အခန်း ၃၇

အခန်း (၃၇) ပြိုင်ဘက်ကင်း ပါရမီရှင်ရဲ့ တောင်းဆိုချက်

ဆေးလုံးနှစ်လုံး ကျဆင်းလာသည်နှင့်အမျှ။

ကျန်းမန်သည် ပြိုင်ဘက်ကင်း ပါရမီရှင် ကံကြမ္မာဇယားအတွင်း၌ လူမသိသော အပြောင်းအလဲတစ်ခု ဖြစ်ပေါ်လာသည်ကို ခံစားလိုက်ရသည်။

ထူးဆန်းနက်နဲလှသော ထိုခံစားချက်က ဆက်တိုက်ဆိုသလို ဖြစ်ပေါ်လာသည်။

ကျန်းမန်က အာရုံစိုက် ကြည့်လိုက်သည်။

ထို့နောက် ထိုထူးဆန်းသော ခံစားချက်များက စတင် အဓိပ္ပာယ်ပွင့်လာပြီး နောက်ဆုံးတွင် စာသားများအဖြစ် ပြောင်းလဲပေါ်ထွက်လာခဲ့သည်။

【ပြိုင်ဘက်ကင်း ပါရမီရှင် ကံကြမ္မာဇယား】

【ပြိုင်ဘက်ကင်း ပါရမီရှင်ဖြစ်သော မင်းအတွက် ကျင့်ကြံခြင်းသည် မွေးရာပါ ဗီဇတစ်ခု ဖြစ်နေပြီဖြစ်ရာ ခန္ဓာကိုယ် အခြေအနေ ခွင့်ပြုသရွေ့ တစ်နေ့လျှင် အကြိမ်တစ်ရာ့ငါးဆယ် တိတိ ကျင့်ကြံရမည်ဖြစ်ပြီး ရက်ပေါင်းသုံးရာအတွင်း နင်းယွမ်ကျင့်စဉ်ကို အဆင့်ကိုးအထိ မြှင့်တင်ရမည်】

【ကျရှုံးပါက ကံကြမ္မာဇယား၏ နောက်ပြန်ရိုက်ခတ်မှုကို ခံရမည်】

【ကျင့်ကြံမှုအဆင့် အားလုံး ပျောက်ဆုံးသွားမည်】

တတိယမြောက် တောင်းဆိုချက်ကတော့ ထွက်လာခဲ့ပြီ ဖြစ်သည်။

နည်းနည်းတော့ လူမဆန်လှပေ။

တစ်နေ့ကို အကြိမ်တစ်ရာ့ငါးဆယ်…..

ကိုယ့်မှာ တခြားကိစ္စလုပ်ဖို့ အချိန်ရှိတော့မည် မဟုတ်ပေ။

မနက်ခင်း ပညာသင်တာကလွဲရင် ကျန်တဲ့အချိန်တွေက အခြေခံအားဖြင့် ကျင့်ကြံခြင်းနဲ့ပဲ ကုန်ဆုံးရတော့မည်။

ညဘက်ဆိုရင် တကယ်ကို အိပ်ရတော့မှာ မဟုတ်ပေ။

ဒါဆို နင်းယွမ်ကျင့်စဉ်ဆိုတာက ဘာကြီးလဲဆိုတာ တွေးစရာ ဖြစ်လာသည်။

ဒီကျင့်စဉ်ကို ကျန်းမန် တစ်ခါမှ မကြားဖူးသော်လည်း အဆင့်ကိုးဟု မြင်လိုက်ရသဖြင့် သက်ပြင်းချနိုင်သွားသည်။

အဆင့်ကိုးဆိုမှတော့ အခြေခံအဆင့် ကျင့်စဉ်ဆိုလျှင် ရနိုင်သည်ဟု ဆိုလိုခြင်း ဖြစ်သည်။

တကယ်လို့ အဆင့်ဆယ့်သုံးသာဆိုရင်တော့ သေဖို့ပဲ ရှိတော့သည်။

အဆင့်ဆယ့်သုံးဆိုတာ ပါရမီကို ယှဉ်ရတာ မဟုတ်ဘဲ ငွေကြေးအင်အားနဲ့ နောက်ခံကို ယှဉ်ရတာမျိုး ဖြစ်သည်။

လူကို ထိပ်ဆုံးရောက်အောင် ကြိုးစားခိုင်းနေသလို ထင်ရသော်လည်း တကယ်တမ်းတွင် အထက်အဆင့် ကျင့်စဉ်ကို ဝယ်နိုင် မဝယ်နိုင် စမ်းသပ်နေခြင်းသာ ဖြစ်သည်။

ဒီပြိုင်ဘက်ကင်း ပါရမီရှင် ကံကြမ္မာဇယားကလည်း ရိုးသားမှု မရှိပေ။

သူ့လို ဆင်းရဲတဲ့ ပါရမီရှင်ကို တမင်သက်သက် နှိပ်စက်နေခြင်းသာ ဖြစ်သည်။

နွားဝါကြီးက ဘေးနားမှနေ၍ မေးလိုက်သည်။

"တောင်းဆိုချက် ထွက်လာပြီလား"

ကျန်းမန်က ခေါင်းညိတ်ပြရင်း ပြန်ပြောလိုက်သည်။

"ထွက်လာပြီ ဆေးလုံးနှစ်လုံးပါ ပိုထွက်လာတယ်"

ဆေးလုံးနှစ်လုံးထဲမှ တစ်လုံးက သွေးကဲ့သို့ ရဲရဲနီနေပြီး နောက်တစ်လုံးကတော့ နှင်းကဲ့သို့ ဖွေးဖွေးဖြူနေသည်။

နွားဝါကြီးက အနည်းငယ် စဉ်းစားပြီးနောက် ပြောလိုက်သည်။

"အနာအဆာကင်း သွေးကြောဆေးလုံးနဲ့ အနာအဆာကင်း စိတ်တည်ငြိမ်ဆေးလုံးပဲ ပထမတစ်ခုက ခန္ဓာကိုယ် တစ်နည်းအားဖြင့် သွေးကြောအင်အား ကျင့်စဉ်အတွက် သုံးတာဖြစ်ပြီး ဒုတိယတစ်ခုကတော့ စိတ်ဓာတ် တစ်နည်းအားဖြင့် စိတ်ကူးပုံဖော်ခြင်း ကျင့်စဉ်အတွက် သုံးတာ မင်းအရင်ရခဲ့တဲ့ အနာအဆာကင်း ဝိညာဉ်စုဆောင်းခြင်း ဆေးလုံးနဲ့ ဆင်တူပြီး နောက်ဆုံး သုံးဆင့်အတွက် တာဝန်ယူပေးလိမ့်မယ်"

အဆင့်သုံးဆင့်စာ တာဝန်ယူပေးနိုင်တာတင် မဆိုးလှပေ ဝိညာဉ်ကျောက်တုံး တော်တော်များများ သက်သာသွားသည်။

တစ်ခုတည်းသော နှမြောစရာကတော့ ဝိညာဉ်စုဆောင်းခြင်း ဆေးလုံးအသစ် မပါလာခြင်း ဖြစ်သည်။

မဟုတ်လျှင် နောက်ပိုင်း ကျင့်ကြံမှုအဆင့် မြှင့်တင်ရတာ ပိုပြီး အဆင်ပြေလိမ့်မည်။

ဒီအချက်တွေကိုတော့ နွားဝါကြီးက အရမ်းကြီး ဂရုမစိုက်လှပေ ချီသန့်စင်ခြင်း အဆင့်ရဲ့ အမွေအနှစ်ဆိုတာက သူ့အတွက်တော့ ရိုးရှင်းလွန်းလှသည်ဖြစ်ရာ ဘယ်လောက်ပဲ ကောင်းတဲ့ ကျင့်စဉ်နဲ့ ဆေးလုံးဖြစ်ပါစေ ဤမျှသာ ဖြစ်သည်။

သူ စိတ်ဝင်စားသည်မှာ တောင်းဆိုချက်အသစ်သာ ဖြစ်သည်။

ထို့ကြောင့် သူက မေးမြန်းလိုက်သည်။

ကျန်းမန်ကလည်း ဖုံးကွယ်မထားဘဲ ပထမဆုံး တောင်းဆိုချက်ကို ပြောပြလိုက်သည်။

နွားဝါကြီးက ပြောလိုက်သည်။

"ဒါက ကိစ္စမရှိပါဘူး ဘာပဲဖြစ်ဖြစ် မင်းက မအိပ်တာပဲဥစ္စာ ကြိုးစားတဲ့သူကို ကြယ်အလင်းရောင်က သစ္စာမဖောက်ပါဘူး"

ကျန်းမန် ဘာမှပြန်မပြောနိုင်ဘဲ ဖြစ်သွားသည်။

ထို့နောက် သူက ဒုတိယမြောက် တောင်းဆိုချက်ကို ထပ်ပြောပြလိုက်သည်။

ထိုအရာမှာ လူမသိသေးသော နင်းယွမ်ကျင့်စဉ် ဖြစ်သည်။

ထိုစကားကို ကြားသောအခါ နွားဝါကြီး ကြောင်အမ်းသွားပြီး မေးလိုက်သည်။

"နင်းယွမ်ကျင့်စဉ် ဟုတ်လား ရက်ဘယ်လောက်လဲ"

ကျန်းမန်က ပြန်ဖြေလိုက်သည်။

"ရက်ပေါင်းသုံးရာ"

နွားဝါကြီးက မေးလိုက်သည်။

"ဘယ်နှစ်ဆင့်လဲ"

ကျန်းမန်က ပြောလိုက်သည်။

"အဆင့်ကိုး"

အရင်တစ်ခေါက်ကလိုပဲ နွားဝါကြီး တိတ်ဆိတ်သွားခဲ့သည်။

မေးစရာပင် မလိုဘဲ ဤတောင်းဆိုချက်က အလွန် ခက်ခဲလိမ့်မည်ဆိုတာ ကျန်းမန် သိလိုက်သည်။

သို့သော်လည်း သေသေချာချာ သိထားရန် လိုအပ်သည်။

နွားဝါကြီးကလည်း ဒီတစ်ခေါက်တွင် လျှို့ဝှက်မနေတော့ဘဲ အနည်းငယ် စဉ်းစားပြီးနောက် ရှင်းပြလိုက်သည်။

"ကောင်းကင်နဲ့ မြေကြီးရဲ့ ဝိညာဉ်စွမ်းအင်တွေကို စုစည်းပြီး အခြေခံကို ခိုင်မာအောင် လုပ်တဲ့ ကျင့်စဉ်ပဲ"

"ဒါက အရင်တုန်းက ခေါ်ဝေါ်တဲ့ အခေါ်အဝေါ်အဟောင်း တစ်ခုပေါ့"

"လက်ရှိ အဓိက ဂိုဏ်းကြီးလေးခုက ထုတ်ပြန်ထားတဲ့ ကျင့်စဉ်တွေအရ ကြည့်မယ်ဆိုရင်"

"အဲဒါက အခြေခံ တည်ဆောက်ခြင်း ကျင့်စဉ်ပဲ"

"တစ်နည်းအားဖြင့် မင်းက ရက်ပေါင်းသုံးရာအတွင်း အခြေခံ တည်ဆောက်ခြင်း ကျင့်စဉ်ရဲ့ အဆင့်ကိုးကို အောင်မြင်အောင် ကျင့်ရမယ်လို့ ဆိုလိုတာ"

ထိုစကားကို ကြားသောအခါ ကျန်းမန် ကြောင်သွားပြီး မယုံနိုင်အောင် ဖြစ်သွားသည်။

ဖောင်ဒေးရှင်း တည်ဆောက်ခြင်းတဲ့လား

ဒီလို အဆင့်မျိုးက သူနှင့် ဘာဆိုင်သလဲဆိုတာ စဉ်းစားစရာ ဖြစ်လာသည်။

သူ အနည်းငယ် တွေဝေသွားပြီးနောက် မေးလိုက်သည်။

"အခြေခံ တည်ဆောက်ရတာ ခက်လား"

နွားဝါကြီးက အမှန်အတိုင်း ပြန်ဖြေလိုက်သည်။

"မင်းလို လူမျိုးအတွက်တော့ အခြေခံ တည်ဆောက်နိုင်ဖို့ဆိုတာ အချိန်ပြဿနာပဲ ရှိတာ"

ဒီလောက် ပါရမီ ထူးချွန်တဲ့သူအတွက် ဖောင်ဒေးရှင်း တည်ဆောက်ဖို့ဆိုတာ သေချာပေါက် အရမ်း မခက်ခဲနိုင်ပေ။

ကျန်းမန် အနည်းငယ် မယုံနိုင်ဘဲ စမ်းသပ်သည့် သဘောဖြင့် မေးလိုက်သည်။

"ဒါဆို ဒီတစ်ခေါက် တောင်းဆိုချက်က သိပ်မမြင့်ဘူးပေါ့"

နွားဝါကြီးက ကျန်းမန်ကို ကြည့်ကာ အေးစက်စွာ ရယ်မောလိုက်ပြီး အနည်းငယ် စဉ်းစားကာ ပြောလိုက်သည်။

"မင်းမေးတဲ့ ပုံစံက မှားနေတယ် အချိန်ကိုပါ ထည့်မေးရမှာ"

ကျန်းမန် ကြောင်သွားပြီး စကားလုံးများကို ပြန်လည် ပြင်ဆင်ကာ မေးလိုက်သည်။

"ရက်ပေါင်းသုံးရာအတွင်း ချီသန့်စင်ခြင်း အဆင့်ခြောက်ကနေ အခြေခံ တည်ဆောက်တဲ့အဆင့်ကို ရောက်ရမယ် ပြီးရင် နင်းယွမ်ကျင့်စဉ်ကို အဆင့်ကိုးအထိ ကျင့်ရမယ်ဆိုရင် ခက်လား"

နွားဝါကြီးက ခပ်ဟဟ ရယ်မောရင်း ပြောလိုက်သည်။

"ကောင်းကင်ဘုံကို တက်ရသလို ခက်လိမ့်မယ်"

ကျန်းမန် ခဏတာ တိတ်ဆိတ်သွားပြီးနောက် စိတ်ခံစားချက်များကို ထိန်းချုပ်လိုက်သည်။

ထို့နောက် သန့်ရှင်းရေး စတင်လုပ်ကိုင်တော့သည်။

နွားဝါကြီးက အနည်းငယ် အံ့ဩသွားပြီး မေးလိုက်သည်။

"လက်လွှတ်လိုက်ဖို့ ဆုံးဖြတ်လိုက်ပြီလား"

ကျန်းမန်က အနောက်သို့ လှည့်ကြည့်ကာ အဓိပ္ပာယ်ပါပါဖြင့် ပြောလိုက်သည်။

"အဝါကြီး မင်းက ပြိုင်ဘက်ကင်း ပါရမီရှင်အကြောင်း ဘာမှမသိသေးဘူးပဲ"

နွားဝါကြီး ဘာမှပြန်မပြောနိုင်တော့ပေ။

နောက်နောင် ဤကဲ့သို့သော မေးခွန်းမျိုးကို လုံးဝ မမေးတော့ရန် သူ ဆုံးဖြတ်လိုက်သည်။

နှစ်ခါတိုင်တိုင် သင်ခန်းစာ ရပြီးနောက်ပိုင်းတွင်လည်း စောစောစီးစီး ကောက်ချက်ချရန် မရည်ရွယ်တော့ပေ။

ယခုအချိန်တွင် ကျန်းမန်က သန့်ရှင်းရေး လုပ်ကိုင်ရင်း ချန်ချီဝမ် ရောက်လာမည့်အချိန်ကို စောင့်ဆိုင်းနေသည်။

အခြေခံ တည်ဆောက်ခြင်းနှင့် နင်းယွမ်ကျင့်စဉ်က ဘယ်လောက်အထိ ခက်ခဲမလဲဆိုတာကိုတော့ သူ စဉ်းစားနေမိသည်။

သူ့တွင် အယူအဆ မရှိပေ။

ဘာကြောင့်လဲဆိုတော့ အဲဒီအဆင့်တွေနှင့် သူ မထိတွေ့ဖူးသေးသောကြောင့် ဖြစ်သည်။

နွားဝါကြီးက အချို့အချက်များကို သိထားသော်လည်း လက်ရှိ အခြေအနေနှင့်တော့ အနည်းငယ် ကွာဟချက် ရှိနိုင်သည်။

သို့သော် ကျန်းမန် အသေအချာ နားလည်ထားသည့် အချက်တစ်ချက် ရှိသည်

၎င်းမှာ ဂိုဏ်းထဲသို့ ဝင်ရမည်ဟူသော အချက်ပင်။

မဟုတ်လျှင် နင်းယွမ်ကျင့်စဉ်ကိုပင် ရရှိနိုင်မည် မဟုတ်ပေ။

ထို့အပြင် ဖောင်ဒေးရှင်း တည်ဆောက်မည့် ကိစ္စကိုလည်း အခွင့်အရေး ရှိလျှင် အလေးထားရမည် ဖြစ်သည်။

သို့သော် လောလောဆယ်တွင်တော့ အများကြီး ဆက်မတွေးတော့ပါ

ဝေးကွာလွန်းသေးသဖြင့် အဓိပ္ပာယ် သိပ်မရှိလှပေ။

အချိန်အများကြီး လိုသေးသည်။

သေချာတာပေါ့ ဒီကာလအတွင်းမှာ ဝိညာဉ်ကျောက်တုံးတွေ ဆက်ပြီး ရှာရဦးမည်။

နောက်ပိုင်းကျရင် ဝိညာဉ်ကျောက်တုံးတွေ အများကြီး လိုအပ်လာမှာ သေချာသည်။

ကံကောင်းသည်မှာ ချန်ချီဝမ်၏ စိန်ခေါ်မှုကြောင့် သူ့တွင် မဆိုးလှသော အကျိုးအမြတ်တစ်ခု ရရှိခဲ့ခြင်း ဖြစ်သည်။

နာရီဝက်ခန့် ကြာပြီးနောက် ကျန်းမန်သည် လရောင်ကို ဖြတ်၍ အပြင်ဘက်သို့ လှမ်းကြည့်လိုက်သည်။

ထိုဘက်မှ လူရိပ်တစ်ရိပ်က မြင်းတင်းကုပ်ဆီသို့ လျှောက်လှမ်းလာနေသည်။

ရောက်လာသူမှာ သေချာပေါက် ချန်ချီဝမ် ဖြစ်သည်။

တစ်ဖက်လူက ကြည့်ရသည်မှာ အနည်းငယ် ရင့်ကျက်ပုံရပြီး အကြည့်များက ခိုင်မာပြတ်သားလှသည်။

ချန်ချီဝမ်က ကျန်းမန်၏ အနားသို့ ရောက်လာပြီး မေးလိုက်သည်။

"ကျန်းမန် မင်း ငါနဲ့ ဘယ်နေရာမှာ ယှဉ်ပြိုင်တိုက်ခိုက်ချင်လဲ"

ကျန်းမန်က အပြင်ဘက်သို့ လက်ညှိုးထိုးပြရင်း ပြောလိုက်သည်။

"ဟိုဘက်မှာပဲ လုပ်ကြစို့ ဒီနေရာက ကွင်းပြင်က မသေးပါဘူး"

ချန်ချီဝမ်က ကွင်းပြင်သို့ လျှောက်သွားပြီး ကျန်းမန်ကို လှည့်ကြည့်ကာ မေးလိုက်သည်။

"မင်း ဘာပြောစရာ ရှိသေးလဲ"

နောက်မှ လိုက်လာသော ကျန်းမန်က အနည်းငယ် စဉ်းစားပြီးနောက် မေးလိုက်သည်။

"မေးခွန်းတစ်ခုပဲ ရှိတယ် မင်းက ဘယ်သူ့လူလဲ"

သူက ချန်ယွီ၏ လူ ဟုတ်မဟုတ်ကို တိုက်ရိုက် မေးမြန်းချင်သော်လည်း

အနည်းငယ် ရုတ်တရက် ဆန်လွန်းလှသည်။

တကယ်လို့ တစ်ဖက်လူ၏ လူသာ ဖြစ်နေမယ်ဆိုရင် နောက်ပိုင်း သုံးမည့် လှည့်ကွက်တွေက ပိုပြီးတော့တောင် လျှို့ဝှက်သွားလိမ့်မည်။

တကယ်လို့ မမေးဘူးဆိုရင် တစ်ဖက်လူက ကိုယ့်ကို ဘာမှ သတိမထားမိသေးဘူးလို့ ထင်နေမှာဖြစ်ပြီး

တစ်ခုခု လုပ်လာတဲ့ အခါမှာလည်း အမှားအယွင်း ပြဖို့ ပိုလွယ်ကူလိမ့်မည်။

ချန်ချီဝမ်က ကျန်းမန်ကို ကြည့်ကာ အလေးအနက် ပြောလိုက်သည်။

"ငါက မင်းကို ကြည့်မရရုံသက်သက်ပဲ ငါက ဒီလောက် ကြိုးစားလာခဲ့တာကို ဘာလို့ မင်းရဲ့ အဖိနှိပ်ခံရမှာလဲ"

"မင်းသာ မရှိရင် ငါက တတိယနေရာနဲ့ ဝင်ခွင့်နေရာကို ရဖို့ အခွင့်အရေး ရှိတယ်"

"အထူးသဖြင့် သခင်လေးချန်က ငါ့ကို အလေးပေးတယ်"

"ပထမနေရာ ဒုတိယနေရာတွေနဲ့ ဝင်ခွင့်နေရာတစ်ခုကို လုယူဖို့ လုံးဝ အရည်အချင်း ရှိတယ်"

"အခုတော့ မင်း ရောက်လာပြီ"

"မင်းက ငါ့ရဲ့ အရာအားလုံးကို ဖျက်ဆီးပစ်လိုက်တာ"

ကျန်းမန်က တစ်ဖက်လူကို ကြည့်ကာ အဓိပ္ပာယ်မရှိတာတွေ လျှောက်ပြောနေသည်ဟု ခံစားလိုက်ရသည်။

ဝင်ခွင့်နေရာအတွက်ဆိုရုံနဲ့ ကိုယ့်ကို ဘယ်လိုလုပ် တိုက်ရိုက် လာတိုက်ခိုက်ရဲမှာလဲ

ဒါကြောင့် သူ ထပ်ပြီး မမေးတော့ဘဲ ရှေ့တစ်လှမ်း တိုးကာ ပြောလိုက်သည်။

"အဆင်သင့် ဖြစ်ပြီလား"

ချန်ချီဝမ်က နည်းနည်းမှ မကြောက်ရွံ့ဘဲ ရှေ့သို့ လျှောက်လှမ်းလာပြီး ပြောလိုက်သည်။

"မင်းက လက်တွေ့တိုက်ခိုက်မှု အားနည်းတာကို ဟန်ဆောင် ခြောက်လှန့်ချင်နေသေးတယ်"

ကျန်းမန်၏ အနားသို့ အလျင်အမြန် ကပ်လာခဲ့သည်။

သူ၏ လက်ဝါးထဲတွင် အလင်းတန်းများ ထွက်ပေါ်လာပြီး ရွှေနဂါးတစ်ကောင် ကွေ့ကောက်လှုပ်ရှားနေသလိုမျိုး ဖြစ်ပေါ်လာသည်။

နဂါးနှိမ်နင်းရေး ကျင့်စဉ် ဖြစ်သည်။

နဂါးဟိန်းသံနှင့်အတူ တိုက်ခိုက်မှုက မျက်စိရှေ့သို့ ရောက်ရှိလာခဲ့သည်။

ကျန်းမန်ကလည်း နောက်ဆုတ်မသွားဘဲ သုံးခုပေါင်းစပ် အားအင်ကို လည်ပတ်စေကာ လက်ဝါးခြောက်ကွက်ကို ထုတ်သုံးလိုက်သည်။

လက်ဝါးခြောက်ချက်ကို တစ်ချက်တည်းအဖြစ် ပေါင်းစပ်လိုက်ခြင်း ဖြစ်သည်။

ဘုန်း

အတွင်းအားများ ပါဝင်နေသော လက်ဝါးခြောက်ကွက်က ရွှေရောင်အလင်းတန်းများကို တိုက်ရိုက် ရိုက်ခွဲပစ်လိုက်ပြီး ချန်ချီဝမ်ဆီသို့ ဦးတည်သွားသည်။

တစ်ဖက်လူ အနည်းငယ် အံ့ဩသွားသည်။

မူလက တစ်ဖက်လူ၏ အစွမ်းအစ အတိမ်အနက်ကို အရင် စမ်းသပ်ကြည့်ချင်သော်လည်း

စတိုက်ချင်းမှာတင် လက်ဝါးခြောက်ချက် ပေါင်းစပ်မှုကို ထုတ်သုံးလာလိမ့်မည်ဟု မမျှော်လင့်ထားခဲ့ပေ။

သူ ဘယ်အချိန်ကစပြီး လက်ဝါးခြောက်ကွက် အဆင့်ကိုးကို ရောက်သွားတာလဲ

ချန်ချီဝမ် မဝံ့မရဲ ဖြစ်မနေတော့ဘဲ အနောက်သို့ ဆုတ်ကာ ရှောင်တိမ်းလိုက်သည်။

နောက်ဆုံးတွင် တိုက်ခိုက်မှုက ကြီးမားလွန်းလှသဖြင့် ထိပ်တိုက်ရင်ဆိုင်ရန်သာ ရှိတော့သည်။

ထို့နောက် သူက လက်ဝါးခြောက်ကွက်ကို လည်ပတ်စေကာ ခုခံလိုက်သည်။

ဘုန်း

ချန်ချီဝမ် အနောက်သို့ ခြေလှမ်းအနည်းငယ် ဆုတ်သွားရပြီး လက်ဝါးက အနည်းငယ် နာကျင်သွားသည်။

မျှော်လင့်ထားသည့်အတိုင်း သုံးခုပေါင်းစပ် အားအင်ကို ထည့်သုံးထားတာပဲ။

ဒါတင်မကဘူး

ဘယ်အချိန်ကစပြီး သုံးခုပေါင်းစပ် အားအင်က အတွင်းအားကို တတ်မြောက်သွားတာလဲ

ဒီမနက် လော်ရွှမ်ဆီမှာ တမင် အားနည်းချင်ယောင် ဆောင်နေခဲ့တာလား

သူ စဉ်းစားနေဆဲမှာပင် ကျန်းမန်၏ တိုက်ခိုက်မှုက ထပ်မံ ရောက်ရှိလာခဲ့ပြီ ဖြစ်သည်။

လက်ဝါးခြောက်ချက် ပေါင်းစပ်မှုနှင့် သုံးခုပေါင်းစပ် အတွင်းအား ထပ်မံ ပါဝင်လာခြင်း ဖြစ်သည်။

ဘုန်း

ချန်ချီဝမ် အနောက်သို့ ထပ်မံ ဆုတ်ခွာသွားရသည်။

သူက အော်ပြောလိုက်သည်။

"ဒီလိုမျိုး တိုက်နေရင် မင်းရဲ့ ဝိညာဉ်စွမ်းအင်က ဘယ်လောက်အထိ တောင့်ခံနိုင်မှာလဲ"