အခန်း ၆၇၀

အခန်း (၆၇၀) - လွန်ခဲ့သော နှစ်ပေါင်းတစ်သောင်းခန့်က လျှို့ဝှက်ချက်နှင့် ဝတ်ရုံစိမ်း ဓားဂိုဏ်းမှ ဟန်ယုံဟွေး

ဝတ်ရုံစိမ်း ဓား ဘိုးဘေး၏ စကားများကြောင့် ယဲ့ဖုန်း၏ ရင်ထဲတွင် အံ့ဩတုန်လှုပ်မှုများ ဖြစ်ပေါ်သွား၏။ လူသူကင်းမဲ့သော ကျွန်းငယ်လေးပေါ်တွင် ရပ်တည်နေသည့် ဤပျက်စီးနေသော အမြင့်ဆုံးအဆင့် ဝိညာဉ်ရတနာမှာ အမှန်တကယ်ပင် မိစ္ဆာပိတ်လှောင်မျှော်စင်၏ မူလပုံစံငယ် ဖြစ်နေချေသည်။ ပြင်ပလောကရှိ မိစ္ဆာပိတ်လှောင်မျှော်စင်များ အားလုံးမှာ ဤအရာကို အခြေခံ၍ ဖန်တီးထားခြင်း ဖြစ်နိုင်ပါသလား။ ယဲ့ဖုန်းသည် ပိုမို သိရှိလိုသဖြင့် အခြေအနေကို မေးမြန်းလိုက်၏။

“ဂိုဏ်းချုပ် မသိသေးတာ ဖြစ်နိုင်ပါတယ်.. ဒီကိစ္စက လွန်ခဲ့တဲ့ နှစ်ပေါင်းတစ်သောင်းက ဖြစ်ပွားခဲ့တဲ့ စစ်ပွဲကြီးနဲ့ ဆက်စပ်နေလို့ပါ”

ဝတ်ရုံစိမ်း ဓား ဘိုးဘေးက တည်ကြည်လေးနက်စွာ ပြောလိုက်သည်။ ယဲ့ဖုန်းမှာ ချက်ချင်းပင် စိတ်ဝင်စားသွားကာ ဆက်ပြောရန် တိုက်တွန်းလိုက်၏။ ဝတ်ရုံစိမ်း ဓား ဘိုးဘေးသည် ခေတ္တမျှ တိတ်ဆိတ်သွားပြီးမှ စကားကို ဆက်သည်။

“ကျွန်တော်တို့ရဲ့ ရှေးဟောင်းမျိုးနွယ်စု တစ်ဆယ့်ရှစ်ခုဟာ တစ်ချိန်က တောင်ပိုင်းမြစ်ဝှမ်းနယ်မြေရဲ့ အရှင်သခင်တွေ ဖြစ်ခဲ့ဖူးပါတယ်.. အထွတ်အထိပ် ရောက်ခဲ့တဲ့ အချိန်တုန်းက ဟင်းလင်းပြင်ဖြိုခွဲအဆင့် အထွတ်အထိပ်မှာ ရှိတဲ့ ကောင်းကင်ဧကရာဇ် တစ်ဆယ့်ရှစ်ပါး ရှိခဲ့ပါတယ်.. ကြယ်စင်မြစ် တစ်ဆယ့်ရှစ်ခု ဝင်္ကပါရဲ့ အကူအညီနဲ့ အဲဒီ ကောင်းကင်ဧကရာဇ်တွေဟာ ဟင်းလင်းပြင်ဖြိုခွဲအဆင့် တစ်ခုလုံးကို သိမ်းကျုံးခြေမှုန်းနိုင်လောက်အောင် အစွမ်းထက်ခဲ့ကြတာပါ။ တစ်ခါက ပြင်ပရန်သူ ကျူးကျော်မှုကို ခုခံရင်း သူတို့ဟာ ကိုယ့်အသက်ကို စတေးပြီး တပိုင်း အဆင့် သူတော်စင် ပညာရှင် တစ်ယောက်ကိုတောင် သတ်ဖြတ်နိုင်ခဲ့ကြတယ်”

“အဲဒီအချိန်မှာပဲ မိစ္ဆာပိတ်လှောင်မျှော်စင်ရဲ့ မူလပုံစံ ပေါ်လာခဲ့တာပါ။ စစ်မှန်တဲ့ မိစ္ဆာပိတ်လှောင်မျှော်စင်က ငါးခု ရှိပါတယ်.. တစ်ခုချင်းစီဟာ အမြင့်ဆုံးအဆင့် ဝိညာဉ်ရတနာတွေ ဖြစ်ကြပြီး စုပေါင်းပြီးတော့ 'ရောင်ခြည်ငါးဖြာ မိစ္ဆာနှိမ်နင်းရေးမျှော်စင်' လို့ ခေါ်ကြပါတယ်.. အဲဒီအရာတွေဟာ တပိုင်း အဆင့် သူတော်စင် အဆင့်ရှိတဲ့ ပညာရှင်တွေကိုတောင် နှိမ်နင်းနိုင်စွမ်း ရှိကြတယ်”

“ဒီအရာဟာ အသတ်ခံလိုက်ရတဲ့ တပိုင်း အဆင့် သူတော်စင်ရဲ့ ကိုယ်ပိုင် ဝိညာဉ်ရတနာ ဖြစ်ပါတယ်.. သူ ကျဆုံးသွားတဲ့အခါ အဲဒီအရာလည်း အရှင်သခင်မဲ့ ဖြစ်သွားခဲ့ရတာပေါ့။ အဲဒီတိုက်ပွဲမှာ ရောင်ခြည်ငါးဖြာ မိစ္ဆာနှိမ်နင်းရေးမျှော်စင် သုံးခုဟာ အစိတ်စိတ်အမြွှာမြွှာ ကြေမွသွားခဲ့ပြီး နှစ်ခုကတော့ အက်ကွဲသွားခဲ့ပါတယ်.. တစ်ခုကို ကျွန်တော်တို့ မျိုးနွယ်စုက ရရှိခဲ့ပြီး ဒီနေရာမှာပဲ ရှိနေတာပါ။ နောက်ထပ် တစ်ခုကိုတော့ ရှေ့ဖြစ်ဟောမျိုးနွယ်စုက ယူဆောင်သွားခဲ့ပါတယ်”

ဤစကားကို ကြားရသောအခါ ယဲ့ဖုန်း၏ မျက်ဝန်းများ တောက်ပသွားချေသည်။ သူသည် ဝတ်ရုံစိမ်း ဓား ဘိုးဘေးကို ကြည့်ကာ မေးလိုက်၏။

“ဒါဆို ရှေ့ဖြစ်ဟောမျိုးနွယ်စုရဲ့ မိစ္ဆာပိတ်လှောင်မျှော်စင်က ဒီ ရောင်ခြည်ငါးဖြာ မိစ္ဆာနှိမ်နင်းရေးမျှော်စင်ကို အခြေခံပြီး ပုံတူကူးယူပြီး မွမ်းမံထားတာပေါ့”

ဝတ်ရုံစိမ်း ဓား ဘိုးဘေးက ခေါင်းညိတ်ကာ ထောက်ခံ၏။ ယဲ့ဖုန်းသည် မိစ္ဆာပိတ်လှောင်မျှော်စင်ကို ကြည့်ရင်း ထပ်မံ မေးမြန်းလိုက်ပြန်သည်။

“လွန်ခဲ့တဲ့ နှစ်ပေါင်းတစ်သောင်းက ရှန်ကျိုးတိုက်ကြီးကို ကျူးကျော်ခဲ့တဲ့ လျှို့ဝှက်ဆန်းကြယ်တဲ့ အင်အားစုက ဘယ်သူတွေလဲ။ အဲဒီတုန်းက စစ်ပွဲမှာ ရှေ့ဖြစ်ဟောမျိုးနွယ်စုလည်း ပါဝင်ခဲ့တာလား”

“ဒီကိစ္စက နည်းနည်းတော့ ရှုပ်ထွေးပါတယ်”

ဝတ်ရုံစိမ်း ဓား ဘိုးဘေးသည် ပျံသန်းရင်း ရှင်းပြ၏။

“လွန်ခဲ့တဲ့ နှစ်ပေါင်းတစ်သောင်းက ရှန်ကျိုးတိုက်ကြီး တစ်ခုလုံးဟာ ပြင်းထန်တဲ့ တိုက်ခိုက်မှုတွေနဲ့ ရင်ဆိုင်ခဲ့ရတာပါ။ ကြယ်တာရာ ဟင်းလင်းပြင် မျိုးနွယ်စုကြီး တစ်ရာကျော်ဟာ တစ်ပြိုင်နက်တည်း ကျူးကျော်လာခဲ့ကြတာပေါ့။ တောင်ပိုင်းမြစ်ဝှမ်းနယ်မြေကို တိုက်ခိုက်ခဲ့တဲ့ အင်အားစုကတော့ 'နတ်ဘုရားမျှော်စင် မျိုးနွယ်စု' လို့ ခေါ်ပါတယ်.. ဒီမျိုးနွယ်စုဟာလည်း ကြယ်တာရာ ဟင်းလင်းပြင် မျိုးနွယ်စုကြီးတွေထဲက တစ်ခုဖြစ်ပြီး မျှော်စင်အမျိုးမျိုးကို သွန်းလုပ်ရာမှာ ကျွမ်းကျင်တဲ့ တစ်ဆင့်ပြောင်း တပိုင်း အဆင့် သူတော်စင် တစ်ယောက် ရှိခဲ့ပါတယ်”

“ရောင်ခြည်ငါးဖြာ မိစ္ဆာနှိမ်နင်းရေးမျှော်စင် ငါးခုဟာ အဲဒီ မျိုးနွယ်စုရဲ့ အကောင်းဆုံး လက်ရာတွေပါပဲ။ အကယ်၍သာ အဲဒီမျှော်စင်တွေ မရှိခဲ့ရင် ကျွန်တော်တို့ ရှေးဟောင်းမျိုးနွယ်စုရဲ့ ဂိုဏ်းချုပ်ဟောင်းတွေဟာ အဲဒီ မျိုးနွယ်စု ခေါင်းဆောင်ရဲ့ အကာအကွယ်ကို ထိုးဖောက်ဖို့ သူတို့ရဲ့ အသက်တွေကို ရင်းရမှာ မဟုတ်ပါဘူး.. အဲဒီ တိုက်ပွဲအပြီးမှာ နတ်ဘုရားမျှော်စင် မျိုးနွယ်စုဟာလည်း မျိုးတုံး ပျောက်ကွယ်သွားခဲ့ရပါတယ်”

“အဲဒီအချိန်တုန်းက ရှေ့ဖြစ်ဟောမျိုးနွယ်စုရဲ့ တပိုင်း အဆင့် သူတော်စင်ဟာ ရှန်ကျိုးတိုက်ကြီးရဲ့ တခြားနေရာမှာ ပြင်းပြင်းထန်ထန် ဒဏ်ရာရပြီး တောင်ပိုင်းမြစ်ဝှမ်းနယ်မြေကို ထွက်ပြေးလာခဲ့တာပါ။ သူက ကျန်နေတဲ့ မိစ္ဆာပိတ်လှောင်မျှော်စင် တစ်ခုကို ယူဆောင်သွားပြီး အဲဒီမျှော်စင်ကို အခြေခံပြီးမှ နောက်ပိုင်းမှာ မိစ္ဆာပိတ်လှောင်မျှော်စင်တွေကို ဖန်တီးခဲ့တာ ဖြစ်ပါတယ်.. အဲဒီတုန်းက ရှန်ကျိုးတိုက်ကြီးရဲ့ တခြား ကြယ်ငါးပွင့် အင်အားစုတွေက တပိုင်း အဆင့် သူတော်စင်တွေ အချိန်မီ ရောက်မလာခဲ့ရင် ကျွန်တော်တို့ရဲ့ ကျန်ရစ်သူတွေဟာလည်း အဲဒီ ရှေ့ဖြစ်ဟောမျိုးနွယ်စု တပိုင်း အဆင့် သူတော်စင်ရဲ့ လက်ချက်နဲ့ သေဆုံးကုန်ကြမှာပါ”

“အဲဒီ တိုက်ပွဲအပြီးမှာ ကျွန်တော်တို့ ရှေးဟောင်းမျိုးနွယ်စု တစ်ခုလုံးဟာ မြေအောက်မှာ ပုန်းကွယ်နေခဲ့ပြီး လောကကြီး ပြန်လည် နိုးထလာမယ့် အချိန်ကို စောင့်ဆိုင်းခဲ့ကြတာပေါ့”

ဝတ်ရုံစိမ်း ဓား ဘိုးဘေးက အေးအေးဆေးဆေးပင် ရှင်းပြသွား၏။ ဤစကားများကို ကြားရမှသာ ယဲ့ဖုန်းသည် သမိုင်းကြောင်း၏ တစ်စိတ်တစ်ပိုင်းကို နားလည်သွားတော့သည်။ သူသည် မေးစေ့ကို ပွတ်ရင်း ထပ်မံ မေးလိုက်ပြန်၏။

“ဒါဆို သစ်မာလွင်ပြင်ရဲ့ မြေအောက် မိုင်တစ်ရာလောက်မှာ မြှုပ်နှံထားတဲ့ ဧရာမ ဦးခေါင်းခွံကြီး အကြောင်းကော သိလား”

သွေးကြာပန်းဂိုဏ်းချုပ်က ကြားဖြတ် ပြောလိုက်သည်။

“ရှေးဟောင်း သူတော်စင်နတ်ဘုရားကို ပြောတာလား။ အဲဒီ ဦးခေါင်းခွံဟာ ဒီနေရာမှာ ရှိနေတာ နှစ်ပေါင်း သောင်းချီ နေပါပြီ။ ရုပ်ခန္ဓာကျင့်စဉ်မှာ ထူးချွန်တဲ့ ပညာရှင်ကြီး တစ်ယောက်ရဲ့ ဦးခေါင်းခွံလို့ ယူဆရတာပေါ့။ ဒါပေမဲ့ သမိုင်းကြောင်းက အရမ်း ရှေးကျလွန်းတာကြောင့် ကျွန်တော်တို့တောင် အဲဒီအကြောင်း အများကြီး မသိပါဘူး”

“ခင်ဗျားတို့တောင် သိနေတာလား”

ယဲ့ဖုန်းမှာ အံ့ဩသွားရ၏။

ထိုအခါ.. အရိပ်နက်မိစ္ဆာဂိုဏ်းချုပ်က.. ဝင်ရောက် ရှင်းပြလာသည်။

“လွန်ခဲ့တဲ့ နှစ်ပေါင်းတစ်သောင်းက စစ်ပွဲမှာ အဲဒီ ရှေးဟောင်း သူတော်စင်နတ်ဘုရားရဲ့ ဦးခေါင်းခွံဟာ အင်အားကြီး တိုက်ခိုက်မှု တစ်ခုကို ထုတ်လွှတ်ပြီး အဝေးက လေးဆင့်ပြောင်း တပိုင်း အဆင့် သူတော်စင် တစ်ယောက်ကိုတောင် သတ်ဖြတ်ခဲ့ဖူးပါတယ်.. အဲဒီလောက်အထိ နာမည်ကြီးခဲ့တာဆိုတော့ ကျွန်တော်တို့ သိနေတာ မဆန်းပါဘူး”

ဤစကားများကို ကြားရသောအခါ ယဲ့ဖုန်းမှာ ပို၍ပင် အံ့အားသင့်သွားတော့သည်။

ဦးခေါင်းခွံ သက်သက် ကျန်ရစ်နေတာတောင်မှ ဟင်းလင်းပြင်ကို ဖြတ်ကျော်ပြီး လေးဆင့်ပြောင်း တပိုင်း အဆင့် သူတော်စင်ကို သတ်ဖြတ်နိုင်သည် ဆိုတော့ ... တကယ့်ကို ကြောက်စရာ ကောင်းလှပါသည်။ ဦးခေါင်းခွံ တစ်ခုတည်းကပင် ဤမျှ စွမ်းဆောင်နိုင်သည် ဆိုပါက ထို ရှေးဟောင်း သူတော်စင်နတ်ဘုရားသာ သူ၏ အထွတ်အထိပ် အခြေအနေသို့ ပြန်ရောက်မည် ဆိုလျှင် ထိုပုဂ္ဂိုလ်၏ ခွန်အားမှာ မည်မျှအထိ ကြောက်မက်ဖွယ် ကောင်းနေမည်နည်း။

“ဒါနဲ့ ... လွန်ခဲ့တဲ့ နှစ်ပေါင်းတစ်သောင်းက ရှန်ကျိုးတိုက်ကြီး တစ်ခုလုံး ကျူးကျော်ခံခဲ့ရတယ် ဆိုရင် ကြီးမြတ်တဲ့ မြင့်မြတ်သောနယ်မြေ ကိုးခုက ရှေးဟောင်း သူတော်စင်တွေကော ဝင်မပါကြဘူးလား”

ယဲ့ဖုန်းသည် စူးစမ်းလိုစိတ်များ ပြည့်နှက်နေ၏။

“ပါတာပေါ့။ ရှေးဟောင်း သူတော်စင်တွေဟာလည်း ပါဝင် တိုက်ခိုက်ခဲ့ကြပါတယ်.. ဒါပေမဲ့ သူတို့ရဲ့ ခွန်အားတွေက အရမ်း မြင့်မားလွန်းပါတယ်.. ရှန်ကျိုးတိုက်ကြီးရဲ့ ရှေးဟောင်း သူတော်စင်တွေဟာ အများအားဖြင့် ကြယ်တာရာ ဟင်းလင်းပြင် ရဲ့ နက်ရှိုင်းတဲ့ နေရာတွေမှာ တခြား မျိုးနွယ်စုတွေရဲ့ သူတော်စင်အဆင့် ပညာရှင်တွေကို တိုက်ခိုက်နေကြတာလေ.. အဲဒီ တိုက်ပွဲမြေပြင်ဟာ အရမ်း ဝေးကွာလွန်းတာကြောင့် ကျွန်တော်တို့ ဆက်သွယ်လို့ မရနိုင်ပါဘူး”

ထိုသို့ ဝတ်ရုံစိမ်း ဓား ဘိုးဘေးက ရှင်းပြလာ၏။

သွေးကြာပန်းဂိုဏ်းချုပ်ကလည်း ထပ်လောင်း ပြောဆိုလိုက်သည်။

“တကယ်တော့ ပုံမှန် အချိန်တွေမှာလည်း ကြယ်တာရာ ဟင်းလင်းပြင် နက်ရှိုင်းတဲ့ နေရာတွေမှာ သူတော်စင်တွေ အချင်းချင်း တိုက်ခိုက်နေကြတာတွေ အများကြီး ရှိပါတယ်.. ဒါပေမဲ့ သူတို့ဟာ ကောင်းကင်လျှို့ဝှက်ချက်တွေကို အသုံးပြုပြီး ဖုံးကွယ်ထားကြတာကြောင့် တို့တွေ.. မသိနိုင်ကြတာပါ”

“ဪ ... အဲဒီလိုကိုး”

ယဲ့ဖုန်း နားလည်သွားသကဲ့သို့ ခေါင်းညိတ်လိုက်၏။ ထိုအချိန်တွင် လူတစ်စုမှာ ပျက်စီးနေသော မိစ္ဆာပိတ်လှောင်မျှော်စင်၏ အထက်သို့ ရောက်ရှိသွားကြပြီ ဖြစ်၏။

(အမည် - ရောင်ခြည်ငါးဖြာ မိစ္ဆာနှိမ်နင်းရေးမျှော်စင်)

(အဆင့် - အမြင့်ဆုံးအဆင့် ဝိညာဉ်ရတနာ - ပျက်စီးနေသည်)

(မှတ်ချက် - နတ်ဘုရားမျှော်စင် မျိုးနွယ်စု ခေါင်းဆောင် သွန်းလုပ်ခဲ့သော ကိုယ်ပိုင် ဝိညာဉ်ရတနာ ဖြစ်ပါသည်။ မူလက မျှော်စင် ငါးခု ရှိသော်လည်း ယခုအခါ နှစ်ခုသာ ကျန်ပါတော့သည်။ ပြင်းထန်သော နှိမ်နင်းမှု စွမ်းအားကို ပိုင်ဆိုင်ထားပြီး အထွတ်အထိပ် အခြေအနေတွင် တပိုင်း အဆင့် သူတော်စင်ကိုတောင် နှိမ်နင်းနိုင်စွမ်း ရှိပါသည်)

ယဲ့ဖုန်းသည် အရာရာကို ပုံဖော်နိုင်သော မျက်လုံးမှတစ်ဆင့် အချက်အလက်များကို မြင်တွေ့လိုက်ရ၏။

“ဂိုဏ်းချုပ် ... ကျွန်တော်တို့ဟာ ဒီမျှော်စင်ကို လျှို့ဝှက်နယ်မြေ တစ်ခုအဖြစ် ပြောင်းလဲထားပါတယ်.. အဲဒီထဲမှာ နေရာရွှေ့ပြောင်းခြင်း ဝင်္ကပါ ပါဝင်ပြီး နှစ်စဉ်နှစ်တိုင်း ကျွန်တော်တို့ မျိုးနွယ်စုရဲ့ မျိုးဆက်သစ်တွေကို အဲဒီထဲမှာ စမ်းသပ်မှုတွေ လုပ်ခိုင်းလေ့ ရှိပါတယ်”

ဝတ်ရုံစိမ်း ဓား ဘိုးဘေးက ရှင်းပြလာသည်။

“အထဲကို ဝင်ကြည့်ရအောင်”

ယဲ့ဖုန်းသည် လက်ဝှေ့ယမ်းကာ မျှော်စင်တံခါး တစ်လွှာကို ဖွင့်လိုက်ပြီး အထဲသို့ ဝင်ရောက်လိုက်၏။

ထိုအခါ မျှော်စင် တစ်ထပ်ချင်းစီတိုင်းသည် မိုင်ပေါင်း ရာချီ ကျယ်ပြန့်သော ဧရာမ ကောင်းကင်ဘုံ ဂူကမ္ဘာကြီးများ ဖြစ်နေကြသည်ကို တွေ့လိုက်ရ၏။ ယဲ့ဖုန်းသည် ဉာဏ်အလင်းပွင့် နှလုံးသားကို အသက်သွင်းလိုက်သည်။ သူ၏ နက်ရှိုင်းသော သိမြင်နားလည်မှု စွမ်းအားဖြင့် မျှော်စင်အတွင်း ဖုံးကွယ်နေသော ဝင်္ကပါ အမှတ်အသားများကို စတင် ခွဲခြမ်းစိတ်ဖြာပြီး လေထဲတွင် ရွှေရောင် ဝင်္ကပါ အမှတ်အသားများကို ရေးထွင်းလေတော့သည်။

တစ်နာရီခန့် ကြာသောအခါ..

ယဲ့ဖုန်းသည် သူ၏ ရှေ့တွင် ရှိနေသော ရွှေရောင် ဝင်္ကပါကြီးကို ကြည့်လိုက်၏။ ၎င်းမှာ အလွန်ပင် ရှုပ်ထွေးပြီး ဝင်္ကပါ အမှတ်အသားပေါင်း သောင်းချီ ပါဝင်နေ၏။ ယဲ့ဖုန်းမှာ သက်ပြင်းတစ်ချက်ကို အသာအယာ ချလိုက်မိသည်။

“နောက်ဆုံးတော့ ပြီးသွားပြီ”

ဤဝင်္ကပါမှာ ‘ရောင်ခြည်ငါးဖြာ မိစ္ဆာနှိမ်နင်းရေး’ ဟု ခေါ်ဆိုပြီး ယဲ့ဖုန်းသည် ပျက်စီးနေသော မျှော်စင်အတွင်းရှိ အမှတ်အသားများကို အခြေခံ၍ ပြန်လည် တွက်ချက်ကာ ပြည့်စုံအောင် ဖန်တီးခဲ့ခြင်း ဖြစ်၏။ ဤဝင်္ကပါ မြေပုံကို အသုံးပြု၍ ရောင်ခြည်ငါးဖြာ မိစ္ဆာနှိမ်နင်းရေးမျှော်စင် အသစ်တစ်ခုကို သွန်းလုပ်နိုင်မည် ဖြစ်ချေသည်။

“ဂိုဏ်းချုပ် ... ဒါက ဒီမျှော်စင်ရဲ့ ဝင်္ကပါ မြေပုံလား”

တစ်စုံတစ်ယောက်က မေးလိုက်၏။

“မဟုတ်ဘူး ... ဒါက ပြီးပြည့်စုံတဲ့ ဝင်္ကပါ မြေပုံပဲ။ ဒီမြေပုံကို အခြေခံပြီး စစ်မှန်တဲ့ ရောင်ခြည်ငါးဖြာ မိစ္ဆာနှိမ်နင်းရေးမျှော်စင်ကို သွန်းလုပ်လို့ ရတယ်”

ယဲ့ဖုန်း၏ အဖြေစကားကြောင့် လူတိုင်း မှင်တက်သွားကြတော့သည်။ ယဲ့ဖုန်းနှင့် အခြားသူများသည် မျှော်စင်အတွင်း လှည့်လည်ကြည့်ရှုခဲ့ကြပြီး များပြားလှသော ကောင်းကင်နှင့် မြေကြီး၏ အဖိုးတန် ရတနာများနှင့် လျှို့ဝှက်နည်းစနစ်များကို တွေ့ရှိခဲ့ကြ၏။ ထိုအရာများမှာ အဆင့် မမြင့်မားလှသော်လည်း မျိုးဆက်သစ် ကျင့်ကြံသူများအတွက်မူ အလွန် သင့်တော်လှပေသည်။ မကြာမီ သူတို့ မိစ္ဆာပိတ်လှောင်မျှော်စင်အတွင်းမှ ပြန်လည် ထွက်လာခဲ့ကြ၏။

“ဝှစ် …”

ထိုအခိုက်အတန့်၌ အစိမ်းရောင် ဝတ်ရုံ တောင်တန်းနယ်မြေ၏ ပင်မကုန်းမြေ ကမ်းခြေမှ မိုင်တစ်ရာခန့် ဝေးကွာသော ပင်လယ်ပြင်ထက်တွင် ပြင်းထန်သော လှိုင်းလုံးကြီးများ ကောင်းကင်သို့ မြင့်တက်သွား၏။ ချက်ချင်းဆိုသလိုပင် ပင်လယ်နတ်ဆိုးပေါင်း သောင်းချီသည် ကုန်းမြေပေါ်သို့ စတင် ကျူးကျော် တိုက်ခိုက်လာကြတော့သည်။

“ဂိုဏ်းချုပ် ... ဒီနတ်ဆိုးတွေက ကျွန်တော် ပင်လယ်ထဲကနေ ဖမ်းလာတဲ့ ပင်လယ်မျိုးနွယ်ဝင်တွေပါ။ သူတို့ဟာ မျိုးပွားနိုင်စွမ်း အလွန် မြင့်မားကြပါတယ်.. ကုန်းမြေပေါ်က သတ္တဝါတွေကို ဖိအားပေးနိုင်ဖို့အတွက် ဒီပင်လယ်ပြင်ထဲမှာ ထားပြီး တစ်ခါတစ်ရံ တိုက်ခိုက်ခိုင်းလေ့ ရှိပါတယ်”

ဝတ်ရုံစိမ်း ဓား ဘိုးဘေးက ရှင်းပြ၏။ ယဲ့ဖုန်းက ခေါင်းညိတ်လိုက်ပြီး ကုန်းမြေဘက်သို့ လက်ညှိုးညွှန်ပြကာ ပြောလိုက်၏။

“တစ်စုံတစ်ယောက် လာနေပြီ။ အသက် သုံးဆယ်အောက် လူငယ်တွေ အုပ်စုလိုက်ကြီးပဲ ... ဟင် ... သူတို့ထဲမှာ ဝိညာဉ်ပင်လယ်အဆင့် တစ်ယောက်တောင် ပါသေးတာပဲ။ တော်တော် မဆိုးဘူး”

ကုန်းမြေပေါ်တွင်မူ..

လူငယ် ဒါဇင်ပေါင်းများစွာမှာ ဓားပျံများ.. စီးနင်းကာ ပျံသန်းလာကြ၏။ အရှေ့ဆုံးမှ ဦးဆောင်လာသူမှာ အဆင့်မြင့် ဝိညာဉ်ဓားတစ်လက်ကို စီးနင်းထားသော အစိမ်းရောင် ဝတ်ရုံဝတ် ဓားသမား တစ်ဦး ဖြစ်ပြီး ကမ်းခြေဆီသို့ အလွန် လျင်မြန်သော အရှိန်ဖြင့် ပျံသန်းလာခြင်း ဖြစ်၏။

“စီနီယာ အစ်ကိုကြီးဟန် ... ခဏလောက် ဖြည်းဖြည်းသွားပါဦး”

သူ၏ အနောက်မှ လူငယ် လေးငါးဆယ်ခန့်က လှမ်းအော်နေကြ၏။

“ပင်လယ်နတ်ဆိုးတွေ ထပ်ပြီး ပြဿနာရှာနေကြပြီ။ ငါ အမြန်ဆုံး သွားမှ ဖြစ်မယ်.. မဟုတ်ရင် သက်ရှိပေါင်းများစွာ ဒုက္ခရောက်ကုန်လိမ့်မယ်”

အစိမ်းရောင် ဝတ်ရုံဝတ် ဓားသမား ဟန်ယုံဟွေးက ပြောလိုက်ပြီးနောက် သူ၏ အမြန်နှုန်းကို တစ်ဟုန်ထိုး မြှင့်တင်လိုက်၏။ သူသည် မကြာမီ ကမ်းခြေသို့ ရောက်ရှိသွားတော့၏။

“အစိမ်းရောင် ဝတ်ရုံ တောင်တန်း ဓားသိုင်း”

ဟန်ယုံဟွေးသည် ဝိညာဉ်ပင်လယ်အဆင့် တတိယအလွှာ၏ အရှိန်အဝါများအား ထုတ်လွှတ်လိုက်ပြီး သူ၏ ဓားကို ပြင်းထန်စွာ ဝှေ့ယမ်းကာ ဓားရိပ်များ ဖန်တီးလိုက်၏။ ဓားရိပ်များ၏ အနောက်တွင် တောင်တန်းကြီးများ၏ ပုံရိပ်ယောင်များ ပါဝင်နေပြီး ကြီးမားသော ခွန်အားများကို သယ်ဆောင်လာတော့သည်။

“ဂိုဏ်းချုပ် ... သူကတော့ ဝတ်ရုံစိမ်း ဓားဂိုဏ်းရဲ့ ပြိုင်ဘက်ကင်း ပါရမီရှင် ဟန်ယုံဟွေး ပါပဲ။ ဒီလောက် ငယ်ငယ်ရွယ်ရွယ်နဲ့ ဝိညာဉ်ပင်လယ်အဆင့် တတိယအလွှာကို ရောက်နေတာပါ”

ဝတ်ရုံစိမ်း ဓား ဘိုးဘေးက ပြုံးရယ်ရင်း မိတ်ဆက်ပေးလိုက်လေ၏။

--