သွေးနီရောင်ကမ္ဘာ (၂)

လင်းရှန်၏ မျက်နှာအမူအရာသည် ဇဝေဇဝါဖြစ်ရာမှ မျက်လုံးသူငယ်အိမ်များကျုံ့ဝင်သွားကာ ပြင်းထန်သောထိတ်လန့်မှုများက အရှိန်အဟုန်ဖြင့် တိုးဝင်လာတော့သည်။

သွေးနီရောင်ကောင်းကင်အောက် သေဆုံးခြင်းအော်ရာများထွက်ပေါ်နေသော ပျက်စီးနေသည့် ကမ်းရိုးတန်း၏ အဆုံး၌ စိတ်ကူးအကန့်အသတ်ကို ကျော်လွန်ကာ အဆုံးမဲ့ကာလမှ ဆိုးဝါးသော တောင်တန်းကြီးတစ်ခုကဲ့သို့ ကြီးမားလွန်းလှသော ပုံရိပ်တစ်ခုသည် သွေးနီရောင်မြူခိုးများကို ဖောက်ထွက်၍ သူ၏ မြင်ကွင်းထဲသို့ ပြင်းထန်စွာ တိုးဝင်လာခဲ့သည်။

၎င်းသည် သဘာဝအတိုင်း ဖြစ်ပေါ်နေသော တောင်တန်းတစ်ခုမဟုတ်ချေ။

၎င်းမှာ သံမဏိတည်ဆောက်ပုံတစ်ခုဖြစ်သည်။

သင်္ဘောတစ်စင်း။

ကမ်းရိုးတန်းတွင် သောင်တင်နေသော တောင်တန်းများကဲ့သို့ ကြီးမားခမ်းနားလှသော သင်္ဘောကြီးတစ်စင်းဖြစ်သည်။

၎င်းသည် ကြီးမားလွန်းလှသည်။

လင်းရှန်၏ စိတ်ထဲတွင် သဘောတရားချင်း နှိုင်းယှဉ်ချက်တစ်ခု လက်ခနဲ ပေါ်လာသည်… ၎င်းမှာ တိတ်ဆိတ်မြို့တော်ဖြစ်သည်။ သူ တစ်ချိန်က အံ့ဩတုန်လှုပ်စွာဖြင့် ငေးမောကြည့်ခဲ့ဖူးသော ကြီးမားလှသည့် ရွေ့လျားမြို့ပြခံတပ်ကြီးဖြစ်သည်။ သို့သော် သူ့ရှေ့တွင် သောင်တင်နေသော ကြီးမားလှသည့် သင်္ဘောကြီး၏ အရွယ်အစားမှာ တိတ်ဆိတ်မြို့တော်ထက် အနည်းဆုံးသုံးဆခန့် ပိုမိုကြီးမားမည်ဟု အကြမ်းဖျင်းခန့်မှန်းနိုင်ပြီး ထို့ထက်လည်း ပိုမိုကြီးမားနိုင်သည်။

ထို့ပြင် လင်းရှန်သည် ရှေ့ရှိ ပုံရိပ်က အမှန်တကယ် မည်သည့်အရာဖြစ်သည်ကိုလည်း ချက်ချင်း သဘောပေါက်သွားခဲ့သည်၊၊ ၎င်းမှာ ပင်လယ်ရေပြင်ပေါ်မှ နိုင်ငံတစ်ခုဖြစ်ပြီး ကမ္ဘာပျက်ကပ်ခေတ်ဆိုးကြီးအတွင်း သမုဒ္ဒရာကို ဖြတ်ကျော်၍ လူသားတို့၏ မျှော်လင့်ချက်မီးတောက်ကို သယ်ဆောင်ရန် တည်ဆောက်ခဲ့သော လူသားမျိုးနွယ်၏ အဆုံးစွန်သော နေဧရေပေါ်သံမဏိမြို့တော်ဖြစ်ကာ သူ ယခင်က သတင်းများထဲတွင်သာ မြင်တွေ့ခဲ့ဖူးသော ယဉ်ကျေးမှုပြယုဂ်တစ်ခုဖြစ်သည်၊၊

လက္ခဏာရပ်အားလုံးသည် ကမ္ဘာပျက်ကပ်ဘေးဒုက္ခများကြားတွင် ရွက်လွှင့်ခဲ့သော မျှော်လင့်ချက်ကို ကိုယ်စားပြုသည့် အဆုံးစွန်သော ဖန်တီးမှုကြီး၏ အမည်တစ်ခုဆီသို့ ညွှန်ပြနေသည်။

“...နောဧလား...”

ပိတ်ဆို့နေသော ခေါင်းဆောင်းအတွင်းမှ လင်းရှန်၏ အသံသည် မယုံကြည်နိုင်လောက်အောင် တုန်ရင်မှုများနှင့်အတူ ခြောက်ကပ်စွာ ထွက်ပေါ်လာတော့သည်။

အတိအကျပြောရလျှင် လင်းရှန် နိုးလာသည့်အချိန်မှစ၍ ထိုသွေးနီရောင်မြူခိုးများကြားရှိ ပုံရိပ်ကြီးကို မြင်တွေ့ခဲ့ရခြင်း ဖြစ်သည်။ သို့သော် ၎င်းသည် တောင်တန်းတစ်ခုမဟုတ်ဘဲ သင်္ဘောကြီးတစ်စင်းဖြစ်နေသည်ကို ယခုမှသာ သူ သဘောပေါက်လိုက်မိသည်။

“နောဧ... ဒါက ဘာလို့ဒီရောက်နေတာလဲ”

လင်းရှန်၏ နှလုံးသားတုန်ခါသွားရသည်။ လူသားမျိုးနွယ်နှင့် ဖီးနစ်၏ နောက်ဆုံးခံတပ်သုံးခုအနက်တစ်ခုဖြစ်သော နောဧသည် မိုးကုတ်စက်ဝိုင်းအစွန်းတွင် သေဆုံးငြိမ်သက်ခြင်းများနှင့်အတူ တည်ရှိနေသည်။

ထိုစဉ် သူ၏ စိတ်ထဲတွင် ဆန်းကြယ်သောအတွေးတစ်ခုပေါ်လာလေသည်၊၊ ကမ္ဘာကြီးက ပျက်စီးသွားခဲ့ပြီလား။

“ဟူး...”

လင်းရှန်သည် သက်ပြင်းအရှည်ကြီး တစ်ချက်ချရင်း ထိုထိတ်လန့်ဖွယ်ပုံရိပ်ကြီးကို စိုက်ကြည့်နေမိသည်။ အရှိန်အဟုန်ဖြင့်ပင် အပေါ်ယံကောင်းကင်ယံထက်မှ ဟာလာဟင်းလင်းဖြစ်နေသော နေရာတစ်ခုခု၏ တုန်ခါသံကဲ့သို့ ထူးဆန်းသော အသံတစ်သံထွက်ပေါ်လာပြီး ကြယ်သင်္ဘောပေါ်ရှိ သဲမှုန်များ တုန်ခါကာ လျှောကျသွားသည်အထိ ထိုအသံက နားကွဲမတတ်ကျယ်လောင်လှသည်။

သူ၏ ရင်ဘတ်ထဲတွင် တင်းကျပ်သွားပြီး ရှေ့ရှိ တင်းကျပ်စွာ ပိတ်ထားသော အလိုအလျောက်တံခါးကို ဖွင့်ရန် လက်ကို မြှောက်လိုက်ကာ အတွင်းသို့ အမြန်ဝင်ရောက်လိုက်သည်။

နောက်တစ်စက္ကန့်တွင် ကောင်းကင်ယံရှိ သွေးနီရောင်များသည် စီးဆင်းနေသော သွေးလှိုင်းများကဲ့သို့ လိပ်တက်လာပြီး ဒြပ်ထုတစ်ခုပမာထင်ရှားလာသည်။ ရုတ်တရက် အဝေးတစ်နေရာတွင် ကြီးမားလှသော ဆလင်ဒါပုံသဏ္ဌာန်အရာဝတ္ထုများ တန်းစီ၍ ပေါ်ထွက်လာပြီး တစ်ဝက်ခန့် ကြည်လင်သောအခြေအနေဖြင့် ဖြတ်သန်းတိုက်ခတ်လာခဲ့သည်။ ၎င်းသည် ကြီးမားလှသော သတ္တုဝါကြီးတစ်ကောင်၏ ရုန်းကန်လှုပ်ရှားနေသော လက်တံများနှင့် တူလှပြီး ကောင်းကင်မှ မြေပြင်အထိ တစ်ပြင်လုံးကို သိမ်းကျုံးတိုက်ခတ်လာနေသည်။

ထူးဆန်းသည်မှာ ၎င်းတွင် ဒြပ်ထုမရှိသကဲ့သို့ မြေပြင်ပေါ်ရှိ ဖုန်မှုန့်များနှင့် ပျက်စီးမှုအကြွင်းအကျန်များကို လွင့်ပျံသွားစေခြင်းမရှိဘဲ တိုက်ရိုက်ဖြတ်သန်းသွားခြင်း ဖြစ်သည်။

“ဒါက ဘာကြီးလဲ”

ရှေ့သို့ တိုးဝင်လာနေသော သွေးနီရောင် တံတိုင်းကြီးကို ကြည့်ရင်း လင်းရှန် မျက်မှောင်ကြုတ်လိုက်ကာ အလိုလျောက်ပင် သူ့ကိုယ်သူကာကွယ်ရန် AT စွမ်းအင်ဒိုင်းကာကို ချက်ချင်းအသက်သွင်းလိုက်သည်။

သူသည် အံတင်းတင်းကြိတ်လျက် ထိုကြီးမားလှသော တံတိုင်းကြီးက ချန်းယင်သင်္ဘော၏ ပျက်စီးမှုအကြွင်းအကျန်များကို ဖောက်ထွက်ပြီး ဆူနာမီလှိုင်းလုံးကြီးတစ်ခုကဲ့သို့ သူ့ထံသို့ ရိုက်ခတ်လာသည်ကို ကြည့်နေမိသည်။ ထိတွေ့မိသည့်အခိုက်အတန့်တွင် လင်းရှန်သည် သူ၏ နှလုံးခုန်သံများမြန်ဆန်လာသည်ကိုသာ ခံစားလိုက်ရပြီး နောက်တစ်စက္ကန့်တွင် ထိုသွေးနီရောင်တံတိုင်းကြီးသည် သူ့ကို လုံးဝဖြတ်သန်းသွားခဲ့ပြီ ဖြစ်ကာ မည်သည့်အရာမျှဖြစ်မလာခဲ့ချေ၊ သူ၏ AT စွမ်းအင်ဒိုင်းသည်လည်း မည်သည့်တုံ့ပြန်မှုမျှမရှိခဲ့ပေ။

လင်းရှန်သည် ဤထူးဆန်းသော ဖြစ်စဉ်ကြောင့် ဝေခွဲမရဖြစ်နေစဉ်မှာပင် သူ၏ စွမ်းအားဝတ်စုံမှ သတိပေးသံ ချက်ချင်းထွက်ပေါ်လာသည်။

[ခန္ဓာကိုယ်အတွင်း သွေးအမြောက်အမြားဆုံးရှုံးနေသည်ကို စစ်ဆေးတွေ့ရှိရသဖြင့် အရေးပေါ်နာနိုအနာဖြန်းဆေးကို အသက်သွင်းနေပါသည်]

“ဘယ်လို”

ဝုန်း၊၊

လင်းရှန် ရုတ်တရက် ဒူးထောက်လျက်လဲကျသွားပြီး ခေါင်းဆောင်းအတွင်းမှ မြင်ကွင်းသည် သွေးရောင်များဖြင့် ဖုံးလွှမ်းသွားသည်။ သူသည် လက်များကို ငုံ့ကြည့်လိုက်ရာ အတွင်းပိုင်းလည်ပတ်မှုစနစ်မှ သွေးမြူခိုးအမြောက်အမြားကို အပြင်သို့ ဆက်တိုက်ထုတ်လွှတ်နေသည်ကို တွေ့လိုက်ရသည်။

၎င်းက သူ့သွေးများဖြစ်သည်။

လင်းရှန်တစ်ကိုယ်လုံးရှိ သွေးကြောငယ်လေးများအားလုံး တစ်ပြိုင်နက်ပေါက်ကွဲသွားသကဲ့သို့ သွေးများအဆက်မပြတ်ထွက်နေခြင်းဖြစ်သည်ကို သဘောပေါက်လိုက်သည်။ နာကျင်မှုတစ်စုံတစ်ရာမရှိဘဲ သွေးများပန်းထွက်လာခြင်းလည်း မဟုတ်သော်လည်း သွေးအားလုံးသည် မြူခိုးများအဖြစ် ပြောင်းလဲကာ စွမ်းအားဝတ်စုံ၏ လေဝင်လေထွက်စနစ်မှတစ်ဆင့် အတင်းစစ်ထုတ်ခံနေရခြင်း ဖြစ်သည်။

“ဒီအရာက သွေးရည်ကြည်တွေကို စုပ်ယူနိုင်တာလား”

လင်းရှန်တစ်ကိုယ်လုံး အားအင်ကုန်ခမ်းသွားသလို ခံစားလိုက်ရပြီး မျက်စိထဲပြာဝေကာ မေ့လဲလုနီးပါးဖြစ်သွားခဲ့ပြီး မသိစိတ်က လှုပ်ရှားလာကာ စွမ်းအားဝတ်စုံမှတစ်ဆင့် အဒရီနယ်လင်ကို ချက်ချင်းထိုးသွင်းလိုက်သည်။

ရွှစ်၊၊

ဆေးထိုးအပ်သည် သူ၏ ကျောက်ကပ်နောက်ဘက်သို့ ထိုးစိုက်သွားပြီး လင်းရှန်ကို ချက်ချင်းပြန်လည်လန်းဆန်းသွားစေသည်။ သူသည် အလိုအလျောက်တံခါးကို ချက်ချင်းပိတ်လိုက်ပြီး လမ်းပြရန် ဒရုန်းနှစ်စင်းကို ထုတ်ကာ ကြယ်သင်္ဘော၏ လမ်းကြောင်းများတစ်လျှောက် ယိုင်တိယိုင်တိုင်ဖြင့် ရှေ့သို့ တိုးဝင်ခဲ့သည်။

ဒုန်း ဒုန်း ဒုန်း၊၊

ခပ်ပြင်းပြင်း ခြေသံများသည် မှောင်မိုက်နေသောစင်္ကြံလမ်းအတွင်း ပဲ့တင်ထပ်နေပြီး လင်းရှန်သည် ခေါင်းဆောင်းအတွင်း အသက်ကို ပြင်းပြင်းရှူနေရသည်။ ခဏမျှ ပြေးပြီးနောက် သူသည် ပင်ပန်းနွမ်းနယ်နေသော အခြေအနေမှ အနည်းငယ်ပြန်လည်သက်သာလာကာ ပျံသန်းရေးဒရုန်းအုပ်စုကို လွှတ်တင်၍ အတွင်းပိုင်းတည်ဆောက်ပုံကို လျင်မြန်စွာ စကင်ဖတ်ခိုင်းလိုက်သည်။ ၎င်းမှာ လုံခြုံစိတ်ချရသော အခန်း သို့မဟုတ် ရိက္ခာများနှင့် ထောက်ပံ့ရေးပစ္စည်းများသိုလှောင်ထားနိုင်မည့်ကုန်းပတ် သို့မဟုတ် သိုလှောင်ခန်းကို ရှာဖွေရန် ဖြစ်သည်။ အချိန်ကို ကြည့်လိုက်ရာ မှောင်လုနီးပါးဖြစ်နေလေပြီ၊၊ ဖြစ်နိုင်သည်မှာ ဤနေရာတွင် နေ့ညခွဲခြားမှုမရှိတော့ခြင်းဖြစ်နိုင်သော်လည်း ချူယန်ပြောခဲ့သကဲ့သို့ အဆောက်အအုံတစ်ခုခုအတွင်းပုန်းအောင်းနေခြင်းက အပြင်၌ နေရခြင်းထက် အမြဲတမ်းပိုမိုကောင်းမွန်သည်။

ပထမဦးစွာ ဖုံးကွယ်နေပြီးမှ တခြားအစီအစဉ်များကို ဆက်လုပ်ရမည်။

မှောင်မိုက်နေသော စင်္ကြံလမ်းအတွင်း ခြေလှမ်းအနည်းငယ်လှမ်းလိုက်တိုင်း မြေပြင်ပေါ်တွင် သေဆုံးနေသောရုပ်အလောင်းများနှင့် ခြေလက်အကြွင်းအကျန်များ၊ ခြောက်သွေ့နေသော စစ်တပ်ယူနီဖောင်းများ၊ စုတ်ပြဲနေသော စွမ်းအားဝတ်စုံများနှင့် မည်သည့်အရာမှန်းမသိသော ထူးဆန်းသည့် သတ္တဝါများ၏ ခန္ဓာကိုယ်များကို တွေ့ရသည်။ ၎င်းတို့ထံမှ ထွက်ပေါ်နေသော အမည်းရောင်အရည်များနှင့် အပုပ်နံ့များသည် အပြင်ဘက်ရှိ သွေးနီရောင်များနှင့် သိသိသာသာကွဲပြားခြားနားနေသည်။

လင်းရှန်သည် လမ်းတစ်လျှောက်ရှိ ရုပ်အလောင်းများနှင့် တိုက်ပွဲလက္ခဏာရပ်များကို စကင်ဖတ်ရင်း မျက်မှောင်ကြုတ်ကာ သုံးသပ်လိုက်သည်၊၊

“ရုပ်အလောင်း အတော်များများက တိုက်ရိုက် သွေးစုပ်ယူခြင်း ခံထားရတာပဲ... ဒီသန္ဓေပြောင်းလဲမှုတွေက... အရင်က ထူးဆန်းတဲ့လူသားတွေနဲ့ မတူဘူး”

သူသည် ဟာဝိုင်အီကျွန်းမှ ထွက်ခွာလာစဉ်က သွေးနီရောင်များအောက်ဝါးမျိုခံလိုက်ရသော ဖုတ်ကောင်များဝါးမျိုမှု သန္ဓေပြောင်းလဲခြင်းဖြစ်စဉ်ကို ချက်ချင်းသတိရသွားသည်။ ၎င်းသည် ယခင်က စွမ်းအားရှင်များ ထူးဆန်းသောလူသားများအဖြစ် ပြောင်းလဲသွားသည့် အခြေအနေနှင့် လုံးဝ ကွဲပြားခြားနားလှသည်။

“ဒါက အတိတ်နိမိတ်မကောင်းတာ သေချာတယ်... ဒါကိုရင်ဆိုင်ရရင် ပိုပြီးတော့ ခက်ခဲလိမ့်မယ်”

သူ့စိတ်ထဲတွင် အတွေးများစီးဆင်းနေစဉ်မှာပင် လင်းရှန်သည် လမ်းကြောင်းမှတစ်ဆင့် လူနေဆောင်ဧရိယာတစ်ခုသို့ ရောက်ရှိလာသည်။ အတော်အသင့် အကောင်းအတိုင်းကျန်ရှိနေသော အခန်းတစ်ခုကို စကင်ဖတ်မိသည်နှင့် သူသည် ယန္တရားနှလုံးသားကို အသုံးပြုကာ အလိုအလျောက်တံခါးကို ဖွင့်လှစ်ပြီး အတွင်းသို့ အမြန်ဝင်ရောက်လိုက်သည်။

မီးမောင်းများကို ဖွင့်လိုက်ရာ ဒရုန်းများသည် လျင်မြန်စွာ စကင်ဖတ်လိုက်ပြီး လေဝင်လေထွက်လမ်းကြောင်းများနှင့် ရေဆိုးထုတ်စနစ်များအားလုံးကို လင်းရှန် ချက်ချင်းထိန်းချုပ်လိုက်သည်။ ယခုအခါတွင် သူသည် ကျိအန်းမြို့၌ ရှိစဉ်ကနှင့်မတူဘဲ ယာယီခိုလှုံရာတစ်ခု တည်ဆောက်ရန်အတွက် သူ့အဖို့ အလွန်လွယ်ကူလှသည်။ သူ၏ တစ်ခုတည်းသော စိုးရိမ်မှုမှာ အဆောက်အအုံများက မကာကွယ်နိုင်သော ခြိမ်းခြောက်မှုများဖြစ်ပြီး မြေမျက်နှာသွင်ပြင်ကို လျစ်လျူရှုကာ ဖြတ်သန်းနိုင်သော ထိုသွေးနီရောင်တံတိုင်းကြီးကဲ့သို့အရာမျိုးဖြစ်သည်။

ဝူး...

စွမ်းအင်းအသေးစားလေး အသက်ဝင်လာပြီး အခန်းကို လင်းထိန်သွားစေကာ အလိုအလျောက်တံခါးကိုလည်း အပြည့်အဝပိတ်ဆို့ထားသော သံမဏိတံခါးဖြင့် လုံးဝပိတ်ဆို့လိုက်သည်။ ထို့နောက် မိုက်ခရိုဒရုန်း အစင်း၄၀ကို တခြားကုန်းပတ်အလွှာများဆီသို့ ဆက်ရှာဖွေရန်စေလွှတ်လိုက်သည်။ သွေးနီရောင်များသည် သတင်းအချက်အလက်များကို ပြင်းထန်စွာ ပိတ်ဆို့ထားသဖြင့် မီတာအနည်းငယ်အကွာတိုင်းတွင် ဒရုန်းများအဆက်အသွယ်ပြတ်တောက်သွားတတ်သည်။ ဤပြဿနာကို ဖြေရှင်းရန်အတွက် သူ၏ ဒရုန်းများကို မက်ထရစ်စနစ်ဖြင့် စကင်ဖတ်ခိုင်းလိုက်ရာ အဝေးဆုံးရှိ ဒရုန်းပင်လျှင် အချက်ပြလှိုင်းကို လက်ခံရရှိနိုင်မည်ဖြစ်သည်။

အရာအားလုံးပြီးမြောက်သွားပြီးနောက် လင်းရှန်သည် စွမ်းအားဝတ်စုံကို ချွတ်လိုက်သည်၊၊ ရှူး... ချက်ချင်းပင် သွေးအမြောက်အမြားသည် အရပ်မျက်နှာအနှံ့သို့ ပန်းထွက်သွားပြီး လင်းရှန်၏ ခန္ဓာကိုယ်သည် သွေးချင်းချင်းနီနေသော လူတစ်ယောက်ကဲ့သို့ ကြောက်မက်ဖွယ်မြင်ကွင်းဖြစ်နေသည်။ သို့သော် သူ၏ ခန္ဓာကိုယ်တွင် ဒဏ်ရာတစ်စုံတစ်ရာမရှိချေ။ သွေးများစွန်းထင်နေသော ရင်ဘတ်ကို ကြည့်ရင်း လင်းရှန်၏ မျက်နှာအမူအရာက လေးနက်ခက်ထန်နေသည်။

“အဲဒီအရာက နောက်ထပ်နှစ်ခေါက်လောက်သာဖြတ်သွားရင် စူပါမန်းတောင် သွေးခြောက်ပြီး အသားတုံးဖြစ်သွားလိမ့်မယ်...”

အဟွတ် အဟွတ်၊၊

လင်းရှန်သည် ပတ်ဝန်းကျင်ရှိ ဖုန်မှုန့်များကို လက်ဖြင့် ယမ်းခါလိုက်သည်။ ယခုမှပင် အခန်းအတွင်းပိုင်းကို သေချာကြည့်ရှုမိရာ ဤနေရာသည် စစ်သင်္ဘောပေါ်ရှိ အဆင့်မြင့်အရာရှိတစ်ဦး၏ အခန်းဖြစ်ပုံရပြီး သီးသန့်ရေချိုးခန်းနှင့် အလုပ်လုပ်ရန်နေရာပါရှိကာ အတော်အတန်ကျယ်ဝန်းလှသည်။

ဤအခန်းအတွင်း တိုက်ပွဲဖြစ်ပွားခဲ့သည့် လက္ခဏာရပ်များ သို့မဟုတ် အလောင်းများမရှိသည်ကို ထောက်ဆလျှင် ဤနေရာ၌ တိုက်ပွဲဖြစ်ပွားခဲ့ပုံမရဘဲ အတော်လေးသန့်ရှင်းနေသည်။ တခြားမမျှော်လင့်ထားသောအခြေအနေမျိုးမရှိပါက သူ ယနေ့ည ဤနေရာ၌သာ တည်းခိုရမည်ဖြစ်သည်။ လင်းရှန်သည် မူလက ဤဒေသတစ်ခုလုံးကို စေ့စေ့စပ်စပ်ရှာဖွေပြီး သူ၏အဖွဲ့သားများနှင့် ဖီးနစ်တို့၏ သတင်းအချက်အလက်များကို ရှာဖွေရန် စီစဉ်ခဲ့သော်လည်း ထိုထူးဆန်းသော သွေးတံတိုင်းကြီး ရုတ်တရက်ပေါ်ထွက်လာခြင်းကြောင့် အစီအစဉ်ပျက်သွားခဲ့ရသည်။ သွေးနီရောင်နယ်မြေ၏ အခြေအနေကို သေချာမသိဘဲ မျက်ကန်းတောတိုးရှာဖွေခြင်းသည် သေမင်းထံသွားနေခြင်းနှင့် တူညီကြောင်း သူ ချက်ချင်း သဘောပေါက်လိုက်သည်။ ဆရာမချန်နှင့် တခြားသူများကို အလွန်ရှာဖွေချင်နေသော်လည်း လက်ရှိတွင်မူ ခိုအောင်းနေရုံသာ တတ်နိုင်သေးသည်။

လင်းရှန်သည် ရေချိုးကန်ထံ သွားကာ ရေဘုံဘိုင်ခေါင်းကို လှည့်လိုက်သော်လည်း ရေပိုက်လိုင်းများထဲမှ လေသံတဟူးဟူးထွက်ပေါ်လာပြီး ရေတစ်စက်မျှ ကျမလာခဲ့ချေ။

ရှူး၊၊

သူသည် ရေချိုးကန်၏ အပြင်ဘက်ကို မှီလျက် ခန္ဓာကိုယ်ပေါ်ရှိ သွေးစွန်းကွက်များကို ရိုးရှင်းစွာ သန့်စင်လိုက်သည်။ ပြင်းထန်လှသော သွေးညှီနံ့များက သူ၏ လည်ချောင်းကို တိုက်ရိုက်လာရောက်ရိုက်ခတ်သဖြင့် လင်းရှန် စိတ်ထဲမှ တွေးနေမိသည်။

“ငါက အဲဒီအရာကို AT စွမ်းအင်ဒိုင်းနဲ့ မတားဆီးနိုင်ဘူး... ဒါကြောင့် အဲဒါက စွမ်းအင်ပုံစံမဟုတ်သလို ဒြပ်ထုရှိတဲ့ အရာလည်းမဟုတ်ဘူး... ငါ ဒါကိုဘယ်လိုကာကွယ်ရမလဲ”