အခန်း ၅၃၂

အခန်း(၅၃၂)

မက်ထရိုပိုလစ်မြို့ရဲ့ ပါရမီအရှိဆုံး လူငယ်မျိုးဆက်သစ်တွေလို့ သတ်မှတ်ခံထားရတဲ့ ရိုင်းဇင်းဆစ် အဖွဲ့ဟာ အတော်ကြာမှ ပထမဆုံးအကြိမ်အဖြစ် လေလံပွဲရဲ့ လက်ရှိအခြေအနေကို ဆွေးနွေးဖို့ အခန်းတစ်ခန်းထဲမှာ စုံစုံလင်လင် ဆုံမိကြတယ်။

အခုဆိုရင် သူတို့ခြောက်ယောက်ဟာ စည်းဝိုင်းပုံစံ ထိုင်နေကြပေမဲ့ အာရုံစိုက်မှုအားလုံးက ဒီဆွေးနွေးပွဲကို အစပြုဖို့ စီစဉ်ခဲ့တဲ့သူဆီပဲ ရောက်နေတာပါ။ အဲဒီလူကတော့ ဘိုးရီဂိုး ပဲ ဖြစ်တယ်။

"ကဲ ငါ မင်းတို့ကို ဘာလို့ ဒီနေရာမှာ စုလိုက်ရလဲဆိုတာ အားလုံး ရိပ်မိကြမှာပါ" ဘိုးက လက်နှစ်ဖက်ကို ပူးယှက်ပြီး စားပွဲပေါ် မှီလိုက်ရင်း ပြောတယ်။ "ငါ ပစ်ဇီမှုန့်တွေအကြောင်း ဆွေးနွေးချင်လို့။ အထူးသဖြင့် ရေလူသား တွေက ဒါကို ဘာဖြစ်လို့ အသည်းအသန် လိုချင်နေကြတာလဲ ဆိုတာကိုပေါ့"

မိကျောင်းရေခွံတွေနဲ့ လိုင်းဖော်ထားတဲ့ ကောင်းဘွိုင်ဦးထုပ်ကို ဆောင်းထားတဲ့ အမျိုးသားတစ်ယောက်က ရှေ့ကို ကိုယ်ကိုင်းလိုက်တဲ့အခါ သူ့မျက်နှာတစ်ခြမ်းဟာ အပေါ်က မှော်မီးရောင်အောက်မှာ လင်းခနဲ ဖြစ်သွားတယ်။ သူက သဘောကျသလို ပြုံးရင်း ဂျုံရိုးတစ်ချောင်းကို ဝါးနေခဲ့တာ။

"မင်းတို့ ဘာလို့ ဒီကိစ္စကို ဆွေးနွေးနေကြတာလဲဆိုတာ ငါ လုံးဝ နားမလည်နိုင်ဘူး။ သူတို့က ပိုက်ဆံတတ်နိုင်လို့ ပစ်ဇီမှုန့်တွေကို လိုချင်ကြတာ ရှင်းနေတာပဲဥစ္စာ" လို့ သူက ဆိုတယ်။

ရိန်နာ က နှာခေါင်းရှုံ့လိုက်ပြီး "ရက်ပ်တာရာ... ကိစ္စက မင်းထင်သလို ရိုးရိုးရှင်းရှင်းကြီး မဟုတ်ဘူး။ မင်းရဲ့ ခရိုကိုဒိုင်းလယ်သာကုမ္ပဏီ ရော အလှအပ သက်သက်အတွက်တင် ဒင်္ဂါးပြား တစ်သန်းလောက် အလဟဿ အကုန်ခံမလား"

အဲဒီလူရဲ့ နာမည်က ရက်ပ်တာ ဖြစ်ပြီး ခရိုကိုဒိုင်းလယ်သာကုမ္ပဏီ ရဲ့ တက်သစ်စကြယ်ပွင့်တစ်ပွင့်ပေါ့။ ဒီအုပ်စုထဲမှာတော့ တတိယမြောက် အတော်ဆုံးလို့ အသိအမှတ်ပြုခံထားရသူပါ။

"ဒါက နတ်သူငယ်တွေ နဲ့ တစ်ခုခု ပတ်သက်နေတာ သေချာတယ်" မျက်လုံးတွေကို ဖုံးအုပ်ထားတဲ့ ဆံပင်ကေရှည်ရှည်နဲ့ အမျိုးသားတစ်ယောက်က တိုးတိုးသက်သာ ပြောလိုက်တယ်။

"ဖင်းမ် ပြောတာ မှန်တယ်" ဘိုးက ထောက်ခံလိုက်တယ်။

ကြည့်ရတာ ရှက်တတ်ပြီး အေးဆေးအိန္ဒြေရပုံပေါ်ပေမဲ့ ဖင်းမ် လို့ခေါ်တဲ့ ဒီကောင်လေးကိုတော့ လျှော့တွက်လို့ မရဘူး။ ဘာလို့လဲဆိုတော့ သူက ဘိုးရဲ့အောက် ဒုတိယမြောက် အတော်ဆုံး တက်သစ်စကြယ်ပွင့်အဖြစ် သတ်မှတ်ခံထားရလို့ပဲ။ သူက ပိရမစ်ဒစ် ကျူဇင်း လိုပဲ အောင်မြင်ကျော်ကြားတဲ့ အိန်ဂျယ်လစ်ခရပ်ဖ်စ် ကုမ္ပဏီကို ကိုယ်စားပြုထားတာ။

"ငါ ရေလူသားတွေအကြောင်း အများကြီး မသိပေမဲ့ သူတို့က ကုန်းပေါ်က သတ္တဝါတွေနဲ့ တူညီတဲ့အချက် သိပ်မရှိဘူးဆိုတာတော့ သိတယ်။ သူတို့က နတ်သူငယ်တွေနဲ့ ဘာများ လုပ်ချင်ရတာလဲ"

ကတ်ကီ ရှပ်အင်္ကျီနဲ့ ဘောင်းဘီတိုကို ဆင်တူဝတ်ထားတဲ့ နောက်ထပ် လူငယ်တစ်ယောက်ကလည်း သူ့အမြင်ကို ဝင်ပြောတယ်။ ကြည့်ရတာ သူက သဘာဝတောတောင်ရုပ်ရှင်တွေထဲက လူတစ်ယောက်နဲ့ တထေရာတည်းပဲ။

သူ့နာမည်က အာလော့စ် ဖြစ်ပြီး စတုတ္ထမြောက် အဆင့်ရှိတဲ့ တက်သစ်စကြယ်ပွင့်ပါ။ သူက အယ်လီဂေတာ ကုမ္ပဏီက ဖြစ်တာမို့ ရက်ပ်တာ ရဲ့ ခရိုကိုဒိုင်းလယ်သာကုမ္ပဏီနဲ့ ပြိုင်ဘက်တွေ ဖြစ်ကြတယ်။

"သူတို့ ဘာလို့ လိုချင်ရလဲဆိုတာကို ငါတို့က သိဖို့ လိုလို့လား"

ဒီမေးခွန်းကို မေးလိုက်တာကတော့ ရိုင်းဇင်းဆစ် ထဲမှာ ဗလအကောင်းဆုံးဖြစ်တဲ့ တန်ဇင်း ပါ။ သူက ပဉ္စမမြောက် အဆင့်ရှိပြီး မောင်တိန်မူးဗားစ် ကုမ္ပဏီက လာတာ ဖြစ်တယ်။

"မင်းပြောတာ ကွက်တိပဲ တန်ဇင်း။ ရေလူသားတွေ ပစ်ဇီမှုန့်တွေကို ဘာလို့ လိုချင်လဲဆိုတာ ငါတို့ သိစရာမလိုဘူး" ဘိုးက အတည်ပြုပေးတယ်။ "သူတို့ လိုချင်နေကြတယ်ဆိုတာ သိထားဖို့ပဲ လိုတာ။ ဒါမှ ငါတို့က အခွင့်ကောင်းယူနိုင်မှာ"

ရိန်နာက ဘိုး ဘာပြောချင်လဲဆိုတာ ချက်ချင်း သဘောပေါက်သွားပြီး "မင်းက သူတို့အတွက် ပစ်ဇီမှုန့်တွေကို လေလံဆွဲပေးပြီး ရေလူသားတွေနဲ့ ဆက်ဆံရေး တည်ဆောက်ချင်တာပေါ့"

ဘိုးက သူမကို လက်ညှိုးထိုးပြလိုက်ပြီး "ဟုတ်တယ်။ ငါတို့သာ ရေလူသားတွေနဲ့ စီးပွားရေးအရ ဆက်ဆံရေး ရှိသွားရင် ငါတို့ရဲ့ ကုမ္ပဏီတွေဟာ နောက်ဆုံးအတားအဆီးကို ကျော်ဖြတ်နိုင်ပြီး ထိပ်တန်းအုပ်စုကြီးတွေထဲ ဝင်သွားနိုင်မှာ"

ဒီစကားကြောင့် တက်သစ်စကြယ်ပွင့်အားလုံး ခဏလောက် ငြိမ်ကျသွားကြတယ်။ သူတို့အားလုံးဟာ အဲဒီလိုအချိန်မျိုးကို ပြင်းပြင်းပြပြ လိုချင်နေကြတာဖြစ်ပြီး ဒါကို အကောင်အထည်ဖော်ဖို့ဆိုရင် ဘာမဆို လုပ်ကြမှာ။

"အဲဒီလိုဆိုရင်လည်း မင်းဘာလို့ ကိုယ့်ဘာသာကိုယ် မလုပ်တာလဲ" ရိန်နာက ဘိုးကို မေးတယ်။

"ငါကတော့ ဒီ စပ်စပ်စုစု ကောင်မလေးဘက်ကပဲ" လို့ ရက်ပ်တာက ဆိုတယ်။

"ငါက အဲဒီ ပစ်ဇီမှုန့်တွေကို ကိုယ့်အတွက်ပဲ လိုချင်တာ။ အဲဒီတော့ ဒီအစည်းအဝေးက စကတည်းက လုံးဝ အပိုပဲ ဖြစ်နေပြီ"

ဘိုးက ခေါင်းခါလိုက်ပြီး "ဒီလိုမျိုး တွေးနေတာ ငါတို့တင် မဟုတ်ဘူးဆိုတာ ငါ အသေအချာ သိတယ်။ ထိပ်တန်းအုပ်စုကြီးတွေရဲ့ လက်ဂါစီ့စ် တွေလည်း အခုအချိန်မှာ သူတို့အချင်းချင်း အစည်းအဝေး လုပ်နေလောက်ပြီ။

သူတို့က ရေလူသားတွေနဲ့ စီးပွားရေးလုပ်ဖို့ အခွင့်အရေးကို ဒီအတိုင်း လက်လွတ်ခံလိမ့်မယ်လို့ မင်းတို့ ထင်လား။ ငါသာ သူတို့နေရာမှာဆိုရင် အထူးသဖြင့် ကိုယ့်မှာ အရင်းအမြစ်အပြည့်အစုံ ရှိနေရင် ဒီအခွင့်အရေးကို ဖမ်းဆုပ်မှာပဲ။

အဲဒီတော့ မင်းတို့က အဲလ်ရစ် ဒါမှမဟုတ် တခြားသူတွေကို တစ်ယောက်တည်း ရင်ဆိုင်ပြိုင်ချင်တယ်ဆိုရင်လည်း သဘောအတိုင်းသာ လုပ်ကြပေါ့"

ဘိုးရဲ့ သတိပေးချက်က ရိုင်းဇင်းဆစ် အဖွဲ့ကို အိပ်မက်ကနေ လန့်နိုးသွားစေတယ်။ သူတို့က မက်ထရိုပိုလစ်မြို့မှာ ထိပ်တန်းကုမ္ပဏီတွေလို့ အသတ်မှတ်ခံထားရပေမဲ့ ထိပ်တန်းအုပ်စုကြီးတွေနဲ့ ယှဉ်လိုက်ရင်တော့ အခြေခံအဆင့် လောက်ပဲ ရှိပါသေးတယ်။ တစ်ယောက်ချင်းသာ ပြိုင်ရင်တော့ ပုရွက်ဆိတ်တစ်ကောင်လို အဖိခံလိုက်ရမှာ အသေအချာပဲ။

"မင်းပြောတာ ဟုတ်ပြီ" လို့ တန်ဇင်းက ဆိုတယ်။ "မင်း ငါတို့ကို ဒီမှာ စုလိုက်ကတည်းက ဖြေရှင်းနည်းတစ်ခုခု ရှိလို့နေမှာပဲလို့ ငါ ယူဆတယ်"

ဘိုးက ပြုံးလိုက်ပြီး "မှန်တာပေါ့။ တစ်ယောက်ချင်းဆိုရင် ငါတို့က ထိပ်တန်းအုပ်စုကြီးတွေကို ဘယ်လိုမှ မယှဉ်နိုင်ဘူး။ ဒါပေမဲ့ ငါတို့ရဲ့ အရင်းအမြစ်အားလုံးကို ပေါင်းလိုက်မယ်ဆိုရင်တော့ လေလံပွဲမှာ နိုင်ဖို့ အခွင့်အရေး ရှိလာလိမ့်မယ်"

ဒါက တကယ့်ကို ရဲရင့်တဲ့ လုပ်ရပ်တစ်ခုဖြစ်ပြီး ကျန်တဲ့ ရိုင်းဇင်းဆစ် အဖွဲ့ဝင်အားလုံးကို အံ့ဩသွားစေတယ်။ ဘာလို့လဲဆိုတော့ သူတို့က အချင်းချင်း ခင်မင်ကြတယ်ဆိုပေမဲ့ ပြိုင်ဆိုင်မှုကတော့ အပြည့်ရှိနေကြလို့ပဲ။

ဒီကိစ္စမှာ သူတို့က လက်ဂါစီ့စ်တွေနဲ့ အတော်လေး တူတယ်။ ဒါပေမဲ့ လက်ဂါစီ့စ်တွေနဲ့ ယှဉ်ရင် ရိုင်းဇင်းဆစ် အဖွဲ့က ခင်မင်တာထက် ပြိုင်ဆိုင်မှုက ပိုပြင်းထန်တယ်။ အားလုံးမှာ တစ်ယောက်ကိုတစ်ယောက် ကျော်ဖြတ်ပြီး ထိပ်တန်းအုပ်စုကြီးတွေဆီ ရောက်ရမယ်ဆိုတဲ့ ရည်မှန်းချက်ကိုယ်စီ ရှိနေကြတာကိုး။

အခုလိုမျိုး ပူးပေါင်းလုပ်ဆောင်ဖို့ ဆိုတာကတော့ ထုံးစံတွေကို ဖောက်ထွက်လိုက်တာပဲ ဖြစ်တယ်။

"ဟို... ငါတို့ရဲ့ အရင်းအမြစ်တွေ အားလုံးပေါင်းလိုက်ရင်တောင် ထိပ်တန်းအုပ်စုကြီးတွေက ငါတို့ကို လေလံဈေး ပိုပေးပြီး နိုင်သွားနိုင်တဲ့ အခွင့်အရေး ရှိသေးတယ်ဆိုတာ မင်းသိတယ်မလား" ဖင်းမ်က တိုးညင်းတဲ့အသံလေးနဲ့ ပြောလိုက်တယ်။

ထိပ်တန်းအုပ်စုကြီးတွေနဲ့ အသေးစားအုပ်စုတွေကြားက ကွာဟချက်က အဲဒီလောက်အထိ ကြီးမားတာပါ။

"စိတ်မပူပါနဲ့" ဘိုးက စိတ်အေးအောင် ပြောလိုက်တယ်။ "သူတို့က ဒီ ပစ်ဇီမှုန့်တွေကို ရဖို့အတွက် သူတို့ရဲ့ အရင်းအမြစ်တွေ အကုန်လုံးကို အသုံးခံမှာ မဟုတ်ဘူး။ သူတို့က မော်တော်ယာဉ်နဲ့ ဝိညာဉ်ဆီ ကို စောင့်နေကြတာ။ အကယ်၍ သူတို့က အခုကတည်းက အရင်းအမြစ်တွေကို သုံးပစ်လိုက်ရင် လေလံပွဲရဲ့ အဲဒီ ပစ္စည်းကြီးတွေ ပေါ်လာတဲ့အခါမှာ လက်ကျန် လျော့နည်းသွားလိမ့်မယ်"

သူမရဲ့ အကျိုးအကြောင်းပြချက်ကို ကြားရတဲ့အခါ ကျန်တဲ့ ရိုင်းဇင်းဆစ် အဖွဲ့ဝင်တွေလည်း သူမရဲ့ ကမ်းလှမ်းချက်ကို အလေးအနက် စဉ်းစားလာကြတယ်။ အကယ်၍ သူတို့က ထိပ်တန်းအုပ်စုကြီးတွေကို ယှဉ်ပြိုင်တော့မယ်ဆိုရင် ဒါက လေလံပွဲမှာ သူတို့ကို အနိုင်ယူနိုင်မယ့် တစ်ခုတည်းသော နည်းလမ်းပဲ ဖြစ်တယ်။

"အားလုံး သဘောတူကြလား" ဘိုးက လက်ထောင်ရင်း မေးလိုက်တယ်။

တစ်ယောက်ပြီးတစ်ယောက် လက်ထောင်လိုက်ကြရာ နောက်ဆုံး တစ်ယောက်ပဲ ကျန်တော့တယ်။

"ငါတို့မှာ အရင်းအမြစ်တွေ လိုနေတယ်ဆိုရင် အဲဒီကုမ္ပဏီကိုလည်း ငါတို့နဲ့ ပူးပေါင်းဖို့ ဘာလို့ မဖိတ်ခေါ်တာလဲ" အာလော့စ်က သူ့ရဲ့ ရှပ်အင်္ကျီကို ပြင်ရင်း ပြောတယ်။ "ဘိုး... ငါ ဘယ်သူ့ကို ပြောတာလဲဆိုတာ မင်းသိပါတယ်"

သူ ရည်ညွှန်းနေတာကတော့ ပိရမစ်ဒစ်ကျူဇင်း ကို လေလံပွဲမှာ ဘာမှ ထပ်မပြိုင်နိုင်တော့အောင် အပြတ်အသတ် နိုင်ပစ်ပြီး သူတို့ရဲ့ ချမ်းသာကြွယ်ဝမှုကို အဆန်းပြားဆုံး ပုံစံနဲ့ ပြသသွားခဲ့တဲ့ ရီနေးတားကုမ္ပဏီ ကလွဲလို့ အခြား မဟုတ်ပါဘူး။

ဘိုးကို အဲဒီလိုမျိုး လုပ်ရဲတဲ့သူ တစ်ယောက်မှ မရှိခဲ့ဖူးတာမို့ ဒါက သူတို့စိတ်ထဲမှာ အကြီးအကျယ် စွဲထင်ကျန်ရစ်သွားတာပေါ့။

"အေးလေ... အဲဒီအစည်းအဝေးမှာ သူတို့ကို ဘာလို့ မပါဝင်ခိုင်းတာလဲ" တန်ဇင်းက မေးတယ်။

"ငါတို့ သူတို့ရဲ့ လူအင်အားကို မလိုဘူး။ ငါတို့ အင်အားနဲ့တင် လုံလောက်တယ်။ ဒါပေမဲ့ ငါတို့ သူတို့ရဲ့ ပိုက်ဆံကိုတော့ လိုလိမ့်မယ်။ သူတို့က ငါတို့နဲ့ အဆင့်တူလောက်အထိ ချမ်းသာမှာ သေချာတယ်"

"ဒါမှမဟုတ် မင်းက လေလံပွဲမှာ သူတို့ကို ရှုံးသွားလို့ စိတ်ကောက်နေသေးလို့ ဒီကို မဖိတ်တာလား" ရက်ပ်တာက စနောက်လိုက်တယ်။

ဘိုးက ခပ်ပြုံးပြုံးနဲ့ ရယ်ပင်ရယ်ချင်သွားပြီး "အဲဒါ မင်းမှားသွားပြီ။ ငါ ရီနေးတားကုမ္ပဏီ နဲ့ တွေ့ဖို့ တကယ်ကို စိတ်ဝင်စားနေတာ။ ငါနဲ့ အဆင့်တူ ရပ်တည်ပြီး အနိုင်ယူသွားနိုင်တဲ့သူက ဘယ်သူလဲဆိုတာကို ငါ သိချင်နေတာ။

ဒါပေမဲ့ ငါ သူတို့ကို ဘယ်နေရာမှာမှ ရှာမတွေ့ဘူး။ ငါ့ရဲ့ ကမ်းလှမ်းချက်တွေကိုလည်း သူတို့ လုံးဝ ပြန်မဖြေကြဘူး။ ငါ လေလံပွဲထဲက သီးသန့်ခန်း တိုင်းကို ဆက်သွယ်ဖို့ ကြိုးစားခဲ့ပေမဲ့ ဘယ်သူကမှ ရီနေးတားကုမ္ပဏီ အနေနဲ့ ပြန်မဖြေခဲ့ကြဘူး"

တကယ်တော့ သူမက လုံးဝ လမ်းကြောင်းအမှားကြီးမှာ ရှာနေခဲ့တာကို သူမကိုယ်တိုင် မသိရှာပါဘူး။ အကယ်၍ သူမက သူမအခန်းရဲ့ အပေါ်က ဗီအိုင်ပီ အခန်းကိုသာ ဆက်သွယ်ခဲ့ရင် မိုက်ကယ် နဲ့ တွေ့ဆုံခွင့် ရရှိခဲ့မှာ သေချာပါတယ်။

* * * * * * * *

စာစဉ်(၄၅)