အခန်း (၂၄၄၉-၂၂၅၀)

အခန်း (၂၄၄၉) - သစ္စာစကား အစည်းအဝေးခန်းမ

ကျိုကျိတောင် မှ ထွက်လာပြီးနောက် ဖန့်ချန် သည် ကျိလင် နှင့် စကားပြောရန် ရည်ရွယ်ခဲ့သည်။ ယခုအချိန်တွင် ကျိလင် မည်သည့်နေရာတွင် ရှိနေပြီး မည်သည့်အရာများ လုပ်ဆောင်နေသည်ကို သူ အသေးစိတ် သိရှိထားသည်။

မည်သည့်အတွက်ကြောင့် ဖြစ်မှန်းမသိသော်လည်း ကျိလင် နှင့် သူ၏ ကံကြမ္မာ အကြောင်းတရားမှာ အလွန်ပင် နက်ရှိုင်းစွာ ဆက်နွယ်နေသည်။ ထိုအကြောင်းတရားမှာ လွန်စွာနက်ရှိုင်းလှသဖြင့် ကျိလင် သည် မှောင်မိုက်နေသော အာကာသထဲမှ တောက်ပသော ကြယ်တစ်ပွင့်အလား သူ့မျက်စိရှေ့တွင် အမြဲတမ်း ပေါ်လွင်နေသကဲ့သို့ပင်။ မျက်လုံးကို အနည်းငယ် ပင့်လိုက်ရုံဖြင့် သူသည် ကျိလင် ရှိရာကို အလွယ်တကူ မြင်နိုင်နေသည်။

"ဖန့်ချန်။"

ဆွေ့ဟုန်ကျူ သည် သူမ၏ အတွင်းကမ္ဘာနယ်မြေ ကို စီးနင်းကာ ဖန့်ချန် ၏ ရှေ့သို့ ရောက်လာပြီး ပြုံးလျက် လက်ယက်ခေါ်လိုက်သည်။

"ငါ့ရဲ့ အတွင်းကမ္ဘာနယ်မြေ ထဲကို လာခဲ့၊ မင်းကို ငါ နေရာတစ်ခုဆီ ခေါ်သွားမယ်။"

"အကြီးအကဲ၊ ဘာအတွက်ပါလဲ"

ဖန့်ချန် အနည်းငယ် အံ့အားသင့်သွားသည်။ စုံစမ်းရေးဌာန သည် ကျိလင် ၏ ကိစ္စကို သိသွားပြီလား။

"ငါ ပြောထားတယ်လေ၊ ငါ့ကို အကြီးအကဲလို့ ခေါ်စရာမလိုဘူးလို့။ နင်က အောက်ဝူဖား နဲ့ ညီအစ်ကိုလို ဆက်ဆံနိုင်တာပဲ၊ ဘာလို့ ငါ့ကို ထပ်ခါတလဲလဲ အကြီးအကဲလို့ ခေါ်နေတာလဲ နင့်မှာ ငါ့ရဲ့ လုပ်ဖော်ကိုင်ဖက် ဖြစ်လာဖို့ အခွင့်အရေးရှိတယ်လို့ အရင်က ပြောခဲ့တယ်လေ။ နင့်ရဲ့ အခွင့်အရေး ရောက်လာပြီ။"

ဆွေ့ဟုန်ကျူ ၏ မျက်မှောင် အနည်းငယ် ကြုတ်သွားပြီးနောက် ပြန်လည်ဖြေလျှော့ကာ သူမ၏ မျက်ဝန်းထဲတွင် ပြုံးရွှင်မှုများ ပေါ်လာသည်။

"ကျွန်တော့်ရဲ့ အခွင့်အရေး ရောက်လာပြီ"

ဖန့်ချန် အနည်းငယ် အံ့အားသင့်သွားသည်။ ဒီလောက်ထိ တိုက်ဆိုင်ပါ့မလား စုံစမ်းရေးဌာနက စုံစမ်းရေးဌာန၏ သူတော်စင်များကို စတင်ရွေးချယ်တော့မှာလား။

"ငါ့နောက်ကို လိုက်ခဲ့၊ လမ်းမှာမှပဲ ပြောပြမယ်။"

ဆွေ့ဟုန်ကျူ က တိုက်တွန်းသည်။

"ငါတို့ သွားရမယ့်နေရာက နည်းနည်း ဝေးတယ်။"

"ကျောင်းတော် အပြင်ဘက်မှာလား ကျောင်းတော်အုပ်ကြီး က လွမ်းချူးထျန်း အကြီးအကဲကို လွှတ်ပြီး ဒီကာလအတွင်းမှာ ကျောင်းတော်အပြင် မထွက်ဖို့ သတိပေးထားတယ်ဗျ။"

ဖန့်ချန် က ပြောသည်။

"ကျောင်းတော် နယ်မြေထဲမှာတင်ပါ။ နင့်ရဲ့ ကိစ္စကို ငါ သိပါတယ်၊ တကယ်ပဲ ခဏတာအတွင်းမှာ ကျောင်းတော်အပြင် ထွက်ဖို့ မသင့်တော်ဘူး။ လင်ယောင် မျိုးနွယ်စုတွေ ငါတို့ဘက်ကို စေလွှတ်ထားတဲ့ သူလျှိုတွေရဲ့ တိုက်ခိုက်မှုကို ခံရမှာ စိုးလို့လေ။"

ဆွေ့ဟုန်ကျူ သည် မနေနိုင်ဘဲ ရယ်မောလိုက်သည်။

"နင်တောင် ကြောက်တတ်သေးတာလား"

ဖန့်ချန် ထိုအခြေအနေကို မြင်သောအခါ ဆွေ့ဟုန်ကျူ ၏ အတွင်းကမ္ဘာနယ်မြေ ထဲသို့ ပျံသန်းဝင်ရောက်လိုက်ပြီး ပေါ့ပေါ့ပါးပါး ပြောလိုက်သည်။

"မကြောက်ဘဲ ဘာလုပ်ရမလဲ၊ ကျွန်တော့်နှလုံးသားကလည်း အသားနဲ့ လုပ်ထားတာပဲ၊ ကျောက်တုံးမှ မဟုတ်တာ။"

"ကြောက်တတ်လျက်နဲ့ ဘာလို့ စီကုပေ့ ကို အဲဒီလို ပုံစံမျိုး ဖြစ်အောင် လုပ်လိုက်သေးလဲ "

ဆွေ့ဟုန်ကျူ ခေါင်းခါလိုက်ပြီး အတွင်းကမ္ဘာနယ်မြေ ကို အာကာသထဲသို့ ခုတ်မောင်းသွားသည်။

"လင်ယောင် မျိုးနွယ်စုဘက်မှာ အခု စီကုပေ့ ကိစ္စကြောင့် ဆူညံပွက်လောရိုက်နေတယ်။ သူတော်စင်တော်တော်များများက မင်းကို သတ်ပစ်မယ်လို့ ကြွေးကြော်ထားကြတယ်။ ဒီအချိန်မှာ အကြီးအကဲက အငယ်ကို အနိုင်ကျင့်တယ်ဆိုတဲ့ စကားလုံးတွေ မရှိတော့ဘူး။ လင်ယောင် ရဲ့ သူတော်စင်တွေနဲ့ တွေ့ရင်ပဲဖြစ်ဖြစ်၊ တစ်ဖက်လူက အထွတ်ထိပ်တာအို သို့မဟုတ် ကောင်းကင်ဘုံရှင် ဖြစ်နေရင်တောင် မင်းကို သတ်ပြီး အရှက်ရမှုကို ဆေးကြောဖို့ ဝန်လေးနေမှာ မဟုတ်ဘူး။"

ဖန့်ချန် ရယ်မောလိုက်သည်။

"အဲဒီအချိန်က အခြေအနေမှာ ကျွန်တော်သာ ပြတ်ပြတ်သားသား မလုပ်ခဲ့ရင် ကိုယ့်စိတ်ကိုယ် ကျေနပ်မှာ မဟုတ်ဘူး။ နောက်ဆက်တွဲ ဘာအကျိုးဆက်ပဲ ဖြစ်လာပါစေ၊ ဂရုမစိုက်တော့ဘူး။ ဘယ်လိုပဲဖြစ်ဖြစ် ချင်းမင် ကတော့ ကျွန်တော့်ကို ကာကွယ်ပေးမှာပဲ။"

"ကောင်းတယ်၊ မဟာမိတ်အဖွဲ့ က မင်းကို ကာကွယ်ပေးနိုင်တယ်။ ဒီကိစ္စနဲ့ပတ်သက်ပြီး အရေးပါတဲ့ ပုဂ္ဂိုလ်ကြီး တော်တော်များများက မင်း လုပ်ရပ်ကို သဘောကျနေကြတယ်။ မင်းရဲ့ အရည်အချင်းနဲ့ဆိုရင် တရားစီရင်ရေးအကြီးအကဲ အဖြစ် တာဝန်ထမ်းဆောင်တာ ကြာသေးတာ မဟုတ်ဘူး၊ အမှုကောင်းကောင်းတွေလည်း သိပ်မကိုင်တွယ်ရသေးဘူး။

ဒါကြောင့် ဒီတစ်ခေါက် ရွေးချယ်မှုမှာ ပါဝင်ဖို့ အရည်အချင်း မမီသေးဘူး။ ဒါပေမဲ့ အရေးကြီးတဲ့ ပုဂ္ဂိုလ်ကြီးအချို့က မင်းကို အမည်စာရင်း တင်သွင်းထားလို့ မင်းက အရည်အချင်းကို ကြိုတင် ရရှိသွားတာပဲ။"

ဆွေ့ဟုန်ကျူ အနည်းငယ် သက်ပြင်းချလိုက်သည်။

"မင်း ကမ္ဘာကြီးအဆင့် ကို တက်လှမ်းပြီးမှ ပထမဆုံးအကြိမ် ရွေးချယ်မှုမှာ ပါဝင်ရမယ်လို့ ထင်ခဲ့တာ၊ အခုတော့ အတော်လေးကို ကြိုတင်ပြီး ဖြစ်လာတာပဲ။"

"ကြိုတင် ရွေးချယ်မှုပေါ့လေ။"

ဖန့်ချန် အတွေးနက်သွားသည်။

လူသားမျိုးနွယ်စုဘက်တွင်မူ ဟော်ဆွေ့ ဘိုးဘေးတောင်မှ ဒီလိုကိစ္စမျိုးကို ဝင်ရောက်စွက်ဖက်နိုင်လိမ့်မည် မဟုတ်ပေ။ ထို့ကြောင့် ကြိုတင်ရွေးချယ်မှုမှာ ကျိလင် ယင်သူတော်စင် ဖြစ်လာခြင်းနှင့် တိုက်ရိုက် မသက်ဆိုင်နိုင်ပေ။ သို့သော် ကျိလင် ယင်သူတော်စင် ဖြစ်လာခြင်းမှာ ထိုကိစ္စနှင့် လုံးဝ မသက်ဆိုင်ဘူးဟုလည်း မဆိုနိုင်ပေ။

"အရင်ကတော့ မင်းက ရွေးချယ်မှုမှာ ပါဝင်ဖို့ အရည်အချင်း မရှိသေးဘူးလို့ ငါ ထင်ခဲ့လို့ ကိစ္စတော်တော်များများ မပြောပြရသေးဘူး။"

"အခုတော့ အဆင်ပြေသွားပြီ၊ ငါတို့ စုံစမ်းရေးဌာန အကြောင်းကို အကျဉ်းချုံးပြီး ပြောပြမယ်။"

"မင်း သိထားတဲ့ စုံစမ်းရေးဌာနက ကျောင်းတော်အတွင်းက ရာဇဝတ်မှုတွေကို တာဝန်ယူရတာ ဟုတ်တယ်မဟုတ်လား "

"ဟုတ်ပါတယ်။"

"အင်း၊ အဲဒီလို တွေးတာ မှန်ပေမဲ့ ကျောင်းတော်ရဲ့ တည်ရှိမှုက ဘာအတွက်လဲ "

"ကျောင်းတော်ရဲ့ တည်ရှိမှုက... ချင်းမင် အဆင့်မြင့်ဆုံး မဟာမိတ်အဖွဲ့အတွက် ပါရမီရှင်တွေကို ထောက်ပံ့ပေးဖို့လား "

ဖန့်ချန် ဆွေ့ဟုန်ကျူ ကို တစ်ချက်ကြည့်လိုက်ပြီး စုံစမ်းရေးဌာန၏ တည်ရှိမှု အဓိပ္ပာယ်ကို နားလည်သွားသကဲ့သို့ ရှိသည်။ နင်ကျောင်းအုပ် သည် သူ့ကို လူသားမျိုးနွယ်စု ကျောင်းတော်၏ တရားစီရင်ရေးအကြီးအကဲ အဖြစ် တာဝန်ပေးခဲ့သည့် ရည်ရွယ်ချက်ကိုလည်း လျှို့ဝှက်စွာ ခန့်မှန်းမိလိုက်သည်။

"ကောင်းတယ်၊ ကျောင်းတော်ရဲ့ တည်ရှိမှုက ချင်းမင် အဆင့်မြင့်ဆုံး မဟာမိတ်အဖွဲ့အတွက် ပါရမီရှင်တွေကို ထောက်ပံ့ပေးဖို့ပဲ။ ပြီးတော့ စုံစမ်းရေးဌာနရဲ့ တည်ရှိမှုက ချင်းမင် အဆင့်မြင့်ဆုံး မဟာမိတ်အဖွဲ့အတွက် ထိပ်တန်း ပါရမီရှင်တွေကို ထောက်ပံ့ပေးဖို့ပဲ။"

ဆွေ့ဟုန်ကျူ ခေါင်းညိတ်လိုက်သည်။

"မင်းသာ စုံစမ်းရေးဌာနရဲ့ သူတော်စင် တစ်ဦး ဖြစ်လာနိုင်ရင် နောင်အခါမှာ မဟာမိတ်အဖွဲ့ရဲ့ အဆင့်မြင့် ရာထူးတွေကို တာဝန်ယူနိုင်ဖို့ အရွေးချယ်ခံရလိမ့်မယ်။ အဲဒီအချိန်ကျရင် ချင်းမင်သံတမန် ဆိုတာတောင် မင်းရဲ့ လက်အောက်ငယ်သားပဲ ဖြစ်သွားလိမ့်မယ်။"

'ရွေးချယ်ခံရတဲ့ ပါရမီရှင်နဲ့ တူတာပဲ...' ဖန့်ချန် စိတ်ထဲတွင် တွေးလိုက်သည်။

ထို့နောက် သူက စဉ်းစားဟန်ဖြင့်

"နေမင်းခုနစ်ပါး ခန်းမကရော နေမင်းခုနစ်ပါး ခန်းမရဲ့ တည်ရှိမှုကလည်း မဟာမိတ်အဖွဲ့အတွက် ထိပ်တန်း ပါရမီရှင်တွေကို ထောက်ပံ့ပေးဖို့ ဖြစ်မှာပေါ့ နေမင်း ခုနစ်ပါး ခန်းမနဲ့ ယှဉ်ရင် စုံစမ်းရေးဌာနက ဘယ်ဘက်က ပိုသာသလဲ "

"ဒါက တစ်ခုနဲ့တစ်ခု ဆန့်ကျင်နေတာ မဟုတ်ဘူး။"

"ဒါမှမဟုတ် စုံစမ်းရေးဌာနရဲ့ သူတော်စင်တိုင်း ဖြတ်ကျော်ရမယ့် အဆင့်တစ်ခုလို့ပဲ ပြောရမလား။"

ဆွေ့ဟုန်ကျူ ပြုံးလျက် ပြောသည်။

"တရားစီရင်ရေးအကြီးအကဲ တစ်ယောက် ဖြစ်လာဖို့ ပထမဆုံး အခြေအနေက တူညီတဲ့အဆင့်မှာ ကောင်းကင် ငါးပါးစစ်မြေပြင် ရဲ့ ထိပ်ဆုံး တစ်ရာထဲမှာ ရှိနေရမယ်။ ဆိုလိုတာက နေမင်းခုနစ်ပါး ခန်းမရဲ့ ကျောင်းတော်သား ဖြစ်လာရမယ်။ အဲဒီအခါမှသာ တရားစီရင်ရေးအကြီးအကဲ အဖြစ် ရွေးချယ်ခံရဖို့ အခွင့်အရေး ရှိမယ်။

တရားစီရင်ရေးအကြီးအကဲ အရင်ဖြစ်မှ စစ်ဆေးမှုတွေကို အောင်မြင်ပြီး ကျောင်းတော်ရဲ့ စုံစမ်းရေးဌာန သူတော်စင် ဖြစ်လာနိုင်မယ်။ ပြီးရင်တော့ မဟာမိတ်အဖွဲ့ရဲ့ အဆင့်မြင့် ရာထူးကို ရောက်ဖို့ အခွင့်အရေး ရှိလာလိမ့်မယ်။

ဟုတ်ပါတယ်၊ ချွင်းချက်တော့ ရှိပါတယ်။ တရားစီရင်ရေးအကြီးအကဲ မဖြစ်ခဲ့ဖူးတဲ့သူ၊ နေမင်းခုနစ်ပါး ခန်းမကို မဝင်ခဲ့ဖူးတဲ့ သူတော်စင်တွေလည်း ရှိပါတယ်။ သူတို့ကတော့ အချိန်ယူပြီး ဖြည်းဖြည်းချင်း အဆင့်မြင့်ရာထူးကို ရောက်သွားကြတာ။ ဒါပေမဲ့ အဲဒီလိုသူတွေက အလွန်ရှားပါတယ်။"

"ဒါ့အပြင် မင်းတို့ လူသားမျိုးနွယ်စု ကျောင်းတော်မှာ အရင်က တရားစီရင်ရေးအကြီးအကဲ မရှိခဲ့ဘူး။ အကြောင်းက မင်းတို့ ကျောင်းတော်ရဲ့ လူငယ်မျိုးဆက်တွေက အရည်အချင်း သာမန်ဖြစ်နေလို့ပဲ။ နောက်ထပ် အရေးကြီးတဲ့ အချက်တစ်ခုလည်း ရှိသေးတယ်။

တရားစီရင်ရေးအကြီးအကဲ ဖြစ်လာပြီး စစ်ဆေးမှုကို မအောင်မြင်ဘဲ စုံစမ်းရေးဌာနကို မရောက်နိုင်ရင် အဲဒီ ရာဇဝင်နဲ့ဆိုရင် လူသားမျိုးနွယ်စုတွေကြားမှာ မင်း ရနိုင်တဲ့ အမြင့်ဆုံး ရာထူးက ချင်းမင်တမန် အဆင့်ပဲ ဖြစ်လိမ့်မယ်။ အဲဒီထက် မြင့်တဲ့ ရာထူးကို မင်း မရနိုင်တော့ဘူး။

မင်းသာ အထွတ်ထိပ်တာအို ဒါမှမဟုတ် ကောင်းကင်ဘုံရှင် အဆင့်ထိ တက်လှမ်းနိုင်မှသာ ဖြစ်မယ်။ ဒါပေမဲ့ အဲဒီလောက်ထိ ဖြစ်ရင်တောင် တကယ့် အဓိက အနှစ်သာရ အသိုင်းအဝိုင်းထဲကို ဝင်နိုင်မှာ မဟုတ်ဘူး။"

ထိုအထိ ပြောပြီးနောက် ဆွေ့ဟုန်ကျူ ၏ အမူအရာမှာ လေးနက်သွားသည်။

"ဒါကြောင့် ဒီတစ်ခေါက် စစ်ဆေးမှုက မင်းအတွက် အလွန် အရေးကြီးတယ်။ မင်းရဲ့ နောင်ရေးကို ဆုံးဖြတ်ပေးမှာ။ ပြီးတော့ အဲဒီ စစ်ဆေးမှုတွေထဲမှာ အန္တရာယ်တွေလည်း ရှိတယ်လေ။"

ဖန့်ချန် တစ်စထက်တစ်စ နားလည်လာသည်။ လူသားမျိုးနွယ်စု ကျောင်းတော်တွင် အရင်က တရားစီရင်ရေးအကြီးအကဲ မရှိခဲ့သည့် အဓိကအကြောင်းရင်းမှာ အရည်အချင်းရှိသူ မရှိ၍သာမက၊ စစ်ဆေးမှု မအောင်မြင်ပါက ဖြစ်လာမည့် နောက်ဆက်တွဲ ဆိုးကျိုးများကြောင့် ဖြစ်ကြောင်း သူ သဘောပေါက်လိုက်သည်။

"ဒါနဲ့ မင်းကို ပြောဖို့ မေ့သွားတာ၊ မင်းမှာ ချန်အင်းရွှယ် ဆိုတဲ့ ညီမလေးတစ်ယောက် ရှိတယ်မလား အရင်တစ်ခေါက် သူမ ယင်သူတော်စင်နဲ့ တွေ့တဲ့ကိစ္စ၊ ငါတို့ စုံစမ်းမှုအရ အဲဒီ ယင်သူတော်စင်က ဘယ်သူလဲဆိုတာ သိရပြီ။ ဟော်ဆွေ့မျိုးနွယ် ရဲ့ ချင်ကွမ်းဟိုင် ပဲ။ သူ့ကို ယင်သူတော်စင်ကျင့်စဉ် သင်ပေးလိုက်တဲ့သူက သူ့အဖေက သူ့ဘေးမှာ စီစဉ်ပေးထားတဲ့ ကမ္ဘာကြီးအဆင့် သူတော်စင် လန်ကျောက် ပဲ။"

ဆွေ့ဟုန်ကျူ ပြုံးလျက် ပြောသည်။

ဖန့်ချန် အနည်းငယ် အံ့အားသင့်သွားသည်။ စုံစမ်းရေးဌာနက ဒီကိစ္စကို တကယ်ပဲ အသေးစိတ် စုံစမ်းဖော်ထုတ်လိုက်နိုင်တာလား။

"ငါတို့ အတည်ပြုထားတယ်၊ ချင်ကွမ်းဝူ ဒီကိစ္စမှာ မပါဘူး၊ ဒီကိစ္စက ချင်ကွမ်းဟိုင် တစ်ယောက်တည်း လုပ်တာ။ သူ့ရဲ့ လုပ်ဖော်ကိုင်ဖက် လန်ကျောက် ကိုတော့ မဟာမိတ်အဖွဲ့က ဖမ်းဆီးလိုက်ပြီ၊ မဟာမိတ်အဖွဲ့ရဲ့ ဥပဒေအတိုင်း အရေးယူမှာပါ။"

ဆွေ့ဟုန်ကျူ ပြောသည်။ ခဏရပ်ပြီးနောက် သူမသည် ဖန့်ချန် ကို အဓိပ္ပာယ်ပါသော အကြည့်ဖြင့် ကြည့်လိုက်သည်။

"ဒီကိစ္စ မင်း အရင်ကတည်းက သိနှင့်ပြီးသားမလား"

ဖန့်ချန် မသိနားမလည်ဟန်ဖြင့် -

"ဘာကို ကြိုသိထားရမှာလဲ"

ထို့နောက် သူသည် အနည်းငယ် အံ့အားသင့်ဟန်ဖြင့် -

"တကယ်ပဲ မထင်မှတ်ထားဘူး၊ ဟော်ဆွေ့မျိုးနွယ် က ယင်သူတော်စင်ကျင့်စဉ်ကို ကျင့်သုံးနေတာပဲ၊ တကယ်ကို ရွံစရာကောင်းလိုက်တာ။ ချင်ကွမ်းဝူ ဒီကိစ္စမှာ မပါဘူးဆိုတာ တကယ်လား "

"တကယ်ပါပဲ။"

"အနည်းဆုံးတော့ သူ ပါဝင်ပတ်သက်နေတဲ့ အထောက်အထားကို ငါတို့ မတွေ့သေးဘူး။"

ဆွေ့ဟုန်ကျူ ပြောပြီးသည်နှင့် သူမ၏ မျက်လုံးများ ရုတ်တရက် အရောင်လက်သွားကာ တံခါးပေါက်အပြင်ဘက်ကို ကြည့်လိုက်သည်။

"ရောက်ပြီ၊ သစ္စာစကား အစည်းအဝေးခန်းမ ပဲ။"

အခန်း (၂၄၅၀) - နောက်ပြန်လှည့်စရာ လမ်းမရှိ

သစ္စာစကား အစည်းအဝေးခန်းမ

ဖန့်ချန် သည် အတွင်းကမ္ဘာနယ်မြေ၏ တံခါးပေါက်မှတစ်ဆင့် လှမ်းမျှော်ကြည့်လိုက်ရာ ဟင်းလင်းပြင်အလယ်တွင် မားမားမတ်မတ် တည်ရှိနေသော ခန်းမကြီးတစ်ခုကို မြင်လိုက်ရသည်။ ဤခန်းမကြီးသည် ဟင်းလင်းပြင်ထဲတွင် တစ်ခုတည်း တိတ်ဆိတ်စွာ ဆိုင်းငံ့နေပြီး အထီးကျန်ဆန်လှသည်။

သူသည် ကျောင်းတော်တွင် နှစ်ပေါင်းများစွာ နေထိုင်ခဲ့ပြီး အတွင်းကမ္ဘာနယ်မြေထဲသို့ အကြိမ်ပေါင်းများစွာ ခုတ်မောင်းဝင်ရောက်ခဲ့သော်လည်း ထိုခန်းမကြီး ရှိနေသည်ကို တစ်ကြိမ်မျှ မတွေ့မြင်ခဲ့ဖူးပေ။

"သွားကြစို့။"

ဆွေ့ဟုန်ကျူ က အေးဆေးစွာ ပြုံးပြောပြီးနောက် ဖန့်ချန် ၏ ပခုံးကို ဆွဲကိုင်လိုက်သည်။ လျှပ်တစ်ပြက်မျှပင် မကြာလိုက်၊ သူတို့နှစ်ဦးသည် ခန်းမကြီး၏ တံခါးဝသို့ ရောက်ရှိသွားကြသည်။ ဖန့်ချန် ၏ စိတ်ထဲတွင် လေးနက်မှုများ တိုးဝင်လာသည်။ ထိုခန်းမကြီးသည် သူ့ကို ထူးခြားသော ခံစားချက်တစ်ခု ပေးစွမ်းနေသည်။

ဤနေရာသို့ ရောက်လာသည်နှင့် တစ်စုံတစ်ခုသော လျှို့ဝှက်ချက်များကို ဖုံးကွယ်ထားရန် ခက်ခဲတော့မည့်အလား၊ လူသားတို့၏ စိတ်ကို ထိုးဖောက်မြင်နိုင်သော မျက်လုံးတစ်စုံက စောင့်ကြည့်နေသကဲ့သို့ ခံစားလိုက်ရသည်။

"သစ္စာစကား အစည်းအဝေးခန်းမ ထဲမှာ မင်း ပထမဆုံး စစ်ဆေးမှုကို ဖြတ်ကျော်ရမယ်။ အထဲရောက်ရင် စုံစမ်းရေးအရာရှိကြီး ဘာပြောပြော အမိန့်အတိုင်း လိုက်လုပ်ပါ။"

ဆွေ့ဟုန်ကျူ ၏ မျက်ဝန်းထဲတွင် လေးနက်မှုများ ရှိနေပြီး သူမက ခန်းမထဲသို့ ဦးဆောင်ဝင်သွားသည်။ ဖန့်ချန် လည်း သူမ၏ နောက်မှ မီအောင် လိုက်သွားသည်။ ခန်းမထဲသို့ ရောက်သောအခါ ထိုနေရာတွင် လူပေါင်း ရာကျော် ရပ်တန့်နေသည်ကို သူ တွေ့လိုက်ရသည်။

ခန်းမ၏ ရှေ့တည့်တည့်တွင်မူ အရိပ်မည်းများ ဖုံးလွှမ်းနေသော ပုံရိပ်သုံးခု ထိုင်နေကြသည်။ ထိုပုံရိပ်များ၏ ပခုံးအောက်ပိုင်းကိုသာ မြင်နိုင်ပြီး မျက်နှာသွင်ပြင်ကိုမူ မည်သို့မျှ မမြင်နိုင်ပေ။ ဖန့်ချန် သည် ဆွေ့ဟုန်ကျူ နှင့်အတူ ပေါ်လာချိန်တွင် အရင်ရောက်နှင့်နေသော လူရာကျော်တို့သည် အမူအရာမဲ့စွာဖြင့် သူ့ကို စိုက်ကြည့်လာကြသည်။ ထိုအကြည့်များထဲတွင် စူးစမ်းမှုများ၊ အံ့အားသင့်မှုများနှင့် တွေးတောမှုများ ရောယှက်နေသည်။

ဖန့်ချန် သည် ထိုလူအုပ်စုမှာ မည်သည့်မျိုးနွယ်စုများမှ ဖြစ်သည်ကို တစ်ချက်ကြည့်ရုံဖြင့် သိလိုက်သည်။ ထိုနေရာတွင် ယန်တန်းမျိုးနွယ် ၊ ကောင်းကင်စစ်သည်မျိုးနွယ် ၊ ရှီးမျိုးနွယ်၊ ပေါင်ရှန်မျိုးနွယ် စသည်တို့ ရှိနေကြသည်။ သူတို့၏ ကျင့်ကြံမှုမှာ တစ်သမတ်တည်းပင်၊ အနည်းဆုံး ကမ္ဘာကြီးအဆင့် ပထမအဆင့်မှ စတင်သည်။ ဖန့်ချန် တစ်ယောက်သာလျှင် ကမ္ဘာငယ်အဆင့် ပထမအဆင့်ဖြင့် အလွန်ပင် ကွဲပြားနေသည်။

'သူတို့တွေက မျိုးနွယ်စုအသီးသီးက တရားစီရင်ရေးအကြီးအကဲတွေပဲ။ ဒါပေမဲ့ ဒီမျိုးနွယ်စုတွေက ချင်းမင် ရဲ့ ကျယ်ပြန့်တဲ့ မျိုးနွယ်စုပေါင်းစုံထဲမှာ အစိတ်အပိုင်း တစ်ခုပဲ ရှိသေးတာ။'

ဖန့်ချန် စိတ်ထဲတွင် တွေးလိုက်သည်။

သူ သိထားသည့် လူသားမျိုးနွယ်ထက်ပင် အရင်းအမြစ် ပိုမိုကြွယ်ဝသော မျိုးနွယ်စုကြီးများမှ ကျောင်းတော်သားများ မရှိသေးသည်ကို ကြည့်ခြင်းအားဖြင့် သူတို့၏ မျိုးနွယ်စုထဲတွင် တရားစီရင်ရေးအကြီးအကဲ ဖြစ်လောက်သည့် အရည်အချင်းရှိသူ မပေါ်သေးကြောင်း သိလိုက်ရသည်။ လက်ရှိရှိနေသည့် မျိုးနွယ်စုများနှင့် ယှဉ်လျှင် လူသားမျိုးနွယ်စုမှာ များစွာ အားနည်းနေသေးသည်။

"ဟုန်ကျူ၊ ရွှေဟွေး ကျောင်းတော်က တရားစီရင်ရေးအကြီးအကဲတွေ အကုန် ရောက်ပြီလား "

ခန်းမအလယ်တွင် ထိုင်နေသော ပုဂ္ဂိုလ်ကြီးက ဖြည်းညှင်းစွာ မေးလိုက်သည်။ ဖန့်ချန် လည်း ဆွေ့ဟုန်ကျူ ၏ အရိပ်အယောင်ပြမှုကြောင့် လူရာကျော်ကြားတွင် သွားရောက်ရပ်လိုက်သည်။

"တင်ပြပါတယ် စုံစမ်းရေးအရာရှိကြီး၊ ရွှေဟွေးကျောင်းတော်က တရားစီရင်ရေးအကြီးအကဲ စုစုပေါင်း ၁၀၈ ယောက်စလုံး ရောက်ရှိနေပါပြီ။"

ဆွေ့ဟုန်ကျူ က လက်အုပ်ချီကာ ပြန်လျှောက်သည်။

"ကောင်းပြီ။"

အလယ်တွင် ထိုင်နေသူက အေးဆေးစွာ ပြောသည်။

"ဒီစစ်ဆေးမှုကို မပါဝင်ချင်တဲ့သူ ရှိသေးလား ရှိရင် အခုပဲ ပြောပါ။ ဆွေ့ဟုန်ကျူ ကို ခိုင်းပြီး ပြန်ပို့ခိုင်းလိုက်မယ်။"

"မပါဝင်ရင်တော့ ကိစ္စမရှိဘူး၊ ဒါပေမဲ့ စစ်ဆေးမှုကို စတင်လိုက်ပြီဆိုရင်တော့ နောက်ပြန်လှည့်စရာ လမ်းမရှိတော့ဘူး။"

တရားစီရင်ရေးအကြီးအကဲ ၁၀၈ ယောက်စလုံးသည် ဖန့်ချန် အပါအဝင် မည်သူမျှ စကားမဟကြဘဲ တိတ်ဆိတ်နေကြသည်။ မည်သူမျှ အလယ်တစ်ဝက်တွင် လက်လျှော့ရန် မရွေးချယ်ခဲ့ပေ။ ထိုပုဂ္ဂိုလ်ကြီးသုံးဦးသည် အလွန်ကျေနပ်ဟန်ရှိပြီး ခဏတာ တိတ်ဆိတ်သွားပြီးနောက် အလယ်မှ ပုဂ္ဂိုလ်က ထပ်မံ ပြောကြားလာသည်။

"အခု မင်းတို့ကို အရေးကြီးတဲ့ မေးခွန်းတစ်ခု မေးမယ်။"

ပြောနေစဉ်မှာပင် တောက်ပသော ပုလဲလုံးတစ်လုံးသည် လူတိုင်း၏ ရှေ့သို့ ဖြည်းညှင်းစွာ ပျံဝဲလာသည်။ ဖန့်ချန် က စူးစိုက်ကြည့်လိုက်ရာ သူ၏ အမူအရာ လှုပ်ရှားသွားသည်။ ဤသည်မှာ ပုလဲလုံးမဟုတ်ဘဲ မျက်လုံးလုံးတစ်လုံး ဖြစ်နေသည်။ ထိုမျက်လုံးသည် ၁၀၈ ယောက်သော တရားစီရင်ရေးအကြီးအကဲတို့ကို စိုက်ကြည့်နေသဖြင့် သူတို့အားလုံးမှာ နေရခက်သွားကြသည်။

"မင်းတို့တွေက ချင်းမင် အဆင့်မြင့်ဆုံး မဟာမိတ်အဖွဲ့ကို အန္တရာယ်ပြုမှာလား "

အလယ်မှ ပုဂ္ဂိုလ်ကြီးက ဖြည်းညှင်းစွာ မေးလိုက်သည်။

"မပြုပါဘူး။"

အားလုံးက တစ်ပြိုင်နက်တည်း ဖြေကြားကြသည်။

ထိုမျက်လုံးသည် ရုတ်တရက် ဝေ့ဝဲကြည့်ရှုလာပြီး ခဏအကြာတွင် တစ်စုံတစ်ယောက်ကို စူးစိုက်ကြည့်လိုက်သည်။ ထိုသူတော်စင်၏ မျက်နှာပေါ်တွင် အံ့အားသင့်မှု၊ မယုံကြည်နိုင်မှုနှင့် ကြောက်ရွံ့မှုတို့ ပေါ်လာသည်။

"ကောင်းကင်တိတ်ဆိတ်မျိုးနွယ် က တရားစီရင်ရေးအကြီးအကဲက သူလျှိုပဲ။"

စကားပြောပြီးသည်နှင့် အလယ်မှ ပုဂ္ဂိုလ်ကြီးက လက်ကို ခပ်ပေါ့ပေါ့ ဝှေ့ယမ်းလိုက်သည်။ ထိုသူတော်စင် မည်သို့မျှ မပြောလိုက်ရသေးမီ သွေးအိုင်အဖြစ် ပေါက်ကွဲသွားသည်။ ထို့နောက် ဖန့်ချန် သည် ဝိညာဉ်ခေါ်ဆောင်သူတစ်ဦး ပေါ်လာပြီး ထိုသူ၏ ဝိညာဉ်ကို ဆွဲယူသွားသည်ကို မြင်လိုက်ရသည်။ ထိုဝိညာဉ်ခေါ်ဆောင်သူက ထွက်ခွာသွားစဉ် အလယ်မှ ပုဂ္ဂိုလ်ကြီးကို လှမ်းပြောသည်။

"ညီကိုဘင်း၊ သူ့ကို ငါ ခေါ်သွားပြီ။ မင်း အားရင် ကိုယ်တိုင် လာမေးကြည့်ဦး၊ ငါ အခုတလော အရမ်း အလုပ်ရှုပ်နေလို့။"

စုံစမ်းရေးအရာရှိကြီးက ခေါင်းညိတ်ပြလိုက်ပြီး ဘာမှ ပြန်မပြောပေ။ ထိုအဖြစ်အပျက်ကို ဖန့်ချန် တစ်ယောက်တည်းသာ ရှင်းရှင်းလင်းလင်း မြင်တွေ့နေရခြင်း ဖြစ်သည်။

'မမှန်ဘူး၊ ကျန်တဲ့ စုံစမ်းရေးအရာရှိကြီး နှစ်ယောက်လည်း ဝိညာဉ်ခေါ်ဆောင်သူနဲ့ ဝိညာဉ်ကို မြင်နေရမှာပဲ။ စုံစမ်းရေးဌာနရဲ့ စုံစမ်းရေးအရာရှိကြီးတွေက ငါ့လိုပဲ ဝိညာဉ်ကို မြင်နိုင်တာလား '

ဖန့်ချန် တည်ငြိမ်စွာပင် နေလိုက်ပြီး မျက်နှာအမူအရာ မပျက်စေရပေ။ စုံစမ်းရေးအရာရှိကြီးများသည် 'ယင်' နှင့် 'ယန်' ကို ထိုးဖောက်မြင်နိုင်သော စွမ်းအားရှိကြသည်ဟု သူ ခန့်မှန်းလိုက်သည်။ ထိုသည်မှာ စုံစမ်းရေးဌာနမှ ပေးအပ်ထားသော စွမ်းရည်ဖြစ်ပြီး သူတို့၏ ထူးခြားချက် ဖြစ်နိုင်ပေသည်။

အနီးနားရှိ တရားစီရင်ရေးအကြီးအကဲများမှာလည်း မျက်နှာများ တင်းမာသွားသည်။ ထိုသူနှင့် ရင်းနှီးသူအချို့၏ မျက်ဝန်းထဲတွင် ဝမ်းနည်းမှုများ ပေါ်လာသော်လည်း ချက်ချင်းပင် ဖုံးကွယ်လိုက်ကြသည်။

"ဆွေ့ဟုန်ကျူ၊ ကောင်းကင်တိတ်ဆိတ်မျိုးနွယ် ကျောင်းတော်ကိစ္စကို မင်း ဦးဆောင်ပြီး စစ်ဆေးလိုက်ပါ။ တခြား အကြောင်းအရာတွေ ရှိမရှိ သေချာကြည့်။"

"ဟုတ်ကဲ့။"

"သူ့သေဆုံးမှုအတွက် ဝမ်းနည်းနေတာကို ဖုံးကွယ်ဖို့ မလိုပါဘူး။ ဒီနေ့ မတိုင်ခင်အထိ သူက အပြင်လူတွေရဲ့ သူလျှို ဖြစ်လိမ့်မယ်လို့ မင်းတို့လည်း မသိခဲ့ကြဘူးလေ။ မဟာမိတ်အဖွဲ့ကို ဆန့်ကျင်တဲ့ စိတ်ဓာတ်တွေ သူ့ဆီမှာ ရှိနေလိမ့်မယ်လို့ ဘယ်သူ ထင်မှာလဲ။"

စုံစမ်းရေးအရာရှိကြီးက ထပ်ပြောသည်။

"အခု တရားစီရင်ရေးအကြီးအကဲ ၁၀၇ ယောက် ကျန်တော့တယ်။ ပထမအဆင့် စစ်ဆေးမှုကို အောင်မြင်တဲ့အတွက် ဂုဏ်ပြုပါတယ်။ မင်းတို့က ချင်းမင် ကို အန္တရာယ်မပြုဘူးဆိုတာ သက်သေပြလိုက်ပြီ။ နောက်တစ်ဆင့် စစ်ဆေးမှုကတော့ မင်းတို့တွေ ချင်းမင် အတွက် အကျိုးပြုနိုင်တယ်ဆိုတာ သက်သေပြရမှာပဲ။

စုံစမ်းရေးဌာနဟာ အရည်အချင်း သာမန်သူတွေကို မလိုချင်ဘူး။ မင်းတို့က အပြင်လောကမှာတော့ ထိပ်တန်း ပါရမီရှင်တွေ ဖြစ်ကြမှာပါ။ တစ်ယောက်မကျန် နေမင်း ခုနစ်ပါးခန်းမ မှာ နေခဲ့ဖူးကြတယ်။ တချို့ဆိုရင် ထိပ်ဆုံး ၁၀ ယောက်စာရင်းဝင်ခဲ့သလို ပထမဆုံးအဆင့် ဆိုတဲ့ ဂုဏ်ပုဒ်တောင် ရခဲ့ကြတယ်။ ဒါပေမဲ့ ဒီမှာတော့ အဲဒီရလဒ်တွေက မလုံလောက်သေးဘူး။"

"ဒုတိယအဆင့် စစ်ဆေးမှုကို စကြရအောင်။"

ခန်းမထဲရှိ တရားစီရင်ရေးအကြီးအကဲများမှာ ပိုမိုတင်းမာသွားပြီး အာရုံစိုက် နားထောင်ကြသည်။

"စုံစမ်းရေးဌာနက အမှုပေါင်း ၁၀၇ ခုကို ရွေးထုတ်ပြီး မင်းတို့ကို တာဝန်ပေးမယ်။ ဘယ်သူက အချိန်အနည်းဆုံးနဲ့ ဒီအမှုကို ဖြေရှင်းနိုင်မလဲ။ သူ့ရဲ့ ရမှတ်က အကောင်းဆုံး ဖြစ်လိမ့်မယ်။ အချိန်ကန့်သတ်ချက်ကတော့ မရှိဘူး။ ပထမဆုံး အမှုတစ်ခု ပြီးသွားတဲ့အချိန်ကနေ စပြီး ရေတွက်မယ်။ နောက် ၁၀ နှစ်အတွင်းမှာ လက်ထဲက အမှုတွေကို ဖြေရှင်းနိုင်ရင် နောက်တစ်ဆင့်ကို တက်ရမယ်။"

တရားစီရင်ရေးအကြီးအကဲများ၏ မျက်နှာများ လှုပ်ရှားသွားသည်။ အချိန်ကန့်သတ်ချက် မရှိဘူးဆိုသည်မှာ ပထမဆုံးအမှုကို မဖြေရှင်းမီအထိ ဖြစ်သည်။ တစ်စုံတစ်ယောက်က အမှုကို ဖြေရှင်းလိုက်သည်နှင့် ၁၀ နှစ်တာ အချိန်ကန့်သတ်ချက် စတင်မည်။ ဆိုလိုသည်မှာ ကံကောင်းလျှင် အမှုဖြေရှင်းရန် အချိန်အများကြီး ရနိုင်သည်။

ကံမကောင်းလျှင်မူ... အရာအားလုံး ပြီးဆုံးသွားလိမ့်မည်။ သူတို့ ထိုနေရာသို့ မလာမီကတည်းက စုံစမ်းရေးဌာန၏ သူတော်စင် မဖြစ်နိုင်လျှင် အနာဂတ် လမ်းကြောင်းမှာ မှိန်ဖျော့သွားလိမ့်မည်ကို သိထားကြပြီးသား ဖြစ်သည်။

ထိုအချိန်တွင် အလယ်မှ ပုဂ္ဂိုလ်ကြီးက လက်ကို ခပ်ဖွဖွ ဝှေ့ယမ်းလိုက်သည်။ လူတိုင်း၏ ရှေ့တွင် ဗီရိုတစ်လုံး ပေါ်လာသည်။ ဗီရိုထဲမှ အမှုတွဲများ တစ်ခုပြီးတစ်ခု ပျံဝဲထွက်လာပြီး တရားစီရင်ရေးအကြီးအကဲ တစ်ယောက်ချင်းစီ၏ လက်ထဲသို့ ကျရောက်လာသည်။

တချို့မှာ အမှုတွဲကို ကြည့်လိုက်သည်နှင့် မျက်နှာမှာ မည်းမှောင်သွားသည်။ တချို့မှာမူ ယုံကြည်မှုအပြည့်ဖြင့် ပြုံးကာ အမှုတွဲကို သိမ်းလိုက်ကြသည်။

"အင်း လူသားမျိုးနွယ်စု ကျောင်းတော်မှာ ယင်သူတော်စင်ကိစ္စ အခုလေးတင် ဖြစ်ထားတာလား "

အလယ်မှ ပုဂ္ဂိုလ်ကြီး ရုတ်တရက် ရပ်တန့်သွားပြီးနောက် သူ၏ လက်ထဲတွင် အမှုတွဲတစ်ခု အပို ထွက်ပေါ်လာသည်။