အခန်း (၂၃၇၅-၂၃၇၆)
Vol. 238 Ch. 2375-2376
အခန်း (၂၃၇၅) - ငါနဲ့တွေ့ရင် မင်းတို့ကံမကောင်းဘူးပဲ
အာကာသ ဟင်းလင်းပြင် ထဲတွင် ပထမဆုံး ပြိုင်ဘက်မှာ လျင်မြန်စွာ ရောက်ရှိလာသည်။
တစ်ဖက်လူသည် ဖန့်ချန် ၏ စစ်ပွဲ မှတ်တမ်းကို ကြည့်ရှုလိုက်ရာ အနိုင် (၁)၊ အရှုံး (၀) ဖြစ်နေသည်ကို မြင်သောအခါ မနေနိုင်ဘဲ ရယ်မောလိုက်သည်။
“သွေးရွာခန်းမ ရဲ့ လူသစ် သူတော်စင် ဟုတ်လား ပထမပွဲလေးပဲ တိုက်ရသေးတာပေါ့ မင်းရဲ့ ပြိုင်ဘက်က ဘယ်သူလဲ သူကလည်း မင်းကို ခြိမ်းခြောက်ခဲ့ဦးမှာပဲ၊ မင်းက အတွင်းကမ္ဘာ ကျောက်တုံး မပေးတဲ့အပြင် သူ့ကိုပါ အနိုင်ယူခဲ့တာလား ”
“မင်းလည်း ခြိမ်းခြောက် ခံခဲ့ရတာလား”
ဖန့်ချန် က ပြုံးလျက် မေးလိုက်သည်။
ပြိုင်ဘက်၏ မျက်နှာမှာ ရုတ်ချည်းပင် တည်ကြည်လေးနက်သွားသည်။
“ဒီနိုင်ပွဲ တစ်ပွဲမှာ မင်း အနိုင်ယူခဲ့တာ တကယ်ပဲ အတွေ့အကြုံရင့် လူဟောင်း သမားတစ်ယောက်လား ”
“မင်းကော အတူတူပဲ မဟုတ်ဘူးလား ”
“ ငါတော့ မဟုတ်ဘူး။ ဒါပေမဲ့ ငါလည်း ခြိမ်းခြောက် ခံခဲ့ရတာ အမှန်ပဲ။ ဘာလို့လဲဆိုတော့ ငါတို့လို လူသစ် သူတော်စင် တွေ ဝင်လာရင် စစ်ပွဲ မှတ်တမ်းမှာ အနိုင် (၀)၊ အရှုံး (၀) ဖြစ်နေတော့ အဆင့်တူတဲ့ သူတိုင်းက ငါတို့ကို စိန်ခေါ်လို့ ရနေတာလေ။ ဒါကြောင့် ဒီက အတွေ့အကြုံရင့် သူတွေက ဒါကို အခွင့်ကောင်းယူပြီး အကျိုးအမြတ် တောင်းခံကြတာပေါ့။”
“ဒီလိုကိုး”
“မင်း အနိုင်ယူခဲ့တာ အတွေ့အကြုံရင့်သူ ဆိုတော့ ငါက မင်းရဲ့ ပြိုင်ဘက် မဖြစ်နိုင်ပါဘူး။ ခဏနေရင် ငါ အရှုံးပေးလိုက်မယ်။”
ထိုသူက ပြောသည်။
သွေးမြူခိုးများမှာ အတွင်းကမ္ဘာ နယ်မြေ နှစ်ခုအပေါ်တွင် တဖြည်းဖြည်း ပျောက်ကွယ်သွားသည်။ သို့သော် တစ်ဖက်လူသည် သူပြောသည့်အတိုင်း အရှုံးမပေးဘဲ ချက်ချင်းပင် လက်ဦးမှု ရယူ တိုက်ခိုက်လိုက်သည်။
ဘုန်း
အတွင်းကမ္ဘာ တံခါးပေါက် ကွဲအက်သွားသည်။
“အရှုံးပေးတယ်”
ပြိုင်ဘက်၏ မျက်လုံးထဲတွင် အလွန်အမင်း ထိတ်လန့်မှုများ ပြည့်နှက်သွားပြီး အော်ဟစ်လိုက်သည်။
“နောက်ကျသွားပြီ၊ ဘယ်သူက မင်းကို ငါ့ကို လိမ်ညာခိုင်းလို့လဲ။”
ဖန့်ချန် သည် လက်ကို မြှောက်ကာ လက်သီး တစ်ချက် ထိုးလိုက်သည်။
နတ်ဘုရားစွမ်းရည်မှာ ကမ္ဘာပျက်စေမည့် ရေစီးကြောင်း တစ်ခုကဲ့သို့ ပြိုင်ဘက်ကို နစ်မြုပ်သွားစေသည်။ ဝိညာဉ်ခေါ်ဆောင်သူ ပေါ်လာပြီး စကားတစ်ခွန်းမျှ မပြောဘဲ ထိုနေရာတွင် ငေးမောနေသည့် ဝိညာဉ်ကို ဆွဲခေါ်သွားသည်။
ဖန့်ချန် သည် သူ့၏ စစ်ပွဲ မှတ်တမ်းကို တစ်ချက် ကြည့်လိုက်သည်။ အနိုင် (၂)၊ အရှုံး (၀)။
“အစပျိုးဖို့ပဲ ခက်တာပါ၊ အခုတော့ အစပျိုးကောင်း နေပြီပဲ။ ဒီနေ့အတွင်းမှာတင်ပဲ အနိုင် (၃၀၀) အထိ တက်သွားအောင် လုပ်မယ်။”
ကိုးကြယ် သွေးစက်မျက်လုံး အသီး မှာ ဤနေရာသို့ လာရခြင်း၏ နောက်ဆက်တွဲ ရလဒ်သာ ဖြစ်သည်။ သူ့၏ တစ်ခုတည်းသော ရည်မှန်းချက်မှာ သူတော်စင် အဆင့်ကို ချိုးဖောက်ကျော်လွန်ရန် ဖြစ်သည်။
သာမန်ထက် ထူးခြားသော ဝိညာဉ် အားဖြည့်မှု ရှိနေသဖြင့် သွေးရွာခန်းမ ဘက်က သူ့ကို ဖိအား အလုံအလောက် ပေးနိုင်မည်ဆိုလျှင် သူတော်စင် အဆင့်ကို ကျော်လွန်နိုင်မည့် အခွင့်အရေးမှာ သာမန် သူတော်စင် များထက် များစွာ ပိုမိုများပြားနေသည်။
သူသည် ချီကွမ်းယိ နှင့် ရင်ဆိုင်ရမည့် အချိန်ကို မျှော်လင့်နေမိသည်။ ထိုသူ၏ လက်စွမ်းမှာ ရှန်ရှိုယွမ် ကဲ့သို့သော သူများထက် တကယ်ပဲ ပိုမိုသာလွန်နေသလား ဆိုသည်ကို သိချင်နေသည်။
မကြာမီပင် ဒုတိယမြောက် ပြိုင်ဘက် ပေါ်လာသည်။ ဖန့်ချန် ၏ စစ်ပွဲ မှတ်တမ်းကို မြင်သောအခါ အကြည့်များမှာ ရုတ်ချည်း တည်ကြည်သွားပြီး သံသယ အရိပ်အယောင်များ ပါဝင်လာသည်။
“ဆက်တိုက် (၂) ပွဲ နိုင်ထားတာလား”
ဖန့်ချန် သည် တစ်ဖက်လူ၏ မှတ်တမ်းကို ကြည့်လိုက်သည်။ အနိုင် (၁)၊ အရှုံး (၁)။
သူနှင့်အတူ ပွဲ (၂) ပွဲသာ ကစားရသေးသော်လည်း မှတ်တမ်းမှာ မကောင်းပေ။
“မင်းက ကံကောင်းတာပဲ၊ ဒီရောက်တာနဲ့ (၂) ပွဲ ဆက်တိုက် နိုင်ထားတယ်၊ ဒါပေမဲ့ သွေးရွာခန်းမ မှာ (၁၀) ပွဲအောက် ဆက်တိုက်နိုင်တာကတော့ အမြဲလိုလို တွေ့နေရတာပါပဲ။ ငါကတော့ မင်းလောက် ကံမကောင်းဘူး၊ အတွေ့အကြုံရင့်သူ တစ်ယောက်ရဲ့ အနိုင်ကျင့်မှုကို ခံလိုက်ရလို့၊ မဟုတ်ရင် ငါလည်း (၂) ပွဲ ဆက်တိုက်နိုင်မှာပါ။”
ထိုသူက ရယ်မော၍ ပြောသည်။
ဖန့်ချန် ပြုံးလိုက်ပြီး ဘာမှ ပြန်မပြောပေ။ သွေးမြူများ ပျောက်ကွယ်သွားသည်နှင့် သူသည် တစ်ဖက်လူ၏ အတွင်းကမ္ဘာ တံခါးပေါက်ကို လက်သီးဖြင့် ထိုးခွဲလိုက်သည်။
“ငါ အရှုံးပေးမယ်။”
ပြိုင်ဘက်မှာ အလွန် ပြတ်သားပြီး အခြား လှည့်ကွက်များ ထပ်မထုတ်တော့ပေ။
သွေးမြူများက သူ့ကို ပို့ဆောင်လိုက်ပြီးနောက် ပြိုင်ဘက်သစ် တစ်ဦး ထပ်ရောက်လာသည်။ ဖန့်ချန် (၃) ပွဲ နိုင်ထားသည်ကို မြင်သော်လည်း ဤပြိုင်ဘက်၏ အမူအရာမှာ ယခင်ကထက် ပိုမို တည်ကြည်သွားသည်။
သွေးမြူများ ပျောက်ကွယ်သွားရာ တစ်ဖက်လူက တိုက်ရိုက်ပင် ပြောသည်။
“ငါ အရှုံးပေးမယ်”
“……”
စတုတ္ထမြောက် ပြိုင်ဘက် ပေါ်လာသည်။ ဤသူမှ စ၍ သွေးရွာခန်းမ က သူ့အတွက် စီစဉ်ပေးသော ပြိုင်ဘက်များမှာ လူသစ် သူတော်စင် များ မဟုတ်တော့ပေ။ ထိုသူ၏ မှတ်တမ်းမှာ အနိုင် (၃၀)၊ အရှုံး (၂၄) ဖြစ်သည်။ သွေးစွန်းသော စစ်ပွဲ ပွဲ (၅၀) ကျော် တိုက်ခိုက်ထားသည် ဆိုတော့ ထိုနေရာတွင် ရှိနေသည်မှာ ကြာပြီဟု ခန့်မှန်းရသည်။
……
“ရှာကြည့်စမ်း၊ အဲ့ဒီလူရဲ့ အဆင့်က အခု ဘယ်မှာလဲ။”
ဂွေ့မြန် နှင့် သူငယ်ချင်း အချို့မှာ သွေးစွန်းသော စစ်ပွဲ စာရင်းဇယား ရှေ့တွင် ဖန့်ချန် ၏ အမည်ကို လိုက်ရှာနေကြသည်။
သူတို့သည် အဆုံးပိုင်းမှ စ၍ ကြည့်ရှုကြရာ ဖန့်ချန် ၏ အဆင့်ကို မကြာမီပင် တွေ့လိုက်ရသည်။ ဖန့်ချန် ၏ တိကျသော အဆင့်ကို သူတို့ မသိကြပါ၊ အဘယ်ကြောင့်ဆိုသော် 'ဝူရှီ' ဆိုသည့် အမည်ရှေ့တွင် နာမည်ပေါင်းများစွာ ရှိနေပြီး နောက်တွင်လည်း နာမည်ပေါင်းများစွာ ရှိနေသောကြောင့် ဖြစ်သည်။ သို့သော် ဤခဏတာ အတွင်းမှာပင် သူသည် ပွဲပေါင်း များစွာ ဆက်တိုက် နိုင်ထားသဖြင့် စာရင်း၏ အဆုံးဆုံး နေရာတွင် မရှိတော့သည်မှာ သေချာသည်။
“ဒီလောက်နဲ့ပဲလား”
ဂွေ့မြန် နှင့် သူငယ်ချင်းများ အချင်းချင်း ကြည့်လိုက်ကြသည်။
ရလဒ်မှာမူ ထိုအချိန်လေး အတွင်းမှာပင် ဖန့်ချန် ၏ အမည်ကို ထပ်ရှာမတွေ့တော့ပေ။ အဆင့်ပေါင်း (၁,၀၀၀) ကျော် အထိ ခုန်တက်သွားခြင်း ဖြစ်သည်။ ၎င်းမှာ ပွဲ (၁,၀၀၀) တိုက်ထားခြင်း မဟုတ်ဘဲ နိုင်နှုန်းနှင့် နိုင်ပွဲ အရေအတွက်ပေါ်တွင် တွက်ချက်ထားသော ရလဒ် ဖြစ်သည်။
ဂွေ့မြန် သည် အနီးအနားကို စိုးရိမ်စွာ ကြည့်လိုက်ရာ ရှဲ့ထူ သည်လည်း စာရင်းဇယား ရှေ့တွင် ရပ်နေပြီး တစ်စုံတစ်ယောက်ကို လိုက်ရှာနေသည်ကို မြင်လိုက်ရသည်။
……
တစ်နာရီ ကြာသွားသည်။
ဖန့်ချန် ၏ ရှေ့တွင် ပြိုင်ဘက်သစ် တစ်ဦး ရောက်လာပြန်သည်။ ထိုသူသည် အတွင်းကမ္ဘာ တံခါးပေါက် ထဲတွင် ရပ်နေရင်း အဝတ်အစားများကို စနစ်တကျ ပြန်ပြင်လိုက်သည်။ တိုက်ပွဲ တစ်ပွဲ ပြီးဆုံးသွားပုံ ရသည်။ သူက ပြုံးရွှင်စွာဖြင့် ပြောသည်။
“မင်းတို့ သွေးရွာခန်းမ က သူတော်စင် တွေက တကယ်ပဲ ခက်ခဲကြသားပဲ၊ တစ်ယောက်ချင်းစီက အသက်ကို မငဲ့ကွက်ကြဘူး။ တိုက်ပွဲ အတွေ့အကြုံ အနေနဲ့ဆိုရင် ခုနစ်ပါး ကျောင်းတော် က အနည်းငယ် အားနည်းချက် ရှိပေမဲ့ ဒါကလည်း ကျောင်းတော် ထဲက သာမန် တပည့် တွေလောက်ပဲ ရှိတာပါ။”
ဖန့်ချန် ဘာမှ ပြန်မပြောပေ။ ထိုသူမှာ နေမင်း ခုနစ်ပါး ကျောင်းတော် မှ တပည့် ဖြစ်ကြောင်း ထင်ရှားနေပြီး ဘာမျှ ဖုံးကွယ်ထားခြင်း မရှိပေ။
“ဒါပေမဲ့ ငါနဲ့ တွေ့ရင်တော့ မင်းတို့ ကံမကောင်းဘူးပဲ။ ဒီတစ်ခါ ကိုးကြယ် သွေးစက်မျက်လုံး အသီး က ငါတို့ ကောင်းကင် ငါးပါး ဘက်ကပဲ။”
တစ်ဖက်လူသည် အသက်ရှူနှုန်းကို ပြင်လိုက်ပြီး နောက်တစ်ကြိမ် ပြုံးလိုက်ကာ ဖန့်ချန် ၏ စစ်ပွဲ မှတ်တမ်းကို ပေါ့ပေါ့တန်တန် ကြည့်ရှုလိုက်သည်။
ထိုအခါ သူ၏ မျက်နှာပေါ်ရှိ အပြုံးများမှာ ရုတ်ချည်း တောင့်ခဲသွားသည်။
ချီဖုန်း နယ်မြေ၊ ဝူရှီ၊ စွမ်းအင်စုစည်းခြင်း အလယ်အဆင့်၊ အနိုင် (၁၂၀)၊ အရှုံး (၀)
“မင်း ဒါကို ဘယ်လို လုပ်လိုက်တာလဲ”
တစ်ဖက်လူမှာ မယုံနိုင်စွာ ဖြစ်သွားသည်။
ထိုကဲ့သို့သော ပြိုင်ဘက်မျိုးကို သူ ဘယ်လိုများ ကြုံတွေ့ရတာလဲ။
“ရိုးရိုးလေးပဲ၊ သွေးစွန်းတဲ့ တိုက်ပွဲ တိုက်တာလေ။”
ဖန့်ချန် ပြုံးသည်။
တစ်ပွဲနှင့် တစ်ပွဲကြား တစ်မိနစ်ခန့် ကြာမနေပါက သူ၏ အနိုင်ပွဲမှာ (၁၂၀) ထက် ပိုများနေဦးမည် ဖြစ်သည်။ ယခု သူ တွေ့နေရသော ပြိုင်ဘက် များထဲတွင် ဖန့်ချန် ကို ဖိအား တစ်စက်မျှ မပေးနိုင်သူ တစ်ယောက်မျှ မရှိပေ။ စွမ်းအား (၂၀) ရာခိုင်နှုန်းခန့် သုံးလိုက်ရုံနှင့်ပင် သူ အနိုင်ရနေသည်။
သွေးမြူခိုးများ ပျောက်ကွယ်သွားသည်။ ဖန့်ချန် သည် တစ်ဖက်လူကို အခွင့်အရေး မပေးဘဲ အရင်ဆုံး လက်ဦးမှု ရယူလိုက်သည်။ သူသည် တစ်ဖက်လူ၏ အတွင်းကမ္ဘာ တံခါးပေါက်ကို ဖျက်ဆီးလိုက်သည်။
“ငါ အရှုံးပေးမယ်”
တစ်ဖက်လူမှာ အလွန်ပင် ရိပ်မိပြီး ဖန့်ချန် အတင်း လိုက်လံ တိုက်ခိုက်မှာကို စိုးရိမ်သဖြင့် အဝေးကြီးသို့ တန်းပြေးသွားသည်။
သို့သော် ဖန့်ချန် ဆက်လက် တိုက်ခိုက်ခြင်း မပြုတော့ပေ။ သူ့ရည်ရွယ်ချက်မှာ လူသတ်ရန် မဟုတ်သောကြောင့် ဖြစ်သည်။
နောက်ထပ် တစ်နာရီကျော် ကြာသွားသည်။
ဖန့်ချန် တွေ့ရသော ပြိုင်ဘက် များသည် နောက်ဆုံးတွင် သူ့ကို ဖိအား အနည်းငယ် ပေးနိုင်လာသည်။ ဤပြိုင်ဘက် များ၏ စွမ်းရည်မှာ သူ ခုနစ်ပါး ကျောင်းတော် တွင် ကြုံတွေ့ခဲ့ရသော ပြိုင်ဘက် များ၏ စွမ်းရည်နှင့် တူညီနေသည်။
တချို့က ပိုအားကောင်းပြီး တချို့က အနည်းငယ် အားနည်းသည်။ ခြားနားချက်မှာ အလွန် မများပေ။ ငါးပါး ဘက်သို့ ပြန်ပို့လိုက်ပါက သူတို့မှာလည်း နေမင်းခုနစ်ပါး ကျောင်းတော် ထဲကို ဝင်နိုင်မည့် သူများ ဖြစ်ကြသည်။
သူတို့ထဲမှ အချို့မှာ သူနှင့် ယခင်က တိုက်ခိုက်ဖူးသည့် ပုံစံများ ဖြစ်ပြီး၊ စစ်ပွဲ နယ်မြေ ထဲတွင် မဟုတ်ဘဲ အခြားနေရာများတွင် တိုက်ခိုက်ဖူးကြသူများ ဖြစ်သည်။
အရပ်ရပ်ရှိ သွေးစွန်းသော စစ်ပွဲ စာရင်းဇယား ရှေ့တွင် သွေးရွာခန်းမ သူတော်စင် များ ပိုမို များပြားစွာ စုရုံးလာကြသည်။ သူတို့ အားလုံးမှာ ဖန့်ချန် ၏ အဆင့်ကို စောင့်ကြည့်နေကြသည်။
ထိုသူ၏ အဆင့်မှာ တဖြည်းဖြည်း မြင့်တက်လာသည်ကို တွေ့ရသည်။ နိုင်ပွဲ အရေအတွက်မှာ များများစားစား မရှိသော်လည်း ထိပ်တန်း (၁၀၀) စာရင်းဝင် ဖြစ်သွားပြီ ဖြစ်သည်။ သူ တွေ့ဆုံရသော ပြိုင်ဘက် အားလုံးမှာလည်း နိုင်ပွဲ အရေအတွက် ထောင်ဂဏန်း နှင့် အရှုံး ရာဂဏန်း ရှိသော ပုဂ္ဂိုလ်များ ဖြစ်ကြသည်။
“တကယ်ပဲ နေမင်း ခုနစ်ပါး ကျောင်းတော် က တပည့် ပဲ။”
ဂွေ့မြန် က တိုးတိုးလေး ညည်းတွားလိုက်သည်။
အခြားတစ်ဖက်တွင် ရှဲ့ထူ သည် ကူဖူ ကို ခေါ်လာပြီး တစ်စုံတစ်ခုကို အတည်ပြုရန် ကြိုးစားနေသည်။ ကူဖူ သည် စစ်ပွဲ စာရင်းဇယားကို ကြည့်ရင်း ချွေးစက် များ ပြန်သန်းနေပြီး တိုးတိုးလေး ပြောသည်။
“နာမည်တူနေတာ ဖြစ်နိုင်ပါတယ်၊ ချီဖုန်း နယ်မြေ မှာ ဝူရှီ ဆိုတဲ့ နာမည်က အများကြီး ရှိတာကိုး...”
“ဒီမှတ်တမ်းကို ကြည့်စမ်း၊ မင်းပြောတဲ့ ဝူရှီ တွေနဲ့ တူရဲ့လား”
ရှဲ့ထူ ၏ မျက်နှာမှာ မည်းမှောင်သွားပြီး ကူဖူ ကို လက်သီးဖြင့် တစ်ချက် ထိုးလိုက်သည်။ ကူဖူ ၏ မျက်နှာမှာ ရဲတွတ်သွားသော်လည်း တစ်ခွန်းမျှ ပြန်မပြောဝံ့ပေ။
“ငါ ပြောသားပဲ၊ ဒါတိုး သူ့လက်ထဲမှာ သေတာ အကြောင်းအရင်း ရှိမှာပေါ့။ ဒီကောင်က ကောင်းကင် ငါးပါး ဘက်က လာတဲ့ နေမင်း ခုနစ်ပါး ကျောင်းတော် က တပည့် သေချာတယ်။”
ရှဲ့ထူ က အေးစက်စွာ ပြောသည်။
“အတွင်းကမ္ဘာ ကျောက်တုံး (၅၀၀) လောက်နဲ့ ငါ့ကို သွားသတ်ခိုင်းတာလား မင်းကတော့ တော်တော် တော်တာပဲ ”
ကူဖူ - “……”
အခန်း (၂၃၇၆) - အရှက်မရှိလိုက်တာ
“ကူဖူ၊ ရှဲ့ထူအစ်ကိုကြီးက သတိကြီးကြီး နဲ့ စုံစမ်းပြီးမှပဲ လှုပ်ရှားတာမို့ တော်သေးတယ်၊ မဟုတ်ရင်တော့ ဒီတစ်ခါ မင်းကြောင့် ငါတို့အိမ်တောင် ပျက်လုမတတ် ဖြစ်ရတော့မယ်။”
“မြန်မြန် ရှဲ့ထူ အစ်ကိုကြီးကို စိတ်ပိုင်းဆိုင်ရာ ဆုံးရှုံးမှုအတွက် လျော်ကြေးပေးလိုက်စမ်း၊ အတွင်းကမ္ဘာ ကျောက်တုံး အနည်းဆုံး (၃၀၀) ပေး၊ မဟုတ်ရင် ဒီကိစ္စအတွက် မင်းကို အလကား ပစ်မထားဘူးနော် ”
ရှဲ့ထူ အနီးရှိ သွေးရွာခန်းမ သူတော်စင် အချို့က တစ်ယောက်ပြီး တစ်ယောက် ဝင်ပြောကြသည်။ ကူဖူ ကို ကြည့်သည့် သူတို့၏ အကြည့်များတွင် ဒေါသများ ပြည့်နှက်နေပြီး ထိုနေရာမှာတင် အပိုင်းပိုင်း အစအန ဖြစ်အောင် ဆွဲဖြဲပစ်ချင်နေကြသည်။
ကူဖူ မှာမူ ပြောစရာစကား ပျောက်ဆုံးနေရပြီဖြစ်သည်။ သူသည် စစ်ပွဲ စာရင်းဇယား ဆီသို့ မနေနိုင်ဘဲ လှည့်ကြည့်လိုက်ရာ ထိုအမည်၏ အဆင့်မှာ တစ်ဆင့် တက်သွားသည်ကို မြင်လိုက်ရသည့်အခါ ခြေထောက်များ ပျော့ခွေသွားပြီး မြေပြင်ပေါ်သို့ ဒူးထောက်ကျလုနီးပါး ဖြစ်သွားသည်။
ရှဲ့ထူ သည် ကူဖူ မတ်တပ်ပင် မရပ်နိုင်တော့သည်ကို မြင်သောအခါ သက်ပြင်းတစ်ချက် ချလိုက်သည်။
“အတွင်းကမ္ဘာ ကျောက်တုံး (၃၀၀) လည်း မလိုတော့ပါဘူး၊ (၂၀၀) ဆိုရင်ပဲ ရပါပြီ၊ ဘယ်လိုလဲ ”
ကူဖူ သည် အခြားလမ်းမရှိသဖြင့် အတွင်းကမ္ဘာ ကျောက်တုံး (၂၀၀) ကို ထုတ်ပေး၍ ရှဲ့ထူ ကို လျော်ကြေး ပေးလိုက်ရသည်။
“ဒီကိစ္စကို နောက်တစ်ခါ ထပ်မပြောနဲ့တော့၊ ဖြစ်ပျက်ခဲ့သမျှကိုလည်း မေ့ပစ်လိုက်။ ဒါတိုး ကလည်း ဟုတ်မှမဟုတ်ဘဲ၊ ဘယ်သူ့ကို သွားမထိရမှန်း မသိဘဲနဲ့ ဒီလူကို သွားပြီး စိန်ခေါ်ရသလား ”
ရှဲ့ထူ သည် ကျောက်တုံးများကို သိမ်းလိုက်ပြီး ခေါင်းကို ခါယမ်းလိုက်သည်။
“တစ်ယောက်ယောက်က နေမင်း ခုနစ်ပါး ကျောင်းတော် က တပည့် ဖြစ်နေတာကို ဘယ်သူက သိမှာလဲ၊ ချီဖုန်း နယ်မြေ ကို ဘယ်လိုလုပ် ရောက်လာတာလဲ...”
ကူဖူ မှာ ငိုရခက် ရယ်ရခက် ဖြစ်နေသည်။
မျက်စိရှိသူတိုင်း သိသာနေသည့်အတိုင်း သူသည် ကောင်းကင် ငါးပါး ဘက်မှ လာသည့် နေမင်း ခုနစ်ပါး ကျောင်းတော် တပည့် ဖြစ်ရမည်။ သွေးရွာခန်းမ သို့ ပထမဆုံး အကြိမ် ရောက်လာခြင်း ဖြစ်ပုံရသည်။ ယခုအချိန်တွင် ထိုရှင်းပြချက်ကသာလျှင် အသင့်လျော်ဆုံး ဖြစ်သည်။
အခြား စစ်ပွဲ စာရင်းဇယား တစ်ခု၏ အောက်ဘက်တွင်။
ဝမ်ဟို သည် သွေးမြူခိုး အစုအဝေး တစ်ခုနှင့်အတူ ပြန်ရောက်လာသည်။ တိုက်ပွဲ တစ်ပွဲ ပြီးဆုံးသွားပုံ ရသည်။ သူသည် အကြည့်ကို ရွှေ့လိုက်ရာ ဝမ်ယွီမုန် တို့နှစ်ဦးကို တွေ့လိုက်ရသည်။
“ဘယ်လိုလဲ အဲ့ဒီလူရဲ့ အဆင့်က အရှိန်အဟုန်နဲ့ တက်နေတုန်းလား ”
ဝမ်ဟို သည် အနီးသို့ ကပ်သွားပြီး စစ်ပွဲ စာရင်းဇယားဆီသို့ အကြည့် ရောက်သွားသည်။
ဝမ်ယွီမုန် သည် တည်ကြည်လေးနက်စွာဖြင့် ခေါင်းညိတ်သည်။
“အဆင့်တွေ ဆက်တက်နေတုန်းပဲ၊ ခုထိတော့ တစ်ပွဲမှ မရှုံးသေးဘူး။ ဝမ်ကျန်း အစ်ကိုကြီး လိုပဲ။”
ဝမ်ဟို သည် သေချာ ကြည့်ရှုလိုက်ရာ 'ဝူရှီ' ဆိုသည့် အမည်ကို နောက်ဆုံးတွင် တွေ့လိုက်ရပြီး တစ်ဖက်လူ၏ စစ်ပွဲ မှတ်တမ်းကို ကြည့်ရှုလိုက်သည်။
“ဒီတစ်ခါ ကိုးကြယ် သွေးစက်မျက်လုံး အသီး က တကယ်ပဲ လူအတော်များများကို ဆွဲဆောင်လိုက်တာပဲ။ သူက ဘယ်သူများ ဖြစ်မလဲ ထိပ်ဆုံး (၁၀) ဦးထဲက ဘယ်သူများလဲ ”
ဝမ်ယွီမုန် တို့နှစ်ဦးမှာလည်း သူပြောသည့် ထိပ်ဆုံး (၁၀) ဦးမှာ ဘယ်နေရာကို ရည်ညွှန်းမှန်း သိကြသည်။ နှစ်ဦးစလုံး ခေါင်းကို ခါယမ်းလိုက်သည်။
“ကြည့်လို့ မရဘူး။”
အစစ်အမှန် နာမည်ကို သုံးမှသာလျှင် ဘယ်သူ ဘယ်ဝါမှန်း သိနိုင်မည် ဖြစ်သည်။
“နှမြောစရာပဲ၊ ဒီကောင်က သွေးစွန်းသော စစ်ပွဲ ပွဲ (၃၀၀) ကို တိုက်ရိုက် ရွေးချယ်လိုက်ပုံပဲ။ ပထမပွဲမှာ မကြည့်မိလိုက်ဘူး၊ နောက်ပိုင်းကျတော့လည်း ဝင်ကြည့်လို့ မရတော့ဘူး။ မဟုတ်ရင် အနည်းငယ်တော့ လေ့လာနိုင်ပြီး အစ်ကိုကြီး အတွက် အကိုးအကား လုပ်လို့ ရမှာ။”
ဝမ်ဟို ၏ မျက်လုံးများတွင် နောင်တ အရိပ်အယောင်များ ပေါ်လာသည်။ သူတို့သာ အစောကတည်းက ထိုလူကို သတိထားမိခဲ့လျှင် ကောင်းမည်ဟု တွေးမိသည်။
ထိုအချိန်တွင် ဝမ်ကျန်း သည် မည်သည့်အချိန်က ရောက်လာမှန်း မသိဘဲ သူတို့နောက်တွင် ရောက်ရှိနေပြီး စစ်ပွဲ စာရင်းဇယားကို ကြည့်ရှုနေသည်။ ဝူရှီ ၏ မှတ်တမ်းမှာ မိမိနှင့် ကွာခြားမှု မရှိသည်ကို မြင်သောအခါ သူ၏ မျက်လုံးများတွင် တည်ကြည်လေးနက်မှုများ ဖြတ်ပြေးသွားသည်။
“ဒီတစ်ခါ စွမ်းအင်စုစည်းခြင်း အလယ်အဆင့် ထိပ်တန်း (၁၀) ဦး စလုံး ရောက်နေပုံရတယ်၊ သူက အဲ့ဒီထဲက တစ်ယောက်ယောက်ပဲ ဖြစ်ရမယ်။”
“အားလုံး ရောက်နေတာလား သူတို့ အားလုံးမှာ မျက်လုံး နတ်ဘုရားစွမ်းရည် တွေ ရှိကြတာလား ”
ဝမ်ဟို တို့ သုံးဦးမှာ အနည်းငယ် အံ့အားသင့်သွားသည်။
ဝမ်ကျန်း သည် ခေါင်းကို ခါယမ်းလိုက်သည်။
“အဲ့ဒီလိုတော့ မဟုတ်ဘူး။ ဒါပေမဲ့ ဒီတစ်ခါ ယှဉ်ပြိုင်မှုက အလွန် ပြင်းထန်နေတာတော့ အမှန်ပဲ။ ကိုယ့်ရဲ့ နတ်ဘုရားစွမ်းရည် ကို သွေးနိုင်သလို သန့်စင်သော အဆင့် အကန့်သက်ကို ကျော်လွန်ဖို့ အခွင့်အရေးကိုလည်း ရှာဖွေနိုင်တယ်။ 'နဂါးဖရုံသီး တစ်လုံး' နဲ့ တိုက်ခိုက်ခွင့် ရရင်လည်း ဒါဟာ ရှားပါးတဲ့ အခွင့်အရေး တစ်ခုပါပဲ။”
“အစ်ကိုကြီး၊ ဒီတစ်ခါ ယှဉ်ပြိုင်မှုက အရမ်း ပြင်းထန်ပုံရတယ်၊ ကျွန်တော်တို့ သုံးယောက်လည်း ဘာမှ ကူညီနိုင်တော့မှာ မဟုတ်ဘူး။”
ဝမ်ဟို သက်ပြင်းချလိုက်သည်။
“ပြင်းထန်တာပဲ ကောင်းတာပေါ့။”
ဝမ်ကျန်း ၏ မျက်လုံးများမှာ မှေးစင်းသွားသည်။
တစ်ချိန်တည်းမှာပင် သွေးစွန်းသော စစ်ပွဲ ထဲတွင် တိုက်ခိုက်နေသူများမှလွဲ၍ အခြား ပုဂ္ဂိုလ် အတော်များများမှာ စာရင်းဇယား ရှေ့တွင် ရပ်နေပြီး ဖန့်ချန် ဘက်မှ အခြေအနေများကို စောင့်ကြည့်နေကြသည်။ ထိုသူများမှာ ထင်ရှားခြင်း မရှိသော်လည်း သူတို့၏ စစ်ပွဲ မှတ်တမ်းများမှာ သာမန် သူတော်စင် များပင် ဝင်တိုက်ရန် မဝံ့မရဲ ဖြစ်ရလောက်အောင် အစွမ်းထက်လှသည်။
……
“မင်း တကယ်ပဲ ခုနစ်ပါး ကျောင်းတော် က တပည့် လား အနိုင် (၂၄၀)၊ အရှုံး (၀) တဲ့လား ”
ကြီးမားလှသည့် အတွင်းကမ္ဘာ တံခါးပေါက် ထဲတွင် ဝေဝါးနေသည့် ပုံရိပ်တစ်ခုမှာ ဖန့်ချန် ကို တိတ်ဆိတ်စွာ ကြည့်ရှုနေသည်။ ဖန့်ချန် သည်လည်း တစ်ဖက်လူ၏ စစ်ပွဲ မှတ်တမ်းကို ကြည့်ရှုလိုက်သည်။ အနိုင် (၂,၁၉၇)၊ အရှုံး (၈၃၁)။
ဤသူမှာ သွေးရွာခန်းမ ထဲတွင် အတွေ့အကြုံ ရင့်ကျက်နေသူ ဖြစ်ကြောင်း သိသာသည်။ နေမင်း ခုနစ်ပါး ကျောင်းတော် တပည့် ဖြစ်နိုင်ခြေမှာ များများစားစား မရှိသော်လည်း လုံးဝ မဖြစ်နိုင်ဟုတော့ မဆိုနိုင်ပေ။
“နေမင်းခုနစ်ပါး ကျောင်းတော် က တပည့် ဖြစ်၊ မဖြစ် က အဲ့လောက် အရေးကြီးလို့လား ”
ဖန့်ချန် က ပေါ့ပေါ့တန်တန် မေးလိုက်သည်။
“သာမန် သူတော်စင် တွေနဲ့ ရောနှောပြီး အခွင့်အရေး ရှာနေတာမျိုး မဟုတ်ရင် နေမင်း ခုနစ်ပါး ကျောင်းတော် မှာပဲ နေသင့်တာပေါ့။ မင်း ဒီကို လာရင်တော့ သေလမ်းပဲ ရှိတယ်။ ဒါက အရေးကြီး၊ မကြီး မင်း ကိုယ်တိုင် စဉ်းစားကြည့်လေ။”
တစ်ဖက်လူက အေးစက်စက် ရယ်မော၍ ပြောသည်။
ဖန့်ချန် ဘာမျှ ပြန်မပြောဘဲ သွေးမြူများ ပျောက်ကွယ်သွားရန် တိတ်ဆိတ်စွာ စောင့်ဆိုင်းနေသည်။ သွေးမြူများ ပျောက်ကွယ်သွားသည်နှင့် တစ်ဖက်လူမှာ ချက်ချင်းပင် လက်ဦးမှု ရယူ တိုက်ခိုက်လာပြီး ထိုလက်စွမ်းမှာ အစွမ်းကုန်ပင် ဖြစ်သည်။
“စွမ်းအားက တကယ်ကို မညံ့ဘူး၊ နေမင်း ခုနစ်ပါး ကျောင်းတော် တပည့် နဲ့ တန်းတူပဲ။”
ဖန့်ချန် စိတ်ထဲတွင် ခေါင်းညိတ်လိုက်ပြီး ခြေတစ်ချက် ကန်လိုက်ရာ တစ်ဖက်လူ၏ အတွင်းကမ္ဘာ တံခါးပေါက် မှာ ပေါက်ကွဲသွားသည်။
ကြီးမားလှသည့် ခန္ဓာကိုယ်မှာ အရုပ်ဟောင်း တစ်ခုကဲ့သို့ အာကာသထဲတွင် လွင့်စင်သွားသည်။ ထိုဖြစ်စဉ် အတွင်းမှာပင် တစ်ဖက်လူက ချက်ချင်း အော်ဟစ်သည်။
“အရှုံးပေးတယ်”
အနီရောင် သွေးမြူများ ကျဆင်းလာပြီး တစ်ခဏချင်းမှာပင် တစ်ဖက်လူကို ဆွဲခေါ်သွားသည်။
နောက်ထပ် တစ်ပွဲ နိုင်ပြန်သည်။ ဖန့်ချန် ၏ စိတ်ထဲတွင်မူ ဝမ်းသာမှု တစ်စက်မျှ မရှိပေ။ တူညီသော အဆင့်ရှိ စွမ်းအင်စုစည်းခြင်း အလယ်အဆင့် များမှာ သူ့ကို စိတ်လှုပ်ရှားမှု မပေးနိုင်တော့ပေ။ နောက်ဆုံးတွင် ပွဲ (၃၀၀) ပြည့်အောင် တိုက်၍ 'နဂါးဖရုံသီး တစ်လုံး' ကို စိန်ခေါ်ခြင်းမှာလည်း ကိုးကြယ် သွေးစက်မျက်လုံး အသီး အတွက်သာ ဖြစ်သည်။
ဤအတိုင်းပင် သူသည် ပြိုင်ဘက် တစ်ယောက်ပြီး တစ်ယောက် ရင်ဆိုင်နေရသည်။ တချို့က စကားများပြီး တချို့က စကားနည်းသည်။ တချို့က သူ့ကို တွေ့လျှင် လှောင်ပြောင်ပြီး စိတ်ဓာတ် တိုက်ခိုက်ရန် ကြိုးစားကြသည်။ သို့သော် သူ့လက်ထဲတွင် တစ်ချက်မျှပင် ခံနိုင်ရည် မရှိကြပေ။
သူ၏ စစ်ပွဲ မှတ်တမ်းများမှာ လျင်မြန်စွာ မြင့်တက်နေပြီး အဆင့်သတ်မှတ်ချက် မှာလည်း ရှေ့သို့ ဆက်တိုက် တိုးတက်နေကာ မကြာမီပင် ထိပ်တန်း (၂၀) စာရင်းဝင် ဖြစ်လာသည်။ သူ၏ စုစုပေါင်း တိုက်ပွဲ အရေအတွက်မှာ (၃၀၀) မပြည့်သေးသော်လည်း၊ သူ၏ နောက်မှ ရှိနေသည့် သွေးရွာခန်းမ သူတော်စင် အချို့မှာ တိုက်ပွဲ ပေါင်း (၅,၀၀၀) ကျော် တိုက်ထားပြီး ဖြစ်သည်။ သို့သော်လည်း သူတို့မှာ ဖန့်ချန် ၏ နောက်တွင်သာ ရှိနေသည်။
အကြောင်းရင်းမှာ သွေးရွာခန်းမ သည် ကောင်းကင် ငါးပါး ဘက်ကဲ့သို့ပင် စုစုပေါင်း စွမ်းရည်ကိုသာ အဆင့်သတ်မှတ်ချက် အဖြစ် သတ်မှတ်သောကြောင့် ဖြစ်သည်။ ပွဲပေါင်း (၂၀၀) ကျော် ဆက်တိုက် နိုင်ထားခြင်းက ဖန့်ချန် ၏ စွမ်းရည်ကို သက်သေပြနေသည်။
မကြာမီပင် ဖန့်ချန် သည် ပွဲ (၃၀၀) ဆက်တိုက် အနိုင်ရရှိသွားပြီး သွေးစွန်းသော စစ်ပွဲ (၃၀၀) တိုက်သည့် ပုံစံကို အဆုံးသတ်ကာ သွေးစွန်းသော စစ်ပွဲ စာရင်းဇယား ရှေ့သို့ ပြန်ရောက်လာသည်။ သူသည် 'နဂါးဖရုံသီး တစ်လုံး' ကို ပထမဆုံး စိန်ခေါ်သူ ဖြစ်မည်ဟု မျှော်လင့်ထားသော်လည်း၊ လက်ရှိတွင် 'နဂါးဖရုံသီး တစ်လုံး' မှာ အခြား သူတော်စင် တစ်ဦး၏ စိန်ခေါ်မှုကို လက်ခံထားပြီး တိုက်ပွဲ စတင်ရန် ပြင်ဆင်နေသည်ကို တွေ့လိုက်ရသည်။
အနီးအနားတွင် လူသူနည်းပါးနေခြင်းမှာ အားလုံး တိုက်ပွဲကို ကြည့်ရှုရန် ရောက်သွားကြခြင်း ဖြစ်သည်။
ဖန့်ချန် စိတ်ကို အနည်းငယ် လှုပ်ရှားလိုက်ရာ သွေးမြူများ ကျဆင်းလာပြီး သူ့ကို အာကာသ ဟင်းလင်းပြင် တစ်ခုဆီသို့ ပို့ဆောင်ပေးလိုက်သည်။ အဝေးတွင် အတွင်းကမ္ဘာ နယ်မြေ နှစ်ခုမှာ အသင့်အနေအထားဖြင့် ရင်ဆိုင်နေကြပြီး တိုက်ပွဲ မှာ မည်သည့်အချိန်မဆို ဖြစ်ပွားတော့မည် ဖြစ်သည်။
“ဟင်၊ ဝူရှီ အစ်ကိုကြီးလား”
တိုက်ပွဲကို ကြည့်ရှုနေသည့် ဂွေ့မြန် သည် အတွင်းကမ္ဘာ နယ်မြေ ကို မောင်းနှင်ကာ အနီးသို့ ကပ်လာသည်။
ဖန့်ချန် ပြုံး၍ ခေါင်းညိတ်သည်။
ဂွေ့မြန် သည် ထိုမြင်ကွင်းကို မြင်သောအခါ အလျင်အမြန်ပင် ဖားယား၍ ပြောသည်။
“ဝူရှီ အစ်ကိုကြီး၊ သွေးစွန်းသော စစ်ပွဲ (၃၀၀) တိုက်ပွဲ ကို အဆုံးသတ်လိုက်ပြီလား ”
ဖန့်ချန် ခေါင်းညိတ်သည်ကို မြင်သောအခါ ဂွေ့မြန် မှာ အံ့အားသင့်စွာဖြင့် အသက်ရှူရ ခက်သွားသည်။ ဘယ်လောက်တောင် မြန်လိုက်သလဲ။ သို့သော်လည်း သူ့ထက် ပိုမြန်သည့် သူတော်စင် တစ်ဦး ရှိနေသေးသည်မှာ ကံကောင်းသည်။
“ဝူရှီ အစ်ကိုကြီး၊ ခုနက ကျွန်တော် ချီဖုန်း နယ်မြေ က ရှဲ့ထူ နဲ့ တွေ့ခဲ့တယ်။”
ဂွေ့မြန် သည် စိတ်လှုပ်ရှားစွာဖြင့် တိုးတိုးလေး ပြောသည်။
“ရှဲ့ရူ ငါ မသိဘူး။”
ဖန့်ချန် ခေါင်းကို ခါယမ်းသည်။
သူသည် 'နဂါးဖရုံသီး တစ်လုံး' နှင့် သူ၏ ပြိုင်ဘက် မှတ်တမ်းကို ကြည့်ရှုနေသည်။
“ဒီ ရှဲထူ က ချီဖုန်း နယ်မြေ ရဲ့ စွမ်းအင်စုစည်းခြင်း အလယ်အဆင့် မှာ နာမည်ကြီးတယ်။ စွမ်းရည် က ထိပ်တန်း (၁၀) ဦး စာရင်းဝင်တယ်။ ဒီတစ်ခါ သူက အစ်ကိုကြီး အကြောင်းကို လာစုံစမ်းနေတာ၊ ကျွန်တော် သူ့ကို ဘာမှ မပြောပြလိုက်ဘူး။”
“အော်”
ဖန့်ချန် သည် ဂွေ့မြန် ကို ကြည့်လိုက်သည်။
“သူက ငါ့အကြောင်း ဘာတွေ စုံစမ်းတာလဲ”
တစ်ချိန်တည်းမှာပင် အဝေးရှိ ရှဲ့ထူ သည် ဂွေ့မြန် နှင့် ဖန့်ချန် တို့ စကားပြောနေသည်ကို တွေ့လိုက်ရသဖြင့် သွေးများဆူလာပြီး မျက်လုံးများ ပြူးကျယ်သွားသည်။
“အရှက်မရှိလိုက်တာ”