အခန်း ၆၇၅

အခန်း (၆၇၅) - ဂိုဏ်းတပည့်များ၏ တိုက်ခိုက်ရေးစွမ်းရည် အဆင့်သတ်မှတ်ချက်နှင့် ထိပ်တိုက်ရင်ဆိုင်မှု

“တိုက်ခိုက်ရေးစွမ်းရည် အဆင့်သတ်မှတ်ချက်ဇယား ဟုတ်လား”

တပည့်များမှာ ဤစကားကို ကြားလိုက်ရသည်နှင့် မှင်တက်သွားကြ၏။ 'နောင်ကျရင် တိုက်ခိုက်နေစရာ မလိုတော့ဘဲ ဒီဇယားကို ကြည့်လိုက်ရုံနဲ့ ဘယ်သူက သန်မာတယ်၊ ဘယ်သူက အားနည်းတယ်ဆိုတာ သိနိုင်တော့မှာပေါ့' ဟု တွေးကာ သူတို့ နားမလည်နိုင်အောင် ဖြစ်နေကြ၏။ အကယ်၍ ထိုသို့သာဆိုလျှင် လက်ရည်စမ်းခြင်းက ဘာအဓိပ္ပာယ် ရှိတော့မည်နည်း။

ဤသို့သော သံသယများဖြင့် တပည့်ပေါင်း တစ်သောင်းနီးပါးမှာ မြူခိုးတောင်ထိပ် ကောင်းကင်ယံတွင် လွင့်ပျံနေသည့် ဧရာမ ရွှေရောင်စာရင်းကြီးကို မော့ကြည့်လိုက်ကြသည်။

“စာရင်းအသစ် တစ်ခု ထပ်ထွက်လာပြန်ပြီလား”

ကုန်းချင်းချိုး အပါအဝင် အကြီးအကဲများမှာလည်း ခြေလှမ်းများကို ရပ်တန့်ကာ စောင့်ကြည့်နေကြ၏။ တိုက်ခိုက်ရေးစွမ်းရည် အဆင့်သတ်မှတ်ချက်ဇယားမှာ အလွန်ပင် ကြီးမားလှ၏။ ၎င်းမှာ ယဲ့ဖုန်း ကိုယ်တိုင် သွန်းလုပ်ထားသည့် အဆင့်နိမ့် ဝိညာဉ်ရတနာ တစ်ခု ဖြစ်၏။ စာရင်းကို ဖြန့်ချလိုက်သောအခါ အကျယ် ဆယ်မီတာနှင့် အလျား မီတာသုံးဆယ်ခန့် ရှိပြီး နေမင်းပမာ ရွှေရောင်များ တောက်ပနေ၏။ ၎င်း၏ မျက်နှာပြင်ပေါ်တွင် ရှုပ်ထွေးလှသော မှော်စာလုံးများဖြင့် ပြည့်နှက်နေပြီး အလွန်ပင် သိမ်မွေ့လှပ၏။

အထက်မှ အောက်သို့ ခရမ်းရောင်မှင်ဖြင့် အမည်ပေါင်း တစ်ရာကို ရေးထိုးထား၏။

“နံပါတ် (၁) - မိုယင်”

“နံပါတ် (၂) - ဟိုယွင်ကျဲ”

“နံပါတ် (၃) - လျန်ဝမ်ဖန်း”

“တိုက်ခိုက်ရေးစွမ်းရည် အဆင့်သတ်မှတ်ချက် ... ”

လူအုပ်ကြီးမှာ စာရင်းပေါ်ရှိ မြူခိုးဂိုဏ်း တပည့်များ၏ အမည်များကို အစဉ်လိုက် ဖတ်ရှုနေကြ၏။

“ညီမလေးမိုက နံပါတ်တစ် ဖြစ်နေတုန်းပဲ။ သူ တကယ်ကို အစွမ်းထက်တာပဲ” လီကျောက်ကျောက်သည် နံပါတ်တစ်နေရာရှိ အမည်ကို မြင်သည်နှင့် ဘေးနားရှိ မိုယင်ကို အရင်ဆုံး ဂုဏ်ပြုလိုက်၏။ သူမ၏ မျက်ဝန်းများတွင် မနာလိုမှု တစ်စက်မျှ မရှိပေ။

မိုယင်၏ ခွန်အားမှာ အလွန်ပင် ကြောက်မက်ဖွယ် ကောင်းလှသည် မဟုတ်ပါလား။ ဤအချက်ကို စီနီယာ တပည့်များ အားလုံး မျက်မြင်ကိုယ်တွေ့ သိရှိထားကြပြီး ဖြစ်၏။

“မင်းကတော့ နံပါတ်တစ် ဖြစ်နေတုန်းပဲပေါ့” ဟိုယွင်ကျဲက တိုက်ခိုက်ရေးစွမ်းရည် အဆင့်သတ်မှတ်ချက်ကို ကြည့်ရင်း မလှမ်းမကမ်းရှိ မိုယင်ကို လှမ်းကာ တိုးညှင်းစွာ ပြောလိုက်၏။

“လောလောဆယ်တော့ ဒီလိုပါပဲ” မိုယင်မှာ မာန်တက်ခြင်း မရှိပေ။

ယဲ့ဖုန်းသည် မြူခိုးတောင်ထိပ်ပေါ်တွင် လက်နှစ်ဖက်ကို နောက်ပစ်ကာ ရပ်နေ၏။ “ဒီတိုက်ခိုက်ရေးစွမ်းရည် အဆင့်သတ်မှတ်ချက်က အချိန်မရွေး ပြောင်းလဲနိုင်တယ်.. တစ်စုံတစ်ယောက်ရဲ့ ခွန်အား တိုးတက်လာတာနဲ့အမျှ စာရင်းပေါ်က နေရာတွေကလည်း လိုက်ပြီး ပြောင်းလဲသွားမှာပဲ”

“ဒီဇယားက ဘယ်လောက်အထိ မှန်ကန်သလဲဆိုတာကိုတော့ မင်းတို့ဘာသာ မင်းတို့ စမ်းသပ်ကြည့်ကြပေါ့” ယဲ့ဖုန်းက ထပ်လောင်း ပြောလိုက်၏။

စကားအဆုံးတွင် သူသည် ဂိုဏ်းချုပ်၏ မဟာခန်းမဆောင်အတွင်းသို့ ပြန်ဝင်သွားတော့သည်။

'ငါက နံပါတ် တစ်ဆယ့်ငါး ပဲလား ... ဘယ်လိုလုပ် ဖြစ်နိုင်မှာလဲ။ ငါက ရှေးဟောင်းမျိုးနွယ်စု တစ်ဆယ့်ရှစ်ခုရဲ့ လူငယ်တွေထဲမှာ အတော်ဆုံးလေ။ ဂိုဏ်းထဲမှာတော့ ထိပ်တန်း တစ်ဆယ် ထဲတောင် မဝင်ဘူးလား'

ဟန်ယုံဟွေးသည် တိုက်ခိုက်ရေးစွမ်းရည် အဆင့်သတ်မှတ်ချက်ကို ကြည့်ကာ မှင်တက်သွားရ၏။ သူသည် နံပါတ်တစ် ဖြစ်လိမ့်မည်ဟု တစ်ခါမျှ မတွေးခဲ့သော်လည်း၊ ထိပ်တန်း သုံးဦး အတွင်း မပါသည့်အပြင် ထိပ်တန်း တစ်ဆယ် အတွင်းပင် မပါဝင်သည်ကို မြင်သောအခါ အတော်လေး စိတ်ပျက်သွားမိသည်။

'နံပါတ် တစ်ဆယ့်ငါး ... ငါ့ကို အထင်သေးတာလား' ဟန်ယုံဟွေးမှာ အလွန် မကျေမနပ် ဖြစ်သွားပြီး နံပါတ် တစ်ဆယ့်လေး နေရာကို လှမ်းကြည့်လိုက်ရာ 'ရှီလေ့' ဆိုသော အမည်ကို တွေ့လိုက်ရသည်။

'စီနီယာ အစ်ကိုကြီး ရှီလေ့လား'

ဟန်ယုံဟွေး၏ အကြည့်များမှာ စူးရှသွားပြီး မြူခိုးတောင်ထိပ်၏ အစွန်းတွင် ရပ်နေသော ရှီလေ့ကို မော့ကြည့်လိုက်၏။ ဂိုဏ်းထဲတွင် ရှိနေစဉ်အတွင်း သူသည် ရှီလေ့ကို ခဏခဏ တွေ့ဖူးပြီး ဤရိုးသားဖြောင့်မတ်သော စီနီယာ အစ်ကိုကြီးအပေါ် အထင်ကြီးလေးစားမှု ရှိနေခဲ့သူ ဖြစ်၏။ ရှီလေ့သည် စိတ်သဘောထား ပြည့်ဝပြီး တပည့်များ ဒုက္ခရောက်တိုင်း အမြဲတမ်း ဦးစွာ ကူညီပေးလေ့ရှိသဖြင့် ဂိုဏ်းအတွင်း၌ နာမည်ကောင်း ရထားသူ ဖြစ်၏။

'စီနီယာ အစ်ကိုကြီးက ငါ့အထက်မှာ ရှိနေတာတော့ ငါ လက်ခံပါတယ်' ဟု ဟန်ယုံဟွေး စိတ်ထဲမှ တွေးလိုက်မိသည်။ သူ ဆက်ကြည့်လိုက်ရာ နံပါတ် တစ်ဆယ့်သုံး နေရာတွင် 'ကျားယွီလန်' ကို တွေ့ရပြန်သည်။

'ကျားယွီလန် ... ပထမမျိုးဆက် စီနီယာ အစ်မကြီးပေါ့။ ရေပေါ်ဖြူမြို့က ကျားမိသားစုရဲ့ သမီးဦးလို့ ကြားဖူးတယ်.. ဒါပေမဲ့ သူ့ရဲ့ တိုက်ပွဲမှတ်တမ်းတွေ သိပ်မရှိတော့ သူ့ခွန်အားကို ခန့်မှန်းရ ခက်တယ်' ဟန်ယုံဟွေး အပေါ်သို့ ဆက်ကြည့်လိုက်ပြန်သည်။

'နံပါတ် တစ်ဆယ့်နှစ် နေရာကတော့ ဒုတိယမျိုးဆက် တပည့် လီကျောက်ခွန် ... ငါ သူ့အကြောင်း သိပ်မသိဘူး.. သူက ဘာတွေ စွမ်းလို့လဲ'

သူသည် လီကျောက်ခွန်ကို စိန်ခေါ်ရန် ချက်ချင်းပင် ဆုံးဖြတ်လိုက်တော့သည်။

မြူခိုးတောင်ထိပ်ပေါ်တွင်..

လုံထျန်းရှင်းသည် စာရင်းကို ကြည့်ကာ ရယ်လိုက်၏။

“ဟားဟား ... ငါက နံပါတ် လေး ပါလား။ ကျားရှီးက ငါး၊ လျန်ဝမ်ရူက ခြောက်၊ လျန်ဝမ်ယွီက ခုနစ်၊ ဇီလင်းက ရှစ်၊ ဝမ်ဖင်းအန်းက ကိုး၊ ယန်ရူယွီက တစ်ဆယ်၊ စီနီယာ အစ်မကြီး ကျောက်ကျောက်က တစ်ဆယ့်တစ်၊ လီကျောက်ခွန်က တစ်ဆယ့်နှစ်၊ ယွီလန်က တစ်ဆယ့်သုံး၊ စီနီယာ အစ်ကိုကြီးက တစ်ဆယ့်လေး ... တကယ့်ကို မဆိုးပါဘူး”

“ငါက စီနီယာ အစ်ကိုကြီးရဲ့ အထက်မှာ ရောက်နေတာလား။ ဘယ်လိုလုပ် ဖြစ်နိုင်မှာလဲ” လီကျောက်ခွန်သည် တိုက်ခိုက်ရေးစွမ်းရည် အဆင့်သတ်မှတ်ချက်ကို ကြည့်ကာ မျက်လုံးပြူးသွားရ၏။

ရှီလေ့က လီကျောက်ခွန်၏ တောက်ပနေသော ကတုံးခေါင်းကို အသာအယာ ပုတ်ကာ ပြောလိုက်သည်။ “ကျောက်ခွန် ... မင်းက ဟောကိန်းထုတ်တဲ့နေရာမှာ ကျွမ်းကျင်တာလေ။ တိုက်ပွဲအတွင်းမှာ ရန်သူရဲ့ လှုပ်ရှားမှုတွေကို ကြိုသိနေမှတော့ ... မင်းက အားနည်းမှာ မဟုတ်ဘူးလေ။ ပြီးတော့ မင်းလည်း အခုလေးတင် ဝိညာဉ်ပင်လယ်အဆင့် တတိယအလွှာကို တက်သွားတာ မဟုတ်လား”

လီကျောက်ခွန် ခေါင်းညိတ်လိုက်သည်။ “ဟုတ်ကဲ့ ... အခုလေးတင် ထိုးဖောက်နိုင်ခဲ့တာပါ။ ပြီးခဲ့တဲ့ အပတ်က တပည့်ရမှတ် အဆင့်သတ်မှတ်ချက်မှာ အဆင့်မြင့်မြင့် ရခဲ့လို့ ဂိုဏ်းက ပေးတဲ့ ကျင့်ကြံခြင်းစွမ်းအားတွေကြောင့် အခုလို အောင်မြင်သွားတာပါ”

ခေတ္တအကြာတွင် လီကျောက်ခွန်က ဆက်ပြောလိုက်၏။ “ငါက နံပါတ် တစ်ဆယ့်နှစ် ဆိုတော့ ... ငါ့ကို ဘယ်သူမှ လာမစိန်ခေါ်ရင် ကောင်းမှာပဲ”

“ဘယ်သူကမှ အလုပ်မရှိဘဲ မင်းကို လာစိန်ခေါ်မှာ မဟုတ်ပါဘူး” ဟု 'ကျိန်စာသင့် အမြှောက်ဘုရင်' ဝမ်ဖင်းအန်းက တည်ငြိမ်စွာ ပြောလိုက်၏။

ထိုစကားကို ကြားသည်နှင့် လူတိုင်းက သူ့ကို ဝိုင်းကြည့်လိုက်ကြတော့သည်။

“အဲ ... ” ဝမ်ဖင်းအန်း သူ၏ ပါးစပ်ကို အမြန် အုပ်လိုက်မိသည်။ သူ၏ 'ကျိန်စာ' က ထပ်ပြီး အသက်ဝင်သွားပြီဖြစ်ကြောင်း သတိပြုမိသွားခြင်း ဖြစ်၏။

“ဝှစ်”

ထိုအခိုက်အတန့်၌ ဓားတစ်လက်ကို လွယ်ထားသော ခန့်ညားသည့် ပုံရိပ်တစ်ခုမှာ မြူခိုးတောင်ထိပ်သို့ ပျံသန်းလာပြီး လူတိုင်းကို လက်နှစ်ဖက် ဆုပ် နှုတ်ဆက်လိုက်၏။

“ပထမမျိုးဆက် စီနီယာ အစ်ကိုကြီး၊ အစ်မကြီးတို့ အားလုံးကို ဂါရဝပြုပါတယ်.. ကျွန်တော်က တတိယမျိုးဆက် တပည့် ဟန်ယုံဟွေး ပါ။ ဒုတိယမျိုးဆက် စီနီယာ အစ်ကိုကြီး လီကျောက်ခွန် ဆီကနေ လမ်းညွှန်မှု ခံယူချင်လို့ လာခဲ့တာပါ”

ဟန်ယုံဟွေး၏ အသံမှာ တည်ငြိမ်လှသော်လည်း သူ၏ မျက်ဝန်းများမှာမူ စူးရှနေတော့သည်။

မလှမ်းမကမ်းတွင် ဖြစ်သည်။

ဝတ်ရုံစိမ်း ဓား ဘိုးဘေးသည် သွေးကြာပန်းဂိုဏ်းချုပ်နှင့် စစ်တုရင် ကစားနေ၏။ သူတို့၏ ဘေးတွင် အခြား အထွတ်အထိပ် အကြီးအကဲ အချို့လည်း ထိုင်ကာ ကြည့်နေကြ၏။

“ဟန်ယုံဟွေးက လီကျောက်ခွန်ကို စိန်ခေါ်နေတာပဲ။ ကြည့်ရတာ မင်းတို့ ဝတ်ရုံစိမ်း ဓားဂိုဏ်းရဲ့ ထိပ်တန်း ပါရမီရှင်တော့ ဒုက္ခတွေ့တော့မယ် ထင်တယ်” အရိပ်နက်မိစ္ဆာဂိုဏ်းချုပ်က ရယ်ရင်း ပြောလိုက်သည်။

“လူငယ်ဆိုတာ အခက်အခဲလေးတွေနဲ့ ကြုံဖူးမှ ... မာန်မတက်မှာပေါ့” ဟု ဝတ်ရုံစိမ်း ဓား ဘိုးဘေးက သူ၏ စစ်တုရင်ခုံကိုသာ အာရုံစိုက်ရင်း ပြောလိုက်၏။

သို့သော် သူ၏ ဝိညာဉ်အာရုံမှာမူ ဂိုဏ်းတစ်ခုလုံးကို ဖြန့်ကြကျထားပြီးသား ဖြစ်၏။ တပည့်တစ်ယောက် လေလည်သည့် အသံကိုပင် သူ ကြားနိုင်စွမ်း ရှိရာ ... ဤလက်ရည်စမ်းပွဲကိုမူ သူ လုံးဝ လွတ်သွားစေမည် မဟုတ်ပေ။

မြူခိုးတောင်ထိပ်ပေါ်တွင်..

ဟန်ယုံဟွေး၏ စိန်ခေါ်မှုကို ကြားသောအခါ လီကျောက်ခွန်သည် သူ၏ ကတုံးခေါင်းကို ပွတ်ရင်း မျက်လုံးကလည်ကလည် လုပ်နေသော ဝမ်ဖင်းအန်းကို လှမ်းကြည့်လိုက်မိသည်။

“အစ်ကိုကြီးဝမ် ... ခင်ဗျားကတော့ ... ” လီကျောက်ခွန် ဘာပြောရမှန်းပင် မသိတော့ချေ။

အခြေအနေ မဟန်တော့သည်ကို မြင်သောအခါ ဝမ်ဖင်းအန်းသည် လီကျောက်ခွန်ကို ကူညီရန်အတွက် အမြန်ပင် 'ကျိန်စာ' တိုက်လိုက်လေတော့သည်။

“အဟမ်း ... ညီလေးလီ ... ကြည့်.. တပည့် ဟန်ယုံဟွေးက တော်တော်လည်း ခန့်တယ်၊ တော်တော်လည်း မိုက်တယ်ကွ။ သူ သေချာပေါက် ခမ်းခမ်းနားနား အနိုင်ရမှာလို့ ငါ အာမခံတယ်.. မင်းကတော့ တတ်နိုင်သလောက်ပဲ ကြိုးစားပေါ့ကွာ ... သိပ်ပြီး ရုပ်မဆိုးအောင်ပဲ ရှုံးဖို့ ဆုတောင်းရမှာပဲ ... ”

ထိုစကားကို ကြားသောအခါ လီကျောက်ခွန်၏ မျက်နှာမှာ ထူးဆန်းသွားတော့သည်။ ဟန်ယုံဟွေးကမူ မျက်ခုံးပင့်သွား၏။

'ပထမမျိုးဆက် စီနီယာ အစ်ကိုကြီး ဝမ်ဖင်းအန်း တောင်မှ ဒီအဆင့်သတ်မှတ်ချက်မှာ ပြဿနာ ရှိတယ်လို့ တွေးနေတာပဲ။ မဟုတ်ရင် သူက ငါ့ကို အနိုင်ရမယ်လို့ ဘယ်ပြောပါ့မလဲ'

ဟန်ယုံဟွေးက တွေးလိုက်မိသည်။ ထိုအတွေးကြောင့်ပင် သူ၏ ယုံကြည်မှုများမှာ တစ်ဟုန်ထိုး မြင့်တက်လာတော့သည်။

သူသည် ထပ်မံ လက်နှစ်ဖက် ဆုပ်ကာ ပြောလိုက်သည်။ “စီနီယာ အစ်ကိုကြီး လီကျောက်ခွန် ... ကျွန်တော့်ကို လမ်းညွှန်ပေးဖို့ တောင်းဆိုချင်ပါတယ်”

လီကျောက်ခွန်သည် ဝမ်ဖင်းအန်းကို တစ်ချက် ကြည့်လိုက်မိသည်။ 'ကျိန်စာသင့် အမြှောက်ဘုရင်' ရဲ့ ကောင်းချီးကို ရထားမှတော့ ... သူ မျက်စိမှိတ် တိုက်ရင်တောင် အနိုင်ရမှာ သေချာနေပြီ မဟုတ်ပါလား။

ထို့ကြောင့် သူ ရှေ့သို့ တစ်လှမ်းတက်ကာ ပြောလိုက်၏။ “ညီလေးဟန်က လက်ရည်စမ်းချင်တယ်ဆိုမှတော့ ... ငါက စီနီယာ အစ်ကိုကြီး တစ်ယောက်အနေနဲ့ ဘယ်ငြင်းလို့ ဖြစ်ပါ့မလဲ”

“ဒါဆို စီနီယာ သဘောတူတယ်ပေါ့” ဟန်ယုံဟွေး၏ မျက်လုံးများ တောက်ပသွားသည်။

“ဟုတ်တယ် ... အခုပဲ တိုက်ကြတာပေါ့” လီကျောက်ခွန် ခေါင်းညိတ်လိုက်သည်။ ကျိန်စာ၏ အာနိသင် မကုန်ဆုံးမီ သူ မြန်မြန် တိုက်ချင်နေခြင်း ဖြစ်၏။

“ဒါဆိုရင်တော့ ပင်မရင်ပြင်ကို သွားကြရအောင်။ စည်းကမ်းအတိုင်းပဲ ... အကြိမ် သုံးရာ လက်ရည်စမ်းမယ်” ဟု ဟန်ယုံဟွေးက ပြုံးရင်း ပြောလိုက်သည်။

“ကောင်းပြီလေ” လီကျောက်ခွန် သဘောတူလိုက်၏။

“ဝူး”

တောင်ထိပ်ပေါ်ရှိ တပည့်များ အားလုံး အောက်သို့ ဆင်းသွားကြတော့သည်။

“ဟေ့ ... အံ့ဩစရာကြီးဟ”

“တတိယမျိုးဆက် တပည့်တွေရဲ့ အကြီးဆုံး တပည့် ဟန်ယုံဟွေးက ... ဒုတိယမျိုးဆက် တပည့် လီကျောက်ခွန်ကို စိန်ခေါ်နေတယ်ဟေ့”

“လီကျောက်ခွန်ကလည်း ဝိညာဉ်ပင်လယ်အဆင့် တတိယအလွှာပဲတဲ့.. ဟန်ယုံဟွေးနဲ့ အဆင့်တူတူပဲပေါ့”

“ဘယ်သူ နိုင်မယ် ထင်လဲ”

“အဆင့်သတ်မှတ်ချက်ဇယား အရဆိုရင်တော့ လီကျောက်ခွန်က နိုင်မှာပေါ့”

“အဲဒီလိုလည်း မဟုတ်နိုင်ပါဘူးကွာ”

သူတို့နှစ်ဦးကြားရှိ စိန်ခေါ်ပွဲ သတင်းမှာ လျင်မြန်စွာ ပျံ့နှံ့သွားတော့သည်။ မျက်တောင်တစ်ခတ်အတွင်းမှာပင် ပင်မရင်ပြင်တွင် လူထောင်ပေါင်းများစွာ ဝိုင်းအုံလာကြပြီး၊ မီတာဆယ်ဂဏန်းခန့် အကွာတွင် ရင်ဆိုင်ရပ်နေသော လီကျောက်ခွန်နှင့် ဟန်ယုံဟွေးတို့ကို စောင့်ကြည့်နေကြ၏။ သူတို့သည် အနိုင်အရှုံးကို အသည်းအသန် ငြင်းခုံနေကြ၏။

“စီနီယာ အစ်ကိုကြီးဟန် ... အနိုင်တိုက်ခဲ့ပါ”

“ငါ ထင်တာတော့ လီကျောက်ခွန် နိုင်မှာပဲ။ သူက အဆင့် (၁၂) လေ။ အဆင့် (၁၅) ဖြစ်တဲ့ ဟန်ယုံဟွေးထက် ပိုသန်မာမှာပေါ့”

“ဟွန်း ... အဆင့်ပိုမြင့်ရုံနဲ့ နိုင်မယ်လို့ ဘယ်သူပြောလဲ။ ဒီဇယားမှာ တိုက်ခိုက်ရေးစွမ်းရည် အတိအကျမှ မပါတာ.. အဆင့်ပဲ ပါတာလေ။ သူတို့နှစ်ယောက်ရဲ့ ခွန်အားက သိပ်မကွာရင် မင်း ဘယ်လို လုပ်မလဲ”

“ဟုတ်တယ် ... လီကျောက်ခွန်က အစွမ်းမပြနိုင်ဘဲ ဟန်ယုံဟွေးရဲ့ လက်ချက်နဲ့ အလွယ်တကူ ရှုံးသွားရင်ရော”

တပည့်များမှာ အုပ်စုနှစ်စု ကွဲနေကြ၏။ တစ်ဖက်က လီကျောက်ခွန်ကို ထောက်ခံပြီး ကျန်တစ်ဖက်ကမူ ဟန်ယုံဟွေးကို ထောက်ခံကာ အပြင်းအထန် ငြင်းခုံနေကြ၏။ အချို့ တပည့်များမှာမူ နေရာတွင်ပင် လက်ရည်စမ်းရန်ပင် ပြင်နေကြသေးသည်။ အကယ်၍သာ တစ်ယောက်နှင့်တစ်ယောက် ဆွဲမထားပါက ထိုနေရာမှာတင် တိုက်ပွဲကြီး စတင်နေလောက်ပြီ ဖြစ်၏။

“စီနီယာ အစ်ကိုကြီး ... ကျွန်တော် အရင် စတိုက်တော့မယ်နော်”

ခေတ္တမျှ ရင်ဆိုင်ပြီးနောက် ဟန်ယုံဟွေး အသက်ကို ပြင်းပြင်းရှူကာ ဦးစွာ တိုက်ခိုက်လိုက်၏။

“လာခဲ့စမ်းပါ” လီကျောက်ခွန်က တည်ငြိမ်စွာ ပြောလိုက်သည်။

လီကျောက်ခွန်သည် ဝမ်ဖင်းအန်း၏ ကျိန်စာ ကောင်းချီးကို ရထားသဖြင့် ယုံကြည်မှု အပြည့် ရှိနေတော့၏။ ထို့ပြင် သူသည် မိစ္ဆာချီ အမြောက်အမြားကို အသုံးပြုကာ ဤတိုက်ပွဲ၏ ရလဒ်ကိုလည်း တွက်ချက်ထားပြီး ဖြစ်သဖြင့် အသင့်ဖြစ်နေပြီပပင်။

“ဝှစ်”

ဟန်ယုံဟွေးသည် ဓားအိမ်အတွင်းမှ ဓားကို ဆွဲထုတ်လိုက်ပြီး လျင်မြန်စွာ ခုတ်ချလိုက်၏။ ထိုအခိုက်အတန့်တွင် ဓားလေတိုးသံမှာ တစ်နယ်မြေလုံးသို့ ပဲ့တင်ထပ်သွားပြီး လေထုမှာလည်း ပေါက်ကွဲထွက်မတတ် တင်းမာသွားတော့သည်။

--