အခန်း (၂၃၈၇-၂၃၈၈)
Vol. 239 Ch. 2387-2388
အခန်း (၂၃၈၇) - ကျိုးကြောင်းမဆီလျော်လှချည်လား
ကြက်သားဟင်းရည် နှင့် လက်ရှစ်ဖက်နတ်ဘုရားတို့သည် ဇန်ထျန်တောင် ၏ မျက်နှာပေါ်တွင် ပေါ်လာသော ထူးဆန်းသည့် အမူအရာကို မြင်လိုက်ရသောအခါ စိတ်ထဲမှ ‘ကံဆိုးလိုက်တာ’ ဟု ရေရွတ်လိုက်မိကြသည်။
ထို့နောက် ကြက်သားဟင်းရည်က ချက်ချင်းပင် ရယ်မော၍ လက်ယှက်ကာ -
“ညီလေး၊ ငါတို့ရဲ့ ရည်မှန်းချက်က ဟိုလူမဟုတ်ဘူး။ ပြီးတော့ ဟိုလူကလည်း ငါတို့ ကောင်းကင် ငါးပါး ကနေ လာတာပဲ။ စည်းကမ်းအရဆိုရင်တော့ မင်းအနေနဲ့ သူ့ကို ဝါမြိုခြင်း နည်းလမ်းကို သုံးလို့ မရဘူးလေ။ ငါတို့ကတော့ ပစ်မှတ်ကိုပဲ အာရုံစိုက်ထားရင် လုံလောက်ပါတယ်”
ဟု ပြောလိုက်သည်။
ဝမ်ဟိုနှင့် အခြားသူတို့မှာ ဤစကားကို ကြားသောအခါ တစ်စုံတစ်ခု လွဲမှားနေသလို ခံစားလိုက်ရပြီး အနည်းငယ် ထူးဆန်းနေကြသည်။ သို့သော် မည်သည့်နေရာတွင် လွဲမှားနေသည်ကိုမူ အတိအကျ ပြောပြနိုင်ခြင်း မရှိခဲ့ပေ။
ဇန်ထျန်တောင် က အေးစက်စွာဖြင့် -
“ငါ့အလုပ်ကို ဘယ်သူ့ကိုမှ လာညွှန်ကြားခိုင်းစရာ မလိုဘူး။ ဘယ်လိုပဲဖြစ်ဖြစ် ဟိုလူကို စောင့်ရမှာပဲဆိုတော့ ဒီ ‘ဝူရှီ’ ဆိုတဲ့ကောင်ရဲ့ အရင်းအမြစ်က ဘယ်လောက်ထိ ရှိလဲဆိုတာကိုလည်း ကြည့်ထားလိုက်ဦးမယ်”
ဟု ဆိုသည်။
စကားပြောပြီးနောက် ဝမ်ဟိုကို တစ်ချက်ကြည့်၍ ပြောလိုက်သည်။
“မင်းရဲ့အစ်ကိုကြီးက ဒီကိစ္စအတွက်နဲ့ ဒဏ်ရာရခဲ့တာမလား။ ငါ မင်းအစ်ကိုကြီးကို တာဝန်ယူပေးမယ်၊ မင်းတို့ကိုလည်း တာဝန်ယူပေးမယ်”
ဟု ပြောလိုက်သည်။
“ကျေးဇူးတင်ပါတယ်”
ဝမ်ဟို၏ စိတ်ထဲတွင် ကျေးဇူးတင်စိတ်များ ပြည့်နှက်သွားသည်။ တစ်ဖက်လူက ဤကိစ္စကို ချက်ချင်းပင် သူ့တာဝန်အဖြစ် လွှဲယူလိုက်လိမ့်မည်ဟု သူ မထင်မှတ်ထားခဲ့ပေ။ လက်ရှစ်ဖက်နတ်ဘုရား တို့ကဲ့သို့ ရှောင်ဖယ်မနေခြင်းပင်။
……
“ဝူရှီ ရောက်လာပြီ”
“အားလုံးပဲ လမ်းဖယ်ပေးကြပါ”
သွေးတိုက်ပွဲစာရင်း ရှေ့တွင် တစ်ဖန်ပြန်၍ ရှုပ်ထွေးသွားပြန်သည်။ သူတော်စင်များမှာ ချက်ချင်းပင် လမ်းဖယ်ပေးလိုက်ကြပြီး ဖန်ချန် ရောက်လာသည်ကို ရိုသေလေးစားသော အကြည့်များဖြင့် ကြည့်နေကြသည်။
ဂွေ့မြန့်နှင့် ရှဲ့ထူ တို့မှာမူ ထိုဩဇာအရှိန်အဝါကို အခွင့်ကောင်းယူ၍ အထက်စီးမှ ဝင်လာကြပြီး မျက်လုံးများမှာလည်း မောက်မာစွာဖြင့် ကောင်းကင်ထိ ရောက်တော့မတတ် ဖြစ်နေကြသည်။
“ဝူရှီအစ်ကိုကြီး ဒီနာမည်နှစ်ခုကို ကြည့်လိုက်ပါ။ သူတို့က သွေးတိုက်ပွဲ (၃၀၀) အထိကို ရွေးချယ်ထားတာ။ ကံမကောင်းတာက ငါတို့ အစကတည်းက သတိမထားမိလိုက်လို့ အခုတော့ သူတို့တိုက်ပွဲကို ဝင်ကြည့်လို့ မရတော့ဘူး”
ဂွေ့မြန့်က အဆင့်သတ်မှတ်ချက်ထဲတွင် အရှိန်အဟုန်ဖြင့် မြင့်တက်လာနေသော နာမည်နှစ်ခုကို လက်ညှိုးထိုး၍ ပြောသည်။
သူတော်စင်အများစုမှာလည်း ထိုသူနှစ်ဦး၏ နောက်ခံကို ခန့်မှန်းမိကြသည်။ ထူးခြားမှု မရှိလျှင် တစ်ဦးမှာ ကောင်းကင် ငါးပါး ဘက်မှ လျှို့ဝှက်လက်နက်ဖြစ်ပြီး နောက်တစ်ဦးမှာမူ ကိုးကြယ် သွေးစက်မျက်လုံးအသီး ပိုင်ဆိုင်ခွင့်ရှိမည့် တကယ့်ပိုင်ရှင် ဖြစ်နိုင်ခြေများသည်။
ဖန့်ချန်မှာ နာမည်နှစ်ခုကို တစ်ချက်ကြည့်လိုက်သည်။ ပထမနာမည်မှာ သာမန်အတိုင်းပင် ဖြစ်ပြီး ဇန်ထျန်တောင် ဟု ခေါ်သည်။ ဒုတိယနာမည်မှာမူ အနည်းငယ် ထူးဆန်းနေသည်။ ၎င်းမှာ ချန်ချန်၏ မိန်းမ ဖြစ်သည်။
ဖန့်ချန်သာမက အနီးအနားရှိ သူတော်စင်များမှာလည်း ဤနာမည်နှင့် ပတ်သက်၍ တီးတိုးပြောဆိုနေကြသည်။
“ကျိုးကြောင်းမဆီလျော်လှချည်လား။”
ဖန့်ချန်က စိတ်ထဲမှ ရေရွတ်လိုက်ပြီးနောက် ခေါင်းလှည့်ကာ ထွက်ခွာသွားသည်။ ရှဲ့ထူးနှင့် ဂွေ့မြန့်တို့မှာ ဘာဖြစ်သွားမှန်း မသိသဖြင့် အလောတကြီး လိုက်ပါသွားကြသည်။ သို့သော် အခြားသူတော်စင်များမှာမူ အမျိုးမျိုး ခန့်မှန်းနေကြသည်။
“ဝူရှီ ဖိအားပေးတာကို ခံလိုက်ရတာလား။”
“ဘယ်ကမှာလဲ၊ ဒါက ဒီလူနှစ်ယောက်ကို မျက်စိထဲတောင် မထည့်တာလေ။”
“ဟုတ်လို့လား……”
ဖန်ချန်မှာ သွေးတိုက်ပွဲစာရင်းမှ ထွက်ခွာသွားပြီး အတွင်းကမ္ဘာ ထဲသို့ တိုက်ရိုက်ဝင်ရောက် ပျောက်ကွယ်သွားသည်။
“ဝူရှီအစ်ကိုကြီး က ဒီအချိန်လေးကို အခွင့်ကောင်းယူပြီး ထပ်ပြီး ကျင့်ကြံမလို့ ဖြစ်မယ် ”
ဂွေ့မြန့်က ရှဲ့ထူကို ကြည့်၍ မေးသည်။
ရှဲ့ထူက ခဏစဉ်းစားပြီးနောက် ပြောလိုက်သည်။
“မသိဘူး” ဟု ဖြေသည်။
တစ်ဖက်လူ၏ သွေးတိုက်ပွဲ (၃၀၀) တိုက်ခိုက်သည့် အရှိန်အဟုန်မှာ နှေးကွေးမည် မဟုတ်ပေ။ ခဏနေလျှင်ပင် တိုက်ပွဲ (၃၀၀) ဆက်တိုက် အနိုင်ရရှိသွားမည် ဖြစ်သည်။ ဒီလောက် အချိန်တိုလေးအတွင်းမှာ ဘာကို ကျင့်ကြံနိုင်မှာလဲ။
အတွင်းကမ္ဘာထဲတွင်။
မြင်ကွင်းကျယ်ကြီး ပွင့်လာသည်။ အတွင်းတွင် သူတော်စင်နှစ်ဦး တိုက်ခိုက်နေကြသည်။ သို့သော် တစ်ဦးမှာ တစ်ဖက်လူ၏ ပြိုင်ဘက် လုံးဝမဟုတ်ဘဲ တိုက်ပွဲတစ်ခုတည်းဖြင့်ပင် ရှုံးနိမ့်သွားခဲ့သည်။ အခြားတစ်ဦးမှာမူ ရုပ်ရည်အလွန်လှပပြီး မျက်နှာပေါ်တွင် အပြုံးနုနုလေးဖြင့် သူတော်စင်တစ်ယောက်ကို အနိုင်ယူပြီးနောက် သွေးမြူများ ပေါ်လာမည့်အချိန်ကို ငြိမ်သက်စွာ စောင့်ဆိုင်းနေသည်။
“အရှင်သခင်၊ ဒီတစ်ယောက်က သွေးရွာခန်းမဘက်က လျှို့ဝှက်လက်နက် ဖြစ်ရမယ်။ သူ့ရဲ့ စွမ်းအားကလည်း အထင်သေးစရာ မရှိဘူး”
လီဝူက လေးနက်သော အမူအရာဖြင့် ပြောသည်။
ဖန်ချန်က ခေါင်းညိတ်လိုက်ပြီး ပြောလိုက်သည်။
“သူ့စွမ်းအားက တကယ်ပဲ မနိမ့်ပါဘူး။ ဒါပေမဲ့ သူက သွေးရွာခန်းမရဲ့ သူတော်စင် ဖြစ်ရုံတင်မကဘဲ ငါတို့ရဲ့ ရှန်းဟုန်မျိုးနွယ်စုရဲ့ တပည့်တစ်ယောက်လည်း ဖြစ်တယ်”
ဟု ပြောသည်။
“……”
လီဝူ၏ မျက်လုံးများထဲတွင် ထိတ်လန့်သွားသည့် အရိပ်အယောင်များ ပေါ်လာပြီး မယုံကြည်နိုင်စွာဖြင့် ကြည့်နေသည်။ ထိုအချိန်မှသာ သူသည် တစ်ဖက်လူမှာ တကယ်ပင် လူသားမျိုးနွယ် ဖြစ်ကြောင်း သတိပြုမိသွားသည်။
“သေခြင်းတရားမှ တစ်ဖန်ပြန်ရှင်သန်လာပြီးနောက် သူ့ဘဝတစ်ခုစီတိုင်းမှာ အဆင်မပြေမှုတွေနဲ့ ကြုံခဲ့ရတယ်။ အခုဆိုရင် ငါးကြိမ်တိုင်တိုင် ပြန်လည်ဝင်စားပြီးပြီ”
ဖန်ချန်က စဉ်းစားဟန်ဖြင့် ပြောသည်။
“ဒါပေမဲ့ ဒီတစ်ဘဝမှာတော့ တစ်စုံတစ်ခု မှားယွင်းနေပုံရတယ်။”
“ဘာများ မှားယွင်းနေတာလဲ”
လီဝူက အလိုအလျောက်ပင် မေးလိုက်သည်။
ဖန်ချန်က ခေါင်းခါလိုက်ပြီး -
“နောက်ဆုံး တွေ့ဆုံချိန်ကျမှပဲ သိရတော့မယ်”
ဟု ဆိုသည်။
တစ်ဖက်လူ၏ သွေးတိုက်ပွဲမှာ ကြည့်ရှုသူ မရှိသည်တော့ မဟုတ်ပေ။ ဥပမာအားဖြင့် လုယေကျွင်း နှင့် နဂါးဖရုံသီးတစ်လုံး တို့မှာ ကြိုတင်ပြင်ဆင်ထားကြသဖြင့် ထိုသွေးတိုက်ပွဲ (၃၀၀) ကို အစအဆုံး ကြည့်ရှုနိုင်ခဲ့သည်။
ချန်ချန်၏ မိန်းမ ၏ နည်းလမ်းများမှာ ကြည့်ရှုနေသော သူတော်စင်များကို အံ့အားသင့်စေခဲ့သည်။ ပြိုင်ဘက်အားလုံးမှာ အဆင့်တူများ ဖြစ်ကြပြီး စွမ်းအားများမှာလည်း အဆက်မပြတ် တိုးတက်နေသော်လည်း သူမသည် တိုက်ပွဲတိုင်းတွင် အများဆုံး တစ်ကွက်တည်းဖြင့်ပင် အဆုံးသတ်သွားခဲ့သည်။ ဒုတိယမြောက် နည်းလမ်းကို ဘယ်သောအခါမှ ထုတ်မသုံးခဲ့ပေ။
“တော်လိုက်တာ……”
နဂါးဖရုံသီးတစ်လုံး က လေးနက်သော အကြည့်များဖြင့် ကြည့်သည်။ ရှန်းကျောက် ကောင်းကင်အရှင်ကိုယ်တိုင် အလေးထားရခြင်းမှာ မထူးဆန်းတော့ပေ။ တစ်ဖက်လူ၏ အတွင်းကမ္ဘာအဆင့်မှာ မွေးရာပါကပင် အလွန်တောင့်တင်းနေပုံရသည်။
“ဒါပေမဲ့… လုအစ်ကိုကြီး၊ သူ့နာမည်က ဘာလို့ ဒီလောက်တောင် ထူးဆန်းနေရတာလဲ။ အဲ့ဒီ ‘ချန်ချန်’ ဆိုတဲ့သူက ဘယ်သူလဲ”
နဂါးဖရုံသီးတစ်လုံး က အလွန်သိချင်စိတ်ဖြင့် မေးသည်။
ထိုစကားထွက်ပေါ်လာသည်နှင့် အနီးအနားရှိ သူတော်စင်များအားလုံးကလည်း လုယေကျွင်းကို စိတ်ဝင်တစား ကြည့်လာကြသည်။
လုယေကျွင်း က စဉ်းစားဟန်ဖြင့် -
“ငါလည်း မသိဘူး။ ဂျူနီယာညီမလေးက ငယ်စဉ်ကတည်းက သာမန်သူတော်စင်တွေနဲ့ မတူဘူး၊ ဆရာ့စကားနဲ့ ပြောရရင်တော့ အရမ်းရိုင်းတယ်၊ ထိန်းကျောင်းရတာ ခက်တယ်တဲ့။ ဒီနာမည်ကလည်း ပေါ့ပေါ့တန်တန်ပဲ ပေးထားတာ ဖြစ်နိုင်ပါတယ်၊ ဘာအဓိပ္ပာယ်မှ မရှိလောက်ပါဘူး”
ဟု ဆိုသည်။
ပေါ့ပေါ့တန်တန်ပဲ ပေးထားတာလား။
သူတော်စင်များမှာ နားလည်သလိုလိုဖြင့် ခေါင်းညိတ်လိုက်ကြသည်။ တကယ်လို့ ‘ချန်ချန်’ ဆိုတဲ့သူက တကယ်ရှိနေတယ်ဆိုရင်တော့ သူတို့တွေ တကယ်ကိုပဲ မနာလိုဖြစ်မိပါလိမ့်မည်။ ဒီလို သူတော်စင်မျိုးကို စိတ်ဝင်စားအောင် လုပ်နိုင်တယ်ဆိုရင်တော့ ကံကောင်းလွန်းသူပဲ ဖြစ်ရမည်။ သူတို့၏ အရှိန်အဝါကို အခွင့်ကောင်းယူပြီး ကောင်းကင်သို့ ပျံတက်သွားနိုင်မည်မှာ အသေအချာပင်။
မကြာမီပင် ချန်ချန်၏ မိန်းမ နှင့် ဇန်ထျန်တောင်တို့သည် သွေးတိုက်ပွဲ (၃၀၀) ဆက်တိုက် အောင်မြင်သွားကြသည်။ တိုက်ဆိုင်မှုတစ်ခုလား မသိသော်လည်း ဤသွေးတိုက်ပွဲ (၃၀၀) ကို တိုက်ခိုက်နေစဉ်အတွင်း သူတို့နှစ်ဦးမှာ တစ်ဦးနှင့်တစ်ဦး တစ်ခါမျှ မတွေ့ဆုံခဲ့ကြပေ။
ဤအချိန်တွင် စွမ်းအင်စုစည်းခြင်း နောက်ဆုံးအဆင့် ၊ အသက်စွမ်းအင် အဆင့် ၊ ကမ္ဘာတည်ဆောက်ခြင်း ၊ ကမ္ဘာကြီး နှင့် ကောင်းကင်နိမိတ်ဖြစ်စဥ် အဆင့် စသည့် သွေးတိုက်ပွဲစာရင်းရှိ အဆင့်မြင့်သူများ၏ လှုပ်ရှားမှုများမှာ ဖြည်းဖြည်းချင်း ရပ်တန့်သွားသည်။
ရှဲ့ထူး နှင့် ဂွေ့မြန့်တို့သည် သွေးတိုက်ပွဲစာရင်းရှေ့သို့ ပြန်ရောက်လာပြီးနောက် ဤအခြေအနေကို သတိပြုမိလိုက်သောအခါ မျက်လုံးများတွင် ထိတ်လန့်သည့် အရိပ်အယောင်များ ပေါ်လာသည်။
“အပေါ်က အကြီးအကဲကြီးတွေတောင် ဒီကိစ္စကို စိတ်ဝင်စားနေကြတာလား ”
ဂွေ့မြန့်မှာ မယုံနိုင်အောင် ဖြစ်နေသည်။
ရှဲ့ထူကလည်း တွေဝေသွားပြီး -
“ကိုးကြယ်သွေးစက်မျက်လုံးအသီး တစ်လုံးတည်းအတွက်နဲ့လား။ ဒီပစ္စည်းက ငါတို့အတွက်တော့ အဖိုးတန်ပေမဲ့ အဲ့ဒီအကြီးအကဲတွေအတွက်တော့ ဒီလောက်တောင် မတန်ဖိုးရှိလောက်ပါဘူး။
သူတို့ရဲ့ အမှတ်အသားစွမ်းအားတွေက ဘယ်လောက်တောင် ကြောက်စရာကောင်းမှန်း မသိဘူး။ ကိုးကြယ်သွေးစက်မျက်လုံးအသီးတစ်လုံးတည်းနဲ့ သူတို့ရဲ့ တိုးတက်မှုက ဘာမှ မထူးခြားတော့ဘူးလေ၊ ဘာလို့ ဒီနေရာကို စိတ်ဝင်စားနေကြတာလဲ”
ဟု မေးသည်။
“သူတို့က ဘယ်သူက သွေးရွာခန်းမရဲ့ နံပါတ် (၁) သူတော်စင် ဖြစ်မလဲဆိုတာကို ကြည့်ချင်နေတာ ဖြစ်မယ်”
ဟု ဂွေ့မြန့်က တွေးတောသည်။
အနီးအနားမှ သူတော်စင်တစ်ဦးက ရုတ်တရက် ဝင်ပြောလိုက်သည်။
“ဒီတစ်ခါ ဆုံးဖြတ်မှာက သွေးရွာခန်းမရဲ့ နံပါတ် (၁) သူတော်စင်တင် မဟုတ်ဘူး။ တစ်လောကလုံးရဲ့ နံပါတ် (၁) သူတော်စင်ကိုလည်း ဆုံးဖြတ်သွားမှာ။”
တစ်လောကလုံးရဲ့ နံပါတ် (၁) သူတော်စင်
သူတော်စင်များ၏ စိတ်ထဲတွင် တုန်လှုပ်သွားသည်။
“ဟုတ်တယ် ဒီတစ်ခါမှာ နေမင်း ခုနှစ်ပါးခန်းမ က စွမ်းအင်စုစည်းခြင်း အလယ်အဆင့် နံပါတ် (၁) တောင် ထွက်လာမှာ။ ဘယ်သူက ဒီကိုးကြယ်သွေးစက်မျက်လုံးအသီးကို အနိုင်ရမလဲ၊ သူပဲ တစ်လောကလုံးရဲ့ နံပါတ် (၁) သူတော်စင် ဖြစ်သွားမှာပဲ ”
သူတော်စင်များစွာမှာ ချက်ချင်းပင် သဘောပေါက်သွားကြပြီး ထိုတိုက်ပွဲ၏ အရေးပါပုံကို နားလည်သွားကြသည်။ အထက်ပါ အကြီးအကဲကြီးများကပင် သွေးတိုက်ပွဲများကို ရပ်နားပြီး အာရုံစိုက်နေကြသည်မှာ မထူးဆန်းတော့ပေ။
ထိုအချိန်တွင် ကြည့်ရှုသူအရေအတွက်မှာ သူတို့တစ်ခါမှ မတွေးဖူးလောက်အောင် များပြားနေလိမ့်မည်ဟု သူတို့ ခန့်မှန်းမိကြသည်။
“ဘယ်သူက အရင်ဆုံး ‘ဝူရှီ’ ကို စိန်ခေါ်လာမလဲ ”
နေရာအနှံ့မှ သူတော်စင်တို့၏ စိတ်ထဲတွင် စောင့်မျှော်နေသည့် စိတ်ခံစားမှုများ ပေါ်ပေါက်လာသည်။
ထိုအချိန်တွင် ဇန်ထျန်တောင် ၏ နာမည်မှာ တဖျပ်ဖျပ် လင်းလက်လာသည်။
ထို့နောက် ဆက်တိုက်ဆိုသလိုပင် ဝူရှီ ၏ နာမည်မှာလည်း လင်းလက်လာပါတော့သည်။
အခန်း (၂၃၈၈) - မင်းက ဖန်ချန် မဟုတ်လား
“အို… တစ်လှမ်း နောက်ကျသွားပြီ ”
ချန်ချန်၏ မိန်းမ က ခြေဆောင့်လိုက်ပြီး သူမ၏ မျက်လုံးများထဲတွင် ဒေါသအရိပ်အယောင်တစ်ခု ဖြတ်ပြေးသွားသည်။
လုယေကျွင်း က သွေးတိုက်ပွဲစာရင်းပေါ်က အခြေအနေကို ကြည့်ရင်း မရယ်ဘဲ မနေနိုင်တော့ဘဲ -
“အနာဂတ် ဂျူနီယာညီမလေးရေ၊ တစ်လှမ်းနောက်ကျတာက နောက်ကျတာပေါ့။ ဒီလိုဖြစ်တာက ပိုတောင် ကောင်းသေးတယ်။ ‘ဝူရှီ’ က ‘ဇန်ထျန်တောင်’ ရဲ့ စွမ်းအားတွေကို အရင်ဆုံး စားသုံးပေးလိုက်ပါစေဦး။ ပြီးမှ မင်းက သူ့ကို သတ်လိုက်ပါ။ ဒါမှသာ မင်း ဒီတစ်ခါ ဆရာ့ရဲ့ တပည့်အရင်း ဖြစ်လာနိုင်မလားဆိုတာကို စစ်ဆေးမယ့် အစစ်အမှန် စာမေးပွဲ ဖြစ်မှာလေ”
ဟု ရယ်မော၍ ပြောသည်။
သွေးရွာခန်းမမှ သူတော်စင်အချို့မှာ ထိုစကားကို ကြားသောအခါ အားလုံးပင် ထိတ်လန့်သွားကြသည်။ သူတို့သည် ယခုမှသာလျှင် ကိစ္စရပ်၏ အစစ်အမှန် ရည်ရွယ်ချက်ကို သဘောပေါက်သွားကြခြင်း ဖြစ်သည်။ နဂါးဖရုံသီးတစ်လုံး မှာမူ ဤကိစ္စကို ကြိုသိနှင့်နေပုံရပြီး နှုတ်ခမ်းကိုသာ မဲ့လိုက်သည်။
“အနာဂတ် ဂျူနီယာအစ်ကိုကြီး၊ ‘ဇန်ထျန်တောင်’ ကို ရင်ဆိုင်ဖို့ဆိုတာ ဒီလောက်တောင် စဉ်းစားစရာ မလိုပါဘူး။ မပြောတော့ဘူး၊ ကျွန်မ တိုက်ပွဲကို သွားကြည့်တော့မယ်။”
“ဟုတ်တယ်၊ ငါတို့လည်း သွားကြည့်ကြမယ်။”
……
သွေးရွာခန်းမ၏ တိုက်ပွဲဇုန် အသီးသီးတွင် သွေးရောင်မြူများ ကောင်းကင်မှ ကျဆင်းလာသည်ကို မြင်လိုက်ရသည်။ ပုံရိပ်များစွာမှာလည်း တစ်ခဏချင်းအတွင်းမှာပင် မူလနေရာများမှ ပျောက်ကွယ်သွားကြသည်။
လေဟာနယ်ထဲတွင်။
ဖန်ချန်မှာ အတွင်းကမ္ဘာထဲ၌ ငြိမ်သက်စွာ ရပ်တည်နေပြီး ဇန်ထျန်တောင် ကို အကဲခတ်ကြည့်ရှုနေသည်။ တစ်ဖက်လူ၏ အသက်ရှူသံ (စွမ်းအင်အရှိန်အဝါ) မှာ သူတွေ့ဖူးခဲ့သည့် စွမ်းအင်စုစည်းခြင်း အလယ်အဆင့်များအားလုံးထက် ပိုမိုအားကောင်းနေသည်မှာ အမှန်ပင်ဖြစ်သည်။
နဂါးဖရုံသီးတစ်လုံး ထက်ပင် များစွာ သာလွန်နေသည်။
၎င်းသည် ယခင်က နေမင်း ခုနှစ်ပါးခန်းမ၏ စွမ်းအင်စုစည်းခြင်း အလယ်အဆင့် နံပါတ် (၁) သူတော်စင်ထက်ပင် ပိုမိုအားကောင်းနေသည်ကို ပြသနေခြင်း ဖြစ်သည်။
ဖန်ချန်က ဇန်ထျန်တောင် ကို စောင့်ကြည့်နေသကဲ့သို့ ဇန်ထျန်တောင် ကလည်း ဖန်ချန်ကို အကဲခတ်နေသည်။
“အစ်ကိုကြီး၊ ဒီတစ်ခါတော့ အစ်ကို့ရဲ့ အငြိုးအတေးတွေ ပြေပျောက်တော့မှာပါ”
ဝမ်ဟိုက ဖန်ချန်ကို စိုက်ကြည့်ရင်း ပြောသည်။
ဝမ်ကျန်းမှာမူ အမူအရာ ရှုပ်ထွေးနေပြီး သူ၏ စွမ်းအင်အရှိန်အဝါမှာ အလွန်အားနည်းနေသည်။ အနီးအနားရှိ စွမ်းအင်စုစည်းခြင်း အလယ်အဆင့် သူတော်စင်များကိုသာ နှိုင်းယှဉ်ကြည့်မည်ဆိုလျှင် မည်သူမဆို သူ့ထက်သာလွန်နေကြပြီ ဖြစ်သည်။ ကောင်းကင်အရှင်၏ အရိုက်အရာ ဆက်ခံသူအဖြစ်မှ ယခုကဲ့သို့ အခြေအနေမျိုးသို့ ရောက်ရှိသွားခြင်းမှာ သူ၏ စိတ်ထဲတွင် လက်ခံနိုင်စရာ မရှိပေ။
ထို့ကြောင့် ဤသို့ဖြစ်အောင် ဖန်တီးခဲ့သည့် ဖန်ချန်ကိုလည်း တစ်သက်လုံး မေ့မရနိုင်သည့် ရန်သူတော်ကြီးအဖြစ် သတ်မှတ်ထားသည်။
“ကံဆိုးတာပဲ၊ ငါ့ကို အချိန်နည်းနည်းလောက်သာ ထပ်ပေးမယ်ဆိုရင် ကိုယ်တိုင် လက်စားချေနိုင်မလားပဲ၊ ဒါပေမဲ့……”
ဝမ်ကျန်းမှာ ရင်ထဲတွင် တောက်လောင်နေသည့် ဒေါသကို ဖြည်းညှင်းစွာပင် မြိုသိပ်လိုက်သည်။ ယခုအချိန်တွင်မူ သူသည် စွမ်းအင်စုစည်းခြင်း အလယ်အဆင့် နံပါတ် (၁) သူတော်စင်အပေါ်တွင်သာ မှီခိုပြီး လက်စားချေရတော့မည် ဖြစ်သည်။
လက်ရှစ်ဖက်နတ်ဘုရား က ဖန်ချန်ကို ပြုံးစစဖြင့် ကြည့်လိုက်သည်။
“မင်းတို့အထင်ကွာ ‘ဇန်ထျန်တောင်’ က သူ့ကို ဘယ်နှစ်ကွက်နဲ့ အနိုင်ယူနိုင်မလဲ”
ဟု မေးသည်။
ကြက်သားဟင်းရည် က -
“အကွက်တစ်ရာအတွင်းမှာ ဖြစ်မှာပေါ့” ဟု ဖြေသည်။
ကွက်တစ်ရာလား
လက်ရှစ်ဖက်နတ်ဘုရား ၏ မျက်လုံးများထဲတွင် မသိမသာ လှောင်ပြောင်သည့် အရိပ်အယောင်တစ်ခု ဖြတ်ပြေးသွားသည်။ သူသာလျှင် သူ၏ ညီဝမ်းကွဲ မည်မျှ ကြောက်မက်ဖွယ် ကောင်းသည်ကို သိသည်။ အကွက်တစ်ရာ တုက်ကွက်တစ်ကွက်တည်းနဲ့တင် ပြိုင်ဘက်ကို အဆုံးသတ်နိုင်လောက်သည်။ ထို့နောက် ဤခရီးစဉ်၏ အစစ်အမှန် ရည်ရွယ်ချက်ကို ဆက်လက်လုပ်ဆောင်သွားမည်။
နောင်နှစ်ပေါင်းများစွာ ကြာလျှင် လောဘကြီးသောတ်ဆိုး မျိုးနွယ်စုမှာ လောက၏ နံပါတ် (၁) အင်အားကြီးမျိုးနွယ်စု ဖြစ်လာလိမ့်မည်။
“အင်း၊ တိုက်ကွက်တစ်ရာဆိုရင် လုံလောက်ပါတယ်”
လက်ရှစ်ဖက်နတ်ဘုရား က ခေါင်းညိတ်လိုက်သည်။
တစ်ဖက်တွင်။
အမျိုးသမီးက ဖန်ချန်နှင့် ဇန်ထျန်တောင်ကို အကဲခတ်ကြည့်ရှုရင်း မနေနိုင်ဘဲ ပြောလိုက်သည်။
“မင်းသေချာလို့လား၊ ‘ဝူရှီ’ က ‘ဇန်ထျန်တောင်’ နဲ့ တန်းတူပဲလား။ သူက မင်းစောင့်နေတဲ့ သူတော်စင် ဟုတ်လို့လား။”
သူမအမြင်တွင် ဇန်ထျန်တောင် ၏ အရှိန်အဝါနှင့် သူမသိရှိထားသည့် နည်းလမ်းများအရ ဖန်ချန်မှာ ထိုသူနှင့် ယှဉ်လျှင် အများကြီး နောက်ကျနေသင့်သည်။
“ငါ သေချာပါတယ်။”
ချီကွမ်းယိက ခေါင်းညိတ်လိုက်ပြလိုက်သည်။
“ဒါပေမဲ့ သူတို့နှစ်ယောက်ထဲမှာ ဘယ်သူက ပိုသန်မာမလဲ ဆိုတာကိုတော့ မသေချာဘူး”
ဟု ဆိုသည်။
“ဒါဆိုရင်ရော ‘ချန်ချန်၏ မိန်းမ’ ကို ဘယ်လိုသဘောထားလဲ။ သူက မင်းစောင့်နေတဲ့ သူတော်စင် မဟုတ်ဘူးလား။”
အမျိုးသမီးက ပတ်ဝန်းကျင်ကို ဝေ့ကြည့်လိုက်သည်။ ထိုသူလည်း တိုက်ပွဲကို လာကြည့်နေလိမ့်မည်ဟု သူမ ခန့်မှန်းထားသည်။
“သူက မတူဘူး။ ရှန်းကျောက် ကောင်းကင်အရှင်က သူ့ကို ဆဋ္ဌမမြောက် တပည့်အဖြစ် လက်ခံဖို့ ရည်ရွယ်ထားတယ်။ ကောင်းကင်အရှင်ရဲ့ စောင့်ရှောက်မှု ရှိနေတာကြောင့် သူ့ကို ငါ တိုက်ခိုက်ဖို့ အခွင့်အရေး မရနိုင်ဘူး”
ချီကွမ်းယိက ခေါင်းခါလိုက်ပြီး -
“ဒါပေမဲ့ သူ့စွမ်းအားကလည်း တကယ်ကို မနိမ့်ပါဘူး” ဟု ပြောသည်။
အမျိုးသမီးက နားလည်သလိုဖြင့် ခေါင်းညိတ်လိုက်သည်။
……
“အနာဂတ် ဂျူနီယာညီမလေး၊ ခဏနေရင် ‘ဇန်ထျန်တောင်’ ရဲ့ နည်းလမ်းတွေကို သေချာကြည့်ထားပါ။ သူ့ရဲ့ ‘ဝါမြိုခြင်း’ နည်းလမ်းကိုသာ သတိထားရင် ရပါပြီ။ တခြားသူ့ဆီမှာ မင်းကို ဒဏ်ရာရစေမယ့် မှော်ပညာ မရှိပါဘူး”
လုယေကျွင်း က ပြုံး၍ သတိပေးသည်။
နဂါးဖရုံသီးတစ်လုံး ၏ မျက်လုံးများထဲတွင် ရှုပ်ထွေးသည့် အရိပ်အယောင်တစ်ခု ပေါ်လာသည်။ တစ်ခါတရံတွင် ထိုကဲ့သို့သော အင်းအားကြီးနွယ်စုများမှ ကောင်းကင်အရှင်၏ အရိုက်အရာ ဆက်ခံသူများနှင့် ရင်ဆိုင်ရသည့်အခါ သူတို့ကဲ့သို့သော သူတော်စင်များမှာ မွေးရာပါ ကွာဟချက်ရှိနေမြဲပင်။
မျိုးနွယ်စု၏ ကံကြမ္မာ နတ်ဘုရားစွမ်းရည်မှာ သာမန်မျိုးနွယ်စုကြီးများ လုံးဝမမီနိုင်သော အရာဖြစ်သည်။ ကံကောင်းသည်မှာ ထိပ်တန်းမျိုးနွယ်စုဝင်တိုင်းက ထိုနတ်ဘုရားစွမ်းရည်ကို မရရှိကြခြင်း ဖြစ်သည်။ မဟုတ်ပါက သာမန်သူတော်စင်များအတွက် လောကကြီးတွင် နေရာမရှိတော့ပေ။
ချန်ချန်၏ မိန်းမ မှာ လုယေကျွင်း ၏ သတိပေးချက်ကို မကြားလိုက်ပုံရပြီး ဖန်ချန်ကိုသာ စိတ်ဝင်တစား စိုက်ကြည့်နေသည်။
“တစ်ခုခု လွဲနေတယ်၊ ဒီအရှိန်အဝါက…… အင်း……”
ချန်ချန်၏ မိန်းမ၏ မျက်လုံးများ ရုတ်တရက် လင်းလက်သွားသည်။
“အနာဂတ် ဂျူနီယာညီမလေး၊ ဘာဖြစ်လို့လဲ။”
လုယေကျွင်း က မျက်မှောင်ကြုတ်၍ မေးသည်။
“ဘာမှ မဖြစ်ပါဘူး။ တိုက်ပွဲကိုပဲ ကြည့်ကြရအောင်။ ‘ဇန်ထျန်တောင်’ ကို ရင်ဆိုင်ဖို့ တာဝန်ကတော့ ငါ့အထိ ရောက်မလာတော့ဘူး ထင်တယ်”
ဟု ချန်ချန်၏ မိန်းမ က ပြုံး၍ ပြောသည်။
“ဟူးးးး"
သူတော်စင်များအားလုံး အံ့အားသင့်သွားကြသည်။
ဖြစ်နိုင်ပါ့မလား
ဒီလူက ‘ဝူရှီ’ ကို ဒီလောက်ထိ အကဲဖြတ်မြင့်မားနေတာလား။
လုယေကျွင်း က အမူအရာမဲ့စွာဖြင့် -
“တကယ်လား။ သတင်းတွေအရ ‘ဇန်ထျန်တောင်’ က အတွင်းကမ္ဘာ (၃) ခုကို စားသုံးပြီးပြီတဲ့။ သူ့ရဲ့ အတွင်းကမ္ဘာအခြေခံနဲ့ နတ်ဘုရားစွမ်းရည်အရေအတွက်က အဆင့်တူတွေထက် အများကြီး သာလွန်တယ်။ ချီကွမ်းယိတောင်မှ မနှစ်ကတည်းက သူ့ကို စောင့်နေတာ။ မင်းသေချာလို့လား ‘ဝူရှီ’ က ပိုနိုင်မယ်လို့ ”
“ငါ သေချာပါတယ်။”
ချန်ချန်၏ မိန်းမ က ယုံကြည်မှုအပြည့်ဖြင့် ခေါင်းညိတ်လိုက်သည်။
“ဘာကို အခြေခံပြီး ပြောတာလဲ။”
“မိန်းမတွေရဲ့ ဆဋ္ဌမအာရုံကြောင့်ပေါ့။”
“……”
သူတော်စင်များ၏ ရင်ထဲတွင် ထိတ်လန့်သွားသည့်စိတ်များ လျော့ကျသွားသည်။ အကြောင်းရင်းက မိန်းမတွေရဲ့ ဆဋ္ဌမအာရုံတဲ့လား၊ ဒါတွေက ဘယ်တုန်းကမှ တိကျတာ မဟုတ်ပါဘူးလေ။
……
“ရှဲ့ထူ၊ ဒီတစ်ခါတော့ သူတော်စင်တွေ အများကြီး ရောက်လာကြတယ်။ ကြည့်စမ်း၊ ဒီအစုလိုက်အစုလိုက်နဲ့ လေဟာနယ်တောင် နေရာလောက်တော့မှာ မဟုတ်ဘူး ”
ဂွေ့မြန့်က ပတ်ဝန်းကျင်ကို ကြည့်ရင်း အံ့အားသင့်စွာ ပြောသည်။
ရှဲ့ထူက ခေါင်းညိတ်လိုက်သည်။
“သာမန်ပါပဲ၊ ဒီတိုက်ပွဲက အကျိုးသက်ရောက်မှု အရမ်းကြီးမားတော့ ကောင်းကင် ငါးပါးဘက်က အကြီးအကဲတွေလည်း လျှို့ဝှက်ကြည့်ရှုနေမှာပါ”
ဟု ပြောသည်။
“မင်းပြောတာ ကောင်းကင် ငါးပါးရဲ့ အထွတ်ထိပ်တာအို …… မဟုတ်ဘူး ကောင်းကင်အရှင် သူတော်စင်တွေပါ ကြည့်နေတာလား”
ဂွေ့မြန့်မှာ ထိတ်လန့်စွာဖြင့် အသက်ရှူမှားသွားသည်။
“ဖြစ်နိုင်ခြေ ရှိပါတယ်”
ရှဲ့ထူက ဖန်ချန်ကို ကြည့်၍ လွမ်းဆွတ်စွာ ပြောသည်။
“ဘယ်တော့များမှ ငါတို့ရဲ့ သွေးတိုက်ပွဲတွေက ဒီလောက်အထိ အာရုံစိုက်ခံရမလဲ၊ ဒီဘဝမှာ ဒီလိုအဆင့်ကို ရောက်ရင်ပဲ ကျေနပ်ပါပြီ။”
“စကားတစ်ခွန်း ပြောရမလား၊ ပြောသင့်၊ မပြောသင့် မသိဘူး။”
ဂွေ့မြန့်က ပြောသည်။
“ဘာလဲ။”
“ငါ တကယ်ပဲ ဒါတိိုး ကို မနာလိုဖြစ်မိတယ်”
ဂွေ့မြန့်က ခံစားချက်ဖြင့် ပြောသည်။
“……”
ရှဲ့ထူမှာ အမူအရာ ရှုပ်ထွေးသွားသည်။
ဒါတိုး သေသွားတာကို သိရင်လည်း ဝမ်းမြောက်နေမှာပါ။ ဒီလို အဆင့်မြင့်သူရဲ့ လက်ချက်နဲ့ သေရတာက တစ်ရာ၊ တစ်ထောင်မှာမှ တစ်ခါ ဖြစ်ခဲတဲ့ ကံတရားပဲ မဟုတ်ပါလား။
ဤအချိန်တွင် ဖန်ချန်နှင့် ဇန်ထျန်တောင် ၏ အတွင်းကမ္ဘာပေါ်ရှိ သွေးရောင်မြူများမှာ ဖြည်းဖြည်းချင်း လျော့ကျသွားသည်။
တိုက်ပွဲ စတော့မည်ဖြစ်သည်။
အသီးသီးသော သူတော်စင်များ၏ တီးတိုးစကားသံများ ရပ်တန့်သွားပြီး တစ်ခုလုံး လေဟာနယ်မှာ အလွန်တိတ်ဆိတ်သွားသည်။ ဖန်ချန်ရော ဇန်ထျန်တောင် ပါ တစ်ခွန်းမှ မပြောကြဘဲ သွေးရောင်မြူများ ကုန်စင်သွားမည့်အချိန်ကို စောင့်ဆိုင်းနေကြသည်။
သို့သော် နောက်ဆုံးအချိန်လေးတွင် ဇန်ထျန်တောင်က ရုတ်တရက် စကားပြောလာသည်။
“မင်းက ဖန်ချန် မဟုတ်လား။”
“ဖန်ချန် ”
“ဘယ်သူလဲ၊ သူက ဖန်ချန်တဲ့လား ”
“ဖန်ချန်က ဘယ်သူလဲ။”
“ဖြစ်နိုင်ပါ့မလား၊ တကယ်ပဲ ဖန်ချန်တဲ့လား ”
“ဖန်ချန်ဆိုတာ ဘယ်သူလဲ ”
“ နေမင်းခုနှစ်ပါးခန်းမမှာ အရင်က စွမ်းအင်စုစည်းခြင်း အစောပိုင်းအဆင့် နံပါတ် (၁) သူတော်စင်၊ သွေးတိုက်ပွဲစာရင်းမှာ နာမည်ကျော်တဲ့လူလေ။”
“အဲ့ဒါ ရှုကျန့် မဟုတ်ဘူးလား၊ ငါ မှားနေတာလား”
“ရှုကျန့်ထက် အရင်ကလူ။”
“အော်……”
တိတ်ဆိတ်နေသော လေဟာနယ်မှာ ရုတ်တရက် အလွန်ပင် ဆူညံသွားသည်။
လက်ရှစ်ဖက်နတ်ဘုရား ၏ မျက်နှာမှာ အလွန်ပင် ရုပ်ဆိုးသွားသည်။
“အဲ့ဒီကောင်ပဲ”
“မသေချာသေးဘူး၊ ဒါပေမဲ့ မင်းရဲ့ ညီဝမ်းကွဲရဲ့ ဒီတစ်ကွက်ကတော့ စိတ်ဝင်စားဖို့ ကောင်းတယ်။ သူက ဖန်ချန် ဖြစ်ဖြစ်၊ မဖြစ်ဖြစ်၊ ဖန်ချန်ကတော့ ပြဿနာ တက်တော့မှာပဲ”
ကြက်သားဟင်းရည် က ခံစားချက်ဖြင့် ပြောသည်။
လက်ရှစ်ဖက်နတ်ဘုရား မှာ ချက်ချင်းပင် သဘောပေါက်သွားသည်။
ယခုအချိန်တွင် ကောင်းကင် ငါးပါးမှ လာသော သူတော်စင်များ၏ စိတ်ထဲတွင် လန်းဆန်းသွားပြီး ဖန်ချန်ကို ကြည့်သော မျက်လုံးများမှာ ပိုမိုပြင်းပြသည့် စိတ်ဝင်စားမှုများဖြင့် ပြည့်နှက်လာသည်။