အခန်း (၂၃၉၇-၂၃၉၈)
Vol. 240 Ch. 2397-2398
အခန်း (၂၃၉၇) - တိုက်ပွဲ
“သူ ချီကွမ်းယိ လက်ထဲမှာ တစ်နာရီကြာ တောင့်ခံနိုင်လိမ့်မယ်လို့ တကယ်ပဲ မထင်ထားမိဘူး။”
လုယေကျွင်း က ကိုယ့်ဘာသာကိုယ် ရေရွတ်လိုက်သည်။
“ဒီကောင်က ဘယ်ကနေ ပေါ်လာတာလဲ၊ တစ်ယောက်ယောက်များ သိသလား”
“အစ်ကိုကြီး၊ ‘ဝူရှီ’ အစ်ကိုက ချီကွမ်းယိ လက်ထဲမှာ တစ်နာရီတောင့်ခံနိုင်ရုံတင် မဟုတ်ဘူး၊ ဒီသွေးတိုက်ပွဲမှာ သူနိုင်သွားလိမ့်ဦးမယ်”
နတ်မိမယ်ယွီ က ပြောလိုက်သည်။
“ရှောင်ယွီ၊ မင်း ဖျားနေတာလား”
လုယေကျွင်း က သတိပြန်ဝင်လာပြီး သူမကို ထူးဆန်းသော အမူအရာဖြင့် ကြည့်လိုက်သည်။
“မင်း ‘ဝူရှီ’ ဆိုတဲ့ ကောင်လေးကို မြင်မြင်ချင်းပဲ ချစ်မိသွားတာလား။ မင်းတို့က လူမျိုးချင်းတောင် တူမှာမဟုတ်ဘူး၊ ဒီလိုမိုက်မဲတဲ့ အလုပ်မျိုး မလုပ်ပါနဲ့ ”
နတ်မိမယ်ယွီ စကားမဆိုခင်မှာပင် လုေယေကျွင်း က စကားဆက်ပြောသည်။
“ချီကွမ်းယိ ဆိုတာ ဘယ်သူလဲ။ သူက လောဘကြီးသော နတ်ဆိုး မျိုးနွယ်စု မဟုတ်ဘူး၊ သူက ချီထျန်မျိုးနွယ်စု။
ချီထျန် မျိုးနွယ်စုရဲ့ မျိုးနွယ်စုကံကြမ္မာ နတ်ဘုရားစွမ်းရည်က ဘာလဲ”
“ချီထျန် အကြီးစား ကျောက်စာမှတ်တမ်း”
အခြားသူတော်စင် တစ်ဦးက ရှုပ်ထွေးသော အမူအရာဖြင့် ပြောသည်။
“ငါတို့မျိုးနွယ်စုရဲ့ ချီထျန် အကြီးစား ကျောက်စာမှတ်တမ်းက ပြိုင်ဘက် ပိုသန်မာလေ၊ ကိုယ်က ပိုသန်မာလေပဲ ”
“ကြားလိုက်တယ်မဟုတ်လား သူက ချီထျန် မျိုးနွယ်စုက၊ သူ့ကိုပဲ မေးကြည့်လိုက်၊ ချီထျန် မျိုးနွယ်စုရဲ့ အကြီးစား ကျောက်စာမှတ်တမ်းက ဘယ်လောက်တောင် ထူးခြားသလဲဆိုတာကို။
လောဘကြီးသောနတ်ဆိုး မျိုးနွယ်စုရဲ့ ဟွမ်ချွမ်တွင်းနက် ထက် အဆပေါင်းများစွာ ပိုသန်မာတယ် ”
လုယေကျွင်း က လှောင်ပြောင်လိုက်သည်။
“အဲ့ဒီလောက်တော့လည်း မပြောနဲ့ပေါ့”
ချီထျန် မျိုးနွယ်စုဝင် သူတော်စင်က ခေါင်းကို အနည်းငယ် ခါယမ်းကာ ပြောသည်။
“တစ်မျိုးစီမှာ သူ့အားသာချက်နဲ့သူ ရှိတယ်လို့ပဲ ပြောရမှာ။ ဟွမ်ချွမ်တွင်းနက် က တချို့နေရာတွေမှာ ချီထျန် အကြီးစား ကျောက်စာမှတ်တမ်းထက် ပိုသာတဲ့ အချက်တွေ ရှိတယ်။
ဒါပေမဲ့ သွေးတိုက်ပွဲလိုမျိုး နေရာမှာတော့ ချီထျန် အကြီးစား ကျောက်စာမှတ်တမ်းက အကောင်းဆုံး ခုခံမှုနဲ့ အကောင်းဆုံး တိုက်ခိုက်မှုတွေကို ပိုင်ဆိုင်ထားတယ်။
ငါသာ ဒီစွမ်းရည်ကို နားလည်သဘောပေါက်နိုင်ရင် ငါ့ရဲ့စွမ်းအားက အဆမတန် တိုးပွားလာမှာ အသေအချာပဲ။”
“ဒါဆိုရင်လည်း ‘ဝူရှီ’ အစ်ကိုရဲ့ ပြိုင်ဘက်တော့ မဖြစ်နိုင်ပါဘူး”
နတ်မိမယ်ယွီ ၏ မျက်ဝန်းအောက်ခြေတွင် စိုးရိမ်စိတ်တစ်ခု ဖြတ်သန်းသွားသော်လည်း ပါးစပ်ကတော့ မလျှော့တမ်း ပြောလိုက်သည်။
“အေးပါ၊ အေးပါ... ‘ဝူရှီ’ အစ်ကိုက အသန်မာဆုံးဆိုပါတော့။ တစ်နာရီတောင် တောင့်ခံနိုင်တယ်ဆိုတာကလည်း တကယ်ကို သန်မာတာပါပဲ...”
လုယေကျွင်း သည် နတ်မိမယ်ယွီ အငြင်းပွားနေရန် စိတ်မပါတော့ဘဲ စိတ်ပျက်လက်ပျက်ဖြင့် ကိုယ့်ဘာသာကိုယ် ရေရွတ်လိုက်သည်။
...
ဟင်းလင်းပြင်
“ရှန်းကျောက်၊ မင်းတို့ အရမ်းလွန်နေပြီ။ ငါတို့ သူတို့ရဲ့ အခြေအနေကို ကြည့်တာတောင် ခွင့်မပြုဘူးလား”
“ဟုတ်တယ်လေ၊ တိုက်ပွဲကို ကြည့်တာပဲလေ၊ ဒါတောင် မရဘူးလား ”
“ငါတို့ကို စိတ်အနှောင့်အယှက် ပိုပေးရင် မင်းတို့ရဲ့ မငြိမ်သက်သော ဒေသ ကို တပ်လွှတ်ပြီး ဖြိုခွင်းပစ်မှာ၊ ယုံလား”
“စမ်းကြည့်ပါလား မင်းတို့ရဲ့ လက်သည်းခြေသည်းတွေကို ဒီဘက်ကို ထိုးသွင်းရဲရင် တန်းပြီး ဖြတ်ထုတ်ပစ်မှာ။ မယုံရင် လာခဲ့လေ။”
“မင်းတို့လည်း အမှန်တရားနဲ့ ပြောကြပါဦးလား”
“အမှန်တရား မငြိမ်သက်သော ဒေသ မှာ သူတို့ရဲ့ ကိုယ်ပိုင် အမှန်တရား ရှိတယ်။
သွေးရွာခန်းမ မှာလည်း ကိုယ်ပိုင် စည်းကမ်း ရှိတယ်။
မင်းတို့ ကြည့်ချင်ရင် ‘သွေးရွာခန်းမ’ ရဲ့ သူတော်စင် ဖြစ်လာပြီးမှ ကြည့်ကြ။
ပြီးတော့ အချိန်မီ ကြည့်ရမယ်။ အချိန်လွန်သွားရင်တော့ မင်းတို့ ဘာမှ မြင်ရမှာ မဟုတ်ဘူး။”
“ အေးပါ၊ မင်းတို့ပဲ အနိုင်ယူသွားပါ ”
...
ချင်းမင် အဆင့်မြင့်ဆုံး မဟာမိတ်အဖွဲ့။
ရွှေဟွေး အကယ်ဒမီ။
လူသားမျိုးနွယ်စု ကျောင်းတော်။
အောက်ဝူဖား သည် ကောင်းကင်နိမိတ်ဖြစ်စဥ် အဆင့် သူတော်စင် အချို့နှင့်အတူ လူသားမျိုးနွယ်စု ကျောင်းတော်သို့ ရောက်ရှိလာသည်။
‘နင်’ ကျောင်းတော်အုပ်ကြီးသည် သတင်းရသည်နှင့် တစ်ပြိုင်နက် ကာကွယ်ရေးဆရာ များအား ခေါ်ဆောင်ကာ လာရောက် ကြိုဆိုကြသည်။
သူတို့သည် အောက်ဝူဖား ၏ ဘေးတွင် ရှိနေသော ကြီးကြပ်ရေးမှူးရုံးမှ သူတော်စင်များကို မြင်လိုက်ရသည့်အခါ အားလုံး၏ အမူအရာတို့မှာ ချက်ချင်း ပြောင်းလဲသွားသည်။
“ဝူဖားညီ၊ ဒီတစ်ခါ ဘာကိစ္စနဲ့ ရောက်လာတာလဲ။ ဒီကာလအတွင်းမှာ...
လူသားမျိုးနွယ်စု ကျောင်းတော်မှာ ကြီးကြပ်ရေးမှူးရုံးက ဝင်ရောက်စွက်ဖက်ရလောက်တဲ့ အရေးကြီးတဲ့ ကိစ္စမျိုး မဖြစ်ပွားပါဘူး၊ ဟုတ်တယ်မလား။
ဒါမှမဟုတ် အရင်က ဖန့်ချန် ကို ချောင်းမြောင်း တိုက်ခိုက်ခဲ့တဲ့ လူယုတ်မာတွေနဲ့ ပတ်သက်ပြီး အရိပ်အမြွက် ရသွားတာလား ”
‘နင်’ ကျောင်းတော်အုပ်ကြီးက လက်ယှက်ကာ ပြုံး၍ မေးလိုက်သည်။
အောက်ဝူဖား က မျက်စိဖြင့် အချက်ပြလိုက်သည်။
ချွေ့ဟုန်ကျူး သည် သူ့ကို တစ်ချက်ကြည့်လိုက်ပြီးမှ ‘နင်’ ကျောင်းတော်အုပ်ကြီးကို ပြုံး၍ ပြောလိုက်သည်။
“ဘာမှ မဟုတ်ပါဘူး၊ ငါတို့က ကျောင်းတော်အုပ်ကြီးရဲ့ အမိန့်အရ ဖန့်ချန် မကြာသေးခင်က ကျင့်ကြံရင်း အခက်အခဲ တစ်စုံတစ်ရာ ရှိနေမလားလို့ ကြည့်ရှုဖို့ လာတာပါ။
သူ အခု ဒီမှာ ရှိသေးလား ”
“ဖန့်ချန် လား”
‘နင်’ ကျောင်းတော်အုပ်ကြီးမှာ ကြီးကြပ်ရေးမှူးရုံး၏ ရည်ရွယ်ချက်မှာ ဖန့်ချန် ကို ရည်ရွယ်နေလိမ့်မည်ဟု မထင်မှတ်ထားခဲ့ပေ။ ပြီးတော့ ကျောင်းတော်အုပ်ကြီး ကိုယ်တိုင် အမိန့်ပေးတာလား။
ချင်းဂွေ့ နှင့် အခြား ကာကွယ်ရေးဆရာ များမှာ တစ်ဦးကိုတစ်ဦး ကြည့်လိုက်ကြပြီး စိတ်ထဲတွင် သံသယများ ဖြစ်ပေါ်နေကြသည်။
ချက်ချင်းပင် သူတော်စင်များအားလုံး ဖန့်ချန် ၏ ကျင့်ကြံရာ ဂူရှေ့သို့ ရောက်ရှိသွားသော်လည်း အချိန်အတော်ကြာ ခေါ်သော်လည်း လူအရိပ်အယောင်မျှ မတွေ့ရပေ။ ချွေ့ဟုန်ကျူး ၏ မျက်လုံးထဲတွင် ထက်မြက်သော အလင်းရောင်တစ်ခု ဖြတ်သန်းသွားသည်။
“ကြည့်ရတာ ဖန့်ချန် က ကျောင်းတော်မှာ မရှိဘူး ထင်တယ်”
ချွေ့ဟုန်ကျူး က စဉ်းစားဟန်ဖြင့် ပြောသည်။
“သူများနဲ့များ ပြဿနာ တက်ထားလို့လား”
‘နင်’ ကျောင်းတော်အုပ်ကြီးက တွေးတောနေသည်။
“အဲ့ဒီလိုတော့ မဟုတ်ပါဘူး”
‘ချွေ့ဟုန်ကျူး’ က ပြုံးလိုက်သည်။
“ငါတို့ ကရုဏာတောင် ကို သွားကြည့်မယ်၊ ဖြစ်နိုင်ရင် သူ အဲ့ဒီမှာ ရှိနေမှာပါ။”
မျက်စိတစ်မှိတ်အတွင်းမှာပင် သူတော်စင်များအားလုံး ‘ကရုဏာတောင်’ သို့ ရောက်ရှိသွားကြသည်။
သို့သော် ‘ကရုဏာတောင်’ မှာ အလွန်ပင် တိတ်ဆိတ်နေပြီး တစ်ယောက်မျှ မရှိသကဲ့သို့ ဖြစ်နေသည်။
သူတော်စင်များက ပတ်ဝန်းကျင်ကို လှည့်ပတ်ကြည့်ရှုကြသော်လည်း လူအရိပ်အယောင်မျှ မတွေ့ရပေ။
“ကရုဏာတောင် မှာ ဘာဖြစ်တာလဲ ”
သူတော်စင်များ၏ အမူအရာတို့မှာ အနည်းငယ် ပြောင်းလဲသွားသည်။
မူလကပင် ‘ချွေ့ဟုန်ကျူး’ တို့ ရောက်လာခြင်းကို သံသယ ဖြစ်နေခဲ့ကြသည်။
ယခု ကရုဏာတောင် ၏ မြင်ကွင်းက သူတို့ကို ပို၍ပင် အံ့ဩသွားစေသည်။
“ကရုဏာတောင် က သူတော်စင်တွေ တစ်ယောက်မှ မရှိတော့တာလား။”
ချွေ့ဟုန်ကျူး က စဉ်းစားဟန်ဖြင့် ပြောသည်။
“ကြည့်ရတာ သူတို့ အပြင်ကို လေ့လာရေး ခရီးထွက်သွားတာ ဖြစ်မယ်။
ကရုဏာတောင် က အမြဲတမ်း ပညာရှိစာပေတွေကိုပဲ ဖတ်ရှုပြီး ပြင်ပကိစ္စတွေကို စိတ်မဝင်စားကြဘူး။
သွေးသံ ရန်ဖြစ်တာတွေကို စိတ်မဝင်စားကြဘဲ နေရာအနှံ့က ရှုခင်းတွေကိုပဲ စိတ်ဝင်စားကြတာလေ။”
‘နင်’ ကျောင်းတော်အုပ်ကြီးက ပြောသည်။
‘ချွေ့ဟုန်ကျူး’ က ခေါင်းကို အသာအယာ ညိတ်လိုက်ပြီး နောက်ထပ် ဘာမှ မပြောတော့ပေ။
ချက်ချင်းပင် သူတော်စင်များမှာ လူသားမျိုးနွယ်စု ကျောင်းတော် တစ်ခုလုံးကို လှည့်ပတ် ရှာဖွေကြပြီး သူတော်စင် အတော်များများကို မေးမြန်းခဲ့သော်လည်း ဖန့်ချန် ကို မတွေ့မြင်ဖူးကြောင်းသာ ပြောကြသည်။
“အားလုံးပဲ ကျေးဇူးတင်ပါတယ်။ ဒီကိုလာတာ တခြားကိစ္စမရှိပါဘူး၊ ငါတို့ ပြန်ပြီး အစီရင်ခံပါဦးမယ်။”
‘ချွေ့ဟုန်ကျူး’ က ယဉ်ကျေးစွာ လက်ယှက်ကာ နှုတ်ဆက်သည်။
‘နင်’ ကျောင်းတော်အုပ်ကြီးတို့ကလည်း ယဉ်ကျေးစွာဖြင့် ပြန်လည် နှုတ်ဆက်လိုက်ကြသည်။
‘ချွေ့ဟုန်ကျူး’ တို့ ထွက်ခွာသွားပြီးနောက် ‘နင်’ ကျောင်းတော်အုပ်ကြီး၏ အမူအရာမှာ တည်ကြည်သွားသည်။
“ဆရာတွေကို ခေါ်ပြီး နေရာအနှံ့ ရှာခိုင်းလိုက်ပါ။ ပြီးတော့ မင်းတို့ရဲ့ ဆက်သွယ်ရေးကွန်ရက်တွေကို အသုံးပြုပြီး ဖန့်ချန် နဲ့ ကရုဏာတောင် က သူတော်စင်တွေ ဘယ်မှာ ရှိနေလဲဆိုတာကို စုံစမ်းပေးကြပါ။”
“ဟုတ်ကဲ့။”
ချင်းဂွေ့ တို့က ခေါင်းညိတ်လိုက်သည်။
ဘာဖြစ်ပျက်နေမှန်း သူတို့ မသိကြသော်လည်း ဤကိစ္စမှာ ရိုးရှင်းသည်ဟု မထင်ကြပေ။
မဟုတ်ပါက ကျောင်းတော်အုပ်ကြီး ကိုယ်တိုင်က ကြီးကြပ်ရေးမှူးရုံးမှ သူတော်စင်တွေကို လာရောက်ခိုင်းပါ့မလား။
...
သွေးတိုက်ပွဲ
တိုက်ပွဲမှာ ဆက်လက် ဖြစ်ပွားနေဆဲပင်။
ဖန့်ချန် နှင့် ချီကွမ်းယိ တို့မှာ ပင်ပန်းနွမ်းနယ်သည်ဟု မသိကြတော့ပေ။
တိုက်လေ ပိုပြင်းထန်လာလေဖြစ်သည်။
နှစ်ဦးစလုံး၏ နတ်ဘုရားစွမ်းရည် ရေစီးကြောင်းမှာ အစမှအဆုံး မည်သည့်အခါမျှ မကုန်ခန်းသွားပေ။
သို့သော် ထိုဖြစ်စဉ် တစ်လျှောက်လုံးတွင် သူတို့သည် ကျင့်ကြံခြင်းအဆင့်ကို တည်ငြိမ်စေရန်အတွက် ‘ဒိန်ရွှမ်း’ အသီးများကို အဆက်မပြတ် စားသုံးနေကြရပြီး မထိန်းချုပ်နိုင်ဘဲ ကျင့်ကြံခြင်းအဆင့် တိုးတက်သွားခြင်းမှ ကာကွယ်နေကြရသည်။
ထိုကာလအတွင်း ဖန့်ချန် မှာ အားသာချက်ရှိလိုက်၊ အားနည်းချက်ရှိလိုက် ဖြစ်နေသည်။
အားနည်းနေချိန်တွင် တစ်နာရီကြာအောင် ဖိအားပေးခံထားရပြီး ဒဏ်ရာများဖြင့် ပြည့်နှက်နေသည်။
အားသာနေချိန်တွင် ချီကွမ်းယိ တောင်မှ ပြန်လည် မတုံ့ပြန်နိုင်ပေ။
သို့သော် ချီကွမ်းယိ ၏ ဒဏ်ရာများနှင့် တိုက်ခိုက်မှုများကို ‘ချီထျန် အကြီးစား ကျောက်စာမှတ်တမ်း’ ဖြင့် အပြည့်အဝ ပြန်လည် ကုသနိုင်ခဲ့သည်။
ဒဏ်ရာရလျှင် ချက်ချင်း ပြန်ကောင်းသွားသည်။
အချိန်အနည်းငယ် တည်ငြိမ်ပြီး စုပ်ယူလိုက်တိုင်းတွင်...
ချီကွမ်းယိ ၏ ‘ချီထျန် အကြီးစား ကျောက်စာမှတ်တမ်း’ မှာ လက်ရှိထက် အဆမတန် သာလွန်သော စွမ်းအားကို ပေါက်ကွဲထုတ်လွှတ်ပြီး ဖန့်ချန် ကို ခေါင်းမဖော်နိုင်အောင် ဖိနှိပ်လိုက်သည်။
ဒါဟာ ဖန့်ချန် အတွက် သမိုင်းတစ်လျှောက် တစ်ဦးတည်း ရင်ဆိုင်ရသည့် အခက်ခဲဆုံး တိုက်ပွဲပင် ဖြစ်သည်။
အခြားမရှိ
အရင်က မဟာရှ မှာ သူ သေလုနီးပါး ဖြစ်ခဲ့စဉ်ကတောင် ချီသန့်စင်ခြင်း ကျင့်ကြံခြင်းအဆင့် နှင့် ဝိညာဥ်သန္ဓေသား အဆင့် ကို ရင်ဆိုင်ခဲ့ရခြင်း ဖြစ်သည်။
ယခုတစ်ကြိမ်တွင် နှစ်ဖက်စလုံးမှာ စွမ်းအင်စုစည်းခြင်း သူတော်စင် အဆင့်ချင်းတူညီပြီး ချီကွမ်းယိ က သူထက် အဆင့် အနည်းငယ်သာ ပိုမြင့်နေခြင်း ဖြစ်သည်။
“အရမ်းသန်မာတယ်၊ လီဝူ ဒီချီကွမ်းယိ က အရမ်းသန်မာလွန်းတယ် ဖန့်ငရဲမင်း ဒီနှစ်ပေါင်းများစွာအတွင်း သူများအနိုင်ကျင့်တာကို ခံရတာ ဒါပထမဆုံးပဲ ”
‘ချီယန်’ သူတော်စင်မှာ ဤတိုက်ပွဲ၏ အန္တရာယ်ကို အပြည့်အဝ ခံစားရပြီး သွေးတို့ ပွက်ပွက်ဆူလာသည်။
“ဒါက အရှင်သခင် သူတော်စင်အဆင့် ကန့်သတ်ချက်ကို ချိုးဖျက်ဖို့ အကောင်းဆုံး အခွင့်အရေးပဲ။
ချီကွမ်းယိ ရဲ့ နတ်ဘုရားစွမ်းရည် အမှတ်အသားက အရှင်သခင်ထက် မသာလွန်သလို ဇန်ထျန်တောင်ထက်လည်း မသာလွန်ပေမယ့် သူ့ရဲ့ အတွင်းကမ္ဘာရဲ့ အဆင့်အတန်းက ကောင်းကင်ဘုံအရှင်အောက်အဆင့်အထိ ရောက်နေလောက်ပြီ။
အတွင်းကမ္ဘာဘက်မှာဆိုရင် အရှင်သခင်နဲ့ သူ့ကြားမှာ အဆင့်နှစ်ဆင့်လောက် ကွာခြားနေတယ်။
ဒါက ပြိုင်ဘက်ရဲ့ နတ်ဘုရားစွမ်းရည် အရေအတွက် ကွာဟချက်ကို ဖြည့်ဆည်းပေးနိုင်မှာပဲ။”
လီဝူ ၏ စိတ်ခံစားမှုမှာ အလွန်ပင် လေးနက်နေသည်။
ပြိုင်ဘက် အသုံးပြုနေသော နတ်ဘုရားစွမ်းရည်များတွင် ကမ္ဘာငယ် ၊ ကမ္ဘာကြီး ၊ ကောင်းကင်နိမိတ်ဖြစ်စဉ်၊ အထွတ်ထိပ်တာအို ၊ ကောင်းကင်ဘုံအရှင် ဟူသော အဆင့် (၅) မျိုး၏ အရှိန်အဝါတို့ ပါဝင်နေသည်။
ဖန့်ချန် ဘက်တွင်မူ နတ်ဘုရားစွမ်းရည်၏ စွမ်းအားမှာ ကောင်းကင်နိမိတ်ဖြစ်စဉ် အဆင့်သာ ဖြစ်သည်။
ဒါပေမဲ့ ဒီကွာဟချက်ကြောင့်သာ ပြိုင်ဘက်က သူ့အတွက် သူတော်စင်အဆင့် ကန့်သတ်ချက်ကို ချိုးဖျက်နိုင်မည့် ခြေလှမ်းဖြစ်လာသည်။
သူသာ အဲ့ဒီအပေါ်ကို တက်လှမ်းနိုင်ရင် ဒီတစ်ခါ သူတော်စင်အဆင့် ကန့်သတ်ချက်ကို ချိုးဖျက်နိုင်ဖို့က အဆင်ပြေသွားပြီ။
ထိုအချိန်တွင် လီဝူ နှင့် ချီယန် သူတော်စင်တို့မှာ ပြင်းထန်စွာ တုန်ယင်သွားသည်။
ချီကွမ်းယိ တစ်ဖန် ပြန်လည် ပေါက်ကွဲထွက်လာသည့် ကြောက်မက်ဖွယ် နတ်ဘုရားစွမ်းရည် ရေစီးကြောင်းကို တွေ့လိုက်ရသည်။
ဖန့်ချန် ၏ သိုင်းသူတော်စင် ကိုယ်ထည်မှာ ထိုရေစီးကြောင်းကို ရင်ဆိုင်ရချိန်တွင် တစ်ချက်တည်းဖြင့် မိုင်ပေါင်း တစ်သောင်းကျော်သို့ နောက်ဆုတ်သွားသည်။
ချီကွမ်းယိ က လက်မလျှော့ဘဲ တိုက်ရိုက် လိုက်လံ တိုက်ခိုက်ကာ မုန်တိုင်းကဲ့သို့ ပြင်းထန်သော တိုက်ခိုက်မှုများကို ဆက်လက် ပြုလုပ်သည်။
ခဏတာအတွင်းမှာပင် တိုက်ခိုက်မှုပေါင်း သောင်းနှင့်ချီ၍ သိုင်းသူတော်စင် ကိုယ်ထည်ပေါ်သို့ ကျရောက်သွားသည်။
သိုင်းသူတော်စင် ကိုယ်ထည်မှာ ပြိုကွဲတော့မည့် လက္ခဏာများ ရှိနေသည်။
သို့သော် ချီကွမ်းယိ ၏ မျက်လုံးများ တစ်ချက် အရောင်လက်သွားပြီး ပြိုင်ဘက်မှာ ထိုနေရာမှ တန်းပြီး ပျောက်ကွယ်သွားသည်ကို မြင်လိုက်ရသည်။ သူသည် အသိစိတ်ဖြင့် သူ့ဘယ်ဘက်ကို လှည့်၍ တိုက်ခိုက်လိုက်ကာ ဖန့်ချန် ၏ ပြင်းထန်သော လက်သီးကို တားဆီးလိုက်သည်။
“တိုက်”
ခေါင်းသုံးလုံး၊ လက်ခြောက်ချောင်းပါရှိသော သိုင်းသူတော်စင် ကိုယ်ထည်မှ အော်ဟစ်လိုက်သလိုပင် ရူးမိုက်စွာ ပြန်လည် တုံ့ပြန် တိုက်ခိုက်လိုက်တော့သည်။
အခန်း (၂၃၉၈) - နတ်ဆိုးဆန်သူဟု ခေါ်ဆိုထိုက်ပေသည်
ဘယ်အချိန်ကတည်းက စတင်ခဲ့သည်ကို မသိရသော်လည်း ဖန့်ချန်ရော ချီကွမ်းယိ ပါ အလွန်ပင် ပင်ပန်းနွမ်းနယ်နေကြပြီ ဖြစ်သည်။
နှစ်ဦးစလုံး၏ တိုက်ခိုက်မှုများမှာ အားလျော့မသွားသော်လည်း ထိုပင်ပန်းနွမ်းနယ်မှုမှာ နက်ရှိုင်းသော ပင်လယ်ရေပြင်ကဲ့သို့ သူတို့၏ ခေါင်းပေါ်သို့ တဖြည်းဖြည်း မြုပ်နှံလာကာ အသက်ရှူပင် ကျပ်လာစေသည်။
“ဟူး”
“ဟူး”
နှစ်ဦးစလုံး၏ အသက်ရှူသံများမှာ ကြမ်းတမ်းလာသည်။
တိုက်ခိုက်နေသည့် လုပ်ငန်းစဉ်တစ်လျှောက်တွင်လည်း ပြိုင်ဘက်မှာ တဖြည်းဖြည်းနှင့် အားအင်ကုန်ခမ်းလာသည်ကို နှစ်ဦးစလုံးပင် သတိပြုမိကြသည်။
“ငါ့ကို သတ်ပစ်လိုက်စမ်း ”
ချီကွမ်းယိ က ဒေါသတကြီး အော်ဟစ်လိုက်သည်။
“စောသေးတယ်”
ဖန့်ချန် က ပြန်လည် တုံ့ပြန်လိုက်သည်။
နှစ်ဖက်စလုံးမှာ တစ်ဖက်နှင့်တစ်ဖက် အသေအလဲ တိုက်ခိုက်ကြပြန်သည်။
ချီကွမ်းယိ မှာ ‘ချီထျန် အကြီးစား ကျောက်စာမှတ်တမ်း’ အပြင် အခြားသော နတ်ဘုရားစွမ်းရည်များမှာလည်း အလွန်ပင် ပြင်းထန်ပြီး အကွက်ဆန်းလှသည်။
သာမန်ဆိုလျှင် ဖန့်ချန် မှာ နတ်ဘုရားစွမ်းရည် အများအပြားဖြင့် ခုခံနိုင်ခြင်း မရှိပါက ပြန်လည် တိုက်ခိုက်ရန်ပင် အခွင့်အရေး ရရှိတော့မည် မဟုတ်ပေ။
ဤတိုက်ပွဲအတွင်းမှာပင် သူသည် ‘ချီထျန် အကြီးစား ကျောက်စာမှတ်တမ်း’ ၏ ထူးခြားချက်များကို တစ်ဖြည်းဖြည်း နားလည်လာခဲ့သည်။
အလွန်ပြင်းထန်သော ခုခံမှု။
ပြိုင်ဘက်၏ နတ်ဘုရားစွမ်းရည်ကို ကူးယူပြီး အဆပေါင်းများစွာ တိုးမြှင့်နိုင်ခြင်း နှင့် အဆုံးမရှိ ပြန်လည် ကုသနိုင်သည့် ဂုဏ်သတ္တိ။
သူ၏ ဒဏ်ရာများ မြန်ဆန်စွာ ပြန်လည်ကောင်းမွန်လာရုံသာမက အတွင်းကမ္ဘာ၏ စွမ်းအားကိုလည်း အလွန် လျင်မြန်စွာ ပြန်လည် ဖြည့်တင်းနိုင်သည်။
ဤအချက်မှာ ဖန့်ချန် နှင့် အတိအကျပင် တူညီနေသည်။
...
“နှစ်ရက် နှစ်ည ရှိသွားပြီ။”
‘သွေးရွာခန်းမ’ ၏ တားမြစ်နယ်မြေအတွင်းရှိ တိုက်ပွဲနယ်မြေ အသီးသီးနှင့် သွေးတိုက်ပွဲ စာရင်းများရှေ့တွင် လူအုပ်ကြီးဖြင့် ပြည့်နှက်နေပြီး ဆူညံပွက်လောရိုက်နေကြသည်။
ကမ္ဘာငယ် အဆင့် သူတော်စင်များ ရှိကြသလို၊
ကမ္ဘာကြီး အဆင့် သူတော်စင်များလည်း ရှိကြသည်။
ကောင်းကင်နိမိတ်ဖြစ်စဉ် အဆင့် သူတော်စင်များ ရှိကြသလို၊
အထွတ်ထိပ်တာအို အဆင့် သူတော်စင်များပင် ရှိနေကြသည်။
ချီကွမ်းယိ ကို စိန်ခေါ်သော သူတော်စင် တစ်ဦးအနေဖြင့် အတွင်း၌ နှစ်ရက်နှစ်ည တိုင်တိုင် တောင့်ခံနိုင်ခြင်းမှာ ဤသည် ပထမဦးဆုံးအကြိမ် ဖြစ်သည်။
ပြည့်ပြည့်ဝဝ (၂၄) နာရီ နှစ်ကြိမ် တိုင်တိုင်
ချီကွမ်းယိ ကို ကောင်းစွာ သိကျွမ်းသော သူတော်စင်များ၊ သူနှင့် ခေတ်ပြိုင်တွင် ယှဉ်ပြိုင်ခဲ့ဖူးသော သူတော်စင်များမှာမူ၊
ယခုအချိန်တွင် သူတို့၏ စိတ်ထဲ၌ ထိတ်လန့်တုန်လှုပ်ခြင်းမှလွဲ၍ တခြားမရှိတော့ပေ။
ဘယ်သူနိုင်၊ ဘယ်သူရှုံး ဆိုသည်မှာ တကယ်တမ်း၌ အရေးမကြီးတော့ပါ။
နှစ်ရက်နှစ်ည တိုင်တိုင် တောင့်ခံနိုင်ခြင်း တစ်ခုတည်းနှင့်ပင် ထို ‘ဝူရှီ’ မှာ သူတို့၏ စိတ်ထဲတွင် ဤသွေးတိုက်ပွဲ၏ အောင်နိုင်သူ ဖြစ်နေနှင့်ပြီ။
မည်သို့ဆိုစေ နှစ်ဦးစလုံးမှာ... အဆင့် အနည်းငယ် ကွာခြားနေသည် မဟုတ်ပါလော။
“ဘာလို့များ စွမ်းအင်စုစည်းခြင်း အဆင့်ချင်း တူတူကို သူတို့က ဒီလောက်အထိ သန်မာနေရတာလဲ ”
“သူတို့ အတွင်းထဲမှာ လက်ဖက်ရည် သောက်နေကြတာများလား”
သူတော်စင် တစ်ဦးက မသိစိတ်ဖြင့် ပြောလိုက်သည်။
ထိုစကား ထွက်ပေါ်လာသည်နှင့် တစ်ပြိုင်နက် မရေမတွက်နိုင်သော မျက်ဝန်းများမှာ သူ့ထံသို့ တစ်ပြိုင်နက်တည်း ကျရောက်လာသည်။
ထိုသူတော်စင်မှာ ကြောက်လန့်သွားပြီး လည်ပင်းကို အသာအယာ ကျုံ့လိုက်သည်။
“အကယ်၍သာ ငါတို့ ဒီလိုမျိုး အစွမ်းကုန် တိုက်ပွဲမျိုးကို ရင်ဆိုင်ရရင် နှစ်ရက်နှစ်ည မပြောနဲ့၊ တစ်ဝက်လောက်ပဲ ကြာရင်တင် အားကုန်သွားမှာ မဟုတ်လား ”
“ချီထျန် အကြီးစား ကျောက်စာမှတ်တမ်း က ပြန်လည် ကုသတဲ့နေရာမှာ ထူးခြားတဲ့ အာနိသင် ရှိနေတာလား ”
“ဒါပေမဲ့ အဲ့ဒါ ချီကွမ်းယိ ရဲ့ နတ်ဘုရားစွမ်းရည်လေ၊ ‘ဝူရှီ’ မှာလည်း ဒီလိုမျိုး နတ်ဘုရားစွမ်းရည် ရှိနေတာလား ”
“မင်းတို့ သတင်း ကြားလိုက်သေးလား ‘ဝူရှီ’ အစ်ကို က ဘယ်မျိုးနွယ်စုကလဲ ကြီးမားတဲ့ ထိပ်တန်း မျိုးနွယ်စုကများလား ”
“အင်း... ကြီးမားတဲ့ ထိပ်တန်း မျိုးနွယ်စုတွေရဲ့ ထိပ်တန်း ကောင်းကင်ဘုံအရှင် အရိုက်အရာခံတွေအားလုံးက စာရင်းဝင်ပြီးသား၊ ဒါပေမဲ့ သူတို့ထဲက မဟုတ်မှန်းတော့ သေချာပြီ။ ငါတော့ လူသားမျိုးနွယ်စုက ဖန့်ချန် ဖြစ်နေမလားလို့ သံသယ ဝင်မိတယ်”
“ဒါက လုံးဝ မဖြစ်နိုင်ဘူး ”
ကြီးမားသော မျိုးနွယ်စုများနှင့် ထိပ်တန်း မျိုးနွယ်စုများမှ သူတော်စင်များက ထိုခန့်မှန်းချက်ကို ချက်ချင်း ငြင်းပယ်လိုက်သည်။
လူသားမျိုးနွယ်စု လား
ဘယ်လိုလုပ် ဖြစ်နိုင်မှာလဲ
‘ချင်းမင်’ ထဲတွင် အလယ်အလတ်သာရှိပြီး ကောင်းကင်ဘုံအရှင် သူတော်စင် တစ်ဦးသာ ပိုင်ဆိုင်ထားသော မျိုးနွယ်စုက၊ ကြီးမားသော မျိုးနွယ်စုတွေမှာတောင် နှစ်ပေါင်းများစွာအတွင်း တစ်ယောက်စ နှစ်ယောက်စလောက်ပဲ ထွက်ပေါ်လာတတ်တဲ့ ထူးချွန်ထက်မြက်တဲ့ ပုဂ္ဂိုလ်မျိုးကို ဘယ်လိုလုပ် မွေးထုတ်ပေးနိုင်မှာလဲ။
ဒါဟာ လုံးဝ မဖြစ်နိုင်တဲ့ အကြောင်းပြချက် ဖြစ်သည်။
လူသားမျိုးနွယ်စု အနေနဲ့ ဒီလိုမျိုး ပုဂ္ဂိုလ်မျိုးကို ပြုစုပျိုးထောင်ပေးဖို့ လုံးဝ လုံးဝ မဖြစ်နိုင်ပါ။
ထိုအချိန်တွင် နေမင်း ခုနစ်ပါးခန်းမ ထဲရှိ ကျောင်းသားများဖြစ်စေ၊ သွေးရွာခန်းမ ဘက်ရှိ ထိပ်တန်း သူတော်စင်များဖြစ်စေ။
အားလုံးမှာ ဤတိုက်ပွဲ၏ အခြေအနေကို စူးစိုက်စွာဖြင့် စောင့်ကြည့်နေကြပြီး အနည်းငယ်မျှပင် အာရုံလွဲခြင်း မရှိကြပေ။
“အစ်ကိုရှစ်၊ ဒီတိုက်ပွဲ ပြီးရင် မင်း နောက်ထပ် သွေးရွာခန်းမ ကို မလာတာ အကောင်းဆုံးပဲ။”
‘ကြက်သားပြုတ်ရည်’ က အလွန် လေးနက်သော အမူအရာဖြင့် ပြောသည်။
တျန်ယိကျန့် တို့မှာ ‘လက်ရှစ်ဖက် နတ်ဘုရား’ ထံသို့ ကြည့်လိုက်ကြပြီး အမူအရာမှာ ရှုပ်ထွေးနေသည်။
ဤတစ်ကြိမ်တွင် လက်ရှစ်ဖက် နတ်ဘုရား တစ်ဦးတည်းသာ ဝူရှီ ကို ပြစ်မှားမိခဲ့ခြင်း ဖြစ်သည်။
ထိုသူက လက်ရှစ်ဖက် နတ်ဘုရား ကို စွမ်းအင်စုစည်းခြင်း နောက်ဆုံးအဆင့်တွင် စောင့်နေမည်ဟု ပြောခဲ့သည်ကို သူတို့ မှတ်မိနေသေးသည်။
“ကံကောင်းတယ်၊ ကံကောင်းတယ်”
တျန်ယိကျန့် တို့မှာ တစ်ဦးကိုတစ်ဦး ကြည့်လိုက်ကြပြီး တစ်ဖက်လူ၏ စိတ်ထဲရှိ ပူပင်သောကစကားကို ကြားလိုက်ရသလိုပင်။
ကံကောင်းထောက်မစွာ သူတို့က အစကတည်းက ယဉ်ကျေးစွာ ဆက်ဆံခဲ့ပြီး ပြင်းထန်စွာ ပြစ်မှားမိခြင်း မရှိခဲ့ပေ။
ထို့ကြောင့် ဤတိုက်ပွဲ ပြီးဆုံးသွားသည့်အခါ အကယ်၍ ပြိုင်ဘက်က နေမင်း ခုနစ်ပါးခန်းမ ကျောင်းသားသာ ဖြစ်နေပါက သူတို့မှာ အပြန်အလှန် ပညာဖလှယ်ခွင့်ပင် ရနိုင်သေးသည်။
အသက်အန္တရာယ် မပါသည့် စစ်မှန်သော ပညာဖလှယ်ခြင်းမျိုး ဖြစ်သည်။
‘လက်ရှစ်ဖက် နတ်ဘုရား’ မှာ တိတ်ဆိတ်သွားပြီးနောက် -
“အကယ်၍ သူက နေမင်းခုနစ်ပါး ခန်းမ ကျောင်းသားပဲ ဖြစ်နေရင်ကော ငါက နေမင်း ခုနစ်ပါးခန်းမ ကိုတောင် မဝင်ရတော့ဘူးလား။
နေမင်းခုနစ်ပါး အမှတ်အသားကို စွန့်လွှတ်ရမလားအဲ့ဒါက သေတာထက်တောင် ပိုဆိုးတယ်။ သေတာကမှ ပိုကောင်းဦးမယ် ”
‘ကြက်သားပြုတ်ရည်’ က သက်ပြင်းချလိုက်သည်။
“စွန့်လွှတ်သင့်တာကို စွန့်လွှတ်ရမှာပဲ။ စွန့်လွှတ်ခြင်းသည် အမြတ်ဖြစ်သည်၊ စွန့်လွှတ်မှသာ ရရှိနိုင်မှာ။”
‘လက်ရှစ်ဖက် နတ်ဘုရား’ ၏ အမူအရာမှာ အလွန်ပင် ဆိုးရွားနေပြီး မျက်လုံးထဲတွင် ရုန်းကန်နေရသည့် အရိပ်အယောင်များ ပေါ်လာသည်။
ပြိုင်ဘက်က ‘ဖန်ကျီး’ ကို သတ်ဖြတ်ခဲ့သည်၊ သူတို့၏ လောဘကြီးသော နတ်ဆိုးမျိုးနွယ်စုနှင့် ပြိုင်ဘက်မှာ မလွဲမသွေ ရန်သူများ ဖြစ်လာတော့မည်။
အကယ်၍ နေမငခုနစ်ပါး ခန်းမမှာ သူ၏ စစ်မှန်သော အထောက်အထားကို သိသွားပါက သွေးရွာခန်းမ မှ ထွက်ခွာသွားလျှင်ပင် ပြိုင်ဘက်၏ သတ်ဖြတ်ခြင်းကို ခံရတော့မည်မှာ အသေအချာပင်။
လက်ရှိတွင် ပြိုင်ဘက်က သူ့အထောက်အထားကို မသိသေးသော်လည်း...
‘လက်ရှစ်ဖက် နတ်ဘုရား’ က ပတ်ဝန်းကျင်ရှိ သူတော်စင်များကို တစ်ချက် ဝေ့ကြည့်လိုက်သည်။
ဤသူတော်စင်များထဲတွင် ပြိုင်ဘက်ကို အခွင့်အရေးယူပြီး အပေါင်းအသင်း လုပ်မည့် သစ္စာဖောက်များ ပေါ်မလာဘူးလို့ ဘယ်သူအာမခံနိုင်မလဲ။
ထို့အပြင် သူတို့မှာ မတူညီသော မဟာမိတ်အဖွဲ့များမှ လာကြသူများ မဟုတ်ပါလော။
“ဒါကြောင့် ငါ့မှာ လမ်းကြောင်းတစ်ခုပဲ ကျန်တော့တယ်”
‘လက်ရှစ်ဖက် နတ်ဘုရား’ ၏ မျက်လုံးတို့မှာ တဖြည်းဖြည်း ပြတ်သားလာသည်။
အချိန်များစွာ ထပ်မံ ကုန်ဆုံးသွားသည်။
တိုက်ပွဲကို ကြည့်ရှုခွင့် မရသည့်အတွက် စောင့်ဆိုင်းနေရသော သူတော်စင်များမှာမူ ရင်ဘတ်ထဲတွင် ပုရွက်ဆိတ် ထောင်သောင်းနှင့်ချီ တွားသွားနေသကဲ့သို့ ယားယံလွန်း၍ သေလုမတတ် ဖြစ်နေကြသည်။
ဟင်းလင်းပြင်။
ဖန့်ချန် ၏ သိုင်းသူတော်စင် ကိုယ်ထည်မှာ ပျောက်ကွယ်သွားပြီ ဖြစ်သည်။
ခန္ဓာကိုယ်အတွင်းရှိ အတွင်းကမ္ဘာ၏ စွမ်းအားမှာလည်း အနည်းငယ်မျှသာ ကျန်ရှိတော့သည်။
ပြန်လည် ကုသနိုင်သည့် အရှိန်မှာလည်း အသုံးပြုသည့် အရှိန်ကို မမီတော့ပေ။
အသန်မာဆုံး ပုံစံကို ဆက်လက် ထိန်းထားနိုင်ခြင်း မရှိတော့ပေ။
အတွင်းကမ္ဘာ၏ တံခါးမှာလည်း အနှံ့အပြား ပျက်စီးနေပြီး ပွင့်လုနီးပါး ဖြစ်နေသည်။
ချီကွမ်းယိ ဘက်မှာလည်း သူနှင့် အတူတူပင် အခြေအနေဆိုးလှသည်။
နှစ်ဦးစလုံးမှာ အသက်ကို ဝဝရှူရင်း ခွန်အားကို ပြန်လည် စုစည်းနေကြသည်။
“ဒါက ငါ့ရဲ့ နှစ်ပေါင်းများစွာအတွင်း အပျော်ရွှင်ဆုံး တိုက်ပွဲပဲ”
ချီကွမ်းယိ က ဖန့်ချန် ကို ကြည့်ကာ ပြောလိုက်သည်။ သူ၏ မျက်ဝန်းတို့မှာ သွေးကြောများဖြင့် နီရဲနေသည်။
“ငါလည်း အတူတူပါပဲ”
ဖန့်ချန် ၏ မျက်လုံးမှာ အဖြူရောင်သန်းနေပြီး အနက်ရောင် ကျောက်ခဲကဲ့သို့ မျက်ဆံမှာ မမြင်ရတော့သော်လည်း အပြင်ဘက် တစ်ပတ်လည်တွင် သွေးကြောများ ပြည့်နှက်နေသည်။
“ဒါက မင်းရဲ့ စစ်မှန်တဲ့ မျက်လုံးတွေပဲ”
ချီကွမ်းယိ က ပြုံးလျက် ပြောသည်။
သူ့စိတ်ထဲတွင် မျိုးနွယ်စုများထဲ၌ မွေးရာပါ မျက်လုံးအဖြူပိုင်ရှင် ဘယ်သူရှိသလဲဟု တွေးတောနေသည်။
ထိုအခြေအနေနှင့် ကိုက်ညီသူ အတော်များများ ရှိသော်လည်း၊ သူ့ရှေ့က လူမှာ သာမန် မျိုးနွယ်စုငယ်မှ လာမည် မဟုတ်ဟု ခံစားရသည်။
ကောင်းကင်ဘုံအရှင် သူတော်စင်ပင် မရှိသည့် မျိုးနွယ်စုငယ်က၊ ဘယ်လိုလုပ်ပြီး ဒီလို ထူးချွန်တဲ့သူမျိုးကို မွေးထုတ်ပေးနိုင်မှာလဲ။
“ချီကွမ်းယိ၊ မင်းဆီမှာ ‘ဒိန်ရွှမ်း’ အသီးတွေ ဘယ်လောက် ကျန်သေးလဲ”
ဖန့်ချန် က မေးလိုက်သည်။
“ဒိန်ရွှမ်းအသီး ငါ့ဆီမှာ စုစုပေါင်း သုံးရာရှိတယ်၊ အခုထိ စားပြီးတာ... အင်း... မင်းရဲ့ ဒိန်ရွှမ်းအသီးတွေ မလုံလောက်တော့ဘူး ထင်တယ်”
ချီကွမ်းယိ က ခေါင်းကို အသာအယာ ညိတ်ကာ လက်ကို ယမ်းလိုက်သည်တွင် ဒိန်ရွှမ်းအသီး တစ်ရာမှာ ဖန့်ချန် ၏ ရှေ့သို့ ရောက်ရှိလာသည်။
“ကျေးဇူးတင်တယ်”
ဖန့်ချန် က ယဉ်ကျေးခြင်း မရှိတော့ဘဲ လက်ခံလိုက်သည်။
သူနှင့် ပြိုင်ဘက် စားသုံးခဲ့သည့် ပမာဏကို တွက်ချက်ကြည့်လျှင်။
ဤတိုက်ပွဲတွင် နှစ်ဦးစလုံးမှာ ဒိန်ရွှမ်းအသီး နှစ်ရာနီးပါးခန့် စားသုံးနိုင်မည် ဖြစ်သည်။
အကယ်၍ နောက်ထပ် သူတော်စင်အဆင့် ကန့်သတ်ချက်ကို မချိုးဖျက်နိုင်ပါက တခြားနည်းလမ်းများကို ရှာဖွေရပေတော့မည်။
“ကျေးဇူးတင်စရာ မလိုပါဘူး၊ မင်း ငါ့ကို သတ်နိုင်လိမ့်မယ်လို့ မျှော်လင့်ထားလို့ပါ”
ချီကွမ်းယိ က အေးဆေးစွာ ပြောသည်။
“ပြောရရင် မင်းရဲ့ နတ်ဘုရားစွမ်းရည်ကလည်း ထူးခြားလှတယ်။ မျိုးနွယ်စုကံကြမ္မာ နတ်ဘုရားစွမ်းရည်ထက် မလျော့ဘူးလို့ ခံစားရတယ်၊ ဒါပေမဲ့ ငါသိထားတဲ့ မျိုးနွယ်စုကံကြမ္မာ နတ်ဘုရားစွမ်းရည်တွေနဲ့တော့ မတူဘူး။”
“ဒီလောကကြီးမှာ မျိုးနွယ်စုကံကြမ္မာ နတ်ဘုရားစွမ်းရည်မှ အသန်မာဆုံး ဖြစ်ရမယ်လို့ ဘယ်သူပြောလဲ”
ဖန့်ချန် က သာမန်မျှသာ ပြန်ပြောလိုက်သည်။
“မင်း စကားက မှန်တယ်။ ဖြစ်ကောင်း ဖြစ်နိုင်မယ်...”
ချီကွမ်းယိ ရုတ်တရက် အတွေးထဲ နစ်မြုပ်သွားပြီး သူ၏ အရှိန်အဝါတို့မှာ တဖြည်းဖြည်း မြင့်တက်လာသည်။
ဒိန်ရွှမ်းအသီး အာနိသင် ကုန်သွားတာလား
ဖန့်ချန် အနည်းငယ် အံ့ဩသွားသည်။
သို့သော် နောက်ပိုင်းတွင် သူတွေ့လိုက်ရသည်မှာ ပြိုင်ဘက်က အဆင့်တက်ခြင်း မဟုတ်၊ သူတော်စင်အဆင့် ကန့်သတ်ချက်ကို ချိုးဖျက်ခြင်းလည်း မဟုတ်ဘဲ...
“ဟုတ်တယ်၊ မျိုးနွယ်စုကံကြမ္မာ နတ်ဘုရားစွမ်းရည်က လောကမှာ အသန်မာဆုံး မဟုတ်ဘူး၊ ငါ ဒီနှစ်ပေါင်းများစွာအတွင်းမှာ မှားယွင်းတဲ့ လမ်းကြောင်းကို ရောက်နေမိတာပဲ၊ ဟားဟားဟား၊ ‘ဝူရှီ’ ညီအစ်ကိုရေ၊ မင်းရဲ့ အသိပေးမှုကို ကျေးဇူးတင်ပါတယ်၊ ငါ နားလည်သွားပြီ ”
ချီကွမ်းယိ က ရုတ်တရက် ကျယ်လောင်စွာ ရယ်မောလိုက်ပြီး အလွန်ပင် ပျော်ရွှင်နေသည်။
ဖန့်ချန် ၏ အမူအရာမှာ ထူးဆန်းသွားသည်။ သူက ရိုးရိုးရှင်းရှင်း ပြောလိုက်မိတာကို ပြိုင်ဘက်က နားလည်သဘောပေါက်သွားတာလား။
‘နတ်ဆိုးဆန်သူ’ ဟု ခေါ်ဆိုထိုက်ပေသည်။