အခန်း ၅၂၉

အခန်း(၅၂၉)

လေလံပွဲအခြေအနေကတော့ တော်တော်လေးကို ဆူညံပွက်လောရိုက်သွားပြီ။ လာရောက်ကြည့်ရှုတဲ့လူအုပ်ကြီးနဲ့ ကုမ္ပဏီအသီးသီးဟာ ရီနေးတားကုမ္ပဏီအကြောင်းကို စပြီးတော့ကို စိစစ်စမ်းသပ်ချင်လာကြတယ်။

ဒီလိုမျိုး နာမည်မရှိတဲ့ ကုမ္ပဏီတစ်ခုအနေနဲ့ ပိရမစ်ဒစ် ကျူဇင်းကို ယှဉ်ပြိုင်ဖို့ ကြိုးစားရဲလောက်အောင် သတ္တိတွေရှိပြီး ငွေကြေးအင်အား တောင့်တင်းနေတာကတော့ တကယ့်ကို အံ့ဩစရာပဲ။ မြေကွက်ရဲ့ လေလံဈေးက သန်းချီအထိ မြင့်တက်သွားခဲ့ပြီ။

လူအများစုကတော့ ရီနေးတားရဲ့ ဆုံးဖြတ်ချက်အပေါ်မှာ ဝေခွဲမရ ဖြစ်နေကြတယ်။ သူတို့က တခြားကုမ္ပဏီတွေ မမြင်နိုင်တဲ့ အဖိုးတန်အရာတစ်ခုခုကို ဒီမြေကွက်ထဲမှာ မြင်နေလို့လား ဒါမှမဟုတ် ငွေတွေကို အလဟဿ ဖြုန်းတီးနေတာလားဆိုတာ သဲသဲကွဲကွဲ မသိကြဘူး။

"ရီနေးတားကုမ္ပဏီဆိုတာ ဘယ်သူလဲ။ တစ်ခါမှလည်း မကြားဖူးပါဘူး။ ဒီလိုအလုပ်မျိုးနဲ့ အသစ်အဆန်း ဖြစ်နေလို့နေမှာပေါ့။ လေလံပွဲရဲ့ အငွေ့အသက်ကြားထဲမှာ စိတ်ပါသွားတာလည်း ဖြစ်နိုင်တာပဲ"

ဒါကတော့ လေလံပွဲကို စောင့်ကြည့်နေကြတဲ့ ကုမ္ပဏီအများစုနဲ့ လူအုပ်ကြီးကြားထဲမှာ အဖြစ်နိုင်ဆုံး ထင်ကြေးပေးနေကြတဲ့ အယူအဆတစ်ခုပဲ။

မိုက်ကယ်ကို လူကိုယ်တိုင် သိကျွမ်းတဲ့ လူတွေတောင်မှ သူတို့ရဲ့ ဆုံးဖြတ်ချက်ကြောင့် အတော်လေး အံ့အားသင့်သွားရတယ်။

အင်အားကြီးအဖွဲ့အစည်းတစ်ခုရဲ့ သီးသန့်ခန်းထဲမှာတော့ ကွန့်ချ်ကုမ္ပဏီက ဘော်ဘီနဲ့ သူ့ရဲ့ အရာရှိတွေဟာ မိုက်ကယ်ရဲ့ လေလံဆွဲမှု သဘာဝအပေါ်မှာ သူတို့အချင်းချင်း ဆွေးနွေးနေကြတယ်။ ဒါက စမတ်ကျတဲ့ လုပ်ရပ်လား ဒါမှမဟုတ် ဖြုန်းတီးတာလားပေါ့။

ဘော်ဘီက မိုက်ကယ်နဲ့ ရင်းနှီးပြီး သူ့ရဲ့ တကယ့်စွမ်းဆောင်ရည် အချို့ကို သိထားတဲ့ ဒစ်ကီဘက်ကို လှည့်လိုက်တယ်။

"မိုက်ကယ်မှာ ဒီလောက်အထိ ငွေအင်အားရှိတာ မင်းသိလား" လို့ ဘော်ဘီက မေးလိုက်တယ်။

ဒစ်ကီက ခေါင်းခါပြလိုက်တယ်။ "သူ သန်မာတယ်ဆိုတာတော့ ကျွန်တော်သိတယ်။ ဒါပေမဲ့ သန်းချီတဲ့ ရွှေဒင်္ဂါးပြားတွေကို သုံးပစ်နိုင်လောက်တဲ့အထိ ရှိမယ်လို့တော့ မသိခဲ့ဘူး။

အမှန်အတိုင်းပြောရရင် မက်ထရိုပိုလစ်ရဲ့ အပြင်ဘက်က သူ့ကုမ္ပဏီရဲ့ ရာဇဝင်အကြောင်းကို သိပ်ပြီးတော့ အလေးအနက် မတွေးမိခဲ့ဘူး။ သူတို့က ကင်းစ်နယ်မြေကလာတာလို့ ကြားဖူးတော့ သူတို့ရဲ့ စီးပွားရေးက သိပ်ပြီးတော့ အဆင်မပြေလှဘူးလို့ပဲ ယူဆထားတာ။

ဒါပေမဲ့ အသုံးမကျတဲ့ မြေကွက်တစ်ကွက်အတွက် သန်းချီပြီး သုံးနိုင်တယ်ဆိုရင်တော့ အဲဒီနယ်မြေမှာ သူတို့ တကယ့်ကို အောင်မြင်နေလို့ပဲ ဖြစ်ရမယ်"

ဒီမှာတင် ဘော်ဘီက သူ့ကို နောက်ထပ် မေးခွန်းတစ်ခု ထပ်မေးပြန်တယ်။ "ရီနေးတားကုမ္ပဏီအနေနဲ့ ဒီလေလံပွဲမှာ နိုင်နိုင်ခြေရှိတယ်လို့ မင်းထင်လား"

သေချာတာပေါ့။ သူ့ရဲ့ အရာရှိအချို့ကတော့ အဖြေကို ချက်ချင်း သိထားပြီးသားပဲ။ ပိရမစ်ဒစ် ကျူဇင်းက နိုင်မှာပဲ။ မေးနေစရာပင် မလိုဘူး။ သို့ပေမဲ့ လေလံပွဲရဲ့ အနိုင်အရှုံးကို ရွေးချယ်ဖို့ ဒစ်ကီ တွန့်ဆုတ်နေတဲ့ အချက်ကပဲ သူ မိုက်ကယ်ရဲ့ အစွမ်းအစကို ဘယ်လောက်အထိ တန်ဖိုးထားတယ်ဆိုတာ ထင်ထင်ရှားရှား ပြသနေတာ။

"မိုက်ကယ်က တကယ့်ကို စွမ်းဆောင်ရည်ရှိတဲ့ တိုက်ခိုက်ရေးသမားတစ်ဦးဆိုတာ ပြသခဲ့ပြီးသားပဲ။ ချက်ကီ ဘယ်လိုမျိုး အပြတ်အသတ် အနိုင်ယူခံလိုက်ရလဲဆိုတာကို မင်း သူ့ကို မေးကြည့်သင့်တယ်။ ဒါကြောင့် မိုက်ကယ်သာ ကိုယ်တိုင် လှုပ်ရှားမယ်ဆိုရင်တော့ ရီနေးတားကုမ္ပဏီအနေနဲ့ ဒီလေလံပွဲမှာ အနိုင်ရဖို့ အခွင့်အရေး ရှိလိမ့်မယ်လို့ ကျွန်တော် ထင်တယ်" လို့ ဒစ်ကီက ရိုးရိုးသားသားပဲ ပြောလိုက်တယ်။

မိုက်ကယ်အပေါ် ထားရှိတဲ့ သူ့ရဲ့ အကဲဖြတ်ချက်က ကွန့်ချ်ကုမ္ပဏီက အရာရှိ တော်တော်များများကို အံ့အားသင့်သွားစေတယ်။

"အော်...ဒါပေမဲ့ ဒီလိုရှိတယ်လေ" ဘော်ဘီက လေလံပွဲကို စိုက်ကြည့်ရင်း ပြောလိုက်တယ်။ "လေလံပွဲရဲ့ တိုက်ခိုက်ပွဲမှာ မိုက်ကယ်တစ်ယောက်တည်း ဝင်ရောက်တိုက်ခိုက်ရမှာ မဟုတ်တာလည်း ဖြစ်နိုင်တာပဲ။ ပိရမစ်ဒစ် ကျူဇင်းအနေနဲ့ ကစားပွဲထဲမှာ တိုက်ခိုက်ရေးသမား တစ်ယောက်ထက်မက ရှိနေတာကိုပဲ သေချာပေါက် အလိုရှိလိမ့်မယ်"

ဒစ်ကီလည်း သူ ဘာကို ဆိုလိုတယ်ဆိုတာ သဘောပေါက်ပါတယ်။ တကယ်တော့ ဒီလေလံပွဲက ကုမ္ပဏီရဲ့ ခေါင်းဆောင်တစ်ယောက်တည်း အပေါ်မှာတင် မူတည်နေတာ မဟုတ်ဘူး။ အချိန်အများစုမှာ ခေါင်းဆောင်နဲ့အတူ လက်တွဲလုပ်ဆောင်ရတဲ့ အရာရှိချုပ်တွေအပေါ်မှာလည်း မူတည်နေတာ။

မိုက်ကယ် သန်မာတယ်ဆိုတာကိုတော့ သူတို့ အသေအချာ ယုံကြည်ကြတယ်။ ဘိုးကလွဲလို့ ပိရမစ်ဒစ် ကျူဇင်းက အရာရှိတိုင်းကို သူ အနိုင်ယူနိုင်စွမ်း ရှိတာလည်း ဖြစ်နိုင်တယ်။ သို့ပေမဲ့ မိုက်ကယ်ရဲ့ အရာရှိချုပ်တွေကကော ဒီတာဝန်ကို ထမ်းဆောင်နိုင်ပါ့မလားဆိုတာ သူတို့ မသေချာကြဘူး။

"မင်း သူ့ရဲ့ အရာရှိတွေကို မြင်ဖူးလား ဒစ်ကီ"

ဒစ်ကီက ခေါင်းခါလိုက်တယ်။ "ကျွန်တော် မိုက်ကယ်နဲ့ပဲ တွေ့ဖူးတာ။ သူ့ကုမ္ပဏီမှာ အရာရှိတွေ ရှိမရှိတောင် ကျွန်တော် မသိဘူး"

"မိုက်ကယ်တစ်ယောက်တည်းနဲ့ ပိရမစ်ဒစ် ကျူဇင်းက အရာရှိ လေးယောက် ဒါမှမဟုတ် နှစ်ယောက်ကိုတောင် ယှဉ်ပြိုင်နိုင်လိမ့်မယ်လို့ မင်း ထင်လား" ဘော်ဘီက ထပ်မေးပြန်တယ်။

ဒီတစ်ကြိမ်မှာတော့ ဒစ်ကီ မသေချာတော့ဘူး။ မိုက်ကယ် လုပ်နိုင်တယ်ဆိုရင်တောင်မှ ဒါက သူ့ရဲ့ အစွမ်းအစတွေကို အလဟဿ ဖြုန်းတီးပစ်ရမှာ ဖြစ်လို့ အဆင်ပြေလှတာတော့ မဟုတ်ဘူး။

ဒါကြောင့်မို့လို့ ဒစ်ကီ့မှာ အခု မေးခွန်းတစ်ခု ရှိလာခဲ့ပြီ။

သူတို့ ဘာလို့ ဒီလောက်တောင် ယုံကြည်မှုလွန်ကဲနေကြတာလဲ။ မိုက်ကယ်က သန်မာချင် သန်မာလိမ့်မယ်။ ဒါပေမဲ့ ပိရမစ်ဒစ် ကျူဇင်းကို တစ်ယောက်တည်းနဲ့တော့ မနိုင်နိုင်ဘူးလေ။

* * * * * * *

တစ်ချိန်တည်းမှာပဲ စပိုက်စ်ဗိုက်စ်ကုမ္ပဏီရဲ့ သီးသန့်ခန်းထဲမှာတော့ ရိန်နာက ရီနေးတားကုမ္ပဏီဟာ ဒီလောက်အထိ ချမ်းသာကြွယ်ဝနေတယ်ဆိုတာကို သိလိုက်ရလို့ ထိတ်လန့်တုန်လှုပ်သွားရတယ်။

"သူတို့ တကယ်ပဲ တတ်နိုင်ကြတာလား။ ဒါမှမဟုတ် သူတို့ မတတ်နိုင်တဲ့ အရာတစ်ခုကို အတင်းအဓမ္မ ကြိုးစားနေကြတာလား" လို့ ရိန်နာက သူ့အဖေကို မေးလိုက်တယ်။

သူမရဲ့ မေးခွန်းကို ဗစ်ရှ်နာက သူ့ဘာသာ သဘောကျပြီး တခိခိ ရယ်မောလိုက်တယ်။ "အော်...တတ်နိုင်တာပေါ့။ သူက သေချာပေါက် တတ်နိုင်တယ်။ သူက အရင်ကတည်းက ချမ်းသာပြီးသား။ နောက်ဆိုရင်လည်း ပိုပြီးတော့တောင် ချမ်းသာလာဦးမှာ"

မိုက်ကယ်မှာ မော်တော်ကားတွေ ရှိတယ်ဆိုတာကို သိထားတဲ့ လူနည်းစုထဲမှာ သူလည်း တစ်ယောက် အပါအဝင်ပဲ။ ပြီးတော့ ဒီလေလံပွဲမှာ ရှိနေတဲ့ လူတိုင်းရဲ့ စိတ်လှုပ်ရှားမှုနဲ့ စိတ်အားထက်သန်မှုတွေကို ကြည့်ခြင်းအားဖြင့် ကုန်တင်ကားတွေအတွက် လေလံဈေးက မိုးထိအောင် မြင့်တက်သွားလိမ့်မယ်လို့ သူ ခံစားမိနေတယ်။

ရီနေးတားကုမ္ပဏီက သာမန်အဖွဲ့အစည်းတစ်ခု မဟုတ်ဘူးဆိုတာကို ပိုပြီးတော့ သဘောပေါက်လာတဲ့ သူ့သမီးရဲ့ မျက်လုံးတွေ စတင်ပြောင်းလဲလာတာကို ဗစ်ရှ်နာ မြင်လိုက်ရတယ်။

"ကဲပါ သမီးရယ်။ သူနဲ့ အဆင်ပြေအောင် ကြိုးစားကြည့်ပါလား"

ရိန်နာက ချက်ချင်းပဲ ခေါင်းခါလိုက်တယ်။ "အဖေရယ်...သမီးက လူတစ်ယောက်ရဲ့ တန်ဖိုးကို ကြည့်ပြီးတော့ အချစ်ကို ဆုံးဖြတ်တာ မဟုတ်ဘူးလေ။

ပြီးတော့လည်း သူတို့အနေနဲ့ ဒီကိစ္စမှာ ပိရမစ်ဒစ် ကျူဇင်းနဲ့ ယှဉ်ပြိုင်နိုင်လိမ့်မယ်လို့ သမီး မထင်ဘူး။ မိုက်ကယ် သန်မာတယ်ဆိုတာကို သမီး လက်ခံနိုင်ပါတယ်။ ဒါပေမဲ့ သူက တစ်ယောက်တည်းလေ။ ဘိုးရဲ့ သန်မာတဲ့ အရာရှိတွေကို သူတစ်ယောက်တည်းနဲ့တော့ မနှိမ်နင်းနိုင်ပါဘူး"

ဗစ်ရှ်နာက နှုတ်ခမ်းကို စေ့လိုက်တယ်။ သမီးဖြစ်သူက အချက်ကျကျ ပြောပြသွားတာပဲ။ အမှန်တော့ ရီနေးတားကုမ္ပဏီမှာ ကောင်းမွန်တဲ့ အခြေခံအုတ်မြစ်တွေ ရှိမရှိဆိုတာကို သူကိုယ်တိုင်တောင် မသိဘူးလေ။ တခြားကုမ္ပဏီတွေကို ယှဉ်ပြိုင်တိုက်ခိုက်နိုင်တဲ့ အစွမ်းက မိုက်ကယ်တစ်ယောက်တည်းမှာပဲ ရှိနေတာလည်း ဖြစ်နိုင်တာပဲ။

* * * * * * *

အခန်းရဲ့ တခြားတစ်ဖက်မှာတော့ ဘိုးရီဂိုးက သူ့ရဲ့ ကုလားထိုင်ပေါ်မှာ ထိုင်ရင်း၊ သူမရဲ့ မျက်နှာပေါ်မှာ အပြုံးတစ်ခုနဲ့အတူ လှပတဲ့ ရွှေအိုရောင် ဆံပင်ကောက်ကောက်တွေကို လက်နဲ့ လိမ်ကျစ်ကစားနေတယ်။

"သူတို့ ငါ့ကို စိန်ခေါ်နေတာပဲ" လို့ သူမ သဘောပေါက်လိုက်တယ်။

"ရီနေးတားကုမ္ပဏီက ဒီမြေကွက်ကို သူတို့ဘာသာ လိုချင်ရုံသက်သက်ဆိုရင် ပိုပြီးတော့ သက်သာတဲ့ ဈေးနှုန်းနဲ့ ကစားပွဲကို သဘောတူလိုက်ရုံပဲ။ ဒါပေမဲ့ အဲဒီလိုလုပ်မယ့်အစား ငါ့ကို စိန်ခေါ်တဲ့အနေနဲ့ လေလံဈေးကို ပိုပြီးတော့ မြင့်အောင် လုပ်လိုက်ကြတယ်"

ရီနေးတားရဲ့ ပိုင်ရှင်ဟာ သူမရဲ့ တကယ့်ရည်ရွယ်ချက်ကို ရိပ်မိသွားပြီဆိုတာ သူမ သိလိုက်တယ်။ သူမက မြေကွက်ကို ဘာရည်ရွယ်ချက်မှမရှိဘဲ လေလံဆွဲနေတာ။ သူမမှာ သုံးပစ်နိုင်တဲ့ ငွေတွေ ရှိနေလို့သာ ဒီလိုလုပ်ခဲ့တာ။

ရီနေးတားကုမ္ပဏီကလည်း အဲဒီလိုမျိုး လုပ်နေတဲ့ပုံစံပဲ။ သူတို့က ဈေးနှုန်းကို သန်းချီအထိ မြှင့်စရာ မလိုပါဘူး။ သူတို့ လုပ်နိုင်လို့သာ လုပ်ခဲ့ကြတာ။

တစ်ချိန်တည်းမှာပဲ စင်မြင့်ရဲ့ အောက်ခြေမှာတော့ ဘာနာဘီက သူ့ရဲ့ နောက်ဆုံး ရေတွက်ခြင်းကို စတင်လိုက်ပြီ။

"ရီနေးတားကုမ္ပဏီက ရွှေဒင်္ဂါးပြား သန်းချီ ပေးထားပါတယ်။ ဒီထက်ပိုပြီး ဈေးမြှင့်ချင်တဲ့သူ ရှိပါသေးလား" ဘာနာဘီက ပိရမစ်ဒစ် ကျူဇင်းရဲ့ သီးသန့်ဆွိတ်ဝတ်စုံအခန်းဆီကို အတိအကျ လှမ်းကြည့်ရင်း မေးလိုက်တယ်။

"ငါတို့ သန်းချီ သုံးလို့ရသေးလား" လို့ သူမက သူ့ရဲ့ ဘဏ္ဍာရေးမှူးကို မေးလိုက်တယ်။

"တော်တော်လေးတော့ ကျပ်ညပ်သွားလိမ့်မယ် သခင်မ။ ဒီလေလံပွဲအတွက် ကျွန်တော်တို့မှာ ဘတ်ဂျက် သန်းချီဝန်းကျင်ပဲ ရှိတာ။ ဒီထက်ပိုသွားရင်တော့ ဝိညာဉ်ဆီ လေလံပွဲအတွက် စုဆောင်းထားတာတွေကို ထိခိုက်မယ့် အန္တရာယ် ရှိလိမ့်မယ်"

ဘိုးက ခေါင်းငြိတ်လိုက်တယ်။ "ငါ လေလံဈေးကို ၁၂သန်း ပေးလိုက်မယ်။ သူတို့က အဲဒါကို ထပ်ပြီး ယှဉ်ပြိုင်မယ်ဆိုရင်တော့ ၁၅သန်း ပေးကြလိမ့်မယ်။ အဲဒီနောက်မှာတော့ ငါ အရှုံးကို လက်ခံပြီး မှော်ကမ္ဘာငယ်လေး ကစားပွဲထဲမှာ သူတို့နဲ့ တိုက်ခိုက်တော့မယ်"

သူမက ဘာနာဘီကို လှမ်းကြည့်ပြီး သူမ ပြောခဲ့တဲ့အတိုင်း တိတိကျကျ လုပ်ဆောင်လိုက်တယ်။ သူမက မှန်အမှောင်ကို ခေါက်ပြီး ၁၂သန်း ပေးလိုက်တယ်။

"ကမ်းလှမ်းချက်အသစ်…"

ဒေါက်

"ရီနေးတားကုမ္ပဏီက ၁၅သန်း ကမ်းလှမ်းလိုက်ပါတယ်"

ဒီလိုမျိုး ဖြစ်ပျက်လာတာကို မြင်လိုက်ရတဲ့အခါ ဘိုးက ပြုံးလိုက်တယ်။ သူမ ခန့်မှန်းထားခဲ့သလိုပါပဲ။ ရီနေးတားကုမ္ပဏီရဲ့ ပိုင်ရှင်က သူတို့ရဲ့ ချမ်းသာကြွယ်ဝမှုကနေတစ်ဆင့် သူတို့ရဲ့ လွှမ်းမိုးမှုကို ပြသချင်ရုံ သက်သက်ပဲ။

"ရပါတယ်လေ။ လေလံဆွဲတာမှာတော့ မင်းတို့ နိုင်သွားပြီ။ တိုက်ခိုက်ပွဲမှာတော့ ငါတို့ နိုင်ရမယ်"

သူမက မှော်ကမ္ဘာငယ်လေး ကစားပွဲထဲမှာ သူမရဲ့ အတော်ဆုံး အရာရှိတွေကို ထည့်သွင်းတော့မယ်။

"တခြား ကမ်းလှမ်းချက်တွေ ရှိပါသေးလား" ဘာနာဘီက အခန်းထဲကို လှမ်းမေးလိုက်တယ်။ "တစ်ကြိမ်...နှစ်ကြိမ်...အဆုံးအဖြတ်…"

ဒေါက်

ဘာနာဘီတစ်ယောက် စကားပင် မပြောနိုင်တော့ဘူး။

"ရီနေးတားကုမ္ပဏီက သန်း၂၀ ကမ်းလှမ်းလိုက်ပါတယ်။ သူတို့က...သူတို့က...သူတို့ရဲ့ ကိုယ်ပိုင်လေလံဈေးကိုပဲ သူတို့ဘာသာ ပြန်ပြီးတော့ ကျော်ဖြတ်လိုက်တာပါ..."

* * * * * * * *

စာစဉ်(၄၅)