အခန်း ၂၉၄၄

အခန်း (၂၉၄၄)

ကျန်းချန်တို့လေးယောက်သည် ထာဝရစိမ်းလန်းသောအင်မော်တယ်နန်းတော်နှင့် ပေပေါင်းထောင်ချီ ဝေးကွာသော ဟင်းလင်းပြင်တွင် ဝင့်ကြွားစွာ ရပ်နေခဲ့ကြသည်။

သူတို့၏ ဆန့်ကျင်ဘက်တွင်မူ ထာဝရစိမ်းလန်းသော အင်မော်တယ်နန်းတော်မှ တလော့အင်မော်တယ် ဆယ်ယောက်ကျော်နှင့် အတူ ထာဝရစိမ်းလန်းသော အင်မော်တယ်နန်းတော်၏ တပည့်ပေါင်းရာချီသည် တိုက်ပွဲဝင်ရန် အသင့် စောင့်ဆိုင်းနေကြ၏။

ဤအခိုက်အတန့်တွင် ပတ်ဝန်းကျင်တစ်ခုလုံး၌ သတ်ဖြတ်ခြင်း အရှိန်အဝါများသာ လွှမ်းခြုံနေခဲ့သည်။

“ထာဝရစိမ်းလန်းသော အင်မော်တယ်နန်းတော်က လူတွေ အသေအချာနားထောင်ကြ.. မင်းတို့ရဲ့ အကြီးအကဲချုပ်လုချင်းလီ သေသွားပြီ.. မင်းတို့တွေ အသက်ရှင်ချင်တယ်ဆိုရင် အခုချက်ချင်း လက်နက်ချ အညံ့ခံပါ”

ကျန်းချန်က သူ့ရှေ့မှ ထာဝရစိမ်းလန်းသော အင်မော်တယ်နန်းတော်၏ လူများဆီသို့ အသာအယာ ဝေ့ကြည့်လိုက်သည်။

သူ၏ အေးစက်စက် စကားသံက ပတ်ဝန်းကျင်တွင် ပဲ့တင်ထပ်သွားခဲ့၏။

ကျန်းချန်၏ စကားကိုကြားလျှင် ထာဝရစိမ်းလန်းသောအင်မော်တယ်နန်းတော်မှ ကျင့်ကြံသူအများအပြား၏ မျက်နှာအမူအရာသည် တစ်ခဏအတွင်း ဖြူဖျော့သွားခဲ့ကြသည်။

အဘယ်ကြောင့်ဆိုသော် ထာဝရစိမ်းလန်းသော အင်မော်တယ်နန်းတော်သည် ဟန်ယွင်အဆင့် အင်မော်တယ်က ဟန်ယွင်အဆင့်ဥပဒေသဖြင့် ဖန်တီးထားသော သီးခြားကမ္ဘာထဲတွင် အမြဲတစေ တည်ရှိနေခဲ့သဖြင့် စိတ်ချလုံခြုံနေခဲ့သည်။

ထို့ကြောင့် ထာဝရစိမ်းလန်းသော အင်မော်တယ်နန်းတော်တွင် အစွမ်းထက် ခုခံကာကွယ်ရေးအစီအရင်များ မရှိပေ။

လက်ရှိအချိန်တွင် ထာဝရစိမ်းလန်းသော အင်မော်တယ်နန်းတော်မှ အစွမ်းထက် ကျင့်ကြံသူအများစုသည် ပြန်လည်မွေးဖွားခြင်း အင်မော်တယ်နန်းတော်နှင့် ပူးပေါင်းကာ ထာဝရရှင်သန်ခြင်း အင်မော်တယ်နန်းတော်ကို သွားရောက် တိုက်ခိုက်နေကြသည်။

ထို့ကြောင့် ဌာနချုပ်ရှိ ကျင့်ကြံသူများထဲတွင် အကြီးအကဲချုပ်လုချင်းလီသည် အစွမ်းအထက်ဆုံး ကျင့်ကြံသူ ဖြစ်သည်။

ယခု လုချင်းလီပင်လျှင် ဤလူများ၏ လက်ထဲတွင် ကျဆုံးသွားခဲ့ပြီဖြစ်ရာ သူတို့အနေဖြင့် မည်ကဲ့သို့ ခုခံနိုင်ပါတော့မည်နည်း။

“မင်းတို့က ငါတို့ ထာဝရစိမ်းလန်းသော အင်မော်တယ်နန်းတော်ရဲ့ အကြီးအကဲချုပ်ကို သတ်ဖြတ်ခဲ့တဲ့ အပြင် ထာဝရစိမ်းလန်းသော အင်မော်တယ်နန်းတော်ထဲကိုပါ ဝင်ပြီး ရမ်းကားရဲတယ်.. ငါတို့ ထာဝရစိမ်းလန်းသော အင်မော်တယ်နန်းတော်ရဲ့ ဟန်ယွင်အဆင့် နန်းတော်သခင် ပြန်ရောက်လာတဲ့အခါကျရင် မင်းတို့ကို အလွယ်တကူ အလွှတ်ပေးမှာ မဟုတ်ဘူး”

ရှေ့ဆုံးကနေ ဦးဆောင်နေသည့် တလော့အင်မော်တယ်အထွတ်အထိပ်အဆင့်ရှိ လူလတ်ပိုင်းအရွယ် ကျင့်ကြံသူက ကျယ်‌‌လောင်စွာ အော်ဟစ်လိုက်သည်။

ကျန်းချန်က လှောင်ပြုံးပြုံး၍ ပြောလိုက်သည်။

“တကယ်လား သူတို့က ငါ့ကို လွှတ်ပေးဖို့ ဆန္ဒရှိရင်တောင် ငါက လွှတ်ပေးဖို့ အစီအစဥ်မရှိဘူး”

သူနှင့် ထာဝရရှင်သန်ခြင်း အင်မော်တယ်ဘုရင်သည် ပတ်သက် ဆက်နွှယ်မှုများစွာ ရှိခဲ့သည်။

ထာဝရရှင်သန်ခြင်း အင်မော်တယ်ဘုရင်၏ မျိုးဆက်ဖြစ်သူ လုရှောင်ချင်းပင်လျှင် ထာဝရရှင်သန်ခြင်း အင်မော်တယ်ဘုရင်အတွက် သူကိုယ်တိုင် ရွေးချယ်ပေးခဲ့ခြင်း ဖြစ်သည်။

လုရှောင်ချင်းကို သူက သူ၏ ညီမလေးအရင်း ကဲ့သို့ အမြဲတစေ သတ်မှတ်ထားခဲ့သည်။

သို့ဖြစ်ရာ ထာဝရစိမ်းလန်းသော အင်မော်တယ်နန်းတော်သည် ထာဝရရှင်သန်ခြင်း အင်မော်တယ်နန်းတော်မှ ခွဲထွက်လိုက်ကတည်းကပင် သူ၏ ရန်သူဖြစ်ရန် ကံကြမ္မာက သတ်မှတ်ပြီးသား ဖြစ်နေခဲ့၏။

ကျန်းချန်သည် ရန်သူနှင့် ရင်ဆိုင်ရလျှင် မည်သည့်အခါမျှ စိတ်နှလုံးနူးညံ့နေမည် မဟုတ်ပေ။

“တိုက်ကြစို့.. သူတို့ကို အမြန်ဆုံးရှင်းပစ်ပြီး ထာဝရစိမ်းလန်းသော အင်မော်တယ်နန်းတော်ရဲ့ အရင်းအမြစ်တွေကို လုယူကြမယ်”

စကားဆုံးသည်နှင့် ကျန်းချန်က လက်ထဲမှ ဓားကျိုးကို ဝှေ့ယမ်းရင်း ထာဝရစိမ်းလန်းသော အင်မော်တယ်နန်းတော်မှ ကျင့်ကြံသူများကို သတ်ဖြတ်ရန် အင်မော်တယ်ဘုရင်ရုပ်အလောင်းကို စေခိုင်းလိုက်သည်။

ထိုမြင်ကွင်းကိုမြင်လျှင် ချင်းယွင်ဘိုးဘေးနှင့် အရှင်ယွင်ကန်းတို့သည်လည်း တစ်ချိန်တည်းမှာပင် လှုပ်ရှားလိုက်ကြသည်။

ထိုက်ယီအဆင့် အင်မော်တယ်နှစ်ပါးနှင့်အတူ ကျန်းချန်နှင့် ထိုက်ယီအင်မော်တယ်ထက် မနိမ့်ကျသော အင်မော်တယ်ဘုရင်ရုပ်အလောင်းတို့ တစ်ပြိုင်နက် တိုက်ခိုက်လိုက်ကြရာ ထာဝရစိမ်းလန်းသော အင်မော်တယ်နန်းတော်မှ တလော့ အင်မော်တယ် တစ်စုသည် လုံးဝ တားဆီးနိုင်ခြင်း မရှိတော့ပေ။

သူတို့လေးယောက်က ထာဝရစိမ်းလန်းသော အင်မော်တယ်နန်းတော်မှ တလော့အင်မော်တယ်များကို သခွားသီးများ လှီးဖြတ်သကဲ့သို့ အလွယ်တကူ သတ်ဖြတ်လိုက်ပြီး ထာဝရစိမ်းလန်းသော အင်မော်တယ်နန်းတော်သို့ တိုက်ရိုက်ပင် ဝင်ရောက်သွားခဲ့ကြသည်။

ကျန်းချန်တို့ လေးယောက်၏ ကြောက်မက်ဖွယ်စွမ်းအားကိုမြင်လျှင် ထာဝရစိမ်းလန်းသော အင်မော်တယ်နန်းတော်မှ တပည့်များသည် စိတ်နှလုံး တုန်လှုပ်သွားကြသည်။

ကျန်းချန်တို့လူစုက တလော့အင်မော်တယ် အဆင့်အောက်ရှိ ထိုတပည့်များကို ဂရုစိုက်မနေဘဲ ထာဝရစိမ်းလန်းသော အင်မော်တယ်နန်းတော်၏ ရတနာတိုက်ကို လိုက်လံရှာဖွေခဲ့ကြသည်။

ခဏအကြာတွင် ကျန်းချန်တို့သည် အရင်းအမြစ်များကို သိုလှောင်ထားသည့် ထာဝရစိမ်းလန်းသောအင်မော်တယ်နန်းတော်၏ ရတနာတိုက်ကို ရှာဖွေ တွေ့ရှိသွားကြ၏။

ရတနာတိုက်တွင် ဟန်ယွင်အဆင့် အင်မော်တယ် ခင်းကျင်းထားသည့် အစီအရင်အတားအဆီးများ ရှိသော်လည်း အရှင်ဇူရီ ရှိနေသဖြင့် ယင်းမှာ သူတို့အတွက် ကြီးကြီးမားမား အဟန့်အတား မဖြစ်ခဲ့ပေ။

ရတနာတိုက်ထဲသို့ ဝင်ရောက်ပြီးနောက်တွင် ကျန်းချန်သည် အရင်းအမြစ်များကို စစ်ဆေးနေရန် ပျင်းရိသဖြင့် သူ၏ လက်ကို ဝှေ့ယမ်းကာ ရတနာတိုက်ထဲရှိ ရတနာအားလုံးကို သိုလှောင်အိတ် ထဲသို့ တစ်ခါတည်း ထည့်သိမ်းလိုက်သည်။

ထို့နောက် ကျန်းချန်တို့ လူစုသည် ထာဝရစိမ်းလန်းသော အင်မော်တယ်နန်းတော်၏ အတွင်းအပြင်ကို ထပ်မံ၍ အသေးစိတ် မွှေနှောက် ရှာဖွေခဲ့ကြပြီး ထာဝရစိမ်းလန်းသော အင်မော်တယ်နန်းတော်က ပျိုးထောင်ထားသော ဟန်ယွင်အင်မော်တယ် စမ်းရေတွင်းကိုပင် ကျန်းချန်က သိမ်းယူသွားခဲ့သည်။

ယင်းနောက်တွင်မူ ကျန်းချန်တို့သည် ထာဝရစိမ်းလန်းသောအင်မော်တယ်နန်းတော်တွင် အချိန်အကြာကြီး ဆက်လက်မနေတော့ဘဲ ထာဝရစိမ်းလန်းသော အင်မော်တယ်နန်းတော် တည်ရှိရာ သီးခြားကမ္ဘာလောကထဲကနေ ထွက်ခွာလာခဲ့ကြပြီး အပြာရောင်သစ်သား အင်မော်တယ်တောင်တန်း၏ ကောင်းကင်ယံထက်ကနေ လျင်မြန်စွာ ထွက်ခွာသွားခဲ့ကြသည်။

-----------------

ထာဝရရှင်သန်ခြင်း အင်မော်တယ်တောင်တန်းသည် ထာဝရရှင်သန်ခြင်း အင်မော်တယ်နယ်မြေ၏ ဗဟိုချက်တွင် တည်ရှိပြီး ထာဝရရှင်သန်ခြင်း အင်မော်တယ်နယ်မြေတွင် ဂုဏ်သတင်း အကျော်စောဆုံး အင်မော်တယ်တောင်တန်း ဖြစ်ကာ ထာဝရရှင်သန်ခြင်း အင်မော်တယ်နယ်မြေထဲမှ မရေမတွက်နိုင်သော အင်အားစုများ အထွတ်အမြတ်ထားရာ နေရာတစ်ခုလည်း ဖြစ်သည်။

အဘယ်ကြောင့်ဆိုသော် ဤနေရာသည် ယခင်က ထာဝရရှင်သန်ခြင်း အင်မော်တယ်နယ်မြေ၏ တစ်ခုတည်းသော နတ်ဘုရင်အဆင့်အင်အားစု ဖြစ်ခဲ့သည့် ထာဝရရှင်သန်ခြင်းအင်မော်တယ်နန်းတော် တည်ရှိရာ အင်မော်တယ်တောင်တန်း ဖြစ်ခဲ့သောကြောင့်ပင်။

ထာဝရရှင်သန်ခြင်းအင်မော်တယ်နန်းတော်၏ အထွတ်အထိပ်ကာလတွင် ထာဝရရှင်သန်ခြင်း အင်မော်တယ်ဘုရင်က တာဝန်ယူ အုပ်ချုပ်ခဲ့သည်။

ထာဝရရှင်သန်ခြင်း အင်မော်တယ်ဘုရင်သည် ခရမ်းရောင်မီးလျှံ ကောင်းကင်နယ်မြေ တစ်ခုလုံးဖြင့် ကြည့်လျှင်ပင် ဂုဏ်သတင်း ကျော်စောသော ကျင့်ကြံသူတစ်ဦး ဖြစ်ခဲ့သည်။

သို့သော်လည်း လွန်ခဲ့သော နှစ်ပေါင်းများစွာက ထာဝရရှင်သန်ခြင်း အင်မော်တယ်နန်းတော်တွင် ကြီးမားသော အပြောင်းအလဲတစ်ခုနှင့် ကြုံတွေ့ခဲ့ရပြီး ထာဝရရှင်သန်ခြင်း အင်မော်တယ်ဘုရင်သည် ထာဝရရှင်သန်ခြင်း အင်မော်တယ်နယ်မြေကနေ လုံးဝ ပျောက်ကွယ်သွားခဲ့သည်။

ထာဝရရှင်သန်ခြင်းအင်မော်တယ်ဘုရင် ပျောက်ကွယ်သွားပြီးနောက်တွင် ထာဝရရှင်သန်ခြင်း အင်မော်တယ်နန်းတော်၏ အင်အားသည် သိသိသာသာပင် ကျဆင်းသွားခဲ့ပြီး ယခုအခါတွင် ဟန်ယွင်အဆင့် အင်အားစုကြီး သုံးစု အဖြစ် ကွဲထွက်သွားခဲ့ပြီ ဖြစ်သည်။

မူလက ဟန်ယွင်အဆင့် အင်အားစုကြီးသုံးစုသည် ထာဝရရှင်သန်ခြင်း အင်မော်တယ်နယ်မြေတွင် အင်အား ကွာခြားမှု သိပ်မရှိခဲ့ပေ။

သို့သော်လည်း ဤမျှခြေ အခြေအနေသည် ထာဝရရှင်သန်ခြင်းအင်မော်တယ်ဘုရင်၏ မျိုးဆက် ပြန်လည် ရောက်ရှိလာခြင်းနှင့်အတူ လုံးဝ ပျက်စီးသွားခဲ့ရသည်။

ထာဝရရှင်သန်ခြင်း အင်မော်တယ် နန်းတော်မှ ခွဲထွက်သွားခဲ့ကြသော ပြန်လည်မွေးဖွားခြင်း အင်မော်တယ်နန်းတော်နှင့် ထာဝရစိမ်းလန်းသော အင်မော်တယ်နန်းတော်တို့သည် ထာဝရရှင်သန်ခြင်း အင်မော်တယ်ဘုရင်၏ မျိုးဆက် ပြန်လည် ရောက်ရှိလာပြီး ထာဝရရှင်သန်ခြင်း အင်မော်တယ်နန်းတော်အား တိုးတက်အောင် လုပ်ဆောင်မည်ကို မလိုလားကြပေ။

ယင်းကြောင့် ထိုဟန်ယွင်အဆင့် အင်အားစုကြီး နှစ်စုသည် ထာဝရရှင်သန်ခြင်း အင်မော်တယ်နန်းတော်ကို တိုက်ခိုက်ရန်အတွက် ပူးပေါင်းဖို့ ဆုံးဖြတ်ခဲ့ကြ၏။

သို့သော်လည်း ထာဝရရှင်သန်ခြင်း အင်မော်တယ်နန်းတော်သည် ထာဝရရှင်သန်ခြင်း အင်မော်တယ်တောင်တန်းကို အမြဲတစေ သိမ်းပိုက်ထားနိုင်ခဲ့သည်။

အထူးသဖြင့် ထာဝရရှင်သန်ခြင်း အင်မော်တယ်ဘုရင်၏ မျိုးဆက် ပြန်လည် ရောက်ရှိလာမှုသည် ထာဝရရှင်သန်ခြင်းအင်မော်တယ်နန်းတော်ကို တိုးတက်စေမည့် အခွင့်အလမ်းများ ယူဆောင်လာခဲ့သည်။

ယင်းအတွက်ကြောင့် ထာဝရစိမ်းလန်းသော အင်မော်တယ်နန်းတော်နှင့် ပြန်လည်မွေးဖွားခြင်း အင်မော်တယ်နန်းတော်တို့သည် အင်အားစုချင်း ပူးပေါင်းထားသည့်တိုင် ထာဝရရှင်သန်ခြင်း အင်မော်တယ်နန်းတော်ကို အချိန်တိုအတွင်း အနိုင်ယူရန် ခက်ခဲနေခဲ့၏။

လက်ရှိတွင် ဟန်ယွင်အဆင့် အင်အားစုသုံးစုကြားရှိ အခြေအနေသည် တင်းမာလျက်ရှိနေခဲ့သည်။

ထာဝရရှင်သန်ခြင်း အင်မော်တယ်တောင်တန်း၏ အပြင်ဘက်ရှိ ဟင်းလင်းပြင်တွင် ထူးခြားသော အရှိန်အဝါများရှိသည့် ပုံရိပ်နှစ်ခုသည် တစ်ဦးနှင့်တစ်ဦး မျက်နှာချင်းဆိုင် ရပ်နေခဲ့ကြသည်။

ထိုနှစ်ယောက်ထဲတွင် တစ်ယောက်မှာ အစိမ်းရောင်ဝတ်စုံကို ဝတ်ဆင်ထားသည့် ခန့်ညားသော လူလတ်ပိုင်းအရွယ်ကျင့်ကြံသူတစ်ဦး ဖြစ်ပြီး ထိုသူမှာ ထာဝရစိမ်းလန်းသော အင်မော်တယ်နန်းတော်၏ နန်းတော်သခင်ဖြစ်သည့် ဟန်ယွင်အဆင့် အင်မော်တယ် လုချန်ချင်း ဖြစ်သည်။

သူ၏ရှေ့တွင်မူ မီးခိုးရောင်ဝတ်စုံကို ဝတ်ဆင်ထားသည့် ဆံဖြူအဘိုးအိုတစ်ဦး ရှိနေခဲ့သည်။

ထိုအဘိုးအို၏ မျက်ခုံးများသည် အဖြူနှင့်အမဲ ဖြစ်နေခဲ့ကာ အလွန်ပင် ဆန်းကြယ်နေခဲ့၏။

ထိုမီးခိုးရောင်ဝတ်စုံဝတ် အဘိုးအိုမှာ ပြန်လည်မွေးဖွားခြင်း အင်မော်တယ်နန်းတော်၏ နန်းတော်သခင် ဖြစ်ပြီး ကျင့်ကြံခြင်းအဆင့်တွင် ဟန်ယွင်အဆင့်ကို ရောက်ရှိနေသည့် အရှင်ဖြူမဲ ဖြစ်သည်။

“မိတ်ဆွေကြီးဖြူမဲ.. ထာဝရရှင်သန်ခြင်း အင်မော်တယ်နန်းတော်ကို အခုအချိန်အထိ တိုက်ခိုက်လို့ မနိုင်သေးဘူး.. ငါတို့ ဒီအတိုင်း ဆက်တိုက်နေတာက အဖြေ မဟုတ်ဘူးထင်တယ်.. ဒီအခြေအနေကို ဖြေရှင်းဖို့ မင်းမှာ ဘယ်လိုနည်းလမ်း ရှိလဲ”

လုချန်ချင်းက သူ့ရှေ့မှ အရှင်ဖြူမဲကို ကြည့်ကာ မေးလိုက်သည်။

အရှင်ဖြူမဲက တစ်ခဏမျှ စဥ်းစားလိုက်ပြီးမှ ပြောလိုက်၏။

“မြားက လေးကြိုးပေါ်ကိုတောင် ရောက်နေပြီ ဆိုမှတော့ ငါတို့ မဖြစ်မနေ လုပ်ကို လုပ်ရတော့မယ်.. ငါတို့အနေနဲ့ အစွမ်းကုန်တိုက်ခိုက်ပြီး ထာဝရရှင်သန်ခြင်း အင်မော်တယ်နန်းတော်ကို အမြန်ဆုံး အနိုင်ယူဖို့က လွဲပြီး တခြား ရွေးချယ်စရာမရှိတော့ဘူး”

ထာဝရရှင်သန်ခြင်း အင်မော်တယ်ဘုရင်၏ မျိုးဆက်သည် အနှိုင်းမဲ့ပါရမီရှင်တစ်ဦး ဖြစ်ပြီး သူ၏ ကြီးထွားနှုန်းသည် အလွန်ပင် ကြောက်မက်ဖွယ်ရာကောင်း၏။

ထို့ကြောင့် ထိုအနှိုင်းမဲ့ပါရမီရှင် မကြီးပြင်းလာခင် ရှင်းပစ်ရပေလိမ့်မည်။

သို့မဟုတ်လျှင် သူတို့ ပြန်လည်မွေးဖွားခြင်း အင်မော်တယ်နန်းတော်နှင့် ထာဝရစိမ်းလန်းသော အင်မော်တယ်နန်းတော်တို့သည် ကြီးမားသော ကပ်ဘေးနှင့် ကြုံတွေ့ရလိမ့်မည်ဖြစ်၏။

လုချန်ချင်းက မျက်မှောင်အနည်းငယ် ကြုတ်သွားခဲ့သည်။

ထာဝရရှင်သန်ခြင်း အင်မော်တယ်နန်းတော်သည် သူတို့ထက် အားမနည်းပေ။

အကယ်၍ သူတို့က အစွမ်းကုန် ရင်းနှီးကာ တိုက်ခိုက်မည်ဆိုလျှင်ပင် ထာဝရရှင်သန်ခြင်း အင်မော်တယ်နန်းတော်ကို အနိုင်ယူနိုင်သည့်တိုင် သူတို့သည်လည်း ကြီးမားသော ပေးဆပ်မှုများကို ပြုလုပ်ရပေလိမ့်မည်။

လုချန်ချင်းက ထိုကဲ့သို့ ပေးဆပ်မှုမျိုး မပြုလုပ်ချင်ခဲ့ပေ။

သို့သော်လည်း ယခုအခါတွင် ကိစ္စရပ်များသည် ဤအခြေအနေအထိပင် ရောက်ရှိလာခဲ့ပြီ ဖြစ်ရာ သူတို့အနေဖြင့် အကောင်းဆုံး လုပ်ဆောင်ရတော့မည် ဖြစ်ပြီး ထာဝရရှင်သန်ခြင်း အင်မော်တယ်ဘုရင်၏ မျိုးဆက်ကို ကြီးပြင်းခွင့်ပေး၍ မဖြစ်တော့ပေ။

လုချန်ချင်းက အသက်ကို ခပ်ပြင်းပြင်းတစ်ချက် ရှူရှိုက်လိုက်ပြီးနောက် စကားပြောရန် ပြင်လိုက်ဆင်မှာပင် ရုတ်တရက် တစ်စုံတစ်ရာကို အာရုံခံမိသွားခဲ့ပြီး မျက်နှာအမူအရာ အကြီးအကျယ် ပြောင်းလဲသွားခဲ့သည်။

“အရှင်ဖြူမဲ.. ငါ့ရဲ့ ထာဝရစိမ်းလန်းသော အင်မော်တယ်နန်းတော်မှာ အရေးတကြီး ဖြေရှင်းရမဲ့ ကိစ္စတစ်ခု ပေါ်လာခဲ့ပြီ.. ထာဝရရှင်သန်ခြင်း အင်မော်တယ်နန်းတော်ကို တိုက်ခိုက်မဲ့ကိစ္စနဲ့ ပတ်သက်ပြီး နောက်ရက်ကျမှပဲ ထပ်ပြီး ဆွေးနွေးကြတာပေါ့”

ထိုစကားကို ပြောလိုက်ပြီးနောက်တွင် လုချန်ချင်းသည် အရှင်ဖြူမဲကို စကားပြန်ပြောခွင့်ပင် မပေးတော့ဘဲ တစ်ခဏအတွင်းမှာပင် နေရာမှ ပျောက်ကွယ်သွားခဲ့သည်။

အခန်း(၂၉၄၄)ပြီး၏။