အခန်း ၂၁

အခန်း (၂၁) သူက ငါ့ကို လူအများရှေ့မှာ ထင်ပေါ်စေချင်နေတာလား

စုန့်ချင့်၏ စိန်ခေါ်မှုက ကျန်းမန်ကို သိပ်ပြီး စိတ်အနှောင့်အယှက် မဖြစ်စေခဲ့ပေ။

သူ၏ ပါရမီများ ပေါ်လွင်လာသည်နှင့်အမျှ၊ ဤကဲ့သို့သော ကိစ္စမျိုးကို ရှောင်လွှဲ၍ မရနိုင်တော့ပေ။

မျက်စိမမြင်သောသူများကတော့ အမြဲရှိနေဦးမှာပဲ။

သူလုပ်နိုင်တာက အမြန်ဆုံး တိုးတက်အောင် လုပ်ပြီး၊ တခြားသူတွေ သူ့ကို စိန်ခေါ်ဖို့တောင် စိတ်မကူးရဲအောင် လုပ်ပစ်လိုက်ဖို့ပဲ ဖြစ်သည်။

တစ်ယောက်ယောက်က စိန်ခေါ်လာလျှင်လည်း ကိစ္စမရှိ၊ လာရင် ခံမယ်၊ ရေလာရင် တားမယ်ပေါ့။

သို့သော် ဖန်ယုံလိုမျိုး ရမှတ် ခြောက်ဆယ်ကျော်သူများ၏ အန္တရာယ်ကိုတော့ လောလောဆယ်တွင် သူ မခုခံနိုင်သေးပေ။

ဒါကြောင့် ပဋိပက္ခ မဖြစ်အောင် ရှောင်ဖယ်နေရမည်။

ယခုအခါ လူတိုင်းက လော်ရွှမ်က သူ့ကို မွေးမြူထားသည်ဟု ထင်နေကြပြီး၊ ကောင်းကျိုးရော ဆိုးကျိုးပါ ရှိနေသည်။

ကောင်းကျိုးကတော့ ပိုပြီး သန်မာလာဖို့အတွက် ခိုင်လုံသော အကြောင်းပြချက် ရှိသွားခြင်းပင်၊ ဆိုးကျိုးကတော့ လူအများစု၏ မကျေနပ်ချက်ကို ခံရခြင်း ဖြစ်သည်။

စုန့်ချင့် ထွက်သွားပြီးနောက် ဖက်တီးလေးက စိုးရိမ်တကြီးဖြင့် မေးလိုက်သည်။

"အစ်ကိုကျန်း မင်းရဲ့ လက်ဝါးခြောက်ကွက်က ဘယ်အဆင့်လောက် ရောက်ပြီလဲ"

"စုန့်ချင့်က ဘယ်အဆင့်လောက်လဲ"

ကျန်းမန်က ပြန်မေးလိုက်သည်။

"သူ လက်ဝါးခြောက်ကွက် ကျင့်လာတာ တော်တော်ကြာပြီ၊ လေးငါးဆင့်လောက်တော့ ရှိလိမ့်မယ်"

ဖက်တီးလေးလည်း သေချာ မသိပေ။

"လေးငါးဆင့်ပဲလား"

ကျန်းမန် အနည်းငယ် အံ့ဩသွားသည်။

"မဟုတ်ရင်ကော ရမှတ် နှစ်ဆယ်ကျော်လေးနဲ့ သွေးကြောအင်အား ကျင့်စဉ်ကိုပါ တွဲကျင့်နေရတာ သိုင်းပညာရပ်ကို တိုးတက်အောင်လုပ်ဖို့ အချိန်က ဘယ်လောက်များ ကျန်မှာမို့လို့လဲ"

ဖက်တီးလေးက သက်ပြင်းချရင်း ဆက်ပြောသည်။

"ခန္ဓာကိုယ် မသန်မာရင် ကျင့်ကြံမှုအဆင့်လည်း တက်မှာမဟုတ်ဘူး။ ပါရမီကောင်းတဲ့သူတွေကတော့ မစိုးရိမ်ရပေမယ့် ပါရမီ သာမန်လောက်ပဲရှိတဲ့သူတွေက ခန္ဓာကိုယ် စွမ်းအားကို တိုးတက်အောင် အချိန်အများကြီး ပေးရမှ ကျင့်ကြံမှုအဆင့် တိုးတက်မှာ။ တခြား သိုင်းပညာရပ်တွေကတော့ သုံးလို့ရရင် ပြီးတာပဲလေ။ လေးငါးဆင့်ဆိုတာက သုံးလို့ရတဲ့ အဆင့်ပဲ"

ကျန်းမန် ခေါင်းညိတ်လိုက်ပြီး အနည်းငယ် သဘောပေါက်သွားသည်။

သိုင်းပညာရပ်ဆိုတာ ရမှတ် မတိုးဘူးလေ၊ ဒါကြောင့် ကျင့်ကြံမှုအဆင့်ကသာ အရေးအကြီးဆုံးပဲ။

နတ်ခြေလှမ်း၊ လက်ဝါးခြောက်ကွက်၊ သုံးခုပေါင်းစပ် အားအင်တို့မှာ ထိပ်ဆုံးလူအနည်းငယ်မှလွဲလျှင် အမြင့်ဆုံးအဆင့်အထိ ကျင့်ကြံသူ နည်းပါးသည်။

အဘယ်ကြောင့်ဆိုသော် အချိန် အရမ်း ကုန်လွန်းသောကြောင့် ဖြစ်သည်။

အစပိုင်း ငါးဆင့်က မြန်ဆန်တဲ့အတွက် သုံးလို့ရရင် ပြီးတာပဲ။

"အစ်ကိုကျန်းကကော ဘယ်အဆင့်လဲ"

ဖက်တီးလေးက ထပ်မေးပြန်သည်။

"အေးဆေး လေ့ကျင့်တာ ငါးဆင့် ရောက်သွားပြီ ခဏလောက် စောင့်ပေးလိုက်ဦး"

ကျန်းမန်က ပြောလိုက်သည်။

ဖက်တီးလေး ကြောင်သွားသည်။

အစ်ကိုကျန်း ဘာတွေ ပြောနေတာလဲ။

ထားပါတော့ ခဏနေရင် ယှဉ်ပြိုင်လေ့ကျင့်မှပဲ သိရတော့မှာပါ။

အစ်ကိုကျန်းက လေ့ကျင့်ဖို့ အချိန်မရှိလို့ ရှက်ပြီး ပြောလိုက်တာ ဖြစ်မှာပါ။

လက်ဝါးခြောက်ကွက် သင်ပေးသူမှာ အမျိုးသမီး ဆရာတစ်ဦး ဖြစ်သည်။

သူမ၏ အမည်မှာ ဖူရီဒန် ဖြစ်ပြီး၊ လူတိုင်းက ဖူဆရာမ ဟု ခေါ်ကြသည်။

သိုင်းပညာရပ် အားလုံးကို သူမကပဲ သင်ပေးခြင်း ဖြစ်သည်။

ကြည့်ရသည်မှာ အသက် သုံးဆယ့်ငါးအရွယ်ခန့် ရှိပြီး အိမ်ထောင်ကျပြီးသူ ဖြစ်သည်။

သို့သော် သူမ၏ ရုပ်ရည်က ထူးချွန်ပြီး ယဉ်ကျေးသိမ်မွေ့သဖြင့်၊ သူမက ဘယ်သူနဲ့ အိမ်ထောင်ကျတာလဲဟု လူအများက လျှို့ဝှက်စွာ ဆွေးနွေးလေ့ ရှိကြသည်။

ကျန်းမန်ကတော့ ဤကိစ္စကို အထင်သေးစွာဖြင့် တွေးလိုက်သည်၊ ဒီအချိန်မှာ မကျင့်ကြံဘဲနဲ့ ဘယ်လိုလုပ် စကားပြောနေဖို့ အချိန်တွေ ရနေကြသလဲဆိုတာပဲ။

"အဆင့်သတ်မှတ်ချက်အသစ် ထွက်လာပြီးနောက်ပိုင်း၊ အနောက်ခြံဝင်းမှာ ယှဉ်ပြိုင်လေ့ကျင့်မှုတွေကို စတင်တော့မှာမို့၊ အသေးစိတ် ရှင်းပြပေးမယ်။ ပြီးရင် မင်းတို့ အချင်းချင်း ယှဉ်ပြိုင်လေ့ကျင့်ပြီး လက်တွေ့ အတွေ့အကြုံတွေကို မြှင့်တင်ရမယ်။ ဝင်ခွင့်နေရာ လုပွဲပဲဖြစ်ဖြစ်၊ ဂိုဏ်းရဲ့ အကဲဖြတ်မှုပဲဖြစ်ဖြစ် လက်တွေ့ ယှဉ်ပြိုင်မှုက အရမ်း အရေးကြီးတယ်"

ဖူဆရာမက လူအားလုံးကို ကြည့်ကာ ပြောလိုက်သည်။

ထို့နောက် သူမက လက်ဝါးခြောက်ကွက်အကြောင်း အသေးစိတ် ရှင်းပြပေးတော့သည်။

လက်ဝါးခြောက်ကွက်သည် ခန္ဓာကိုယ်ထဲရှိ ဝိညာဉ်စွမ်းအင်ကို လှုံ့ဆော်ကာ လက်ဝါးတွင် စွမ်းအားများ ထပ်ဖြည့်ပေးခြင်း ဖြစ်သည်။

ကောင်းစွာ လည်ပတ်နိုင်လျှင် လေ့ကျင့်မှု အောင်မြင်ပြီး၊ လက်ဝါးထဲသို့ စွမ်းအားများ ဆက်တိုက် စီးဆင်းလာမည် ဖြစ်သည်၊ ဤသည်မှာ ပထမအဆင့် ဖြစ်သည်။

ဒုတိယအဆင့်မှာ လက်ဝါးထဲရှိ စွမ်းအားကို လှုံ့ဆော်ပြီး ခန္ဓာကိုယ်အတွင်းရှိ ဝိညာဉ်စွမ်းအင်နှင့် ဆက်သွယ်ပေးရမည်။

၎င်း၏ အကျိုးရလဒ်မှာ တစ်ချက် ထိုးလိုက်လျှင် လက်ဝါး၏ ဦးတည်ရာကို ထိန်းချုပ်နိုင်ခြင်း ဖြစ်သည်။

လက်ဝါးပညာ တိုးတက်လာသည်နှင့်အမျှ ဝိညာဉ်စွမ်းအင် လက်ဝါးရာများကို ပိုမို ရိုက်ထုတ်နိုင်မည် ဖြစ်သည်။

အများဆုံး လက်ဝါး ခြောက်ချက်……

၎င်းမှာ လက်ဝါးခြောက်ကွက်၏ အဆင့်ခုနစ် ဖြစ်သည်။

အဆင့်ရှစ်တွင် လက်ဝါးသုံးချက်ကို ပေါင်းစပ်ပြီး ပိုမို အားကောင်းသော စွမ်းအားဖြင့် ရိုက်ထုတ်နိုင်သည်။

အဆင့်ကိုးတွင်မူ လက်ဝါးခြောက်ချက်ကို ပေါင်းစပ်လိုက်ခြင်းဖြင့် လက်ဝါးခြောက်ကွက်၏ အမြင့်ဆုံး အထွတ်အထိပ်သို့ ရောက်ရှိသွားမည် ဖြစ်သည်။

"တစ်နာရီလောက် လေ့ကျင့်ပြီးရင် ယှဉ်ပြိုင်လေ့ကျင့်တာ စမယ်"

ဖူဆရာမက ပြောလိုက်သည်။

ထိုစကားကို ကြားသောအခါ ကျန်းမန် အချိန်မဆွဲတော့ဘဲ စတင် လေ့ကျင့်တော့သည်။

စုန့်ချင့်၏ လက်ဝါးခြောက်ကွက်က အဆင့်လေး၊ ငါး ဖြစ်သဖြင့် အမှန်တကယ်ပင် ရင်ဆိုင်ရ ခက်ခဲနိုင်သည်။

ဝိညာဉ်စွမ်းအင် လက်ဝါးရာ သုံးလေးခုကို အချိန်မရွေး ထိန်းချုပ်ကာ တိုက်ခိုက်လာနိုင်သည်။

သို့သော် ကောင်းစွာ ထိန်းချုပ်နိုင်မှသာ အကြီးမားဆုံး အကျိုးသက်ရောက်မှု ရနိုင်သည်။

ကျန်းမန်က အများကြီး မတွေးတော့ဘဲ ဝိညာဉ်စွမ်းအင်များကို လှုံ့ဆော်ကာ လက်ဝါးခြောက်ကွက်ကို စတင် လေ့ကျင့်တော့သည်။

သိုင်းပညာရပ် မွေးရာပါချီကလည်း လည်ပတ်နေသည်။

ပထမဆုံးအကြိမ် လေ့ကျင့်ခြင်းဖြစ်သဖြင့် အနည်းငယ် နှေးကွေးသည်။

ဆယ့်ငါးမိနစ်…..

ကျန်းမန် တစ်ကျော့ လေ့ကျင့်ပြီးသွားသည်။

အခြေခံဝင်သွားသည်။

နောက်ပိုင်းကတော့ လွယ်ကူသွားသည်။

သိုင်းပညာရပ် မွေးရာပါချီက ကျင့်စဉ် ခရမ်းရောင်ချီလောက် မစွမ်းဆောင်နိုင်လို့ ဖြစ်နိုင်သည်။

နှစ်ကြိမ် လေ့ကျင့်ပြီးနောက် မအောင်မြင်သေးပေ။

လေးကြိမ် လေ့ကျင့်ပြီးနောက်မှ လက်ဝါးထဲမှ ဝိညာဉ်စွမ်းအင် လက်ဝါးရာကို ထုတ်နိုင်ခဲ့သည်။

နောက်ထပ် ရှစ်ကြိမ် လေ့ကျင့်ပြီးနောက်၊ ကျန်းမန်သည် လက်ဝါးခြောက်ကွက် အဆင့်သုံးသို့ ရောက်ရှိသွားသည်။

နောက်ထပ် ဆယ့်ခြောက်ကြိမ် လေ့ကျင့်ပြီးနောက်၊ လက်ဝါးခြောက်ကွက် အဆင့်လေး လက်ဝါးရာ သုံးခု ရိုက်ထုတ်နိုင်သည်။

လောလောဆယ် နာရီဝက် ကြာပြီ ဖြစ်သည်။

ကျန်းမန် လေ့ကျင့်နေသည်ကို ကြည့်ပြီး ဖက်တီးလေး အနည်းငယ် အံ့ဩသွားသည်။ အစပိုင်းက ကျန်းမန် လက်ဝါးခြောက်ကွက် မရသေးဘူး ထင်ခဲ့ပေမယ့်၊ မကြာခင်မှာပဲ တစ်ဖက်လူက လက်ဝါးရာတစ်ခုတည်း မဟုတ်ဘဲ သုံးခုအထိ ထုတ်နိုင်သည်ကို မြင်လိုက်ရသည်။

ဒါက အနည်းဆုံးတော့ လက်ဝါးခြောက်ကွက် အဆင့်လေး ဖြစ်သည်။

အဲဒါဆို ကျန်းမန်က အရည်အချင်းကို ကြိုတင် ရရှိထားတာပဲ ဖြစ်ရမယ်။

သေချာပေါက် လော်သခင်မလေး ကြိုတင် စီစဉ်ပေးထားတာ ဖြစ်ရမယ်။

ကြည့်ရတာ အစ်ကိုကျန်း တကယ်ပဲ သက်တော်စောင့် ဖြစ်တော့မှာပဲ။

အားကျလိုက်တာ……

နောက်ဆုံး နာရီဝက်တွင် ကျန်းမန် ဆက်လက် လေ့ကျင့်ခဲ့ပြီး၊ ဖူရီဒန် ရပ်ခိုင်းလိုက်ချိန်တွင် နောက်ဆုံး အကြိမ်ကို ပြီးမြောက်ခဲ့သည်။

သူသည် လက်ဝါးလေးချက်ကို အလွယ်တကူ ထုတ်နိုင်ပြီ ဖြစ်သည်။

ဒီလို ယှဉ်ပြိုင်လေ့ကျင့်ရင်တော့ နစ်နာစရာ မရှိတော့ဘူး။

ဟုတ်တာပေါ့၊ တိုက်ရိုက်နိုင်သွားရင်တော့ အကောင်းဆုံးပဲ။

နာမည်ကျော်ဖို့ အချိန်ရောက်ပြီ။

ဒီလို သေးသေးမွှားမွှား ကိစ္စတွေကို ဖုံးကွယ်ထားဖို့ မလိုပါဘူး။

"အစ်ကိုကျန်း မင်း ယုံကြည်ချက် ရှိရဲ့လား"

ဖက်တီးလေး ရောက်လာပြီး မေးလိုက်သည်။

ကျန်းမန် တစ်ဖက်လူကို ကြည့်ကာ ပြောလိုက်သည်။

"ပါရမီနဲ့ ကြိုးစားအားထုတ်မှု ရှိနေတာပဲလေ"

ထိုစကားကို ကြားသောအခါ ဖက်တီးလေးက ကျန်းမန်၏ မျက်နှာကို ကြည့်လိုက်သည်။

အနည်းငယ် ခေါင်းညိတ်လိုက်ပြီး၊ တကယ်ပဲ ပါရမီကောင်းတယ်လို့ ချီးကျူးလိုက်သလိုပင်……

ကျန်းမန် "..."

ဖက်တီးလေး တစ်ခုခု လွဲမှားစွာ တွေးနေသလိုပဲ။

"အခုချိန်ကစပြီး ယှဉ်ပြိုင်လေ့ကျင့်မယ်၊ ပြင်းထန်မှုကတော့ မင်းတို့ဘာသာ ဆုံးဖြတ်ပေမယ့် အရမ်းကြီး လွန်မသွားနဲ့။ စွမ်းအား လုံလောက်တဲ့သူတွေက အစွမ်းကုန် ယှဉ်ပြိုင်နိုင်ပါတယ်၊ ဒဏ်ရာရတာတွေကို သိပ်ဂရုစိုက်မနေနဲ့"

ဖူဆရာမက ပြောလိုက်သည်။

ထိုစကားကို ကြားသောအခါ စုန့်ချင့် အနည်းငယ် စိတ်သက်သာရာ ရသွားသည်။

အစပိုင်းက တစ်ဖက်လူကို လက်ရမ်းလွန်သွားပြီး အပြစ်ပေးခံရမှာ စိုးရိမ်ခဲ့ပေမယ့်၊ အခုတော့ စိုးရိမ်စရာ မလိုတော့ဘူး။

မကြာမီ သူနှင့် ကျန်းမန်တို့သည် တစ်နေရာစီ ရပ်လိုက်ကြသည်။

လူတိုင်း အဝေးကြီးကို ရောက်သွားကြသည်။

စုစုပေါင်း နှစ်ဆယ့်ခြောက်ယောက်……ဆယ့်သုံးအုပ်စု ခွဲလိုက်သည်။

"မင်း သက်တော်စောင့် ဖြစ်တော့မယ်လို့ ကြားတယ်"

စုန့်ချင့်က ကျန်းမန်ကို ကြည့်ကာ မေးလိုက်သည်။

သူ၏ အသံက သိပ်မကျယ်ဘဲ တခြားသူတွေ မကြားစေရန် ပြောခြင်း ဖြစ်သည်။

ကျန်းမန် ခေါင်းခါလိုက်သည်။

"မဖြစ်သေးပါဘူး"

"ဒါပေမယ့် လူတိုင်း ဒီလိုပဲ ပြောနေကြတာလေ"

စုန့်ချင့်က ကျန်းမန်ကို ကြည့်ကာ ခပ်တိုးတိုး ပြောလိုက်သည်။

"ကိစ္စတစ်ခုက လျှို့ဝှက်မှ အောင်မြင်တာ ငါသိပါတယ်။ ဒီလို ကောင်းတဲ့အရာကို မင်း သေချာပေါက် ဟိုဟိုဒီဒီ ပြောမှာ မဟုတ်ဘူး။ ငါလည်း မင်းကို ရန်ရှာဖို့ ရည်ရွယ်ချက် မရှိဘူး မင်းကို တစ်ဆင့် စကားပြောပေးဖို့ပဲ တောင်းဆိုတာ ဒီတစ်ခေါက်မှာ မင်းကို အရမ်းလှပတဲ့ နည်းလမ်းနဲ့ အနိုင်ရအောင် လုပ်ပေးမယ် ငါ ဒဏ်ရာပြင်းပြင်းထန်ထန် ရပြီး လဲကျသွားမယ် မင်းအတွက် နာမည်ကျော်သွားအောင် လုပ်ပေးမယ် ဘယ်လိုလဲ"

ကျန်းမန် ကြက်သေသေသွားသည်။

တစ်ဖက်လူ၏ စကားက သူ့ကို တွေဝေသွားစေသည်။

ဒီလူက အစပိုင်းက သူ့ကို တမင် စော်ကားဖို့ ကြိုးစားခဲ့တာ မဟုတ်ဘူးလား။

ဘာလို့ ရုတ်တရက် အစီအစဉ် ပြောင်းသွားတာလဲ။

စော်ကားပြီးမှ သူ့ကို အနိုင်ရအောင် လုပ်ပေးတာက ကောင်းတဲ့ အချက်တစ်ခုလား။

ဟုတ်ပါတယ်၊ ခဏနေရင် ခြံဝင်းငယ်မှာ ဂုဏ်သတင်း ကျော်ဇော်သွားပြီး နေရာတစ်ခု ရသွားမှာ။

အရင်တုန်းက နောက်ဆုံးအဆင့် ဖြစ်ခဲ့ပေမယ့်၊ အခုတော့ မဟုတ်တော့ပေမယ့်လည်း လူတိုင်းက အရင် အမြင်ဟောင်းနဲ့ သူ့ကို နောက်ဆုံးအဆင့်လို့ပဲ မြင်နေကြတုန်းပဲ။

တကယ်လို့ လှလှပပ အနိုင်ရလိုက်မယ်ဆိုရင်တော့၊ အဲဒီ အမြင်ဟောင်းတွေကို သေချာပေါက် ဖျက်ဆီးပစ်နိုင်မှာ။

ဒါဆို ဒီနေ့ သေချာပေါက် နိုင်အောင် လုပ်ရတော့မယ်။

"မင်း ငါ့ကို အထင်လွဲနေတာ ဖြစ်မယ် ဒီနေ့ ငါ အောင်မြင်နေတာက လော်သခင်မလေးကြောင့် မဟုတ်ဘူး ငါ့ရဲ့ ပါရမီနဲ့ ကြိုးစားအားထုတ်မှုကြောင့်ပဲ"

ကျန်းမန်က အမှန်အတိုင်း ပြောပြလိုက်သည်။

"မင်း မပြောမှန်း ငါသိတယ် ကျွန်တော်တို့ ယှဉ်ပြိုင်လေ့ကျင့်တာ စလို့ရပြီ။ တချို့လူတွေကတော့ ငါတို့ကို စောင့်ကြည့်နေမှာ သေချာတယ်။ မင်း နောင်တရဖို့ အချိန်ရှိသေးတယ်၊ မင်းသာ သဘောတူမယ်ဆိုရင် ငါက မင်းအတွက် သွေးအန်ပြီး လဲကျပေးမှာပါ"

စုန့်ချင့်က အလေးအနက် ပြောလိုက်သည်။

"ငါက မင်းကို စိန်ခေါ်မယ်၊ ပြီးရင် မင်းရဲ့ အနိုင်ရမှုကို ခံယူမယ်၊ ဒါက အားတက်စရာ ကောင်းတဲ့ ကိစ္စတစ်ခုပဲ၊ သေချာ စဉ်းစားကြည့်ပါဦး။ ငါတို့နှစ်ယောက်လုံးအတွက် ကောင်းပါတယ်။"