အခန်း ၄၈

အခန်း (၄၈) ငါက ခြေတစ်လှမ်းချင်းစီ တက်ပြီး ကောင်းကင်ဘုံဆီ ရောက်အောင် သွားမှာ

ချန်ယွီက ဖန်ယုံကို ကြည့်ရင်း စိတ်ထဲတွင် အတော်လေး နှမြောမိသွားသည်။

သူမ၏ တွက်ချက်မှုအရ ကျန်းမန်နှင့် ဖန်ယုံတို့ တွေ့ဆုံပါက အရင်က ရန်ငြိုးများကြောင့် အပြင်းအထန် တိုက်ခိုက်ကြမည်ဟု ထင်မှတ်ထားခဲ့၏။

ထို့အပြင် သူတို့နှစ်ဦး၏ စွမ်းရည်မှာလည်း သိပ်မကွာခြားလှချေ။

တစ်ယောက်ယောက် ဒဏ်ရာရသွားရုံဖြင့် လုံလောက်သည်။

ချန်ချီဝမ်ကလည်း တစ်ယောက်ကို အလဲထိုးပေးနိုင်မည်။

ထိုသို့ဆိုလျှင် သူမက အလွယ်တကူ အဆင့်တက်ကာ ဝင်ခွင့်အရည်အချင်းကို ရရှိနိုင်မည် ဖြစ်၏။

ကံမကောင်းသည်မှာ ကျန်းမန်နှင့် ဖန်ယုံတို့ တိုက်ခိုက်ရာတွင် အသံကျယ်လောင်ရုံမှလွဲ၍ အားအင်ကုန်ခမ်းခြင်း အနည်းငယ်သာ ရှိပြီး မည်သည့် ဒဏ်ရာမျှ မရရှိခဲ့ကြခြင်းပင်။

သို့သော်လည်း အကြောင်းမဟုတ်ချေ။

ယခု အဆင့်တက်နိုင်မတက်နိုင် ဆိုသည်မှာ ဤပွဲစဉ်အပေါ်တွင်သာ မူတည်တော့၏။

နိုင်လျှင် ဝင်ခွင့်နေရာကို သေချာပေါက် ရရှိမည် ဖြစ်သည်။

လော်ရွှမ်က မတိုက်ခိုက်နိုင်တော့ကြောင်း လူတိုင်း မြင်သာပေသည်။

ထို့ကြောင့် သူတို့နိုင်ပါက လော်ရွှမ်၏ စိန်ခေါ်မှုကို စိုးရိမ်ရန် မလိုတော့ချေ။

ဖန်ယုံက ချန်ယွီကို အေးစက်စက် ကြည့်ကာ မေးလိုက်သည်။

"မင်းက ငါ့ကို ခြိမ်းခြောက်နေတာလား"

"ခြိမ်းခြောက်တယ်ဆိုရင်တော့ အရမ်းလွန်သွားတာပေါ့ ရှင်ရဲ့ သခင်လေးဖန် ဆိုတဲ့ နာမည်ကို တခြားသူတွေ မသိစေချင်ရင် ကျန်းမန်နဲ့ ဝင်ခွင့်နေရာကို သွားလုဖို့ စဉ်းစားသင့်တယ်လို့ အကြံပေးချင်ရုံပါ"

ချန်ယွီက စဉ်းစားပြီးနောက် ထပ်မံ ပြောဆိုလိုက်သည်။

"ကြားရတာကတော့ အဲဒီနေရာမှာ လမ်းဖောက်ဖို့တောင် ဝိညာဉ်ကျောက်တုံး မရှိဘူးဆို ဆင်းရဲသား ရွာလေးတစ်ခုကနေ ဝိညာဉ်ကျောက်တုံးတွေကို လူတစ်ယောက်တည်းက အကုန်စုပ်ယူပြီး သခင်လေး လုပ်နေတာတဲ့လေ"

ထိုသို့ပြောနေစဉ်မှာပင် ချန်ယွီက ဆေးလုံးများကို တစ်လုံးပြီးတစ်လုံး ပါးစပ်ထဲ ထည့်ကာ မျိုချလိုက်ပြီး သူမ၏ ကိုယ်ပေါ်တွင်လည်း မှော်လက်ဖွဲ့ အချို့က တောက်ပလာခဲ့သည်။

"ရှင် သေချာ စဉ်းစားကြည့်ပါ ကျွန်မကလည်း သဘောကောင်းပါတယ် ရှင် လော့ယွင်မြို့မှာ အလုပ်ကောင်းကောင်း တစ်ခု ရအောင် သေချာပေါက် ကူညီပေးပါ့မယ်"

ချန်ယွီက နောက်ဆုံး ဆေးလုံးကို မျိုချပြီး ပြောလိုက်သည်။

ထိုအချိန်တွင် သူမ၏ ကိုယ်ပေါ်ရှိ သွေးများ ပွက်ပွက်ဆူလာခဲ့သည်။

၎င်းမှာ ချန် မိသားစု၏ သွေးတိုက်ပွဲ သိုင်းပင် ဖြစ်၏။

ခန္ဓာကိုယ်၏ သွေးသားစွမ်းရည်များကို မရပ်မနား ထုတ်ဖော်ပေးနိုင်သည်။

ဖန်ယုံ၏ ကိုယ်ပေါ်တွင်လည်း တိုက်ပွဲရာချီ သိုင်းဖြစ်သော သံချပ်ကာဝတ်စုံ ဖုံးလွှမ်းသွားသည်။

သူ၏ မျက်လုံးအိမ်များ ကျဉ်းမြောင်းသွားပြီး အေးစက်သော အကြည့်များဖြင့် ပြည့်နှက်သွား၏။

ထို့နောက် သူက ခြေတစ်လှမ်း တိုးလိုက်ရာ ကိုယ်ပေါ်မှ ရွှေရောင် နဂါးဟိန်းသံများ ထွက်ပေါ်လာသည်။

အသက်တစ်ရှူအတွင်းမှာပင် တစ်ဖက်လူက ချန်ယွီ၏ အရှေ့သို့ ရောက်ရှိလာခဲ့၏။

လက်ဝါးတစ်ချက် ရိုက်ထုတ်လိုက်ရာ ရွှေရောင် နဂါးတစ်ကောင် ပါလာခဲ့သည်။

ချန်ယွီက လျှို့ဝှက်စွမ်းအားကို လည်ပတ်ကာ လက်ဝါးခြောက်ချက် ပေါင်းစပ်မှုဖြင့် တုံ့ပြန်လိုက်သည်။

ဘုန်း

ရွှေရောင် နဂါးက ပြိုကွဲသွား၏။

ထို့နောက် မှော်လက်ဖွဲ့ တစ်ခုက ဖန်ယုံ၏ လက်ဖဝါးထဲသို့ ရောက်ရှိလာသည်။

ဘုန်း

မှော်လက်ဖွဲ့က ပေါက်ကွဲသွား၏။

ဖန်ယုံ၏ လက်ဖဝါးတွင် ဝိညာဉ်စွမ်းအင်များ ဖုံးလွှမ်းသွားပြီး လက်ဝါးခြောက်ချက် ပေါင်းစပ်မှုဖြင့် ကာကွယ်လိုက်သည်။

ထိုအချိန်တွင် သူက မီးခိုးငွေ့အဖြစ် ပြောင်းလဲကာ ရှေ့သို့ တစ်လှမ်းတိုး၍ နောက်တစ်ဖက်က လက်ဝါးမှ လက်သည်းအဖြစ် ပြောင်းကာ ချန်ယွီ၏ လည်ပင်းကို ရွယ်လိုက်၏။

၎င်းကို မြင်သော် ချန်ယွီက ခြေဖျားထောက်၍ နောက်သို့ ဆုတ်ခွာလိုက်ရာ သူမ၏ ဝတ်ရုံစက လေထဲတွင် လွင့်ပျံသွားပြီး ခြေသုံးလှမ်းခန့် အကွာအဝေးသို့ ရောက်ရှိသွားကာ ခြေတစ်လှမ်း ချလိုက်ရာ ရေစီးကြမ်း သိုင်း ပေါ်ထွက်လာ၏။

မြေပြင်မှ ဆူးချွန်များ ထွက်ပေါ်လာပြီး ဖန်ယုံထံသို့ ဦးတည်သွားသည်။

မီးခိုးငွေ့တစ်ချို့ လှုပ်ရှားသွားပြီးနောက် ဖန်ယုံ ပြန်ပေါ်လာချိန်တွင် ချန်ယွီ၏ ဘေးဘက်သို့ ရောက်ရှိနေပြီ ဖြစ်၏။

သို့သော် သွေးတိုက်ပွဲ သိုင်းဖြင့် ဖုံးလွှမ်းထားသော ချန်ယွီ၏ ရေစီးကြမ်း သိုင်းက ချက်ချင်း ရောက်ရှိလာသည်။

ချန်ချီဝမ်၏ တိုက်ကွက်နှင့် တစ်ထပ်တည်းပင် ဖြစ်၏။

ဘုန်း

ထိုအချိန်တွင် ဖန်ယုံက လက်မြှောက်၍ ကာကွယ်လိုက်သော်လည်း အားကောင်းသော စွမ်းအားကြောင့် သူ၏ သွေးကြောများ ပွက်ပွက်ဆူလာပြီး သွေးအန်လုမတတ် ဖြစ်သွားရသည်။

တစ်ချိန်တည်းမှာပင် လက်ဝါးခြောက်ချက် ပေါင်းစပ်မှုကလည်း ရောက်ရှိလာခဲ့ပြီ။

လက်ဝါးတစ်ချက် ရိုက်ချလိုက်၏။

ဘုန်း

ချန်ယွီ ရှောင်တိမ်းချိန် မရလိုက်ဘဲ ပခုံးကို အထိခံလိုက်ရကာ နောက်သို့ လွင့်စင်သွားတော့သည်။

သို့သော် ဖန်ယုံက ရပ်တန့်မသွားဘဲ ချန်ယွီ၏ အရှေ့သို့ ထပ်မံ ရောက်ရှိလာပြန်သည်။

နဂါးနှိမ်နင်းရေး ကျင့်စဉ်

ဝုန်း

ချန်ယွီက မတတ်သာဘဲ ခွန်အားချင်း ယှဉ်ပြိုင်ရတော့သည်။

ထို့နောက် သူတို့နှစ်ယောက်က လျင်မြန်စွာ ပျောက်ကွယ်သွားလိုက် ပြန်ပေါ်လာလိုက် ဖြစ်နေပြီး သိုင်းပညာရပ် မျိုးစုံဖြင့် မရပ်မနား တိုက်ခိုက်နေကြ၏။

ဖန်ယုံက အနည်းငယ်မျှ ဝေးကွာသွားရန် စိတ်ကူးမရှိဘဲ မရပ်မနား ချဉ်းကပ်လာခဲ့သည်။

ဒဏ်ရာချင်း လဲလှယ်၍ တိုက်ခိုက်ခြင်းပင်။

သူမကို အလဲထိုးရန် ကြိုးစားနေ၏။

"နာမည်ပျက်သွားမှာကို နည်းနည်းလေးတောင် မစဉ်းစားဘူးလား နောက်ဆက်တွဲ အကျိုးဆက်တွေကို နည်းနည်းလေးတောင် မယုံဘူးလား"

ချန်ယွီက အသံနှိမ့်၍ ပြောလိုက်သည်။

သို့သော် ဖန်ယုံ၏ မျက်လုံးအိမ်များက ပိုမို အေးစက်လာခဲ့၏။

"မင်း နားမလည်ဘူး မင်း လုံးဝ မသိဘူး ငါ ဘယ်လို ဖြတ်သန်းလာရသလဲဆိုတာကို မင်း လုံးဝ မသိဘူး ဒါကြောင့်မို့ ငါ့ကို ဘာလို့ ခြိမ်းခြောက်လို့ မရတာလဲဆိုတာကိုလည်း မင်း နားလည်နိုင်မှာ မဟုတ်ဘူး"

သူ့ကိုယ်သူလောက် မိမိ မိသားစု၏ အခြေအနေကို မည်သူကမျှ ကောင်းစွာ မသိရှိနိုင်ချေ မိဘများက ဆင်းရဲနွမ်းပါးပြီး ရွာက လူတွေကလည်း ဝမ်းရေးအတွက် ရုန်းကန်နေရကာ အိမ်တွင်လည်း ညီလေးနှင့် ညီမလေး ရှိနေသေးသည်။

သူ ရွာမှ ထွက်ခွာလာစဉ်က ရွာတစ်ရွာလုံး၏ ဆယ်နှစ်စာ စုဆောင်းထားမှုများကို ယူဆောင်လာခဲ့ခြင်း ဖြစ်၏။

လူတိုင်းက သူ၏ အပေါ်တွင် မျှော်လင့်ချက်များ ထားရှိခဲ့ကြသည်။

သို့သော် လော့ယွင်မြို့တွင် ထိုဆယ်နှစ်စာ စုဆောင်းငွေမှာ ချမ်းသာသော မိသားစုမှ ကလေးတစ်ယောက်၏ နှစ်လစာ မုန့်ဖိုးလောက်ပင် မရှိချေ။

သူ ဘာတွေ ရင်ဆိုင်ခဲ့ရသလဲ ဆိုတာကို မည်သူကမျှ မသိခဲ့ကြပေ ထိုလူများကို အမီလိုက်နိုင်ရန် မည်မျှ ကြိုးစားခဲ့ရသလဲ ဆိုသည်ကိုလည်း မည်သူကမျှ နားမလည်ခဲ့ကြချေ။

အစပိုင်းတွင် သူက အဟောင်းဆောင်ကိုသာ သန့်ရှင်းရေး လုပ်နိုင်ခဲ့ပြီး ကံကောင်းစွာဖြင့် ထိုနေရာ၌ ကျင့်ကြံရေး ကွင်းပြင်ကို တွေ့ရှိခဲ့ရသည်။

ထိုအချိန်မှစ၍ သူသည် နေ့ရောညပါ မနားတမ်း ကျင့်ကြံကာ မိမိကိုယ်ကိုယ် မရပ်မနား တိုးတက်အောင် ကြိုးစားခဲ့၏။

ထိုအရာများကို တွေးတောလေလေ သူ၏ လက်သီးချက်များက ပိုမို ပြင်းထန်လာလေလေ ဖြစ်သည်။

သူက နှစ်ပေါင်းများစွာ ကြိုးစားခဲ့ပြီး ဝင်ခွင့်အရည်အချင်းကလည်း မျက်စိရှေ့တွင် ရောက်ရှိနေပြီဖြစ်ရာ မည်သို့လုပ်၍ ခြိမ်းခြောက်ခံရနိုင်မည်နည်း။

တကယ်လို့ ခြိမ်းခြောက်ခံရပါက ရွာ၏ ဆယ်နှစ်စာ စုဆောင်းငွေ ထိုနှစ်များတစ်လျှောက် အစောကြီးထကာ ညဉ့်နက်မှအိပ်ခဲ့ရသော ကြိုးစားအားထုတ်မှုများက ဘာအဓိပ္ပာယ် ရှိတော့မည်နည်း။

ရှုံးနိမ့်သူသာလျှင် ခြိမ်းခြောက်ခံရမည်ဖြစ်ပြီး အောင်မြင်မှုကသာ ခြိမ်းခြောက်မှု အားလုံးကို ဖြတ်တောက်နိုင်မည့် ဓားတစ်လက် ဖြစ်၏။

ထိုအခိုက်အတန့်တွင် ဖန်ယုံ၏ ယုံကြည်ချက်က အထွတ်အထိပ်သို့ ရောက်ရှိသွားပြီး သူ၏ ကိုယ်ပေါ်တွင် မျက်မြင်မရသော မီးတောက်တစ်ခု လောင်ကျွမ်းနေသကဲ့သို့ ဖြစ်လာသည်။

ချန်ယွီ၏ ကိုယ်ပေါ်တွင်လည်း မှော်လက်ဖွဲ့များ လှုပ်ရှားလာပြီး သွေးတိုက်ပွဲ သိုင်းနှင့် ပေါင်းစပ်ကာ အရာအားလုံးကို ဖျက်ဆီးပစ်ရန် ပြင်ဆင်လိုက်၏။

"ဆက်လုပ်နေရင် ရှင် နိုင်ရင်တောင် ကျွန်မနဲ့ ဒဏ်ရာချင်း လဲလှယ်ရလိမ့်မယ်"

"နောက်ဆုံးကျရင် လော်ရွှမ်ကို ရှုံးသွားပြီး ရှင် ဘာမှ ရမှာ မဟုတ်ဘူး"

"ဟုတ်လို့လား"

ဖန်ယုံ၏ အသံက ဩရှရှ ဖြစ်နေသည်။

"ငါ အသက်နဲ့ ရင်းပြီး လုယူတာတောင် မရနိုင်တာကို မင်းရဲ့ ပေးကမ်းမှုနဲ့များ ရနိုင်မယ် ထင်နေလား"

"မင်းက သွေးမိစ္ဆာ ဆေးလုံးကိုတောင် မစားရဲဘူး အသက်နဲ့လည်း မရင်းရဲဘူး မင်းက ဘာနဲ့များ ငါ့ကို လာယှဉ်မလို့လဲ"

ထိုအခိုက်အတန့်တွင် ဖန်ယုံက ချန်ယွီထံသို့ ပြေးဝင်သွားတော့သည်။

မှော်လက်ဖွဲ့များ၏ တိုက်ခိုက်မှုများကလည်း ဓားသွားများစွာအသွင်ဖြင့် ဖန်ယုံထံသို့ ဦးတည်လာ၏။

ဝုန်း

ဝုန်း

မှော်လက်ဖွဲ့များက မရပ်မနား တိုက်ခိုက်နေသော်လည်း ဖန်ယုံက လက်သီးချက်များဖြင့် တိုက်ခိုက်မှုများကို တစ်ခုပြီးတစ်ခု ဖျက်ဆီးပစ်လိုက်သည်။

သို့သော် မှော်လက်ဖွဲ့ အချို့က သူ၏ လက်မောင်း ပါးပြင်နှင့် ပခုံးတို့ကို ရှပ်ထိသွား၏။

သူက နည်းနည်းလေးတောင် မမှုခဲ့ချေ။

အမြန်ဆုံး အရှိန်ဖြင့် ရှေ့သို့သာ တိုးသွားခဲ့သည်။

သို့သော် ချန်ယွီက သိုင်းပညာရပ် မျိုးစုံကို အသုံးပြု၍ ဖန်ယုံ အနားသို့ မကပ်နိုင်အောင် တားဆီးထားသည်။

လမ်းတစ်ဝက်တွင် ဖန်ယုံ၏ ခြေလှမ်းများက ရုတ်တရက် ပြောင်းလဲသွား၏။

သူက ခြေတစ်လှမ်း တိုး၍ တိုက်ခိုက်မှုများကို ဖျက်ဆီးပစ်လိုက်ပြီး နောက်ထပ် ခြေတစ်လှမ်း တိုးကာ အရှေ့မှ လက်ဝါးသိုင်းကို ဖိနှိပ်ပစ်လိုက်သည်။

သူ၏ ခြေလှမ်းများက တစ်လှမ်းထက် တစ်လှမ်း ပိုမို လေးလံလာပြီး ပိုမို တည်ငြိမ်လာသည်။

အမြင့်ဆီသို့ ခြေတစ်လှမ်းချင်းစီ တက်နေသကဲ့သို့ပင်။

"အလကားပဲ လက်လျှော့လိုက်တော့ ရှင် အဝေးကြီး သွားနိုင်မှာ မဟုတ်ဘူး"

ချန်ယွီက အသံနှိမ့်၍ ပြောလိုက်သည်။

သို့သော် ဖန်ယုံ၏ ခြေလှမ်းများက ပိုမို ခိုင်မာလာပြီး မျက်လုံးအိမ်များထဲတွင်လည်း ရှေ့သို့ ဆက်လက် တိုးသွားမည့် ယုံကြည်ချက် တစ်ခုသာ ရှိနေတော့၏။

"ငါက အဝေးကြီး သွားနိုင်မှာပါ ငါက ခြေတစ်လှမ်းချင်းစီ ရှေ့ကို တိုးသွားမယ် ငါက ခြေတစ်လှမ်းချင်းစီ တက်ပြီး ကောင်းကင်ဘုံဆီ ရောက်အောင် သွားမှာ"

ဖန်ယုံက ခန္ဓာကိုယ်ဖြင့် ချန်ယွီ၏ တိုက်ခိုက်မှုများစွာကို တွန်းဖယ်ပစ်လိုက်သည်။

မျက်စိတစ်မှိတ်အတွင်းမှာပင် သူမ၏ အရှေ့သို့ ရောက်ရှိသွား၏။

ချန်ယွီ တုံ့ပြန်ချိန် မရလိုက်ခင်မှာပင် လက်သီးတစ်ချက် ထိုးချလိုက်သည်။

ဘုန်း

လက်သီးက ချန်ယွီ၏ မျက်နှာကို ပြင်းထန်စွာ ထိမှန်သွား၏။

ဘုန်းခနဲ အသံနှင့်အတူ ချန်ယွီ လွင့်စင်သွားတော့သည်။

နောက်ဆုံးတွင် အစီအရင် အပြင်ဘက်သို့ ပြင်းထန်စွာ ကျဆင်းသွားပြီး အကြိမ်အနည်းငယ်မျှ လိမ့်သွားခဲ့သည်။

ဖန်ယုံက တစ်ဖက်လူ လဲကျသွားသည်ကို ကြည့်ရင်း လေးလံသော ဝန်ထုတ်ဝန်ပိုးကြီးကို ချထားနိုင်လိုက်သကဲ့သို့ ခံစားလိုက်ရသည်။

စွမ်းအားများကို ထုတ်ဖော်လိုက်ရသဖြင့် သူ အနည်းငယ် အားနည်းသွားပြီး မျက်လုံးများက ဝေဝါးလာ၏။

အချိန်မရွေး သတိလစ်သွားနိုင်သော်လည်း သူ မလစ်ရဲခဲ့ချေ။

ခန္ဓာကိုယ်မှ ဒဏ်ရာများကလည်း သူ့ကို သည်းမခံနိုင်အောင် ဖြစ်စေပြီး ဝေဝါးနေသော အသိစိတ်ကြားမှ သူ အဆင့်တက်သွားပြီဆိုသည့် အသံကို ကြားလိုက်ရသည်။

သို့သော် သူ အနည်းငယ်မျှ မပေါ့ဆရဲသေးချေ။

ဤလမ်းတစ်လျှောက် မည်မျှ ခက်ခဲခဲ့သည်ကို သူက အခြားသူများထက် ပိုမို နားလည်ထားသည်။

မည်သူကမျှ သူ့ကို နားမလည်ခဲ့ကြသော်လည်း အတိတ်က သူ့ကို သိရှိခဲ့ကြပါက လက်ရှိ သူ့ကို နားလည်နိုင်ကောင်း နားလည်နိုင်ပေလိမ့်မည်။

ထိုအချိန်တွင် ဖန်ယုံက ဆေးလုံးတစ်လုံးကို ပါးစပ်ထဲ ထည့်လိုက်ပြီး မိမိနေရာသို့ ပြန်သွားကာ လော်ရွှမ်၏ စိန်ခေါ်မှုကို စောင့်ဆိုင်းနေလိုက်သည်။

ကျောက်လဲ့မင်က အနည်းငယ် အံ့ဩသွား၏။

"ဖန်ယုံက ငါ ထင်ထားတာထက် ပိုပြီး အစွမ်းထက်နေတယ်"

ဆရာဖူကလည်း ခေါင်းညိတ်လိုက်သည်။

"တကယ်ပဲ သိုင်းပညာရပ် မျိုးစုံကို ကျွမ်းကျွမ်းကျင်ကျင် ပေါင်းစပ်အသုံးပြုနိုင်တယ် ဒါတင်မကသေးဘူး သူ့ရဲ့ နောက်ဆုံး သိုင်းပညာရပ်က သာမန် မဟုတ်ဘူး ကြည့်ရတာ တကယ်ပဲ အမွေအနှစ် တစ်ခုခု ရထားတဲ့ပုံပဲ"

"သူနဲ့ လော်ရွှမ် ဘယ်သူက ဒဏ်ရာ ပိုပြင်းထန်လဲ"

ကျောက်လဲ့မင်က မေးလိုက်သည်။

"ပြောရခက်တယ် အတူတူလောက်ပါပဲ ဒါပေမယ့် လော်ရွှမ် နိုင်ဖို့ အခွင့်အရေး အရမ်းနည်းသွားပြီ"

ဆရာဖူက အနည်းငယ် စဉ်းစားပြီးနောက် ပြောလိုက်၏。

"ဖန်ယုံက အသက်နဲ့ ရင်းပြီး တိုက်နေတာ အဲဒါက ဆင်းရဲသားတွေရဲ့ အကြောက်ရဆုံး အချက်ပဲ သူတို့က တကယ်ကို အသက်ကို ပဓာနမထားကြဘူး"

"အခုခေတ် ချမ်းသာတဲ့ မိသားစုက ကလေးတွေထဲမှာ အသက်နဲ့ ရင်းပြီး တိုက်မယ့်သူက လက်ချိုးရေလို့ ရတယ်"

ကျောက်လဲ့မင်က ခေါင်းညိတ်ကာ တစ်ဖက်လူ၏ စကားကို သဘောတူလိုက်သည်။

ထို့နောက် နောက်တစ်ပွဲအတွက် ပြင်ဆင်ရန် ညွှန်ကြားလိုက်၏။

ကျန်းမန်လည်း ဖန်ယုံ၏ စွမ်းဆောင်ရည်အတွက် အံ့ဩနေမိသည်။

အထူးသဖြင့် နောက်ဆုံး သိုင်းပညာရပ်ဖြစ်သော ကောင်းကင်ဘုံသို့ တက်လှမ်းခြင်း ပင် ဖြစ်၏။

ဒါဆိုရင် ချင်းယွင် ကျင့်စဉ်ကို သူ ယူသွားတာပေါ့

တစ်ဖက်လူ၏ ဤတိုက်ပွဲက တွန်းအားချင်း တူညီနေသော်လည်း ပါရမီရှင်တစ်ယောက်၏ အငွေ့အသက်ကို ထုတ်ဖော်ပြသနိုင်ခဲ့သည်။

ကွင်းထဲတွင် ကျန်းမန်က မျက်နှာဖြူရော်နေသော လော်ရွှမ်ကို ကြည့်ကာ မေးလိုက်သည်။

"သခင်မလေးလော် ကျွန်တော်နဲ့ တိုက်ဦးမလား"