အခန်း (၂၄၃၇-၂၄၃၈)

အခန်း (၂၄၃၇) - သူ စပျစ်သီး စားနေတာလား

"ဖန့် ကျောင်းသားကတော့... ဒီတစ်ခါတော့ အန္တရာယ်များပြီ။"

ချိုင်စစ်ရှို့ က သူ့ဘာသာ သူ တိုးတိုးလေး ရေရွတ်လိုက်သည်။

သူသည် ကံကောင်း၍ လူသားမျိုးနွယ်စု ကျောင်းတော်မှ ကျောင်းသားအုပ်စုတစ်စုနှင့် ပွဲကြည့်နေရင်း လမ်းမှာ ဆုံတွေ့ခဲ့ကြခြင်းဖြစ်သည်။ အနီးနားတွင် ရွှမ်ပုထုံ၊ လုကျိုဝမ် ၊ မိုရှဲ့ ၊ ဝေရွှန်း၊ ထိုက်ရှီးဝမ်ကျန်း တို့ ရှိနေကြသည်။

ချိုင်စစ်ရှို့ ၏ စကားကြောင့် လူတိုင်း၏ မျက်နှာအမူအရာတို့မှာ ပိုမိုလေးနက် တင်းမာလာကြသည်။

ထိုက်ရှီးဝမ်ကျန်း က အလွန်အလေးအနက်ဖြင့် -

"မျိုးနွယ်စု စွမ်းအားနှစ်ခုကို ပေါင်းသုံးတာ၊ အရင်က တစ်ခါမှ မမြင်ဖူးဘူး။ ငါ့ရဲ့ အတွေ့အကြုံ မလုံလောက်သေးလို့လည်း ဖြစ်နိုင်ပါတယ်။"

"ဒါဟာ ကောင်းကင်အရှင် သူတော်စင် ဆက်ခံသူတစ်ယောက်ရဲ့ အခြေခံအုတ်မြစ်ဆိုတာလား..."

ဝေရွှန်း က ရေရွတ်လိုက်သည်။

ကျောင်းတော်မှ ကျောင်းသားတစ်ဦးအနေဖြင့် သူသည် မိမိ၏ ပါရမီကို ချင်းမင် အဆင့်မြင့်ဆုံး မဟာမိတ်အဖွဲ့တွင် ထိပ်တန်းအဆင့်ဟု ထင်မှတ်ထားခဲ့သည်။ နေမင်းခုနှစ်ပါး ကျောင်းသားများနှင့် ကွာခြားမှု အလွန်ကြီးမားသည်ကို သိသော်လည်း နှစ်ဦးကြားရှိ ကွာခြားချက်မှာ ဤမျှတောင် ကြီးမားလိမ့်မည်ဟု သူ မထင်ထားခဲ့ပေ။ ထိပ်တန်းမျိုးနွယ်စုတွေက မျိုးနွယ်စုစွမ်းအားတွေကို ပိုင်ဆိုင်ထားတာပဲ ထားတော့၊ အခု နှစ်မျိုးတောင် ပိုင်ဆိုင်ထားတယ်ဆိုတာ ဖြစ်နိုင်ပါ့မလား။

"ဖန့်ချန် ကျောင်းသားက သူများနဲ့ ယှဉ်တိုက်တိုင်း အမြဲတမ်း အဆင်ပြေချောမွေ့နေကျပဲ၊ ဒီတစ်ခါလည်း သူမှာ ပြန်လည်ဖြေရှင်းနိုင်မယ့် နည်းလမ်း ရှိမှာပါ။"

ထိုက်ရှီးဝမ်ကျန်း က ရုတ်တရက် ရယ်မော၍ ပြောသည်။

"ဖြေရှင်းနိုင်မယ့် နည်းလမ်း ဟုတ်လား"

ဝေရွှန်း က ရုတ်တရက် အေးစက်စွာဖြင့် -

"အကယ်၍ မျိုးနွယ်စု စွမ်းအား တစ်ခုတည်းဆိုရင်တော့ သူ ဖြေရှင်းနိုင်မယ်လို့ ငါ ယုံကြည်ပေးနိုင်တယ်။ ဘာလို့လဲဆိုတော့ ဒီနှစ်တွေမှာ သူ့ရဲ့ နည်းလမ်းတွေက တကယ်ကို ထူးခြားလွန်းလို့၊ ငါတို့ မမြင်ဖူးတဲ့ လျှို့ဝှက်ကတ်တွေ ရှိနေနိုင်တယ်။ ဒါပေမဲ့... မျိုးနွယ်စု စွမ်းအား နှစ်ခု၊ အဲဒီထဲမှာ တစ်ခုက ပြစ်ဒဏ်ပေး နတ်ဆိုးမျိုးနွယ်ရဲ့ တစ္ဆေနှိမ်နင်းသည့် နတ်ဆိုးမျက်လုံး ဖြစ်နေတာ၊ ဒါကို ဘယ်လိုများ ဖြေရှင်းမှာလဲ မင်းတို့ တစ္ဆေနှိမ်နင်းသည့် နတ်ဆိုးမျက်လုံး ရဲ့ စွမ်းအားကို မသိကြဘူးလား"

လူတိုင်း တိတ်ဆိတ်သွားကြသည်။ ထိုက်ရှီးဝမ်ကျန်းပင်လျှင် ပြန်၍ မပြောနိုင်တော့ပေ။

အခြားတစ်ဖက်တွင်...

ကျိလင် သည် လက်သီးကို တင်းတင်းဆုပ်လိုက်ပြီး မျက်ဝန်းထဲတွင် စိတ်လှုပ်ရှားမှုများ ပြည့်နှက်နေသည်။ ဂုဏ်သိက္ခာကို လုံးဝ ပျက်စီးသွားခဲ့သည့်နေ့ကတည်းက ဖန့်ချန်မှာ သူ့အတွက် စိတ်စွဲလမ်းမှု တစ်ခု ဖြစ်လာခဲ့သည်။ ဒီရက်ပိုင်းအတွင်းမှာ ဖန့်ချန် ဆိုတဲ့ နာမည်ကို ကြားလိုက်တိုင်း သူ၏ နှလုံးသားက အပ်နှင့် ထိုးသကဲ့သို့ နာကျင်ရသည်။

"ဒီတစ်ခါတော့ စိတ်စွဲလမ်းမှုကို ဖယ်ရှားပစ်ဖို့ နည်းလမ်း ရပြီ "

ကျိလင် က သူ့ဘာသာ သူ ရေရွတ်လိုက်သည်။ သူသည် မေဒေါင်ကွမ်း အရင်က ခံစားခဲ့ရသည့် စိတ်အခြေအနေကို တဖြည်းဖြည်း နားလည်လာခဲ့သည်။ သူသည် မေဒေါင်ကွမ်း ကို နားလည်နိုင်ပြီး၊ နောက်ဆုံးတွင် သူကိုယ်တိုင်ပင် မေဒေါင်ကွမ်း ဖြစ်လာခဲ့သည်။

"ငါ့ကံသာ ကောင်းရင်ပေါ့၊ မေ အစ်ကိုသာ ဒီနေ့ထိ အသက်ရှင်နေမယ်ဆိုရင် သူလည်း ငါ့လိုပဲ ဘဝကို မျှော်လင့်ချက်တွေနဲ့ ပြည့်နှက်နေမှာ၊ စိတ်ပျက်အားငယ်နေမှာ မဟုတ်ဘူး။"

...

"ငါကြားတာတော့ တစ္ဆေနှိမ်နင်းသည့် နတ်ဆိုးမျက်လုံး က တချို့သော အချက်တွေမှာ ဝိညာဉ်မျိုးနွယ်စုကို ရင်ဆိုင်ရင် အပိုဆောင်း အားသာချက် ရှိတယ်တဲ့။ ဒါပေမဲ့ အဲဒါအပြင် တခြား ဘာထူးခြားချက်တွေ ရှိသေးလဲဆိုတာ ဘယ်သူ ပြောပြနိုင်မလဲ"

"ပြစ်ဒဏ်ပေး နတ်ဆိုးမျိုးနွယ်စုထဲမှာ တစ္ဆေနှိမ်နင်းသည့် နတ်ဆိုးမျက်လုံး ကို နားလည်တဲ့သူ အနည်းငယ်ပဲ ရှိတယ်။ ပြီးတော့ ပြစ်ဒဏ်ပေး နတ်ဆိုးမျိုးနွယ်စုရဲ့ အရေအတွက်ကလည်း နည်းပါးတယ်၊ လောကကြီးမှာ တစ္ဆေနှိမ်နင်းသည့် နတ်ဆိုးမျက်လုံး ရဲ့ စွမ်းအားကို တကယ် မြင်ဖူးတဲ့ သူတော်စင်က အလွန်ရှားပါတယ်။ ဒါပေမဲ့ ငါတော့ နည်းနည်း သိထားတယ်။"

"အစ်ကိုကြီး မြန်မြန်ပြောပါဦး။"

"အဟွတ် အဟွတ်၊ ဒီတစ္ဆေနှိမ်နင်းသည့် နတ်ဆိုးမျက်လုံး အကြောင်းပြောရရင်၊ သူက လောကမှာရှိတဲ့ မျက်လုံးဆိုင်ရာ စွမ်းအားပေါင်း များစွာထဲမှာ ထိပ်ဆုံး ၃ ခုထဲမှာ ပါဝင်နိုင်တယ်။ ဘာလို့လဲဆိုတော့ သူက ဝိညာဉ်မျိုးနွယ်စုကို အားသာချက် ရှိနေလို့ပဲ၊ အဲဒီအချက်တစ်ခုတည်းနဲ့တင် သူက ကျော်ကြားဖို့ လုံလောက်တယ်။ ဝိညာဉ်မျိုးနွယ်စုက ကောင်းကင်ငါးပါးစစ်မြေပြင်မှာ ဘယ်လောက်တောင် အရေးပါလဲဆိုတာ မင်းတို့လည်း သိကြမှာပါ။"

"တော်စမ်းပါ၊ တခြား အသုံးဝင်ပုံကို မြန်မြန်ပြော "

"တခြား အသုံးဝင်ပုံကတော့... တစ္ဆေနှိမ်နင်းသည့် နတ်ဆိုးမျက်လုံး က ဟင်းလင်းပြင်ထဲက အရာတွေကိုလည်း ဖိနှိပ်နိုင်တဲ့ စွမ်းအား ရှိတယ်လို့ပဲ ပြောနိုင်တယ်။"

"ဟင်"

"အတွင်းနယ်မြေ ဆိုတာ ဟင်းလင်းပြင်ကနေ လာတာလေ"

လူပေါင်းများစွာသော သူတော်စင်တို့မှာ ရုတ်တရက် သဘောပေါက်သွားကြပြီး ကြောက်လန့်တကြား ဖြစ်သွားကြသည်။ အတွင်းနယ်မြေက ဟင်းလင်းပြင်က လာတယ်ဆိုတာ ထားတော့၊ ဒဏ္ဍာရီထဲက သူတော်စင် ကျမ်းစာတွေတောင် ဟင်းလင်းပြင်က လာတာပဲ မဟုတ်လား ကောင်းကင် ငါးပါးစစ်မြေပြင်က အရာအားလုံး၊ သူတို့ သူတော်စင်တွေ အပါအဝင် အကုန်လုံးက ဟင်းလင်းပြင် နဲ့ ဆက်စပ်နေတာပဲ အကယ်၍ တစ္ဆေနှိမ်နင်းသည့် နတ်ဆိုးမျက်လုံး က ဒီအပိုင်းမှာ အားသာချက် ရှိနေရင်တော့ ဒါဟာ သူတော်စင်တွေကို တိုက်ခိုက်ဖို့ အကောင်းဆုံး လက်နက်ပဲ။

ယခုအချိန်တွင် လူတိုင်းမှာ ဖန့်ချန် ရောက်ရှိနေသည့် ဟင်းလင်းပြင်နယ်မြေသည် တစ္ဆေနှိမ်နင်းသည့် နတ်ဆိုးမျက်လုံး ၏ စွမ်းအားကြောင့် ထိခိုက်နေပြီဟု ခံစားနေရသည်။

...

စီကုပေ့ ၏ နှုတ်ခမ်းထောင့်တွင် အနည်းငယ် ကွေးညွှတ်သွားသည်။ မျက်ဝန်းထဲက ဝဲဂယက်များသည် အလွန်နက်ရှိုင်းနေပြီး ဟင်းလင်းပြင်နှင့် ချိတ်ဆက်ထားသော နေရာတစ်ခုကဲ့သို့ပင်။ တစ်ချက်ကြည့်လိုက်ရုံဖြင့် စိတ်ဝိညာဉ်တို့ ဟင်းလင်းပြင်၏ နက်ရှိုင်းသောနေရာသို့ ကျရောက်သွားမည့်အတိုင်း ကြောက်မက်ဖွယ်ကောင်းလှသည်။

"တစ္ဆေနှိမ်နင်းသည့် နတ်ဆိုးမျက်လုံး၊ တကယ်ကို သုံးလို့ကောင်းတာပဲ"

သူသည် မိမိရှေ့ရှိ ဟင်းလင်းပြင်သည် တစ္ဆေနှိမ်နင်းသည့် နတ်ဆိုးမျက်လုံး ကြောင့် ပိတ်ဆို့၊ တားဆီး၊ ဖိနှိပ်ခံလိုက်ရပြီဖြစ်ကြောင်း ရိပ်မိလိုက်သည်။

"ဖြစ်နိုင်တာက၊ အဲဒီမျက်လုံးလုံးကိုတောင် သုံးစရာ မလိုတော့ဘူးထင်တယ်။"

ဤသို့ တွေးတောရင်း စီကုပေ့က ဖန့်ချန်ကို သရော်သော အကြည့်ဖြင့် ကြည့်လိုက်သည်။

"ဖန့်ချန်၊ မင်း လှုပ်ရှားနိုင်သေးလား"

ဖန့်ချန် ဘာမျှ မပြောပေ။ တစ္ဆေနှိမ်နင်းသည့် နတ်ဆိုးမျက်လုံး ၏ စွမ်းအားကို ငြိမ်သက်စွာ ခံစားနေသည်။ မမြင်နိုင်သော လက်ပေါင်းများစွာက သူနှင့် သူ၏ အတွင်းနယ်မြေပေါ်သို့ ကျရောက်လာသကဲ့သို့ပင်။ ထိုအချိန်တွင် သူကိုယ်တိုင်တင်မက အတွင်းနယ်မြေထဲရှိ စွမ်းအားများ၊ ကျင့်စဉ် အမှတ်တံဆိပ်များပါ မမြင်နိုင်သော လက်များဖြင့် ချုပ်နှောင်ခံထားရသလို ခံစားနေရသည်။ သာမန် စွမ်းအင်စုစည်းခြင်း နောက်ပိုင်းအဆင့် သူတော်စင်ဆိုလျှင် လှုပ်ရှားဖို့ဆိုတာ ထားလိုက်၊ စွမ်းအင် အနည်းငယ်မျှပင် ထုတ်သုံးနိုင်မည် မဟုတ်ပေ။

"ချုပ်နှောင်ခြင်း... ငါ့ရဲ့ ထိပ်တန်း နည်းလမ်းစွမ်းအား နဲ့ နည်းနည်း ဆင်တူတယ်။ ဝမ်ချွမ်း နဲ့လည်း ဆင်တူတာပဲ။"

ဖန့်ချန် စိတ်ထဲတွင် တိတ်တဆိတ် တွေးလိုက်သည်။ အကြောင်းရင်းမသိဘဲ သူသည် ထိုစွမ်းအားနှင့် အကျွမ်းတဝင် ရှိနေသလို ခံစားလိုက်ရသည်။

"တစ္ဆေနှိမ်နင်းသည့် နတ်ဆိုးမျက်လုံး၊ ငါနဲ့ တော်တော်ကိုက်ညီမယ့်ပုံပဲ။ လူ့လောက ၊ ဝမ်ချွမ်း တို့နဲ့ ပေါင်းစပ်လိုက်ရင် အံ့အားသင့်စရာ ရလဒ်တွေ ထွက်လာနိုင်တယ်။ ကံဆိုးတာက ငါက ပြစ်ဒဏ်ပေး နတ်ဆိုးမျိုးနွယ်စုက မဟုတ်ဘူး။"

ထိုသို့ တွေးမိသည်နှင့် ဖန့်ချန်၏ ခန္ဓာကိုယ်ထဲရှိ ကျင့်စဉ်စွမ်းအားများမှာ မီးတောင်ပေါက်ကွဲသကဲ့သို့ ပေါက်ကွဲထွက်လာသည်။ တစ္ဆေနှိမ်နင်းသည့် နတ်ဆိုးမျက်လုံး ၏ စွမ်းအားမှာ ပြင်းထန်သော်လည်း၊ အကြွင်းမဲ့ စွမ်းအား၏ ရှေ့တွင်မူ ပါးလွှာသော ရေခဲပြင်ကဲ့သို့ အပိုင်းပိုင်း အစအစ ကွဲကြေသွားသည်။

"စီကုပေ့၊ မင်းရဲ့ နည်းလမ်းက ဒီလောက်ပဲ ရှိရင် ကောင်းကင် ငါးပါးစစ်မြေပြင်မှာ ဘာလို့ မီးမွှေးဖို့ အရည်အချင်းရှိရမှာလဲ ငါ့အမြင်တော့ တန်ခယ်ရွှမ် က မင်းထက်တောင် ပိုပြီး အရည်အချင်းရှိသေးတယ်။"

ဖန့်ချန်က အေးဆေးစွာ လက်ကိုမြှောက်၍ ဆံပင်ကို သပ်လိုက်သည်။

"..."

"ဒါ ဘယ်လိုလုပ် ဖြစ်နိုင်မှာလဲ"

အရပ်ရပ်မှ သူတော်စင်များမှာ အလွန်တုန်လှုပ်သွားကြသည်။ ဘာအကြောင်းပြချက်မှ မရှိဘဲနဲ့ တစ္ဆေနှိမ်နင်းသည့် နတ်ဆိုးမျက်လုံး က ကျိုးပေါက်သွားတာလား သို့မဟုတ် ဤစွမ်းအားမှာ နာမည်သာရှိပြီး အစွမ်းမရှိတာလား တစ္ဆေနှိမ်နင်းသည့် နတ်ဆိုးမျက်လုံး ကို သံသယဝင်သော အသံများ ပေါ်ထွက်လာသည်။

ရင်တန့် က တိုက်ရိုက်ပင် ရယ်မော၍ -

"တစ္ဆေနှိမ်နင်းသည့် နတ်ဆိုးမျက်လုံး က မကောင်းတာ မဟုတ်ဘူး၊ အဲဒါကို သုံးတဲ့ကောင်က အစွမ်းမရှိတာ "

သူတော်စင်များမှာ သဘောပေါက်သွားကြသည်။ အသုံးပြုသူက အစွမ်းမရှိခြင်းကြောင့်သာ ဖြစ်သည်။ စိတ်လှုပ်ရှားနေသော လင်ယောင် ကျောင်းသားများမှာလည်း ယခုအခါတွင် မျက်နှာအမူအရာ တောင့်တင်းသွားကြသည်။ စီကုပေ့မှာ တုန်လှုပ်မှု ခဏတာ ဖြစ်ပြီးနောက် ရုတ်တရက် ရယ်မောလိုက်သည်။

"ဖန့်ချန် မင်းက တကယ်ကို သန်မာတာပဲ။"

စကားဆုံးသည်နှင့် သူသည် အလွန်လျင်မြန်သော အရှိန်အဟုန်ဖြင့် အရာတစ်ခုကို ထုတ်ယူ၍ မျိုချလိုက်သည်။

စားရင်းနှင့်ပင် ရယ်မော၍ -

"ဒါပေမဲ့ မင်း ဘယ်လောက်ပဲ သန်မာပါစေ၊ အသက်စွမ်းအင် အဆင့် တစ္ဆေနှိမ်နင်းသည့် နတ်ဆိုးမျက်လုံး ရဲ့ စွမ်းအားကို ယှဉ်နိုင်ပါ့မလား "

"သူ စပျစ်သီး စားနေတာလား"

"ဒီလို အရေးကြီးတဲ့ အချိန်မှာ စပျစ်သီး စားနေတာတဲ့လား"

"........."

အရပ်ရပ်မှ သူတော်စင်များမှာ စီကုပေ့၏ လုပ်ရပ်ကြောင့် ကြောင်သွားကြသည်။ သူတို့ သေချာမြင်လိုက်ရသည်မှာ ၎င်းသည် ရတနာမဟုတ်ဘဲ စပျစ်သီး တစ်လုံးသာဖြစ်သည်။ သံသယဖြစ်ဖွယ် အသံများ ဆက်တိုက် ထွက်ပေါ်လာသည်။ ပွဲကြည့် သူတော်စင်များထဲမှ တစ်ဦးသည် ဤမြင်ကွင်းကို မြင်လိုက်ရသည့်အခါ မျက်မှောင်ကြုတ်သွားသည်။

စီကုပေ့ကိုယ်တိုင်လည်း တစ်ခုခု မှားနေမှန်း သိလိုက်သည်။ အရသာက လုံးဝ မမှန်ပေ။ သူသည် ခဏမျှ ဝါးစားလိုက်ပြီးနောက် ရုတ်တရက် ပြန်ထွေးထုတ်လိုက်ကာ လက်ထဲရှိ စပျစ်သီး အကြွင်းအကျန်ကို ကြည့်ရင်း မျက်နှာပျက်သွားသည်။ ဒါ ဘာဖြစ်တာလဲ သူ စားလိုက်မိတာက...

"စပျစ်သီး ကြိုက်ရင် အိမ်ပြန်သွားမှ စား၊ ဒီနေရာက ကောင်းကင် ငါးပါးစစ်မြေပြင်၊ မင်းအိမ် မဟုတ်ဘူး။"

ဖန့်ချန် စကားဆုံးသည်နှင့် သူ၏ ရှေ့တွင် တံဆိပ်ခတ်တစ်ခု ပေါ်လာသည်။ ထူးခြားသော ကျင့်စဉ် ကရုဏာ တံဆိပ်တော် ကမ္ဘာမြေကို ဖျက်ဆီးနိုင်လောက်သည့် စွမ်းအားများမှာ ရေလွှမ်းမိုးသကဲ့သို့ စီကုပေ့ ဆီသို့ ဦးတည်သွားသည်။ စီကုပေ့ မှာ ဘာဖြစ်သွားမှန်းတောင် စဉ်းစားချိန်မရလိုက်ဘဲ မျက်ဝန်းထဲတွင် ရက်စက်မှုများဖြင့် -

"အဲဒီမျက်လုံးလုံး မပါလည်း ငါ မင်းကို သတ်ပစ်မယ် "

နောက်တစ်စက္ကန့်တွင် သူသည် ချီထျန် ကြီးမားသော ကျောက်စာ မှတ်တမ်း ကို အသုံးပြုလိုက်သည်။ ကရုဏာ တံဆိပ်တော် ကို ကရုဏာ တံဆိပ်တော် ဖြင့်ပင် ပြန်လည် တားဆီးရန် ပြင်ဆင်လိုက်တော့သည်။

အခန်း (၂၄၃၈) - အားနည်းလွန်းတယ်

"စီကုပေ့ က မျိုးနွယ်စု စွမ်းအားကို အသုံးပြုလိုက်ပြီ "

ခဏတာ အံ့အားသင့်သွားပြီးနောက်၊ ကျောင်းသား အသီးသီး၏ မျက်ဝန်းထဲတွင် လေးနက်သော အမူအရာများ ရောက်ရှိလာသည်။

'တစ္ဆေနှိမ်နင်းသည့် နတ်ဆိုးမျက်လုံး' ပျက်စီးသွားတာက ကိစ္စမရှိ၊ စီကုပေ့ က ပြစ်ဒဏ်ပေး နတ်ဆိုးမျိုးနွယ်စုဝင် မဟုတ်တာကြောင့် အခုနက သုံးလိုက်တာက အစစ်အမှန် မဟုတ်တာ ဖြစ်နိုင်တယ်။ ဒါပေမဲ့ 'ချီထျန် ကြီးမားသော ကျောက်စာ မှတ်တမ်း' ကတော့ မတူပေ။

၎င်းက ရန်သူ၏ အပြင်းထန်ဆုံး တိုက်ခိုက်မှုတွေကို မူလအတိုင်း ပြန်လည် ပစ်လွှတ်နိုင်စွမ်း ရှိသည်။ ထို့ပြင် စွမ်းအားကို အသုံးပြုသည့် သူတော်စင်ကို အလွန် ကြောက်မက်ဖွယ်ကောင်းသော ပြန်လည်ကောင်းမွန်လာမှု စွမ်းအားကိုလည်း ပေးစွမ်းနိုင်သည်။ စွမ်းရည်ချင်း တန်းတူသည့် အဆင့်တူသူချင်းမှာဆိုလျှင် ထိုစွမ်းအားတစ်ခုတည်းဖြင့်ပင် တစ်ယောက်တည်းက ဆယ်ယောက်ကို ယှဉ်တိုက်နိုင်သည်။

"ချီထျန် ကြီးမားသော ကျောက်စာ မှတ်တမ်း"

ကရုဏာ တံဆိပ်တော် ၏ စွမ်းအားလှိုင်းကြီး မိမိဆီ ရောက်လာသည်ကို မြင်သောအခါ စီကုပေ့ က ဒေါသတကြီး အော်ဟစ်လိုက်သည်။ ချက်ချင်းဆိုသလိုပင် သူ၏ ရှေ့ရှိ စွမ်းအားလှိုင်းကြီးမှာ ကရုဏာ တံဆိပ်တော် ၏ စွမ်းအားကြောင့် ချက်ချင်း ပြိုကွဲသွားသည်။

ကမ္ဘာမြေကို ဖျက်ဆီးနိုင်လောက်သည့် စွမ်းအားလှိုင်းမှာ လျော့ပါးမသွားဘဲ မျက်မြင်ကိုယ်တွေ့ မြင်နိုင်သည့်အရှိန်ဖြင့် စီကုပေ့၏ အတွင်းနယ်မြေ တံခါးပေါက်ကို အရည်ပျော်စေသည်။ ထိုမြင်ကွင်းကို ကြည့်နေကြသည့် သူတော်စင်အားလုံးမှာ ကြောင်အသွားကြသည်။

အစအဆုံး စီကုပေ့သည် ထိပ်တန်း စွမ်းအားကြီး နှစ်ခုကို အသုံးပြုခဲ့သော်လည်း၊ တစ်ခုမျှ မကျန် ချက်ချင်း အနိုင်ယူခံလိုက်ရသည်လား။

"အသုံးမကျတဲ့ကောင်။"

အရိပ်တစ်ခုက လက်ကို နောက်ပစ်၍ ရပ်နေပြီး နေမင်းကြီးကဲ့သို့ တောက်ပနေသော အတွင်းနယ်မြေထဲတွင် ရပ်တည်နေသည်။ စီကုပေ့၏ လက်ရှိ အခြေအနေကို ကြည့်ကာ ပါးစပ်မှ အေးစက်စက် စကားလုံး နှစ်လုံးကို တိုးတိုးလေး ထုတ်ဖော်ပြောလိုက်သည်။

"ဘယ်လိုလုပ်ပြီး ဒီလို ဖြစ်သွားရတာလဲ "

စီကုပေ့ မှာ အကြောင်းရင်းကို နားမလည်နိုင် ဖြစ်သွားသည်။ တစ်ဖက်လူ၏ အတွင်းနယ်မြေ စွမ်းအားက ဘာကြောင့် ဒီလောက်အထိ အစွမ်းထက်နေရတာလဲ။ ထိုမျှသော တိုက်ခိုက်မှုမျိုးက တကယ်ပဲ စွမ်းအင်စုစည်းခြင်း နောက်ပိုင်းအဆင့် သူတော်စင်တစ်ယောက် ထုတ်သုံးနိုင်တာ ဟုတ်ရဲ့လား။

သူ တုံ့ပြန်ချိန် မရခင်မှာပင် ဖန့်ချန် က တိုက်ခိုက်မှုပုံစံကို ပြောင်းလဲလိုက်သည်။ လျှပ်စီးတန်းများ တလက်လက်ဖြင့် တောက်ပနေသော နတ်ဘုရားရိုက်တုတ် မှာ ဦးခေါင်းကို ရွယ်၍ ကျလာသည်။ ၎င်းသည် 'ကောင်းကင်မိုးကြိုး' စွမ်းအားနှင့် နတ်ဘုရားရိုက်တုတ် ပေါင်းစပ်ထားခြင်းဖြစ်သည်။

ဗုန်းးးးးဗုန်းးးးးးဟူသော အသံများနှင့်အတူ စီကုပေ့၏ အတွင်းနယ်မြေ တံခါးပေါက်မှာ ထိုနေရာတွင်ပင် ပြိုကွဲသွားတော့သည်။

ဖျပ်

အသံမြည်သံတစ်ခုနှင့်အတူ စီကုပေ့မှာ ဦးခေါင်းကို အရိုက်ခံလိုက်ရပြီး တစ်ကိုယ်လုံး နောက်သို့ လွင့်ထွက်သွားသည်။ သူ၏ ခန္ဓာကိုယ်ပေါ်တွင် မိုးကြိုးရောင်ခြည်များ တလက်လက်တောက်နေသော ကြောက်မက်ဖွယ်ကောင်းသည့် ဒဏ်ရာကြီး တစ်ခု ကျန်ခဲ့သည်။

ဖန့်ချန် က ဟင်းလင်းပြင်တွင် ရပ်တည်ရင်း ဘာမျှ မခံစားရသလို အေးစက်စက်ဖြင့် ကြည့်နေသည်။ နတ်ဘုရားရိုက်တုတ် ၏ တိုက်ခိုက်မှုမှာ လျော့မသွားပေ။ တစ်ချက်ပြီး တစ်ချက် စီကုပေ့၏ ခန္ဓာကိုယ်ပေါ်သို့ ကျရောက်နေသည်။

ဖျန်းးးး

ဖျန်းးးး

ယခုအချိန်တွင် ဟင်းလင်းပြင်ကြီးတစ်ခုလုံးမှာ ရိုက်ချခံရသဖြင့် ပျက်စီးတော့မည့်အတိုင်း ခံစားနေရသည်။ လူတိုင်း၏ မျက်လုံးထဲတွင် နတ်ဘုရားရိုက်တုတ် ဝှေ့ယမ်းရာမှ ကျန်ခဲ့သော အရိပ်များသာ ပြည့်နှက်နေသည်။

"အား အား အား "

စီကုပေ့ မှာ အဆက်မပြတ် အော်ဟစ်နေသည်။ ရိုက်ချက်တိုင်းက သူ့ကို သူ၏ အတွင်းနယ်မြေနှင့် အဆက်အသွယ် ပိုမိုနည်းပါးသွားစေသည်။ သူသည် အခြား ကျင့်စဉ် တံဆိပ်များကို အသုံးပြု၍ တားဆီးရန် ကြိုးစားသော်လည်း အချည်းနှီးသာ ဖြစ်သည်။ ထိုစွမ်းအားလှိုင်းများမှာ ထွက်ပေါ်လာသည်နှင့် နတ်ဘုရားရိုက်တုတ်၏ ရိုက်ချချက်ကြောင့် ပျက်စီးသွားကြသည်။

"အားနည်းလွန်းတယ်။"

လီဝူ နှင့် ချီယန်သူတော်စင် တို့သည် ထိုမြင်ကွင်းကို ကြည့်ရင်း အပြန်အလှန် ကြည့်လိုက်မိကြသည်။ အခုနက ပုဂ္ဂိုလ်မှာ အရင်က ချီကွမ်းယိ နှင့် ယှဉ်လိုက်လျှင် ပုရွက်ဆိတ်နှင့် ကျားကဲ့သို့ ကွာခြားသည်။ အရင်က တစ္ဆေနှိမ်နင်းသည့် နတ်ဆိုးမျက်လုံး ၊ နောက်ပိုင်းက ချီထျန် ကြီးမားသော ကျောက်စာ မှတ်တမ်း တို့မှာ အလွန်ပြင်းထန်သော မျိုးနွယ်စု စွမ်းအားများ ဖြစ်သော်လည်း၊ ယခုအခါတွင်မူ... ထိုစွမ်းအားများက ကြောက်မက်ဖွယ်ကောင်းလောက်အောင် အားနည်းနေသည်။

"တကယ်ကို အသုံးမကျတဲ့ အရာပဲ။"

ဖန့်ချန် က စီကုပေ့ ကို ရိုက်နေရင်းပင် ပြုံး၍ ပြောသည်။ သူသည် ချီကွမ်းယိ နှင့် တိုက်ခိုက်ခဲ့စဉ်က အပြင်းထန်ဆုံး ပုံစံကို လွမ်းဆွတ်နေမိသည်။ ယခုအခါတွင်မူ... စွမ်းအား နှစ်ပုံတစ်ပုံ ပြောနေစရာ မလို၊ သူ တစ်ပုံမျှပင် အသုံးမပြုရသေးပေ။ အပြင်းထန်ဆုံး ပုံစံကို ထုတ်ပြရန်မှာ ဝေးစွ။

အတူတူပင် ဖြစ်သည့် စွမ်းအင်စုစည်းခြင်း နောက်ပိုင်းအဆင့်၊ တူညီသည့် ကောင်းကင်အရှင် ဆက်ခံသူအဖြစ် သတ်မှတ်ထားသော်လည်း၊ စီကုပေ့ နှင့် ချီကွမ်းယိ တို့မှာ ယှဉ်စရာ အကြောင်းအရင်း လုံးဝ မရှိပေ။ သူ၏ လက်ရှိ စွမ်းရည်မှာ ချီကွမ်းရီ နှင့် ယှဉ်တုန်းကထက် ပိုမို သန်မာနေသည်။ တစ်ပွဲလုံးမှာ သူ့ကို စိတ်လှုပ်ရှားစေရန်ပင် မစွမ်းဆောင်နိုင်ခဲ့ပေ။ တကယ်ကို... ပျင်းစရာကောင်းလှသည်။

"ဘာလို့ ဒီလို ဖြစ်ရတာလဲ"

"မင်းတို့ထဲက တစ်ယောက်ယောက် နားလည်လိုက်လား"

"ဖန့်ချန် က တကယ်ပဲ စွမ်းအင်စုစည်းခြင်း နောက်ပိုင်းအဆင့် ဟုတ်ရဲ့လား "

ကျောင်းသားများမှာ ထိုမြင်ကွင်းကို ကြည့်ကာ ကြက်သီးထသွားကြသည်။ တိုက်ပွဲ မစခင်တုန်းက နှစ်ယောက်သား နိုင်ပွဲမှာ ၅၀-၅၀ ဟု ထင်ခဲ့ကြသည်။ နောက်ပိုင်း စီကုပေ့ က တစ္ဆေနှိမ်နင်းသည့် နတ်ဆိုးမျက်လုံး ကို ပိုင်ဆိုင်ထားသည်ကို သိသောအခါ သူပဲ အနိုင်ရလိမ့်မည်ဟု ထင်ခဲ့ကြသည်။ သို့သော် ရလဒ်မှာ သူတို့၏ ခန့်မှန်းချက်ထက် လုံးဝ လွဲချော်နေသည်။

ဒါ ဘာတွေ ဖြစ်နေတာလဲ စီကုပေ့ ဘာလို့ တစ်ခဏချင်းမှာတင် အခြေအနေ ဆိုးရွားသွားပြီး အော်ဟစ်နေရတာလဲ။

လင်ယောင် မဟာမိတ်အဖွဲ့မှ သူတော်စင်များမှာ တံတွေးမြိုချလိုက်မိသည်။

စီကုပေ့ကြောင့် တက်ကြွနေခဲ့သော စိတ်ခံစားမှုများမှာလည်း မသိလိုက်မသိဘာသာ ပျောက်ကွယ်သွားကြသည်။

"ချီထျန် ကြီးမားသော ကျောက်စာ မှတ်တမ်း က ပြဿနာ မရှိပါဘူး၊ စီကုပေ့ က ဒီစွမ်းအားကို ပိုင်ဆိုင်ထားတာ အမှန်ပါပဲ။ တစ်ခုတည်းသော ပြဿနာက သူနဲ့ ဖန့်ချန် ကြားမှာရှိတဲ့ စွမ်းရည် ကွာခြားချက်က အလွန်ကြီးမားလွန်းနေတာပဲ။ သူတင်မကဘူး... ငါတို့နဲ့ ဖန့်ချန် ကြားမှာလည်း ကွာခြားချက်တွေက အလွန်ကြီးမားတယ်။ ဒီနှစ်တွေမှာ သူ ဘယ်လို ကျင့်ကြံလာတာလဲ..."

တန်ခယ်ရွှမ် တိုးတိုးလေး ရေရွတ်လိုက်သည်။ အနီးနားရှိ နေမင်းခုနှစ်ပါး ကျောင်းသားများမှာ တစ်ယောက်မျက်နှာ တစ်ယောက် ကြည့်လိုက်ကြသည်။ အရင်ကဆိုလျှင် သူတို့နှင့် ဖန့်ချန်ကြားတွင် ကွာခြားချက် မရှိဟု ထင်ခဲ့ကြသော်လည်း၊ အခုတော့ အမှန်တရားကို မျက်မြင်ကိုယ်တွေ့ မြင်လိုက်ရသည့်အတွက် သူတို့လည်း ဘာမှပြန်မပြောနိုင်တော့ဘဲ စိတ်ထဲတွင် ရှုပ်ထွေးနေကြသည်။

"ငါတို့နဲ့ သူနဲ့ကြားမှာ တကယ်ပဲ ဒီလောက်တောင် ကွာခြားချက် ရှိနေတာလား "

ဆွေ့ထျန်ဟွမ် မှာ ထုံအသွားသည်။ သူသည် ဤတိုက်ပွဲမှာ စီကုပေ့ နှင့် ဖန့်ချန် တို့ နှစ်ယောက်သား အပေးအယူလုပ်ထားသော ပွဲလားဟုပင် သံသယဖြစ်မိသည်။ သို့သော် လုံးဝ အကြောင်းပြချက် မရှိပေ။

ရှန်ရှိုးယွမ်၊ ဖူယွမ်ကျူး စသည့် ကျောင်းသားများမှာလည်း တိတ်ဆိတ်သွားကြသည်။ ယခင်က ဖန့်ချန် နှင့် ရင်းနှီးခဲ့ဖူးသော ကျောင်းသားများမှာမူ ထို ဖန့် ကျောင်းသားကို မသိတော့သလို၊ အလွန်ပင် စိမ်းသက်နေသလို ခံစားနေရသည်။

ပွဲကြည့်နေကြသည့် ကျောင်းသားအားလုံးမှာလည်း ဤအခြေအနေကို သတိပြုမိကြသည်။

"မဖြစ်နိုင်တာ၊ ဘယ်လိုလုပ်ပြီး..."

ကျိလင် မှာ စိတ်ပျက်လက်ပျက်ဖြင့် မျက်လုံးကို ပွတ်လိုက်သော်လည်း မျက်စိရှေ့က မြင်ကွင်းမှာ ဘာမျှ ပြောင်းလဲမသွားပေ။ စီကုပေ့ က အော်ဟစ်နေဆဲ၊ တုံ့ပြန်နိုင်စွမ်း မရှိတော့ဘဲ အတွင်းနယ်မြေမှာ တစ်လက်မချင်း လျော့နည်းသွားသည်။ ကျိလင် မှာ လုံးဝ စိတ်ဓာတ်ကျသွားသည်။

ရှကျိ နှင့် ချင်းဟော့ချိန်တို့ အပြန်အလှန် ကြည့်လိုက်ကြပြီး တစ်ယောက်မျက်လုံးထဲတွင် တစ်ယောက် အံ့အားသင့်မှုကို မြင်လိုက်ကြသည်။ သူတို့က ဖန့်ချန် နိုင်မည်ဟု ထင်ထားသော်လည်း ဤမျှလောက်ထိ ပုံစံမျိုးကိုမူ မမျှော်လင့်ထားခဲ့ပေ။

ချင်ဟော့ချိန် က အနီးနားရှိ ချီထျန် မျိုးနွယ်စုဝင်ကို ကြည့်၍ -

"မင်း အခုထိရော ဖန့်ချန် ရှုံးလိမ့်မယ်လို့ ထင်နေတုန်းလား "

ထိုသူသည် မျက်တောင်ခတ်၍ -

"ဘာပြောတာလဲ ငါ ဘယ်တုန်းကမှ မပြောခဲ့ဘူး။ မင်း ငါ့ကို မစွပ်စွဲ နဲ့။ ဖန့် ကျောင်းသား ကြားသွားရင် သူ ဘာတွေးမလဲ "

စကားဆုံးသည်နှင့် သူသည် တိုက်ပွဲကို ကြည့်ကာ လက်သီးကို ဝှေ့ယမ်း၍ အားပေးလိုက်သည်။

"အားပေးကြ၊ အားပေးကြ ဖန့် ကျောင်းသား အားပေးကြ "

ချင်ဟော့ချိန် က မျက်မှောင်ကြုတ်လိုက်ပြီး ထိုသူကို ဂရုမစိုက်တော့ဘဲ ရှကျိ ကို ကြည့်ကာ ပြောလိုက်သည်။

"အကယ်၍ ဒီနေ့ ပွဲပြီးရင်တောင် ဖန့်ချန် ကို ဟော်ဆွေ့ ဘိုးဘေးက ကောင်းကင်အရှင် ဆက်ခံသူအဖြစ် မမြှောက်စားပေးရင်၊ တခြား ကောင်းကင်အရှင်တွေ ဝင်ပါလာဖို့ များတယ်။"

ရှကျိ က ခေါင်းညိတ်၍

"ဟုတ်တယ်၊ အဲဒီလို ဖြစ်လိမ့်မယ်။"

ချင်ဟော့ချန် ၏ မျက်ဝန်းထဲတွင် စိုးရိမ်မှုများ ပေါ်လာသည်။ သူသည် လူမျိုးတူဖြစ်သည့် ဖန့်ချန် ကိုသာ ကောင်းကင်အရှင် ဆက်ခံသူအဖြစ် မြင်ချင်သည်။ အကယ်၍ လူမျိုးစုတွင် ဒီလို အရည်အချင်းရှိသူကို မွေးထုတ်ပေးနိုင်စွမ်း မရှိတော့လျှင်၊ ကောင်းကင်အရှင်များ ဝင်ပါလာမည်မှာ အသေအချာပင်။

အခြားတစ်ဖက်တွင်...

ဝမ်ချုံစန်း တို့သည် ထိုမြင်ကွင်းကို ကြည့်ရင်း စိုးရိမ်မှုများ ပပျောက်သွားကာ ပြုံးရွှင်စွာဖြင့် ပွဲကြည့်နေကြသည်။ ရိုက်ချက်ပေါင်း ရာချီ ရိုက်ချခံလိုက်ရသည့် စီကုပေ့ က ထိုအတိုင်း ဆက်ဖြစ်နေ၍ မဖြစ်တော့ဟု ခံစားလိုက်ရသည်။ သူသည် ကောင်းကင်ကို ဟိန်းထွက်သွားအောင် အော်ဟစ်လိုက်ပြီး သူ၏ အတွင်းနယ်မြေမှာ ချက်ချင်း မီးလောင်ကျွမ်းသွားတော့သည်။

ကောင်းကင်အရှင် ဆက်ခံသူ၏ အတွင်းနယ်မြေကို မီးရှို့ပြီး တိုက်ခိုက်ခြင်း။

သူတော်စင်များမှာ ထိုမြင်ကွင်းကို မြင်လိုက်ရသည့်အခါ ကြောက်ရွံ့တုန်လှုပ်သွားကြသည်။