ညကျရောက်ခြင်း (၂)

ဒါ ဘာဖြစ်တာလဲ။

လင်းရှန် အံ့အားသင့်သွားပြီး မိမိနောက်ကွယ်ရှိ မီးလင်းနေသော အခန်းဆီသို့ လှည့်ကြည့်လိုက်သည်။ သိုလှောင်မှုယူနစ်၏ တံခါးမှာ ပွင့်နေဆဲဖြစ်သော်လည်း အတွင်းပိုင်းမှာမူ အခြားကမ္ဘာတစ်ခုသို့ ရောက်ရှိသွားသကဲ့သို့ ခံစားရစေသည်။

“ငါ နားလည်သွားပြီ...”

လင်းရှန် မီးကို ဖွင့်လိုက်ပြီး သပ်သပ်ရပ်ရပ် စီရီထားသော ရေနှင့် စည်သွပ်ဗူးများကို ကြည့်ရင်း သမုဒ္ဒရာလမ်းကြောင်းအတိုင်း ထွက်ပြေးစဉ်က သွေးနီရောင်ထဲမှ ထွက်ပေါ်လာခဲ့ဖူးသော သတ္တဝါများကို ပြန်လည်အမှတ်ရကာ သူ၏စိတ်ထဲတွင် ထူးဆန်းသော အတွေးတစ်ခု ဖြတ်ပြေးသွားသည်။

သွေးနီရောင်လွှမ်းမိုးထားတဲ့ ကမ္ဘာကြီးက အခြားလှိုင်းနှုန်းတစ်ခုပဲ။

ဒါမှမဟုတ် အခြားဒိုင်မေးရှင်းတစ်ခုနဲ့တူနေတာလား၊၊

ဤယူဆချက်မှာ အလွန်တုန်လှုပ်ဖွယ်ကောင်းသော်လည်း လင်းရှန်တွင် သံသယဖြစ်စရာမရှိချေ။ ဒါက အဖြစ်နိုင်ဆုံးရှင်းလင်းချက်ဖြစ်သည်။

ထိုသို့ တွေးမိသည်နှင့် သူသည် သိုလှောင်မှုယူနစ်ထဲမှ ချက်ချင်းပြန်ထွက်ကာ အခန်း၏ အစွန်းဘက်သို့ ရွေ့လျားပြီး ထိုနေရာကို မိမိ၏ လက်များဖြင့် တိုက်ရိုက်စကင်ဖတ်လိုက်သည်။ သူသည် ကြယ်သင်္ဘောပျက်တစ်ခုလုံးကို စကင်ဖတ်ရန် ကြိုးစားနေခြင်းမဟုတ်ဘဲ မိမိ၏ ယူဆချက်ကို အတည်ပြုရန်အတွက် အပြင်ခွံဧရိယာကိုသာ အဓိကထား၍ စကင်ဖတ်ခြင်း ဖြစ်သည်။

မိနစ်အနည်းငယ် ကြာပြီးနောက် လင်းရှန် မျက်လုံးများကို ဖွင့်လိုက်မိပြီး အလွန်အမင်း အံ့အားသင့်သွားသည်။

“တကယ်ပဲ။ ကြယ်သင်္ဘောတစ်စင်းလုံးမှာ သွေးနီရောင်ကို ခွဲထုတ်ဖို့ ဒီလိုလှိုင်းနှုန်းစနစ် တပ်ဆင်ထားတာပဲ။ သူတို့ သေချာပေါက်ရှင်သန်နိုင်ကြမှာပါ”

သူသည် လှည့်၍ လက်ကို ဝှေ့ယမ်းလိုက်ရာ လေထုထဲမှ မရေမတွက်နိုင်သောပစ္စည်းများပျံသန်းလာကြသည်။ ယခုတစ်ကြိမ်တွင်မူ သူသည် အခန်းတစ်ခုလုံး၌ ယန္တရားတစ်ခုကို လျင်မြန်စွာ တည်ဆောက်ပြီး ထိုပိုက်လိုင်းကိရိယာကို နေရာအနှံ့သို့ ဖြန့်ကျက်လိုက်သည်။ အရာအားလုံးအဆင်သင့်ဖြစ်သောအခါ လင်းရှန်သည် ပျက်စီးလုနီးပါးဖြစ်နေသော ပြတင်းပေါက်ငယ်တစ်ခုအနီးသို့ ချဉ်းကပ်ကာ မိမိ၏ ယန္တရားစွမ်းအားကို အသုံးပြု၍ ပြုပြင်လိုက်သည်။ ထို့နောက် ပြင်ပရှိ သွေးနီရောင်သဲကန္တာရကို ကြည့်ရင်း ခလုတ်ကို နှိပ်လိုက်သည်။

ဝူး။

အခန်းတစ်ခုလုံး၏ အာကာသဟင်းလင်းပြင်မှာ ရုတ်တရက် ပြောင်းလဲသွားပြီး သွေးနီရောင်မှုံမှိုင်းမှုများမှသည် ကြည်လင်တောက်ပသောအခြေအနေသို့ ကူးပြောင်းသွားကာ လေထုပင်လျှင် လတ်ဆတ်သွားပုံရသည်။

လင်းရှန်သည် စွမ်းအားဝတ်စုံကို ချွတ်လိုက်ပြီး ရင်းနှီးနေသောခံစားချက်တစ်ခု ပြန်ရလာသည်ကို ခံစားလိုက်ရသည်။ အဆောက်အအုံ၏ သီးခြားခွဲထုတ်ထားမှုကြောင့် ခိုလှုံအခန်းအတွင်းရှိ သွေးနီရောင်တည်ရှိမှုမှာ အနည်းငယ်မျှသာ ရှိသော်လည်း ၎င်းက စိတ်မသက်မသာဖြစ်စေဆဲပင်၊၊ ခန္ဓာကိုယ်၏ ကိုယ်ခံအားစနစ်ပြိုလဲပျက်စီးကာ အားအင်ကုန်ခမ်းသွားသကဲ့သို့ ခံစားချက်မျိုးမှာ ထိုကိရိယာကို တပ်ဆင်ပြီးနောက်တွင် ပျောက်ကွယ်သွားပြီး အတိတ်က ညရက်များဆီသို့ ပြန်လည်ရောက်ရှိသွားသကဲ့သို့ ရှိတော့သည်။

“ပြီးသွားပြီ။ ဒီသုံးလအတွင်းမှာ အများကြီးဖြစ်ပျက်ခဲ့ပုံရတယ်”

လင်းရှန် သက်ပြင်းအရှည်ကြီးချလိုက်ပြီး ရေတစ်ဗူးကို ချက်ချင်းဖွင့်ကာ ဘာမှတွေးမနေတော့ဘဲ တစ်ကျိုက်တည်းနှင့် အဝသောက်လိုက်သည်။ ယခုအချိန်တွင် ရေသည် သွေးနီရောင်၏ မည်မျှအထိ တိုက်စားခြင်းခံထားရသည်ကို သူ ဂရုမစိုက်တော့ချေ။ သောက်ပြီးနောက်တွင်မူ သူ၏ ခန္ဓာကိုယ်ရှိ ဆဲလ်တိုင်းက ပျော်ရွှင်နေကြသကဲ့သို့ အနှိုင်းမဲ့သက်တောင့်သက်သာရှိမှုကို ခံစားလိုက်ရသည်။

ဝူး၊၊

ရေသောက်ပြီးနောက် လင်းရှန်သည် ရေချိုးကန်ထဲတွင် မတ်တတ်ရပ်နေပြီး အိမ်စေဒရုန်း သုံးစင်းက ခန္ဓာကိုယ်ပေါ်မှ သွေးအညစ်အကြေးများကို သန့်စင်ရန် ရေမြူများကို ဖြန်းပက်ပေးလိုက်ကြသည်။ ထွက်လာသော သွေးပုပ်ရေများကိုမူ ပြန်လည်သန့်စင်၍ သိုလှောင်ရန်အတွက် ပိုက်လိုင်းများက စုဆောင်းသွားကြသည်။

ယခုအခါ သွေးနီရောင်ကို ခွဲထုတ်နိုင်သည့် ကိရိယာရှိနေပြီဖြစ်သော်လည်း ရိက္ခာတစ်ခုကိုမျှ သူ အလဟဿအဖြစ်မခံလိုချေ။ သူသည် သွေးနီရောင်ထဲတွင် သူ၏ အဖွဲ့သားများနှင့် ဖီးနစ်အကြောင်း သဲလွန်စများကို ရှာဖွေရန် လိုအပ်နေသေးသဖြင့် ဤရိက္ခာများမှာ အလွန်အရေးကြီးလှသည်။

ဘုန်း။

အခန်းထဲတွင် လင်းရှန် ဖန်တီးထားသော ယန္တရားညာဘက်လက်မောင်းက Dragon Girl ၏ ညာဘက်လက်မောင်းတွင် တိကျစွာသွားရောက်တပ်ဆင်မိသွားသည်။ အလွိုင်းညာဘက်ပခုံး ချိတ်ဆက်မှုမျက်နှာပြင်မှ တောက်ပသော အပြာရောင်အလင်းတန်းများ လင်းထိန်လာပြီး ပြုပြင်ထိန်းသိမ်းရေးစက်ရုပ်က လင်းရှန် တောင်းဆိုထားသောအလုပ် ပြီးဆုံးသွားသဖြင့် တိတ်တဆိတ်ဆုတ်ခွာသွားခဲ့သည်။

၎င်းကို ကြယ်နက်ပန်းပဲဖိုထဲမှ ထုတ်ယူရသည်မှာ မခက်ခဲသော်လည်း ပြန်လည်ရုပ်သိမ်းရန်မှာ အလွန်ပင်ပန်းလှသဖြင့် လင်းရှန်သည် သူမကို ပြန်မရုတ်သိမ်းရန် ဆုံးဖြတ်လိုက်သည်။

တီ တီ၊ တီ တီ။

ညနေ ၆ နာရီ ၄၅ မိနစ်တွင် လင်းရှန် အိပ်စက်ကိရိယာထဲသို့ မဝင်ရောက်မီ သူ၏ နာရီမှ သတိပေးသံထွက်ပေါ်လာပြန်သည်။ သူသည် ပြတင်းပေါက်အနီးရှိ သတ္တုကုလားထိုင်တွင် ထိုင်နေပြီး ကြယ်တာရာသင်္ဘော၏ ပြတင်းပေါက်မှတစ်ဆင့် ပြင်ပသို့ လှမ်းကြည့်လိုက်သည်။ ထိုနေရာတွင် သွေးနီရောင်လေပြင်းများက သံချေးရောင်သဲများကို တိုက်ခတ်နေပြီး တိမ်တိုက် သို့မဟုတ် အလင်းရောင်တစ်စုံတစ်ရာမရှိဘဲ မြေပြင်ကို ဖိနှိပ်ထားသော သွေးနီရောင်ကောင်းကင်မျက်နှာကြက်ကြီးနှင့်အတူ ခဲပျစ်နေသော သွေးပင်လယ်ကြီးကဲ့သို့ မြင်ကွင်းကို ဖန်တီးနေသည်။

အမှောင်ထုရှိခြင်း၊ မရှိခြင်း သို့မဟုတ် လက်ရှိညသည် အတိတ်ကညများနှင့် ကွာခြားမှုရှိ၊မရှိကို သူ မသိချေ။ ယခုအချိန်တွင် သူသည် တိတ်တဆိတ်သာ စောင့်ဆိုင်းနေနိုင်ပြီး အပြင်ကမ္ဘာတစ်ခုလုံးမှာ သွေးနီရောင်အောက်တွင် နစ်မြုပ်နေကာ အနီရောင်လေပြင်းများက လေထုထဲတွင် လှိုင်းတံပိုးများကဲ့သို့ ထန်နေပြီး ကောင်းကင်ကြီးမှာ မြေပြင်ပေါ်သို့ ပြိုကျလုနီးပါး ဖြစ်နေကာ သွေးနီရောင်အကာအကွယ်အတားအဆီးကြီးတစ်ခုက မြေပြင်ကို လုံးဝဖုံးလွှမ်းထားသကဲ့သို့ ရှိနေသည်။

လင်းရှန် ပြတင်းပေါက်မှတစ်ဆင့် ကြည့်နေစဉ်မှာပင် အမှောင်ထုက ရုတ်တရက်ကျရောက်လာတော့သည်။

၎င်းမှာ ဂြိုဟ်ကြီးတစ်ခု၏ ကြီးမားလှသော အရိပ်က ကမ္ဘာမြေကို တိတ်တဆိတ် ဖြတ်သန်းသွားသကဲ့သို့ ဖြစ်ပြီး သွေးနီရောင်များကို ပိုနက်မှောင်ကာ သွေးခဲရောင်ကဲ့သို့ ညိုမည်းသောအခြေအနေသို့ ပြောင်းလဲသွားစေကာ ညကျရောက်လာပြီဖြစ်ကြောင်း လင်းရှန်ကို သိရှိသွားစေသည်။

ပုံစံကွဲပြားသော ညအချိန်ကျရောက်ခြင်းပင်၊၊

ဤအချိန်တွင် လင်းရှန်၏ အသက်ရှူသံများ ရုတ်တရက် ပြင်းထန်လာပြီး ပုံပျက်ပန်းပျက်ဖြစ်နေသော သင်္ဘောပျက်တောင်ကုန်းများကြားတွင် ပုံမှန်မဟုတ်သောအရာများထွက်ပေါ်လာသည်။ လေတိုက်ခတ်ရာသို့ လွင့်ပါးသွားသော မီးခိုးငွေ့များ သို့မဟုတ် သဲထုအနက်ပိုင်းမှ စိမ့်ထွက်လာသော အနည်အနှစ်များကဲ့သို့ ဝဲလှည့်နေသော သွေးနီရောင်သဲများထဲတွင် ပုံပျက်ပန်းပျက်ဖြစ်နေသော မီးခိုးရောင်အရိပ်များကို သူ မြင်တွေ့လိုက်ရသကဲ့သို့ ရှိသည်။ ၎င်းတို့တွင် လူသားပုံသဏ္ဌာန်ရှိသော်လည်း ၎င်းတို့၏ ခြေလက်များမှာ ပြောင်းပြန်ဖြစ်နေကာ ရှည်လျားလှပြီး လှမ်းလျှောက်ပုံမှာလည်း ပုံမှန်မဟုတ်ချေ။ သွေးနီရောင်မြူများကြားတွင် ၎င်းတို့က ပေါ်လိုက်ပျောက်လိုက် ဖြစ်နေသည်။ လေတစ်ချက်ဝှေ့လိုက်ရုံဖြင့် ၎င်းတို့က မြူများကွဲလွင့်သွားပြီးနောက် ထူးဆန်းသော ပုံသဏ္ဌာန်အသစ်များအဖြစ် ချက်ချင်း ပြန်လည်ဖွဲ့စည်းသွားကြသည်။

“သန္ဓေပြောင်းသတ္တဝါတွေလား”

လင်းရှန်၏ မျက်နှာအမူအရာတည်ကြည်သွားသည်။ သွေးနီရောင်က ဤအရာများကို စိတ်ကူးယဉ်ဆန်သကဲ့သို့ဖြစ်စေသော်လည်း တစ်ချိန်တည်းမှာပင် အလွန်အမင်းသေစေနိုင်လောက်သော စွမ်းအားရှိနေစေသည်။

ဤအချိန်တွင် သူ၏ အကြည့်က ပိုမိုဝေးကွာသော နေရာဆီသို့ ရောက်ရှိသွားပြီး ထိုနေရာရှိ တစ်ဝက်တစ်ပျက်နစ်မြုပ်နေသော ကြယ်တာရာသင်္ဘော၏ အတောင်ပံအပျက်အစီးများဖြင့် တည်ဆောက်ထားသော သဲသောင်ခုံတစ်ခုပေါ်တွင် ပုံရိပ်တစ်ခု မတ်တတ်ရပ်နေသည်။ ၎င်းမှာ လေးမီတာ သို့မဟုတ် ငါးမီတာခန့် မြင့်မားပြီး ခန္ဓာကိုယ်မှာ ခြောက်သွေ့နေသော သစ်ပင်စည်ပိုင်းကဲ့သို့ တွန့်လိမ်နေသော်လည်း ခြေလက်များမှာမူ ထူးဆန်းစွာ အချိုးကျလှပြီး ပုပ်သိုးဆွေးမြည့်နေသော ကျောက်တိုင်တစ်ခုကဲ့သို့ သွေးနီရောင်ကောင်းကင်အောက်တွင် တိတ်တဆိတ် မတ်တတ်ရပ်နေသည်။

၎င်းက မည်သည့်လှုပ်ရှားမှုမျှမရှိဘဲ အသက်ရှူသံလည်း မရှိချေ။ မိမိဘက်သို့ မျက်နှာမူထားခြင်း သို့မဟုတ် ကျောခိုင်းထားခြင်း ရှိမရှိကိုလည်း ရှင်းရှင်းလင်းလင်းမသိရဘဲ စစ်မှန်သောအမည်းရောင်ပုံရိပ်အဖြစ်သာတည်ရှိနေသည်။

၎င်းမှာ ဦးခေါင်း၊ ပခုံးတို့ပါဝင်ပြီး လူသားတစ်ဦးနှင့်ထပ်တူညီသော ဖြစ်တည်မှုတစ်ခုဖြစ်သော်လည်း ထိတ်လန့်ဖွယ်ကောင်းလောက်အောင် ရှည်လျားသော ခြေလက်များရှိနေကာ သည်းထိတ်ရင်ဖိုဇာတ်လမ်းများထဲမှ သရဲတစ္ဆေတစ်ကောင်ဖြစ်သည့် Gao Liren နှင့် တူနေသည်။

လင်းရှန် မျက်မှောင်ကြုတ်လိုက်ပြီး ဝိုးတဝါးဖြစ်နေသော အမှောင်ထုကို ဖောက်ထွင်း၍ ကြည့်ရန် ကြိုးစားလိုက်သော်လည်း ရှင်းရှင်းလင်းလင်းမမြင်ရချေ။

သို့သော်လည်း လျှပ်တစ်ပြက်အတွင်းမှာပင် ကြီးမားလှသော အမည်းရောင်တွင်းကြီးတစ်ခု သို့မဟုတ် ကြီးမားလှသော လူသားမျက်နှာကြီးတစ်ခုက ပြတင်းပေါက်၏ အပြင်ဘက်တွင် ထူးဆန်းစွာ ထွက်ပေါ်လာတော့သည်။ ၎င်းမှာ မျက်နှာအသွင်အပြင်မရှိဘဲ မျက်နှာတစ်ခုလုံးကို နေရာယူထားသည့် အဆုံးမရှိသော တွင်းနက်ကြီးတစ်ခုသာ ဖြစ်သည်။ ထိုတွင်းနက်ကြီး၏ အနက်ပိုင်းမှ ပျစ်ခဲလှသော သွေးနီရောင် အလင်းတန်းများက သက်ရှိတစ်ခုကဲ့သို့ လှုပ်ရှားနေပြီး ပြတင်းပေါက်တွင် တိုက်ရိုက်လာရောက်ကပ်ငြိနေသည်။

၎င်းက သူ့ကို စိုက်ကြည့်နေခြင်း ဖြစ်သည်။

ရိုးတွင်းခြင်ဆီအထိ အေးစက်သွားစေသည်။

တိတ်ဆိတ်ငြိမ်သက်လွန်းလှသည်။

လင်းရှန်သည် ပြတင်းပေါက်မှတစ်ဆင့် ပြင်ပရှိ ကြီးမားလှသော အမည်းရောင်တွင်းကြီးနှင့်တူသည့် မျက်နှာဆိုးကြီးကို ကြည့်ရင်း အသက်ရှူပင် ခေတ္တရပ်တန့်သွားသကဲ့သို့ သူ၏ အမူအရာက အလွန်တုန်လှုပ်ချောက်ချားသွားခဲ့သည်။ ထိုမှောင်မည်းနေသော ဟာလာဟင်းလင်းတွင်းနက်ကြီးက သူ့ကို ငရဲတွင်းနက်ကြီးကဲ့သို့ စိုက်ကြည့်နေပုံရသဖြင့် လင်းရှန်သည် ဗီဇအရ သူ၏ AT စွမ်းအင်ဒိုင်းကို ချက်ချင်း အသက်သွင်းလိုက်မိသည်။

နဖူးမှ ချွေးစေးများ စီးကျလာပြီး လင်းရှန်သည် အပြင်ဘက်ရှိ ထူးဆန်းသောသတ္တဝါကြီးနှင့် မျက်နှာချင်းဆိုင်လျက် မတ်တတ်ရပ်ကာ တောင့်ထားလိုက်သည်။ သူ၏ ညာလက်ကမူ စူပါအလင်းယိုင်ဓားကို တိုက်ရိုက်ထုတ်လွှတ်ရန် အဆင်သင့်ပြင်ထားပြီး တစ်ချိန်တည်းမှာပင် ဘေးအန္တရာယ်မှ ရှောင်တိမ်းရန်အတွက် စွမ်းအင်အသွင်ပြောင်းခြင်းကို အသုံးပြုရန်ပါ စဉ်းစားနေခဲ့သည်။

သူ၏စိတ်ထဲတွင် အတွေးပေါင်းများစွာ တစ်ပြိုင်နက်ပေါက်ကွဲထွက်ပေါ်လာသော်လည်း ထူးဆန်းသည်မှာ စက္ကန့်အနည်းငယ်ကြာသွားသည့်တိုင် ပြင်ပမှ သတ္တဝါကြီးက တိုက်ခိုက်ခြင်းမရှိဘဲ ထိုဟာလာဟင်းလင်းမျက်နှာကြီးဖြင့် ပြတင်းပေါက်ကိုသာ ဆက်လက်မျက်နှာမူထားခြင်း ဖြစ်သည်။

လင်းရှန် မျက်မှောင်ကြုတ်လိုက်ပြီး ရုတ်တရက်အတွေးတစ်ခုဖြတ်ပြေးသွားသည်။ အခန်း၏ အမှောင်စွမ်းအင်လှိုင်းနှုန်းက လုံးဝ‌‌ပြောင်းလဲသွားပြီဖြစ်၍ ထိုသတ္တဝါက သူ့ကို မမြင်နိုင်တာများလား။

အသံ၊ အနံ့၊ စွမ်းအင်၊ လှိုင်းနှုန်းစသည့် အလားအလာများစွာကို လင်းရှန် စဉ်းစားနေရင်း တိုက်ခိုက်လိုစိတ်ကို အတတ်နိုင်ဆုံးထိန်းချုပ်ကာ မိမိကိုယ်ကိုယ်တည်ငြိမ်အောင် သတိပေးလိုက်သည်။ မလိုအပ်ဘဲနှင့် ဤသွေးနီရောင်ညတွင် ပြဿနာမရှာလိုချေ။ ချန်းယင်သင်္ဘော၏ အပျက်အစီးများနှင့် ပတ်လည်တွင် ပျံ့နှံ့နေသော စစ်ပွဲအကြွင်းအကျန်များက သွေးနီရောင်အတွင်းရှိ ကြောက်မက်ဖွယ်ရာများကို သက်သေပြနေသည်။ ဤငရဲတွင်းနက်ကဲ့သို့ ထိတ်လန့်စရာများကို သူ တစ်ယောက်တည်းရင်ဆိုင်ရန်မှာ ခက်ခဲလှပြီး ဘယ်သို့ထွက်ပြေးရမည်ကိုလည်း မသိသဖြင့် ချောင်ပိတ်ခံထားရသော သားရဲတစ်ကောင်ကဲ့သို့သာ တိုက်ခိုက်ရပေလိမ့်မည်။

ထိုမှောင်မည်းနေသော တွင်းနက်ကြီးကို ကြည့်ရင်း လင်းရှန်သည် လက်သီးကို တင်းတင်းဆုပ်ကာ ဆက်လက်ငြိမ်သက်နေပြီး ဒရုန်းအားလုံးကိုလည်း အသံမထွက်ဘဲ ငြိမ်သက်စွာနေရန် တိတ်တဆိတ်အမိန့်ပေးလိုက်သည်။

သူ လောင်းကြေးထပ်နေခြင်း ဖြစ်သည်။

သူ့အတွေးမှန်ပါစေဟူ၍သာ လောင်းကြေးထပ်နေမိသည်။

အချိန်မည်မျှကုန်လွန်သွားသည်ကို မသိရဘဲ ပြင်ပရှိ ဟာလာဟင်းလင်းမျက်နှာကြီးက သွေးနီရောင်မြူလှိုင်းများနှင့်အတူ သဲဝါများထဲသို့ ရုတ်တရက် ပျောက်ကွယ်သွားပြီး တစ်ချိန်တည်းမှာပင် ရိုးတွင်းခြင်ဆီအထိ အေးစက်စေသော စိုက်ကြည့်မှုကြီးကလည်း ပျောက်ဆုံးသွားတော့သည်။

ထိုအခါမှသာ လင်းရှန် သက်ပြင်းအရှည်ကြီးချနိုင်သွားပြီး စိတ်ထဲမှ ကြောက်ရွံ့တုန်လှုပ်မှုကို အနိုင်နိုင်ထိန်းချုပ်လိုက်ရသည်။

“အစကတည်းက ပျင်းမနေဘဲ အခန်းတစ်ခုလုံးကို ကိရိယာတွေ တပ်ဆင်လိုက်တာ တော်သေးတာပေါ့။ သွေးနီရောင်ထဲက သတ္တဝါတွေက ဝင်ရိုးစွန်းညထဲကကောင်တွေထက် ပိုပြီး အာရုံခံစားမှု ထက်မြက်ပုံရတယ်။ ဒါ့အပြင်...”

သူ အနည်းငယ် ဝေခွဲမရဖြစ်နေမိသည်။ ပြင်ပရှိ သတ္တဝါများက ဖမ်းဆုပ်ရခက်ခဲလှပြီး တည်နေရာရွှေ့ပြောင်းခြင်းပါ လုပ်ဆောင်နိုင်စွမ်းရှိပုံရသဖြင့် အလွန်ထူးဆန်းအံ့ဩဖွယ် ကောင်းလှသည်။ အကယ်၍ ထိုသတ္တဝါများတွင် ယခုကဲ့သို့ လျင်မြန်သော လှုပ်ရှားနိုင်စွမ်းရှိနေပါက သာမန်လူသားများအနေဖြင့် ရှင်သန်ရန် တုံ့ပြန်ခွင့်ပင် ရလိမ့်မည်မဟုတ်ချေ။