အခန်း ၃၆၁

အခန်း (၃၆၁) - အခွင့်အရေး

ဤအခိုက်အတန့်တွင် သူတို့၏ ကာကွယ်ရေးမှာ အနိမ့်ဆုံး အခြေအနေသို့ ရောက်ရှိနေပြီး အာရုံစိုက်မှုအားလုံးမှာလည်း စစ်မြေပြင်၏ ဆွဲဆောင်ခြင်းကို ခံထားရသည်။

“အခုပဲ…ဒီထက်ကောင်းတဲ့ အခွင့်အရေးဆိုတာ ဘယ်တော့မှ ရှိလာတော့မှာ မဟုတ်ဘူး”

၎င်း၏ ခန္ဓာကိုယ်အတွင်း စုစည်းထားခဲ့သည့် ၎င်း၏ အသက်မူလအစ စွမ်းအားများ ပါဝင်နေသည့် အဆိပ် မိစ္ဆာစွမ်းအားများသည် တံတိုင်းကျိုးသွားသည့် မြစ်ရေကြီးတစ်ခုအလား လည်ချောင်းဝက အဆိပ်အိတ်ဆီသို့ ဆူပွက်စီးဆင်းသွားခဲ့ပြီး ထပ်ခါတလဲလဲ ဖိသိပ်စုစည်းသွားခဲ့ပြီ ဖြစ်သည်။

၎င်း၏ ဧရာမ ခန္ဓာကိုယ်ကြီးက ဖြည်းညင်းစွာ တွားသွားခြင်း မပြုတော့ဘဲ ကာလရှည်ကြာစွာ ဖိသိပ်ထားခဲ့ရသည့် စပရိန်တစ်ခုအလား ကြွက်သားများ ချက်ချင်း အစွန်းရောက်အောင် တင်းမာသွားခဲ့ပြီးနောက်…

“အရှင်သခင်သစ်... အတွက်ပဲ”

စိမ့်နွံနက်မြွေဘုရင်၏ အေးစက်သော အသံသည် ငရဲခန်းမှ ထွက်ပေါ်လာသည့် နာရေးခေါင်းလောင်းသံကြီးတစ်ခုအလား ရုတ်တရက် ပဲ့တင်ထပ်သွားခဲ့ပြီ ဖြစ်သည်။

၎င်း၏ ဦးခေါင်းသည် အရှိန်အဟုန်၏ အကန့်အသတ်ကို ကျော်လွန်လျက် ဝေဝါးနေသော အနောက်ပုံရိပ်တစ်ခုအဖြစ် ပြောင်းလဲသွားသည်။

၎င်း၏ မွေးရာပါ သေစေနိုင်သော အဆိပ်စွယ် ထိုးစိုက်ခြင်းသည် မိမိ၏ သစ္စာဖောက်မှု ပြတ်သားချက်များနှင့် အနာဂတ်အပေါ် အရာအားလုံးကို လောင်းကြေးထပ်ထားသည်။

ရှေ့တန်းစစ်မြေပြင်၏ အပြောင်းအလဲများကြောင့် ဘယ်ဘက်ဆုံးက မိစ္ဆာဘုရင်၏ ဝိညာဉ်လှုပ်ခတ်မှုကို အခွင့်ကောင်းယူကာ ရက်စက်ကြမ်းကြုတ်စွာ ရှေ့သို့ ထိုးစိုက်ကာ ကိုက်ခဲပစ်လိုက်တော့သည်။

“စိမ့်နွံနက်… မင်း ဘယ်လိုတောင် ဝံ့ရဲတာလဲ”

သတ္တုများနှင့် ကျောက်ဆောင်များကိုပါ တိုက်စားနိုင်ပြီး ဝိညာဉ်များကိုပါ ချေမှုန်းပစ်နိုင်စွမ်းရှိသော ကြောက်မက်ဖွယ်ကောင်းသည့် အဆိပ်စွမ်းအားများသည် ၎င်း၏ အရိုးစု ခန္ဓာကိုယ်ပေါ်တွင် ပြင်းထန်စွာ ပေါက်ကွဲထွက်သွားခဲ့ပြီ ဖြစ်သည်။

“ဂျွတ်... ”

အရိုးစုကြီး ကျိုးပဲ့သွားသည့် စူးရှသော အသံနှင့် စွမ်းအင်များ တိုက်စားခံလိုက်ရသည့် ထူးဆန်းသော အသံတို့က တစ်ပြိုင်နက်တည်း ထွက်ပေါ်လာခဲ့ပြီ ဖြစ်သည်။

ထိုမိစ္ဆာဘုရင်၏ ဖြူရော်ရော် အရိုးစုကြီးမှာ ချက်ချင်းပင် မည်းမှောင်ကာ ကြွပ်ဆတ်သွားခဲ့ပြီး စတင်ပြိုလဲပျက်စီးတော့သည်။

၎င်း၏ ဦးခေါင်းခွံအတွင်း တောက်လောင်နေသည့် ဝိညာဉ်မီးတောက်မှာလည်း ပြင်းထန်စွာ လှုပ်ခတ်သွားပြီး ရုတ်တရက် မှေးမှိန်သွားခဲ့ရရှာသည်။

မိမိအယုံကြည်ရဆုံးဖြစ်သည့် “မဟာမိတ်” ထံမှ ရုတ်တရက် ရရှိလိုက်သည့် သစ္စာဖောက်မှုက မဟာမိတ်တပ်ဖွဲ့၏ နှလုံးသားပေါ်သို့ ရက်စက်စွာ ထိုးစိုက်လိုက်သည့် အဆိပ်လူးဓားမြှောင်တစ်လက်အလား ဖြစ်သွားခဲ့လေပြီ။

သူတို့၏ အောင်ပွဲအတွက် နောက်ဆုံး မျှော်လင့်ချက် အပိုင်းအစလေးကို လုံးဝချေမွဖျက်ဆီးခံလိုက်ရသည်။

မဟာမိတ်အဖွဲ့၏ ပင်မစခန်းမှ စိတ်ပျက်အားငယ်မှုနှင့် ဖရိုဖရဲဖြစ်မှုများ ပြင်းထန်စွာ ပေါက်ကွဲထွက်လာခဲ့သည်။ ယင်းအခြေအနေက မဟာမိတ်အဖွဲ့၏ စည်းကမ်းနှင့် အခြေခံအုတ်မြစ်များ လုံးဝပြိုကွဲသွားကြောင်း ဖော်ပြနေသကဲ့သို့ ဖြစ်ပြီး၊ ထိုစိတ်ပျက်ဖွယ်လှိုင်းသည် စခန်းအတွင်းမှ အပြင်သို့ ပျံ့နှံ့သွားကာ စစ်မြေပြင်တစ်ခုလုံးကို လွှမ်းမိုးသွားခဲ့သည်။

နင်မြို့ထက်၌ ဖုံးလွှမ်းနေသော မီးခိုးမြူများကြားမှ အရုဏ်ဦး၏ ပထမဆုံး အလင်းတန်း ဖြတ်ပြေးသွားချိန်တွင် အရိုးဖြူတောအုပ် မိစ္ဆာဘုရင်၏ စူးရှလှသော ဝိညာဉ်အော်ဟစ်သံကြီးက စစ်မြေပြင်တစ်ခုလုံးသို့ ရိုက်ခတ်လှိုင်းတစ်ခုအလား ပျံ့နှံ့သွားသည်။

အစိမ်းရောင်ဖျော့ဖျော့ရှိသော ဝိညာဉ်မီးတောက် သုံးခုသည် လေထုထဲတွင် ပျံ့နှံ့နေကြပြီး အရုဏ်မတက်မီ အမှောင်ထုကို ဝါးမြိုထားသည်။

“စိမ့်နွံနက်”

အဆိပ်စွယ်များဖြင့် ရင်ဘတ်ကို ထိုးစိုက်ခံလိုက်ရသည့် မိစ္ဆာဘုရင်သည် လိမ်ကောက်နေသော ဟိန်းဟောက်သံတစ်ခုကို ထုတ်လွှတ်လိုက်သည်။

ရက်စက်လှသော အဆိပ်များ၏ တိုက်စားမှုအောက်တွင် ၎င်း၏ ကျိုးပဲ့နေသော အရိုးစုများက အဆက်မပြတ် ကွာကျနေပြီး ဝိညာဉ်မီးတောက်မှာလည်း ပြင်းထန်စွာ လှုပ်ခတ်နေသည်။

“ငါတို့ နင်မြို့ကို အတူတူ ခွဲဝေယူကြဖို့ သွေးသစ္စာ ကျိန်ဆိုခဲ့ကြတာလေ၊ မင်းက ဘာလို့ ငါ့ကို အနောက်ကနေ လုပ်ကြံရဲတာလဲ”

စိမ့်နွံနက်မြွေဘုရင်၏ ဧရာမခန္ဓာကိုယ်ကြီးသည် အပျက်အစီးများကြားတွင် သွက်လက်စွာ လှည့်ပတ်နေပြီး မြွေမျက်လုံးများထဲတွင် ကောက်ကျစ်မှုများနှင့် ပြတ်သားမှုများ လင်းလက်နေသည်။

“သွေးသစ္စာ ဟုတ်လား… အကြွင်းမဲ့ ခွန်အားရှေ့မှာတော့ ကျိန်ဆိုချက်ဆိုတာ အားနည်းသူတွေက ကိုယ့်ကိုယ်ကိုယ် နှစ်သိမ့်ဖို့ ပြောကြတဲ့ အလိမ်အညာတွေ သက်သက်ပါပဲ”

၎င်းသည် အမြီးဖြင့် ပြင်းထန်စွာ ရိုက်ချလိုက်ရာ ကွန်ကရစ် အပိုင်းအစများ လွင့်စင်သွားသည်။

“မင်း အခြေအနေကို မမြင်ဘူးလား… နှင်းဝံပုလွေဘုရင်ရဲ့ ခွန်အားတွေကို မင်းကိုယ်တိုင် မျက်စိနဲ့ မြင်ခဲ့ရတာပဲ… ဇွတ်မှိတ် ခုခံနေတာက သေလမ်းကို ရှာနေတာနဲ့ အတူတူပဲ”

“ဒါဆို မင်းက ဝံပုလွေဘုရင်ရဲ့ ခွေးတစ်ကောင်အဖြစ် ခေါင်းငုံ့ဖို့ သဘောတူလိုက်တာပေါ့”

အခြားမိစ္ဆာဘုရင်တစ်ပါး၏ ဦးခေါင်းခွံအတွင်းရှိ ဝိညာဉ်မီးတောက်မှာ ပြင်းထန်စွာ လောင်ကျွမ်းလာခဲ့ပြီး ၎င်း၏ အရိုးလက်သည်းများက အစိမ်းရောင်ဖျော့ဖျော့ အလင်းတန်း သုံးခုကို ဝှေ့ယမ်းလိုက်ရာ ဖြတ်သန်းသွားရာ လေထုကိုပင် တိုက်စားသွားစေသည်။

“ငါတို့ နင်မြို့ကို သိမ်းပိုက်နိုင်ခဲ့ရင်တောင် ဝံပုလွေဘုရင်က မင်းကို အကျိုးအမြတ် ဘယ်လောက်ပေးမယ် ထင်လို့လဲ… သူစားမကုန်လို့ ချန်ထားခဲ့မယ့် အရိုးကျန်လေးတွေပဲ ဖြစ်မှာ”

မြွေဘုရင်က ထိုတိုက်ခိုက်မှုကို သွက်လက်စွာ ရှောင်တိမ်းလိုက်ပြီး အဆိပ်ရည်များကို ပြန်လည်မှုတ်ထုတ်လိုက်ရာ အပျက်အစီးများပေါ်တွင် တရှဲရှဲ မြည်သံများနှင့်အတူ ချိုင့်ခွက်များ ဖြစ်ပေါ်သွားစေသည်။

“အရိုးကျန်လေးက အလောင်းတောင် ရှာမရဘဲ သေရတာထက်စာရင်တော့ ပိုကောင်းတာပေါ့…အနည်းဆုံးတော့ ဝံပုလွေဘုရင်ဆီမှာ ခေါင်းငုံ့လိုက်ရင် ငါနဲ့ ငါ့မျိုးနွယ်စုဝင်တွေ အသက်ရှင်သန်ခွင့်ရဦးမယ်… မင်းတို့ကတော့...”

၎င်း အေးစက်စွာ ရှူးရှူးမြည်သံ ထုတ်လိုက်သည်။

“ဒီစစ်ပွဲရဲ့ စတေးခံတွေ ဖြစ်သွားဖို့ပဲ ကံပါလာကြတာ”

သူသည် မိစ္ဆာဘုရင်သုံးပါးနှင့် အပြင်းအထန် တိုက်ခိုက်နေကြသည့် အချိန်မှာပင်၊ ဝံပုလွေအသိုက်၏ ထိုးစစ်မှာလည်း ထိတ်လန့်တုန်လှုပ်ဖွယ် အထွတ်အထိပ်သို့ ရောက်ရှိသွားခဲ့ပြီ ဖြစ်သည်။

စစ်မြေပြင်၏ ဘယ်ဘက်တောင်ပံတွင် ထျန်းပင်းသည် လုပ်ကြံသတ်ဖြတ်သူများကို ဦးဆောင်လျက် ရဲရဲတောက်နေသော ဓားတစ်လက်အလား သားရဲအုပ်စုကြားထဲတွင် အက်ကြောင်းကြီးတစ်ခုကို ဆုတ်ဖြဲပစ်ခဲ့သည်။

သူ့ပတ်လည်တွင် ရွှေအိုရောင် လျှပ်စီးကြောင်းများ စီးဆင်းနေပြီး၊ မိုးကြိုးအကျဉ်းထောင် အရူးနတ်ဘုရား အခြေအနေရှိ သူ၏ တိုက်ခိုက်မှုတိုင်းက ကောင်းကင်နှင့် မြေကြီးကို ဖျက်ဆီးနိုင်သည်။

အဆင့် ၄၂ ရှိ မြေကမ္ဘာချေမှုန်းကြံ့ဘုရင် တစ်ကောင်က သူ့ကို ပိတ်ဆို့ရန် ကြိုးစားခဲ့သော်လည်း ၎င်း၏ ထူထဲလှသော ချပ်ဝတ်အရေပြားမှာ သူ၏ မိုးကြိုးလက်သီးရှေ့တွင် စက္ကူအလား အပိုင်းပိုင်း ပြိုကွဲသွားခဲ့ရပြီး ဦးခေါင်းတစ်ခုလုံး လုံးဝ ချေမွခံလိုက်ရသဖြင့် အသားစိုင်များ မီတာဆယ်ဂဏန်းအထိ လွင့်စင်သွားခဲ့ရသည်။

“အလန်းကြီးပဲဟေ့…နောက်တစ်ကောင် လာခဲ့စမ်း…”

ထျန်းပင်း ရူးသွပ်စွာ ရယ်မောလိုက်ရင်း နောက်ထပ် မိစ္ဆာသားရဲတစ်ကောင်ဆီသို့ ခုန်အုပ်လိုက်ရာ သူ သွားရာ နေရာတိုင်းတွင် လျှပ်စီးများ ပေါက်ကွဲပြီး အသားစိုင်များ လွင့်စင်နေသည်။

သူ၏ အနောက်က လုပ်ကြံသတ်ဖြတ်သူများသည်လည်း ပြီးပြည့်စုံစွာ ပူးပေါင်းဆောင်ရွက်နေကြပြီး သေမင်းတမန် လေဆင်နှာမောင်းတစ်ခုအလား သူတို့ကို ဝိုင်းရံရန် ကြိုးစားသည့် မည်သည့် မိစ္ဆာသားရဲမဆို အပိုင်းပိုင်း ဆုတ်ဖြဲပစ်ကြသည်။

စစ်မြေပြင်၏ ညာဘက်တောင်ပံတွင်မူ ရန့်မြဲ့သည် အစောင့်အရှောက် တပ်ဖွဲ့များကို တည်ငြိမ်စွာ ကွပ်ကဲနေသည်။

သာမန်အစောင့်အရှောက်ဝံပုလွေများသည် ခိုင်မာသော နှင်းခဲဒိုင်း ဖွဲ့စည်းပုံကို ဖွဲ့စည်းထားကြပြီး ရွေ့လျားနေသည့် မြို့တံတိုင်းကြီးတစ်ခုအလား တည်ငြိမ်စွာ ရှေ့တိုးနေကြသည်။

သူတို့နောက်တွင် မဟာနှင်းအစောင့်အရှောက်ကိုးဦးသည် တစ်ပြိုင်နက်တည်း ခေါင်းမော့လိုက်ကြရာ အေးစက်စက် စွမ်းအားများသည် သူတို့၏ ခေါင်းပေါ်တွင် ဧရာမ ရေခဲသလင်းကျောက် ဝဲကတော့ကြီးတစ်ခုအဖြစ် စုစည်းသွားခဲ့ပြီ ဖြစ်သည်။

“ရေခဲဥက္ကာခဲ... ရိုက်ချခြင်း”

ပစ်ခတ်မှု သုံးလှိုင်း။

အချင်းဝက် မီတာငါးမီတာထက် ကျော်လွန်သည့် မိုးပြာရောင် ရေခဲဥက္ကာခဲ ကိုးလုံးသည် အဖြူရောင်လမ်းကြောင်းများအဖြစ် ကောင်းကင်ယံကို ဖြတ်သန်းသွားပြီး သားရဲအုပ်စု အသိပ်သည်းဆုံး ဧရိယာများပေါ်သို့ တိကျစွာ ရိုက်ချလိုက်တော့သည်။

တစ်ခဏအတွင်း ကျယ်ပြန့်သွားသည့် အကြွင်းမဲ့ ဗလာနယ်ပယ်က မိစ္ဆာသားရဲ ရာဂဏန်းခန့်ကို ရေခဲရုပ်တုကြီးများအဖြစ် အေးခဲသွားစေခဲ့သည်။

၎င်းနောက်တွင် ရောက်ရှိလာသည့် ရိုက်ခတ်မှုများအောက်၌ မရေမတွက်နိုင်သော ရေခဲစင်လေးများအဖြစ် ပြိုကွဲသွားခဲ့သည်။

ဤကြောက်မက်ဖွယ် မြင်ကွင်းကြောင့် အဝေးမှ စောင့်ကြည့်နေကြသည့် အရပ်သားများပင် ဆွံ့အကုန်ကြရသည်။

အရိပ်များထဲတွင်၊ ယင်းဖုန်း၏ ပုံရိပ်သည် ပျက်စီးနေသော တံတိုင်းများကြား၌ ပေါ်လိုက်၊ ပျောက်လိုက် ဖြစ်နေသည်။

သူ၏ ရေခဲမျက်ဝန်းပြာများက အခြေအနေတစ်ခုလုံးကို တည်ငြိမ်စွာ စစ်ဆေးကြည့်ရှုနေပြီး ဝိညာဉ်ကွန်ရက်မှတစ်ဆင့် ကင်းလှည့်အမဲလိုက်တပ်ရင်းနှင့် နှင်းခဲအရိပ်လျှို့ဝှက်အစောင့်အရှောက်များကို ကွပ်ကဲနေသည်။

သာမန်ကင်းလှည့်အမဲလိုက်တပ်ရင်း စစ်သည်များသည် မိစ္ဆာသားရဲများ၏ ခြေဆစ်များနှင့် အရိုးများကို တမင်တကာ တိုက်ခိုက်ကြသဖြင့် အဆက်မပြတ် ဖရိုဖရဲဖြစ်မှုများကို ဖြစ်ပေါ်စေသည်။

နှင်းခဲအရိပ်လျှို့ဝှက်အစောင့်အရှောက်ကိုးဦးမှာမူ တစ္ဆေများအလား ဖြစ်နေကြပြီး အရိပ်လှည့်ပတ်ခြင်းတစ်ကြိမ်စီတိုင်းက မိစ္ဆာကွပ်ကဲသူတစ်ကောင်၏ အသက်ကို တိကျစွာ ဆွဲယူနေသည်။

သို့သော်လည်း တိုက်ပွဲမှာ ပြင်းထန်စွာ ဖြစ်ပွားနေချိန်မှာပင်…

ရေဆိုးသန့်စင်စက်ရုံရှိ ရေခဲသလင်းကျောက် ပလ္လင်တော်ထက်၌ ထိုင်နေသည့် လင်းထျန်းလုံသည် မျက်လုံးများကို ဖြည်းညင်းစွာ ဖွင့်လိုက်သည်။

သူ၏ ငွေပြာဧကရာဇ်မျက်ဝန်းမှတစ်ဆင့် မိစ္ဆာဘုရင် သုံးပါး၏ အတွင်းပိုင်း တိုက်ခိုက်မှုများနှင့် လူသားကာကွယ်ရေးမျဉ်းပေါ်ရှိ စစ်သည်များ၏ မျက်နှာပေါ်တွင် မျှော်လင့်ချက်များ အပါအဝင် စစ်မြေပြင်၏ အသေးစိတ်အချက်တိုင်းကို သူ မြင်တွေ့နေရသည်။

“ဆယ်မိနစ် ပြည့်ပြီ”

နက်ရှိုင်းသော အတွေးတစ်ခု ဝိညာဉ်ကွန်ရက်မှတစ်ဆင့် စစ်မြေပြင်တစ်ခုလုံးသို့ ဖြည်းညင်းစွာ ပျံ့နှံ့သွားတော့သည်။

“နောက်ဆုတ်ရမယ့် အချိန်ပဲ”

ဤအမိန့်သည် ဝံပုလွေအသိုက် စစ်သည်အားလုံး၏ လှုပ်ရှားမှု ပုံစံများကို တစ်ခဏအတွင်း ပြောင်းလဲသွားစေခဲ့သည်။

မိစ္ဆာအုပ်စုကြားတွင် တိုက်ခိုက်နေဆဲဖြစ်သည့် ထျန်းပင်းသည် သူ့ရှေ့က မိစ္ဆာသားရဲ၏ လည်ပင်းကို ရုတ်တရက် ဆုတ်ဖြဲပစ်လိုက်ရာ သူ၏ ရွှေအိုရောင် အမွေးအမျှင်များပေါ်တွင် လျှပ်စီးကြောင်းများ စီးဆင်းနေသည်။

သူ ကောင်းကင်သို့ မော့ကာ ကျယ်လောင်စွာ ဟိန်းဟောက်လိုက်မိရာ အသံက စစ်မြေပြင်တစ်ခုလုံးသို့ မိုးခြိမ်းသံကြီးတစ်ခုအလား ပဲ့တင်ထပ်သွားသည်။

“လူသားတွေ… အချိန်ပြည့်ပြီ…ကျန်တာတွေကို မင်းတို့ဘာသာ ရှင်းကြတော့…”

ဤဟိန်းဟောက်သံကြီးက ရေခဲရေဖြင့် လောင်းချလိုက်သကဲ့သို့ ဖြစ်သွားခဲ့သဖြင့် လူသား ကာကွယ်သူအားလုံး ဆွံ့အသွားကြရရှာသည်။

ဝံပုလွေအသိုက်နှင့်အတူ ပူးပေါင်း တန်ပြန်တိုက်ခိုက်ရန် ပြင်ဆင်နေခဲ့သည့် လေ့ဟောက်သည် သူ၏ လက်သီးများကို ရုတ်တရက် တင်းကြပ်စွာ ဆုပ်ထားမိရာ အင်အားကြောင့် လက်ဆစ်များ ဖြူရော်နေသည်။

သူသည် မည်သူမျှ မယှဉ်နိုင်ကြသည့် ငွေဖြူရောင်ဝံပုလွေကြီးများ ရုတ်တရက် ဆုတ်ခွာသွားသည်ကို စိုက်ကြည့်နေမိသည်။

“ခဏစောင့်ပါဦး…မင်းတို့ ထွက်သွားလို့ မရဘူးလေ”

အဖွဲ့ခေါင်းဆောင် ကောင်လေးငယ် ကျင့်ကြံသူတစ်ဦးက စိတ်လှုပ်ရှားစွာဖြင့် မအောင့်နိုင်ဘဲ အော်ဟစ်လိုက်မိသည်။

“ငါတို့ နောက်ထပ် ခဏလောက်ပဲ တောင့်ထားနိုင်ရင် သေချာပေါက်...”

သို့သော် သူ၏ အသံမှာ မိစ္ဆာသားရဲများ၏ ဟိန်းဟောက်သံများကြားတွင် နစ်မြုပ်သွားခဲ့ရပြီ ဖြစ်သည်။

ဝံပုလွေအသိုက်၏ တပ်ဖွဲ့များသည် မူဟန်မပျက် နောက်ဆုတ်သွားကြသည်မှာ ယခုလေးတင် ဖြစ်ပွားခဲ့သည့် သွေးစွန်းသော တိုက်ပွဲကြီးမှာ လေ့ကျင့်မှုတစ်ခု သက်သက်သာ ဖြစ်ခဲ့ဖူးသကဲ့သို့ပင်။

ဤအခိုက်အတန့်တွင် လူသား ကာကွယ်သူအားလုံး၏ စိတ်ဓာတ်များ လုံးဝအောက်ဆုံးသို့ ကျဆင်းသွားခဲ့ရပြီ ဖြစ်သည်။