အခန်း ၃၀၃

အပိုင်း(၃၀၃)

ဆယ်မိုင်ခန့် ကွာဝေးသော ဂူတစ်ခုအတွင်း၌ ပြည့်ဖြိုးသော ခန္ဓာကိုယ်နှင့် လှပသော မျက်နှာသွင်ပြင်ရှိသည့် အသက် နှစ်ဆယ်ကျော်အရွယ် အမျိုးသမီးတစ်ဦးသည် အရိုးများဖြင့် ပြုလုပ်ထားသော အရိုးဖြူပလ္လင်ပေါ်တွင် တိတ်ဆိတ်စွာ ထိုင်နေလေသည်။

သူမ၏ ရှေ့တွင်တော့ ချည်နှောင်ခံထားရပြီး သတိလစ်နေသော ပုံရိပ်နှစ်ခု ရှိနေပြီး တစ်ဦးက အိုမင်းကာ တစ်ဦးက ငယ်ရွယ်၏။ အဘိုးအိုတစ်ဦးနှင့် မိန်းကလေးငယ် တစ်ဦးပင် ဖြစ်သည်။

"သခင်မ... ဒီနှစ်ယောက်ကို ဖမ်းထားတာ နှစ်ရက်ရှိပြီဆိုတော့ သူတို့လည်း ငတ်နေတာ အဲဒီလောက် ကြာနေလောက်ပြီ... သူတို့ကို သန့်စင်ဆေးကြောပြီးသွားရင် ကျွန်မတို့ စားလို့ရပြီ..."

အစေခံအဖြစ် ဝတ်ဆင်ထားသော ချစ်စရာကောင်းသည့် မိစ္ဆာမလေး တစ်ကောင်က အရိုးဖြူပလ္လင်ပေါ်ရှိ အမျိုးသမီးအား ပြောလိုက်၏။

"အင်း... သူတို့ကို ခေါ်သွားပြီး သန့်စင်ဆေးကြောလိုက်တော့..."

အရိုးဖြူပလ္လင်ပေါ်ရှိ အမျိုးသမီးက ထိုပုံရိပ်နှစ်ခုကို ကြည့်ရင်း အနည်းငယ် ခေါင်းညိတ်ပြကာ တီးတိုးရေရွတ်လိုက်သည်။

မွေးရာပါ တာအို ခန္ဓာကိုယ်ကို ပိုင်ဆိုင်ထားကြသော လူသားမျိုးနွယ်တို့သည် မိစ္ဆာမျိုးနွယ်စုများအတွက် အလွန် အာဟာရဖြစ်စေပေသည်။

ထို့ကြောင့် မိစ္ဆာသတ္တဝါ တစ်ကောင်သည် ခိုင်မာသော စိတ်ပိုင်းဖြတ်မှုဖြင့် ကျင့်ကြံခြင်းလမ်းစဉ်ပေါ်သို့ လျှောက်လှမ်းနေခြင်း မဟုတ်ပါက ၎င်းတို့ထဲမှ မည်သူမဆို လူသားများကို စားသုံးလိုသည့် သွေးဆောင်ဖြားယောင်းမှုကို ခုခံတွန်းလှန်နိုင်ရန် ခက်ခဲလှပေသည်။

ယင်းအချက်သည် မူလက အရိုးဖြူမှ အသွင်ပြောင်းလာခဲ့သော အရိုးဖြူ မိစ္ဆာ အတွက်တော့ ပို၍ပင် မှန်ကန်နေပေ၏။ ရင်သပ်ရှုမောဖွယ်ကောင်းသော အလှအပကို ထိန်းသိမ်းထားနိုင်ရန်အတွက် သူမသည် လူသားတို့၏ သွေးကို လိုအပ်ပေသည်။ လစဉ်လတိုင်း လူအနည်းငယ်ခန့်ကို မစားရပါက သူမ၏ အသားအရည်သည် ကြောက်မက်ဖွယ်ကောင်းလောက်အောင် ဖြူလျော့သွားမည်ဖြစ်ပြီး သူမ၏ ဆံပင်အမည်းရောင်များပင်လျှင် ဆီးနှင်းများကဲ့သို့ ဖြူဖွေးသွားမည့် အခြေအနေအထိ ဖြစ်လာမည် ဖြစ်သည်။

"သခင်မ... လွန်ခဲ့တဲ့ နှစ်တွေအတွင်းက ကျွန်မတို့ လူတွေ အများကြီး စားခဲ့ကြလို့ မိုင်ငါးဆယ် ပတ်လည်မှာ အိမ်ထောင်စုဆိုလို့ သိပ်တောင် မကျန်တော့ဘူး... တကယ်လို့ လူတွေ ထပ်ရှာချင်သေးတယ်ဆိုရင် ကျွန်မတို့ ဒီထက်ပိုပြီး ဝေးဝေးသွားရလိမ့်မယ်..."

အရိုးဖြူပလ္လင်ခြေရင်းရှိ အခြားလှပသော အစေခံမလေး တစ်ယောက်က ရုတ်တရက် ဝင်ပြောလိုက်၏။

"အင်း... ဒါဆိုရင်လည်း ပိုဝေးတဲ့ နေရာကို သွားကြတာပေါ့..."

ပလ္လင်ပေါ်တွင် မှီချနေသော သခင်မက ဤကိစ္စကို စိုးရိမ်ပူပန်မှုမရှိဘဲ တည်ငြိမ်သော ဟန်ပန်ဖြင့် အနည်းငယ် ခေါင်းညိတ်ကာ ပြန်ပြောလိုက်သည်။

သူမ၏ လက်အောက်ငယ်သားများ မည်မျှပင် ဝေးဝေးသွားရပါစေ အသက်ရှင်နေသော လူများကို ပြန်လည်ခေါ်ဆောင်လာနိုင်သရွေ့ အရေးမကြီးလှပေ။

"သခင်မ... တင်ပြစရာ တစ်ခုရှိပါတယ်..."

သို့သော်လည်း မကြာမီမှာပင် ကင်းလှည့်နေသော မိစ္ဆာလေး တစ်ကောင်သည် အရိုးဖြူ မိစ္ဆာ ရှေ့တွင် ဒူးထောက်ကာ စတင်ပြောဆိုလာ၏။

"ပြောလေ..."

ပလ္လင်ပေါ်တွင် ထိုင်နေစဉ် အရိုးဖြူ မိစ္ဆာ က မျက်ခွံကို အနည်းငယ် ပင့်တင်ကာ တည်ငြိမ်စွာ ပြောလိုက်သည်။

"သခင်မကို တင်ပြရရင် ထူးဆန်းတဲ့ ကိစ္စတစ်ခု ဖြစ်ပေါ်နေပါတယ်... ကျွန်တော်တို့ တောင်ခြေနဲ့ မဝေးတဲ့နေရာမှာ အိမ်တစ်လုံးက လေထဲကနေ ရုတ်တရက် ထွက်ပေါ်လာသလိုပဲ... အဲဒီအိမ်ကြီးကို ဘယ်တုန်းက ဆောက်လိုက်တယ်ဆိုတာ ဘယ်သူမှ သတိမထားမိကြဘူး... ပြီးတော့ အဲဒီအိမ်ကြီးက သာမန်မိသားစု တစ်စုရဲ့ အိမ်နဲ့လည်း မတူဘူး..."

မိစ္ဆာလေး က တင်ပြလိုက်၏။

"အို... ဒီလို အိမ်ကြီးကို ဆောက်ဖို့ဆိုတာ အနည်းဆုံး လအတော်ကြာ အချိန်ယူရမှာ မဟုတ်ဘူးလား... အဲဒါကလည်း ငါတို့ရဲ့ တောင်ခြေနဲ့ မဝေးဘူးပေါ့လေ... စိတ်ဝင်စားစရာပဲ... တခြား မိစ္ဆာမျိုးနွယ် တစ်ခုခုများ ရောက်လာတာလား... ဒါပေမယ့် သူတို့က တောင်ပိုင်သခင်ကို အရင်ဆုံး လာရောက်ဂါရဝပြုရမှာ မဟုတ်ဘူးလား..."

ဤစကားကို ကြားသောအခါ အရိုးဖြူပလ္လင်ပေါ်တွင် အေးလူလူ ထိုင်နေသော သခင်မသည် ကိုယ်ဟန်ကို အနည်းငယ် မတ်မတ်ပြင်ထိုင်လိုက်ပြီး သူမ၏ မျက်နှာပေါ်တွင် စိတ်ဝင်စားမှု အရိပ်အယောင်တစ်ခု ထွက်ပေါ်လာလေသည်။

"ဒီအိမ်ကြီးက တော်တော်လေး လျှို့ဝှက်ဆန်းကြယ်စွာ ထွက်ပေါ်လာတာမို့လို့ ကျွန်တော်တို့ အရမ်းနီးကပ်အောင် မသွားရဲကြဘူး... ဒါပေမယ့် အခု ညနေစောင်းနေပြီဆိုတော့ အဲဒီအိမ်ထဲကနေ အလင်းရောင်တွေ ထွက်ပေါ်နေတာကို မြင်တွေ့ရသေးတယ်..."

ကင်းလှည့် မိစ္ဆာလေး က ပြန်ပြောလိုက်၏။

"အင်း... အဲဒီအိမ်ရှင်ကို မနှောင့်ယှက်ခဲ့တာ မင်းတို့ ကောင်းကောင်း လုပ်ခဲ့တာပဲ... ဘာတွေများ ဖြစ်နေလဲဆိုတာ ငါကိုယ်တိုင် သွားကြည့်ရသေးတာပေါ့... တကယ်လို့ မိစ္ဆာမျိုးနွယ်စု တွေသာ ဖြစ်နေမယ်ဆိုရင် ဒီနေရာက အရိုးဖြူ မိစ္ဆာ ရဲ့ နယ်မြေဖြစ်တယ်ဆိုတာ သူတို့ကို သိအောင် လုပ်ပြရမယ်... တကယ်လို့ လူသားမျိုးနွယ် သာ ဖြစ်နေမယ်ဆိုရင်တော့ အပို အစားအစာတစ်နပ် ရတာပေါ့..."

အရိုးဖြူ မိစ္ဆာ က ခေါင်းညိတ်ကာ ပြောလိုက်သည်။

ကောင်းကင်ကို တစ်ချက်ကြည့်လိုက်ရာ အချိန်မှာ ည ခုနစ်နာရီ ဝန်းကျင်ခန့်သာ ရှိသေးပြီး ညဥ့်ဦးယံသို့ စတင် ဝင်ရောက်လာချိန်သာ ရှိသေး၏။ အရိုးဖြူ မိစ္ဆာ သည် သူမ၏ ဂူအတွင်းမှ ထကာ ထွက်ခွာသွားလေသည်။

ဆယ်မိုင်ခန့်မျှသာ ရှည်လျားသော တောင်တက်လမ်းကို လျင်မြန်စွာ ဖြတ်သန်းလာခဲ့ပြီးနောက် အရိုးဖြူ မိစ္ဆာသည် တောင်ခြေရင်းရှိ အတော်လေး ခမ်းနားထည်ဝါသော အိမ်ကြီးတစ်လုံးကို မြင်တွေ့လိုက်ရလေသည်။

မြေပြင်ပေါ်သို့ ဆင်းသက်ပြီးနောက် အရိုးဖြူ မိစ္ဆာ သည် အသက် နှစ်ဆယ်၊ သုံးဆယ်အရွယ် အမျိုးသမီးတစ်ဦးအဖြစ် အသွင်ပြောင်းလိုက်ပြီးနောက် နတ်စံအိမ်တော် ဆီသို့ ချဉ်းကပ်သွားလေသည်။

သူမသည် "ကျန်း စံအိမ်တော်" ဟု ကျန်းလျို ပြောင်းလဲတပ်ဆင်ထားသော အိမ်ကြီး၏ ဆိုင်းဘုတ်ကို ကြည့်လိုက်၏။

"ကျန်း စံအိမ်တော်... အဲဒါက လူသားမိသားစုတွေ သူတို့ရဲ့ အိမ်တွေမှာ သုံးလေ့ရှိတဲ့ နာမည်မျိုး မဟုတ်ဘူးလား..."

ဆိုင်းဘုတ်ပေါ်ရှိ စာလုံးများကို မြင်သောအခါ အရိုးဖြူ မိစ္ဆာ က သူမကိုယ်သူမ တီးတိုးရေရွတ်လိုက်သည်။

ထို့နောက် သူမသည် တံခါးနားသို့ ချဉ်းကပ်သွားကာ ညင်သာစွာ ခေါက်လိုက်လေသည်။

"နေပါဦး... တစ်ယောက်ယောက် တံခါးလာခေါက်နေသလိုပဲ..."

ပင်မခန်းမဆောင်ကြီး အတွင်း၌ တံခါးခေါက်သံကို ကြားလိုက်ရသောအခါ ကျန်းလျိုက သူ၏ တပည့်များကို ပြောလိုက်ပြီး မာဂျောင်ခုံမှ ထကာ တံခါးဆီသို့ သွား၍ ဖွင့်လိုက်၏။

"ဒကာမလေး... ဘယ်ကနေများ ရောက်လာတာလဲဗျ..."

လက်ရှိအချိန်မှာ ည ၇ နာရီ ဝန်းကျင်ခန့် ဖြစ်နေကာ တောနက်ကြီးအတွင်း၌ အမှောင်ထု လွှမ်းမိုးနေပြီ ဖြစ်သော်လည်း မိန်းကလေးငယ် တစ်ဦးက တံခါးလာခေါက်နေခြင်းကြောင့် ကျန်းလျိုသည် ခေတ္တမျှ အံ့အားသင့်သွားရလေသည်။

"အရှင်ဘုရား... ကျွန်မက တောင်ခြေက တောင်သူမလေးပါ... ဆေးမြစ်တွေ လာကူးရင်း မတော်တဆ ချော်လဲသွားလို့ တောင်အောက်ပြန်ဆင်းရမယ့် အချိန်လွန်သွားလို့ပါ... အခု အရမ်းဆာလောင်နေလို့ ဆရာတော်တို့ဆီမှာ စားစရာ အကြွင်းအကျန်လေးများရှိရင် တစ်ပန်းကန်လောက် စွန့်ကြဲပါလားဘုရား..."

အရိုးဖြူ မိစ္ဆာ က လျှောက်ထားလိုက်၏။

ကျန်းလျိုသည် ချက်ချင်း အဖြေမပေးဘဲ သူ၏ ရင်ထဲတွင် သံသယဖြစ်သွားကာ သူမကို စိုက်ကြည့်ရင်း ရင်ထဲမှနေ၍ တိတ်တဆိတ် အမိန့်ပေးလိုက်သည်။

'ဇာတ်ကောင် အချက်အလက်ပြဘုတ်'

ကျန်းလျိုက ရင်ထဲမှ တိတ်တဆိတ် ရေရွတ်လိုက်သည်နှင့် မကြာမီမှာပင် တစ်ဝက်အလင်းပေါက်နေသော ဇာတ်ကောင် အချက်အလက်ပြဘုတ် တစ်ခု သူ၏ရှေ့တွင် ထွက်ပေါ်လာလေသည်။

အမည် - လျှို့ဝှက်ဆန်းကြယ် အမျိုးသမီး (အမည်ဝှက်) (အပြာရောင်)

လိင် - အမ

အသက်မွေးဝမ်းကျောင်း - မိစ္ဆာမျိုးနွယ်

အဆင့် - ၇၀

လက်နက်ကိရိယာ - အရိုးဖြူ ကျာပွတ် (ဒဏ္ဍာရီလာ အရည်အသွေး) ...

ကျန်းလျို၏ အကြည့်တို့သည် ဇာတ်ကောင် အချက်အလက်ပြဘုတ် ပေါ်သို့ ကျရောက်သွားပြီး သူ လိုအပ်သော အချက်အလက်များကို လျင်မြန်စွာ တွေ့ရှိသွားတော့၏။

ဤ ဇာတ်ကောင် အချက်အလက်ပြဘုတ် မှတစ်ဆင့် ဤအမျိုးသမီး မည်သူမည်ဝါဖြစ်ကြောင်းကို ကျန်းလျို သိရှိသွားလေသည်။

နီကျား ရောက်ရှိလာစဉ်ကကဲ့သို့ပင် သူမသည်လည်း သူမ၏ အသွင်အပြင်ကို ပြောင်းလဲထားသောကြောင့် နာမည်မှာလည်း အမည်ဝှက် ဖြစ်နေသော်လည်း သူမ၏ အသက်မွေးဝမ်းကျောင်းအဆင့်နှင့် လက်နက်ကိရိယာများကိုမူ ဖုံးကွယ်ထား၍ မရနိုင်ချေ။

အလားတူပင် ဤအမျိုးသမီးသည်လည်း သူမ၏ အစစ်အမှန် မျက်နှာကို ခွဲခြားသိမြင်ရန် ခက်ခဲစေမည့် အသွင်ပြောင်း စွမ်းရည်တစ်ခုကို အသုံးပြုထားမည်မှာ သေချာသော်လည်း သူမ၏ အသက်မွေးဝမ်းကျောင်း၊ ဇာတ်ကောင်အဆင့်နှင့် လက်နက်ကိရိယာများကိုမူ ဖုံးကွယ်ထားနိုင်စွမ်း မရှိခဲ့ပေ။

‘အဆင့် ၇၀ တဲ့လား... အဲဒါက နိမ့်တဲ့ အဆင့်တော့ မဟုတ်ဘူးပဲ...’

စွန်းဝူခုန်းသည် အဆင့် ၈၀ တွင် ရှိနေပြီး ထိုက်ရိ အစစ်အမှန် နတ်အဆင့်၏ အထွတ်အထိပ်တွင် ရှိနေ၏။ သို့ဆိုလျှင် အဆင့် ၇၀ ဆိုသည်ကရော... ကောင်းကင်နတ်မင်း အဆင့်၏ အထွတ်အထိပ်ဟု ယူဆနိုင်သည် မဟုတ်ပါလော။

သေချာပေါက်ပင် သူမသည် မိစ္ဆာမျိုးနွယ် မှ ဖြစ်သောကြောင့် မိစ္ဆာနတ်မင်း တစ်ပါး ဖြစ်ပေလိမ့်မည်။

ဤစွမ်းအားသည်ပင် နတ်မင်းကြီးလေးပါး ကဲ့သို့သော ကောင်းကင်ဘုံတွင် ကျော်ကြားသူ တစ်ဦးဖြစ်လာစေရန် လုံလောက်လှပေသည်။

'ဒါဆို... အရိုးဖြူ မိစ္ဆာ ကိုယ်တိုင် အလည်လာတာပေါ့လေ...'

ဇာတ်ကောင်အဆင့်နှင့် အထူးသဖြင့် အရိုးဖြူ ကျာပွတ် ကဲ့သို့သော လက်နက်ကိရိယာများကို မြင်လိုက်ရသောအခါ ကျန်းလျိုသည် ဤ မိစ္ဆာမ ၏ အစစ်အမှန်ကို နားလည်သွားတော့၏။

မည်သို့ပင်ဖြစ်စေ ဝတ္ထု၏ မူလဇာတ်လမ်းအရ ဝူကျွမ် ကျောင်းတော် မှ အခက်အခဲများကို ဖြတ်ကျော်ပြီးနောက် အရိုးဖြူ မိစ္ဆာ နှင့် သုံးကြိမ်တိုင်တိုင် တိုက်ခိုက်ရမည့် အချိန်သို့ ရောက်ရှိလာပြီ ဖြစ်ပေသည်။

သို့သော်လည်း ဤအခြေအနေမှာ အနည်းငယ် လွဲချော်နေသကဲ့သို့ ရှိနေ၏။ အဘယ်ကြောင့်ဆိုသော် အခုက မှောင်နေပြီဖြစ်ပြီး သူနှင့် သူ၏ တပည့်များက ထမင်းစားကာ မာဂျောင် ကစားနေကြချိန်တွင် အရိုးဖြူ မိစ္ဆာ သည် အဘယ်ကြောင့် ညဘက်ကြီး တံခါးလာခေါက်ရန် ရွေးချယ်ခဲ့ရသနည်း။

သေချာပေါက် ဇာတ်လမ်းက အနည်းငယ် လွဲချော်နေသည်ဟု သူ ခံစားရသော်လည်း အရိုးဖြူ မိစ္ဆာ က လမ်းလျှောက်လာသော အတွေ့အကြုံမှတ် အထုတ်ကြီးတစ်ခုလို သူမကိုယ်သူမ သူ၏ တံခါးဝအရောက် လာပို့ပေးနေခြင်း မဟုတ်ပါလော။

ကျန်းလျို အံ့အားသင့်သွားသော်လည်း သူ၏ ရင်ထဲတွင်မူ ပို၍ပင် ဝမ်းသာကျေနပ်နေမိတော့သည်။

***