အခန်း ၆၀

အခန်း (၆၀) စာအုပ်တစ်အုပ်လုံး ဖတ်ပြီးသွားတော့ စာလုံးနှစ်လုံးတည်း တွေ့တယ်

လော်ရွှမ်က အရှေ့ရှိ လူကို ကြည့်ကာ နောက်ဆုံးတွင် ဘာမှ ထပ်မမေးတော့ချေ။

တစ်ဖက်လူသာ မဟုတ်ပါက သူမက ဝင်ခွင့်အရည်အချင်းကို ရရှိနိုင်မည် ဖြစ်၏။

အင်အားအပြည့်အဝ ရှိနေစဉ် ဖန်ယုံနှင့် ယှဉ်ပြိုင်ရပါက နိုင်နိုင်ခြေက မနည်းလှပေ။

သို့သော် ကိစ္စများက ဤအခြေအနေအထိ ရောက်ရှိနေပြီဖြစ်ရာ သူမက လက်ခံရုံသာ ရှိတော့သည်။

အားလုံးက လှည့်ကွက်များသာ ဖြစ်ပြီး သူမ ရှုံးနိမ့်သွားခြင်းသာ ဖြစ်၏။

သို့သော် အရှေ့ရှိ လူကို အပြစ်မတင်ဘူးဟု ဆိုပါက သေချာပေါက် မဖြစ်နိုင်ပေ။

လက်စားချေခြင်း...

မလိုအပ်သလို ခံစားရသည်။

အဘယ်ကြောင့်ဆိုသော် ရလဒ်ကို ပြောင်းလဲ၍ မရနိုင်တော့သောကြောင့်ပင်။

မိသားစုကို ဘာလို့ ပြဿနာ သွားရှာပေးရဦးမည်နည်း။

သူမက ခဏရပ်ပြီးနောက် မေးလိုက်၏။

"ကျန်းမန်က စာကို နင်ရေးတာဆိုတာ ဘယ်တော့မှ သိမှာလဲ"

"သိပ်မကြာတော့ပါဘူး သိပ်မကြာခင်ပေါ့ ဒါပေမယ့် အဲဒီစာကလည်း သူ့ဆီမှာ ဘာအပြောင်းအလဲမှ မဖြစ်စေခဲ့တာတော့ သိသာပါတယ်"

ချန်ယွီက ပြုံး၍ ပြောလိုက်သည်။

သူမက ခဏရပ်ပြီးနောက် ဆက်ပြောလိုက်၏။

"အခု မတ်လ ရောက်နေပြီ သြဂုတ်လ ရောက်ဖို့ အချိန်သိပ်မရှိတော့ဘူး နင် စဉ်းစားပြီးပြီလား"

"အိမ်ပါသမက် ခေါ်မှာလား၊ပေးစားတဲ့ လင်ယူမှာလား"

"သြဂုတ်လ ရောက်သွားရင် အချိန်မမီတော့ဘူးနော်"

ထိုအချိန်ရောက်လျှင် အရာအားလုံးက အတည်တကျ ဖြစ်နေပြီဖြစ်ရာ အရည်အချင်းရှိသူကို ရွေးချယ်နိုင်ရန် အခွင့်အရေး မရှိတော့ချေ။

ဂိုဏ်းထဲသို့ ဝင်ရောက်နိုင်မည်၊ မဝင်ရောက်နိုင်မည် ဆိုသည်ကလည်း ပြောင်းလဲရန် ခက်ခဲသွားပြီ ဖြစ်၏။

အရင်းအမြစ်များကို စောစော အသုံးပြုနိုင်လေ ပိုကောင်းလေ ဖြစ်သည်။

လူတစ်ယောက်ကို သိမ်းသွင်းလိုပါက အောင်မြင်စွာ သိမ်းသွင်းနိုင်ရန်အတွက် သဘာဝကျကျပင် သူ အားအနည်းဆုံး၊ အကူအညီ အလိုအပ်ဆုံး အချိန်တွင် ဖြစ်ရမည်။

"ဒုတိယအကြိမ် ယှဉ်ပြိုင်လုယူပွဲ ပြီးရင် အဆင့်သတ်မှတ်ချက်တွေ ထပ်ထွက်လာလိမ့်မယ် သူတို့ အားလုံးက အဲဒီရလဒ်ကို စောင့်ကြည့်နေလောက်တယ်"

လော်ရွှမ်က ပြောလိုက်သည်။

"ကျန်းမန်သာ အိမ်ထောင်မကျသေးဘူးဆိုရင် တကယ်ကို အသင့်တော်ဆုံးပဲ"

ချန်ယွီက နှမြောတသစွာ ပြောလိုက်၏။

လော်ရွှမ်က ခေါင်းခါပြရင်း ပြောလိုက်သည်။

"တကယ်တော့ နင် အများကြီး တွေးနေတာပါ အကြိမ်အနည်းငယ် လေ့ကျင့်ပြီးတဲ့နောက်မှာ သူက သာမန်လူတွေနဲ့ မတူဘူးဆိုတာ ငါ တွေ့ရတယ်"

"သူက သိမ်းသွင်းခံရမှာ မဟုတ်သလို အိမ်ပါသမက်လည်း လုပ်မှာ မဟုတ်ဘူး"

ချန်ယွီက ခေါင်းခါ၍ ခေါင်းမာစွာဖြင့် ပြောလိုက်၏။

"ငါ မယုံဘူး လူဆိုတာ အားနည်းချက်တော့ ရှိစမြဲပဲ ငါက သူ့ရဲ့ အားနည်းချက်ကို မရှာတွေ့သေးတာ ဒါမှမဟုတ် သူ့ရဲ့ အားနည်းချက်က ပေါ်မလာသေးတာ ဖြစ်မယ်"

"နင် သူ့ကို ပြဿနာ သွားရှာဦးမလို့လား" လော်ရွှမ် အံ့ဩသွားသည်။

"မရှာပါဘူး" ချန်ယွီက ခေါင်းခါ၍ ပြုံးရင်း ဖြေလိုက်၏။

"ငါက ဘာကောင်မို့လို့လဲ"

"ဒါဆို ဖန်ယုံကော" ချန်ယွီက ထပ်မေးလိုက်သည်။

"သူလည်း မတူပါဘူး သူက အထက်ကို တက်လှမ်းဖို့ပဲ အာရုံစိုက်နေတာ ဘယ်တော့မှ ရပ်တန့်နေမှာ မဟုတ်ဘူး သူ့မှာ ပျောက်ပျက်မသွားနိုင်တဲ့ ယုံကြည်ချက် တစ်ခု ရှိနေလောက်တယ် အိမ်ဝင်သမက် လုပ်တာက သူ့ရဲ့ ယုံကြည်ချက်နဲ့ ဆန့်ကျင်ဘက် ဖြစ်နေလောက်တယ်" လော်ရွှမ်က ဖြေလိုက်သည်။

"နင့်ရဲ့ အမြင်က သိပ်မကျယ်ဘူး ပြီးတော့ ကြိုးစားပြီး မလုယူတတ်ဘူး နင်ဒီလိုမျိုးဆိုရင် အရှုံးပေါ်လိမ့်မယ်"

ချန်ယွီက ဆက်ပြောလိုက်၏။

"အခု နင်က သခင်မလေး ဖြစ်နေတော့ ဘာမှမဖြစ်ပေမယ့် အိမ်ပါသမက်ပဲ ခေါ်ခေါ် လင်ပဲ ပေးစားစား နင်ကတော့ အရှုံးပေါ်မယ့် စရိုက်မျိုးပဲ"

လော်ရွှမ် မျက်လွှာချသွားသည်။

ဝင်ခွင့်အရည်အချင်း မရရှိခဲ့သဖြင့် သူမ၏ အနာဂတ် မျှော်လင့်ချက်များကို မမြင်ရတော့ချေ။

"နင့်ကျေးဇူးကြောင့်ပေါ့"

သူမက အေးစက်စက် ပြန်ပြောလိုက်၏။

ချန်ယွီကတော့ ရယ်မောနေသော်လည်း ပြန်မဖြေခဲ့ချေ။

————

ကျန်းမန်က ခြံဝင်းထဲတွင် တင်ပျဉ်ခွေ ထိုင်နေသည်။

ထိုရက်ပိုင်းအတွင်း သူက မရပ်မနား ကျင့်ကြံနေခဲ့၏။

ဖေဖော်ဝါရီလမှ ယခု မတ်လလယ်အထိ သူက နေ့တိုင်းနီးပါး ဆေးလုံးများကို စားနေခဲ့သည်။

သူကိုယ်တိုင် ရှာဖွေထားသည်များရော၊ ဖက်တီးလေး ပေးသည်များပါ ပါဝင်၏။

ထို့ကြောင့် သူ၏ တိုးတက်မှု အရှိန်က အလွန် မြန်ဆန်နေခဲ့သည်။

သတ္တမမြောက် ဘူးသီးခြောက်က အစပိုင်းတွင် နှစ်ဆယ်ရာခိုင်နှုန်းခန့်မှ နောက်ပိုင်း သုံးဆယ်ရာခိုင်နှုန်း၊ ငါးဆယ်ရာခိုင်နှုန်း၊ ခုနစ်ဆယ်ရာခိုင်နှုန်း အထိ ပြည့်လာခဲ့၏။

ယခုအခါ အပြည့် ဖြစ်နေပြီ ဖြစ်သည်။

တကယ်ကို ပင်ပန်းလွန်းလှပေသည်။

သုံးလနီးပါး အချိန်အတွင်း ဆေးလုံးများစွာ ကုန်ကျပြီး အပြင်းအထန် ကြိုးစားခဲ့ရမှ ချီသန့်စင်ခြင်း အဆင့်ရှစ်သို့ ခြေတစ်လှမ်း ချနိုင်ခဲ့ခြင်း ဖြစ်၏။

ခန္ဓာကိုယ် အဆင့်ကလည်း အဆင့်ငါးမှ အဆင့်ခြောက်သို့ အောင်မြင်စွာ တက်လှမ်းနိုင်ခဲ့ပြီး အပြစ်ကင်းစင်သော သွေးကြောအင်အား ဆေးလုံးများလည်း ကုန်ဆုံးသွားပြီ ဖြစ်သည်။

ထို့ကြောင့် ပိတ်ဆို့မှုကို ဖောက်ထွက်ရန် သူက စိတ်အာရုံကျင့်စဉ်ကို ရွေးချယ်လိုက်၏။

အဓိကအားဖြင့် စိတ်အာရုံကျင့်စဉ် အဆင့်ဆယ့်သုံးသို့ ရောက်ရှိနေပြီး အဆာခံနိုင်သဖြင့် ဝိညာဉ်ကျောက်တုံး ကုန်ကျစရိတ်ကို လျှော့ချနိုင်သောကြောင့်ပင်။

သာမန် စိတ်အာရုံ စုစည်းမှု ဆေးလုံး သုံးလုံးကို စားပြီးနောက် သူက စိတ်အာရုံ အဆင့်လေးသို့ အောင်မြင်စွာ ဝင်ရောက်နိုင်ခဲ့သည်။

တစ်ဝက်က စိတ်အာရုံကျင့်စဉ် အဆင့်ဆယ့်သုံး၏ ကျေးဇူးကြောင့်ပင်။

အဆင့်မြင့်လေ စိတ်အာရုံ စုစည်းမှု မြန်လေလေဖြစ်ပြီး စိတ်အာရုံ သန့်စင်မှုက ပိုမို သိသာလာလေလေ ဖြစ်၏。

ကျင့်ကြံမှု ပြီးဆုံးပြီးနောက် ကျန်းမန်က သက်ပြင်းရှည်ကြီး တစ်ချက် ချလိုက်သည်။

"ပထမအကြိမ် ယှဉ်ပြိုင်လုယူပွဲကို အခြေခံပြီး တွက်ကြည့်မယ်ဆိုရင် ဒီတစ်ခေါက်က သုံးရက်လောက် အချိန်ရသေးတယ်ဆိုတော့ သိပ်မလောပါဘူး"

ကျန်းမန်က သူ ကိုယ်တိုင် ချီသန့်စင်ခြင်း အဆင့်ရှစ်သို့ ခြေတစ်လှမ်း ချထားပြီးဖြစ်ကြောင်း ခံစားလိုက်ရပြီး တစ်ရက်နှစ်ရက်အတွင်း အောင်မြင်စွာ ဝင်ရောက်နိုင်မည်ဟု ယုံကြည်နေ၏。

ချီသန့်စင်ခြင်း အဆင့်ကိုးအတွက်မူ...

သူ့တွင် ခံစားချက် တစ်ခု ရှိနေသည်၊ ဝင်ရောက်ရန် အလွန် ခက်ခဲလိမ့်မည် ဖြစ်၏。

"ချင်းယွင်ဆောင်မှာ ချီသန့်စင်ခြင်း အဆင့်ကိုး ရှိမလား မသိဘူး"

"အဆောင်ခြောက်ဆောင်မှာတော့ ရှိဖို့ ရာခိုင်နှုန်း နည်းတယ် အထပ်သုံးထပ်မှာကတော့ သေချာပေါက် ရှိမှာပဲ"

လီယွမ်နှင့် ဖန်ထျန်းယီတို့ကို ပြန်တွေးကြည့်ပြီးနောက် ချင်းယွင်ဆောင်တွင် ချီသန့်စင်ခြင်း အဆင့်ကိုး မရှိနိုင်ဟု ကျန်းမန် ထင်မြင်မိ၏。

ချီသန့်စင်ခြင်း အဆင့်ရှစ်က အမြင့်ဆုံး ဖြစ်လောက်ပေသည်။

အနည်းဆုံး ထိပ်ဆုံး သုံးယောက်ထဲမှ နှစ်ယောက်ကတော့ မဟုတ်ချေ၊ ဖန်ထျန်းယီက ပထမလား ဒုတိယလား ဆိုသည်ကိုသာ သေချာ မသိရခြင်း ဖြစ်သည်။

မည်သို့ပင်ဆိုစေ သူက ချီသန့်စင်ခြင်း အဆင့်ရှစ်သို့ သေချာပေါက် ရောက်ရှိအောင် လုပ်ရမည်ဖြစ်ပြီး သူ လိုချင်သော သိုင်းပညာရပ်များကို ရယူရမည်။

သိုင်းပညာရပ် မရှိပါက သူက အလွန် အသာစီးမဲ့နေပြီး ထို မိသားစုကြီးများမှ ပါရမီရှင်များကို အနိုင်ယူရန် လုံလောက်သော အစွမ်းထက်သည့် သိုင်းပညာရပ်များ လိုအပ်ပေသည်။

ထိုသို့မဟုတ်ပါက ဂိုဏ်းထဲသို့ ဝင်ရောက်ရန်သာ လွယ်ကူမည် ဖြစ်၏。

ပထမနေရာဖြင့် ဝင်ရောက်ရန်မှာ မဖြစ်နိုင်သလောက်ပင်။

ငွေကြေးအင်အား ကွာခြားချက်က အလွန် ကြီးမားလွန်းလှသည်။

"အဝါကြီး ငါ ဘယ်ကနေ အစွမ်းထက်တဲ့ သိုင်းပညာရပ်တွေ ထပ်ရနိုင်မလဲ"

ကျန်းမန်က မေးလိုက်သည်။

ယခုအခါ သူ၏ ကျင့်ကြံမှုအဆင့်က ထိပ်ဆုံးသို့ ရောက်လုနီးပါး ဖြစ်နေပြီး သိုင်းပညာရပ်သာ လိုအပ်နေတော့၏。

သိုင်းပညာရပ် မရှိပါက မိမိ၏ စွမ်းရည်ကို အပြည့်အဝ ထုတ်ဖော်နိုင်မည် မဟုတ်ချေ။

"မင်းရဲ့ ကျင့်ကြံမှုအဆင့်ကို ဆက်ပြီး မြှင့်တင်လို့ ရတာပဲ မင်းရဲ့ ကျင့်ကြံမှုအဆင့်က အမြင့်ဆုံးကို ရောက်နေရင် သိုင်းပညာရပ်က ညံ့နေရင်တောင် နိုင်နိုင်ခြေက အမြင့်ဆုံးပဲ"

နွားဝါကြီးက ပြောလိုက်သည်။

ကျန်းမန် ကြောင်အမ်းသွား၏။

"ယွင်ချန်ဌာနခွဲမှာ ချီသန့်စင်ခြင်း အဆင့်ကိုး မရှိဘူးလား"

နွားဝါကြီးက မျက်ခုံးပင့်ကာ ကျန်းမန်ကို ကြည့်ရင်း မေးလိုက်သည်။

"ဘာလို့ မရှိရမှာလဲ"

"ဒါဆို ကျင့်ကြံမှုအဆင့် အမြင့်ဆုံးကို ဘယ်လို ရောက်အောင် လုပ်မလဲ"

ကျန်းမန်က မေးလိုက်၏。

"ပါရမီရှင်တွေမှာလည်း ကွာခြားချက်တွေ ရှိတယ် ချီသန့်စင်ခြင်း အဆင့်ကိုးလည်း အဲဒီလိုပဲ"

နွားဝါကြီးက တည်ငြိမ်စွာ ဖြေလိုက်သည်။

"ကျင့်ကြံမှုအဆင့် အမြင့်ဆုံး ဆိုတာက ခန္ဓာကိုယ်အဆင့် အမြင့်ဆုံးကို ပြောတာ မဟုတ်သလို စိတ်အာရုံအဆင့် အမြင့်ဆုံးကို ပြောတာလည်း မဟုတ်ဘူး"

ထိုစကားကို ကြားသော် ကျန်းမန် နားလည်သွားခဲ့၏။

ချီသန့်စင်ခြင်း အဆင့်ကိုးက ခန္ဓာကိုယ် အဆင့်ခြောက်နှင့် စိတ်အာရုံ အဆင့်သုံးကို လိုအပ်သည်။

အားလုံးကို အဆင့်ကိုးအထိ မြှင့်တင်နိုင်သူ အလွန် ရှားပါးလှသည်၊ အဘယ်ကြောင့်ဆိုသော် အချိန်မလုံလောက်သောကြောင့်ပင်။

သို့သော် သူ၏ လက်ထဲတွင် ဝိညာဉ်ကျောက်တုံးများ ရှိနေသရွေ့ အချိန်က လုံလောက်ပေသည်။

မည်သို့ပင်ဆိုစေ သူ၏ သွေးကြောအင်အား ကျင့်စဉ်က အဆင့်ကိုး၊ စိတ်အာရုံကျင့်စဉ်က အဆင့်ဆယ့်သုံး ဖြစ်နေပြီ မဟုတ်ပါလား။

ကြည့်ရသည်မှာ အာရုံစိုက်မှုကို ဤနေရာသို့ ပြောင်းလဲသင့်ပေသည်။

ထို့နောက် သူက မေးလိုက်၏။

"ဖက်တီးလေးရဲ့ ကျင့်ကြံရေး အစီအစဉ်က သိပ်အသုံးမဝင်သလိုပဲ"

"သူက မင်းလို ပါရမီရှင် ဖြစ်နေလို့လား" နွားဝါကြီးက မေးလိုက်သည်။

"မဟုတ်ဘူး"

ကျန်းမန်က ခေါင်းခါပြလိုက်၏။

"အဲဒါဆို ဘာတိုးတက်မှုမှ မရှိတာက ပုံမှန် မဟုတ်ဘူးလား"

နွားဝါကြီးက ခဏရပ်ပြီးနောက် ဆက်ပြောလိုက်သည်။

"အချိန်ကြာလာမှ သိသာလာမှာ ဒီကျင့်ကြံရေး အစီအစဉ်က အခု ဘာမှ မသိသာပေမယ့် တဖြည်းဖြည်းနဲ့ အသုံးဝင်လာလိမ့်မယ်"

"တကယ်လို့ မရဘူးဆိုရင် မင်းရဲ့ လမ်းဟောင်းအတိုင်း သွားခိုင်းလိုက် မိန်းမတစ်ယောက် ယူခိုင်းလိုက်"

ကျန်းမန် ဆွံ့အသွားရ၏။

ထားလိုက်ပါတော့၊ အသုံးဝင်ရင် ပြီးတာပါပဲ၊ ထို့ကြောင့် သူလည်း အများကြီး ဆက်မတွေးတော့ချေ။

အရင်ဆုံး ကိုယ့်ကျင့်ကြံမှုအဆင့်ကို မြှင့်တင်ရန်သာ အာရုံစိုက်လိုက်သည်။

————

ကောင်း မိသားစု အိမ်တော်။

ကောင်းချွင်ဖုန်းက ဖက်တီးလေး အမြဲဖတ်နေသော စာအုပ်ကို ယူကာ ဆံပင်ဖြူအချို့ ရှိနေသော အမျိုးသားတစ်ဦးထံ ပေးလိုက်ပြီး မေးလိုက်သည်။

"အဘိုးချန် ကြည့်ကြည့်ပါဦး ဒီဟာက အသုံးဝင်လား"

အဘိုးချန်က စာအုပ်ကို ယူ၍ ဖတ်ကြည့်လိုက်သည်၊ အစပိုင်းတွင် ဘာမှ မဖြစ်သော်လည်း ဖတ်လေလေ မျက်မှောင်ကြုတ်လာလေလေ ဖြစ်၏。

အဘယ်ကြောင့်ဆိုသော် စာအုပ်တစ်အုပ်လုံး ဖတ်ပြီးသွားသောအခါ သူ မြင်လိုက်ရသည်မှာ စာလုံးနှစ်လုံးတည်းသာ ဖြစ်သည်။

'မအိပ်နဲ့' ဆိုသည့် စာလုံးပင် ဖြစ်သည်။

သိပ်မကြာခင်မှာပင် သူက စာအုပ်ကို ပိတ်လိုက်ပြီး ပြောလိုက်၏။

"သခင်ကြီး ဒီကျင့်ကြံရေး နည်းလမ်းက နည်းနည်း..."

"ဘာဖြစ်လို့လဲ"

ကောင်းချွင်ဖုန်းက မေးလိုက်သည်။

"အစွန်းရောက်လွန်းတယ် ဒါက အသေခံတပ်သားတွေကို ကျင့်ကြံခိုင်းဖို့လား"

အဘိုးချန်က သတိထား၍ မေးလိုက်၏。

ကောင်းချွင်ဖုန်း ဆွံ့အသွားရသည်။

ဖက်တီးလေးက ရမ်းသမ်းလုပ်နေသည်ဟု သူ ချက်ချင်း ခံစားလိုက်ရ၏။

ပထမနေရာ ရတဲ့သူနောက်ကို လိုက်တာက ကောင်းပါတယ်၊ ဒါပေမယ့် သူ့ကို ဘာလို့ လာသင်ပေးခိုင်းနေတာလဲ။

သူ သတိမထားမိလိုက်ချေ၊ ဆင်းရဲသားတိုင်းက အသက်ပေးပြီး ကြိုးစားတတ်ကြသည် မဟုတ်ပါလား။

ထိုသို့ဆိုလျှင် သူ့သားနှင့် သေချာပေါက် မသင့်တော်ပေ။

သို့သော် သူက အများကြီး မပြောတော့ဘဲ ပြောလိုက်၏။

"အဘိုးချန် နည်းနည်းလောက် ပြင်ပေးပါ ဘယ်လိုလုပ်ရင် အထိရောက်ဆုံး ဖြစ်မလဲဆိုတာကို ကြည့်ပေးပါ"

"ဒါက ဘယ်သူ ကျင့်ကြံမှာလဲဆိုတဲ့ အပေါ်မှာ မူတည်တယ်"

အဘိုးချန်က ဖြေလိုက်သည်။

"ကောင်းယောင် ကို ကျင့်ကြံခိုင်းမှာ"

ကောင်းချွင်ဖုန်းက ဖြေလိုက်၏။

ဒီရက်ပိုင်းအတွင်း ပြင်ဆင်ပြီးသွားပါက ဒီစာအုပ်ကို ခိုးပြီး လဲပစ်ရမည်။

တစ်ဖက်လူက အသစ်ပေးလိုက်သည်ဟုသာ ပြောလိုက်မည် ဖြစ်၏။

သို့သော် နောက်ထပ် ကျင့်စဉ် ယှဉ်ပြိုင်လုယူပွဲ ရောက်လာတော့မည်ဖြစ်ရာ ထိုလူက တကယ်ပဲ အစွမ်းအစ ရှိမရှိ ကြည့်ရပေမည်။