ယန္တရားဂြိုလ် (၁)

အသိစိတ်က ထိုးဆင်းသွားသည်။

အေးစက်၍ ထူထပ်သော လေဟာနယ်ကို ဖြတ်သန်းသွားသည်။

ဂီယာများ ချိတ်ဆက်မိရာမှ ထွက်ပေါ်လာသော ထူးဆန်းသည့် အပြာရောင်လျှပ်စီးကြောင်းများကို ဖြတ်သန်းသွားသည်။

ခဲနေသော စွမ်းအင်ပိုက်လိုင်းများ၏ မျက်နှာပြင်တစ်လျှောက် စီးဆင်းနေသော ခရမ်းနက််ရောင်အလင်းမြစ်များကို ဖြတ်သန်းသွားသည်။

ရေတွက်မရနိုင်သော ယန္တရားထုတ်လုပ်မှုအစီအစဉ်တပ်ဆင်ရေးလိုင်းများကို ဖြတ်သန်းသွားသည်။

လင်းရှန်၏ အသိစိတ်မှာ လုံးဝထိန်းချုပ်မှုကင်းမဲ့သွားပြီး ကြယ်နက်ပန်းပဲဖိုထဲမှနေ၍ အဆုံးမဲ့နက်ရှိုင်းသော အာကာသထဲသို့ ပျံသန်းထွက်ခွာတော့မည့်အချိန်တွင်ပင် သူသည် ကြယ်နက်ပန်းပဲဖို၏ ကြယ်တာရာအမိုးခုံးဥမင်လိုဏ်ခေါင်းထဲမှ အရပ်မျက်နှာတစ်ခုဆီသို့ ရုတ်တရက် အာရုံစိုက်မိသွားသည်။

ထိုဘက်အရပ်မှာ လင်းရှန်က ယန္တရားဖန်တီးမှုများ သို့မဟုတ် အခြားပစ္စည်းများကို သိမ်းဆည်းထားသည့် နေရာဖြစ်ပြီး ထိုနေရာ၏ ထောင့်တစ်နေရာတွင် ခဲသေတ္တာတစ်လုံးရှိနေသည်။

အတွင်းထဲတွင် ထိုသတ္တုအန်စာတုံးရှိနေသည်။

“အာကာသသတ္တဝါကြီးက ကြေမွပျက်စီးသွားခဲ့တာပဲ။ ဒီအရာက သေချာပေါက်လူသားတွေရဲ့ ဖန်တီးမှုဖြစ်ရမယ်။ ဒါက တတိယအဖွဲ့အစည်းတစ်ရပ်တည်ရှိနေတယ်ဆိုတဲ့ ငါ့ရဲ့ယခင်တွေးထင်ချက်က အများကြီးဖြစ်နိုင်ချေရှိတယ်ဆိုတာကို ပြသနေတာပဲ”

လင်းရှန်၏ အသိစိတ်မှာ အရည်ပျော်ပျက်စီးနေရာမှ စတင်ရပ်တန့်သွားခဲ့ပြီး ရေနစ်နေသူတစ်ဦးက နောက်ဆုံးကောက်ရိုးမျှင်ကို လှမ်းဆွဲလိုက်သကဲ့သို့ပင်။ ဤအတွေးက မိုးကြိုးမုန်တိုင်းကဲ့သို့ အရှိန်အဟုန်ဖြင့် လင်းရှန်၏ အသိစိတ်ထဲမှ ရှုပ်ထွေးမှုများနှင့် မျှော်လင့်ချက်မဲ့မှုများကို ခွဲထုတ်ပစ်လိုက်သည်။

“မဟုတ်ဘူး ဖြစ်နိုင်ချေရှိတာတင်မဟုတ်ဘူး… လုံးဝကို ဖြစ်နိုင်တာ”

လင်းရှန်၏ အသိစိတ်မှာ ပြန်လည်တည်ငြိမ်လာခဲ့သည်။ သူသည် ပြန်လည်ထိန်းချုပ်နိုင်ပုံရပြီး ထုတ်လုပ်မှုအစီအစဉ်၏ ကြယ်တာရာအမိုးခုံးဥမင်လိုဏ်ခေါင်းဆီသို့ လျင်မြန်စွာ ပျံသန်းကာ ခဲသေတ္တာကို ယူဆောင်လိုက်သည်။ ၎င်းကို ဖွင့်လိုက်သောအခါ သတ္တုအန်စာတုံးမှာ ဖော်ပြ၍မရအောင် စိတ်ကူးယဉ်ဆန်စွာ ပြောင်းလဲနေသည်ကို သူမြင်လိုက်ရသည်။ တစ်ခဏတွင် နံပါတ် ၆ က အပေါ်သို့ မျက်နှာမူနေပြီး နောက်တစ်ခဏတွင်မူ နံပါတ် ၄ က ပေါ်လာကာ အချိန်များ လျင်မြန်စွာ စီးဆင်းနေသကဲ့သို့ ဤလေ့လာ၍မရသော အရိပ်အခြေအနေကို ထပ်ခါထပ်ခါပြသနေသည်။

“၆၊ ၄ က ဘာကို ကိုယ်စားပြုတာလဲ”

“၆:၀၄ လား၊ ဇွန်လ ၄ ရက်လား”

“ဒါက ဘာကိုဆိုလိုတာလဲ။ ငါ့ကို အချက်အလက်တစ်ခုခုပေးဖို့ ကြိုးစားနေတာလား”

မည်သူမျှ ပြန်မဖြေခဲ့ပေ။ လင်းရှန်တွင် အဖြေမရှိခဲ့ပေ။

ဤသတ္တုအန်စာတုံးက လင်းရှန်အတွက် နောက်ဆုံးယုံကြည်ချက်အမျှင်တန်းလေးတစ်ခုကို ချန်ထားခဲ့ပြီး ယခင်အတွေးက သူ့ကို တုန်လှုပ်ခြောက်ခြားစေဆဲဖြစ်သော်လည်း ဤယုံကြည်ချက်အမျှင်တန်းလေးကပင် သူ၏ယခင်အတွေးများကို ပြန်လည်သံသယဝင်ရန် လုံလောက်ခဲ့သည်။ သံသယရှိလျှင် မျှော်လင့်ချက်ရှိပေသည်။

တစ်တော့… တစ်တော့၊၊

ကြယ်နက်ပန်းပဲဖို၏ ကြယ်တာရာအမိုးခုံးဥမင်လိုဏ်ခေါင်းထဲတွင် အနက်ရောင်အနန္တရထားကြီးက တိတ်ဆိတ်စွာ မျောလွင့်နေသည်။ လင်းရှန်သည် ဝေးလ် 03E အကြီးစားဂတ်စ်တာဘိုင်ရထားခေါင်း၏ ထိန်းချုပ်ခန်းထဲတွင် ထိုင်နေရင်း လွှဲယမ်းနေသော နာရီမှ တုန်ခါမှုများကို ခံစားနေရသည်။ တွက်ချက်ထားသော အချိန်များအရ သူသည် ကြယ်နက်ပန်းပဲဖိုထဲတွင် ပိတ်မိနေခဲ့သည်မှာ သုံးလကျော်သွားပြီ ဖြစ်သည်။

ဟိုလိုဂရပ်ဖစ်ဖန်သားပြင်ပေါ်တွင် အမျိုးမျိုးသောနံပါတ်များနှင့် ဖော်မြူလာများဖြင့် ပြည့်နှက်နေသည်။ ဤအချိန်အတောအတွင်း သူသည် ကြယ်နက်ပန်းပဲဖိုထဲမှ နိုးထရန် နည်းလမ်းမျိုးစုံကို ကြိုးစားခဲ့သည်။ သူသည် ချူယန်၊ ဂရေ့စ်နှင့် ဗိုင်အိုလာတို့ကို လှမ်းခေါ်ရန် ကြိုးစားခဲ့သော်လည်း အားလုံးက အချည်းနှီးသာဖြစ်ခဲ့သည်။

အချိန်များကုန်လွန်လာသည်နှင့်အမျှ လင်းရှန်သည် ဗိုင်အိုလာ၏ တွက်ချက်မှုစွမ်းရည်ကို အသုံးပြု၍ သူမြင်ခဲ့ရသမျှ အရာအားလုံးကို ပုံဖော်ကြည့်ခဲ့သည်။ အာကာသသတ္တဝါကြီး၊ ဧရာမဦးခေါင်းကြီး၊ ဟင်းလင်းပြင်တည်နေရာများခုန်ကူးခြင်း...

သို့သော် မည်သည့်ထူးခြားသော တိုးတက်မှုမျှ မရှိခဲ့ပါ။ ဗိုင်အိုလာ၏ သင်ယူမှုပုံစံငယ်တွင် စွမ်းအင်မြင့်ရူပဗေဒအသိပညာများပါဝင်သော်လည်း လူသားတို့၏ နက္ခတ္တဗေဒဆိုင်ရာ စူးစမ်းရှာဖွေမှုတစ်ခုလုံးမှာ အလွန်ပင် ရှေးဦးအဆင့်၌သာရှိနေပြီး သူ့တွင် ကျွမ်းကျင်ပစ္စည်းကိရိယာများမရှိခဲ့ပေ။ အပြာရောင်ဂြိုဟ်ပေါ်တွင် လုံးဝမတည်ရှိနိုင်သော ယန္တရားဂြိုဟ်တည်ဆောက်မှုဆိုင်ရာ စက်ပြင်ပညာအချို့ကို ကောက်ချက်ချနိုင်သည်မှတစ်ပါး အခြားအသုံးဝင်တာမရှိခဲ့ပေ၊၊

လင်းရှန်၏ စိတ်အခြေအနေက အလွန်ပူပန်သောကရောက်လာသည်။ သူသည် အခန်းထောင့်တွင် တစ်ယောက်တည်းမှီထိုင်နေပြီး အပြင်ဘက်တွင်မူ ထုတ်လုပ်မှုအစီအစဉ်က တိတ်ဆိတ်စွာ လည်ပတ်နေသည်။

မောင်းနှင်ခန်း ပြတင်းပေါက်၏ အပြင်ဘက်တွင် Iron Man နှင့် Dragon Girl တိုက်ခိုက်ရေးမီကာ အစီးရေ ၃၀၀၀ မှာ သပ်ရပ်စွာ စီတန်းထားသည်။ ဤထိတ်လန့်ဖွယ်ရာ ယန္တရားစစ်တပ်က လွှမ်းမိုးနိုင်သောစွမ်းအားတစ်ခုကို ပြသနေသည်။ ဤသုံးလအတွင်း လင်းရှန်သည် ယန္တရားစစ်တပ်ကို ထုတ်လုပ်ရန်အတွက် ကြယ်နက်ပန်းပဲဖိုကို မနားမနေမောင်းနှင်ခဲ့ပြီး အနန္တရထားကြီးကို ပြန်လည်မွမ်းမံရန်အတွက်ပင် အားစိုက်ထုတ်ခဲ့သည်။ ယခင်က စူပါဝဲဂယက်နှင့် ကြုံတွေ့ခဲ့ရစဉ်က ရရှိခဲ့သော ပျက်စီးမှုများကို အပြည့်အဝပြုပြင်နိုင်ခဲ့ပြီး သူသည် ဂြိုလ်ပတ်လမ်းတုန်ခါကြယ်အမြောက်ကြီးတစ်ခုကိုပင် တည်ဆောက်ခဲ့သည်။

မူလက လင်းရှန်သည် အချိန်ဖြုန်းမနေဘဲ ဆင့်ကဲပြောင်းလဲမှုမတိုင်မီ သူ၏ယန္တရားစစ်တပ်ကို စတင်တည်ဆောက်ရန် စီစဉ်ခဲ့သော်လည်း ဤနေရာ၌ သုံးလအထိ ကြာမြင့်သွားလိမ့်မည်ဟု မမျှော်လင့်ခဲ့ပေ။

အချိန်များစွာ ကုန်လွန်သွားခဲ့ပြီဖြစ်ရာ ကြယ်နက်ပန်းပဲဖိုထဲမှ အချိန်က အပြင်ဘက်နှင့် ကွာခြားသည်ဟု လင်းရှန် မိမိကိုယ်ကိုယ်ဆက်လက်၍ မဖျောင်းဖျနိုင်တော့ဘဲ သူ ဆယ်နာရီမျှသာ အိပ်ပျော်ခဲ့သည်ဟူသော အတွေးမှာလည်း အိပ်မပျော်နိုင်သည့် ညှဉ်းပန်းနှိပ်စက်မှုများကြားတွင် ကွယ်ပျောက်သွားခဲ့သည်မှာ ကြာပြီဖြစ်သည်။

“...သုံးလတောင်ရှိသွားပြီ… အပြာရောင်ဂြိုဟ်ကြီးကော ရှိပါဦးမလား… ဟူး”

ခါးသက်မှုများနှင့် မိမိကိုယ်ကိုယ် လှောင်ပြောင်မှုများ ပြည့်နှက်နေသော ညည်းတွားသံတစ်ခုက ထွက်ပေါ်လာသည်။

လင်းရှန်သည် ခုံကို မှီထားရင်း အပြင်ဘက်ရှိ ယန္တရားစစ်တပ်ကို ကြည့်နေမိသည်။ ထုတ်လုပ်မှုအစီအစဉ်၏ နောက်ဆုံးတပ်ဆင်ရေးလိုင်းမှာ လည်ပတ်မှုရပ်တန့်သွားခဲ့ပြီဖြစ်ရာ ၎င်းသည် သူ၏ပစ္စည်းစင်တာရှိ ကုန်ကြမ်းအားလုံးကုန်ဆုံးသွားပြီဖြစ်ကြောင်း ပြသနေသော်လည်း သူကမူ နိုးထလာနိုင်ခြင်း မရှိသေးပေ။

“ဆရာမချန်... ကီကီ... တာလို့... မီးတောက်...”

လင်းရှန်သည် မျှော်လင့်ချက်မဲ့စွာဖြင့် သူ၏နဖူးကို ဖိထားမိသည်။ အကယ်၍ သူ့တွင် ရုပ်ပိုင်းဆိုင်ရာခန္ဓာကိုယ်သာရှိနေပါက သူ၏ဦးခေါင်းမှာ ကွဲအက်မတတ် နာကျင်နေမည်မှာ အသေအချာပင်။

သို့သော် ယခုမူ သူ၏ခန္ဓာကိုယ်က အသက်ရှင်လျက်ရှိနေသေးရဲ့လားဆိုသည်ကိုပင် သူ မသိတော့ပေ။ ဖြစ်နိုင်သည်က သူ၏အသိစိတ်မှာ မှိုမျှင်ကွန်ရက်တစ်ခုကဲ့သို့ ကြာမြင့်စွာကတည်းက အွန်လိုင်းတင်ခြင်းခံလိုက်ရပြီး ကြယ်နက်ပန်းပဲဖိုအတွင်း၌သာ တည်ရှိနေတော့ခြင်းလည်းဖြစ်နိုင်သည်။

ဤအချိန်အတောအတွင်း သူသည် နည်းလမ်းမျိုးစုံကို ကြိုးစားခဲ့ပြီး ငွေကျည်ဆန်ကို တိုက်ရိုက်အသုံးပြုရန်ပင် စဉ်းစားခဲ့သည်။ အနည်းဆုံးတော့ အပြာရောင်ဂြိုဟ်၏ ပတ်လမ်းအနီးသို့ ပြန်ရောက်သွားခြင်းက ဤနေရာတွင် ရှိနေခြင်းထက် ပိုမိုကောင်းမွန်ပေလိမ့်မည်။

သို့သော် ၎င်းက လုံးဝမဖြစ်နိုင်ခဲ့ပေ။ သူက တားမြစ်ပစ္စည်းများအားလုံး၏ တည်ရှိမှုကို အာရုံမခံနိုင်ခဲ့ချေ၊ ထို့ကြောင့်ပင် သူသည် ဂရေ့စ်ကို ဆက်သွယ်၍မရခြင်း ဖြစ်သည်။

ဒေါင်~~ဒေါင်~~

အလွန်အကျွံစိတ်အနှောင့်အယှက်ဖြစ်မှုများနှင့် မည်သည့်နေရာတွင်မှ ဖွင့်ထုတ်၍မရသော မျှော်လင့်ချက်မဲ့မှုများသည် နောက်ဆုံးတွင် ပေါက်ကွဲထွက်သွားခဲ့သည်။ လင်းရှန်သည် ရုတ်တရက် ထရပ်လိုက်ပြီး မြေပြင်ပေါ်တွင် သူလေ့လာနေခဲ့သော အရာများကို ကန်ထုတ်ပစ်လိုက်သည်—အနက်ရောင်ဂီယာ၊ ဆိုင်းငံ့အရည်ကွန်တိန်နာ၊ ယဉ်ကျေးမှုအကြိုမြင်ကွင်းစက်လုံး...

သူသည် တိတ်ဆိတ်နေသော ထိန်းချုပ်ခန်းကို ဖြတ်ကျော်ကာ ဆက်သွယ်ထားသော တံခါးကို တွန်းဖွင့်ပြီး တွဲအမှတ် ၂ ထဲသို့ ဝင်ရောက်ခဲ့သည်။ သတင်းအချက်အလက်စင်တာ၏ ချိတ်ဆက်ဖန်သားပြင်အစုံမှာ မှောင်မိုက်နေခဲ့သည်။ ချိုချဉ်စားရတာ ကြိုက်ပြီး သူနှင့် အမြဲငြင်းခုံတတ်သော ကောင်မလေးမှာ ယခုအခါ မှတ်ဉာဏ်ထဲမှ ပုံရိပ်တစ်ခုအဖြစ်သာတည်ရှိတော့သည်။ တွဲအမှတ် ၂ ၏ ဖျော်ဖြေရေးဧရိယာရှိ တီဗီနှင့် ဂိမ်းစက်များကိုမူ သူက ကျိအန်းမြို့ ပရိဘောဂစီးတီးနှင့် ယုချီဒစ်ဂျစ်တယ်စီးတီးတို့မှ ရှာဖွေစုဆောင်းခဲ့ခြင်း ဖြစ်သည်။

လင်းရှန်သည် ကိုးလ် ၃ အမျိုးအစား ဇီဝသုတေသနတွဲ ၃ နှင့် ၄ ကို ဖြတ်သန်းကာ တွဲအမှတ် ၅ သို့ ရောက်ရှိလာခဲ့သည်။ ဤတွဲမှာ တစ်ချိန်က အနန္တရထားကြီးပေါ်တွင် သူထွက်ခွာလာစဉ်က နောက်တွဲဖြစ်ခဲ့ပြီး အကြီးစားပြုပြင်မွမ်းမံမှုများကို အကြိမ်ကြိမ် ပြုလုပ်ခဲ့ဖူးသည်။ ဟိုက်ဒရောလစ်နောက်တံခါးပြားကို ဖယ်ရှားလိုက်သည်မှာ ကြာပြီဖြစ်ရာ သမုဒ္ဒရာပတ်လမ်းထဲသို့ ဝင်ရောက်ရန်အတွက် ၎င်းကို အသစ်စက်စက်တွဲတစ်ခုအဖြစ် အခြေခံအားဖြင့် ပြောင်းလဲပစ်ခဲ့သည်ဟု ဆိုနိုင်သည်။

တာလို့၏အခန်းနှင့် လုရှင်းချန်၏ လက်ဖက်ရည်ခန်းတို့သည်လည်း ဗလာကျင်းနေခဲ့သည်။ လင်းရှန်မှာ အသိစိတ်သက်သက် တည်ရှိမှုတစ်ခုဖြစ်၍ လက်ဖက်ရည်ပင် မဖျော်နိုင်ခဲ့ပေ။

သူသည် အတက်အဆင်းလုပ်နိုင်သော အမိုးဆီသို့ မော့ကြည့်လိုက်ရာ သူ၏အသိစိတ်က သံချပ်ကာအောက်တွင် ဝှက်ထားသော 1130 အနီးကပ်ကာကွယ်ရေးအမြောက်နှင့် G-3 လျှပ်စစ်သံလိုက်အမြောက်တို့ကို ဖောက်ထွက်ကြည့်ရှုလိုက်သည်။ ဤအရာများသည် တစ်ခုချင်းစီကို ပင်ပန်းကြီးစွာ ဖန်တီးခဲ့ရခြင်းဖြစ်ပြီး ရထားဖြင့် ထွက်ပြေးစဉ်အတွင်း သွေးချောင်းစီးလမ်းတစ်ခုကို ဖောက်ထွက်ရန် သူတို့ကို ကူညီပေးခဲ့သည်။

“သလင်းကျောက် ဆင့်ကဲပြောင်းလဲမှု...” လင်းရှန်သည် ညင်သာစွာ သက်ပြင်းချလိုက်မိသည်၊၊

“ငါသာ ဆင့်ကဲမပြောင်းလဲသွားခဲ့ရင် ငါ့ရဲ့ယန္တရားစွမ်းအားက အမှောင်ယဉ်ကျေးမှုနဲ့ မသက်ဆိုင်ဘူးလို့ ပြသနေတာပဲ”

“ငါ အရင်က စိုးရိမ်ခဲ့တဲ့အရာတွေက ပြဿနာမဟုတ်တော့ဘူး ထင်တယ်”