတယ်လို့ သူ ခံစားမိလိုက်တယ်။

ဒီလိုဖြစ်ရတဲ့ အကြောင်းရင်းက နောက်ဆုံးအဆင့်ရဲ့ ကြိုးစားမှုကြောင့်ဆိုတာ ယုံနိုင်စရာ မရှိဘူး။

ကျန်းမန် တစ်ခုခုကို သဘောပေါက်သွားတာက သူ့အတွက်တော့ မထူးဆန်းပါဘူး။

လူတွေက တစ်ချိန်ချိန်မှာတော့ ရုတ်တရက် အသိဉာဏ် ပွင့်လာတတ်တာပဲလေ။

အရူးတောင်မှ ချွင်းချက် မဟုတ်ဘူး။

အထူးသဖြင့် ကျင့်ကြံရေးလောကမှာဆိုရင် ဒီလိုကိစ္စမျိုးက အရမ်းကို သာမန်ပဲလေ။

ဒါပေမယ့် တစ်ဖက်လူ အသိဉာဏ်ပွင့်လာတာနဲ့ တစ်ပြိုင်နက် လူတိုင်းကိုပါ ကြိုးစားချင်စိတ် ဖြစ်လာအောင် လုပ်နိုင်တာကတော့ သူ မထင်မှတ်ထားခဲ့တဲ့ ကိစ္စပါပဲ။

ဒါ့အပြင်...

တစ်ဖက်လူ ပေးခဲ့တဲ့ ကျွေးမွေးနည်းက တကယ်ပဲ အသုံးဝင်တယ်။

ဒီလတိုလေးအတွင်းမှာတင် သူ ဝိညာဉ်ကျောက်တုံးတွေ အများကြီး ရခဲ့သလို၊ သူ့ရဲ့ အဆင့်အတန်းနဲ့ ဂုဏ်သိက္ခာလည်း တိုးတက်လာခဲ့တယ်။

သူ့ရဲ့ အနာဂတ် လမ်းခရီးကို ပိုပြီး ဖြောင့်ဖြူးသွားစေတယ်။

ဒါက လူကို ကိုယ့်မျက်စိအောက်မှာပဲ ထားသင့်တယ်လို့ သူ့ကို တွေးမိစေတယ်။

သူ မမြင်ချင်တဲ့ ကိစ္စတွေ ဖြစ်လာမှာကို တားဆီးဖို့ပေါ့။

အနည်းဆုံးတော့ နောက်တစ်နှစ်လောက်အထိ သေချာ စောင့်ကြည့်ရဦးမယ်။

ပြီးတော့ ဒီတစ်ခေါက် သူ ရမှတ် ဘယ်လောက်ရမလဲဆိုတာကိုလည်း ကြည့်ရမယ်။

တကယ်လို့ သုညမှတ်ပဲ ဆက်ဖြစ်နေမယ်ဆိုရင်တော့၊ တကယ်ပဲ မတော်တဆ ရလာခဲ့တာ ဖြစ်နိုင်တယ်။

တကယ်လို့ ဆယ်မှတ် ရလာခဲ့ရင်တော့ အရင်က ခန့်မှန်းချက်တွေကို တစ်မှတ်စာလောက် ယုံကြည်လို့ ရသွားပြီ။