အခန်း ၅၃၈

အခန်း(၅၃၈)

မိုက်ကယ်ရဲ့ အသင်းက ဒရာဂွန်ဘွန်း မောင်နှမလေးယောက်ရယ် ဂရီးဗ်ရယ်နဲ့ ဖွဲ့စည်းထားတာပါ။ ဒါက မှော်ကမ္ဘာငယ်လေးထဲမှာ သူတို့ကို အောင်ပွဲဆင်ပေးနိုင်လိမ့်မယ်လို့ သူ တွက်ဆထားတဲ့ လူစာရင်းပဲ ဖြစ်တယ်။

ပြီးတော့ သူတို့တွေက ဒီပွဲကို အလေးအနက်ထားတဲ့ပုံ မပေါ်ပေမဲ့လည်း အခြေအနေတွေ တကယ် တင်းမာခက်ခဲလာပြီဆိုရင် အားကိုးလို့ရမှန်း သူ သိနေပါတယ်။ သူတို့တွေက သူ့အတွက် အောင်မြင်အောင် စွမ်းဆောင်ပေးကြမှာပါ။

"မင်းတို့အသင်း အဆင်သင့်ဖြစ်ပြီဆိုရင် ကွင်းထဲကို ဆင်းပေးကြပါတော့" လို့ ဘာနာဘီက ကြေညာလိုက်တဲ့အခါ ပရိသတ်ကြီးကတော့ အကြီးအကျယ်ကို သဘောကျသွားကြတယ်။

သူတို့တွေက ရိုင်းဇင်းဆစ်တွေနဲ့ သူတို့ရဲ့ အတော်ဆုံး အရာရှိတွေ ကွင်းထဲ ဝင်လာမှာကို မျှော်လင့်စောင့်စားနေကြတာပါ။ ဒီလို လူငယ်မျိုးဆက်သစ် ပါရမီရှင်တွေ တစ်နေရာတည်းမှာ အချင်းချင်း ပြိုင်ဆိုင်တိုက်ခိုက်ကြတာကို မြင်ရဖို့ဆိုတာ နေ့တိုင်း ကြုံနိုင်တာမျိုး မဟုတ်ဘူးလေ။ ဒီပွဲရဲ့ အကောင်းဆုံးအပိုင်းကတော့ ဒီလေလံပွဲရဲ့ ရလဒ်က ရိုင်းဇင်းဆစ်ရဲ့ အဆင့်သတ်မှတ်ချက်တွေကိုပါ အကုန် ပြောင်းလဲပစ်နိုင်တာပဲ ဖြစ်တယ်။

နောက်ဆုံးတော့ ကွင်းရဲ့ တစ်ဖက်ခြမ်းကနေ ဘိုးနဲ့ သူမရဲ့ အတော်ဆုံး စစ်သည်တော်ငါးယောက် ဝင်လာတဲ့အချိန်မှာ မှော်အလင်းတန်းတွေက မြေပြင်ပေါ်ကို ဖြာကျလာခဲ့ပါတယ်။

သူမ ဝင်လာတာကို ဩဘာပေးသံတွေနဲ့ အားကျနှစ်သက်တဲ့ အကြည့်တွေ အများကြီးနဲ့ ဆီးကြိုကြတယ်။ သူမက လှေကားထစ်တွေအတိုင်း လျှောက်ဆင်းလာရင်း သူမရဲ့ ရွှေရောင်ကောက်ကောက် ဆံနွယ်တွေက ကျော့ရှင်းပြီး ယုံကြည်ချက်အပြည့်နဲ့ ဘယ်ညာယိမ်းခါနေခဲ့တယ်။

"ဟိုး... အဲဒါ ဘိုးရီဂိုးပဲ။ သူမက အဆင့်တစ်လေ။ သူမရဲ့ အသင်းကိုလည်း ကြည့်ဦး။ ဒီတစ်ခါတော့ အကုန်ပုံအောပြီး လာတာပဲ"

"သူမက ရိုင်းဇင်းဆစ်ရဲ့ အကောင်းဆုံးအဖြစ်နဲ့ သူမရဲ့အမှတ်ကို ပိုအပြတ်အသတ် ဖြတ်ထားဖို့ ပြင်ဆင်လာတာနေမှာ"

"ငါကတော့ သူမကိုပဲ အားပေးတယ်။ သူမက နောင်ကျရင် အဓိက အင်အားစုကြီးတွေဆီ ရောက်ဖို့ အခွင့်အရေးအရှိဆုံးပဲ။ ငါတို့တွေ နောင် အနာဂတ်ရဲ့ လက်ဂါစီတစ်ယောက်ကို မြင်နေရတာလည်း ဖြစ်နိုင်တာပဲ"

ရိုင်းဇင်းဆစ် အဖွဲ့ဝင်တွေက တစ်ယောက်ပြီးတစ်ယောက် လှေကားထစ်တွေအတိုင်း ဆင်းလာပြီး စင်မြင့်ပေါ်က သူတို့ရဲ့ သက်ဆိုင်ရာနေရာတွေကို ယူလိုက်ကြတယ်။ သူတို့ တစ်ယောက်ချင်းစီကို ဩဘာပေးသံတွေ၊ အော်ဟစ်အားပေးသံတွေနဲ့ ဆီးကြိုခဲ့ကြတာပါ။

တိုက်ဆိုင်တာလည်း ဖြစ်နိုင်ပေမဲ့ သူတို့အားလုံးက ကမ္ဘာ့ထိပ်တန်း ကုမ္ပဏီကြီး ၅၀၀ စာရင်းက သူတို့ရဲ့ အဆင့်အတိုင်း ကွင်းထဲကို ကွက်တိ ဆင်းလာခဲ့ကြတယ်။

ပထမဆုံးက ပိရမစ်ဒစ် ကျူဇင်းက ဘိုး၊ နောက်တစ်ယောက်ကတော့ အန်ဂျလစ် ခရပ်ဖ်စ်က ဆံပင်တိုနဲ့ကောင်လေး ဖင်မ်၊ သူ့နောက်ကတော့ ခရိုကိုဒိုင်းလယ်သာက ကောင်းဘွိုင်လူသား ရက်ပတာ၊ သူ့ဘေးမှာတော့ အယ်လီဂေတာကလပ်က ကာကီရောင်ဝတ်ထားတဲ့ အာလော့စ်၊ ပြီးတော့ သူ့နောက်မှာတော့ မောင်တိန်မူးဗားစ်က ကြွက်သားအမြှောင်းမြှောင်းနဲ့ တန်ဇင်းတို့ ဖြစ်ကြတယ်။

နောက်ဆုံးပိတ်သော်လည်း အညံ့စားမဟုတ်တဲ့ စပိုက်စ်ဗိုက်စ်က ရိန်နာလည်း ဝင်လာရော အဓိကကတော့ သူမရဲ့ အလှအပကို သဘောကျတဲ့ အမျိုးသားတွေဆီကနေ ပျံ့လွင့်လာတဲ့ အကြီးအကျယ် သြဘာပေးသံတွေကို ရရှိခဲ့တယ်။

သူမက ခန္ဓာကိုယ်အလှကို ပေါ်လွင်စေတဲ့ လှိုင်းထနေတဲ့ အစိမ်းရောင် ပိုးထည်ရိုးရာဝတ်စုံကို ဝတ်ဆင်ထားပြီး မျက်နှာကို ဇာပဝါပါးလေးနဲ့ အုပ်ထားတာကြောင့် ပိုပြီးတော့တောင် ဆွဲဆောင်မှုရှိနေခဲ့တယ်။

"ဝိုး... သူမက သိပ်လှတာပဲ"

"ရိန်နာ... ငါ့ကို လက်ထပ်ပါဦး"

"သူမက ရိုင်းဇင်းဆစ်ထဲမှာ အဆင့်အနောက်ဆုံး ဖြစ်နေရင်တောင် မင်းတို့လို လူမျိုးတွေနဲ့တော့ ကောင်းကင်နဲ့ မြေကြီးလို ကွာပါသေးတယ်ကွာ"

ရိန်နာကတော့ အမျိုးသားတွေ ပြောနေကြတာတွေကို အကုန်ဥပေက္ခာပြုပြီး စင်မြင့်ရဲ့ သူမရှိရမယ့် ထောင့်ဆီကို လျှောက်သွားလိုက်တယ်။

သူမရဲ့ ဇာပဝါအောက်ကနေ သူမအသင်းရဲ့ ဘေးနားက လွတ်နေတဲ့နေရာဆီကို မသိမသာ ခိုးကြည့်မိတာကိုတော့ သူမ ကိုယ်တိုင်လည်း မတားဆီးနိုင်ခဲ့ဘူး။ ကျန်နေတာဆိုလို့ သူတစ်ယောက်ပဲ ရှိတော့တာလေ။

'ငါ ဘာတွေ လုပ်နေမိတာလဲ' လို့ သူမကိုယ်သူမ ပြန်အပြစ်တင်လိုက်တယ်။ 'ငါ သူ့ကို လျစ်လျူရှုထားရမယ်။ သူက အရေးပါတဲ့လူ မဟုတ်ဘူး။ ငါ အဓိက စိတ်ဝင်စားရမှာက ဝိညာဉ်ဆီတွေပဲ'

သူမက ခေါင်းကို ခါယမ်းလိုက်ပြီး သူမရဲ့ ခေါင်းထဲကို လက်ထပ်ဖို့ အတွေးတွေ အကုန်ရိုက်သွင်းပေးခဲ့တဲ့ သူမရဲ့ အဖေကို စိတ်ထဲကနေပဲ အပြစ်တင်နေမိတယ်။ သူမက သူ့လို ကလေးတစ်ယောက်ကို လက်ထပ်မယ့် အဖော်အဖြစ် စဉ်းစားနိုင်လိမ့်မယ်လို့ တွေးတာကိုက သူမအဖေ တကယ် ရူးနေလို့ပဲ ဖြစ်ရမယ်။

ကွက်တိပဲ၊ နောက်ဆုံး မှော်အလင်းတန်းက စင်မြင့်ပေါ်ကို ဖြာကျလာခဲ့တယ်။

လူတိုင်းက ပါဝင်ယှဉ်ပြိုင်မယ့် နောက်ဆုံးအသင်းရှိရာဆီကို ချက်ချင်း ခေါင်းလှည့်ကြည့်လိုက်ကြတယ်။

ဒီလေလံပွဲတစ်လျှောက်လုံးမှာ ရီနေးတားကုမ္ပဏီက ရိုင်းဇင်းဆစ်တွေကိုတောင် ယှဉ်ပြိုင်နိုင်တဲ့ ချမ်းသာကြွယ်ဝမှုကို ပြသခဲ့တာကို သူတို့ ကိုယ်တိုင် မျက်ဝါးထင်ထင် မြင်ခဲ့ရတာပါ။

ဒါပေမဲ့လည်း အဲဒီကုမ္ပဏီက လျှို့ဝှက်ချက်တွေနဲ့ ဖုံးလွှမ်းနေတုန်းပဲ ဖြစ်တယ်။ သူတို့က ကုမ္ပဏီနာမည်နဲ့ ချမ်းသာကြွယ်ဝမှုကလွဲရင် ဘာတစ်ခုမှ မသိကြဘူးလေ။

ဒါက ရီနေးတားကုမ္ပဏီကို တာဝန်ယူထားတဲ့သူကို သူတို့ ပထမဆုံးအကြိမ် မြင်ဖူးခြင်းပဲ ဖြစ်လိမ့်မယ်။

"ဘယ်သူ ဖြစ်မလဲ သိချင်လှပြီ။ ရာစုနှစ်ပေါင်းများစွာ ကြာအောင် သူတို့ရဲ့ စည်းစိမ်တွေကို စုဆောင်းထားတဲ့ ဂူအောင်းပြီးကျင့်စဉ်ဝင်နေတဲ့သူတစ်ယောက် ဖြစ်ရမယ်"

"မဟုတ်နိုင်တာ၊ လူတွေရဲ့ အာရုံစိုက်မှုကို မုန်းတီးတဲ့ ရင့်ကျက်တဲ့ အသက်လတ်ပိုင်း လူကြီးတစ်ယောက် ဖြစ်မှာပါ"

အတွေးအမြင် သီအိုရီမျိုးစုံ ထွက်ပေါ်နေကြပြီး လေလံပွဲတစ်ခုလုံးမှာ ခြေသံတွေ ဖြည်းဖြည်းချင်း ပဲ့တင်ထပ်လာတာနဲ့အမျှ မျှော်လင့်ချက်တွေက ပိုပြီး မြင့်တက်လာခဲ့တယ်။

နောက်ဆုံးတော့ သူတို့တွေ လျှောက်ဆင်းလာကြတဲ့အခါမှာ လူတွေက မိုက်ကယ်နဲ့ သူ့ရဲ့ ကုမ္ပဏီကို ပထမဆုံးအကြိမ်အဖြစ် ရိပ်ခနဲ မြင်လိုက်ကြရတယ်။

လူတိုင်းရဲ့ မျက်လုံးတွေ ပြူးကျယ်သွားကြတာပေါ့။

သူတို့အသင်းရဲ့ အလယ်တည့်တည့်မှာ ရွှေရောင်ဆံပင်နဲ့ သောကကင်းတဲ့ အပြုံးကို မျက်နှာပေါ် ဆင်မြန်းထားတဲ့ အသက် တစ်ဆယ့်သုံးနှစ်အရွယ် ကလေးတစ်ယောက် ရှိနေတာပါ။ သူက ဘယ်သူမှ မျှော်လင့်မထားတဲ့ ပုံစံမျိုး ဖြစ်နေခဲ့တယ်။

"မဖြစ်နိုင်တာ... ရီနေးတားကုမ္ပဏီရဲ့ ပိုင်ရှင်က အဲဒီကလေးလား"

"ငါတို့ မှားနေတာလည်း ဖြစ်နိုင်တယ်။ ဟိုဘက်က ခေါင်းမြှီးခြုံထားတဲ့ လူ ဖြစ်ရင်ဖြစ်မှာပါ"

မိုက်ကယ်က သူတို့ရဲ့ လူစာရင်းရဲ့ အလယ်တည့်တည့်မှာ ထင်ထင်ရှားရှား ရှိနေတာတောင်မှ လူတွေရဲ့ ပထမဆုံး အတွေးကတော့ ဂရီးဗ်ကသာ ရီနေးတားရဲ့ လျှို့ဝှက်ဆန်းကြယ်တဲ့ ခေါင်းဆောင် ဖြစ်ရမယ်လို့ တွေးနေကြတုန်းပဲ ဖြစ်တယ်။

ဒါပေမဲ့ သူတို့ စင်မြင့်ပေါ်မှာ နေရာယူလိုက်တဲ့အခါ မိုက်ကယ်က သူ့အသင်းဆီကနေ ခွာပြီး ရိုင်းဇင်းဆစ်ရဲ့ အခြားခေါင်းဆောင် ခြောက်ယောက်နဲ့အတူ စင်မြင့်ရဲ့ ညာဘက်အစွန်ဆုံးမှာ သွားရပ်လိုက်တယ်။

ဒါက အတည်ဖြစ်သွားစေခဲ့တာပါ။ သူက ရီနေးတားကုမ္ပဏီရဲ့ ခေါင်းဆောင်ပဲ ဖြစ်တယ်။ မယုံကြည်နိုင်တဲ့ ညည်းတွားသံတွေက ပရိသတ်ကြီးဆီမှာ ပျံ့လွင့်သွားခဲ့တယ်။

"သူက အဲဒီအသက်အရွယ်နဲ့ ကုမ္ပဏီတစ်ခုကို ပိုင်ဆိုင်ထားတာလား"

ဒီအချက်ကြောင့်ပဲ ရီနေးတားက သူတို့ရဲ့ စည်းစိမ်ချမ်းသာတွေကို ကြွားလုံးထုတ်ခဲ့တဲ့ အောင်မြင်မှုတွေအားလုံးက လူတိုင်းရဲ့ စိတ်ထဲမှာ အဓိပ္ပာယ်အသစ် ပြောင်းလဲသွားခဲ့ရတယ်။ သူ့အသက်အရွယ်နဲ့ ကောင်လေးတစ်ယောက်က ဒီလောက် ဧရာမ စည်းစိမ်ချမ်းသာကြီးရှိတဲ့ ကုမ္ပဏီတစ်ခုကို စေခိုင်းစေညွှန်ကြားနိုင်တယ်ဆိုတာကို သူတို့ မယုံကြည်နိုင် ဖြစ်နေကြတာပါ။

ဒါတင်မကဘဲ သူက မှော်ကမ္ဘာငယ်လေးရဲ့ သံလိုက်စွမ်းအားနယ်မြေထဲမှာ ရှိနေတယ်ဆိုတဲ့ အချက်က သူကလည်း အခြား ရိုင်းဇင်းဆစ်တွေလိုပဲ မက်ဂ်နက်တစ်တစ်ယောက် ဖြစ်နေတယ်ဆိုတဲ့ အဓိပ္ပာယ်ပဲ ဖြစ်တယ်။

မိုက်ကယ်က သူ့နေရာကို ယူလိုက်တဲ့အခါ သူ့ကို စိုက်ကြည့်နေတဲ့ အကြည့်မျိုးစုံကို သူ ခံစားလိုက်ရတယ်။ အဲဒါက မကောင်းတဲ့ စိတ်နဲ့ ကြည့်တာမျိုးတော့ မဟုတ်ပါဘူး၊ ဒါပေမဲ့ သူက အာရုံစိုက်မှုအားလုံးရဲ့ ဗဟိုချက် ဖြစ်နေတာကတော့ အသေအချာပါပဲ။

သူက ဗွီအိုင်ပီခန်းထဲက လူတွေရဲ့ အာရုံစိုက်မှုကိုတောင် ဖမ်းစားနိုင်ခဲ့တာပါ။ မှော်မျှော်စင်သခင်က နောက်ဆုံးတော့ မိုက်ကယ်ကို သေသေချာချာ မြင်လိုက်ရပြီ ဖြစ်တယ်။ သူ့ကို နှလုံးရောဂါရလုနီးပါး ဖြစ်အောင် လုပ်ခဲ့တဲ့ နာမည်နောက်က မျက်နှာကို မြင်လိုက်ရတာကတော့ အနည်းငယ် စိတ်သက်သာရာ ရစေခဲ့တာပေါ့။

တစ်ချိန်တည်းမှာပဲ ကောင်းကင်ဘုံစစ်သည်တော် ခရူဂါက မိုက်ကယ်ကို ချက်ချင်း မှတ်မိသွားပြီး အမှတ်ရသွားခဲ့တယ်။

'အဲဒါ ငါတို့ကို ကိုကိုးချောကလက်တွေ ရောင်းတဲ့ကောင်လေးပဲ' လို့ သူ သဘောပေါက်သွားတယ်။ 'သူက မက်ထရိုပိုလစ်ကိုတောင် ရောက်နေပြီလား'

ရိုင်းဇင်းဆစ်တွေကတော့ အခြားလူတွေထက် ပိုပြီး အံ့ဩနေကြတယ်။ ဘာပဲဖြစ်ဖြစ် လူအများစုက သူတို့ကို ငယ်ငယ်ရွယ်ရွယ်နဲ့ အောင်မြင်မှုတွေ အများကြီး ရရှိခဲ့တာကြောင့် ပါရမီရှင်တွေ၊ ထူးချွန်သူတွေလို့ သတ်မှတ်ထားကြတာလေ။

ဒါပေမဲ့ သူတို့ထက်တောင် ငယ်တဲ့ မိုက်ကယ်ကို မြင်လိုက်ရတဲ့အခါ သူတို့ကိုယ်သူတို့ အများကြီး ပိုအသက်ကြီးသွားသလို ခံစားလိုက်ရတယ်။ သူတို့က သူက ပိုအသက်ကြီးလိမ့်မယ်၊ ဒါမှမဟုတ် အနည်းဆုံးတော့ သူတို့နဲ့ အသက်တူလောက် ဖြစ်မယ်လို့ ထင်ထားခဲ့ကြတာကိုး။

နေရထိုင်ရ ထောက်နေတဲ့ ခံစားချက်ကို ဖျောက်ဖျက်ဖို့အတွက် မိုက်ကယ်က သူ့ဘေးနားတင် ရှိနေတဲ့ ရိန်နာဘက်ကို လှည့်ပြီး နှုတ်ဆက်လိုက်တယ်။

"ဟေး... ငါတို့ မင်းတို့ရဲ့ ဌာနချုပ်မှာတုန်းက တွေ့ခဲ့ကြသေးတယ်နော်"

သူက နှုတ်ဆက်လိုက်ပေမဲ့လည်း ရိန်နာက သူ့ရဲ့ တည်ရှိမှုကို ခပ်တန်းတန်းပဲ တုံ့ပြန်ခဲ့တယ်။ သူမက သူ့ရဲ့ အကြည့်တွေကို တက်တက်ကြွကြွ လျစ်လျူရှုထားပြီး မှော်ကမ္ဘာငယ်လေးဆီကိုပဲ သူမရဲ့ မျက်လုံးတွေကို အာရုံစိုက်ထားခဲ့တယ်။

'သူမက ဒီပွဲကို တကယ် အလေးအနက်ထားနေတာပဲ' လို့ သူ တွေးလိုက်မိတယ်။

အခုဆိုရင် လူတိုင်းက သူတို့ရဲ့ သက်ဆိုင်ရာ နေရာတွေမှာ ရှိနေကြပြီမို့ ဘာနာဘီက သူ့ရဲ့ ဟိန်းထွက်နေတဲ့ အသံကြီးနဲ့ လူတိုင်းရဲ့ အာရုံကို ဖမ်းစားလိုက်တယ်။

"ကစားသမားတို့... မင်းတို့တွေ မှော်ကမ္ဘာငယ်လေးထဲကို ခြေချလိုက်တာနဲ့ မင်းတို့ရဲ့ နယ်မြေတွေထဲက ကျပန်းနေရာတစ်ခုဆီကို ရောက်သွားကြလိမ့်မယ်။ အားလုံး အဆင်သင့် ဖြစ်ကြပြီလား"

လူတိုင်းက ခေါင်းငြိမ့်ပြကြတယ်။

"ခုန်ချလိုက်ကြတော့"

သူက အဲလို ပြောလိုက်တာနဲ့ လူတိုင်းက ခြေထောက်ကို အရင်ဦးတည်ပြီး မှော်ကမ္ဘာငယ်လေးထဲကို ခုန်ဆင်းသွားကြတော့တယ်။ တစ်စုံတစ်ရာသော မှော်စွမ်းအားက သူတို့ကို မြေပြင်ပေါ်ဆီ တိုက်ရိုက် ပို့ဆောင်ပေးနေခဲ့တာပါ။

ရိန်နာက အရင်ဆုံး သွားတဲ့လူတွေထဲမှာ ပါဝင်ပြီး မိုက်ကယ်ကတော့ အနောက်ဆုံးမှာ ကျန်ခဲ့တဲ့လူတွေထဲက တစ်ယောက် ဖြစ်တယ်။

သူ မခုန်ချခင်မှာ ဘာနာဘီက သူ့ကို ကံကောင်းပါစေကြောင်း မသိမသာ လက်မထောင်ပြခဲ့တယ်။ သူကလည်း ကျေးဇူးတင်ကြောင်း ခေါင်းငြိမ့်ပြပြီး မှော်ကမ္ဘာငယ်လေးထဲကို ခုန်ဆင်းသွားခဲ့ပါတော့တယ်။

လူတိုင်း ဂိမ်းထဲကို ရောက်သွားတဲ့အခါ ပရိသတ်ကြီးကြားထဲမှာ ဆွေးနွေးငြင်းခုံသံတွေ စတင်ထွက်ပေါ်လာခဲ့တယ်။

"ဘိုးကတော့ သော့ဂလောက်တွေကို အများဆုံး ရမှာ သေချာတယ်။ သူမ ဟိုမှာ ရပ်နေတုန်းက စွမ်းအားကို မြင်လိုက်တယ်မလား"

"ငါကတော့ ဖင်မ်နဲ့ အန်ဂျလစ် ခရပ်ဖ်စ်တို့က အနည်းဆုံး တစ်ခု ဒါမှမဟုတ် နှစ်ခုလောက် ရလိမ့်မယ်လို့ ထင်တယ်"

"မင်းတို့ ဘယ်လိုတွေးတွေး ငါကတော့ အလွန်လှပတဲ့ ရိန်နာကိုပဲ အားပေးတယ်။ သူမက လူတွေ ထင်သလောက် မညံ့ပါဘူး"

ဘယ်သူက အစက်အပြောက်တွေကို ရမလဲဆိုတဲ့ ခန့်မှန်းချက်တွေ၊ တွက်ဆချက်တွေ အားလုံးထဲမှာ ရီနေးတားကုမ္ပဏီရဲ့ နာမည်ကတော့ တစ်ကြိမ်တစ်ခါမျှ တိုင်အောင် ထွက်မလာခဲ့ပါဘူး။

* * * * * * * *

စာစဉ်(၄၅)